Yesaya
41 “Nyuwo atthu anikhala musisironi, mmaale mukiwiriyaneke;*
Nyuwo atthu a mulaponi, mphwanye-tho ikuru.
Mukaattamele ni mulavuleke.+
Nrowe nikumane, nto miyo kinimoophukelani.
Ni onvahererye maloko,
Ni omwiirihe waaxintta mamwene?+
Ti pani oniwiiriha mamwene awo okhala ntoko ntthupi ohoolo wa espaata* awe,
Ni ntoko malaxi oowuuma anivavihiwa ni epheyo, ohoolo wa muura awe?
3 Owo onniwoomola mamwene awo, ehikhanle etthu enimukhoottiherya.
Onnivira iphiro ohitonko awe weetta.
4 Ti pani opanke etthu ela,
Yoowo onilattula maloko okhuma woopaceryani?
Miyo Yehova, kiri Oopacerya.+
Nave kinrowa okhalaka siiso mpakha maloko ookiserya”.+
5 Atthu anikhala musisironi, annoona etthu eniiraneya ni annoova.
Atthu anikhala omalenle elapo, aapacerya ottettemela.
Awo anithukumana poromosa.
6 Atthu annikhaliheryana,
Ni annihimeeryana wiira: “Mwiilipihe”.
7 Tivonto, ole onipattha miri, onnimulipiha ole onihana iyuuma.+
Ole onookolola iyuuma ni maritelo,
Onnimulipiha ole onimanela eyuuma vayuumani ekhwaaya.
Owo onnihimya wiira eyuuma eyo yoolipihiwa saana.
Nuumala-vo, ennikhomakeliwa ni ipereku wiira ehimore.
8 “Masi, nyuwo Isarayeli, mwa murumeyi aka;+
Nyuwo Yakobe, mwa osuulu wa mpatthani aka Abrahamu,+
Ti nyuwo koothanlalyaakani.+
9 Ti nyuwo kookumihalyaakani omalenle elapo,+
Ti nyuwo kiwiihannaakani ottaiwene.
10 Muhoove, okhala wiira miyo kiri ni nyuwo.+
Muhixanke, okhala wiira miyo ka Muluku anyu.+
Kinimoolipihani, aayo, kinimookhaliheryani,+
Kinimoovarelelani oratteene ni ntata naka noolopwana na xariya’.
11 Mwiiwe! Ootheene yaale annanariwa ni nyuwo, animuuliwa muru ni anooveeheya.+
Ootheene yaale aniwana ni nyuwo, animwiiviwa ni anoomala-mala.+
12 Nyuwo munrowa owaavyaka yaale yaawana ni nyuwo, masi khamunrowa waaphwanya;
Ale aniwana ni nyuwo, anrowa okhalaka ntoko etthu ehikhanle, anrowa okhalaka ntoko ethiru.+
13 Miyo, Yehova Muluku anyu, kinnoovarelani ntata nanyu noolopwana,
Ti miyo kinooleelani wiira: ‘Muhoove. Kinimookhaliheryani’.+
14 Muhoove, nyuwo Yakobe,+ muhinooneliwa vatthu!*
Yehova, yoowo ori Moopoli anyu+ ni Muluku Oowaarya a Isarayeli, onihimya wiira: “Nyuwo atthu a wIsarayeli, miyo kinimookhaliheryani”.
15 “Mwiiwe! Miyo kihookhalihani ekaruma eninyakatta ipyo,+
Ekaruma esya yoowiitha eninyakatta ipyo.
Munoonyakelaka miyaako ni munooxila seiyo.
Nave munimwiiriha mattumuxa okhalaka ntoko ikavava.
16 Nyuwo munooveera itthu iyo ntoko ipyo,
Nave ettheku enoovaviha.
Epheyo yuulupale enoomwarya-mwarya.
Nyuwo munootteeliwaka murima mwaha wa Yehova,+
Munimwiittottopaka mwaha wa Muluku Oowaarya a Isarayeli”.+
17 “Ale oovelavela ni ale oohaawa, annaavya maasi masi khaniphwanya.
Nlumi naya nihuuma, mwaha wa ovoliwa ntthona.+
Miyo Yehova, kinimwaakhaliherya.+
Miyo, Muluku a Isarayeli, nkinrowa waanyanyala.+
18 Kinookumiherya miro vasulu va mattumuxa ahinimela malaxi,+
Nave miro sinoophattuwa mapuro oowaataleya.+
Kinootatuxa othako wiira okhale matthiya ari nammese,*
Nave mapuro oowuuma, kinookhaliha ihime sa maasi.+
19 Moothakoni, miyo kinimwaala miri sa eseeturu,
Sa akaasiya, sa murta ni sa epinyeero.+
Moothakoni moowaataleya, kinimwaala mwiri oniihaniwa xuniiperu,
Vamosa ni mwiri oniihaniwa ferexo* ni mwiri oniihaniwa sipereste.+
20 Siiso, atthu ootheene animoona ni anoosuwela,
Anoovaha ephoole ni anoosuwela oratteene,
Wiira ntata na Yehova tinipanke etthu ela,
Nave wiira Muluku Oowaarya a Isarayeli, topanke etthu ela”.+
21 Yehova onihimya wiira: “Mulavule mulattu anyu”.
Mwene a Yakobe onihimya wiira: “Mwiixaakihe”.
22 “Nyuwo amuluku! Munooniherye etthu ni munihimeerye itthu sinrowa wiiraneya ohoolo.
Munileele itthu siiraneyale khalai,*
Wiira nuupuweleleke seiyo,* ni nisuwele etthu enrowa okhumelela.
Aahiiso munileele itthu sinirwa ohoolo.+
23 Munihimeerye etthu enrowa wiiraneya ohoolo,
Wiira nisuwele wiira nyuwo mwa amuluku.+
Aayo, mpake etthu, ekhale yooreera aahiiso yootakhala,
Wiira niwehe etthu eyo, nitikinihiwe.+
24 Mwiiwe! Nyuwo khamuhiyo etthu,
Nave itthu munipaka anyu khasihiyo etthu.+
Ole onithanla wookokhorelani, toothanyeya.+
25 Miyo koomulattula mutthu onikhuma onorti, nto owo onnoorwa;+
Ti yoowo onirwa mpantta onikhuma nsuwa,+ ni onirowa ovuwiha nsina naka.
Owo onimwaanyakela anamalamulela, ntoko oninyakeliwa aya oloko,+
Siisaale mulipa-onuupa miyaapu, oniphwatta awe oloko.
26 Ti pani ohimmye etthu ela okhuma woopaceryani, wiira hiyo nisuwele?
Aahiiso, ti pani ohimmye khalai ene, wiira hiyo nihimyeke so: ‘Onihimya ekeekhai’?+
Mweekeekhai, khuuvo olaleyale etthu ela!
Khuuvo ohimmye etthu eyo!
Khuuvo owiiwaleni muhimyaka etthu!”+
27 Ti miyo kaapacenrye omuleela Siyoni, wiira: “Mooneke itthu sinrowa wiiraneya!”+
Nave kinoomuruma namitthaka a ihapari sooreera+ orowa oYerusalemu.
28 Masi miyo kaahithipelela oweha, khaakhanle mutthu;
Khaakhanle mutthu aawerya ovaha miruku.
Nnaamwi kaathipelela okoha, khuuvo aakhunle.
29 Mwiiwe! Ootheene aya khahiyo etthu.
Miteko saya ti seethiru.
Ilatarato saya sa eyuuma, sinlikana ni epheyo ni ti seethiru.+