OKHUMA

1 Ala masina a anamwane a Isarayeli, eyo piiyo, anaawe Yakobe, yaawo yaaronwe wExiitu. Khula mulopwana aaronwe ni etthoko awe:+ 2 Rubeni, Simeyoni, Levi, ni Yuda;+ 3 Isakari, Zabuloni, ni Beniyamini; 4 Dani, Nefetali, Gadi, ni Axeri.+ 5 Osuulu wootheene wa Yakobe waaronwe nuuwo, yaari atthu 70. Masi Yosefe iira ori ene wExiitu.+ 6 Nuuvira okathi, Yosefe aahikhwa.+ Nave axinnawe ootheene, ni atthu ootheene yaakhanle wExiitu okathi ole naawo, yaahikhwa. 7 Aisarayeli* yaahaayara anaaya ni yaahaatta vanceene. Awo yaamutepa waatta ni wuncerereya moowaakuveya, mpakha osarya elapo ele.+

8 Nuuvira okathi, aahikhumelela mwene mukina a wExiitu, yoowo ahaamusuwela Yosefe. 9 Nto, owo aahaaleela atthu awe wiira: “Moone! Aisarayeli khareere waatta, nave tooweryexa onivikana hiyo.+ 10 Naakuxerye olavilavi wiira ahitepeke wuncerereya, maana yakhumelela ekhotto, anootakaahana ni awanani ihu, awaneke ni hiyo, ni akhumeke mulaponi-mu”.

11 Tivo, yaahaathanla maxeefi a ipottha,* wiira yaahaaxeke aisarayeli yaavarihaka muteko woolipa.+ Awo yaahiteka ipooma sa oPitomi, ni oRamese+ wiira sisukiweke soolya ni mireerelo sa Farawo. 12 Nto okathi maxeefi a ipottha yaatepa aya waahaaxa, aisarayeli yaamutepa wuncerereya ni otepa osareya elapo ele, mpakha atthu a wExiitu opacerya owoova+ vanceene. 13 Tivonto, atthu a wExiitu yaahiwiiriha aisarayeli okhala ipottha,+ ni waahaaxa vanceene. 14 Awo yaanitepa waahaaxa aisarayeli, yaakhanyereryaka weetheya oloko ni opaka itixolu, ni miteko soolipa sa mmatta. Yaanaakhanyererya ovara muteko woolipa ntoko ipottha,+ yaahaaxaka.

15 Nuumala-vo, mwene a wExiitu aahilavula ni athiyana aheeperi yaakhaliherya oyara, yaawo yaihaniwa Xifra ni Puwa. 16 Owo aahaaleela wiira: “Okathi munaakhaliherya anyu athiyana aheeperi oyara,+ muhaana ovaha ephoole, okathi oniyara aya. Mwaweha wiira mwaana mwaamulopwana toyariwe, mmwiive. Masi mwaweha wiira mwaana mwaamuthiyana toyariwe, muhimwiive”. 17 Nto athiyana ale yaakhaliherya oyara, yaanimoova Muluku eekeekhai. Awo khiyaiwelenle ele mwene a wExiitu aarumme awe. Tivo, khiyaawiiva+ anamwane axilopwana. 18 Nuuvira okathi, mwene a wExiitu aahiwiihana athiyana yaakhaliherya oyara, onaakoha oriki: “Xeeni muhiwiivaka anamwane axilopwana?” 19 Athiyana ale yaahimwaakhula Farawo wiira: “Athiyana aheeperi toovirikana ni athiyana a wExiitu. Awo ta ikuru, ni anniyara ohinatthi ophiya ole onaakhaliherya oyara”.

20 Siiso, Muluku aahaareerela murima athiyana ale yaakhaliherya oyara. Nto aisarayeli yaanitepa waatta, ni yaanikhala oowerya vanceene. 21 Nave, okhala wiira athiyana yaakhaliherya oyara yaanimoova Muluku eekeekhai, owo aahoona miteko saya sooreera, ni aahaavaha anamwane. 22 Vano, Farawo aahaaruma atthu awe ootheene wiira: “Mwaarihele mmuro Niilo anamwane ootheene axilopwana ayariwe niinaano ni aheeperi, masi muhiwiive+ anamwane axithiyana”.

2 Okathi owo, mulopwana mmosa a etthoko ya Levi, aahimuthela muthiyana a nihimo nenlo na Levi.+ 2 Muthiyana owo aahirupala, omuyara mwaana mwaamulopwana. Vaawenhe awe wiira mwaana owo aari ooreera, aahimwiipithiha miyeeri miraru.+ 3 Okathi vahaaweryaneyaya-tho omwiipithiha,+ owo aahikuxa ettanka* ya nammese* osirikela etthu yaalikana ni alkatarau.* Nuumala-vo, aahimukuxa mwaana ole omuhela muttankani-mme, ompweha mmalaxini, mukerekhere mwa muro Niilo. 4 Masi murokorawe+ mwaana ole, aaheemela opuro woorakamela vakhaani, wiira oweheke etthu yaarowa wiiraneya.

5 Okathi mwaana mwaamuthiyana a Farawo aarowa awe orapa omuro Niilo, arumeyi awe athiyana yaaneetteetta mukerekhere mwa muro ole. Nto mwaana a Farawo, aahiweha ettanka* eri ene eriyari ya malaxi. Moowaakuveya, aahimuruma murumeyi awe mmosa orowa okuxa ettanka* ele.+ 6 Nuumala mwaana a Farawo ohula ettanka ele, aahimphwanya mwaana owo mwaamulopwana inlaka. Owo aahihimya wiira: “Ola mwaana a muheeperi”. Hata vari siiso, owo aahimoonela othunku. 7 Nuumala-vo, murokorawe mwaana ole aahimukoha mwaana a Farawo, iiraka: “Munniphavela wiira kamwiihane muthiyana muheeperi, wiira omwaamwiheke mwaana owo?” 8 Mwaana mwaamuthiyana a Farawo, aahimwaakhula wiira: “Muroweke!” Nto mwaaruusi ole aahaakuveya, onarowa omwiihana maama awe mwaana+ ole. 9 Mwaana a Farawo aahimuleela maama awe mwaana ole, wiira: “Mmukuxe mwaana ola mwaamwaamwiheke, miyo kinimoolivakani”. Tivo, muthiyana ole aahimukuxa mwaana ole, onarowa omwaamwiha. 10 Vannuwale awe mwaana ole, aahimuroihela mwaana mwaamuthiyana a Farawo. Nto, mwaana ole aahikhala awawe.+ Aahinvaha nsina noowi Moise,* maana aahimya wiira: “Okhala wiira kimukuminhe mmaasini”.+

11 Okathi Moise annuwale awe, aahirowa waaweha axinnawe aheeperi avaraka miteko sookhanyereriwa.+ Vano aahinveha mutthu a wExiitu ommanaka muheeperi mmosa. 12 Okathi aawenhe awe moono woolopwana ni moono woothiyana ohimoona mutthu, aahimwiiva mulopwana ole a wExiitu, onvitha vatthayani.+

13 Mmeeloni mwaya, aahitthikela orowa waaweha axinnawe, nto aahaaweha aheeperi anli awanaka. Siiso, Moise aahimukoha ole aatthenke wiira: “Xeeni munimmana anyu munninyu?”+ 14 Nto owo aahimwaakhula iiraka: “Ti pani oothanlaleni okhala namalamulela wiira muniphukeleke? Muniphavela okiiva ntoko mmwiivale anyu mulopwana ole a wExiitu?+ Vano Moise aahoova, onuupuwela iiraka: “Tthiri mwaha ola woosuweliwa!”

15 Nuumala-vo, Farawo aahiiwa etthu eyo, onaphavela omwiiva Moise. Masi Moise aahimutthyawa Farawo, onarowa okhala oMidiyani.+ Weiwo aahiphwanya ehime, okilaathi waattamela vaavo. 16 Vano namukuttho a oMidiyani,+ aahikhalana anamwane axithiyana 7. Anamwane awo, yaahirowa orika maasi wiira yaitthele nipuro naawurya aya inama sa apapaya. 17 Masi yaahirwa amakampusi akina awoomola, ntoko yaalimalenle aya. Vano Moise aahaakhaliherya* axithiyana ale, ni aahivaha maasi inama saya. 18 Okathi yaatthikenle aya owaani, wa paapa aya Reweli,*+ owo aahitikinihiwa, onaakoha wiira: “Xeeni olelo atthu ahalaka waakuva otthika?” 19 Awo yaahimwaakhula yiiraka: “Mulopwana mmosa a wExiitu+ tonaakihenrye amakampusi. Nave oonirikela maasi, ni oovaha maasi inama sahu”. 20 Owo aahaakoha anaawe wiira: “Mulopwana owo ori vai? Xeeni mmuhiyale anyu weiwo? Mwamwiihane, wiira orwe olye ni hiyo”. 21 Nuumala-vo, Moise aaheemererya okhala ni Reweli. Vano aahinvaha Moise mwanawe mwaamuthiyana iihaniwa Siipora,+ wiira omuthele. 22 Nuuvira okathi, Siipora aahimuyara mwaana mwaamulopwana. Vano Moise aahinvaha nsina noowi Gerisomi,*+ maana aahimya wiira: “Okhala wiira ka namurwa elapo ela”.+

23 Nuuvira okathi munceene,* mwene a wExiitu, aahikhwa.+ Masi aisarayeli nlelo yaaninla ni wiikhupanyerya, mwaha wookhalihiwa ipottha. Tivonto, awo yaaninla anvekelaka Muluku+ eekeekhai, wiira aakhaliherye. 24 Vano Muluku aahiiwa wunla waya,+ nto aahuupuwela nivarihano aapanke awe ni Abrahamu, Isaakhi, ni Yakobe.+ 25 Siiso, Muluku aahoona ohaawa wa anamwane a Isarayeli, ni aahaamorela ikharari.

3 Moise aari makampusi a inama sa taata awe Yeethoro,+ yoowo aari namukuttho oMidiyani. Okathi oomolela awe* inama oroihaka mpantta onikela nsuwa wa moothakoni, aahiphiya oHorebi,+ opuro waari mwaako wa Muluku eekeekhai. 2 Vano, nlaikha na Yehova naahimukhumelela eriyari ya mwiri wa miiwa+ waapatta mooro. Okathi aaweha awe, aanoona wiira mwiri ole wa miiwa waanipatta, masi khiwaavya. 3 Nto Moise aahihimya wiira: “Kinimwaattamela kawehe oratteene etthu ele yootikiniha, kiwehe nthowa naya mwiri ole wa miiwa ohinivya aya”. 4 Okathi Yehova aawenhe awe wiira Moise aanaattamela wiira awehe, aahimwiihana eriyari ya mwiri ole wa miiwa, iiraka: “Moise! Moise!” Owo aahimwaakhula oriki: “Miyo-va”. 5 Muluku aahimuleela wiira: “Muhaattamele-va. Murule isantaalya sanyu, okhala wiira opuro mweemenle anyu ti woowaarya”.

