Samuweli Oopacerya
20 Davidi aahitthyawa oNayothi, oRama, onarowa okumana ni Yonathani, onamukoha wiira: “Miyo kiiraleni?+ Etthu xeeni yootakhala kiirale aka? Kaatthekenleni apapinyu aniphavela aya okiiva?” 2 Yonathani aahimwaakhula Davidi oriki: “Eyo kheniiraneya nnakhala vakhaani!+ Nyuwo khamunrowa okhwa. Khiivo etthu apaapa anipaka aya, ekhale yuulupale aahiiso yaamukhaani, ahinatthi okileela. Xeeni apaapa ahikileelaka etthu ela? Eyo khenrowa wiiraneya”. 3 Masi Davidi aahilapha ohimyaka wiira: “Mweekeekhai paapa anyu oosuwela wiira nyuwo munnikiphenta,+ tivo ohuupuwela wiira: ‘Yonathani ohisuwele etthu ela, wiira ohiriipiwe murima’. Tthiri siisaale Yehova onikhala awe, ni nyuwo munikhala anyu, miyo nkirakamenle wookhwaani!”+
4 Moottharelana Yonathani aahimuhimeerya Davidi wiira: “Kinoovara itthu sootheene munrowa anyu okileela”. 5 Davidi aahimuhimeerya Yonathani wiira: “Meelo nihiku na efesta ya otthapela mweeri musya.+ Voohaanyiherya, mwene onnilipelela wiira kinrowa olya vamosa nuuwo. Nto nyuwo mukihiye kirowe kaipithe omatta mpakha murotto makaaripi. 6 Paapa anyu akiphavela vale, mmuhimeerye wiira: ‘Davidi orookixonttela wiira kimweemererye orowe moowaakuveya epooma awe oBetelehemu,+ wiira avahe mukuttho wa vamwaakhani ni amusi awe ootheene’.+ 7 Awaakhulani wiira: ‘Vaareera’, weeso murumeyi anyu onookhalana murettele. Masi ananariwa, musuweleke wiira mweekeekhai oniphavela okiiriha etthu yootakhala. 8 Mmooniherye ophenta woororomeleya murumeyi anyu,+ okhala wiira moopaka nivarihano ni murumeyi anyu, ohoolo wa Yehova.+ Masi kaarina ene mulattu mwaha wa etthu epanke aka,+ mukiiveke mmansinyu. Xeeni mwaakhanle anyu ookivahererya wa paapa anyu?”
9 Siiso Yonathani aahihimya wiira: “Muhilavuleke itthu iyo! Kiireke kasuwela wiira paapa aka omphavela owiirihani etthu yootakhala, nkinooleelani?”+ 10 Moottharelana Davidi aahimuhimeerya Yonathani wiira: “Ti pani onrowa okileela paapa anyu aahiwaakhuleni saana?” 11 Yonathani aahimuleela Davidi wiira: “Nrowe omatta”. Nto oowanli aya yaahirowa omatta. 12 Yonathani aahimuhimeerya Davidi wiira: “Yehova, Muluku a Isarayeli, okhale namoona wiira meelo aahiiso murotto ewoora ene yeela, kinrowa ophavelaka osuwela ele apaapa anuupuwela aya. Vakhala wiira anoophavelaka owiirelani* itthu sooreera, kinimooleelani. 13 Masi vakhala wiira apaapa aniphavela owiirelani etthu yootakhala, Yehova okihukhumu* kaahooleeleni, ni kaahoohiyeni murowaka ni murettele. Yehova okhale ni nyuwo,+ siisaale aari awe ni paapa aka.+ 14 Niireke munookooniherya ophenta woororomeleya wa Yehova nlelo kiri ene mukumi, hata nuumala okhwa?+ 15 Muhihiye owooniherya ophenta woororomeleya atthu a etthoko aka,+ hata nuumala Yehova waamala-maliha awanani anyu* ootheene valaponi”. 16 Nto, Yonathani aahipaka nivarihano ni atthu a etthoko ya Davidi, aahimeeryaka wiira: “Yehova onimwaakumiherya mulattu awanani a Davidi”. 17 Yonathani aahimwiiriha Davidi olapha mwaha wa omphenta wawe, okhala wiira Yonathani aanimphenta ntoko aiphenta awe.+
18 Yonathani aahimuhimeerya wiira; “Meelo nihiku na efesta ya otthapela mweeri musya.+ Paapa aka onimoophavelani, maana khuuvo onrowa okilaathi opuro anyu. 19 Murotto, paapa aka onimookohereryani. Vano murowe opuro mwaipinthe anyu nihiku nikina, mwakhale waattamela nluku nri vaavo. 20 Kinoovonyerya mpantta mmosa wa nluku nlo mattheere mararu, okhalaka ntoko kimphavela ohoma etthu. 21 Kamuruma murumeyi aka, kinoomuhimeerya wiira: ‘Murowe mwattotte mattheere’. Nto kamuhimeerya wiira: ‘Mattheere awo ari mpantta mukina, mwattotte’, weeso nyuwo muhaana otthika, okhala wiira ntoko siisaale Yehova onikhala awe, eyo enitaphulela wiira nyuwo munookhala ni murettele, ni khiivo etthu yootakhala enrowa wookhumelelani. 22 Masi kamuhimeerya murumeyi aka wiira: ‘Mattheere awo ari ohoolo wanyu’, nto muroweke, okhala wiira Yehova oniphavela wiira murowe ottaiwene. 23 Okhala wiira noopaka nivarihano,+ Yehova okhale namoona ahu mahiku ootheene”.+
