Wahala a Nenli
34 Yosiya+ aarina iyaakha 8 okathi aakhanle awe mwene, nave aahilamulela iyaakha 31 oYerusalemu.+ 2 Owo aanipaka itthu sooloka vamaithoni va Yehova ni aanitthara iphiro sootheene sa muhavinre awe, Davidi. Nave khaahapuwenle moono woothiyana, nnakhala moono woolopwana.
3 Eyaakha ya neethanu neeraru ya olamulelo awe, nlelo ori ene mmiravo, aahipacerya omphavela Muluku a muhavinre awe, Davidi.+ Nave eyaakha ya namuloko ni piili, aahipacerya oreeriha oYuda ni oYerusalemu,+ okumihaka mapuro oorakamela osulu yaakokhoreliwa amuluku eethiru+ ni miri soowuuma saakokhoreliwa,* ilatarato soopatthiwa+ ni ilatarato sa eyuuma. 4 Ohiya-vo, yaahaapwexakasa altaari a muluku Bayaali ohoolo wawe, ni aahaapwexakasa altaari a nsenso* yaakhala vasulu vaya. Nave-tho aahiikitthasa miri soowuuma saakokhoreliwa,* ilatarato soopatthiwa ni ilatarato sa eyuuma. Aahikhaliha ntthupi itthu iyo, otathela mahiye a atthu yaale yaamakela ovaha mikuttho itthu iyo.+ 5 Nave owo aahipaha makhuva a anamukuttho vasulu va altaari awo.+ Siiso owo aahireeriha oYuda ni oYerusalemu.
6 Nave, ipooma sa oManase, sa wEfrayimi+ ni oSimeyoni, orowa mpakha oNefetali ni mapuro ootheene yahaakhaliwa yaarukurenrye ipooma iyo, 7 Yosiya aahaapwexakasa altaari ni aahiikittha miri soowuuma saakokhoreliwa,* ni ilatarato soopatthiwa,+ okhaliha ntthupi. Nave-tho aahaapwexakasa altaari ootheene a nsenso elapo yootheene ya wIsarayeli,+ nuumala-vo aahitthikela oYerusalemu.
8 Eyaakha ya namuloko ni thanu na tthaaru ya olamulelo awe, nuumala oreeriha elapo ele ni etemplo,* Yosiya aahimuruma Xafani+ mwaana a Azaliya, Maaseya xeefi a epooma, ni mulipa-oolepa Yowa mwaana a Yowazi wiira yalokiherye empa ya Yehova Muluku awe.+ 9 Awo yaahirowa okumana ni namukuttho muulupale Hilikiya, anvahererya musurukhu waaruuhiwe mpaani mwa Muluku, yoowo alevi yaarumeela ntoko makwarta, yaavahereriwe aya ni nloko na Manase, na Efrayimi ni atthu ootheene a wIsarayeli+ ni a oYuda, a oBeniyamini ni atthu yaakhala oYerusalemu. 10 Nto awo yaahaavahererya musurukhu owo ale yaathanleliwe ovara muteko empa ya Yehova. Vano ale yaavara muteko empa ya Yehova, yaahirumeela musurukhu owo wiira areerihe ni alokiherye empa eyo. 11 Musurukhu owo yaahivahereriwa mapeterero ni ale yaavara muteko ni matera, wiira yathume maluku oopwexiwa ni oolokiheriwa vamosa ni matera wiira apakeliwe malipiheryo ni iviika saarowa otekeliwa ipa, seiyo mamwene a oYuda yaahiyale aya sihononeyaka.+
12 Alopwana awo yaahivara muteko aya voororomeleya.+ Alevi yaihaniwa Yahathi ni Obadiya a nloko na amerari,+ ni Zakariya ni Mexulami a nloko na akehathi,+ yaahithanliwa wiira yaaweheryeke alopwana awo. Nto alevi ootheene yaawo yaasuwela wiipa isipo,+ 13 yaahithanliwa wiira yaaweheryeke anamuteko akina* ni yaanaaweherya atthu ootheene yaavara miteko soovirikana. Alevi akina yaari masekretaario, makhulupale ni makwarta.+
14 Okathi yaakuxa aya musurukhu waaruuhiwe empa ya Yehova,+ namukuttho Hilikiya, aahiphwanya eliivuru ya Nlamulo na Yehova,+ aavahereriwe awe Moise.+ 15 Nto Hilikiya aahimuleela sekretaario Xafani wiira: “Koophwanya eliivuru ya Nlamulo mpaani mwa Yehova”. Vano Hilikiya aahinvahererya eliivuru eyo Xafani. 16 Xafani aahimuroihela eliivuru eyo mwene onamuleela wiira: “Arumeyi anyu annivara muteko wootheene athanleliwe aya. 17 Awo aathukumanya musurukhu waari mpaani mwa Yehova, yaavahererya alopwana athanliwe ni ale anivara muteko owo”. 18 Nave-tho sekretaario Xafani aahimuleela mwene wiira: “Namukuttho Hilikiya ookivaha eliivuru ela”.+ Vano Xafani aahipacerya osoma eliivuru eyo ohoolo wa mwene.+
