Miteko sa Arummwa
24 Nuuvira mahiku mathanu, namukuttho muulupale Ananiya+ aahiphiya oKesareya. Owo aari ni makhulupale a ayuda ni mulipa-oniwaakiha atthu omilattuni, aihaniwa Teertulo. Awo yaahirowa wa kuvernatoro Feelexi, omuleela mulattu yaarina aya ni Paulo.+ 2 Okathi Teertulo aaleeliwe awe wiira olavuleke, aahipacerya omuhimyana itthu Paulo ohoolo wa kuvernatoro Feelexi, oriki:
“Hiyo ninnooxukhurelani, maana ninnikhala ni murettele. Nave, okhala wiira munnilamulela ni ankhili, elapo ahu ela ennikhala saana. 3 Nyuwo mukhulupale Feelexi! Okathi wootheene ninnixukhurela itthu sootheene munipaka anyu mapuro ootheene. 4 Vano nkiniphavela woopisihani, tivo kinooxonttelani wiira munireerele murima, muniwiriyane okathi vakhaani. 5 Hiyo nihoona wiira mulopwana ola onnikumiherya onyakulihana,*+ ni onniwiiriha ayuda anikhala ilapo sootheene, omurukunuwela kuvernu.+ Ohiya-vo, ola tonihoolela ekurupu eniihaniwa ‘anazarethi’.+ 6 Nave-tho aaheererya ohittittimiha etemplo, tivo, hiyo naahinvara.+ 7* —— 8 Mwamukoha vale, munimoona wiira ninlavula ekeekhai”.
9 Nave-tho, ayuda yaahaakhulela ahimyaka wiira ele yaalavuliwe yaari ekeekhai. 10 Okathi kuvernatoro Feelexi anvahale awe esinaale Paulo wiira olavuleke, owo aahihimya wiira:
“Koosuwela wiira okhuma khalai, nyuwo munniphuka myaha sa nloko nla. Tivonto, kinnihakalala wiixaakiha ohoolo wanyu.+ 11 Okhuma vaavale kaaronwe aka omukokhorela Muluku oYerusalemu+ mpakha-va, khavinre mahiku 12. Nyuwo pooti okoha, mwaphavela osuwela vaari siiso. 12 Khuuvo okiphwannye kinyakulihanaka ni mutthu mutemplo, nnakhala kaathukumanyaka atthu ootakhala musinagoga* aahiiso mpooma. 13 Nave, awo khaniwerya wooniherya tthiri wiira itthu sootheene anihimya aya wiira koopaka, ti seekeekhai. 14 Masi etthu enisuwela aka tiila: Miyo kinitthara enamuna ya omukokhorela Muluku, yeeyo awo anihimya aya okhala etiini esya. Siiso, miyo kininvarela muteko Muluku a amuhavinre ahu+ ni kinnikupali itthu sootheene sihimmwale ni Nlamulo ni soolempwa sa Maprofeta.+ 15 Nave, kookhalana nlipelelo nimosa-ru atthu ala arina aya, wiira Muluku onrowa waahihimuxa anaxariya+ ni ale ahikhanle anaxariya.+ 16 Tivonto, okathi wootheene kinniimananiha okhalana murima wooreera* ohoolo wa Muluku ni ohoolo wa atthu.+ 17 Siiso, nuuvira iyaakha sinceene, kaahirowa oYerusalemu ovaha musurukhu wiira kaakhaliherye atthu+ a nloko naka ni onvaha mikuttho Muluku. 18 Okathi kaapaka aka itthu iyo, awo yaahikiphwanya mutemplo kiireerihale ene.+ Masi nkaakhanle ni muttitthi nnakhala nkaakumiherya onyakulihana. Vano yaahikhala weiwo ayuda akina, yaakhuma eprovinsia ya wAsia. 19 Awo yaakiphwanyanne mulattu, yaahaana okhala vaava, wiira ahimye ohoolo wanyu.+ 20 Aahiiso, atthu ala ari vaava, ahimye akhala wiira yaahikiphwanyana etthu yootakhala, okathi yaakiphukela aya ohoolo wa eSineedrio.* 21 Masi etthu emosa kaahimmye aka kikhuwelaka, okathi keemenle aka ohoolo waya, tiila: ‘Miyo kimphukeliwa-va, mwaha wa nlipelelo na ohihimuxiwa wa alipa-ookhwa!’”+
22 Okhala wiira kuvernatoro Feelexi aanisuwela saana myaha sa Ephiro ya Apwiya,+ aahinteererya mwaha ole, onahimya wiira: “Miyo kinoophuka mwaha ola, kumantanti a atoropa, Lisia, aphiya vale”. 23 Nto aahimuruma mukhulupale a anakhotto wiira omutthukwele Paulo, masi omweemereryeke opaka itthu sikina ni oxukuriweke ni apatthani awe wiira amukhaliheryeke.
24 Vaavirale aya mahiku vakhaani, Feelexi aahirwa ni mwaarawe, aihaniwa Drusila, yoowo aari muyuda. Vano aahiruma wiihaniwa Paulo, wiira omwiiwe olavulaka itthu aakupali awe sa Kristu Yesu.+ 25 Masi, okathi Paulo aalavula awe myaha ntoko exariya, wiihiiha ni ophukeliwa onirwa,+ Feelexi aahoova, onahimya wiira: “Vano muroweke, masi kakhalana okathi, kinooruma wiira mwiihaniwe”. 26 Nave Feelexi aanilipelela wiira Paulo aamunvaha musurukhu. Tivonto aamakela awe omwiihana, onavaanelana. 27 Nuuvira iyaakha piili, Feelexi aahirantteliwa ni Porsio Festo. Nto okhala wiira Feelexi aaphavela waasiveliha ayuda,+ aahimuhiya Paulo mukhatteya.