Miteko sa Arummwa
11 Vano arummwa ni axinna yaawo yaakhala oYudeya, yaahiiwa wiira atthu yahaakhanle ayuda, nave yaahaakhela moolumo a Muluku. 2 Okathi Pedru aaphiyale awe oYerusalemu, ale yaaphavela wiira atthu a maloko makina yinnuwihiweke,+ yaahipacerya onvaanyiha, 3 ariki: “Nyuwo mookela etthoko ya atthu oohinnuwihiwa, munalya naawo”. 4 Nto Pedru aahaatthokiherya itthu sootheene saakhumelenle, oriki:
5 “Miyo kaari epooma ya oYope kivekelaka. Okathi ene yoowo, kaahoona moolohani, etthu yaalikana ni ekuwo yuulupale ekuruxiwaka wiirimu, evareliwe ene iponta saya ixexe, khuphiya vaari aka.+ 6 Okathi kaawehexenxe aka oratteene muhina mwaya, kaahoona inama sa mikhalelo sootheene: inama sa metto mixexe, inowa, anaakhwiitti ni axipalame.* 7 Nave-tho, kaahiiwa nsu nihimyaka wiira: ‘Pedru, nvenye, mwiiveke ni mukhuureke!’ 8 Nto, miyo kaahaakhula wiira: ‘Pwiya, nkinikhuura nnakhala vakhaani, maana khenakele mwaano mwaka etthu yoohiloka ni enikhoottihiwa ni nlamulo’. 9 Nave, nsu nlo naakhuma wiirimu, naahaakhula ekwaha ya nenli niiraka: ‘Muhihimyeke okhala soohiloka itthu Muluku oreerinhe awe’. 10 Yaahiiraneya-tho ekwaha ya neeraru. Nuumala-vo, itthu sootheene saahiroihiwa wiirimu. 11 Nave, okathi ene yoowo, alopwana araru yaahiphiya opuro naamanke ahu. Awo, yaakhumme oKesareya.+ 12 Vano ikuru soowaarya saahikileela wiira kaatthare kihihoveryaka etthu. Nave axinna ala 6, yaahirowa ni miyo, nikela mpaani mwa Korneelio.
13 “Owo, aahinileela wiira aahoona nlaikha neemenle ene owannyawe, nimwiirelaka wiira: ‘Mwaarume atthu orowa oYope omwiihana Simoni, yoowo-tho oniireliwa Pedru.+ 14 Nto, Pedru owo onimooleelani itthu nyuwo ni atthu ootheene a vatthokoni vanyu munireerela anyu opaka wiira moopowe’. 15 Masi nlelo kilavulaka, awo yaahaakhela ikuru soowaarya, ntoko hiyo naakhenle ahu woopaceryani.+ 16 Siiso, kaahuupuwela moolumo a Pwiya, yoowo aamakela ohimya wiira: ‘Yohani onipatisa ni maasi,+ masi nyuwo munrowa opatisiwa ni ikuru soowaarya’.+ 17 Tivonto, akhala wiira Muluku ohaavaha mahala ene etthu emosa-ru, ntoko onivanhe awe hiyo nimwaaminni Pwiya Yesu Kristu, miyo nkaawerya opaka etthu wiira kimukhoottiherye Muluku opaka ele oniphavela awe”.+
18 Okathi axinna yaiwale aya itthu iya, yaahihiya onvaanyiha.* Nave yaaninvuwiha Muluku, ahimyaka wiira: “Muluku ohaavaha-tho atthu ahikhanle ayuda, eparakha ya orukunuxa murima aya, wiira aphwanye okumi woohimala”.+
19 Nuumala wiiviwa Siteefano, awiixutti akina yaahipacerya ohaaxiwa. Tivo, ale yaatthyanwe+ yaahirowa oFeniisia, oKiipero ni wAntiyokiya. Masi awo yaalaleerya ihapari sooreera ayuda paahi.+ 20 Nto akina yaahikhuma oKiipero ni oKirene, anarowa wAntiyokiya. Weiwo, yaahipacerya ovaanela ni atthu yaalavula ekereku, yaalaleeryaka ihapari sooreera saamuhimya Pwiya Yesu. 21 Nave-tho, Yehova* aanaakhaliherya, vano atthu anceene yaahaamini, anamutthara Pwiya.+
22 Ehapari ela yaahiphiya miloko sa oYerusalemu, nto awo yaahimuruma Baarnaba+ orowa wAntiyokiya. 23 Okathi aaphiyale awe, khuweha oreera murima wuulupale wa Muluku, Baarnaba aahitteeliwa murima, onapacerya waalipiha atthu ootheene wiira akhaleke oororomeleya wa Apwiya ni murima wootheene.+ 24 Tthiri Baarnaba owo, aari mulopwana ooreera murima ni aahisareya ikuru soowaarya ni aahikhalana waamini woolipa. Nave muttitthi muulupale wa atthu, waahimwaamini Pwiya.+ 25 Siiso, aahirowa oTarso, onamwaavya Saulo mapuro ootheene.+ 26 Nuumala omphwanya, aahimuroiha wAntiyokiya. Nto eyaakha yootheene, Baarnaba ni Saulo yaanithukumana ni muloko wa Antiyokiya ni yaaniwiixuttiha atthu anceene. Waari wAntiyokiya weiwo, awiixutti alakiheriwaka ni Muluku, yaapacenrye aya wiireliwa makristau.+
27 Mahiku awo, maprofeta+ makina, yaahiphiya wAntiyokiya akhumaka oYerusalemu. 28 Vano, profeta mmosa aihaniwa Aagabo,+ okhaliheriwaka ni ikuru soowaarya, aaheemela, onahimya wiira yaamukhumelela etala yuulupale elapo yootheene.+ Tthiri eyo yaahiiraneya okathi wa Klaudio. 29 Nto awiixutti yaahilakela waakhaliherya+ anna yaakhala oYudeya, ntoko yaawerya aya.+ 30 Tthiri, yaahiira siiso. Awo yaahaaroihela axitokweene, anvahereryaka Baarnaba ni Saulo.+