Silempwale ni Luka
2 Mahiku ale, Seesari Augustu, aahiruma wiira atthu ootheene yaakhala olamulelo awe, yaahaana orepeliwa. 2 Orepeliwa iwo woopacerya, wiiraneyale okathi Kirino aari awe kuvernatoro a oSiiria. 3 Vano atthu ootheene yaahirowa orepeliwa. Khula mutthu aahirowa epooma awe. 4 Nto, Yosefe+ aahikhuma oGalileya, epooma ya oNazarethi, orowaka oYudeya, epooma ya Davidi, yaihaniwa Betelehemu,+ okhala wiira aari a emusi ni nloko na Davidi. 5 Aahirowa orepeliwa ni Maria, yoowo aamuthenle awe.+ Okathi owo Maria aahala vakhaani oyara.+ 6 Ari ene weiwo, waahiphiya okathi wa Maria oyara. 7 Vano Maria aahimuyara mwanawe mwaamulopwana, oopacerya.+ Nto aahimukhuneela ni ikuwo sookheriwa, omwaatalela nipuro naalya inama,+ okhala wiira mpaani mwaamaka aya aletto, khiwaakhanle opuro.
8 Nave, yaahikhala amakampusi yaakhala mmatta, akhapelelaka ipwittipwitthi saya ohiyu. 9 Mootutuxerya, nlaikha na Yehova* naahaakhumelela, neemela ohoolo waya. Nave, waahaakhumelela waarya wooniheryaka ovuwa wa Yehova,* nto awo yaahoova vanceene. 10 Masi nlaikha naahaahimeerya wiira: “Muhoove! Miyo kihoorwa wooleelani ihapari sooreera, seiyo sinrowa waatteeliha murima vanceene atthu ootheene. 11 Olelo, epooma ya Davidi,+ mooyareliwa moopoli,+ yoowo ori Kristu Pwiya.+ 12 Nto ethoonyeryo enrowa woosuwelihani tiila: Munomphwanya mwaana okhuneeliwe ene ni ikuwo sookheriwa, aataleliwe ene nipuro ninlya inama”. 13 Mootutuxerya, yaahirwa malaikha manceene a* wiirimu,+ atakaahana ni nlaikha nne, anamuttottopela Muluku, yiiraka: 14 “Avuwihiwe Muluku wiirimu, nave-tho vathi-va murettele okhale ni ale animuhakalaliha Muluku”.
15 Nuumala malaikha orowa wiirimu, amakampusi ale yaahileelana wiira: “Nihaana orowa oBetelehemu niinaano-va, nawehe etthu ekhumelenle, yeeyo Yehova* onisuwelihale awe”. 16 Yaahirowa voowaakuveya, amphwanya Maria ni Yosefe ni mwaana aataleliwe ene nipuro naalya inama. 17 Voonale aya eyo, yaahihimya itthu sootheene yaahimeeriwe aya, seiyo saamuhimya mwaana owo. 18 Ootheene ale yiiwale itthu saahimya aya amakampusi, yaahitikinihiwa vanceene. 19 Maria aanisuka moolumo ootheene vamurimani vawe+ ni aanuupuwelela ele itthu iya saataphulela aya. 20 Vano, amakampusi yaahitthikela opuro waakhumme aya, amuxukhurelaka ni omuttottopela Muluku, mwaha wa itthu sootheene yaiwale aya ni yoonale aya, ntoko yaahimeeriwe aya.
