Samuweli a Nenli

12 Yehova aahimuruma Natani+ orowa wa Davidi. Vaaphiyale awe,+ Natani aahihimya wiira: “Epooma emosa yaahikhala alopwana anli, mmosa oothaaciri mukina oohaawa. 2 Mulopwana owo oothaaciri, aahikhalana ipwittipwitthi ni ipooyi sinceene.+ 3 Masi mulopwana ole oohaawa aarina paahi epwittipwitthi emosa yaamukhaani yoothiyana, yeeyo aathumme awe.+ Owo aanikhapelela epwittipwitthi eyo, ni yaaninnuwa nuuwo vamosa ni anaawe. Epwittipwitthi eyo yaanilya eyoolya vakhaani aarina awe ni yaaniwurerya ekoopho awe, nave yaanirupa mmoononi mwawe. Epwittipwitthi eyo yaahikhala ntoko mwanawe mwaamuthiyana. 4 Muhoolo mwaya, mulopwana ole oothaaciri aahimwaakhela muletto. Masi khaaphavenle wiiva epwittipwitthi nnakhala epooyi awe wiira olokiherye eyoolya ya muletto awe. Ohiya-vo, mulopwana owo aahikuxa epwittipwitthi ya mulopwana ole oohaawa, omuhitela muletto awe”.+

5 Nto Davidi aahinanariwa vanceene ni mulopwana owo, onamuhimeerya Natani wiira: “Ntoko siisaale Yehova onikhala awe,+ mulopwana opanke etthu eyo onniphwanela wiiviwa! 6 Nave ohaana oliva epwittipwitthi eyo ovikana ikwaha xexe,+ mwaha wa opaka eyo ni mwaha wa ohooniherya omoriwa ikharari”.

7 Moottharelana, Natani aahimuhimeerya Davidi wiira: “Mulopwana owo ti nyuwo! Etthu onihimya awe Yehova Muluku a Isarayeli, tiila: ‘Miyo kihoothanlani wiira mukhale mwene a atthu a Isarayeli+ nave koowoopolani mmatatani mwa Sawuli.+ 8 Miyo kihoovahani etthoko ya pwiya anyu+ ni kihoovahereryani mmatatani mwanyu axaarawe pwiya anyu.+ Nave kihoovahani etthoko ya atthu a Isarayeli ni ya Yuda.+ Koonale aka wiira khivaaphiyerya, kaahilakela owiirelani itthu sinceene.+ 9 Xeeni muhalaka ohittittimiha moolumo a Yehova mpakaka itthu sootakhala ohoolo wawe? Nyuwo moomwiiva Uriya, muhiti ni espaata!*+ Nuumala omwiiviha Uriya owo ni atthu a wAmoni,+ moomukuxa mwaarawe mmuthela.+ 10 Vano espaata khenrowa okhuma vatthokoni vanyu,+ okhala wiira khamukittittiminhe, mmuthelaka mwaarawe Uriya muhiti’. 11 Etthu onihimya awe Yehova, tiila: ‘Kinimookumiheryani ehasara ni atthu a vatthokoni vanyu,+ nave kinimwaakuxa axaarinyu, kinvahe mulopwana mukina.+ Nto mulopwana owo, onoorupa ni axaarinyu ohoolo wa atthu ootheene.+ 12 Nyuwo mpanke ni mwiitiho,+ masi miyo kinrowa opaka etthu ela ohoolo wa aisarayeli ootheene’”.

13 Davidi aahimuhimeerya Natani oriki: “Koomutthekela Yehova”.+ Natani aahimwaakhula Davidi wiira: “Yehova ohoolevelelani etampi anyu.+ Nyuwo khamunrowa okhwa.+ 14 Nto okhala wiira khammuttittiminhe Yehova mpakaka etthu ela, mwaninyu oyariwe niinaano onimookhwa”.

