Miteko sa Arummwa
20 Okathi waavukunwe aya onyakulihana, Paulo aahiruma wiihaniwa awiixutti, ni aahaalipiha ni aalaxerya. Nuumala-vo, aahirowa oMasedonia. 2 Vano Paulo aaheetteetta ipooma sootheene sa elapo ele ni aahaalipiha vanceene awiixutti a weiwo. Nto aahiphiya oGresia. 3 Paulo aahikhala weiwo miyeeri miraru. Masi okathi aitthokiha awe wiira onwele pakiti orowaka oSiiria, aahisuwela wiira ayuda+ yaahiiwanana omwiiva. Tivo, aahuupuwela otthika oviraka oMasedonia. 4 Owo aahooliwe ni Sopaatoro, mwaana a Piro, a oBereya. Aristarko+ ni Sekundo, yaawo yaari a oTesaloonika. Gaio a oDerbe. Timootheyo,+ vamosa ni Tiikhiko+ ni Troofimo,+ a eprovinsia ya wAsia. 5 Alopwana awo yaahihoola, ananilipelela oTrowade. 6 Masi hiyo naahinwela pakiti oFilipi, nuumala mahiku a Efesta ya Iphaawu Soohiheliwa Eferemento.+ Naahiviriha mahiku mathanu neettaka. Nto, naahiphiya oTrowade, nikhala weiwo mahiku 7.
7 Nihiku noopacerya na esumana,* okathi naathukumanne ahu wiira nilye, Paulo aahipacerya olavula mwaha, okhala wiira mmeeloni mwaya aamurowa. Nto owo aahilavula okathi munceene, mpakha ohiyu eriyari. 8 Esaala ele ya osulu naathukumanne ahu, saahikhala ixamaniiya sinceene. 9 Nto, mmiravo mmosa, aihaniwa Eutiko, aakilanthi vaxanelani. Siiso, nlelo Paulo olavulaka, mmiravo owo saahinvola ikhove sinceene, khirupa. Vano, okhala wiira ikhove saahinveliha, aahimorela vathi okhumaka empa ya neeraru ya osulu. Okathi aaroweliwe awe, aaphwanyiwe ookhwa ene. 10 Paulo aahikhuruwela vathi, omumpaathela mmiravo owo ni omukhupaarela,+ onahimya wiira: “Muhixanke, mmiravo ola mukumi”.+ 11 Paulo aahiwela-tho empa ele ya osulu, aahikawanya ephaawu, okhuura. Vano, aahitthikela ovaanela naawo okathi munceene, mpakha oxa. Nuumala-vo, aahirowa mukwaha awe. 12 Nto awo yaahimukuxa mmiravo owo ori ene mukumi ni yaahihakalala vanceene.
13 Hiyo naahihoola, nivira neettaka mukwaha ahu mpakitini mpakha wAso, masi Paulo aaronwe mwentto. Yaari epooma yeela, naarowa ahu omwaakhela Paulo mpakitini, ntoko aanivekenle awe. 14 Siiso, okathi aaniphwannye awe epooma ya wAso, naahimukuxa mpakitini, nnarowa oMitilene. 15 Mmeeloni mwaya, naahinwela pakiti weiwo, niphiya waattamela esisiro* ya oKhiyo. Nihiku na nenli, naahiphiya oSaamo. Nihiku na neeraru, naahiphiya oMileto. 16 Paulo khaaphavenle weemela wEefeso,+ maana khaaphavela opisa eprovinsia ya wAsia. Owo aamwaakuva wiira vaweryaneya vale, ophiye oYerusalemu+ nihiku na Efesta ya Pentekoositi.
