Miteko sa Arummwa
13 Muloko a wAntiyokiya, yaahikhala maprofeta ni alipa-oowiixuttiha.+ Masina aya taala: Baarnaba, Simeyoni, yoowo aihaniwa Nooriipe.* Akina yaari, Saulo, Lusio a oKirene ni Manaye, yoowo aasomme vamosa ni mwene Herodi. 2 Okathi yaamukokhorela aya Yehova,* ni yaatthukwa aya, ikuru soowaarya saahaaleela wiira: “Mukithanlele Baarnaba ni Saulo.+ Miyo kihaathanla wiira avareke muteko”.+ 3 Nuumala otthukwa ni ovekela, awo yaahimwiixaatherya matata Saulo ni Baarnaba, anaahiya arowaka.
4 Okathi yaarummwale aya ni ikuru soowaarya, Saulo ni Baarnaba yaahirowa oSeleusia. Weiwo, yaahiwela ekalawa anarowa oKiipero. 5 Okathi yaaphiyale aya oSalamina, awo yaahipacerya olaleya nuulumo na Muluku musinagoga* mwa ayuda. Nave Yohani aari namakhaliherya aya.+
6 Nuumala weetteetta esisiro* yootheene, mpakha ophiya oPafo, awo yaahikumana mulopwana mmosa muyuda, aihaniwa Bariyesu. Mulopwana owo, aari namaxintta ni aari profeta oowootha. 7 Namaxintta owo, anvarela muteko kuvernatoro* Serxio Paulo. Kuvernatoro owo, aari mulopwana a ankhili. Nto Serxio Paulo aahimwiihana Baarnaba ni Saulo, okhala wiira aaniphavela vanceene wiiwa moolumo a Muluku. 8 Masi namaxintta Elima, aanaavirikanya arummwa, ophavelaka omuhapuxa kuvernatoro wiira ohaamini. (Nsina noowi Elima, nintaphulela namaxintta). 9 Vano Saulo, yoowo-tho aihaniwa Paulo, osareiye ene ikuru soowaarya, aahinwehexexa Elima oratteene, 10 onamuhimeerya wiira: “Nyuwo mwa mulopwana oosareya wootha ni ootakhala. Nave mwa mwaana a Diabo+ ni nwanani a itthu sootheene sooloka. Munrowa ohiya silini ohonona iphiro soowookololowa sa Yehova?* 11 Mwiiwe! Yehova* onimoohukhumuni ni khamunrowa woonaka. Khamunrowa owehaka nsuwa mwa okathi vakhaani”. Niinaano-ru, itthu sootheene aaweha awe saakhala ntoko etthapwe ni epiphi. Vano aanimwaavya mutthu wiira onvarele ntata, wiira omweettiheke. 12 Okathi kuvernatoro oonale awe itthu iya, aahaamini, okhala wiira aahitikinihiwa vanceene ni itthu sa Yehova* aixuntte awe.
13 Paulo ni apatthani awe, yaahikhuma oPafo ni ekalawa, aphiya oPerxe, oPanfiilia. Masi Yohani+ aahaahiya, onatthikela oYerusalemu.+ 14 Nuumala-vo, yaahikhuma oPerxe anarowa wAntiyokiya wa oPisiidia. Nto yaahikela musinagoga,*+ nihiku na saabadu, akilaathi. 15 Nuumala osommwa Nlamulo+ ni iliivuru sa Maprofeta, makhulupale yaahoolela musinagoga,* yaahimuhimeerya Paulo ni Baarnaba wiira: “Anna, mwaarina ene moolumo wiira mwaalipihe atthu, mulavuleke”. 16 Siiso, Paulo aaheemela, aavaha esinaale ni ntata, onahimya wiira:
“Nyuwo alopwana a Isarayeli ni nyuwo akina munimoova Muluku, nwiriyane. 17 Muluku a atthu a Isarayeli, aahaathanla amuhavinre ahu. Nto, okathi yaari aya wExiitu, weiwo yaakhala aya ntoko aletto, owo aahaakhaliherya ni aahirumeela owerya wawe wiira aakumihe opuro ole.+ 18 Etthu yoowiiraka iyaakha 40, owo aahaapixerya murima moothakoni.+ 19 Nuumala opwetexa maloko 7 a elapo ya oKanaani, aahaavaha amuhavinre ahu elapo eyo.+ 20 Itthu iyo sootheene siiraneyale etthu yoowiiraka iyaakha 450.