6 Muluku aahimuleela-tho wiira: “Miyo ka Muluku a paapa anyu, Muluku a Abrahamu,+ Muluku a Isaakhi+ ni Muluku a Yakobe”.+ Nto Moise aahikhuneela owiitho wawe, maana aanoova onweha Muluku eekeekhai. 7 Yehova aahihimya-tho wiira: “Mweekeekhai, kihoona ohaawa wa atthu aka, yaawo ari wExiitu, nave kihiiwa wunla waya mwaha wa miteko sookhanyereriwa anivara aya. Miyo kinnisuwela saana ohaawa waya.+ 8 Kinrowa owoopola mmatatani mwa atthu a wExiitu,+ ni waakumiha elapo ele. Nave kinimwaaroiha elapo yooloka ni yuulupale, yoowaatta eleeti ni oravo,+ muttetthe wa akanaani, aheti, amori, aperizi, ahivi ni ayebusi.+ 9 Mukiiwe! Miyo kihiiwa wunla wa atthu a Isarayeli, nave kinnoona moota atthu a wExiitu anaahaaxa aya vanceene.+ 10 Vano kinimoorumani orowa wa Farawo, mwaakumihe wExiitu+ atthu aka, aisarayeli”.

11 Masi Moise, aahimwaakhula Muluku eekeekhai iiraka: “Miyo ka pani, kikhanle oorowa olavula ni Farawo, wiira kaakumihe aisarayeli wExiitu?” 12 Muluku aahimwaakhula wiira: “Miyo kinrowa okhala ni nyuwo.+ Esinaale enooniherya wiira ti miyo koorummeni tiila: Mwaakumiha atthu wExiitu, nyuwosa munrowa omukokhorelaka* Muluku eekeekhai vamwaako vaava”.+

13 Masi Moise aahimukoha Muluku eekeekhai wiira: “Ankhi karowa okumaana ni aisarayeli, kinaaleela wiira: ‘Muluku a amuhavinre anyu ookiruma okumaana ni nyuwo’, awo yakikoha wiira: ‘Nsina nawe ti pani?’+ Nto kinrowa waaleela exeeni?” 14 Muluku aahimuleela Moise wiira: “Miyo Kinookhala Ele Kiniphavela Aka* Okhala”.*+ Nave aahihimya-tho wiira: “Mwaaleele aisarayeli wiira: ‘Miyo Kinookhala, tokirumme okumaana ni nyuwo’”.+ 15 Nuumala-vo, Muluku aahimuleela-tho Moise wiira:

“Mwaaleele aisarayeli wiira: ‘Yehova, Muluku a amuhavinre anyu, Muluku a Abrahamu,+ Muluku a Isaakhi+ ni Muluku a Yakobe,+ ookiruma okumana ni nyuwo’. Nla nsina naka na mahiku ootheene.+ Maloko ootheene a muhoolo, anrowa okuupuwelaka ni nsina nenla. 16 Murowe, mwaathukumanye axitokweene a wIsarayeli, mwaaleele wiira: ‘Yehova, Muluku a amuhavinre anyu, Muluku a Abrahamu, a Isaakhi, ni a Yakobe, ookikhumelela okihimeerya wiira: “Miyo kinnoowehani,+ ni kinnoona etthu muniireliwa anyu wExiitu. 17 Tivo, kinimookumihani elapo ela munihaaxiwa anyu+ ni atthu a wExiitu, kooroiheni elapo ya akanaani, aheti, amori,+ aperizi, ahivi ni ayebusi,+ yeeyo yoowaatta eleeti ni oravo”’.+

18 “Mweekeekhai awo animoowiriyanani.+ Nto nyuwo, ni axitokweene a wIsarayeli, murowe mwakumane ni mwene a wExiitu, mmuleele wiira: ‘Yehova, Muluku a aheeperi,+ oolavula ni hiyo. Xontte, muneemererye weetta mukwaha wa mahiku mararu, nirowaka woothakoni, wiira nanvahe mukuttho Yehova, Muluku ahu’.+ 19 Masi miyo koosuwela saana wiira mwene a wExiitu khonrowa oweemereryani orowa, vahikhanle wiira orookhanyereriwa.+ 20 Tivo, kinimookola ntata naka, kinimwaahukhumu atthu ootheene a wExiitu, ni miteko saka sootikiniha kinrowa aka ovara eriyari aya. Nuumala-vo, animoohiyani murowaka.+ 21 Kinoowiiriha aisarayeli wooniwaka saana ni atthu a wExiitu. Nto okathi munrowa anyu okhuma, nyuwosa khamunrowa okhuma matata-ru.+ 22 Khula muthiyana ohaana onvekela namwaattamanani awe, ni muthiyana ori muletto vatthokoni vawe, itthu sa eparatha, sa eweero ni ikuwo. Mwaawarihe itthu iyo aniinyu axilopwana ni axithiyana. Siiso, munookuxa itthu sinceene sa wExiitu.+

4 Masi Moise aahaakhula iiraka: “Ankhi awo yaahikikupali ni yaahikiwiriyane?+ Awo anrowa ohimya wiira: ‘Yehova khookhumelenleni’”. 2 Vano, Yehova aahimukoha Moise wiira: “Exeeni eyo mukunxe anyu mmatatani mwanyu?” Moise aahaakhula iiraka: “Ttootto”. 3 Muluku aahimuhimeerya Moise wiira: “Mmurihele ttootto owo vathi”. Siiso, Moise aahimurihela vathi, nto ttootto ole aahithatuwa enowa.+ Nuumala-vo, Moise aahitthyawa enowa ele. 4 Vano Yehova aahimuleela Moise wiira: “Mookole ntata nanyu, nvare mwiila wa enowa eyo”. Nto, Moise aahookola ntata nawe, ovara mwiila wa enowa. Vano eyo yaahithatuwa ttootto. 5 Muluku aahihimya wiira: “Ela esinaale enrowa waakupaliha aisarayeli wiira Yehova, Muluku aamuhavinre aya, Muluku a Abrahamu, Muluku a Isaakhi, ni Muluku a Yakobe,+ ohookhumelelani”.+

6 Yehova aahimuleela-tho wiira: “Xontte, muhele ntata nanyu vapeeto, muhina mwa nlaya nanyu”. Nto Moise aahihela ntata nawe vapeeto, muhina mwa nlaya nawe. Okathi aakumihenrye awe ota, ntata nawe naahikhalana makokho,* nikhala nootteela!+ 7 Nuumala-vo, aahimuleela wiira: “Muttikiherye ntata nanyu vapeeto, muhina mwa nlaya nanyu”. Nto Moise aahittikiherya ntata nawe muhina mwa nlaya nawe. Okathi aakumihenrye awe ota, ntata nawe naahitthikela okhala saana, ntoko naari aya! 8 Muluku aahimuleela-tho wiira: “Vakhala wiira awo khanrowa wookupalini, aahiiso woowiriyanani nuumala opaka mwiiriirya woopacerya, weeso animoowiriyanani nuumala mwiiriirya wa nenli.+ 9 Masi awo yaahookupalini nuumala opaka miiriirya iya miili, ni yakhootta woowiriyanani, nyuwo muhaana orika maasi mmuro Niilo, mwayiiherye vatthayani yoowuuma. Nto maasi munrowa anyu orika mmuro Niilo, anoothatuwa ephome vatthayani yoowuuma”.+

10 Vano Moise aahimuleela Yehova wiira: “Yehova, mukilevelele! Masi okhuma khalai, miyo nkinisuwela olavula. Nnakhala nkipacenrye olavula saana nuumala nyuwo olavula ni miyo. Nkinisuwela olavula+ oratteene”. 11 Nto Yehova aahimukoha wiira: “Ti pani onvanhe eyano mutthu? Aahiiso ti pani onimwiiriha mutthu ohilavula, ohiiwa, woona aahiiso ohoona? Kiira ti miyo, Yehova? 12 Vano muroweke. Miyo kinookhala ni nyuwo okathi munrowa anyu olavulaka. Nave kinimooleelakani etthu munrowa anyu ohimyaka”.+ 13 Masi Moise aahaakhula iiraka: “Xontte Yehova, mukilevelele! Masi mmurumeke mutthu mukina munimphavela anyu”. 14 Tivonto, Yehova aahinanariwa vanceene ni Moise, onamuleela wiira: “Munninyu Aroni,+ a nihimo na Levi, onniwerya olavula oratteene. Owo onnoorwa okumana ni nyuwo. Oowehani vale, onootteeliwa murima.+ 15 Nyuwo muhaana omuleela yena etthu yoolavula,+ nave miyo kinrowa okhala ni nyuwosa okathi munrowa anyu olavulaka.+ Kinimooleelani etthu yoopaka. 16 Aroni onrowa olavulaka ni atthu nipuro nanyu, nave nyuwo munrowa olavulaka ni Aroni, okhalaka ntoko ti miyo kinilavula nuuwo.*+ 17 Nyuwo munrowa omukuxa ttootto ola ori mmatatani mwanyu, mpakaneke miiriirya”.+

18 Nto Moise aahitthikela wa taata awe+ Yeethoro, onamuleela wiira: “Xontte, kiniphavela otthikela wExiitu, wiira kaawehe axinnaka nlelo yaari akumi”. Vano Yeethoro aahimwaakhula Moise oriki: “Muroweke ni murettele”. 19 Nuumala-vo, nlelo Moise ori ene oMidiyani, Yehova aahimuleela wiira: “Nvenye, mutthikele wExiitu, okhala wiira atthu ootheene yaaphavela owiivani, ahookhwa”.+

20 Vano Moise aahimukuxa mwaarawe ni anaawe, aaweliha vapuuruni, onapacerya mukwaha awe, otthikelaka elapo ya wExiitu. Nave-tho, Moise aahimukuxa mmatatani mwawe ttootto, yoowo Muluku eekeekhai aamurumme awe omukuxa. 21 Yehova aahimuleela Moise wiira: “Kihoovahani owerya woopaka miiriirya. Nto mwatthikela wExiitu, muhaana opaka+ miiriirya sootheene ohoolo wa Farawo. Masi kinoomuhiya Farawo wiira uumihe murima+ awe. Tivo, khonrowa waahiya atthu akhumaka.+ 22 Muhaana omuleela Farawo wiira: ‘Yehova ohimmye wiira: “Isarayeli, ti mwanaka mwaamulopwana, ompacerya aka omuyara.+ 23 Kinooleelani wiira, mmuhiye mwanaka owo wiira orowe akikokhorele.* Masi mwakhootta, miyo kinoomwiiva mwaninyu mwaamulopwana oopaceriwa oyariwa”’”.+

24 Okathi Moise eetta awe mphironi, orowaka opuro aakela awe orupa, Yehova*+ aahimphwanya, onaphavela omwiiva+ yoowo.* 25 Vano Siipora+ aahikuxa nluku noowiitha,* omwinnuwiha mwanawe. Nto nrapala nene aahirihela vasulu va inawu sawe, onahimya wiira: “Nyuwo mwa iyaka,* mwaha wa ephome ela”. 26 Siiso, nlaikha* khinaamwiivale. Okhala wiira Siipora aahimwinnuwiha mwanawe, aahihimya wiira: “Nyuwo mwa iyaka, mwaha wa ephome ela”.

