Silempwale ni Yohani
13 Nihinatthi niira na Paasikha, Yesu aanisuwela wiira yaahiphiya ewoora awe ya okhuma+ olumwenku ola orowaka wa Tiithi.+ Okhala wiira aanaaphenta atthu awe yaari moolumwenkuni, owo khaahiyerenrye waaphenta mpakha wookiseryani.+ 2 Okathi yaalya aya, Diabo iira ohenle ene vamurimani va Yuda Isikariyoti,+ mwaana a Simoni, muupuwelo wa onvariha Yesu.+ 3 Vano, Yesu aanisuwela wiira Tiithi aahinvaha itthu sootheene mmatatani mwawe. Aanisuwela-tho wiira aakhuma wa Muluku ni aamutthikela wa Muluku.+ 4 Okathi owo Yesu aahivenya vameesa, orula malaya awe a ota. Nave aahikuxa etuwalya otthukwelela muyuununi mwawe.+ 5 Vano, aahiitthela maasi mpasiyani, onapacerya orapiha inawu sa awiixutti awe, ni onapuputtha ni etuwalya aatthukwelenle awe muyuununi mwawe. 6 Yaaphiyale aya ekwaha ya Simoni Pedru, owo aahimukoha Yesu wiira: “Pwiya, munrowa orapiha inawu saka?” 7 Yesu aahimwaakhula oriki: “Etthu kinivara aka, nyuwo khamunisuwela niinaano-va, munrowa osuwela ohoolo”. 8 Pedru aahimuhimeerya wiira: “Tthiri, miyo nkinoohiyani murapihaka inawu saka”. Yesu aahimuleela wiira: “Kaahirapihe-ru inawu sanyu,+ nyuwo khamuniwerya okhala ni miyo”. 9 Simoni Pedru aahimuhimeerya Yesu wiira: “Pwiya, weeso muhirapihe inawu saka paahi, nave-tho, murapihe matata aka ni muru aka”. 10 Yesu aahimuhimeerya wiira: “Ole orampe, erutthu awe yootheene ti yooreera, khonireerela-tho orapiha etthu ekina, sihikhanle inawu sawe paahi. Nave nyuwo mooreera, masi ohiya ootheene anyu”. 11 Tthiri Yesu aanimusuwela ole aarowa onvariha.+ Tivo aahimmye awe wiira: “Khahiyo wiira ootheene anyu mooreera”.
12 Siiso, vaamalihale awe orapiha inawu saya, Yesu aahiwara malaya awe a ota, khutthikela vameesa, onaakoha oriki: “Nyuwo munnisuwela etthu ewiirenlyaakani? 13 Nyuwo munnikihimya okhala ‘Mwiixuttihi’ ni ‘Pwiya’, nto enihimya anyu ekeekhai. Tthiri miyo ka Mwiixuttihi ni Pwiya.+ 14 Tivonto, akhala wiira miyo, kiri Pwiya ni Mwiixuttihi, koorapiha inawu sanyu,+ nyuwo-tho muhaana* orapihanaka inawu.+ 15 Tthiri miyo kihoovahani nthoonyeryo, wiira nyuwo-tho mwiireke siisaale kiwiirenlyaakani.+ 16 Tthiri, kinooleelani ekeekhai wiira, namuteko khahiyo muulupale onvikana patarau awe, aahiiso mutthu orummwale khahiyo muulupale onvikana ole omurumme. 17 Vano nyuwo moosuwela itthu iya, masi munrowa ohakalala vakhala wiira munimweettela.+ 18 Miyo nkinoohimyani ootheene anyu, maana kinnaasuwela ale kaathanlale aka. Vano eyo ehiiraneya wiira emaliheriwe yoolempwa enihimya wiira:+ ‘Ole aalya ni miyo, ookirukunuwela’.+ 19 Kinooleelani wiira etthu ela enimwiiraneya, nto okathi munrowa anyu woona ekiiraneelaka, munoosuwela wiira yoolepa eyo yaakihimya yoomi.+ 20 Tthiri, kinooleelani ekeekhai wiira, ole onimwaakhela mutthu kimurumme aka, onikaakhela-tho miyo.+ Nave ole onikaakhela miyo, onimwaakhela-tho Ole okirumme”.+
