Wahala a Nenli

6 Nto mwene Salomooni aahihimya wiira: “Yehova aahilavula wiira aarowa okhalaka vameekuni ooriipela.+ 2 Vano kihootekelani empa ela yoolokexa wiira mukhaleke, opuro munrowa anyu okhalaka mahiku ootheene”.+

3 Moottharelana, mwene aahirukunuwa onaaweha atthu ootheene a nloko na Isarayeli onaareeliha, nlelo atthu ootheene a nloko na Isarayeli yeemenle ene ohoolo wawe.+ 4 Owo aahihimya wiira: “Ottottopeliwe Yehova Muluku a Isarayeli, yoowo aamuleihenrye paapa aka Davidi ni eyano awe ni aamalihenrye itthu sootheene ni matata awe, oriki: 5 ‘Okhuma nihiku kaakuminhe aka atthu aka elapo ya wExiitu, nkaathanlale epooma eriyari ya mahimo ootheene a Isarayeli, wiira kitekeliwe empa erina nsina naka, yeeyo kaarowa aka okhalaka-mo,+ nave nkaamuthanlale nnakhala mulopwana mmosa wiira aahooleleke atthu aka aisarayeli. 6 Masi koothanla oYerusalemu+ wiira nsina naka nikhaleke weiwo, nave koomuthanla Davidi wiira aalamuleleke atthu aka aisarayeli’.+ 7 Paapa aka Davidi aaniphavela ni murima wootheene oteka empa erina nsina na Yehova, Muluku a atthu a Isarayeli.+ 8 Masi Yehova aahimuhimeerya paapa aka Davidi, wiira: ‘Nyuwo munniphavela ni murima anyu wootheene oteka empa erina nsina naka, nave munniira saana ophavela eyo ni murima anyu wootheene. 9 Hata vari siiso, nyuwo khamunrowa oteka empa eyo, masi mwaninyu mwaamulopwana munrowa anyu oyareliwa, tonrowa oteka empa erina nsina naka’.+ 10 Yehova oomaliherya etthu aaleihenrye awe, okhala wiira koomuranttela paapa aka Davidi ni kookilaathi veehiceni ya atthu a Isarayeli,+ ntoko Yehova aaleihenrye awe.+ Nave-tho kooteka empa erina nsina na Yehova, Muluku a Isarayeli, 11 ni koopweha weiwo Nivuku na Nivarihano, nenlo nirina nivarihano+ Yehova aapanke awe ni atthu a Isarayeli”.

12 Moottharelana, Salomooni aaheemela ohoolo wa altaari a Yehova ni ohoolo wa nloko nootheene na atthu a Isarayeli, oteexerya matata awe osulu.+ 13 Salomooni aahipaka etthu yaalikana ni ekaaxa ya ekoopiri, opweha eriyari ya nivate, wiira eemeleke-vo.+ Orakama waya waari etthu yoowiiraka imeeturu piili,* wunnuwa waya waari etthu yoowiiraka imeeturu piili ni okhuveya waya waari etthu yoowiiraka emeeturu emosa; nto aaheemela vaavo. Nuumala-vo, aahikokhora ohoolo wa nloko nootheene na atthu a Isarayeli, oteexerya matata awe osulu,+ 14 onahimya wiira: “Khoo Yehova Muluku a atthu a Isarayeli, khuuvo Muluku mukina wiirimu, hata vathi-va, onlikana ni nyuwo. Nyuwo munneettela nivarihano mpanke anyu, nave munniwooniherya ophenta woororomeleya arumeyi anyu aneetta ohoolo wanyu ni murima aya wootheene.+ 15 Nyuwo moomaleliha etthu mwaamuleihenrye anyu murumeyi anyu Davidi, paapa aka.+ Mwaahimuleiherya ni eyano anyu. Nave olelo moomaleliha ni ntata nanyu.+ 16 Vano, khoo Yehova Muluku a Isarayeli, mmaliherye etthu mwaamuleihenrye anyu murumeyi anyu Davidi, paapa aka, okathi mwaamuhimenrye anyu wiira: ‘Okathi wootheene, osuulu anyu onrowa okilaathiki veehiceni va atthu a Isarayeli, vakhala wiira aniinyu animweettelaka malamulo aka,+ ntoko nyuwo mweettale anyu ohoolo waka’.+ 17 Nto, khoo Yehova Muluku a Isarayeli, mmaliherye etthu mwaamuleihenrye anyu murumeyi anyu Davidi.

