Samuweli Oopacerya

16 Nuuvira okathi, Yehova aahimuleela Samuweli wiira: “Mpakha liini munrowa anyu oriipiwa murima mwaha wa Sawuli,+ variki kimukhoottale ene okhala mwene a Isarayeli?+ Musarye makhura munyakani,+ nvenye. Murowe wa Yese,+ a oBetelehemu, okhala wiira koomuthanla mwanawe mmosa wiira kimukhalihe mwene”.+ 2 Masi Samuweli aahikoha wiira: “Kirowe sai? Sawuli iiwa eyo, onookiiva”.+ Yehova aahimwaakhula wiira: “Mukuxe epooyi yoothiyana, mwahimye wiira: ‘Kirwiiye onvaha mukuttho Yehova’. 3 Mmulattule Yese opuro onrowa anyu ohela mukuttho. Miyo kinimooleelani ele enrowa anyu opaka. Mwamuthanle ole onrowa aka owooniheryani”.+

4 Samuweli aahipaka ele aaleeliwe awe ni Yehova. Nuumala ophiya oBetelehemu,+ ahooleli a epooma yaahirwa vaari awe, athukumelaka, anamukoha wiira: “Murwenle salaama?” 5 Samuweli aahaakhula wiira: “Aayo, salaama. Kirwiiye onvaha mukuttho Yehova. Mwiireerihe, nto mukitthareke opuro onrowa aka ovaha mukuttho”. Moottharelana, aahimureeriha Yese ni anaawe, nuumala-vo aahaalattula wiira arowe opuro aakela awe ovaha mukuttho. 6 Nuumala okela, Samuweli aahimoona Eliyabi,+ onahimya wiira: “Veekeekhai, ti yoola othanliwe ni Yehova”. 7 Masi Yehova aahimuhimeerya Samuweli wiira: “Muhiwehe makhalelo awe, nnakhala orakama wawe,+ okhala wiira miyo koomukhootta. Tthiri ele mutthu oniweha awe, khahiyo yeeyo miyo kiniweha aka. Mutthu oniweha makhalelo a ota, masi miyo Yehova, kiniweha murima”.+ 8 Vano, Yese aahimwiihana Abinadabi,+ omuroiha ohoolo wa Samuweli, masi owo aahihimya wiira: “Nnakhala ola, Yehova khomuthanlale”. 9 Moottharelana, Yese aahimwiihana Xama,+ masi Samuweli aahihimya wiira: “Nnakhala ola, Yehova khomuthanlale”. 10 Nto Yese aahaaruuha anaawe 7 ohoolo wa Samuweli, masi Samuweli aahihimya wiira: “Yehova khomuthanlale nnakhala mmosa a anamwane ala”.

11 Wookiseryani, Samuweli aahimukoha Yese wiira: “Aamalela aniinyu axilopwana ootheene?” Yese aahimwaakhula wiira: “Oohala ookiserya,+ onilyiha ipwittipwitthi.+ Vano Samuweli aahimuhimeerya Yese wiira: “Mmurume mutthu, amurowele. Hiyo khaninlya, owo ahirwiiye”. 12 Vano Yese aahiruma wiihaniwa mwanawe ookiserya. Owo aari ooxeerya, ooreera owiitho, ni oophwaneliwa.+ Nto Yehova aahimuleela Samuweli wiira: “Mweemele, ti yoowo kimuthanlale aka wiira okhale mwene!”+ 13 Samuweli aahikuxa makhura ale yaari munyakani,+ omwiitthela Davidi ooniwaka ni axuulupale awe. Okhuma nihiku nenle, ikuru sa Yehova saahinvaha owerya Davidi.+ Vano, Samuweli aahivenya, otthikela oRama.+

14 Ikuru sa Yehova saahimuhiya Sawuli,+ vano Yehova aaheemererya wiira Sawuli ohaaxiweke ni miyuupuwelo sawe sootakhala.+ 15 Arumeyi a Sawuli yaahimuhimeerya wiira: “Munnoona wiira Muluku oheemererya wiira muhaaxiweke ni miyuupuwelo sootakhala. 16 Xontte apwiya, mwaarume arumeyi anyu ala, wiira yamwaavye mulopwana onisuwela omoopa oratteene viola.*+ Okathi miyuupuwelo sootakhala seemereriwe ni Muluku sinrowa aya woohaaxakani, mulopwana owo onrowa omoopaka viola, nto nyuwo munookhala saana”. 17 Vano Sawuli aahaaleela arumeyi awe wiira: “Xontte, mukiphavelele mulopwana onisuwela omoopa oratteene viola, mukiruuhele”.

18 Mmosa a arumeyi awe aahimuleela Sawuli wiira: “Kinnimusuwela mwaana mmosa a Yese, a oBetelehemu. Owo onnisuwela omoopa oratteene viola, nave nakhotto oolipa murima ni oowerya.+ Ohiya-vo, mmiravo owo onnisuwela olavula oratteene, toophwaneliwa,+ ni Yehova ori nuuwo”.+ 19 Sawuli aahaaruma alopwana orowa omuleela Yese wiira: “Mukiruuhele mwaninyu Davidi, yoowo onlyiha inama”.+ 20 Yese aahimukuxa puuru omureya iphaawu, ni murupa wa esapala waarina eviinyu. Nave-tho aahikuxa epuri onvahererya Davidi, mwanawe, wiira anvahe Sawuli. 21 Siiso, Davidi aahiphiya owannyawe Sawuli, onapacerya omurumeela.+ Sawuli aanimphenta vanceene, nto Davidi aahikhala murumeyi awe aamukhaliherya oteexa nikula na wiixaakihana.* 22 Sawuli aahiruma oleeliwa Yese wiira: “Xontte mukihiyerye Davidi wiira okivareleke muteko, okhala wiira onnikisiveliha”. 23 Okathi miyuupuwelo sootakhala seemereriwe ni Muluku, saamurweela aya Sawuli, Davidi aanimukuxa viola, onamoopa. Vano murima wa Sawuli waanimukhurunuwa, onakhala saana. Nto miyuupuwelo sootakhala saanimuhiya.+