Atesaloonika Oopacerya
2 Axinnaka, nyuwo moosuwela oratteene wiira hiyo khinooxukunryeni mahala ene.+ 2 Ntoko munisuwela anyu, nnaamwi woopaceryani naahaawale ni naahaaxiwe oFilipi,+ Muluku oonivaha olipa murima wiira noolaleeryeni ihapari sooreera,+ nnaamwi nivaanyihiwaka vanceene.* 3 Otumererya wahu khahiyo ti woowootha, nnakhala khannootumereryani ni muupuwelo wootakhala hata khanimphavela woowokani. 4 Masi, hiyo ninlavula ntoko atthu athanliwe ni Muluku wiira alaleye ihapari sooreera. Khaninlavula wiira naasivelihe atthu, masi nimphavela omusiveliha Muluku, yoowo onisuwela mirima sahu.+
5 Nyuwo munnisuwela wiira hiyo khanitonko woowokani nirumeelaka moolumo ooreera, nnakhala khinootherenrye okhala atthu ooloka, wiira niphwanye etthu.+ Muluku onnisuwela saana etthu ela! 6 Nnakhala khanimphavela ovuwihiwa ni apinaatamu, mukhale nyuwo aahiiso atthu akina. Ntoko arummwa a Kristu,+ hiyo nanwerya wooreyani muritti woolemela wiira munikhapeleleke. 7 Ohiya-vo, okathi naari ahu ni nyuwo naahiikhaliha ooreera murima, ntoko maama onaamwiha onaakhapelela awe anaawe. 8 Okhala wiira ninnoophentani vanceene,+ naahihakalala* woolaleeryani ihapari sooreera sa Muluku. Masi ohiya paahi opaka eyo, hiyo naahileva okumi ahu+ wiira nookhaliheryeni.
9 Axinnaka, tthiri nyuwo munnisuwela wiimananiha wahu ni muteko woolipa nivanre ahu. Okathi noolalenryaahuni ihapari sooreera sa Muluku, hiyo naahivara muteko ohiyu ni othana wiira niikhapelele, nihiphavelaka omureya muritti khula mmosa a nyuwo.+ 10 Okathi naari ahu ni nyuwo, naahiroromeleya, naahipaka itthu sa xariya ni khinaarina mulattu. Nyuwo vamosa ni Muluku, mwa anamoona ahu. 11 Nave munnisuwela oratteene wiira hiyo naanoolipihani, woomaalihani ni woolopolani,+ siisaale paapa+ oniwiirela awe anaawe. 12 Hiyo naahiira siiso, wiira nyuwo mweetteke ntoko Muluku oniphavela awe,+ yoowo oniwiihanani wiira mukele Moomweneni mwawe,+ ni mwaakhele ovuwa.+
13 Tivonto, hiyo-tho ninnimuxukhuru Muluku voohihiyererya,+ okhala wiira okathi mwaakhenle anyu nuulumo na Muluku, nenlo noolalenryaahuni, nyuwo khimwaakhenle ntoko nuulumo na atthu, masi mwaakhenle ntoko siri aya, eyo piiyo, ntoko nuulumo na Muluku, nenno nnookhaliheryani nyuwo atthu oowaamini. 14 Mweekeekhai, nyuwo axinna mootthara ntakiheryo na miloko sa makristau a oYudeya, seiyo siri miloko sa Muluku, okhala wiira nyuwo moohaawa mmatatani mwa atthu a elapo anyu,+ itthu simosa-ru yaahaawale aya axinna a oYudeya mmatatani mwa ayuda, 15 yaawo amwiivale Pwiya Yesu,+ awiivale maprofeta ni yaanilupattha.+ Atthu awo khanimusiveliha Muluku, nave itthu anipaka aya khasinaaphwanyiha mureerelo atthu. 16 Awo anneererya onikhoottiherya waalaleerya atthu ahikhanle ayuda, moota akhanle aya oowoopoliwa.+ Siiso, awo annitepa wuncererya itampi saya. Masi, oviruwa wa Muluku ohaaphwanya.+
17 Axinnaka, khalai hiyo naahivalaana ni nyuwo okathi vakhaani, masi khinaavalanne vamurimani. Nto, okhala wiira naaniphavela tthiri woowehani, naahiimananiha vanceene wiira nirwe wooxukuryani.* 18 Tivonto, naaniphavela orwa wooxukuryani. Mweekeekhai, miyo Paulo, kaaheererya orwa ikwaha piili, masi Satana aahittiyelela ephiro ahu. 19 Okathi Apwiya Yesu anitthika* aya, tani anrowa okhala nlipelelo nahu, otteeliwa wahu murima ni etthuvo* ahu? Kiira ti nyuwo?+ 20 Mweekeekhai, nyuwo ti mukhanle ovuwa wahu ni otteeliwa wahu murima.