27 Vano Yehova aahimuleela Aroni wiira: “Murowe mwakumane ni Moise+ woothakoni”. Aroni aahirowa okumana ni Moise omwaako wa Muluku eekeekhai.+ Nuumala omphwanya, aahimukoha ihaali, onvaha epeexo. 28 Moise aahimuleela Aroni moolumo ootheene a Yehova, ni miiriirya sootheene aarummwale awe+ opaka.+ 29 Nuumala-vo, Moise ni Aroni yaahirowa waathukumanya axitokweene ootheene a wIsarayeli.+ 30 Nto Aroni aahaaleela moolumo ootheene Yehova aamulenle awe Moise. Nave Moise aahipaka miiriirya+ ohoolo wa atthu. 31 Vano atthu yaahimukupali+ Moise. Nuumala wiiwa wiira Yehova aamwaakhaliherya aisarayeli,+ ni wiira aanoona ohaawa waya,+ awo yaahuurama mpakha vathi.

5 Nuuvira okathi, Moise ni Aroni yaahirowa okumana ni Farawo anamuleela wiira: “Yehova, Muluku a Isarayeli onihimya wiira: ‘Mwaahiye atthu aka erowe woothakoni yathukumane wiira yakikokhorele’”. 2 Masi Farawo aahaakhula iiraka: “Yehova ti pani,+ kikhanle aka oomwiiwelela wiira kaahiye aisarayeli arowaka?+ Nkinimusuwela Yehova nnakhala vakhaani. Nave-tho, nkinaahiya aisarayeli arowaka”.+ 3 Masi awo yaahimuleela wiira: “Muluku a aheeperi oolavula ni hiyo. Xontte, nimphavela weetta mukwaha wa mahiku mararu, nirowaka woothakoni wiira nanvahe mukuttho Yehova, Muluku ahu.+ Naahiire siiso, owo onoonikumiherya iretta, aahiiso onimwaahiya awanani ihu aniivaka ni espaata”.* 4 Mwene a wExiitu aahiiwaakhula wiira: “Nyuwo Moise ni Aroni, xeeni munaahiiha anyu atthu ovara miteko saya? Mutthikelase ovara miteko sanyu!”*+ 5 Farawo aahihimya-tho wiira: “Nyuwo muhoona wiira atthu a nloko nanyu khareere waatta mulaponi mu. Vano muniphavela waahiiha ovara miteko saya”.

6 Nihiku nenle, Farawo aahaaruma arumeyi awe ni makapataaxi aisarayeli iiraka: 7 “Muhiye waavaha malaxi* atthu ala wiira apakeke itixolu.+ Mwaahiye yaavyeke malaxi mmansaya. 8 Masi mwaakhanyereryeke opaka nummeru na itixolu ntoko yaapaka aya khalai. Muhivukule, okhala wiira aapacerya onyoonyeriwa.* Tivonto aninla aya, ahimyaka wiira: ‘Nimphavela orowa, wiira nanvahe mukuttho Muluku ahu!’ 9 Mwaavariheke muteko munceene. Siiso, animwaatteliwa itthu soovara, ahiwiriyaneke itthu soowoothiwa”.

10 Tivo arumeyi ni makapataaxi+ aisarayeli yaahirowa waalela atthu wiira: “Farawo onihimya wiira: ‘Khamunrowa ovahiwaka-tho malaxi. 11 Muroweke nyuwo mmansinyu mwaavyeke malaxi, opuro munoona anyu wiira munoophwanya. Masi muteko anyu khonrowa ovukuliwa nnakhala vakhaani’”. 12 Nuumala-vo, atthu yaahimwareela elapo yootheene ya wExiitu aphavelaka malaxi.* 13 Arumeyi ale yaanaakhanyererya atthu yiiraka: “Khula mutthu ohaana omaliha muteko awe wa khula nihiku, ntoko mwiira anyu okathi mwaavahiwa anyu malaxi”. 14 Nave-tho, makapataaxi aisarayeli, yaawo yaathanliwe ni arumeyi a Farawo wiira yaaweha-weheke, yaanaamana.+ Vano arumeyi a Farawo yaanaakoha makapataaxi aisarayeli wiira: “Xeeni muhimalelihaka opaka nummeru na itixolu ntoko mwaapaka anyu khalai? Eyo ehiiraneya nsana ni olelo”.

15 Siiso makapataaxi aisarayeli yaahirowa okumana ni Farawo, ananlaseya yiiraka: “Xeeni munniirela anyu siisa, hiyo arumeyi anyu? 16 Khuuvo onnivaha malaxi. Hata vari siiso, awo aniphavela wiira nihihiye opaka itixolu. Nave-tho anninimana, nnaamwi ari ene yaawo arina mulattu”. 17 Masi Farawo aahihimya wiira: “Nyuwo munoonyoonyeriwa!* Munoonyoonyeriwa!*+ Tivo munihimya anyu wiira: ‘Nimphavela orowa, wiira nanvahe mukuttho Yehova’.+ 18 Vano mutthikele ovara miteko sanyu! Khamunrowa ovahiwa malaxi, masi muhaana opaka nummeru nimosa-ru na itixolu mwaavekeliwa anyu khalai”.

19 Makapataaxi aisarayeli yaahoona wiira vano ari mmaxakhani, mwaha wa moolumo oowi: “Muhivukule nummeru na itixolu munipaka anyu khula nihiku”. 20 Nuumala makapataaxi ale okhumela ota waaronwe aya okumana ni Farawo, yaahimphwanya Moise ni Aroni yeemenle ene, yaalipelelaka. 21 Makapataaxi ale awoonaka-ru, yaahihimya wiira: “Yehova owehe etthu epanke anyu, ni oovaheeni ehukhumu, okhala wiira moomwiiriha Farawo ni arumeyi awe oninyokha. Nave muhaavahererya espaata* mmatatani mwaya wiira aniive”.+ 22 Vano Moise aahinvekela Yehova iiraka: “Yehova, xeeni munaahiya anyu atthu ala ahaaxiwaka? Xeeni muhalaka okiruma? 23 Okhuma nihiku kironwe aka okumana ni Farawo, kilavulaka nsina nanyu,+ owo onootepa waahaaxa atthu ala.+ Nave nyuwo khiivo etthu mpanke anyu wiira nwaakihe atthu anyu”.+

6 Yehova aahimuleela Moise wiira: “Vano munimoona etthu kinrowa aka omwiiriha Farawo.+ Ni ntata naka noowerya, miyo kinoomwiiriha Farawo waahiya atthu aka arowaka. Khahiyo onrowa waahiya arowaka paahi, masi onrowa owoomola”.+

2 Nuumala-vo, Muluku aahimuhimeerya Moise wiira: “Miyo ka Yehova. 3 Miyo kaanimukhumelela Abrahamu, Isaakhi ni Yakobe, ntoko Muluku Oowerya Sootheene.+ Masi nkaisuwelinhe awo+ kirumeelaka nsina naka noowi Yehova.+ 4 Nave koopaka nivarihano naawo, wiira kaavahe elapo ya oKanaani, yeeyo yaakhala aya ntoko anamurwa.+ 5 Miyo kihiiwa wunla wa atthu a Isarayeli, yaawo anipakiwa ipottha ni atthu a wExiitu. Nave kinnuupuwela nivarihano+ kipanke aka ni amuhavinre anyu.

6 “Tivonto, mwaaleele aisarayeli wiira: ‘Miyo ka Yehova. Kinimootaphulani miteko soolipa munivarihiwa anyu ni atthu a wExiitu, ni anookhalihaayani ipottha.+ Miyo kinimookola moono aka kaahukhumu,+ ni kiwoopoleni. 7 Nyuwo munookhala atthu aka, nave miyo kinrowa okhala Muluku anyu.+ Mweekeekhai, munoosuwela wiira miyo ka Yehova, Muluku anyu, yoowo ookuminheni wExiitu, weiwo mwaavarihiwa anyu miteko soolipa. 8 Kinimooroihani elapo kammanenle aka natiri Abrahamu, Isaakhi ni Yakobe. Nto kinimoovahani elapo eyo wiira ekhale yawinyu.+ Miyo ka Yehova’”.+

9 Muhoolo mwaya, Moise aahaaleela aisarayeli moolumo ala. Masi awo khiyanwiriyanne Moise owo, okhala wiira yaahikhulumuwa mwaha woovarihiwa miteko soolipa.+

10 Vano, Yehova aahimuleela Moise wiira: 11 “Murowe wa Farawo, mwene a wExiitu, mwamuleele wiira aahiye aisarayeli wiira akhume elapo ela”. 12 Masi, Moise aahimwaakhula Yehova iiraka: “Aisarayeli khakiwiriyanne,+ nto kiireke Farawo onookhala-khala okiwiriyanaka? Nave miyo nkinlavula saana”.+ 13 Yehova aahimuleela-tho Moise ni Aroni etthu yaarowa aya waahimeerya aisarayeli ni Farawo, mwene a wExiitu. Owo aarummwale waakumiha aisarayeli wExiitu.

14 Makhulupale a nihimo na Rubeni, yoowo aari mwaana oopaceriwa oyariwa+ a Isarayeli, taala: Hanoki, Palu, Esironi, ni Karmi.+ Ala tari amusi a Rubeni.

15 Anamwane a Simeyoni taala: Yemuweli, Yamini, Ohadi, Yakini, Sohari, ni Xawuli. Xawuli owo aayariwe ni muthiyana mukanaani.+ Ala tari amusi a Simeyoni.

