Miteko sa Arummwa
22 “Nyuwo axinna ni axipaapa, vano mukiwiriyane wiira kitthokiherye etthu ekhumelenle”.+ 2 Okathi yaamwiiwale aya aalavulihaka ni nttaava na eheeperi, awo yaahitepa omaala. Vano Paulo aahihimya wiira: 3 “Miyo ka muyuda,+ kiyariwe oTarso wa oSilisia,+ kiixuttihiwe epooma yeela ni Gamaliyeli.+ Owo ookiixuttiha otthara oratteene Nlamulo+ na amuhavinre ahu ni okhalela nthiti omukokhorela Muluku, ntoko muniira anyu olelo-va.+ 4 Miyo kaanaatthukwa alopwana ni athiyana yaatthara Ephiro ya Apwiya ni kaanaavahererya wiira atthukweliwe mukhatteya, kaanaalupattha ni kaaniwiiviha.+ 5 Tthiri, namukuttho muulupale ni nikhuuru nootheene na axitokweene na ayuda, annisuwela mwaha ola. Awo yaahikivaha ipaphelo saalepenle aya axinna a oDamaasiko, wiira kaaruuhe ootthukiwa ene oYerusalemu wiira ahukhummwe.
6 “Okathi keetta aka, kihalaka ophiya oDamaasiko, othana eriyari, waarya wuulupale waakhuma wiirimu, waahikirukurerya niinaano-ru.+ 7 Nto kaahimorela vathi, kinaiwa nsu naakihimeerya wiira: ‘Saulo, Saulo, xeeni munikilupattha anyu?’ 8 Miyo kaahikoha wiira: ‘Atokweene, nyuwo mwa pani?’ Owo aahikaakhula wiira: ‘Miyo ka Yesu munazarethi, yoowo munimulupattha anyu’. 9 Vano alopwana kaarina aka, yaahiweha waarya iwe, masi khiyaiwale nsu nawe ole aakilavuliha. 10 Siiso, kaahihimya wiira: ‘Pwiya, kipake exeeni?’ Nto Pwiya aahikihimeerya wiira: ‘Nvenye, murowe oDamaasiko, weiwo munooleeliwa itthu sootheene mukhanle anyu oopaka’.+ 11 Okhala wiira nkaawerya woona etthu mwaha wa waarya wootutha, ale kaarina aka yaahikivarela ntata mpakha ophiya oDamaasiko.
12 “Nto mulopwana mmosa aihaniwa Ananiya, yoowo aamoova Muluku ni aiwelela Nlamulo ni aalavuliwa saana ni ayuda yaakhala weiwo, 13 aahirwa vaari aka. Owo aahikaattamela, onakihimeerya wiira: ‘Saulo, munnaka, mutthikele woona!’ Okathi ene yoowo, kaahitthikela woona, kinanweha Ananiya.+ 14 Ananiya aahihimya wiira: ‘Muluku a amuhavinre ahu, ohoothanlani wiira musuwele ele eniphavela awe ni mmoone Naxariya awe+ ni mwiiwe nsu ninkhuma mwaano mwawe, 15 okhala wiira munrowa omukhalela onamoona ohoolo wa atthu ootheene, mwaha wa itthu moonale anyu ni mwiiwale anyu.+ 16 Nto, xeeni munipisa anyu? Nvenye, mpatisiwe, nto Muluku onimoolevelelani itampi sanyu,+ okhala wiira munniromola nsina na Yesu’.+
17 “Masi okathi kaatthikenle aka oYerusalemu,+ kinavekela mutemplo, kaakhala ntoko kaamuloha. 18 Nto kaahimoona Pwiya okihimeeryaka wiira: ‘Mwaakuveke, mukhume oYerusalemu niinaano-va, okhala wiira awo khanrowa weemererya etthu munilaleya anyu mukihimyaka miyo’.+ 19 Miyo kaahiira: ‘Pwiya, awo annisuwela oratteene wiira kaanaarihela mukhatteya ni kaanaamana musinagoga* ale yaawaaminini.+ 20 Nihiku yaamwiiva aya Siteefano, namoona anyu, miyo kaari vaavo. Nave kaaneemererya itthu yaapaka aya ni kaahisuka malaya a ota a atthu ale yaamwiiva’.+ 21 Masi owo aahikihimeerya wiira: ‘Murowe, okhala wiira miyo kinimoorumani wa atthu ahikhanle ayuda, yaawo ari mapuro oorakamela’”.+
22 Vano yaahinwiriyana mpakha okathi aalavunle awe moolumo awo. Nuumala-vo, yaahipacerya okhuwela, yiiraka: “Mmwiive mulopwana owo, maana khonireerela okhala mukumi!” 23 Nto atthu awo akhuwelaka siisaale, yaaniriha malaya aya a ota ni yaanivonyerya etthaya musulu.+ 24 Tivo kumantanti a atoropa aahiruma wiira Paulo okelihiwe mukwartelo, uuputthiwe, wiira ohimye etthu aapanke awe, wiira kumantanti osuwele oratteene etthu yaawiiriha atthu ale omukhuwelela Paulo siisaale. 25 Masi okathi yaamutthunkwe aya wiira emuuputthe, Paulo aahimukoha mukhulupale a anakhotto aari vaavale, wiira: “Niireke nlamulo ninniweemereryani omuuputtha muroma ohinatthi olamuliwa?”*+ 26 Vaiwale awe moolumo ala, mukhulupale a anakhotto, aahirowa omuhimeerya kumantanti a atoropa, wiira: “Exeeni munrowa anyu opaka? Mulopwana ola muroma”. 27 Siiso, kumantanti owo, aahimwaattamela Paulo, onamukoha wiira: “Mukileele, nyuwo mwa muroma?” Paulo aahimwaakhula oriki: “Aayo”. 28 Kumantanti a atoropa, aahiira: “Miyo kooliva musurukhu munceene wiira kiphwanye ihakhi* sa okhala muroma”. Masi Paulo aahihimya wiira: “Masi miyo kirooyaraniwa ihakhi* iyo”.+
29 Niinaano-ru, atoropa ale yaarowa omukoha ni omuuputtha Paulo, yaahikhuma-vo. Vano, kumantanti a atoropa, aahoova vaasuwenle awe wiira Paulo aari muroma, nave mwaha woowi aahimutthukwa ni ikwirinti.+
30 Mmeeloni mwaya, kumantanti a atoropa ophavelaka osuwela oratteene itthu ayuda yaamuhimyana aya Paulo, aahimutaphula, khuwiihaniha makhulupale a anamukuttho ni eSineedrio* yootheene wiira athukumane. Nuumala-vo, aahimuruuha Paulo, omweemexa eriyari aya.+