21 Yeettaka mahiku 8, waahiphiya okathi wiira innuwihiwe.+ Nto, aahivahiwa nsina noowi Yesu, nenno naahimmwe ni nlaikha ohinatthi orupaliwa.+
22 Waaphiyale aya okathi wa niira na oreerihiwa, ntoko nlamulo na Moise naahimya aya,+ Yosefe ni Maria yaahimuroiha Yesu oYerusalemu, wiira yanvahererye Yehova,* 23 ntoko naahimya aya Nlamulo na Yehova,* wiira: “Khula mwaana mwaamulopwana oopaceriwa oyariwa, ohaana ovahereriwa Yehova”.+ 24 Nave yaahivaha mukuttho waavekeliwa ni Nlamulo na Yehova:* “masiya manli aahiiso ipompa piili mihoro”.+
25 Vano, aahikhala oYerusalemu mulopwana mmosa aihaniwa Simeyoni. Mulopwana owo aari naxariya ni aanimoova Muluku, nave aanilipelela ohakalalihiwa wa Isarayeli.+ Ikuru soowaarya saari nuuwo. 26 Nave-tho, Muluku aahimusuweliha mulopwana ole orumeelaka ikuru soowaarya, wiira khaarowa okhwa ohinatthi omoona Kristu a Yehova.* 27 Uupuxeriwaka ni ikuru soowaarya, Simeyoni aahikela mutemplo. Okathi ene yoowo, apapawe ni amamawe Yesu yaahimuruuha, wiira epake etthu yaavekeliwa ni Nlamulo.+ 28 Nto Simeyoni aahimukuxa mwaana ole mmatatani, onamuttottopela Muluku, iiraka: 29 “Pwiya Muulupalexa, konweha mwaana mwaamuhimya anyu. Vano miyo pooti okhwa kihakalanle ene.+ 30 Tthiri konweha moopoli omurumme anyu,+ 31 yoowo omukumihenrye anyu wiira owehiwe ni maloko ootheene.+ 32 Owo ti muthuko+ onimaliha epiphi enaakhuneela atthu+ ni ti ovuwa wa atthu anyu aisarayeli”. 33 Apapawe ni amamawe mwaana ole, yaanitikinihiwa ni itthu saalavuliwa, ohimmwaka mwaana ole. 34 Nave, Simeyoni aahaareeliha, onamuhimeerya Maria, maama awe mwaana ole wiira: “Mwiiwe! Mwaana ola oothanliwa wiira aamoroxe+ ni aavenxe atthu anceene wIsarayeli.+ Nave owo onrowa okhala esinaale enrowa othanyiwaka.+ 35 Owo oothanliwa wiira uupulule mirima sa atthu anceene. Masi nyuwo, munoohaawa ntoko muhommwale ni espaata yoorakama”.*+
36 Vano, aahikhala muthiyana mmosa aari profeta, aihaniwa Ana, mwaana a Fanuweli, a nihimo na Axeri. Muthiyana owo aari oowuuluvala ni aahikhala ni iyawe iyaakha 7, nuumala otheliwa. 37 Owo aari naamukhweli ni aarina iyaakha 84. Khaacompela orowa otemplo, aaninvarela muteko Muluku, othana ni ohiyu. Nave, aanitthukwa ni ovekela. 38 Ewoora ene yeeyo, muthiyana owo aahiphiya, onamuxukhuru Muluku ni omulaleya mwaana ole wa atthu ootheene yaalipelela woopoliwa wa Yerusalemu.+
39 Vano, nuumala Yosefe ni Maria opaka itthu sootheene Nlamulo na Yehova*+ naavekela aya, yaahitthikela owannyeya oGalileya, epooma ya oNazarethi.+ 40 Nto mwaana owo aaninnuwa ni olipa, nave aanitepa okhalana ankhili. Muluku aanimukhaliherya.+
41 Iyaakha sootheene, apapawe ni amamawe yaahilimalela orowela niira na Paasikha oYerusalemu.+ 42 Okathi Yesu aarina awe iyaakha 12, awo yaahirowela niira nlo, ntoko saalimalenle aya.+ 43 Vaamanle aya niira nle, apapawe ni amamawe Yesu yaahikhuma, anatthikela owaani. Masi owo aahanle oYerusalemu, apapawe ni amamawe ahisuwelaka. 44 Yuupuwelaka wiira Yesu aari ekurupu emosa-ru ya atthu ale yeettana aya mukwaha, yaaheetta nihiku ntero. Vano yaahipacerya omwaavya Yesu eriyari ya amusi aya ni atthu yaasuwela aya. 45 Masi khiyamphwannye. Tivo yaahitthikela oYerusalemu, enamphavelasa khula opuro. 46 Nuuvira mahiku mararu, yaahimphwanya ori ene mutemplo, okilanthi ene eriyari ya awiixuttihi a itiini, aawiriyanaka ni aakohaka. 47 Ootheene ale yanwiriyana, yaanitikinihiwa vanceene ni osuwela wawe ni waakhula wawe.+ 48 Vano, okathi apapawe ni amamawe yanwehale aya, yaahitikinihiwa vanceene. Nto, amamawe, yaahimuhimeerya wiira: “Mwanaka, xeeni muhalaka oniirela siisa? Paapa anyu ni miyo, naahixanka vanceene niwaavyakani”. 49 Masi owo aahiwaakhula wiira: “Xeeni mwaakaavya anyu? Niireke khimwaasuwenle wiira kaahaana okhala mpaani mwa Tiithi aka?”+ 50 Masi awo khiyaiwexenxe saana etthu aahimeerya awe.
51 Nuumala-vo, Yesu aahitthikela oNazarethi ni axipapawe, ni aaniwiiwelela.+ Nave-tho, maama awe aanisuka vamurimani itthu sootheene Yesu aahimya awe.+ 52 Nto, Yesu aaninnuwa ni ankhili awe yaanincerereya. Nave owo aanimusiveliha Muluku ni atthu.