Isaalimu
Nsipo na otthukuleliwa wa empa. Nsipo na Davidi.
30 Khoo Yehova, miyo kinimoovuwihani, okhala wiira mookeemexa;
Nyuwo khimwaahiyale awanani aka atteeliwaka murima mwaha wa miyo.+
2 Khoo Yehova, Muluku aka, miyo kihookhuwelelani wiira mukikhaliherye, nto nyuwo mookipenuxa.+
4 Nyuwo atthu oororomeleya, mmwiipele isipo Yehova, mmuttottopelaka,+
Muxukhureleke nsina nawe noowaarya;+
5 Okhala wiira onanariwa wawe onikhala okathi vakhaani,+
Masi oreera wawe murima khonimala.+
Ohiyu, mutthu pooti oriipiwa murima. Masi voosiisu, owo onnikhuwela otteeliwe ene murima.+
6 Okathi kahaarina aka mixankiho, kaahihimya wiira:
“Khiivo etthu enrowa okixekexa”.*
7 Yehova, okathi mwaakireerela anyu murima, mwaahikilipiha ntoko mwaako.+
Masi okathi mwiipithinhe anyu owiitho wanyu, kaahoova vanceene.+
8 Miyo kaamakela owiihanani, nyuwo Yehova;+
Kaamakela woovekelani wiira mukireerele murima, nyuwo Yehova.
9 Mureerelo xeeni onikhumelela kakhwa vale, nave kakela mmahiye?*+
Niireke wiira ntthupi nnimoottottopelani?+ Niireke wiira nnoolaleya ororomeleya wanyu?+
10 Khoo Yehova, mukiiwe ni mukireerele murima.+
Xontte Yehova, mukikhaliheryeke.+
11 Nyuwo mookiiriha wiina kitteeliwe ene murima, ohiya oriipiwa murima;
Mookirula esaakho, mukiwariha otteeliwa murima;
12 Wiira koottottopelekeni ni isipo, ni kihimaaleke.
Yehova Muluku aka, miyo kinrowa woottottopelani mahiku ootheene.