Atesaloonika Oopacerya

1 Miyo Paulo, ni Silvano*+ ni Timootheyo,+ ninnoolepelani nyuwo a muloko wa oTesaloonika, mwiiranne ni Muluku Tiithi, vamosa ni Pwiya Yesu Kristu:

Oreera murima wuulupale wa Muluku ni murettele, okhale ni nyuwo.

2 Ninnimuxukhuru Muluku, niwuupuwelakani nyuwo, okathi wootheene ninvekela ahu,+ 3 okhala wiira ohoolo wa Muluku, Tiithi ihu, khaninkhala-khala niliyalaka muteko nvanre anyu ni waamini ni ophenta ni moota nvilenle anyu mixankiho, mwaha wa nlipelelo murina anyu+ wa Pwiya ahu Yesu Kristu. 4 Nyuwo axinnaka oophentiwa ni Muluku, hiyo noosuwela wiira owo ohoothanlani, 5 okhala wiira khinoolalenryeni ihapari sooreera ni moolumo paahi. Masi noolalenryeni nikhaliheriwaka ni ikuru soowaarya. Hiyo naanikupali wiira itthu noolalenryaahuni ti seekeekhai, nave ihapari sahu sihookhaliheryani vanceene. Nyuwo moosuwela mikhalelo noonihenrye ahu okathi naari ahu eriyari anyu, niirelaka mureerelo anyu. 6 Nave nyuwo moonitakiha+ ni moomutakiha Pwiya,+ okhala wiira muheemererya nuulumo na Muluku mutteeliwe ene murima, weiwo onikumiheriwa ni ikuru soowaarya, nnaamwi mwaahaawale vanceene.+ 7 Siiso, nyuwo muhaavaha ntakiheryo ootheene ale animutthara Yesu, yaawo ari oMasedonia ni wAkhaya.

8 Nyuwo khahiyo paahi mwaalalenrye atthu a oMasedonia ni a wAkhaya nuulumo na Yehova, masi-tho, moolaleya mapuro ootheene. Nave atthu a mapuro ootheene+ anniiwa omwaamini wanyu Muluku. Tivonto khanrina etthu yoohimya. 9 Tthiri, atthu annilavula, ahimyaka ekwaha yoopacerya naakumanne ahu ni nyuwo oTesaloonika ni moota mwaahiyale anyu waarumeela amuluku eethiru,+ wiira mukhale ipottha sa Muluku mukumi ni eekeekhai. 10 Nave munnimulipelela Mwaana a Muluku, yoowo onikhuma wiirimu+ ni ohihimuxiwe mookhwaani ni Muluku, eyo piiyo, Yesu. Owo onrowa onaakiherya oviruwa wa Muluku onirwa.+