16 Masina a anamwane a Levi,+ nitthariwaka nihimo naya, taala: Gerisoni, Kehathi ni Merari.+ Levi aahikhala iyaakha 137.

17 Anamwane a Gerisoni, atthariwaka imusi saya,+ taala: Liibini ni Ximeyi.

18 Anamwane a Kehathi taala: Amurami, Isehari, Hebroni ni Uziyeli.+ Kehathi aahikhala iyaakha 133.

19 Anamwane a Merari taala: Mali ni Muxi.

Iya imusi sa alevi, atthariwaka mahimo aya.+

20 Amurami aahimuthela murokorawe paapa awe,+ yoowo iihaniwa Yokebedi. Yokebedi owo, aahimuyara Aroni ni Moise.+ Amurami aahikhala iyaakha 137.

21 Anamwane a Isehari taala: Kora,+ Nefegi, ni Ziikiri.

22 Anamwane a Uziyeli taala: Mixayeli, Elisafani+ ni Sitiri.

23 Aroni aahimuthela Elixeba, mwaana a Aminadabi, murokorawe Naasoni.+ Elixeba aahimuyara Nadabi, Abihu, Eleyazari, ni Itamari.+

24 Anamwane a Kora taala: Asiri, Elikana, ni Abiyasafi.+ Ala amusi a nihimo na Kora.+

25 Eleyazari+ mwaana a Aroni, aahimuthela mwaana a Putiyeli. Nto muthiyana owo aahimuyara Pineha.+

Ala makhulupale a itthoko sa alevi, itthariwaka imusi saya.+

26 Ola Aroni ni Moise, yaale Yehova aalenle awe wiira: “Mwaakumihe aisarayeli elapo ya wExiitu, nihimo ti nihimo”.+ 27 Ti yaawo, eyo piiyo, Aroni ni Moise+ yaalavunle ni Farawo, mwene a wExiitu, wiira aahiye atthu a Isarayeli akhumaka wExiitu.

28 Nihiku Yehova aalavunle awe ni Moise elapo ya wExiitu, 29 Yehova aahimuleela Moise wiira: “Miyo ka Yehova. Mwamuleele Farawo, mwene a wExiitu, itthu sootheene kinooleelaakani”. 30 Vano, Moise aahimuleela Yehova wiira: “Miyo nkinlavula saana, nto kiireke Farawo onookhala-khala okiwiriyanaka?”+

7 Yehova aahimuleela Moise wiira: “Mukiiwe, miyo kihoovahani owerya wiira mwalavule ohoolo wa Farawo nipuro naka.* Nto muulupale anyu Aroni onrowa olavulaka nipuro nanyu.*+ 2 Muhaana omuleela itthu sootheene kinoorumaakani. Vano muulupale anyu Aroni onrowa olavulaka ni Farawo, nto Farawo onimwaahiya aisarayeli wiira akhume elapo ela. 3 Miyo kinoomuhiya Farawo uumihaka murima awe.+ Nave kinimooniherya miteko sootikiniha ni kinoopaka miiriirya sinceene elapo ya wExiitu.+ 4 Masi Farawo khonrowa woowiriyanani. Miyo kinimooniherya owerya waka* kaaphukelaka vanceene+ atthu a wExiitu ni kinimwaakumiha atthu aka oowaatta,* eyo piiyo, aisarayeli, elapo ya wExiitu. 5 Mweekeekhai, atthu a wExiitu anoosuwela wiira miyo ka Yehova,+ okathi kinrowa aka wookolela ntata naka wExiitu ni waakumiha aisarayeli eriyari aya”. 6 Moise ni Aroni yaahipaka ele Yehova aarumme awe. Awo yaahiira siisaale ntoko yaarummwale aya. 7 Okathi Moise ni Aroni yaalavunle aya ni Farawo,+ Moise aarina iyaakha 80, masi Aroni arina iyaakha 83.

8 Vano Yehova aahimuleela Moise ni Aroni wiira: 9 “Farawo ooleelani wiira: ‘Mpake mwiiriirya’, nyuwo mmuleele Aroni wiira: ‘Mmukuxe ttootto anyu, mmurihele vathi ohoolo wa Farawo’. Vano ttootto owo onoothatuwa enowa yuulupale”.+ 10 Siiso, Moise ni Aroni yaahirowa okumana ni Farawo, apaka siisaale ntoko Yehova aarumme awe. Aroni aahimurihela ttootto awe vathi, ohoolo wa Farawo ni wa arumeyi a Farawo, nto ttootto ole aahithatuwa enowa yuulupale. 11 Masi Farawo aahiruma wiihaniwa asuweli, akulukhana ni anahako a wExiitu.+ Nave awo yaahipaka etthu emosa-ru arumeelaka maxintta aya.+ 12 Khula mutthu aahimurihela ttootto awe vathi, nto attootto awo yaahithatuwa inowa suulupale. Masi ttootto a Aroni aahaamirya attootto awo. 13 Hata vari siiso, Farawo aahuumiha murima awe,+ ni khanwiriyanne Moise ni Aroni, ntoko siisaale Yehova aahimmye awe.

14 Vano Yehova aahimuleela Moise wiira: “Farawo ohuumiha murima awe.+ Owo ookhootta waahiya atthu arowaka. 15 Meelo voosiisu, murowe mwakumane ni Farawo, okathi onrowa awe omuro Niilo. Mweemele mukerekhere mwa muro owo, mmulipeleleke. Nave mmukuxe ttootto anyu mmatatani, yoole aathatunwe enowa.+ 16 Nave mmuleele wiira: ‘Yehova, Muluku a aheeperi, ookiruma okumana ni nyuwo.+ Owo onihimya wiira: “Mwaahiye atthu aka arowe wiira yakikokhorele* woothakoni”. Masi nyuwo khamwiiwelenle mpakha vano. 17 Yehova onihimya wiira: “Nyuwo munoosuwela wiira miyo ka Yehova,+ mwaha wa etthu kinrowa aka opaka. Kinoomana maasi ala a muro Niilo ni ttootto ori mmatatani mwaka, nto maasi ala, anoothatuwa ephome. 18 Ihopa sa muro Niilo sinimookhwa, nave muro Niilo onimunkhaka vanceene. Atthu a wExiitu khanrowa owerya ophwanya maasi oowurya mmuro Niilo”’”.

19 Nuumala-vo, Yehova aahimuleela Moise iiraka: “Mmuleele Aroni wiira: ‘Mmukuxe ttootto anyu, mmookolele vasulu va maasi a wExiitu,+ eyo piiyo, miro suulupale, miro saamukhaani,* mapuro ootothowa,+ maratta ootheene, wiira athatuwe ephome’. Elapo yootheene ya wExiitu enoosarya ephome. Hata mapawe ni maluku aniheliwa maasi, anoosarya ephome”. 20 Moowaakuveya, Moise ni Aroni yaahipaka ele Yehova aarumme awe. Aroni aahimukuxa ttootto, omana maasi a muro Niilo, ohoolo wa Farawo ni wa arumeyi a Farawo. Vano maasi ootheene a muro, yaahithatuwa ephome.+ 21 Ihopa sa muro Niilo saahikhwa,+ nto muro waahipacerya wunkha vanceene. Atthu a wExiitu khiyaawerya owurya maasi a muro Niilo.+ Nave maasi a elapo yootheene ya wExiitu yaahithatuwa ephome.

22 Nto, anahako a wExiitu yaahipaka etthu emosa-ru ni maxintta aya.+ Tivo, Farawo aahithipelela wuumiha murima awe, ni khanwiriyanne Moise ni Aroni, ntoko siisaale Yehova aahimmye awe.+ 23 Nuumala-vo, Farawo aahitthikela owannyawe, ni khaacanle-tho itthu oonale awe. 24 Tivo, atthu ootheene a wExiitu yaanithipa mukerekhere mwa muro Niilo wiira aphwanye maasi oowurya, okhala wiira khiyaawerya-tho owurya maasi a muro Niilo. 25 Nave yaahimala mahiku 7 Yehova otatunxe ene maasi a muro Niilo.

8 Yehova aahimuleela Moise oriki: “Murowe wa Farawo mwaamuleele wiira: ‘Yehova onihimya wiira: “Mwaahiye atthu aka erowe, wiira yakikokhorele.*+ 2 Mwathipelela waakhoottiherya orowa, kinookumiherya ehukhumu ya anaphulu,+ elapo anyu yootheene. 3 Mmuro Niilo anookhumelela anaphulu anceene. Anookela owannyu, okwartu wanyu, ni vakhaamani vanyu. Nave anoomwareela itthoko sa arumeyi anyu, ni sa atthu anyu. Anookela nfornuni mwanyu, ni mapuro ammasariwa etiriku.+ 4 Anaphulu awo animoorweelani nyuwo, ni animwaarweela atthu anyu, ni arumeyi anyu ootheene”’”.

5 Nuumala-vo, Yehova aahimuleela Moise oriki: “Mwamuleele Aroni wiira: ‘Mmukuxe ttootto anyu, mmookolele vasulu va miro sootheene, ni miro saamukhaani* siniphattuwa muro Niilo, ni mapuro ootothowa, wiira akhumelele anaphulu elapo yootheene ya wExiitu’”. 6 Aroni aahimukuxa ttootto awe, omookolela vasulu va maasi a wExiitu. Nto yaahikhumelela anaphulu, asareya elapo ya wExiitu. 7 Masi anahako a wExiitu yaahipaka etthu emosa-ru ni maxintta aya. Tivo yaahiwiiriha okhumelela anaphulu elapo ya wExiitu.+ 8 Vano, Farawo aahimwiihana Moise ni Aroni aahimeerya wiira: “Mmuxonttele Yehova wiira aakumihe anaphulu ala wa miyo ni wa atthu aka,+ okhala wiira kinniphavela waahiya atthu ala arowaka, wiira yanvahe mukuttho Yehova”. 9 Moise aahimwaakhula Farawo iiraka: “Nyuwo muthanleke okathi muniphavela anyu wiira kimuxonttele Muluku wiira aakumihe anaphulu ala wa nyuwo, wa arumeyi anyu, wa atthu anyu, ni mmaitthokoni mwanyu. Anrowa ohala mmuro Niilo paahi”. 10 Nto Farawo aahaakhula iiraka: “Meelo”. Vano Moise aahimuleela oriki: “Kinimwiira ntoko mulavunle anyu. Siiso, munoosuwela wiira khuuvo-tho onlikana ni Yehova, Muluku ahu.+ 11 Anaphulu awo anookumihiwa vate vanyu, wa arumeyi anyu, ni wa atthu anyu. Anrowa ohala mmuro Niilo paahi”.+

12 Vano, Moise ni Aroni yaahikhuma ohoolo wa Farawo. Moise aahimuxonttela Yehova wiira aakumihe anaphulu aamukumihenrye awe Farawo.+ 13 Yehova aahaakhula yooveka ya Moise. Nto anaphulu yaahipacerya okhwa mpaani, vate, ni mmatta. 14 Yaahuukeliwa mapuro manceene, nto elapo ele yaahipacerya wunkha vanceene. 15 Okathi Farawo oonale awe wiira anaphulu aavukuwa, aahuumiha murima awe,+ okhootta onwiriyana Moise ni Aroni, ntoko Yehova aahimmye awe.

