Yesaya
33 Mootakhaliwa nyuwo munipwetexa, masi nlelo muhipwetexiwe!+
Mootakhaliwa nyuwo muniwoka, masi nlelo muhiwokiwe!
Mwamaliha opwetexa, nyuwo munrowa opwetexiwa.+
Mwamaliha owoka, nyuwo munrowa owokiwa.
2 Khoo Yehova, munireerele murima.+
Hiyo nnoororomelani nyuwo,
Khula voosiisu, mukhaleke ikuru sahu,+
Aayo, munoopoleke okathi ninxanka ahu.+
3 Atthu annitthyawa yaiwaka okukutteya wanyu.
Okathi muneemela anyu, maloko annimwara-mwareya.+
4 Ntoko siisaale isoope sinikhuura aya itthu sootheene siniphwanya aya, siiso-tho, mireerelo sanyu sootheene sinookuxiwa;
Atthu anoowanela seiyo ntoko isoope siniira aya.
5 Yehova onoovuwihiwa,
Okhala wiira owo onikhala nipuro noorakamelexa osulu.
Onoosariha exariya oSiyoni.
6 Ti yoowo oniwiirihani okhala muhoovaka etthu;
Ti yoowo oniwoopolani vanceene,+ onoovahani ankhili, osuwela ni oniwiirihani omoova Yehova.+
Ola muhakhu muulupale.*
7 Mwiiwe! Alopwana aya oolipa murima, anninla mustaraatani;
Anamitthaka a murettele anninla vanceene.
8 Istaraata khasiniviriwa;
Khuuvo mutthu onivira mphironi.
9 Elapo enninla* ni ehuuma.
OLiibano ohuuliwa muru;+ woohononeya.
OSaroni ori ntoko othako,
Nave oBaxani ni oKarmelo, makukhu aya aamora.+
11 Nyuwo moorupala malaxi oowuuma, nave munrowa oyara malaxi yaawo oowuuma.
Muupuwelo anyu wootakhala, onimoopahani ntoko mooro.+
12 Atthu anrowa okhala ntoko ettuurwa ya ekaali yoopahiwa.
Anoopahiwa vaikho ntoko miiwa soowiikitthiwa.+
13 Nyuwo munikhala ottaiwene, mwiiwe etthu kinrowa aka opaka!
Nyuwo munikhala vakhiviru, musuwele owerya waka!
14 Anatampi ari oSiyoni annoova vanceene;+
Anamavirikanya annittettemela, anakoha yiiraka:
‘Tani a hiyo oniwerya okhala opuro ori mooro muulupale?+
Tani a hiyo oniwerya okhala eriyari ya mooro ohinittipiheya?’
15 Ole oneettela exariya okathi wootheene,+
Ni onilavula ekeekhai,+
Ni onikhootta ophwanya muhakhu aawokaka atthu akina,
Yoowo onikhootta okunyariwa,+
Onikhootta waawiriyana apalano anipakiwa para wiiviwa mutthu,
Ni oniwala maitho awe wiira ohiwehe itthu sootakhala,
16 Owo onrowa okhalaka miyaako soorakamela musulu;
Onrowa otthyawelaka ixiri soolipa sa maluku,
Onookhalanaka eyoolya okathi wootheene,
Nave maasi khanrowa ommalelaka”.+
17 Munonweha mwene oovuwa ni maitho anyu;
Nyuwo munooweha elapo ya ottaiwene.
18 Vamurimani vanyu, munimuupuwelelaka etthu yoowoopiha, mwiikoheke wiira:
“Mulipa-oolepa ori vai?
Ori vai ole aaliva mpoosito?+
Ori vai ole aakontari ipa soorakamela musulu?”
19 Nyuwo khamunrowa-tho owoona atthu ootakhala,
Yaawo anilavula nttaava nihiniiwanyeya,
Atthu yaawo yaalavulaka anikhala wiira anookukuma, vahinaiwanyeya etthu.+
20 Moone oSiyoni, epooma yeeyo nimpaka ahu ifesta sahu!+
Maitho anyu anooweha wiira muttetthe wa oYerusalemu ti woomaaleleya para okhala,
Iyeemexeryo sa etenta eyo khasinrowa opheliwa,
Nnakhala mikhoyi saya khasinrowa okwasiwa.
21 Masi mmuttettheni-mmo, Yehova oovuwa,
Onrowa onikhapelela ntoko miro saamukhaani ni miro suulupale.
Apakiti a ikhotto, nnakhala apakiti aalupale,
Khanrowa oviraka miro iyo.
22 Yehova ti Mulipa Oniphuka Milattu sahu,+
Yehova ti Mulipa Onikumiherya Malamulo ahu,+
Yehova ti Mwene ahu;+
Owo tonrowa onoopola.+
23 Mikhoyi sa awanani sinooreseya;
Iyo khasinrowa-tho ovarelela nipotto na ekalawa, nnakhala otapuruxa ntthanka naya.*
Okathi owo, sinookhala mihakhu sinceene sinrowa okawaniwa;
Hata atthu oorakala, anootuphela mireerelo sinceene sa axineene.+
24 Nave, khuuvo mutthu onrowa okhalaka mulaponi, onrowa ohimyaka wiira: “Miyo kinoowereiwa”.+
Atthu anrowa okhalaka mulaponi, anooleveleliwa itampi saya.+