Yoona
2 Ori ene mmirimani mwa ehopa, Yoona aahinvekela Yehova Muluku awe,+ 2 oriki:
“Moovelavelani mwaka, konvekela Yehova, nto owo ookaakhula.+
Miyo kaahala okhwa. Waalikana ni okhala opuro woowiixa wa Mahiye,* nto kaahivekela okhaliheriwa.+
Nyuwo mookiwiriyana.
3 Okathi mwaakirihenle anyu opuro woowiixa, eriyari ya ephareya,
Maasi yaahikimirya.+
Mawimpi oowerya yaawo mwaakumihenrye anyu, aavira vamuru vaka.+
4 Nave kaahihimya wiira: ‘Kihoomoliwa ohoolo wanyu!
Kinrowa owerya sai otthikela oweha etemplo anyu yoowaarya?’
5 Miyo kaahala okhwa okhala wiira maasi yaahikikhuneela;+
Maasi oowiixa yaahikirukurerya.
Namalele aahivitikelela muru aka.
6 Kaahisama mpakha vathi va miyaako.
Elapo yaahiwala mikhora ohoolo waka ni yaahikiiriha okhala epottha para mahiku ootheene.
Masi nyuwo Yehova Muluku aka, mookikumiha mulittini.+
7 Okathi kaahala aka okhwa, kaahiwuupuwelani nyuwo Yehova.+
Ovekela waka waahiphiya wa nyuwo, mutemplo mwanyu moowaarya.+
8 Ale anikokhorela ilatarato sihirina efaita, annimuhiya ole oniwooniherya ophenta woororomeleya.*
9 Masi miyo kinimoottottopelani, nave kinimoovahani mukuttho.
Natiri kimmanale aka, kinoomutaphula.+
Woopowa onikhuma wa Yehova”.+
10 Nuuvira okathi, Yehova aahiruma ehopa, nto eyo yaahimurapheya Yoona ota wa ephareya.