16 Yehova aahimuleela Moise oriki: “Mmuleele Aroni wiira: ‘Mmukuxe ttootto anyu, mmane etthaya. Vano ntthupi nene nnoothatuwa apwilimwithi elapo yootheene ya wExiitu’”. 17 Awo yaahipaka ntoko saarummwale aya. Aroni aahimookola ttootto awe, omana etthaya. Nto apwilimwithi yaahaakhumelela atthu ni inama. Ntthupi nootheene na wExiitu+ naahithatuwa apwilimwithi, asareya elapo ele. 18 Anahako yaaheererya opaka etthu emosa-ru ni maxintta aya+ wiira yaakumiherye apwilimwithi, masi khiyaawenrye. 19 Anahako ale yaahimuleela Farawo wiira: “Nno owerya wa Muluku!”*+ Masi Farawo aahuumiha murima awe, ni kanwiriyanne Moise ni Aroni, ntoko Yehova aahimmye awe.

20 Nuumala-vo, Yehova aahimuleela Moise oriki: “Meelo voosiisu, okathi Farawo onrowa awe omuro, murowe mwamuleele wiira: ‘Yehova onihimya wiira: “Mwaahiye atthu aka arowe, wiira yakikokhorele.* 21 Masi mwakhootta waahiya atthu aka arowaka, kinimookumiheryani aphuure nyuwo, ni arumeyi anyu, ni atthu anyu, ni mmaitthokoni mwanyu. Ipa sootheene sa wExiitu anoosareya aphuure, ni anookhuneela etthaya yootheene atthu a wExiitu aninyakela aya. 22 Nihiku nlo kinoovalaanya elapo ya oGooxeni, yeeyo anikhala atthu aka. Khanrowa ophiya aphuure, nnakhala mmosa.+ Siiso munoosuwela wiira miyo Yehova, kiri elapo yeela.+ 23 Nave kinimwavalaanya atthu aka ni atthu anyu. Mwiiriirya ola onrowa okhumelela meelo”’”.

24 Yehova aahiira siiso. Yaahikhumelela aphuure anceene, asareya empa ya Farawo, ni ipa sa arumeyi awe, ni elapo yootheene ya wExiitu.+ Nto, elapo yootheene yaahisareya aphuure.+ 25 Vano, Farawo aahimwiihana Moise ni Aroni, onamuleela wiira: “Muroweke mwanvaheke mukuttho Muluku anyu, mulaponi muumu”. 26 Moise aahimwaakhula wiira: “Khivanikhalela wiira siiso, okhala wiira atthu a wExiitu+ annithanya etthu ninrowa ahu onvaha mukuttho Yehova, Muluku ahu. Niireke atthu a wExiitu khanrowa onivonya maluku, navaha mukuttho etthu anithanya aya? 27 Nimphavela weetta mukwaha wa mahiku mararu nirowaka woothakoni. Weiwo, ninrowa onvaha mukuttho Yehova, Muluku ahu, ntoko onilenle awe”.+

28 Farawo aahihimya wiira: “Kinimoohiyani murowaka, wiira mwanvahe mukuttho Yehova, Muluku anyu, moothakoni. Masi muhirowexe ottaiwene. Nave mmuxonttele Muluku mwaha wa miyo”.+ 29 Nto Moise aahimuleela wiira: “Vano, kinookhuma ohoolo wanyu kamuxonttele Yehova. Meelo, aphuure animoohiyani, ni animwaahiya arumeyi anyu, ni animwaahiya atthu anyu. Masi nyuwo Farawo muhitthikele-tho oniwoka,* mukhoottaka waahiya atthu orowa wiira yanvahe mukuttho Yehova”.+ 30 Moise aahikhuma ohoolo wa Farawo, ni aahimuxonttela Yehova.+ 31 Yehova aahipaka ele Moise anvekenle awe. Vano aphuure yaahimuhiya Farawo, ni arumeyi awe, ni atthu awe. Khaahanle nnakhala phuure mmosa. 32 Masi, Farawo aahuumiha murima awe, ni aahikhootta waahiya atthu arowaka.

9 Siiso, Yehova aahimuleela Moise wiira: “Murowe wa Farawo, mwamuleele so: ‘Yehova, Muluku a aheeperi, ohimmye wiira: “Mwaahiye atthu aka erowe, wiira yakikokhorele.*+ 2 Masi mwathipelela okhootta, muhinaphavela waahiya erowaka, 3 miyo Yehova, kinimwiiva mihuwo sanyu ni owerya waka.+ Nave-tho, ikhavalo, apuuru, ikamelo, ipooyi, ni ipwittipwitthi, sinoophwanyiwa ni eretta yootakhala.+ 4 Nave miyo Yehova, kinoovalaanya mihuwo sa aisarayeli ni mihuwo sa atthu a wExiitu. Khiivo enama ya aisarayeli enrowa okhwa”’”.+ 5 Nave-tho, Yehova aahihimya okathi ene, iiraka: “Meelo, miyo Yehova, kinoopaka eyo, elapo yeela”.

6 Mmeeloni mwaya, Yehova aahipaka eyo. Nto mihuwo sootheene sa atthu a wExiitu saahipacerya okhwa,+ masi mihuwo sa aisarayeli khisaakhwiiye, nnakhala enama emosa. 7 Okathi Farawo aarumme awe owehiwa mihuwo iyo, aahisuwela wiira khiivo enama ya aisarayeli yaakhwiiye, nnakhala emosa. Hata vari siiso, Farawo nlelo aahuumiha murima awe, ni aahikhootta waahiya atthu arowaka.+

8 Vano, Yehova aahimuleela Moise ni Aroni wiira: “Musarye ettuurwa* matata anyu oomanli, nto Moise oyiiherye musulu ohoolo wa Farawo. 9 Vano eyo enoopakeya ntthupi elapo yootheene ya wExiitu, ni enimwaakumiherya ithuku sinikhuma oru, atthu ni inama, elapo yootheene ya wExiitu”.

10 Nto awo yaahikuxa ettuurwa,* yeemela ohoolo wa Farawo. Vano Moise aahiyiiherya musulu ettuurwa eyo, nto eyo yaahaakumiherya atthu ni inama, ithuku saaphuleya, sinakhuma oru. 11 Anahako khiyaawenrye orowa okumana ni Moise, mwaha wa ithuku saakhumelenle awo, ni atthu ootheene a wExiitu.+ 12 Masi Yehova aahimuhiya Farawo uumihaka murima awe, nto Farawo owo khaamwiiwelenle Moise ni Aroni, ntoko Yehova aamulenle awe Moise.+

13 Yehova aahimuleela Moise wiira: “Nvenye meelo voosiisu ene, murowe mweemele ohoolo wa Farawo, mmuleele wiira: ‘Yehova, Muluku a aheeperi, ohimmye so: “Mwaahiye atthu aka arowe, wiira yakikokhorele.* 14 Vano kinimookumiheryani ihukhumu sootheene nyuwo, arumeyi anyu, ni atthu anyu, wiira musuwelase wiira khuuvo onlikana ni miyo, elapo yootheene.+ 15 Kaarowa wiiraka saano kookumihenryeeneni ehukhumu yootakhala nyuwo ni atthu anyu, ni kaamoomala-malihani mulaponi. 16 Masi kihoohiyani muri ene mukumi mwaha wa etthu ela: wiira kiwooniheryeni owerya waka ni wiira nsina naka nilaleiwe elapo yootheene ya vathi.+ 17 Masi nlelo munniixinnuwiha, muhinaphavela waahiya atthu aka arowaka. 18 Meelo, waattamelaka okathi yoola, kinookumiherya epula ya maralala maalupale, ehitonko okhumelela wExiitu mpakha olelo-va. 19 Tivonto, murume wiira mihuwo sanyu sootheene ni itthu sanyu sootheene siri mmatta, sipwehiwe nipuro noolipa. Atthu ootheene ni inama, sinrowa ophwanyiwa mmatta sihinatthi oroihiwa nipuro noolipa, sinimookhwa saphwanyiwa ni maralala”’”.

20 Arumeyi akina a Farawo, yaawo yoovale nuulumo na Yehova, yaahaakuvela waarowela anamuteko aya ni mihuwo saya, yaapweha nipuro noolipa. 21 Masi ale yahaiwelenle nuulumo na Yehova, yaahaahiya anamuteko aya ni mihuwo saya omatta.

22 Yehova aahimuleela Moise wiira: “Mookololele ntata nanyu musulu, wiira maralala amorele elapo yootheene ya wExiitu.+ Yaamorele atthu, ni inama, ni malaxi ootheene a elapo ya wExiitu”.+ 23 Siiso, Moise aahimookolela ttootto awe osulu, nto Yehova aahikumiherya okukutteya ni maralala. Waahikhumelela mooro* osulu, ni Yehova aanirupiha epula ya maralala elapo ya wExiitu. 24 Yaahikhumelela maralala ni mooro waaverunya eriyari ya maralala awo. Yaari epula yuulupale. Khetonko okhumelela epula siisaale, elapo ya wExiitu.+ 25 Maralala yaahimorela elapo yootheene ya wExiitu. Yaahaamorela atthu, ni inama, ni yaahihonona malaxi ootheene ni miri sootheene.+ 26 Elapo ya oGooxeni paahi, weiwo yaakhala aya aisarayeli, khiyaamorenle maralala.+

27 Tivo, Farawo aahiruma wiihaniwa Moise ni Aroni, onaaleela wiira: “Vano kihoona wiira koottheka. Yehova naxariya. Miyo ni atthu aka noottheka. 28 Mmuxonttele Yehova, wiira omalihe okukutteya ni maralala anikhuma wa Muluku. Kinimoohiyani murowasaka, ni khimunkhala-tho nno”. 29 Moise aahimwaakhula oriki: “Kikhumaka-ru opooma nno, kinonvekela Yehova.* Okukutteya onoomala, nave maralala khantthikela omora, wiira musuwele wiira elapo ela ti ya Yehova.+ 30 Masi koosuwela wiira hata vari siiso, nyuwo ni arumeyi anyu, khamunrowa omoova Yehova Muluku”.