24 Vano Davidi aahiipitha mmatta. Nuumala ophiya nihiku na efesta ya otthapela mweeri musya, mwene aahikilaathi wiira olye.+ 25 Mwene aakilanthi opuro aamakela awe okilaathi, waattamela vaxirini. Yonathani anwehana ni mwene, vano Abineri+ aakilanthi waattamana ni Sawuli, masi opuro wa Davidi khuuvo aakilanthi. 26 Sawuli khaalavunle etthu nihiku nle, maana owo aanuupuwela wiira: ‘Yookhala etthu emwiirinhe okhala oohiloka.+ Tthiri owo ohiinanariha’. 27 Nuuvira nihiku noopacerya na efesta ya otthapela mweeri musya, nihiku na nenli, opuro wa Davidi nlelo khuuvo aakilanthi. Vano Sawuli aahimukoha mwanawe Yonathani wiira: “Xeeni mwaana a Yese+ ohirwiiye awe olya nsana hata olelo? 28 Yonathani aahimwaakhula Sawuli oriki: “Davidi ookivekela wiira kimweemererye orowa oBetelehemu.+ 29 Owo aahihimya wiira: ‘Xontte mukeemererye orowa, okhala wiira kihaana ovaha mukuttho ni amusi aka opooma, nave munnaka tokiihanne. Nto vakhala wiira munookeemererya mukihiye kakumane ni axinnaka’. Tivonto ohikhanle awe vameesa va mwene”. 30 Sawuli aahinanariwa vanceene ni Yonathani, onamuhimeerya wiira: “Nyuwo mwa mwaana a muthiyana oohiiwelela. Nyuwo munuupuwela wiira miyo nkisuwenle wiira muthanlale omukhaliherya mwaana a Yese mphavelaka wiixuulihiha muru ni owuulihiha muru amaminyu? 31 Nlelo mwaana a Yese okhalaka mukumi valaponi, nyuwo ni omwene anyu khonrowa olipihiwa.+ Nto mmurume mutthu omurowele, okhala wiira ohaana okhwa”.*+
32 Yonathani aahimwaakhula paapa awe Sawuli oriki: “Xeeni owo onrowa awe wiiviwa?+ Opankeni?” 33 Vano Sawuli aahinvonyerya nivaka Yonathani ophavelaka omwiiva.+ Nto Yonathani aahisuwela wiira paapa awe aahilakela omwiiva Davidi.+ 34 Yonathani aahivenya vameesa onanariwe ene vanceene, ni khaalyiiye etthu nihiku na nenli na efesta ya otthapela mweeri musya, okhala wiira aahixankiheya vanceene ni Davidi,+ ni paapa awe aahimuulihiha muru.
35 Mmeeloni mwaya voosiisu, Yonathani aahirowa omatta wiira akumane ni Davidi, ohooliwaka ni murumeyi awe.+ 36 Yonathani aahimuleela murumeyi awe wiira: “Mutthimakele mattheere kinrowa aka ovonya”. Murumeyi awe aahitthimaka, nto Yonathani aahivonya nttheere* onvikanihaka murumeyi awe. 37 Nuumala murumeyi awe ophiya opuro Yonathani aavonyenrye awe nttheere,* Yonathani aahimukhuwelela omukohaka wiira: “Nttheere nlo khinimorenle ohoolo wanyu?” 38 Nave Yonathani aahimukhuwelela murumeyi awe oriki: “Mwaakuve! Mutthimake! Muhipise!” Nto murumeyi a Yonathani aahittotta mattheere ni aahitthikela opuro aari awe pwiyawe. 39 Murumeyi awe khaasuwenle etthu ele, Yonathani ni Davidi paahi ti yaasuwela. 40 Vano Yonathani aahikuxa ikaruma sawe sa ekhotto onvahererya murumeyi awe, omuleela wiira: “Mukuxe, muroihe opooma”.
41 Okathi murumeyi awe aaronwe awe, Davidi aahikhuma opuro aipinthe awe, waattamela opuro yoole, mpantta wa osuuli. Moottharelana, aahikokhora ikwaha tthaaru uuramaka mpakha vathi. Nto Davidi ni Yonathani yaahivahana epeexo ni yaahinla, masi Davidi tahaareere wunla vanceene. 42 Yonathani aahimuleela Davidi wiira: “Muroweke ni murettele, okhala wiira naahilapha+ ni nsina na Yehova, niiraka: ‘Yehova okhale namoona aka ni namoona anyu, okhale namoona a osuulu aka ni osuulu anyu mahiku ootheene’”.+
Vano Davidi aahirowa, nave Yonathani aahitthikela opooma.