Yoobi
2 Nuumala-vo, naahiphiya nihiku anamwane a Muluku eekeekhai*+ yaaronwe aya wiixooniherya ohoolo wa Yehova.+ Nave-tho, Satana aahirwa vaavo wiixooniherya ohoolo wa Yehova.+
2 Vano Yehova aahimukoha Satana iiraka: “Munikhuma woowi?” Nto Satana aahimwaakhula Yehova oriki: “Kaaronwe weetteetta mulaponi, ni owehaweha mulaponi-mmo”.+ 3 Yehova aahimukoha Satana wiira: “Kiira monweha* murumeyi aka Yoobi? Muhoona wiira mulaponi mootheene khuuvo onlikana nuuwo? Owo mulopwana oororomeleya* ni a xariya,+ onimoova Muluku ni onikhootta itthu sootakhala. Owo nlelo khonihiya okhala oororomeleya,+ nnaamwi nyuwo mweereryaka okiiriha ompwetexa* yena,+ vahikhanle mulattu”. 4 Masi Satana aahimwaakhula Yehova oriki: “Okathi mutthu onihala awe okhwa, oolikanana oleva itthu sootheene wiira oopole okumi awe. 5 Masi, mookole ntata nanyu ni mmukumiherye eretta. Nto munimoona akhala wiira khonrowa wooveehani ohoolo wanyu”.+
6 Nuumala-vo, Yehova aahimuleela Satana wiira: “Owo ori mmatatani mwanyu! Masi muhimwiive!” 7 Siiso, Satana aahikhuma ohoolo* wa Yehova. Nto aahimphwanyiha Yoobi eretta ya makhwatta oowereya,+ okhuma vathi va inawu sawe mpakha vamuru vawe. 8 Yoobi aahikuxa nivali onaisunana. Owo aakilanthi vattuurwani.+
9 Vano mwaarawe Yoobi aahimukoha iiraka: “Nlelo munithipelela ororomeleya? Munveehe Muluku, mukhweeke!” 10 Masi Yoobi aahimwaakhula wiira: “Nyuwo munlavula ntoko muthiyana mulolo. Niireke nihaana waakhela paahi itthu sooreera sinikhuma wa Muluku eekeekhai, masi nihinaakhela itthu soonanara?”+ Nnaamwi Yoobi saamwiiranenle itthu iya sootheene, owo khaatthenke ni eyano awe.+
11 Apatthani araru a Yoobi yaahiiwa maxakha ootheene yaamukhumelenle. Khula mmosa aahikhuma owannyawe onarowa okumana ni Yoobi. Apatthani awo taala: Elifaazi+ a oTemani, Bilidaadi+ a oXuwa,+ ni Sofaari+ a oNaama. Awo yaahiiwanana okumana wiira arowe yammaalihe ni yamulipihe Yoobi. 12 Okathi yanwenhe aya ari ene ottaiwene, awo khiyaamusuwela. Nto yaahipacerya wunla akhuwelaka ni yaahikhera malaya aya. Nave-tho yaahirihela ettuurwa musulu ni mmuru mwaya.+ 13 Nuumala-vo, yaahikilaathi vathi vamosa ni Yoobi mpakha mahiku 7, othana ni ohiyu. Khuuvo aamulavulinhe, okhala wiira awo yaanoona wiira Yoobi aanoona owereya vanceene.+