Yesaya
30 Yehova onihimya wiira: “Aatakhaliwa anamwane oohiiwelela,+
Yaawo anaapaka apalano aya, ohiya awaka,+
Yaawo anipaka nivarihano,* masi miyo kihiphavenle.
Siiso, annincererya itampi saya.
3 Masi okhapeleliwa ni Farawo, onrowa owuulihiha muru,
Nave otthyawela wExiitu, onrowa owuulihiha muru.+
4 Makhulupale aaphiya oSowani,+
Nave anamitthaka aaphiya oHanesi.
5 Awo animuulihihiwa muru,
Ni atthu ahinivareleya muteko,
Yaawo ahinaakhaliherya nnakhala ahinaaphwanyiha mureerelo.
Awo aniwuulihiha muru paahi ni owiiriha oveeheya”.+
6 Muhupi woophukela oniroiheliwa inama sa oNegebi,* tuula:
Awo annivira elapo yoowoopiha,
Elapo ya kharamu, eyo piiyo, kharamu onoopa mirukulu,
Elapo ya ivili ni ya inowa soowaakuva weetta.
Awo annikuxa mihakhu saya vasulu va apuuru,
Ni mireerelo saya vasulu va ikamelo.
Masi itthu iya khasinrowa waakhaliherya atthu.
7 Okhaliheriwa ni Exiitu ti weethiru.+
Tivonto, kaahimwiihana “Rahabi,+ yoowo orookilaathi paahi, ohivaraka etthu”.
8 Vano, murowe mwalepe muhupi ola vathaapwani, ohoolo waya,
Nave mwalepe muliivuruni,+
Wiira erumeeliweke ohoolo,
Ntoko namoona a mahiku ootheene.+
10 Annaaleela atthu yaale anoonihiwa itthu, yiiraka: ‘Muhooneke’,
Nave annaaleela ale anoonihiwa itthu sinrowa wiiraneya ohoolo, wiira: ‘Muhinileeleke itthu seekeekhai moonihiwe anyu.+
Munileeleke itthu sooreera; nweheke itthu sinnoototha.+
11 Muhapuwe ephiro yeekeekhai; mukhume ephiro eyo.
Muhiye olavula ni hiyo, mmuhimyaka Muluku Oowaarya a Isarayeli’”.+
12 Tivonto, etthu onihimya awe Muluku Oowaarya a Isarayeli, tiila:
“Okhala wiira mookhotta moolumo ala,+
Ni muniroromela wootha ni wiiya,
Nave munlipa ni itthu seiyo,+
13 Mwaha wa etampi anyu, nyuwo muri ntoko exiri yoophweeya,
Muri ntoko exiri yoorakamela osulu, ethetemanne ni enihala omora.
Eyo enoomora niinaano-ru ni vootutuxerya.
14 Enoopwexiwa ntoko murinki muulupale,
Yoowo oniphweeya wootheene, ohinahala nnakhala nivali,
Wiira nivaleliweke mooro,
Aahiiso nirikaniweke maasi veehimeni”.*
15 Etthu onihimya awe Pwiya Muulupalexa Yehova, Muluku Oowaarya a Isarayeli, tiila:
“Mwaphavela woopoliwa, muhaana otthikela wa miyo ni mukilipeleleke.
Nyuwo munookhala oolipa, vakhala wiira munoomaaleleya ni munookiroromela”.+
Masi nyuwo khamphavenle.+
16 Ohiya-vo, munihimya wiira: “Nnaari, hiyo nnootthyawa niwenle ene ikhavalo!”
Mweekeekhai, nyuwo munootthyawa.
Nave munihimya wiira: “Ninrowa owela ikhavalo soowaakuva otthimaka!”+
Aayo, nave ale anrowa owoomolani anrowa waakuveyaka.+
17 Atthu 1.000 anoottettemelaka mwaha wa woopopihiwa ni mutthu mmosa.+
Nyuwo munrowa otthyawaka mwaha wa woopopihiwa ni atthu athanu.
