Miteko sa Arummwa
12 Okathi ole, mwene Herodi aahipacerya waahaaxa atthu akina a mmulokoni.+ 2 Owo aahaaruma atoropa awe okuxa espaata*+ wiira amwiive Yakobo, munnawe Yohani.+ 3 Voonale awe wiira eyo yaahaasivela ayuda, aahaaruma-tho atoropa awe onvara Pedru. (Eyo yiiraneyale mahiku a Iphaawu Soohiheliwa Eferemento.)+ 4 Nto, atoropa awo, yaahinvara Pedru, amurihela mukhatteya.+ Vano ikurupu xexe sa atoropa, saaniranttelana, sinwehawehaka Pedru. Khula ekurupu, yaarina atoropa axexe. Herodi aaphavela omphukela ohoolo wa atthu, nuuvira Paasikha. 5 Pedru otthukweliwe ene mukhatteya, muloko waaninvekelela voohihiyererya.+
6 Ohiyu, wiiriwaka wiira mmeeloni mwaya Herodi aarowa omphukela Pedru, Pedru owo, iira orupaka, otthukiwe ene matata awe ni ikwirinti piili, eriyari ya atoropa anli. Nave, yaahikhala makwarta yaawehaweha mukhora wa ekhatteya. 7 Niinaano-ru, naahikhumelela nlaikha na Yehova,* vano opuro Pedru aatthukweliwe awe+ waahisareya waarya. Nlaikha naahimukwata mpararini, nnanvenxa, niiraka: “Nvenye, mwaakuveke!” Okathi ene yoowo, ikwirinti saatthukwaniwe awe matata awe, saahimora.+ 8 Nlaikha naahimuhimeerya wiira: “Nware ikuwo sanyu ni isantaalya sanyu”. Pedru aahiira siiso. Nuumala-vo, nlaikha naahimuleela-tho wiira: “Nware nlaya nanyu na ota, mukitthareke”. 9 Pedru aahikhuma mukhatteya, onatthara nlaikha nne. Masi owo khaasuwela wiira itthu iye saapaka aya nlaikha nne saari seekeekhai. Owo oona wiira aamuloha. 10 Nlaikha nle ni Pedru, yaahivira opuro aakhala awe kwarta oopacerya ni a nenli. Okathi yaaphiyale aya mukhora wa eyuuma, yoowo waaroiha opooma, mukhora owo waahihuleya mekhaya-ru. Vaakhumenle aya ota, awo yaahitthara ephiro. Niinaano-ru, nlaikha naahimuhiya Pedru. 11 Vano Pedru, aahisuwela etthu yiiraneya, onahimya wiira: “Veekeekhai koosuwela wiira Yehova* ooruma nlaikha nawe, ni ookoopola mmatatani mwa Herodi ni itthu sootheene sootakhala ayuda yuupuwela aya wiira saamukiiraneela”.+
12 Nuumala Pedru osuwela eyo, aahirowa owannyawe Maria, maama awe Yohani, yoowo-tho iireliwa Marko.+ Weiwo, yaahithukumana awiixutti anceene, anavekela. 13 Okathi Pedru aamanne awe mukhora, murumeyi muthiyana, yoowo aihaniwa Roda, aahirowa onweha ole aamana mukhora. 14 Murumeyi owo vaasuwenle awe wiira naari nsu na Pedru, aahitteeliwa murima vanceene. Nto ohiya ohula mukhora, aahitthimakela mpaani onahimya wiira Pedru eemenle vamukhora. 15 Awo yaahimuhimeerya wiira: “Nyuwo muroovahuwa”. Masi murumeyi ole, aanithipelela ohimyaka wiira Pedru aahirwa tthiri. Vano awo, yaahihimya wiira: “Ti nlaikha nawe”. 16 Masi Pedru iira nlelo omanaka mukhora. Okathi yaahunle aya khimoona Pedru, yaahitikinihiwa vanceene. 17 Pedru aahaavaha esinaale ni ntata wiira amaale, ni aahaatthokiherya saana moota aakumihiwe awe mukhatteya ni Yehova.* Nave-tho, aahihimya wiira: “Mwamuleele Yakobo+ ni axinna akina itthu iya”. Nto, Pedru aahivenya, onarowa opuro mukina.
18 Nuumala oxa, atoropa yaahixanka mwaha woohisuwela etthu yaamukhumelenle Pedru. 19 Herodi aahimwaavya oratteene, khuhimphwanya. Nto, owo aahaakoha-koha makwarta ni aahiruma ohukhummwa.+ Siiso, Herodi aahikhuma oYudeya, onarowa okhala mahiku vakhaani oKesareya.
20 Vano Herodi aahinanariwa vanceene* ni atthu a oTiiro ni a oSiidoni. Atthu a ilapo iyo, yaanithuma yoolya mittetthe saalamuleliwa ni Herodi. Tivo yaahiiwanana, amuxonttela Blasto, yoowo aaweherya etthoko ya mwene Herodi, wiira aakhaliherye. Siiso, yaahilavulana mwene, aphavelaka murettele. 21 Nihiku nimosa atthu yaathukumanne aya, Herodi aahiwara ikuwo sa omwene ni aahikilaathi opuro waaphukiwa milattu, onapacerya olavula mwaha ohoolo wa atthu. 22 Vano atthu awo yaathukumanne, yaahikhuwela, yiiraka: “Ola olavunle muluku, khahiyo pinaatamu!” 23 Okathi ene yoole, nlaikha na Yehova* naahimukumiherya eretta Herodi, okhala wiira khanvuwinhe Muluku. Herodi owo, aahikhuuriwa ni miyunku ni aahikhwa.
24 Vano nuulumo na Yehova* naanitepa omwara-mwareya,+ nave atthu anceene yaanaamini.
25 Baarnaba+ ni Saulo, vaamalihale aya muteko woowaakhaliherya anna oYerusalemu,+ yaahitthikela wAntiyokiya amukunxe ene Yohani,+ yoowo-tho aihaniwa Marko.