Atesaloonika Oopacerya
4 Axinnaka, nyuwo munnikhala ntoko Muluku oniphavela awe,+ siisaale niwiixuttihalyaahuni. Masi vano, mwa nsina na Pwiya Yesu, ninnootumereryani ni woovekelani wiira mutepeke opaka eyo. 2 Tthiri nyuwo munnisuwela malakiheryo noovahalyaahuni, yaawo anikhuma* wa Pwiya Yesu.
3 Muluku oniphavela wiira mukhaleke oowaarya+ ni mukhootteke orupihana woohiloka.*+ 4 Khula mmosa a nyuwo, ohaana osuwela weettiha erutthu* awe,+ wiira ekhaleke yoowaarya+ ni yoottittimiheya. 5 Muhaatakiheke atthu a mulaponi, yaawo ahinimusuwela Muluku+ ni aniphavela orupihana voohiihiiha ni voohiphiyeriwa.+ 6 Mwaha ola, ohikhale mutthu onrowa omwiirela etthu yootakhala nnakhala omuttottela muraarelo munnawe, okhala wiira Yehova onimwaahukhumu ootheene ale anipaka itthu iya, ntoko noohimenryaahuni ni nooloponlyaahuni oratteene. 7 Muluku khoniihanenle makhalelo oonanara, masi oniihanenle okhala oowaarya.+ 8 Ole onikhootta mwiixuttiho ola, khonimukhootta pinaatamu, masi onimukhootta Muluku,+ yoowo onoovahani ikuru sawe soowaarya.+
9 Nilavulaka sa ophentana ntoko axinna,+ nyuwo khamumpirisari wiira hiyo noolepeleni etthu, okhala wiira muhiixuttihiwa ni Muluku wiira mphentaneke mukina ni mukhwaawe.+ 10 Mweekeekhai, nyuwo munniwiirela siiso axinna ootheene a oMasedonia wootheene. Masi ninnootumereryani, nyuwo axinna, wiira mutepeke opaka eyo. 11 Mphaveleke okhala ni murettele,+ muthokoreryeke myaha sanyu paahi ni nvareke muteko+ ni matata anyu,+ ntoko niwiixuttihalyaahuni. 12 Siiso, munrowa weettaka oratteene vamaithoni va atthu+ ni khiivo etthu enrowa woothowakani.
13 Axinnaka, kiniphavela-tho wiira musuweleke etthu enrowa owiiraneela ale anrupa mookhwaani,+ wiira muhiriipiweke murima ntoko aniira aya ale ahirina nlipelelo.+ 14 Akhala wiira ninnaamini wiira Yesu ohookhwa ni oohihimuxiwa,+ weeso ninnaamini-tho wiira Muluku onimwaahihimuxa ale anrupa mookhwaani, omurumeelaka Yesu, wiira yakhale nuuwo.*+ 15 Etthu enooleelaahuni nirumeelaka nuulumo na Yehova, tiila: Hiyo ninrowa okhala akumi okathi Apwiya anitthika* aya, nnoohihimuxiwa wiira nrowe wiirimu. Masi, ale apacenrye okhwa tanrowa opacerya ohihimuxiwa, nuumala-vo, nihihimuxiweke hiyo. 16 Pwiya ahu onookhuruwa wiirimu. Owo onookhuwela ni nsu noorunya na nlaikha nuulupale,+ ovarenle ene nlope na Muluku. Nuumala-vo, awiixutti awe akhwiiye tanrowa opacerya ohihimuxiwa.+ 17 Nto, hiyo ninrowa ohala niri ene akumi, ninrowa okuxiwa vamosa naawo, niroihiwaka mmeekuni,+ wiira nakumane ni Apwiya osulu.+ Siiso, okathi wootheene ninrowa okhalaka ni Apwiya.+ 18 Tivonto, mulipihaneke ni moolumo ala.