Atthu anrowa ohala ni nyuwo, anrowa okhalaka ntoko mwiri onithomeiwa epantera, ori vasulu va mwaako,
Ntoko epantera ethipeliwe nipuro noottukhuwa.+
18 Masi Yehova onnoolipelelani opixaka murima,* wiira ooreereleni murima,+
Nave, onimweemela wiira oomoreleni ikharari.+
Yehova ti Muluku a xariya.+
Oohakalala taale animulipelela ni murima aya wootheene.+
19 Okathi atthu anrowa aya okhalaka oSiyoni, oYerusalemu,+ nyuwo khamunrowa wunla.+ Mweekeekhai, owo onimooreerelani murima okathi munrowa anyu okhuwelaka, nvekelaka okhaliheriwa. Onoowaakhulani aiwaka-ru okhuwela wanyu.+ 20 Nnaamwi Yehova orowaka woovahani oxanka ntoko eyoolya anyu, ni ohaaxiwa ntoko etthu yoowurya,+ masi Mwiixuttihi anyu Muulupalexa khonrowa-tho wiipitha. Nave, munonweha Mwiixuttihi anyu Muulupalexa+ ni maitho anyu. 21 Mwaahapuwelaka moono woolopwana aahiiso woothiyana,+ munimwiiwa nsu ottuli wanyu, nihimyaka wiira: “Ephiro yeekeekhai tiila.+ Mutthareke yeela”.
22 Nyuwo munoonanariha ilatarato sanyu soopatthiwa, seiyo sisirikeliwe ni eparatha, ni ilatarato sanyu sa eyuuma, seiyo sisirikeliwe ni eweero.+ Munoorihela ota, ntoko nttapwatta noonanara, muhimyeke wiira: “Khuma-va!”*+ 23 Nave Muluku onoorupihela epula ipyo mwaalale anyu.+ Eyoolya munrowa anyu oruwerya, enrowa okhala yoowaatta ni yoosiva.+ Okathi owo, mihuwo sanyu sinrowa olyaaka mapuro oowaatta malaxi.+ 24 Nave-tho, ipooyi ni apuuru anilima mmatta, sinrowa olyaaka eyoolya yooreera ni yooveeriwa. 25 Nihiku anrowa aya wiiviwa atthu anceene ni sinrowa aya omora ipa soorakamela osulu, sinoophattuwa miro vasulu va miyaako sootheene soorakama ni mattumuxa ootheene.+ 26 Nihiku Yehova onrowa awe otthukwa nikhuva noowunteya na atthu awe+ ni ovoliha nikhwatta nuulupale aavulalinhe awe,+ waarya wa mweeri woosarya, onrowa olikanaka ni waarya wa nsuwa. Nave waarya wa nsuwa, onimuncerereya mpakha ikwaha 7,+ ntoko waarya wa mahiku 7.
27 Mwiiwe! Yehova* onnoorwa okhumaka ottaiwene,
Onanariwe ene vanceene ni onnoorwa ni meeku ooriipa.
Owo onnilavula onanariwe ene,
Nave nlumi nawe ninlikana ni mooro ompwetexa.+
28 Iphumu sawe siri ntoko maasi manceene aniphiya mpakha muxikoni,
Wiira aaxekexe atthu, siisaale mutthu onimuxekexa awe xeefa wiira okumihe ikavava sa ipyo.
Nave onoohela mikhoyi mwaano mwa atthu+ wiira aathweelelihe.
29 Masi atthu anrowa wiipa nsipo ntoko nenne nniipiwa ohiyu,
Munootteeliwa murima,
Mulikaneke ni mutthu oneetta oopaka ephivi,*
Orowaka omwaako wa Yehova, yoowo ori ntoko mwala para Isarayeli.+
30 Yehova onoowiiriha atthu wiiwa nsu nawe noovuwa,+
Nave onookuruxa moono awe wa ikuru,+ onanariwe ene vanceene,+
Ni opattaka mooro munceene,+
32 Khula ekwaha Yehova onrowa awe waamanaka asiiria,
Ni ekopo awe para waavaha ehukhumu,
Onimwiiwanyeyaka oruma wa malapa macikhaani* ni aviola,+
Okathi onrowa awe wookola moono awe, wiira owane naawo okhottoni.+
Ohuukela ikhuni sinceene nipuro nuulupale ni noowiixa,
Nirina mooro munceene.
Iphumu sa Yehova, seiyo sinlikana ni enxoofere yinceene,
Ti sinrowa opattiha mooro owo.