18 “Veekeekhai, niireke Muluku onookhala ni apinaatamu vathi-va?+ Hata wiirimu, niire so, wiirimu wootheene khamuniphiyerya okhala,+ vootepa empa ela kitenke aka!+ 19 Vano, khoo Yehova Muluku aka, mwiiwe nivekelo na murumeyi anyu ni etthu onivekela awe. Nave nwiriyane okhuwela wa murumeyi anyu onivekela okhaliheriwa. Mwiiwe nivekelo onipaka awe ohoolo wanyu. 20 Maitho anyu, aweheke empa ela othana ni ohiyu, opuro ola ohimyale anyu wiira munoopweha nsina nanyu,+ nwiriyane ovekela wa murumeyi anyu, okathi onirukunuwela awe otemplo ovekelaka. 21 Nwiriyane okathi murumeyi anyu onoovekelaaweni nikhaliheryo, ni etthu atthu anyu aisarayeli anoovekelaayani, okathi anivekela aya awehaka opuro ola.+ Nave nwiriyane muri ene opuro munikhala anyu, wiirimu.+ Nwiriyane ni munilevelele.+

22 “Akhala mutthu onimutthekela mukhwaawe, onakhanyereriwa wiilaphela, nuumala olapha, onarowa weemela ohoolo wa altaari anyu otemplo,+ 23 nwiriyane wiirimu muri anyu, nave mpake etthu ni mwaaphukele arumeyi anyu: Mmuliverye ole opanke etthu yootakhala, mwiirihaka etthu yootakhala opanke awe ommorela yena.+ Nave mmuhimye oohikhalana mulattu ole ori naxariya, mmureelihaka moovarihana ni exariya awe.+

24 “Nave okathi atthu anyu aisarayeli anrowa aya oweriwa ni nwanani aya mwaha wa othipelela wootthekelani+ ni yatthika wiira avuwihe nsina nanyu+ ni yavekela+ ohoolo wanyu yooxonttelakani ari ene empa ela,+ 25 wiirimu muri anyu, mwaawiriyane+ ni mulevelele yoottheka ya atthu anyu aisarayeli ni mwaattikiherye elapo mwaavanhe anyu awo vamosa ni amuhavinre aya.+

26 “Erimu yawaleya ehinarupa epula,+ mwaha wa atthu anyu othipelelaka wootthekelani,+ nto anavekela awehaka opuro ola, avuwihaka nsina nanyu, anattharuwa yoottheka aya mwaha wa owiixuttiha wanyu okhala oowiiyeviha,+ 27 nto wiirimu muri anyu, mwaawiriyane ni mulevelele yoottheka ya arumeyi anyu, eyo piiyo, atthu anyu aisarayeli ni nwiixuttihe ephiro yooloka ekhanle aya ootthara.+ Nave murupihele epula+ mulaponi mwaavanhe anyu atthu anyu ntoko yoohiyeriwa.