“Nuuvira okathi owo, aahaakumiherya alipa-oophuka wiira aweettiheke mpakha okathi wa profeta Samuweli.+ 21 Nuumala-vo, yaahinvekela mwene.+ Nto Muluku aahaavaha Sawuli, mwaana a Kiixi, a nihimo na Beniyamini.+ Owo aahaalamulela mwa iyaakha 40. 22 Nuumala Muluku omwaakha Sawuli omwene, aahimuthanla Davidi wiira okhale mwene aya.+ Muluku aahimuhimya Davidi owo, iiraka: ‘Komphwanya Davidi, mwaana a Yese,+ mulopwana yoowo onrowa ohakalalihaka murima aka.+ Owo onoopaka itthu sootheene siniphavela aka’. 23 Ntoko aaleihenrye awe, Muluku aahaavaha aisarayeli moopoli, Yesu, yoowo aari osuulu wa mulopwana ole.+ 24 Ohinatthi orwa Yesu, Yohani aanaalaleerya atthu ootheene a wIsarayeli, wiira apatisiwe, yooniheryaka orukunuxa waya murima.+ 25 Okathi Yohani aamaliha awe muteko awe, aanihimya wiira: ‘Nyuwo munuupuwela wiira miyo ka pani? Miyo nkihiyo yoowo. Masi, onnoorwa ottuli waka, ole kihiniphwanela aka otaphula isantaalya sawe’.+
26 “Nyuwo anna ni atthu a nloko na Abrahamu ni nyuwo akina munimoova Muluku, nwiriyane! Hiyo nihiiwa moota Muluku onnoopola awe.+ 27 Tthiri, atthu a oYerusalemu ni anamalamulela aya, yaahimukhootta moopoli owo. Masi okathi yamphukela aya, yaahimaliherya moolumo alempwale ni Maprofeta,+ yaawo anisommwa khula esaabadu, voowiiwanyeya. 28 Nnaamwi yahamphwanyanne mulattu wiira amwiive,+ awo yaahinvekela Pilato wiira omwiivihe Yesu.+ 29 Nuumala opaka itthu sootheene saalempwale simuhimyaka yoowo, yaahimukuruxa vamwirini, anvitha mmahiye.+ 30 Masi Muluku aahimuhihimuxa mookhwaani.+ 31 Nave Yesu aahaakhumelela mahiku manceene awiixutti awe, yaale yaakhumme oGalileya nuuwo, arowaka oYerusalemu. Awo tanimukhalela onamoona ohoolo wa atthu.+
32 “Siiso, hiyo ninnoolaleeryani ihapari sooreera sa natiri Muluku aamanenle awe amuhavinre ahu. 33 Muluku oomutaphula natiri owo voomalela, omuhihimuxaka Yesu,+ wiira hiyo niri anaaya, niphwanye mureerelo. Tivo valempwale aya esaalimu ya nenli, wiira: ‘Nyuwo mwa mwanaka. Olelo, miyo ka paapa anyu’.+ 34 Muluku aahimuhihimuxa mookhwaani, nave khonrowa-tho okhwa, nnakhala erutthu awe khenrowa wuntta. Muluku oolipiherya wiira eyo ekeekhai, ohimyaka wiira: ‘Kinrowa owooniheryani ophenta woororomeleya kaamuleihenrye aka Davidi. Natiri owo toororomeleya’.+ 35 Nave-tho, esaalimu ekina enihimya wiira: ‘Nyuwo khamunrowa ohiya yinttaka erutthu ya murumeyi anyu oororomeleya’.+ 36 Masi, Davidi, aahipaka ele Muluku aaphavela awe ori ene mukumi ni aahikhwa, khuvithiwa vamosa ni amuhavinre awe, ni erutthu awe yaahintta.+ 37 Vano, ole ohihimuxiwe ni Muluku, erutthu awe khiyinttale.+
38 “Tivonto, axinnaka, musuweleke wiira Muluku onrowa woolevelelani itampi sanyu, mwaha wa okhwa wa mulopwana ola.+ 39 Nlamulo na Moise+ khaniwenrye wookhalihani anaxariya. Masi mwaha wa okhwa wa mulopwana ola, Muluku onimwaahimya atthu ootheene anaamini, okhala anaxariya.+ 40 Siiso, mukhalane ephoole wiira ele elempwale muliivuruni mwa Maprofeta, ehookhumeleleni. Eyo enihimya so: 41 ‘Nyuwo atthu oonyohola, nweheke muteko onivara aka mahiku anyu. Nyuwo khamunrowa okupali muteko ola, hata mutthokiheriwaka saana. Masi munootikinihiwa vanceene ni munoolakaseya’”.+
42 Vano, okathi Paulo ni Baarnaba yaakhuma aya musinagoga,* atthu yaahaaxonttela wiira yalavule-tho myaha iye, esaabadu yaattharelana. 43 Okathi muthukumano musinagoga* waamanle aya, ayuda anceene ni ale yaakenle etiini ya ayuda, yaawo yaamukokhorela Muluku, yaahimutthara Paulo ni Baarnaba. Awosa yaahaatumererya atthu wiira atepeke ottottela mureerelo oreera murima wuulupale wa Muluku.+
44 Esaabadu yaattharelana, atthu ootheene a epooma ele, waahiya atthu vakhaani paahi, yaahithukumana wiira awiriyane moolumo a Yehova.* 45 Okathi ayuda yoonale aya mittitthi sa atthu, yaahisareya nrima, anapacerya onveeha Muluku, avaanyihaka moolumo a Paulo.+ 46 Nto Paulo ni Baarnaba yaahaahimeerya ayuda ale, ahoovaka etthu, wiira: “Vaanireerela opacerya woolaleeryani nyuwo moolumo a Muluku.+ Okhala wiira munnikhootta ni muniixoona wiira khamuniphwanela okumi woohimala, nto hiyo ninrowa waalaleerya ale ahikhanle ayuda.+ 47 Tthiri, Yehova* ooniruma, oriki: ‘Miyo kihookhalihani muthuko wa maloko wiira mulaleye woopowa mpakha omalenle elapo’”.+
48 Nuumala ale yahaakhanle ayuda wiiwa moolumo ala, yaahitteeliwa murima vanceene, anavuwiha nuulumo na Yehova.* Siiso, ootheene ale yaarina murima wooloka wiira yaakhele okumi woohimala, yaahaamini. 49 Nave-tho, nuulumo na Yehova,* naanimwareela mulaponi mootheene. 50 Masi ayuda yaahaawoka* athiyana oottittimiheya, yaawo yaamoova Muluku ni alopwana oottittimiheya a epooma ele, wiira amulupatthe+ Paulo ni Baarnaba ni yaahiwoomola mmuttettheni mwaya. 51 Siiso, Paulo ni Baarnaba yaahitatha ntthupi na inawu saya, ntoko ethoonyeryo yoowi atthu awo aalopoliwa. Nuumala-vo, yaahirowa wIkoonio.+ 52 Vano awiixutti yaamutepa otteeliwa murima+ ni osareya ikuru soowaarya.