31 Vano mitathi sa eliinyu ni ipyo saahihononeya, okhala wiira ipyo saahirupala, ni mitathi sa eliinyu* saahikhalana ithutu. 32 Masi etiriku* khiyaahononeiye, okhala wiira nlelo khiyaakhoomanle. 33 Moise aahimuhiya Farawo, onakhuma epooma ele, onarowa onvekela Yehova.* Vano, okukutteya ni maralala yaahimala, ni epula yaahihiya orupa elapo ele.+ 34 Okathi Farawo oonale awe wiira epula, maralala, ni etari saahimala, aahitthikela-tho ottheka, uumiha murima awe,+ owo ni arumeyi awe. 35 Farawo aahuumiha murima awe, ni aahikhootta waahiya aisarayeli arowaka, ntoko Yehova aamulenle awe Moise.+

10 Yehova aahimuleela Moise oriki: “Murowe wa Farawo, okhala wiira koomuhiya wiira uumihe murima awe, ni kihaahiya arumeyi awe wiira yuumihe mirima saya,+ wiira kipake miiriirya saka ohoolo waya.+ 2 Kihiira siiso, wiira mwaaleele aniinyu ni axisulu anyu, ehukhumu yuulupale kaavanhe aka atthu a wExiitu, ni miiriirya kipanke aka eriyari aya.+ Nave-tho, nyuwo munoosuwela tthiri wiira miyo ka Yehova”.

3 Moise ni Aroni yaahirowa wa Farawo, anamuleela wiira: “Yehova, Muluku a aheeperi, ohimmye so: ‘Munrowa okhootta okiiwelela+ mpakha silini? Mwaahiye atthu aka arowe, wiira yakikokhorele.* 4 Masi mwathipelela okhootta waahiya atthu aka arowaka, meelo kinoomukumiherya nasope* mulaponi mwanyu. 5 Nasope owo, onookhuneela elapo yootheene, ni khivanrowa oweryaneyaka oweha etthaya. Onookhuura itthu sootheene sahaahononiwe ni maralala. Nave onookhuura makukhu ootheene a miri.+ 6 Nasope owo onoosareya mpaani mwanyu, ni mpaani mwa arumeyi anyu, ni ipa sootheene sa wExiitu. Okhuma okathi amuhavinre anyu yaakhala aya elapo ela mpakha olelo-va,+ khonawehiwe nasope siiso’”. Nuumala-vo, owo aahirukunuwa, onakhuma ohoolo wa Farawo.

7 Nto arumeyi a Farawo yaahimukoha Farawo, ariki: “Mulopwana ola onrowa onikumiherya maxakha* mpakha silini? Mwaahiye atthu ala eroweke, wiira yamukokhorele* Yehova, Muluku aya. Khamunoona wiira elapo ya wExiitu yoohononeya?” 8 Vano Moise ni Aroni yaahittikiheriwa wa Farawo. Nto owo aahaaleela wiira: “Muroweke wiira mwamukokhorele* Yehova, Muluku anyu. Masi munrowa naani?” 9 Moise aahimwaakhula Farawo oriki: “Ninrowa ni amiravo ahu, ni atthu ahu oowuuluvala, ni aniihu axilopwana ni axithiyana, ni ipwittipwitthi sahu, ni ipooyi sahu,+ okhala wiira ninrowa othukumana wiira namukokhorele Yehova”.+ 10 Farawo aahaaleela wiira: “Nyuwo munuupuwela wiira kinimoohiyani mukhumaka vamosa ni aniinyu? Vakhala wiira eyo enimwiiraneya, weeso Yehova ori ni nyuwo+ tthiri! Vannooneya wiira nyuwosa muniphavela opaka etthu yootakhala. 11 Nnaari! Aroweke alopwana-ru paahi wiira yamukokhorele* Yehova, maana ti etthu nvenke anyu”. Nuumala-vo, Moise ni Aroni yaahoomoliwa ohoolo wa Farawo.

12 Vano Yehova aahimuleela Moise wiira: “Mookololele ntata nanyu vasulu va elapo ya wExiitu, wiira okhumelele nasope mulaponi mwa wExiitu, ni okhuure malaxi ootheene a mulaponi, ni itthu sootheene sihihononiwe ni maralala”. 13 Niinaano-ru, Moise aahimookolela ttootto awe vasulu va elapo ya wExiitu. Nto Yehova aahiiriha woopa epheyo yaakhuma mpantta onikhuma nsuwa wa elapo. Vano epheyo eyo yaahoopa nihiku nootheene, othana ni ohiyu. Nuumala oxa voosiisu, epheyo ele yaakhuma mpantta onikhuma nsuwa, yaahimuruuha nasope. 14 Nasope aahirwa elapo yootheene ya wExiitu, onakhala mapuro ootheene a elapo ele.+ Nasope owo khaareere waatta.+ Khotonko okhala nasope oowaatta siisaale, nnakhala khonrowa-tho okhala siisaale. 15 Nasope owo aahikhuneela elapo ele yootheene, nto eyo yaahiriipela. Aahikhuura malaxi ootheene a elapo ele, ni aahikhuura mihokorokho sa miri sahaahononiwe ni maralala. Khinaahanle nnakhala nikukhu nimosa nikithi mmirini, wala nlaxi nimosa nikithi, mulaponi mootheene mwa wExiitu.

16 Vano, Farawo aahiruma wiihaniwa Moise ni Aroni moowaakuveya, onaahimeerya wiira: “Miyo koomutthekela Yehova, Muluku anyu. Nave kihootthekelani nyuwo. 17 Xontte, mukilevelele etampi aka ekwaha yeela paahi, nave mmuxonttele Yehova, Muluku anyu, wiira okumihe ehukhumu ela yootakhala”. 18 Nto, owo* aahikhuma ohoolo wa Farawo, onarowa omuxonttela Yehova.+ 19 Vano Yehova aahirukunuxa epheyo, enoopa ni ikuru ekhumaka onikela nsuwa. Epheyo eyo yaahinvaviha nasope, emurihela ephareya Yooxeerya. Nto khiyaahanle nnakhala esoope emosa, mulaponi mootheene mwa wExiitu. 20 Masi, Yehova aahimuhiya Farawo uumihaka murima awe,+ ohiphavela waahiya aisarayeli arowaka.

21 Nuumala-vo, Yehova aahimuleela Moise wiira: “Mookololele ntata nanyu osulu, wiira ekhumelele ewiriphi elapo ya wExiitu. Ewiriphi eyo enrowa okhala yuulupalexa”. 22 Niinaano-ru, Moise aahookolela ntata nawe osulu, ni yaahikhumelela ewiriphi yuulupale ya mahiku mararu,+ elapo yootheene ya wExiitu. 23 Atthu a wExiitu khiyaawerya woonana, nave mahiku ale mararu khuuvo aakhumme nipuro naari awe. Masi mmaitthokoni+ mwa aisarayeli mwaahikokola. 24 Nto Farawo aahimwiihana Moise, omuleela wiira: “Muroweke mwamukokhorele* Yehova.+ Masi ipwittipwitthi sanyu ni ipooyi sanyu, sinoohala. Nave pooti waakuxa aniinyu”. 25 Masi Moise aahimwaakhula oriki: “Nnaari! Nyuwo muhaana onivaha* inama wiira nahite, ninvahe mikuttho Yehova, Muluku ahu.+ 26 Nave-tho, nnookuxa mihuwo sahu, khaninrowa ohiya nnakhala enama emosa, okhala wiira ninrowa ovaha inama sikina okathi ninrowa ahu omukokhorelaka Yehova, Muluku ahu. Nave naphiya wuuwu, ti ninrowa ahu osuwela etthu enrowa ahu onvaha Yehova”. 27 Yehova aahimuhiya Farawo uumihaka murima awe. Nto Farawo kheemerenrye waahiya aisarayeli arowaka.+ 28 Farawo aahimuleela Moise wiira: “Mukhume ohoolo waka! Muheererye-tho ophavela okumana ni miyo, maana nihiku munrowa anyu okumana ni miyo, kinoowiivani”. 29 Vano, Moise aahimwaakhula oriki: “Miyo nkineererya-tho okumana ni nyuwo, ntoko muhimmye anyu”.

11 Vano, Yehova aahimuleela Moise wiira: “Kinoomukumiherya ehukhumu ekina Farawo ni elapo ya wExiitu. Nuumala-vo, owo onimoohiyani murowaka.+ Khahiyo onrowa woohiyani murowaka paahi, masi onrowa owoomolani elapo ela.+ 2 Nto mwaaleele atthu wiira alopwana ootheene ni athiyana ootheene, ahaana waavekela ale yaattamanne aya, itthu sa eparatha, ni sa eweero”.+ 3 Nave Yehova aahiwiiriha atthu awo wooniwaka saana ni atthu a wExiitu. Ohiya-vo, Moise aanittittimihiwa vanceene ni arumeyi a Farawo ni atthu a wExiitu.

4 Moise aahimuleela Farawo wiira: “Yehova ohimmye wiira: ‘Ohiyu eriyari, kinoovira elapo ya wExiitu.+ 5 Anamwane ootheene oopacerya oyariwa a wExiitu animookhwa,+ okhuma mwaana oopacerya oyariwa a Farawo, yoowo okilanthi veehiceni vawe, mpakha mwaana oopacerya oyariwa a epottha yoothiyana, yeeyo enivara muteko ni nxilo. Nave inama soopacerya ototholiwa sa mihuwo sanyu,+ sinimookhwa. 6 Atthu ootheene a wExiitu animunla ikuttho suulupale sihitonko wiiwanyeya, nnakhala sihinrowa-tho wiiraneya.+ 7 Khuuvo mwalapwa onrowa owuwa* ophavelaka owoopopiha aisarayeli, nnakhala woopopiha inama saya. Siiso, munoosuwela wiira Yehova onniwerya waahiyaniha atthu a wExiitu ni atthu a Isarayeli’.+ 8 Nto arumeyi anyu ootheene, animoorwa okumana ni miyo, akuuramele, ahimyeke wiira: ‘Muroweke vamosa ni atthu anyu’.+ Nuumala-vo, miyo kinoorowa”. Siiso, Moise aahikhuma ohoolo wa Farawo onanariwe ene vanceene.

