Silempwale ni Luka
13 Okathi yoowo, atthu akina yaahirwa omuleela Yesu wiira Pilato oowiiviha agalileya yaawo yaarwiiye ovaha mikuttho. 2 Yesu aahiwaakhula wiira: “Munuupuwela wiira agalileya awo yaari ootepa ottheka waavikana agalileya akina mwaha wa owiiraneela itthu iyo? 3 Nnaari, kinooleelani wiira, nyuwo mwa anatampi ntoko agalileya awo akhwiiye. Nto mwaahirukunuxe murima, ootheene anyu munimookhwa ntoko yaawo.+ 4 Ankhi atthu ale 18 yaaphitiwe ni empa yoorakamela osulu ya oSilowe, akhwaasa, munuupuwela wiira atthu awo yaari ootepa okhala anatampi waavikana atthu akina ootheene anikhala oYerusalemu? 5 Nnaari, kinooleelani wiira, mwaahirukunuxe murima, ootheene anyu munimookhwa ntoko yaawo”.
6 Nto Yesu aahaaleela nlikanyiho nla, oriki: “Aahikhala mulopwana mmosa aaphatteiye mwiri wa ifiiku ematta awe ya ewuuva. Owo aahirowa oweha wiimale ene mihokorokho, masi khaaphwannye nnakhala mmosa.+ 7 Vano aahimuhimeerya namuteko aalima ematta eyo wiira: ‘Soovira iyaakha tthaaru kirwaaka ophavela mihokorokho sa mwiri ola wa ifiiku, masi nkiphwannye nnakhala muhokorokho mmosa. Tivo, mwiikitthe! Xeeni oninnuwa awe ohiimaka mihokorokho?’ 8 Namuteko owo aahimwaakhula pwiya awe wiira: ‘Pwiya, nrowe nilipelele mwaakha mmosa paahi. Kinrowa othipa mukerekhere, kihele eturumu. 9 Akhala wiira muhoolo onimwiima mihokorokho, vanooreera. Masi akhala wiira khoniima mihokorokho, murumeke wiikitthiwa’”.+
10 Vano Yesu iira iixuttihaka musinagoga* esaabadu. 11 Nto, aahikhala memmo muthiyana mmosa, aavariwe ni nlaikha nootakhala, nenlo naamwiirinhe oviriha iyaakha 18 owereiwaka. Nave muthiyana owo khaawerya weemela mowookololowa, masi eetta uuramme ene.* 12 Yesu vaamonale awe, aahimwiitthana onamuleela wiira: “Muthiyana, moopenuxiwa eretta anyu”.+ 13 Vano Yesu aahimwiixaatherya matata; niinaano-ru muthiyana owo aahookololowa khupacerya onvuwiha Muluku. 14 Masi mukhulupale aahoolela musinagoga* aahinanariwa, maana Yesu ampenuxale mutthu ole esaabadu. Tivonto, mukhulupale owo aahaahimeerya atthu a muttitthi ole wiira: “Ahaavo mahiku 6 akhanle oovariwa muteko.+ Nto murweeke mahiku yaawo wiira mpenuxiwe, ohiya esaabadu”.+ 15 Masi Pwiya aahimwaakhula wiira: “Nyuwo anawoothe!+ Niireke nyuwo khamuntaphula epooyi anyu aahiiso puuru anyu, munaroiha wiira sawurye esaabadu?+ 16 Ankhi muthiyana ola, a nloko na Abrahamu, yoola ovirinhe iyaakha 18, Satana omuhaaxaka, khaakhanle oopenuxiwa eretta awe nihiku na saabadu?” 17 Nuumala Yesu ohimya itthu iya, awanani awe ootheene yaahipacerya wuuliwa muru. Masi muttitthi wootheene wa atthu, waahitteeliwa murima, mwaha wa itthu sootheene sootikiniha Yesu aapanke awe.+
