Miteko sa Arummwa
17 Paulo ni Sila yaahivira muttetthe wa wAnfiipoli ni wApolonia, khuphiya oTesaloonika,+ weiwo yaari esinagoga* ya ayuda. 2 Vano, ntoko aalimalenle awe, Paulo aahikela+ musinagoga* mwaya. Nto aahiviriha isaabadu tthaaru eereryaka waakhaliherya wiiwexexa Soolempwa,+ 3 aatthokiheryaka ni owooniheryaka Soolempwa, wiira Kristu aahaana ohaawa,+ okhwa ni ohihimuxiwa mookhwaani.+ Paulo aahihimya wiira: “Yesu ti Kristu, yoowo kinoolaleeryaakani”. 4 Siiso, atthu akina yaahaamini ni yaahikhala vamosa ni Paulo ni Sila.+ Nave, akereku anceene yaamukokhorela Muluku ni athiyana anceene oottittimiheya, yaahaamini.
5 Nto ayuda yaahisareya nrima+ ni yaahaathukumanya atthu ootakhala murima, yaawo yeettakasa mmerkaatu. Nuumala-vo, yaahikumiherya onyakulihana epooma ele. Yaahikela empa ya Yasoni, amphavelaka Paulo ni Sila wiira yaaroihe waari muttitthi wa atthu ootakhala. 6 Masi okhala wiira khiyaaphwannye, yaahimpurula Yasoni ni anna akina, yaaroihaka wa anamalamulela a epooma, akhuwelaka wiira: “Alopwana yaale anikumiherya onyakulihana mapuro ootheene, nave-tho aaphiya nno.+ 7 Yasoni oowaakhela vatthokoni vawe. Alopwana ala ootheene, annivirikanya malamulo a Seesari, ahimyaka wiira ookhala mwene mukina, oniihaniwa Yesu”.+ 8 Vaiwale aya moolumo awo, anamalamulela a epooma vamosa ni muttitthi wa atthu, yaahituthuwa. 9 Nuumala Yasoni ni anna oliva musurukhu waavekeliwa wiira ataphuliwe, awo yaahaataphula anaahiya arowaka.
10 Ohiyu ene yoowo, axinna yaahimuruma Paulo ni Sila, wiira avenye voohipisa, arowaseke oBereya. Vaaphiyale aya, yaahikela musinagoga* mwa ayuda. 11 Vano, ayuda a oBereya yaari atthu yaaphavela wiixutta vanceene, waavikana ale a oTesaloonika, okhala wiira ale a oBereya yaaniphavela vanceene waakhela nuulumo na Muluku. Nave-tho, khula nihiku yaanitokosa oratteene Soolempwa, wiira yoone vakhala wiira itthu yaiwale aya, saari seekeekhai. 12 Tivo, atthu anceene yaahaamini, nave-tho athiyana akereku anceene oottittimiheya vamosa ni alopwana akina, yaahaamini. 13 Okathi ayuda a oTesaloonika yaiwale aya wiira Paulo aanaalaleerya-tho nuulumo na Muluku atthu a oBereya, awo yaahirowa weiwo waawoka* atthu wiira yaarukunuwele.+ 14 Niinaano-ru, axinna yaahimuleela Paulo wiira oroweke ophareya,+ vamosa ni anna akina. Masi Sila ni Timootheyo yaahihala weiwo. 15 Ale yaamuhoola Paulo, yaahirowa mpakha wAthena. Vano awo yaahitthika, nuumala Paulo waahimeerya wiira yamuleele Sila ni Timootheyo+ wiira arowase yakumane ni Paulo voohipisa.