28 “Yakhumelela etala mulaponi,+ aahiiso ekwerere,+ wala oviha vanceene, nave yakhumelela eretta ya miri,+ akhumelela nasope munceene,+ aahiiso awanani aya yaarukurerya khula epooma ya elapo eyo+ ni yakhumelela eretta ekina,+ 29 nto khula mutthu, aahiiso nloko nanyu nootheene na Isarayeli, navekela,+ nooxonttelakani khula etthu,+ (okhala wiira khula mmosa onnisuwela mixankiho sawe ni onnisuwela etthu eninwereya)+ yateexerya matata aya osulu, awehaka empa ela,+ 30 nto wiirimu muri anyu, opuro munikhala anyu,+ nwiriyane ni mwaalevelele.+ Nave, mmutthuvele khula mmosa moovarihana ni iphiro sawe sootheene, okhala wiira nyuwo munnisuwela mirima saya, (nyuwo paahi, munnisuwela oratteene mirima sa atthu ootheene),+ 31 wiira yoottittimihekeni vanceene* yeettelaka iphiro sanyu mahiku ootheene anikhala aya elapo mwaavanhe anyu amuhavinre ahu.

32 “Nave, mutthu onikhuma elapo ekina, ohiniirela mpantta nloko nanyu na aisarayeli, onirwa okhumaka elapo ya ottaiwene mwaha wa nsina nanyu nuulupale+ ni itthu soowerya mpanke anyu ni ntata nanyu, orwaaka ovekela owehaka empa ela,+ 33 munwiriyane muri ene wiirimu, opuro munikhala anyu. Nave mpake ele namurwa oniveka awe wiira atthu a ilapo sootheene asuwele nsina nanyu+ ni yoottittimihekeni vanceene,* ntoko aniira aya atthu a Isarayeli. Siiso, awo anoosuwela wiira nsina nanyu ninniromoliwa empa ela kitenke aka.

34 “Akhala wiira atthu anyu anoorowa owana ni awanani aya, attharaka ephiro nwoonihenrye anyu,+ nto anoovekelani nyuwo,+ awehaka epooma ela muthanlale anyu ni awehaka empa kitenke aka erina nsina nanyu,+ 35 nto muri ene wiirimu, mwiiwe ovekela waya, mwaawiriyane anoovekelaayani waareerela murima ni nwiirele exariya.+

36 “Akhala wiira atthu awo animootthekelani (okhala wiira atthu ootheene annittheka),+ nyuwo munanariwa naawo ni mwaavahererya awanani aya, nto awo yaakuxa ntoko ipottha yaaroiha elapo aya, okhale ottaiwene aahiiso vakhiviru,+ 37 vano awo anuupuwela saana elapo aroihiwe aya ntoko ipottha, anootthikelani ni anooxonttelani elapo ari aya ntoko ipottha, ahimyaka wiira: ‘Hiyo nihootthekelani ni noopaka etthu yoohiloka. Noopaka itthu sootakhala’,+ 38 nto awo yootthikelani ni murima aya wootheene+ ni okumi aya wootheene ari ene elapo aroihiwe aya ntoko ipottha,+ anoovekelani awehaka elapo mwaavanhe anyu amuhavinre aya, epooma muthanlale anyu,+ ni empa ela kootekenlyaakani erina nsina nanyu, 39 nto nwiriyane ovekela waya ni etthu anivekela aya, muri ene wiirimu, opuro munikhala anyu, nave nwiirele exariya+ ni mwaalevelele atthu anyu yaawo yootthekenleni.

40 Vano, xontte Muluku aka, maitho anyu aweheke ni maaru anyu yiiweke ni ephoole mavekelo anilavuliwa opuro ola.+ 41 Vano, khoo Yehova Muluku, murowe opuro anyu woomumula,+ nyuwo ni Nivuku na Nivarihano na owerya wanyu. Xontte Yehova Muluku, mwaahiye anamukuttho anyu yooniherye wiira nyuwo munniwoopola atthu, nave atthu anoororomelani atteeliweke murima mwaha wa oreera wanyu murima.+ 42 Yehova Muluku, muhimukhootte* mwene mmuthanlale anyu.+ Muupuwelele ophenta woororomeleya mwaamoonihenrye anyu murumeyi anyu, Davidi”.+