Silempwale ni Luka

11 Yesu aari nipuro nimosa ovekelaka. Vano, omalihaka-ru, mwiixutti awe mmosa aahinvekela wiira: “Pwiya, muniixuttihe ovekela, ntoko Yohani owiixuttihale awe awiixutti awe”.

2 Owo aahaaleela wiira: “Mwaavekelaka, muhimyeke so: ‘Tiithi, nsina nanyu nitteelihiwe.*+ Omwene anyu orwe.+ 3 Munivaheke khula nihiku, yoolya* eniphiyerya nihiku nootheene.+ 4 Nave, munlevelele soottheka sahu,+ maana hiyo-tho ninnaalevelela ootheene ale annitthekela.*+ Muhinihiye nimoraka okathi oneehereriwa ahu’”.+

5 Nto Yesu aahaaleela wiira: “Muupuwele wiira nyuwo mookhalana mpatthani, vano munarowa owannyawe ohiyu eriyari, munanvekela muriki: ‘Mpatthani mukoolihe iphaawu tthaaru, 6 okhala wiira mpatthani aka mmosa ohoorwa vatthokoni vaka okhumaka mukwaha awe, masi miyo nkirina etthu yonvaha’. 7 Vano mpatthani inyu owo onnaakhula ori ene mpaani oriki: ‘Munookixatiyari.* Mukhora woowaliwa, nave miyo ni anaaka nihimmaathi Nkikhanle oovenya wiira koovaheeni etthu’. 8 Kinooleelani wiira owo onoovenya tthiri, ni ononvaha mpatthani awe itthu siniphavela awe, ohiya mwaha wookhala mpatthani awe, masi mwaha wa othipelela+ oveka. 9 Nto kinoohimeeryani wiira, muthipeleleke oveka,+ munoovahiwa. Muthipeleleke ophavelasa, munoophwanya. Muthipeleleke omana mukhora, munoohuleliwa.+ 10 Ootheene ale aniveka, anoovahiwa.+ Nave ootheene ale aniphavelasa, anoophwanya, ni ootheene ale animana mukhora, anoohuleliwa. 11 Mweekeekhai, niireke ookhala paapa oniira mwanawe anvekela ehopa, onanvaha enowa, ohiya ehopa?+ 12 Aahiiso anvekela nooce, onanvaha walisi?* 13 Tivonto, nnaamwi muri nyuwo ootakhala murima, munasuwela waavaha itthu sooreera aniinyu, nto niireke Tiithi ori wiirimu khonitepa waavaha ikuru soowaarya ale aninvekela?”+

14 Okathi mukina, Yesu aahoomola nlaikha nootakhala naamwiiriha mulopwana mmosa ohilavula.+ Nuumala nlaikha nne okhuma, mulopwana ole aahipacerya olavula, nto mittitthi sa atthu saahitikinihiwa vanceene.+ 15 Masi akina yaahimya wiira: “Ola onoomola malaikha ootakhala okhaliheriwaka ni Satana,* namalamulela a malaikha ootakhala”.+ 16 Akina, aphavelaka omweehererya, yaahinvekela wiira owooniherye ethoonyeryo+ enikhuma wiirimu. 17 Osuwelaka itthu yuupuwela aya,+ Yesu aawaakhunle wiira: “Omwene onikawanyeya yoowo-ru, onoohononeya. Nave etthoko enikawanyeya yeeyo-ru, enoohononeya. 18 Siiso-tho, akhala wiira Satana onniikawanya mmansawe, nto omwene awe onrowa okhala sai? Nyuwo munihimya wiira kinoomola malaikha ootakhala kikhaliheriwaka ni Satana.* 19 Nto miyo koomolaka malaikha ootakhala kikhaliheriwaka ni Satana,* ankhi atthu anyu, anoomola ni owerya wawani? Ti maana aya, atthu anyu anrowa aya woophukelani. 20 Masi akhala wiira kinoomola malaikha ootakhala kikhaliheriwaka ni ikuru sa Muluku,*+ eyo enitaphulela wiira, Omwene wa Muluku woophiya, nyuwo muhisuwela.+ 21 Okathi mulopwana a ikuru ni orina ikaruma sa ekhotto onikhapelela awe enupa awe, khuuvo oniwerya wiiya mireerelo sawe. 22 Masi arwa mukina orina ikuru sinceene onvikana owo, khinwerya, onnimwaakha ikaruma sawe sa ekhotto aaroromela awe. Nuumala-vo, onnikawanya itthu omwaakhale awe. 23 Ole ohikhanle ni miyo, onnikivirikanya, nave ole ohinithukumanya ni miyo, onnimwara-mwarya.+

24 “Nlaikha nootakhala namukhuma mutthu, ninneettakasa moothakoni, niphavelaka nipuro noomumula. Masi naahiphwanye, ninnihimya so: ‘Kinootthikela empa aka, ekhumale aka’.+ 25 Niphiyaka-ru, ninniphwanya empa eyo eveliwe ene ni ereerihiwe ene oratteene. 26 Vano, ninnirowela malaikha makina 7, ootepa otakhala ovikana nlo. Annikela empa eyo, enakhala memmo. Siiso, makhalelo masya a mutthu ole annitepa onanara ovikana a khalai”.

