Habakuuki
2 Miyo kinrowa weemela opuro aka woolipelela,+
Nave kinimwiilokiherya opuro woorakamela osulu wa exiri.
Kinrowa oweha-wehaka wiira koone etthu onrowa awe ohimya okirumaka miyo,
Nave kinrowa wuupuwelaka etthu kinrowa aka ohimya okathi onrowa awe okipwapwela.
2 Vano Yehova aahikaakhula oriki:
“Mulepe etthu mooniheriwe anyu, nave mulepe oratteene vamapaweni,+
Wiira ole onrowa osomaka voowiiwanyeya, ooneke okhweya osoma.+
3 Etthu yooniheriwe anyu enrowa wiiraneya okathi othanliwe,
Eyo ennaakuva wiira yiiraneye, khivanoothiwa.
Hata episaka wiiraneya, nlelo mulipeleleke,+
Okhala wiira enimwiiraneya tthiri.
Khenrowa opisa!
4 Munweheke mutthu oowiixinnuwiha,
Owo khahiyo ooloka vamurimani vawe.
Masi naxariya onookhala mukumi mwaha wa ororomeleya wawe.*+
5 Mweekeekhai, okhala wiira eviinyu ennimuhapuxa mutthu,
Mulopwana oowiisoona khonrowa ophwanya etthu eniphavela awe.
Owo khoniphiyeriwa ntoko mahiye.
Owo khonivona ntoko okhwa.
Owo onniithukumanyerya maloko ootheene,
Nave onniithukumanyerya atthu ootheene.+
6 Niireke ootheene aya khanrowa olavula muhapo, moolumo ootikiniha ni ithale* amuhimyaka yoowo?+
Awo anoohimya wiira:
‘Ootakhaliwa ole oniithukumanyerya itthu sihikhanle saawawe,
Ni ole onincererya itthu onikopha awe!
Mpakha silini?
7 Niireke ale munaakophela anyu khanrowa woorweelani vootutuxerya?
Awo anoovenya ni animootathani vootakhala,
Nto animookuxani.+
8 Mwaha woowaakuxa atthu anceene,
Atthu ootheene ahanle animookuxani,+
Okhala wiira moowiiva atthu,
Moopwetexa mittetthe, ipooma
Ni muhaapwetexa ootheene ale anikhala memmo.+
9 Ootakhaliwa ole oniithukumanyerya mihakhu soohixariya vatthokoni vawe,
Ophavelaka oteka epuru awe opuro woorakamela osulu,
Wiira oopowe mmaxakhani!
10 Itthu munipaka anyu sinnuulihiha muru etthoko anyu.
Mwaha woowaahaaxa atthu anceene munniitthekela mmansinyu.+
11 Tthiri nluku nnookhuwela vaxirini,
Nto eviika enimwaakhula eri ene vasulu va empa.
12 Ootakhaliwa ole oniteka epooma mwaha woowiiva atthu anceene,
Nave ootakhaliwa ole onilipiha epooma ni ohixariya!
13 Kiira atthu anonvarela muteko munceene Yehova a anakhotto, apakaka itthu sinrowa opahiwa vamooroni?
Nave kiira maloko annikhulumuwa mahala?+
14 Tthiri osuwela wa ovuwa wa Yehova onoosareya mulaponi,
Ntoko siisaale maasi anisareya aya mphareya.+
15 Ootakhaliwa ole onaavaha akhwaawe etthu yoowurya,
Onanariwe ene ni ovirunwe ene,
Wiira owiirihe ohapaliwa, ophavelaka owoona ahiwanre etthu!
16 Nyuwo munoosareya wuuliwa muru ohiya ovuwa.
Nave nyuwo-tho nwurye ni mooniherye ohinnuwihiwa wanyu.
Enoophiya ekwaha anyu munrowa anyu owurerya ekaalisi eri moono woolopwana wa Yehova,+
Nto wuuliwa muru onookhuneela ovuwa wanyu.
17 Tthiri etthu yootakhala nwiirinhe anyu atthu a oLeeboni enimookhumelelani.
Nave opwetexiwa onoopopiha inama onimookhumelelani,
Okhala wiira moowiiva atthu anceene.
Nave moopaka itthu sootakhala mmuttettheni, mpooma
Ni moowiiriha etthu yootakhala atthu anikhala memmo.+
18 Niireke elatarato yoopatthiwa,
Ennimphwanyiha mureerelo mutthu opanke?
Elatarato ya eyuuma ni etthu eniixuttiha itthu soowoothiwa, niireke ennimphwanyiha mureerelo mutthu?
Hata mutthu owo aaroromelaka amuluku awo eethiru ahinilavula,
Exeeni enrowa awe ophwanya?+
19 Ootakhaliwa ole onihimeerya epetaaso ya matera wiira: “Nvenye!”
Aahiiso ole onihimeerya nluku nihinlavula wiira: “Nvenye! Muniixuttihe!”
Moone! Nnaamwi ilatarato iyo sisirikeliwe ene ni eweero ni eparatha,+
Khasirina iphumu nnakhala vakhaani.+
20 Masi Yehova ori mutemplo mwawe moowaarya.+
Tivo atthu ootheene a mulaponi amaaleke ohoolo wawe’”.+