Wahala a Nenli
36 Nuumala-vo, atthu a elapo ele yaahimukuxa mwaana a Yosiya, Yowakhazi,+ amukhaliha mwene nipuro na paapa awe, oYerusalemu.+ 2 Yowakhazi aarina iyaakha 23 okathi aakhanle awe mwene, nave aahilamulela miyeeri miraru oYerusalemu. 3 Mwene a wExiitu aahimwaakha okhulupale awe oYerusalemu. Nave aahiruma wiira elapo ele yaahaana oliva mpoosito wa italento 100 sa eparatha ni etalento* emosa ya eweero.+ 4 Ohiya-vo, mwene a wExiitu aahimukhaliha Eliyakiimi munnawe Yowakhazi, mwene a oYuda ni a oYerusalemu, nave aahituruka nsina nawe wiira iihaniweke Yoyakiimi. Masi Neko+ aahimukuxa munnawe Yowakhazi, omuroiha wExiitu.+
5 Yoyakiimi+ aarina iyaakha 25 okathi aakhanle awe mwene, nave aahilamulela iyaakha 11 oYerusalemu. Owo aanithipelela opaka itthu sootakhala vamaithoni va Yehova Muluku awe.+ 6 Nabukodonosori,+ mwene a oBabiloonia, aahirwa wiira omutthukwe ni ikwirinti piili sa ekoopiri wiira omuroihe oBabiloonia.+ 7 Nabukodonosori aahikuxa mireerelo sikina sa empa ya Yehova oroiha oBabiloonia, opweha opalaasio wawe, oBabiloonia.+ 8 Itthu sikina siiraneyale ni Yoyakiimi, itthu soohiirya aapanke awe ni itthu sinimuhimya yena, soolempwa Muliivuruni ya Mamwene a wIsarayeli ni a oYuda. Nto mwanawe Yoyakiini, aahikhala mwene nipuro nawe.+
9 Yoyakiini+ aarina iyaakha 18 okathi aakhanle awe mwene, nave aahilamulela miyeeri miraru ni mahiku 10 oYerusalemu. Owo khaahiyale opaka itthu sootakhala vamaithoni va Yehova.+ 10 Woopaceryani wa eyaakha,* mwene Nabukodonosori aahiruma wiira Yoyakiini oroihiwe oBabiloonia,+ ni mireerelo sa efaita yinceene sa empa ya Yehova.+ Owo aahimukhaliha tiiyu awe, Sedekiya, mwene a oYuda ni a oYerusalemu.+
11 Sedekiya+ aarina iyaakha 21 okathi aakhanle awe mwene, nave aahilamulela iyaakha 11 oYerusalemu.+ 12 Owo khaahiyale opaka itthu sootakhala vamaithoni va Yehova Muluku awe. Nave khaiyevihale okathi profeta Yeremiya+ aamuloponle awe orummwaka ni Yehova. 13 Ohiya-vo, owo aahimurukunuwela mwene Nabukodonosori,+ yoowo aamwiirihale olapha ni nsina na Muluku, ohinaphavela omwiiwelela, uumihaka murima awe, nave khaaphavenle otthikela wa Yehova, Muluku a atthu a Isarayeli. 14 Makhulupale ootheene a anamukuttho vamosa ni atthu, yaari ootepa ohiroromeleya apakaka itthu sootheene soohiirya, seiyo saapakiwa ni maloko makina, nave yaahihonona empa ya Yehova,+ yeeyo aareerinhe awe, oYerusalemu.
15 Yehova, Muluku a amuhavinre aya, aamakela waalopola, aarumeelaka anamitthaka* awe, aalopolaka ikwaha sinceene, okhala wiira aaniwoonela othunku atthu awe ni opuro aakhala awe. 16 Masi awo yaanaanyohola anamitthaka a Muluku eekeekhai,+ ahicalaka moolumo awe,+ ni yaanaaveeha maprofeta awe,+ mpakha Yehova onanariwa vanceene ni atthu awe,+ vahinaweryaneya okhaliheriwa mwa inamuna sootheene.
17 Nto, owo aahimuruma mwene a atthu a oKhaldeya,+ yoowo aawiivale amiravo aya ni espaata*+ opuro woowaarya.+ Owo khaamoonenle othunku nnakhala mmiravo wala mwali, aahiiso atthu oowuuluvala nnakhala aretta.+ Muluku aahinvahererya mwene a oKhaldeya itthu sootheene mmatatani mwawe.+ 18 Mireerelo sootheene sa empa ya Muluku eekeekhai, suulupale ni saamukhaani, vamosa ni mihakhu sa empa ya Yehova ni mihakhu sa empa ya mwene ni sa makhulupale awe, sootheene aahiroiha oBabiloonia.+ 19 Owo aahipaha empa ya Muluku eekeekhai,+ opwexakasa exiri ya oYerusalemu,+ opaha ni mooro ipa saya sootheene soorakamela osulu soolipihiwa, ni opwexakasa itthu saya sootheene saarina efaita.+ 20 Ale yahiiviwe ni espaata, aahaakuxa ntoko ipottha aroiha oBabiloonia,+ nave aahaakhaliha arumeyi awe+ ni anaawe mpakha omwene wa oPersia opacerya olamulela,+ 21 wiira yiiraneye moolumo a Yehova aalavunle awe omurumeelaka Yeremiya,+ mpakha elapo ele oliva isaabadu saya.+ Mahiku ootheene yahaakhaliwa aya, elapo ele yaaneettela esaabadu, mpakha omaleliha iyaakha 70.+
22 Eyaakha yoopacerya ya mwene Kiiru+ a oPersia, wiira yiiraneye moolumo Yehova aalavunle awe omurumeelaka Yeremiya,+ Yehova aahiiriha murima wa Kiiru mwene a oPersia olaleya moomweneni mwawe mootheene, moolumo yaawo-tho aarumme awe olempwa,+ oriki: 23 “Enihimya awe Kiiru mwene a oPersia tiila: ‘Yehova Muluku a wiirimu, ookivaha omwene wootheene wa mulaponi,+ nave ookithanla wiira kimutekele empa oYerusalemu, ori oYuda.+ Ole oniirela mpantta atthu awe, Yehova Muluku awe okhale nuuwo, nto owo oroweke oYerusalemu’”.+