27 Vano, Yesu olavulaka itthu iya, muthiyana mmosa aari eriyari ya muttitthi wa atthu, aahikhuwela oriki: “Oohakalala ti muthiyana ooyanreni ni owaamwinheni nipele!”+ 28 Nto Yesu aahaakhula wiira: “Nnaari, masi oohakalala taale aniiwa nuulumo na Muluku, aneettela!”+

29 Okathi mittitthi sa atthu saathukumanne aya, Yesu aahihimya wiira: “Nyuwo atthu* ootakhala ni oohiroromeleya! Nyuwo munnithipelela ophavela ethoonyeryo, masi khamunrowa ovahiwa ethoonyeryo ekina, ehikhanle ethoonyeryo ya profeta Yoona.+ 30 Siisaale Yoona+ aari awe ethoonyeryo ya atthu a oNiinive, siiso-tho, Mwaana a Mutthu onrowa okhala ethoonyeryo ya atthu a okathi ola. 31 Nihiku Noophukela, pwiyamwene a osuuli,*+ onoohihimuxiwa vamosa ni atthu a okathi ola wiira aalamule, okhala wiira aahikhuma ottaiwene, arowaka owiriyana miruku sa Salomooni. Masi, moone wiira vaava ookhala mutthu orina efaita yuulupale onvikana Salomooni.+ 32 Nihiku Noophukela, atthu a oNiinive anoohihimuwa vamosa ni atthu a okathi ola wiira yaalamule, okhala wiira yaahirukunuxa mirima saya, nuumala omwiiwa Yoona olaleeryaka.+ Masi, moone wiira vaava ookhala mutthu orina efaita yuulupale onvikana Yoona. 33 Khuuvo onipattiha muthuko, onapweha nipuro noowiipitheya aahiiso onakhuneela ni ettanka.* Masi onipweha osulu-sulu,+ wiira ale anikela mpaani yooneke okokola. 34 “Muthuko wa erutthu, niitho. Tivonto, akhala wiira niitho nanyu ninluluwanya itthu sooreera paahi, erutthu anyu yootheene ennaarya.* Masi, niitho nanyu natakhala,* erutthu anyu yootheene enoosareya epiphi.+ 35 Mukhalane ephoole wiira muthuko orina anyu, ohikhale epiphi. 36 Nto erutthu anyu yootheene yamwaleeliwa ni muthuko, ehinakhalana epiphi, yootheene enookhala nipuro noowaarya, ntoko muthuko onoomwaleelaayani ni waarya waya”.

37 Nuumala Yesu olavula itthu iya, nfarisi mmosa aahimulattula orowa olya yoolya ya othana owannyawe. Nto owo aahirowa, okilaathi, ohameela vameesa. 38 Vano, nfarisi ole aahitikinihiwa nuumala woona wiira Yesu aahipacerya olya ohinyanwe.*+ 39 Masi Pwiya aahimuhimeerya wiira: “Nyuwo afarisi, munnirapiha ekoopho ni eparatho ota-ru, masi muhina mwanyu moosareya ohiphiyeriwa ni otakhala.+ 40 Nyuwo mwa alolo! Khamunsuwela wiira ole opanke epantta ya vate, oopaka-tho ya muhina? 41 Nwiireleke sooreera alipa-oohaawa ni itthu siri vamurimani vanyu, nto itthu sootheene mwa nyuwo sinookhala sooreera. 42 Masi, mootakhaliwa nyuwo afarisi, okhala wiira munnivaha epantta ya namuloko ya ortelaani* ni aruuta* ni makukhu makina.+ Nto munnithanya exariya ni ophenta wa Muluku. Iya ti itthu munirummwa anyu weettela, muhihiyaka sikina.+ 43 Mootakhaliwa nyuwo afarisi, okhala wiira woosivelani okilaathi musinagoga* mapuro oohoolo* ni okhomasiwa ni nttittimiho mapuro oowaatta atthu.*+ 44 Mootakhaliwa nyuwo, maana munlikana ni mahiye ahinooneya oratteene,*+ yaawo atthu anivira aya vasulu vaya ahisuwelaka!”

45 Nto mulopwana mmosa aasuwela saana Nlamulo, aahimuhimeerya Yesu wiira: “Mwiixuttihi, mwaalavulaka siiso, nave munniniveeha hiyo-tho”. 46 Yesu aahaakhula oriki: “Mootakhaliwa nyuwo-tho munisuwela saana Nlamulo, okhala wiira munnaareya atthu miritti soolemela. Masi nyuwo aneene khamuniphavela okwannya, hata ni ekatha anyu!+

47 “Mootakhaliwa nyuwo, okhala wiira munniteka mahiye a maprofeta, yaawo amuhavinre anyu awiivale aya!+ 48 Mweekeekhai, nyuwo moosuwela miteko sa amuhavinre anyu, hata vari siiso muheemererya. Awo aawiiva maprofeta,+ nto nyuwo mooteka mahiye a maprofeta awo. 49 Tivonto miruku sa Muluku saahimmye aya wiira: ‘Kinimwaaroihela maprofeta ni arummwa, nto awo anoowiiva akina ni animwaalupattha akina. 50 Siiso, atthu a okathi ola+ anoovahiwa nthowa mwaha wa ephome emwarexiwe ya maprofeta ootheene, olumwenku ohinatthi opattuxiwa,* 51 okhuma ephome ya Abeli+ mpakha ephome ya Zakariya, yoowo aiviwe eriyari ya altaari ni empa ya Muluku’.*+ Aayo, kinoohimeeryani wiira atthu a okathi ola anoovahiwa nthowa.

52 “Mootakhaliwa nyuwo munisuwela saana Nlamulo, okhala wiira moowaakha atthu ixaavi sa omusuwela Muluku. Nyuwo aneene khamunkela-mo, nave munnaakhoottiherya ale aniphavela okela!”+

53 Nuumala okhuma opuro ole, alipa-oowiixuttiha nlamulo ni afarisi, yaahipacerya onvelaveliha Yesu, ampakelaka makoho manceene, 54 awehereryaka olavula etthu yaarowa owiiriha onvara ni moolumo awe.+