Samuweli Oopacerya

23 Nuuvira okathi Davidi aahileeliwa wiira: “Afilisti anwana ni atthu a oKeila,+ nave anniwiiyerya soolya saya”. 2 Davidi aahimukoha Yehova+ oriki: “Kirooke kaatupheleke afilisti?” Yehova aahimwaakhula Davidi wiira: “Muroweke, mwaatuphele afilisti ni mwawoopole atthu a oKeila”. 3 Masi anakhotto a Davidi yaahimuleela wiira: “Vakhala wiira nri ene oYuda wenno hiyo ninnoova,+ ninrowa-tho otepa woova narowa oKeila waatuphela anakhotto a afilisti!”+ 4 Siiso Davidi aahitthikela-tho omukoha Yehova.+ Yehova aahimwaakhula Davidi oriki: “Nvenye, murowe oKeila, okhala wiira kinimoovahereryani afilisti mmatatani mwanyu”.+ 5 Davidi aahirowa ni anakhotto awe oKeila, ni aahaatuphela afilisti. Owo aahiwiiva afilisti anceene, ni aahikuxa inama saya. Nave Davidi aahiwoopola atthu a oKeila.+

6 Okathi Abiyatari+ mwaana a Ahimeleki aatthyawenle awe wa Davidi oKeila, aahikuxa eefodi.* 7 Sawuli aahileeliwa wiira: “Davidi ori oKeila”. Vano Sawuli aahihimya wiira: “Muluku ookivahererya* Davidi,+ okhala wiira owo ohiivariha mmensawe ovolowaka epooma erina mikhora ni itaranka”. 8 Sawuli aahaathukumanya anakhotto awe ootheene, wiira arowe okhottoni, oKeila, yamurukurerye Davidi ni anakhotto awe. 9 Nuumala Davidi osuwela wiira Sawuli aaniphavela omwiiriha etthu yootakhala, aahimuleela namukuttho Abiyatari, wiira: “Mukiruuhele eefodi”.+ 10 Davidi aahihimya wiira: “Yehova Muluku a Isarayeli, miyo murumeyi anyu, kihiiwa wiira Sawuli omphavela orowa opwetexa epooma ya oKeila, mwaha wa miyo.+ 11 Niireke ahooleli* a oKeila anookivahererya mmatatani mwawe? Niireke tthiri Sawuli onimoorwa ntoko miyo murumeyi anyu kiiwale aka? Khoo Yehova Muluku a Isarayeli, xontte mmwaakhule murumeyi anyu”. Yehova aahimwaakhula oriki: “Owo onimoorwa”. 12 Davidi aahikoha wiira: “Niireke ahooleli a oKeila anookirukurerya miyo ni anakhotto aka ni onivahererya mmatatani mwa Sawuli?” Yehova aahimwaakhula wiira: “Aayo, animoorukureryani”.

13 Moowaakuveya, Davidi ni anakhotto awe oowiiraka 600,+ yaahitthyawa oKeila, arowa opuro mukina. Okathi Sawuli aaleeliwa awe wiira Davidi aahitthyawa oKeila, owo khaamutthimakenle. 14 Davidi aahikhala woothakoni, mapuro ooxankiha ophiya, muttetthe wa omiyaakoni woothakoni wa oZifi.+ Khula okathi, Sawuli aanimwaavya Davidi,+ masi Yehova khanvaherenrye mmatatani mwawe. 15 Davidi ori ene moothakoni wa oZifi, oHorexi, aahisuwela wiira* Sawuli aahikhuma orowaka omwaavya wiira omwiive.

16 Yonathani mwaana a Sawuli, aahirowa okumana ni Davidi oHorexi, ni aahimulipiha Davidi ni nsina na Yehova.+ 17 Yonathani aahimuleela Davidi wiira: “Muhoove, paapa aka Sawuli khonrowa woophwanyani, nyuwo munookhala mwene a atthu a Isarayeli,+ nto miyo kinrowa okhala mwene a nenli nuumala nyuwo, nave paapa aka Sawuli onnisuwela eyo”.+ 18 Oowanli aya yaahipaka nivarihano+ ohoolo wa Yehova, nto Davidi aahihala oHorexi, nave Yonathani aahitthikela owannyawe.

19 Muhoolo mwaya, alopwana a oZifi yaahirowa okumana ni Sawuli oXibeya,+ anamuhimeerya wiira: “ Davidi iipinthe vakhiviru vahu,+ mapuro ooxankiha ophiya, oHorexi+ omwaako wa oHakila,+ yoowo onikhala mpantta wa osuuli* wa oYesimoni.*+ 20 Nyuwo mwene mwaaphavelaka orwa murweeke, hiyo nnonvara Davidi, noovahereryeni mmatatani mwanyu”.+ 21 Vano Sawuli aahihimya wiira: “Yehova ooreeliheni, okhala wiira mookireerela murima. 22 Murowe mwasuwele oratteene opuro ori awe ni tani omonne, okhala wiira kooleeliwa wiira owo khoreere okhala mulavilavi. 23 Murowe mwasuwele oratteene mapuro awo ootheene oowiipitheya nto mutthike murwe mukileele vakhala wiira moosuwelexa oratteene. Miyo kinoorowa ni nyuwo vakhala wiira yena nlelo ori mulaponi-mmo, nto miyo kinoorowa omwaavya eriyari ya imusi sootheene sa Yuda mpakha omphwanya”.

24 Moottharelana, awo yaahirowa oZifi,+ amuhoolelaka Sawuli, nto Davidi ni anakhotto awe yaari woothakoni wa oMawoni,+ wAraba,+ mpantta wa osuuli wa oYesimoni. 25 Sawuli aahirowa ni anakhotto awe omwaavya Davidi.+ Okathi Davidi aaleeliwa awe, owo aahirowa okhala mukhukuni+ woothakoni wa oMawoni. Nuumala Sawuli oleeliwa, owo aahirowa omwaavya Davidi woothakoni wa oMawoni. 26 Okathi Sawuli aaphiyale awe mpantta mmosa wa mwaako, Davidi ni anakhotto awe yaari mpantta mukina. Davidi aanimutthyawa Sawuli moowaakuveya,+ masi Sawuli ni anakhotto awe yaanimwaattamela Davidi ni anakhotto awe wiira yaavare.+ 27 Masi aahirwa mulopwana mmosa onamuleela Sawuli wiira: “Murwe moowaakuveya, okhala wiira afilisti aatuphela elapo ahu!” 28 Siiso Sawuli aahihiya omoomola Davidi,+ onarowa owana ni afilisti. Ti maana aya opuro ole oniitthaniwa aya Mwala Woovalaana.

29 Nto Davidi aahikhuma opuro ole onarowa okhala mapuro ooxankiha ophiya a wEni-Gedi.+