21 Nuumala ohimya itthu iya, Yesu aahixanka vanceene ni aahihimya wiira: “Tthiri, kinooleelani ekeekhai wiira, mmosa a nyuwo onookivariha”.+ 22 Awiixutti yaahipacerya owehana, ahimusuwelaka ti pani Yesu aamuhimya awe.+ 23 Mwiixutti mmosa, yoowo Yesu amphenta awe,+ aari vameesa omwaattamenle ene Yesu. 24 Vano, Simoni Pedru aahinvaha esinaale ni muru mwiixutti owo, oriki: “Ti pani onimuhimya awe?” 25 Mwiixutti owo aahimwaattamela Yesu, onamukoha wiira: “Pwiya, ti pani owo?”+ 26 Yesu aahaakhula oriki: “Ti yoole onrowa aka onvaha epetaaso ya ephaawu kinrowa aka orerya mutixelani”.*+ Nto, nuumala orerya ephaawu eyo, aahikuxa, onvaha Yuda, mwaana a Simoni Isikariyoti. 27 Nuumala Yuda waakhela epetaaso eyo ya ephaawu, Satana aahimukela.+ Siiso, Yesu aahimuhimeerya wiira: “Etthu enrowa anyu opaka, mpake voowaakuveya”. 28 Masi, atthu ale yaari vameesa, khiyaasuwenle xeeni Yesu aamwiirenle awe siiso. 29 Okhala wiira Yuda taakhapelela musurukhu waarumeeliwa+ ni awiixutti, akina yuupuwela wiira Yesu aamurumme othuma itthu saarowa orumeeliwa okathi wa niira, aahiiso aahaana waavaha etthu alipa-oohaawa. 30 Nto nuumala Yuda waakhela epetaaso ya ephaawu, aahikhumela ota voowaakuveya. Okathi ole waari ohiyu.+
31 Siiso, nuumala Yuda okhumela ota, Yesu aahihimya wiira: “Vano Mwaana a Mutthu onoovuwihiwa,+ nave-tho Muluku onoovuwihiwa mwaha wa Mwaana owo. 32 Muluku mwaneene ononvuwiha Mwaana a mutthu,+ nave onoopaka eyo voohipisa. 33 Anaaka oophentiwa, miyo kinookhala ni nyuwo okathi vakhaani. Nyuwo munookaavya. Vano kinoohimeeryani nyuwo-tho, etthu yeele kaahimenrye aka ayuda, kiiraka: ‘Opuro kinrowa aka, nyuwo khamunwerya ophiya’.+ 34 Miyo kinnoovahani yooruma ela esya:* Mphentaneke mukina ni mukhwaawe. Siisaale koophentalyaakani+ ni nyuwo-tho mphentaneke mukina ni mukhwaawe.+ 35 Atthu ootheene anoosuwela wiira mwa awiixutti aka, mwaaphentanaka mukina ni mukhwaawe”.+
36 Simoni Pedru aahimukoha Yesu oriki: “Pwiya, munrowa vai?” Nto Yesu aahimwaakhula wiira: “Opuro onrowa aka, nyuwo khamunwerya okitthara niinaano-va, masi munookitthara ohoolo”.+ 37 Pedru aahimuhimeerya wiira: “Pwiya, xeeni kihinwerya aka woottharani niinaano-va? Miyo koolikanana wookhwelani”.+ 38 Yesu aahimwaakhula oriki: “Kiireke tthiri moolikanana okikhwela? Tthiri, kinooleelani ekeekhai wiira, muthupi ohinatthi wiipa, nyuwo munookikhootta ikwaha tthaaru”.+