19 Nuumala mwene wiiwa moolumo a Nlamulo, aahikhera malaya awe.+ 20 Moottharelana, mwene aahimuruma Hilikiya, Ahikami+ mwaana a Xafani, Abidoni mwaana a Mika, sekretaario Xafani, ni Asaya murumeyi a mwene oriki: 21 “Murowe mwamukohe Yehova mwaha wa miyo, ni mwaha wa ale nlelo ahanle wIsarayeli ni oYuda moolumo ala ari eliivuru ela ephwanyiwe. Tthiri Yehova oonanariwa vanceene ni hiyo, okhala wiira amuhavinre ahu khiyaiwelenle moolumo a Yehova, nave khiyaapanke itthu sootheene silempwale muliivuruni-mu”.+
22 Siiso, Hilikiya vamosa ni ale yaarummwale ni mwene, yaahirowa wa profeta muthiyana aihaniwa Hulda.+ Owo aari mwaarawe Xalumi yoowo aaweherya ikuwo, mwaana a Tikwa, mwaana a Harasi. Profeta owo aakhala oYerusalemu, epooma esya.* Nto yaahirowa weiwo ovaanela ni yena.+ 23 Profeta owo muthiyana aahaaleela alopwana ale wiira: “Etthu onihimya awe Yehova, Muluku a Isarayeli, tiila: ‘Mwamuleele mulopwana oorummeni orwa wa miyo, wiira: 24 “Etthu onihimya awe Yehova, tiila: ‘Kinookumiherya ehasara opuro ola ni atthu ala.+ Nave kinoomaliherya moolumo ootheene ootakhaliha alempwale muliivuruni,+ yeeyo esommwale ohoolo wa mwene a oYuda. 25 Mwaha wa okinyanyala+ ni waavaha amuluku akina mukuttho woopakiwa, yoowo waatthuwa mwiixi, wiira akiveehe+ ni miteko saya sootheene, miyo kinoonanariwa vanceene ni opuro ola ntoko mooro ohiniweryaneya ottipihiwa’”.+ 26 Vano, mwamuleele mwene a oYuda, yoowo oorummeni omukohererya Yehova wiira: “Etthu onihimya awe Yehova, Muluku a Isarayeli, tiila: ‘Mwaha wa moolumo mwiiwale anyu,+ 27 nyuwo muhiiwelela ni muhiiyeviha ohoolo wa Muluku okathi mwaiwale anyu moolumo yaahimya opuro ola ni atthu anikhala opuro ola, nave muhiiyeviha ohoolo waka, nyuwo mookhera ikuwo sanyu ni muhinla ohoolo waka, nto miyo koowiiwani.+ Yehova tonihimya. 28 Tivo nyuwo munoorowa okhala vamosa ni amuhavinre anyu, nave munoorowa omumula ni murettele opuro onrowa anyu ovithiwa. Nave-tho, maitho anyu khanrowa woona ihasara sootheene sinrowa okhumelela opuro ola ni atthu anikhala opuro ola’”’”.+
Nuumala-vo, awo yaahirowa omuleela mwene ele yaakhuliwe aya. 29 Vano, mwene aahiwiihaniha makhulupale ootheene a oYuda ni a oYerusalemu.+ 30 Nuumala-vo, mwene aahirowa empa ya Yehova ni alopwana ootheene a oYuda, atthu ootheene yaakhala oYerusalemu, anamukuttho, alevi ni atthu ootheene, eyo piiyo, aalupale ni acikhaani. Owo aahisoma ohoolo waya moolumo ootheene a eliivuru ya nivarihano, yeeyo yaaphwanyiwe mpaani mwa Yehova.+ 31 Mwene aaheemela opuro awe, opaka nivarihano+ ohoolo wa Yehova, ohimyaka wiira aarowa omuttharaka Yehova, weettela sooruma sawe, soolopola sawe, ikano sawe ni murima awe wootheene ni okumi awe wootheene,+ omalelihaka moolumo a nivarihano nlo, yaawo yaalempwale muliivuruni-mmo.+ 32 Nave-tho owo aahiwiiriha atthu ootheene yaari oYerusalemu ni oBeniyamini weemererya nivarihano nlo. Nto atthu yaakhala oYerusalemu yaahitthara nivarihano na Muluku, Muluku a amuhavinre aya.+ 33 Moottharelana, Yosiya aahimala-maliha itthu sootheene soohiirya* ilapo sootheene sa aisarayeli,+ nave aahiwiiriha atthu ootheene a Isarayeli omurumeela Yehova, Muluku aya. Okathi wootheene wa okumi awe,* awo khiyaahiyale omutthara Yehova, Muluku a amuhavinre aya.