9 Yehova aahimuleela Moise wiira: “Farawo khonrowa woowiriyanani.+ Eyo enimwiiraneya wiira atthu a wExiitu+ yoone miiriirya saka sinceene”. 10 Moise ni Aroni yaahipaka miiriirya iya sootheene ohoolo wa Farawo.+ Masi Yehova aahimuhiya Farawo uumihaka murima awe. Tivo, Farawo khaaphavenle waahiya aisarayeli akhumaka elapo awe.+

12 Nlelo Moise ni Aroni ari ene elapo ya wExiitu, Yehova aahaaleela wiira: 2 “Mweeri ola tonrowa okhala mweeri woopacerya wa mwaakha. Nto munrowa okontariki mwaakha, mpaceryaka mweeri yoola.+ 3 Mwaathukumanye atthu ootheene a Isarayeli, mwaaleele wiira: ‘Nihiku na namuloko, na mweeri ola, khula emusi ethanle epwittipwitthi emosa.+ Khula etthoko, epwittipwitthi emosa. 4 Masi akhala wiira atthu a vatthokoni-vo aatepa oyeva, ahinawerya omaliha epwittipwitthi ntero, ahaana* okawana ni atthu a etthoko yaattamanne aya. Okathi muniphavela anyu okawana, nwehe mwaattelo wa enama ya epwittipwitthi khula mutthu onrowa awe okhuura. 5 Ehaana okhala epwittipwitthi yoolopwana, ni yooloka+ erina eyaakha emosa. Nyuwo pooti othanla epwittipwitthi yaamukhaani yoolopwana aahiiso epuri. 6 Muhaana osuka mpakha nihiku 14 na mweeri+ yoola. Khula etthoko ya muloko wa Isarayeli ehaana wiiva enama aya nuumala nsuwa okela.*+ 7 Khula etthoko enrowa aya okhuuriwa enama eyo, ehaana ohavuliwa ephome ya mwaamunama owo, ettikittheliwe mukerekhere mwa mukhora, ni vasulu va mukhora owo.+

8 “‘Ahaana wooxa vaikho enama eyo, ni okhuura ni iphaawu+ soohiheliwa eferemento, vamosa ni makukhu+ oowaawa. Nave ahaana okhuura enama eyo ohiyu yoola.+ 9 Enama eyo, muhikhuure ekithi aahiiso yookaphulihiwa, nnakhala yoowaapeiwa. Masi yooxiwe yootheene, vamosa ni muru aya, ni metto saya, ni marupo aya. 10 Muhisuke mpakha mmeeloni mwaya. Masi yahala vale mpakha mmeeloni mwaya, ehaana opahiwa vaikho.+ 11 Muhaana okhuura mwaakuveyaka, nwanre ene esintu, nwanre ene isantaalya, ni mukunxe ene ekopo mmatatani. Ola Paasikha a Yehova. 12 Ohiyu yoola, miyo kinoovira elapo ya wExiitu, kiwiivakase anamwane ootheene oopacerya oyariwa, ni inama sootheene soopacerya ototholiwa.+ Nave kinimwaaphukela amuluku ootheene a wExiitu.+ Miyo ka Yehova. 13 Ephome eyo enrowa okhala esinaale itthoko munikhala anyu. Koonaka-ru ephome eyo, kinoovikana. Nto ehasara eyo khenrowa woophwanyani wiira ewiiveeni, okathi kinrowa aka ohukhumu elapo ya wExiitu.+

14 “‘Nna nihiku mukhanle anyu oowuupuwelelaka. Nave khula mwaakha, nyuwo ni osuulu anyu wootheene munrowa omutthapelaka Yehova nihiku nla. Nla nlamulo na mahiku ootheene. 15 Mpakha mahiku 7, muhaana okhuura ephaawu yoohiheliwa eferemento.+ Nihiku noopacerya, muhaana okumiha eferemento mmaitthokoni mwanyu, okhala wiira mutthu yoole onrowa okhuura etthu erina eferemento, okhuma nihiku noopacerya mpakha nihiku na neethanu nenli, mutthu owo ohaana wiiviwa munlokoni mwa Isarayeli. 16 Nihiku noopacerya, mumpake konkereesu muulupale. Nave nihiku na neethanu nenli, mumpake konkereesu mukina muulupale. Mahiku awo,+ ohikhale mutthu onrowa ovara muteko. Nyuwo muhaana olokiherya eyoolya khula mutthu okhanle awe oomaliha.

17 “‘Muhaana wuupuwelela Efesta ya Iphaawu Soohiheliwa Eferemento,+ okhala wiira nihiku nenna, kinimookumihani ootheene anyu elapo ya wExiitu. Nave-tho, osuulu anyu wootheene, ohaana wuupuwelela nihiku nla. Nla nlamulo na mahiku ootheene. 18 Mweeri woopacerya, ahaana okhuura iphaawu soohiheliwa eferemento, okhuma nihiku 14 vahalaka wiila, mpakha nihiku 21 na mweeri yoowo, vahalaka wiila.+ 19 Mpakha mahiku 7, ehiphwanyiwe eferemento mmaitthokoni mwanyu, okhala wiira mutthu yoole onrowa okhuura etthu erina eferemento, ohaana wiiviwa munlokoni mwa Isarayeli, okhale namurwa+ aahiiso mutthu a nloko na Isarayeli.+ 20 Muhikhuure etthu eheliwe eferemento. Itthoko sootheene, sikhuuriweke iphaawu soohiheliwa eferemento’”.

21 Moowaakuveya, Moise aahiwiihana axitokweene ootheene a Isarayeli,+ onaaleela wiira: “Khula etthoko emuthanle mwaamunama ohitempe wunnuwa,* emuhite wiira okhale eyoolya ya Paasikha. 22 Muxuweye mivelo sa mutathi oniihaniwa isopo* mphomeni eri mmuhasani. Muttikitthele mukerekhere mwa mukhora ni vasulu va mukhora owo. Ohikhale mutthu onrowa okhuma mpaani, mpakha oxa. 23 Okathi Yehova onrowa awe ovira wiira aahukhumu atthu a wExiitu, aweha ephome eri vasulu va mukhora ni mukerekhere mwaya, Yehova onoovira, nave khonrowa weemererya wiira ehukhumu eniiva* emphwanye mutthu a mmaitthokoni mwanyu.+

24 “Okhuma olelo orowa ohoolo, nyuwo ni osuulu anyu+ muhaana omuupuwelelaka Paasikha ola. 25 Okathi munrowa anyu okela elapo Yehova onrowa awe woovahani, ntoko ohimmye awe, mumpakeke Paasikha ola.+ 26 Okathi aniinyu anrowa aya wookohakani wiira: ‘Xeeni nimpaka ahu etthu ela?’,+ 27 Nwaakhule so: ‘Ola mukuttho wa Paasikha a Yehova, yoowo aavinre itthoko sa aisarayeli wExiitu, okathi aavanhe awe ehukhumu atthu a wExiitu, masi khuhiya itthoko sahu’”.

Vano aisarayeli yaahikokhora, yuurama. 28 Nto aisarayeli yaahipaka siisaale ntoko Yehova aamurumme awe Moise ni Aroni.+ Awo yaahiira siisaale ntoko yaarummwale aya.

29 Ohiyu eriyari, Yehova aahiwiiva anamwane ootheene oopacerya oyariwa a wExiitu,+ okhuma mwaana oopacerya oyariwa a mwene Farawo, mpakha mwaana oopacerya oyariwa a peresu muthiyana, ni inama sootheene soopacerya ototholiwa.+ 30 Ohiyu ole, Farawo aahivenya. Nave arumeyi awe ootheene, ni atthu ootheene a wExiitu, yaahivenya. Atthu a wExiitu yaahinla vanceene, okhala wiira khiivo etthoko ahaakhwiiye mutthu.+ 31 Moowaakuveya, ohiyu ene yoole, Farawo aahimwiihana Moise ni Aroni,+ onamuleela wiira: “Nvenye, mukhume ohoolo wa atthu aka, nyuwosa ni aisarayeli akina. Murowe mwamukokhorele* Yehova, ntoko muhimmye anyu.+ 32 Nave-tho, mukuxe inama sanyu, murowaseke, ntoko silavunle anyu.+ Masi muhaana okireeliha”.

33 Atthu a wExiitu yaahipacerya waakhanyererya aisarayeli wiira akhume moowaakuveya+ mulaponi-mme, ahimyaka wiira: “Akhala wiira khamunikhuma, ootheene ahu nnimookhwa!”+ 34 Siiso, aisarayeli yaahikuxa otthu* wooweetheiwa woohiheliwa eferemento. Nave-tho, yaahikapatta vanikhatani vaya ipasiya seetheiwa etiriku, seiyo yaatthunkwe aya vakuwoni. 35 Aisarayeli yaahipaka ele Moise aalenle awe. Nto yaahaavekela atthu a wExiitu itthu sa eparatha, sa eweero ni ikuwo.+ 36 Yehova aahiwiiriha atthu awo wooniwaka saana ni atthu a wExiitu. Siiso atthu a wExiitu yaahaavaha itthu yaavenke aya. Nto aisarayeli yaahikuxa itthu sinceene sa wExiitu.+

37 Aisarayeli yaahikhuma oRamese+ arowaka oSukothi.+ Yaari alopwana 600.000 yeetta mwentto, ohaakontari anamwane.+ 38 Nto atthu anceene* yaahirowa naawo.+ Nave-tho, yaahikuxa inama, ni mihuwo sinceene. 39 Awo yaaheetheya otthu* yaakunxe aya wExiitu, yooxa iphaawu soovilikeya soohiheliwa eferemento. Iphaawu iyo khisaaheliwe eferemento, okhala wiira awo yaahoomoliwa wExiitu moowaakuveya. Tivo khiyaalokihenrye itthu soolya, wiira yalyeeke mphironi.+

40 Atthu a Isarayeli yaahikhala wExiitu+ iyaakha 430.+ 41 Nihiku nenle yaaphiyerinhe aya iyaakha 430, atthu ootheene a Yehova yaahikhuma elapo ya wExiitu. 42 Awo ahaana otthapela ohiyu ola, okhala wiira ti yoola Yehova aakuminhe awe elapo ya wExiitu. Ohiyu ntoko ola, atthu ootheene a Isarayeli ni maloko aya ootheene anikela orwa muhoolo,+ ahaana omutthapelaka Yehova.

