Yesaya
2 Khula mmosa a yaawo, onrowa okhalaka ntoko nipuro nootthyawela okathi wa epheyo,
Nipuro nootthyawela okathi wa epula yinceene,
Onrowa okhalaka ntoko maasi ari nipuro noowuuma,+
Nave, onrowa okhalaka ntoko muuttutthi wa mwala muulupale ori elapo yoowuuma.
3 Vano, maitho a atthu anoona khanrowa owaliwa,
Nave maaru a atthu aniiwa, anoowiriyanaka oratteene.
4 Atthu ookhummwa murima, animuupuwela saana etthu eniixutta aya,
Nave nlumi na atthu ookukuma, nnoolavulaka saana ni voowiiwanyeya.+
5 Mulolo, khonrowa-tho ohimmwaka okhala mutthu oovaha,
Nave mutthu oohiroromeleya, khonrowa ohimmwaka okhala mutthu oottittimiheya.
6 Mulolo onoolavulaka itthu sa elolo,
Nave vamurimani vawe, onimuupuwelaka itthu sootakhala,+
Wiira owiiriheke atthu onvirikanya Muluku, ni omootherya Yehova,
Wiira omwiirihe mutthu ovoliwe etala ohikhalana yoolya,
Nave omukhoottiherya maasi oowurya, mutthu ovoliwe ntthona.
7 Apalano a mutthu oohiroromeleya tootakhala,+
Owo onnaatumererya atthu akina otthara mweettelo woowuuliha muru,
Wiira omukumiherye maxakha mutthu oohaawa, ni moolumo awe oowootha,+
Hata okathi mutthu owo oohaawa onilavula awe ekeekhai.
8 Mutthu oovaha, onniphavela ovaha,
Nave onnithipelela ovaha.
9 “Nyuwo athiyana muhinicala etthu, mweemele mukiwiriyane!
Nyuwo anamwane axithiyana muhinixikha etthu,+ nvahe ephoole etthu enihimya aka!
10 Yavira eyaakha emosa ni mahiku vakhaani, nyuwo athiyana muhinixikha etthu munooxanka,
Okhala wiira hata omalaka okathi onuuruliwa ewuuva, nyuwo khamunrowa wuurula etthu.+
11 Nyuwo athiyana muhinicala etthu, muttettemeleke!
Nyuwo athiyana muhinixikha etthu, muxankeke!
Murule ikuwo,
Nware esaakho muyuununi mwanyu.+
12 Mmaneke vapeeto vanyu, mwiikhupanyeryaka,
Mwaha wa etthu eniiraneya ni imatta sooruwerya ni imatta sa ewuuva.
13 Elapo ya atthu aka, enoosareya miiwa ni ikhuukwa;
Iyo sinookhuneela ipa sootheene, seiyo atthu yaahakalala aya,
Aayo, epooma atthu yaahakalala aya.+
14 Empa yoorakamela osulu ni yoolipihiwa, enoonyanyaliwa;
Epooma yoonyakuliwa, enoothammwa.+
Ofeli+ ni nipuro na mulipa-oowehaweha, noothammwa,
Noothatuwa opuro anithweela aya apuuru,
Opuro onilya aya inama,+
15 Mpakha Muluku onivaha ikuru sawe,+
Nave othako okhala ematta yaaliwe miri,
Nave-tho, ematta eyo olikanaka ni etakhwa yoowunttelana.+
16 Vano, exariya enookhalaka moothakoni,
Nave exariya enookhalaka mmatta mwaaliwe miri.+
17 Exariya yeekeekhai, enookumiherya murettele,+
Nave exariya yeekeekhai enookumiherya omumula wa mahiku ootheene ni murettele ohinimala.+
18 Atthu aka anrowa okhalaka elapo ya murettele,
Ipa soolipa ni mapuro oomaaleleya, voohixankela etthu.+
19 Masi epula ya maralala, enoohonona etakhwa,
Nave epooma yootheene enoopwexakasiwa.
20 Oohakalala ti nyuwo munaala epyo mapuro ootheene ari maasi,
Ti nyuwo ipooyi sanyu soolopwana ni apuuru anyu ari mmatta”.+