17 Masi, ori ene oMileto, Paulo aahiruma wiihaniwa axitokweene a muloko a wEefeso. 18 Okathi axitokweene awo yaaphiyale aya, Paulo aahaaleela wiira: “Nyuwo moosuwela oratteene mweettelo aka eriyari anyu, okhuma nihiku noopacerya kaaphiyale aka eprovinsia ya wAsia.+ 19 Nto, kihaavarela muteko Apwiya ni wiiyeviha wootheene,+ kinlaka ni kihaawaka mwaha wa ayuda yaaphavela okiiva. 20 Nave-tho, moosuwela wiira kihoolaleeryani kihivithaka etthu wiira mphwanye mureerelo, kiwiixuttihakani ohoolo wa atthu ootheene+ ni mmaitthokoni.+ 21 Masi kihaalaleerya atthu ootheene, eyo piiyo, ayuda ni akereku, wiira arukunuxe murima+ ni amukokhoreleke Muluku ni amwaaminiki Pwiya ahu Yesu.+ 22 Vano, keettihiwaka ni ikuru sa Muluku, kinrowa oYerusalemu kihisuwelaka etthu enrowa okikhumelela weiwo. 23 Masi enisuwelaka tiila: khula epooma, ikuru soowaarya sinimakela okileela wiira kinrowa otthukweliwa ni ohaaxiwa.+ 24 Hata vari siiso, okumi aka nkinoona okhala etthu.* Kiniphavela aka, ori omaliherya ele erina aka opaka+ ni muteko kivahiwa aka ni Pwiya Yesu. Muteko owo, ti olaleya voomalela ihapari sooreera sa oreera murima wuulupale wa Muluku.
25 “Miyo kihoolaleeryani Omwene wa Muluku, masi okhuma olelo orowa ohoolo, khamunrowa okiweha-tho. 26 Tivo, olelo-va, nyuwo munnikikhalela onamoona, wiira akhala mutthu onrowa okhwa, miyo nkirina mulattu.+ 27 Tthiri, kihoolaleeryeni itthu sootheene Muluku oniphavela awe opaka.+ 28 Mwiipasoope mmansinyu+ ni mukhapeleleke muloko, maana ikuru soowaarya sihoothanlani wiira mukhale axitokweene anihoolela+ ni mweettiheke muloko wa Muluku,+ yoowo othumme awe ni ephome ya Mwanawe.+ 29 Koosuwela wiira, karowa vale, anookhumelela atthu anlikana ni miici,+ yaawo ahinrowa okhapelela ipwittipwitthi moophenta. 30 Nave eriyari anyu, anookhumelela atthu anrowa ovirikanyaka ekeekhai. Awo anoopaka eyo aphavelaka waahapuxa awiixutti wiira yaatthareke.+
31 “Tivo, nwehaweheke. Muupuweleke wiira kookhala ni nyuwo iyaakha tthaaru,+ othana ni ohiyu, kihihiyaka onvaha miruku khula mmosa a nyuwo, kimoroxaka maithori. 32 Vano, kinoovahereryani mmatatani mwa Muluku, ni nuulumo nawe ninnileela oreera wawe murima wuulupale. Nuulumo nlo, ninniwerya woolipihani ni woovahani itthu Muluku onaavaha awe ale oothanliwa.+ 33 Miyo nkinaphavele eparatha, aahiiso eweero, nnakhala ikuwo sa akina.+ 34 Nyuwo moosuwela wiira, koovara muteko ni matata aka wiira kiphwanye itthu saakithowa+ ni saathowa ale arina aka. 35 Mwa itthu sootheene, koowooniheryani ni miteko saka moota mukhanle anyu oowaakhaliherya+ ale anireerela okhaliheriwa. Nave muupuweleke ele Pwiya Yesu aahimmye awe wiira: ‘Ovaha onnitepa ohakalaliha+ ovikana ovahiwa’”.
36 Vaamalihale awe olavula itthu iya, Paulo aahikokhora vamosa naawo, onavekela. 37 Tthiri, ootheene aya yaahipacerya wunla vanceene, anamukhupaarela* Paulo, anvahaka epeexo ya niphento. 38 Nto awo, yaahiriipiwa murima vanceene mwaha woowaahimeerya wiira khiyaarowa omoona-tho.+ Nuumala-vo, yaahimuhoola wiira anwele pakiti.