Habakuuki
3 Nivekelo na wiikhupanyerya na profeta Habakuuki:
2 Yehova, kihiiwa itthu sinoohimyani nyuwo.
Yehova, kootikinihiwa ni miteko sanyu.
Iyaakha sinceene,* munnitthikela ovara miteko simosa-ru!
Iyaakha sinceene, munnisuweliha miteko iyo.
Muhiliyale omoriwa ikharari okathi munrowa anyu okumiherya maxakha.+
Ovuwa wawe waahikhuneela erimu,+
Ottottopeliwa wawe waahisareya valaponi.
4 Waarya wawe waalikana ni muthuko.+
Mmatatani mwawe mwaanikhuma overunya waatutha,
Memmo mwaari aya ikuru sawe.
5 Ohoolo wawe yaahikhala ekwerere,+
Nave efeepere yooviha yaanitthara mavalo awe.
6 Owo aaheemela ni ahiiriha elapo othukumela.+
Oweha-ru, ahiiriha maloko othukumela.+
Miyaako sinikhala okathi wootheene saahipwexakasiwa,
Nave mattumuxa a khalai yaahikhutupuwa.+
Iphiro sa khalai ti saawawe.
7 Kaahoona maxakha itenta sa oKuuxi.
Ipaanu sa itenta sa muttetthe wa oMidiyani saahithukumela.+
8 Yehova, niireke moonanariwa ni miro?
Niireke moonanariwa vanceene ni miro?
Niireke mooviruwa mwaha wa ephareya?+
9 Muura anyu wootapuruxiwa ni woolokiheriwa.
Ikaruma sanyu sa ekhotto* soothanliwa omaniwaka natiri. (Selahi)
Nyuwo mookawanya elapo ni miro.
10 Miyaako sihoona owereya nuumala woowehani.+
Yoorupa epula yinceene.
Maasi oowiixa aanyakula vanceene.+
Aateexerya matata aya osulu.
11 Nsuwa ni mweeri niheemela osulu onikhala aya.+
Mattheere anyu aarowa ntoko waarya.+
Nivaka nanyu ninnaarya ntoko overunya.
12 Nyuwo moovira valaponi nvirunwe ene.
Moonyakela* maloko munanariwe ene.
13 Nyuwo moorowa owoopola atthu anyu, wiira mmoopole ole omuthanlale anyu.
Moomunyakatta muhooleli a etthoko ya atakhali.
Owo ohooniheriwa okhuma vaalisenso mpakha osulu. (Selahi)
14 Moohoma miru sa anakhotto awe murumeelaka ikaruma sawe,
Okathi yaakirweela aya ntoko munamukhaya wiira akoomole.
Awo yaanitteeliwa murima alipelelaka ompwetexa voohisuweliwa mulipa-oohaawa.
15 Moovira mphareya ni ikhavalo sanyu,
Moolapuwa maasi manceene.
16 Kaahiiwa, nave mmirimani mwaahikithukumela,
Iyano saka saahithukumela mwaha wa oruma waya.
Eyuutte yaahikela mmakhuvani mwaka,+
Metto saka saahithukumela.
Masi kinnilipelela moomaaleleya nihiku na maxakha,+
Okhala wiira nihiku nno nnimwaarwela ale annituphela.
17 Hata miri sa ifiiku sihiimaka ithutu,
Nave miri sa ewuuva sihiimaka mihokorokho,
Hata sihiruweriwaka mihokorokho sa olivera,
Nave hata imatta sihiimaka soolya,
Hata ipwittipwitthi simala-malaka munsisini,*
Hata sihikhalaka inama opuro onisukiwa inama,
18 Masi, miyo kinoohakalala mwaha wa Yehova,
Kinootteeliwa murima mwaha wa Muluku aka onikoopola.+
19 Pwiya Muulupalexa Yehova tori ikuru saka.+
Owo onimwiiriha metto saka okhala ntoko sa naahe,
Nave onookiiriha onyakela mapuro oorakamela osulu.+
Para tiretoore a isipo. Nihaana otthariwaka ni ikaruma saka sa isipo sirina mikhoyi.