16 Okathi Paulo aamulipelela awe Sila ni Timootheyo wAthena, owo aahinanariwa vanceene, voonale awe wiira epooma ele yaahisareya amuluku eethiru. 17 Siiso, aahipacerya owiixuttiha ayuda musinagoga,* vamosa ni atthu akina yaamukokhorela Muluku. Nave-tho khula nihiku, aaniwiixuttiha atthu aaphwanya awe omerkaatu, owiirihaka wuupuwelela etthu aahimya awe. 18 Masi atthu akina, yaawo yaatthara soowiixuttiha sa Epikuro* ni Sitoiko,* yaanivaanyihana ni Paulo. Akina yaahimya so: “Namukhwa-anepa* ola oolavulasa, onihimya exeeni?” Nave-tho akina yaahimya wiira: “Onikhala ntoko onaalaleya amuluku a ilapo sikina”. Awo yaahimya siiso, okhala wiira Paulo aalaleya ihapari sooreera sa Yesu ni ohihimuxiwa wa alipa-ookhwa.+ 19 Siiso, awo yaahimuroiha Paulo wAreopago,* anamukoha wiira: “Mookhala oonileela etiini ela esya munihimya anyu? 20 Maana muniixuttiha itthu nihitonko ahu wiiwa. Nto hiyo nimphavela osuwela etthu enitaphulela aya itthu iyo”. 21 Tthiri, atthu ootheene a wAthena vamosa ni ale yaaxukurya epooma ele, yaaniviriha okathi yahaavara aya etthu, alavulaka aahiiso awiriyanaka itthu isya. 22 Vano, Paulo aaheemela eriyari ya wAreopago,*+ onalavula wiira:
“Nyuwo atthu a wAthena, kinnoona wiira mwa itthu sootheene, nyuwo munnivarexexa etiini. Noolikanyihani ni atthu akina, nyuwo munnitepexa owoova amuluku.+ 23 Mwa ntakiheryo, okathi keettaaka, kiwehawehaka oratteene itthu munikokhorela anyu, komphwanya altaari mmosa olempwale so: ‘Altaari a Muluku Ohinimusuwela ahu’. Tivo, ele munikokhorela anyu muhisuwelaka, ti yeeyo kinoolaleeryaakani. 24 Muluku opattunxe olumwenku wootheene ni itthu sootheene siri memmo, yoowo ori Pwiya a erimu ni elapo,+ khonikhala mutemplo etekiwe ni matata a atthu.+ 25 Nnakhala khonilipelela okhaliheriwa ni atthu, okhala wiira khiivo enimuthowa.+ Owo tonaavaha atthu iphumu, okumi+ ni itthu sootheene. 26 Nave, mwa mutthu mmosa,+ Muluku ohaakumiherya atthu a maloko ootheene, wiira akhaleke elapo yootheene ya vathi.+ Owo oohela okathi ni oovaha mikano sa mapuro apinaatamu yaarowa aya okhalaka.+ 27 Muluku oniphavela wiira atthu amwaavyeke, yaapapeleke amphavelaka wiira amphwanye.+ Tthiri, owo ori vakhiviru wa khula mmosa a hiyo. 28 Mwaha wa yoowo, hiyo nookhalana okumi, ninneetta ni nookhala, siisaale ntoko alipa-oolepa a muttetthe anyu ola, anihimya aya wiira: ‘Nave-tho hiyo na anamwane awe’.
29 “Tivonto, okhala wiira na anamwane a Muluku,+ nihuupuweleke wiira Muluku owo onlikana ni elatarato ya eweero, aahiiso ya eparatha, nnakhala ya nluku, seiyo sinuupuweliwa ni sinipakiwa ni apinaatamu.+ 30 Ekeekhai wiira khalai, Muluku aanaahiya atthu apakaka itthu iyo mwaha woohisuwela,+ masi vano owo onnaaleela atthu ootheene anikhala mapuro ootheene, wiira arukunuxe murima. 31 Muluku oothanla nihiku onrowa awe waaphukela mwa xariya+ atthu ootheene anikhala mulaponi, omurumeelaka mulopwana omuthanlale awe. Vano, oomuhihimuxa mulopwana owo, wiira owooniherye atthu ootheene wiira nihiku nlo nnoophiya tthiri”.+
32 Nto, okathi atthu yaiwale aya oromoliwaka ohihimuxiwa wa alipa-ookhwa, akina yaahipacerya omutheya.+ Nto akina yaahimya wiira: “Ninrowa owiiwakani-tho okathi mukina”. 33 Tivo, Paulo aahikhuma opuro ole. 34 Hata vari siiso, atthu akina yaahaamini, anakhala vamosa nuuwo. Mulopwana mmosa aaminni, aari Dionisio, yoowo aari mulipa-oophuka milattu a etripunaale ya wAreopago.* Aahikhala-tho muthiyana aihaniwa Daamari. Nave, yaahikhala-tho atthu akina.