18 Nto Yesu aahihimya wiira: “Omwene wa Muluku onlikana ni exeeni? Nave kinrowa olikanyiha ni exeeni? 19 Onlikana ni enuku yaamukhaanixa,* mulopwana mmosa aalale awe mmatta mwawe. Enuku eyo yaahinnuwa khukhala mwiri muulupale, nto axipalame* yaanipaka ipuru saya mmirittani mwaya”.+
20 Nave-tho, Yesu aahihimya wiira: “Kinrowa olikanyiha ni exeeni Omwene wa Muluku? 21 Onlikana ni eferemento, yeeyo muthiyana aatakaahale awe ni miphimo* miraru sa otthu,* mpakha otthu* wootheene opuhuwa”.+
22 Yesu aaheetteetta ipooma sootheene ni mittetthe sootheene, iixuttihaka. Nave iira orowaka oYerusalemu. 23 Vano mulopwana mmosa, aahimukoha Yesu wiira: “Pwiya, niireke ale anrowa woopowa ari vakhaani?” Yesu aahaaleela wiira: 24 “Mwiimananiheke vanceene okela mukhora woophunyeya.+ Tthiri, kinooleelani wiira, atthu anceene animweererya okela, masi khanrowa owerya. 25 Okathi mwaneene etthoko onrowa awe ovenya ni owala mukhora, nyuwo munrowa ohala vate mmanaka mukhora mwiiraka: ‘Pwiya, munihulele’.+ Masi owo onoowaakhulani wiira: ‘Nkinsuwela onikhuma anyu’. 26 Nave nyuwo munrowa ohimyaka wiira: ‘Hiyo naanilya ni naaniwurya ohoolo wanyu, nave nyuwo mwaaniixuttiha mphironi mwa epooma ahu’.+ 27 Masi owo onoowaakhula wiira: ‘Miyo nkinsuwela onikhuma anyu. Mukhumase-va, nyuwo muniira sootakhala!’ 28 Weiwo tonrowa anyu wunla ni olumanyiha maino anyu. Okathi owo, munonweha Abrahamu, Isaakhi, Yakobe ni maprofeta ootheene ari ene Moomweneni mwa Muluku, masi nyuwo muriheliwe ene ota.+ 29 Nave-tho, atthu animoorwa onikhuma nsuwa ni onikela nsuwa. Nave animoorwa akhumaka onorti* ni osuuli,* nto anookilaathi ahameele vameesa Moomweneni mwa Muluku. 30 Vano, ahaavo atthu oopacerya, anrowa okhala ookiserya, nave ahaavo atthu ookiserya, anrowa okhala oopacerya”.+
31 Ewoora ene yeeyo, afarisi akina yaahirwa anamuhimeerya Yesu wiira: “Mukhume-va, muroweke, maana Herodi oniphavela owiivani”. 32 Nto Yesu aahiwaakhula oriki: “Murowe mwamuleele khwatte owo wiira: ‘Mwiiwe! Olelo ni meelo kinoomola malaikha ootakhala ni waapenuxa aretta, nto murotto, kinoomaliha muteko aka’. 33 Vano, olelo, meelo ni murotto kihaana orowa, okhala wiira khivanireerela profeta okhwa opuro mukina, ohikhanle oYerusalemu.+ 34 Yerusalemu! Nyuwo Yerusalemu! Nawiive a maprofeta ni munaavonyakasa maluku atthu muruuheliwe anyu ni Muluku!+ Koophavela ikwaha sinceene waathukumanya aniinyu, siisaale mwalyakhu onaathukumanya awe axaana awe mmapuphani mwawe! Masi nyuwo khuhiphavela.+ 35 Tivo, Muluku onoohiya empa* anyu.+ Kinooleelani wiira, khamunikoona-tho, mpakha nihiku ninrowa anyu ohimya wiira: ‘Ooreelihiwa tuule onirwa mwa nsina na Yehova!’”*+