15 Natani aahirowa owannyawe.

Nave Yehova aahimukumiherya eretta mwaana aayariwe ni mwaara a Uriya, yoowo aayareliwe awe Davidi. 16 Davidi aahimuxonttela Muluku eekeekhai mwaha wa mwaana owo. Owo aanitthukwa, nave ohiyu aanikela okwartu wawe onampaathi vathi.+ 17 Makhulupale a etthoko ya mwene, yaaniimananiha onvenxa vathi ammaathale awe, masi owo aanikhootta, ni khaaphavela olya naawo. 18 Nihiku na neethanu nenli, mwaana owo aahikhwa. Masi arumeyi a Davidi yaanoova omuleela wiira mwaana aahikhwa. Awo yaahimya wiira: “Mwaana owo ori ene mukumi hiyo naahilavula ni Davidi, masi owo khaaniwiriyanne. Nto ninrowa owerya sai omuleela wiira mwaana ohookhwa? Woonasa wene, owo onoopaka etthu yootepa otakhala”.

19 Okathi Davidi aawoonale awe arumeyi awe avaanelaka vathi-vathi, aahisuwela wiira mwaana aahikhwa. Davidi aahaakoha arumeyi awe oriki: “Mwaana ohookhwa?” Awo yaahaakhula wiira: “Aayo, ohookhwa”. 20 Davidi aahivenya vathi ampaathale awe, orapa, ootta makhura+ ni oturuka ikuwo. Moottharelana aahirowa mpaani+ mwa Yehova okokhora. Nuumala-vo, aahirowa owannyawe,* ovekela yoolya, olya. 21 Arumeyi awe yaahimukoha wiira: “Xeeni muniira anyu siiso? Okathi mwaana ari awe mukumi mwaanitthukwa ni mwaaninla. Masi vano mwaana okhwiiye awe, nyuwo moovenya, munalya”. 22 Davidi aahaakhula oriki: “Okathi mwaana ari awe mukumi miyo kaanitthukwa+ ni kaaninla, okhala wiira kaanuupuwela so: ‘Woonasa wene, Yehova onookimorela ikharari ni onoomuhiya mwaana ori ene mukumi’.+ 23 Vano mwaana owo ohookhwa, xeeni kikhanle aka ootthukwa? Kiireke nnoowerya omuttikiherya okumi?+ Miyo kinoorowa ori awe,+ masi owo khonkitthikela”.+

24 Davidi aahimmaaliha mwaarawe, Bati-Xeba.+ Aahikelana mpaani, orupana. Nuuvira okathi Bati-Xeba aahimuyara mwaana mwaamulopwana, onvaha nsina noowi: Salomooni.*+ Nave Yehova aanimphenta mwaana owo,+ 25 tivo aahimuruma profeta Natani+ onvaha nsina noowi Yedidiya,* okhala wiira Yehova aanimphenta.

26 Yowabi aahithipelela owana ni atthu a oRaba+ wa wAmoni+ ni aahikuxa epooma ya mwene.+ 27 Nto Yowabi aahaaruma alopwana omuleela Davidi wiira: “Koowana ni atthu a oRaba+ ni kookuxa epooma ya maasi.* 28 Vano mwaathukumanye atoropa akina ahanle, murowe mwaipithele epooma eyo ni mwakuxe. Mwaahiire siiso, miyo kinookuxa epooma eyo, nto atthu anrowa okivuwihaka”.*

29 Siiso, Davidi aahaathukumanya atoropa ootheene, aahirowa oRaba, owana ekhotto, okuxa epooma eyo. 30 Davidi aahikuxa ekhara yaari vamuru va muluku Malikomi. Ekhara eyo yaalemela etalento* emosa ya eweero, vamosa ni maluku oowaaryexa, nave ekhara eyo yaahiheliwa vamuru wa Davidi. Owo aahikuxa-tho itthu sinceene+ epooma ele.+ 31 Davidi aahaakuxa atthu a epooma eyo wiira yathikileke maluku ni seroti, yavareke muteko ni ikaruma sa iyuuma soononiwa ni amaxatto a iyuuma ni yaapakeke itixolu. Eyo ti etthu Davidi aawiirinhe awe atthu a epooma ya wAmoni. Nuumala-vo, Davidi ni atoropa awe ootheene yaahitthikela oYerusalemu.