43 Yehova aahimuleela Moise ni Aroni wiira: “Nna nlamulo na Paasikha: Ohikhale mutthu ohikhanle a nloko na aisarayeli onrowa omulya.+ 44 Masi akhala mutthu orina epottha yoolopwana othumme awe ni musurukhu, epottha eyo pooti omulya Paasikha. Masi eyo ehaana winnuwihiwa toko.+ 45 Namurwa, ni namuteko onliviwa, ohimulyeke Paasikha. 46 Epwittipwitthi ehaana okhuuriwa etthoko emosa. Ehihavuliwe enama vakhaani eroihiwaka etthoko ekina. Nave enama eyo ehipwexiwe nikhuva nnakhala nimosa.+ 47 Nloko nootheene na Isarayeli, nihaana omutthapela Paasikha. 48 Akhala namurwa onikhala ni nyuwo, oniphavela omulya Paasikha omutthapelaka Yehova, owo vamosa ni alopwana ootheene anikhala vatthokoni vawe, ahaana winnuwihiwa. Nuumala-vo, owo pooti omulya Paasikha. Onrowa okhalaka ntoko mutthu a elapo yeeyo. Masi ohikhale mutthu oohinnuwihiwa onrowa omulya Paasikha.+ 49 Nlamulo nimosa-ru ninnivareleya muteko wa mwisarayeli oyariwe elapo yeela, ni wa namurwa onikhala eriyari anyu”.+

50 Nto aisarayeli ootheene yaahipaka siisaale Yehova aamurumme awe Moise ni Aroni. Awo yaahiira siisaale ntoko yaarummwale aya. 51 Nihiku nene nenle, Yehova aahaakumiha aisarayeli ootheene elapo ya wExiitu.

13 Yehova aahilavula-tho ni Moise, iiraka: 2 “Mukireerihele* anamwane ootheene axilopwana oopacerya oyariwa a nloko na Isarayeli. Mwaana mwaamulopwana oopacerya oyariwa, ni enama yoolopwana yoopacerya ototholiwa, sootheene ti sawaka”.+

3 Nuumala-vo, Moise aahaaleela atthu wiira: “Muupuwele nihiku nla mukumihiwe anyu wExiitu,+ weiwo mwaari anyu ipottha, okhala wiira Yehova ohookumihani elapo ela+ ni ntata nawe noowerya. Tivo, ehikhuuriwe etthu yooheliwa eferemento. 4 Nyuwo mukhumme wExiitu nihiku nenla, mweeri wa Abibi.*+ 5 Yehova ohaamanela natiri amuhavinre anyu waavaha+ elapo ya akanaani, aheti, amori, ahivi ni ayebusi.+ Nto owo ooroihani elapo eyo yoowaatta eleeti ni oravo,+ muhaana otthapela niira nla khula mwaakha, mweeri wa Abibi. 6 Mpakha mahiku 7, muhaana okhuura iphaawu soohiheliwa eferemento.+ Vano, nihiku na neethanu nenli, nnookhala niira noomutthapela Yehova. 7 Muhaana okhuura ephaawu yoohiheliwa eferemento, mpakha mahiku 7.+ Muhiphwanyaniwe etthu yooheliwa eferemento,+ nnakhala ohikhale mutthu onrowa ophwanyaniwa eferemento mmuttettheni mwanyu* mootheene. 8 Nihiku nlo, muhaana omuleela mwaninyu wiira: ‘Kinipaka ela, mwaha wa etthu Yehova aakiirenle awe nihiku kaakhuma aka wExiitu’.+ 9 Ela enrowa wookhalelani ntoko esinaale vantatani vanyu ni enrowa okhala vayuuci vanyu.*+ Eyo enoowuupuxeryani wiira mulavuleke nlamulo na Yehova. Nave-tho enrowa owuupuxeryakani wiira Yehova ohookumihani wExiitu, ni ntata nawe noowerya. 10 Nyuwo muhaana otthara malakiheryo ala ni opaka niira nla khula mwaakha.+

11 “Okathi Yehova onrowa awe wooroihani elapo ya akanaani, yeeyo olamphe awe para nyuwo ni olamphe awe para amuhavinre anyu wiira oovahani,+ 12 muhaana omusukerya Yehova, anamwane ootheene axilopwana oopacerya oyariwa, ni inama sootheene soolopwana soopacerya ototholiwa sa mihuwo sanyu. Anamwane axilopwana ni inama soolopwana, ti sa Yehova.+ 13 Mwakhalana puuru oolopwana oopacerya ototholiwa, muhaana omoopola, nvahaka mukuttho wa epwittipwitthi, nipuro na puuru owo. Mwaahivahe mukuttho wa epwittipwitthi, weeso muhaana omunta exiko puuru owo. Anamwane ootheene axilopwana oopacerya oyariwa a nloko nanyu, ahaana woopoliwa.+

14 “Vakhala wiira muhoolo mwaninyu onimookohani iiraka: ‘Xeeni nimpaka ahu etthu ela?’, nyuwo muhaana omwaakhula wiira: ‘Yehova oonikumiha ni ntata nawe noowerya wExiitu, weiwo naari ahu ipottha.+ 15 Okathi Farawo uuminhe awe murima awe, onakhootta onihiya nirowaka,+ Yehova aahiwiiva anamwane ootheene axilopwana oopacerya oyariwa wExiitu, ni inama soolopwana soopacerya ototholiwa.+ Tivonto nninvaha ahu Yehova inama sootheene soolopwana soopacerya ototholiwa, ni ninwoopola ahu anamwane ootheene axilopwana oopacerya oyariwa’. 16 Ela ehaana okhala esinaale vantatani vanyu ni vayuuci vanyu,*+ okhala wiira Yehova oonikumiha wExiitu ni ntata nawe noowerya”.

17 Okathi Farawo aawoomonle awe aisarayeli, Muluku khaavirinhe ephiro yaavira elapo ya afilisti, nnaamwi yaari yookhuveya. Muluku uupuwela so: “Okathi atthu ala anrowa aya okumana ni ekhotto, woonasa wene anooturuka muupuwelo aya, atthikele wExiitu”. 18 Siiso, Muluku aahiwiiriha atthu a wIsarayeli otthara ephiro yoorakama yaarukurerya woothakoni, waattamela ephareya Yooxeerya.+ Okathi aisarayeli yaakhumme aya elapo ya wExiitu, awo yaari ootthokiheya ntoko atoropa. 19 Nave-tho, Moise aahikuxa makhuva a Yosefe, okhala wiira Yosefe owo aahaalaphiha aisarayeli, oriki: “Mweekeekhai Muluku onimookhaliheryani. Nto muhaana okumiha makhuva aka elapo ela”.+ 20 Awo yaahikhuma oSukothi, anarowa omaka wEtami, waattamela woothakoni.

21 Yehova aanikhala ohoolo wa aisarayeli wiira oweettiheke.+ Othana, owo aaniweettiha orumeelaka neeku, nave ohiyu, aaniweettiha orumeelaka mooro. Siiso, awo yaaneetta mukwaha othana ni ohiyu.+ 22 Othana, neeku nle khinaasusa vaari aya atthu, nave ohiyu,+ mooro ole khiwaasusa.

14 Yehova aahimuleela Moise oriki: 2 “Mwaaleele aisarayeli wiira: ‘Nyuwo mutthike, mwamake ohoolo wa oPi-Hahirothi, eriyari ya oMigdoli ni ephareya, oluluwanya ni oBayali-Sefoni.+ Mwamake ohoolo wa oBayali-Sefoni, okerekhere wa ephareya. 3 Vano Farawo onoolavula aahimyaka aisarayeli wiira: ‘Awo aarimeela moothakoni. Othako ohaattiyelela’. 4 Miyo kinoomuhiya Farawo uumihaka murima awe.+ Farawo onimwaatthimakela aisarayeli, nto miyo kinoowiiriha atthu woona wiira ti miyo kirina owerya wuulupalexa onvikana Farawo ni anakhotto awe ootheene.+ Atthu a wExiitu anoosuwela tthiri wiira miyo ka Yehova”.+ Tivo, aisarayeli yaahiira siiso.

5 Muhoolo mwaya, mwene a wExiitu aahileeliwa wiira aisarayeli aakhuma. Niinaano-ru, Farawo ni arumeyi awe yaahituruka murima aya,+ anahimya wiira: “Niirenleni siisa? Xeeni nihalaka ohiya ipottha sahu, aisarayeli, sirowaka?” 6 Siiso, Farawo aahilokiherya ikaaro sawe sa ekhotto, ni aahaakuxa atthu awe.+ 7 Owo aahikuxa ikaaro sa ekhotto 600 soolokexa, ni ikaaro sootheene sikina sa wExiitu, ni khula nakhotto owenle ene ikaaro iyo. 8 Yehova aahimuhiya Farawo, mwene a wExiitu, uumihaka murima awe. Farawo aahaatthimakela aisarayeli, okathi aisarayeli awo yaakhuma aya ahoovaka etthu.+ 9 Atthu a wExiitu yaahaatthimakela aisarayeli.+ Nto ikaaro sootheene saapuruliwa ni ikhavalo, ni anakhavalo awe, ni anakhotto ootheene a Farawo yaahiwaattamela aisarayeli, yaawo yaamanke okerekhere wa ephareya, waattamela oPi-Hahirothi, ohoolo wa oBayali-Sefoni.

10 Okathi mwene a wExiitu ni anakhotto awe yaattamenle aya, aisarayeli yaaheemexa miru saya, yaaweha atthu a wExiitu yaatthimakelaka. Nto aisarayeli yaahoova vanceene, anapacerya okhuwela anvekelaka Yehova wiira aakhaliherye.+ 11 Aisarayeli yaahimukoha Moise wiira: “Xeeni muniruuhaka wiira nikhwe moothakoni-mu?+ Niireke wExiitu khakhanle mahiye wiira navithiwe weiwo? Exeeni ela muniirenle anyu? Xeeni muhalaka onikumiha wExiitu? 12 Kiira naahooleelani nri ene wExiitu wiira: ‘Munihiye, nikhaleke ipottha sa atthu a wExiitu’? Fataari okhala ipottha sa atthu a wExiitu, ohiya okhwa moothakoni-mu”.+ 13 Vano Moise aahiwaakhula wiira: “Muhoove.+ Mulipihe murima, nwehe moota Yehova onrowa awe owoopolani olelo.+ Tthiri atthu a wExiitu munaaweha anyu olelo-va, khamunrowa-tho waaweha.+ 14 Nyuwo munrowa omaala paahi, okhala wiira Yehova tonrowa owana ni atthu a wExiitu”.+

15 Yehova aahimukoha Moise iiraka: “Xeeni munithipelela anyu okhuwela mukivekelaka wiira kookhaliheryeni? Mwaaleele aisarayeli wiira atthikeleke weetta mukwaha aya. 16 Masi nyuwo, mmookololele ttootto anyu ori mmatatani vasulu va ephareya, wiira ekawanyeye, wiira aisarayeli avire eriyari ya ephareya, yeettaka vatthayani yoowuuma. 17 Miyo kinimwaahiya atthu a wExiitu yuumihaka mirima saya, nto awo animwaatthimakela aisarayeli. Tivo, miyo kinoowiiriha atthu woona wiira kirina owerya wuulupalexa onvikana Farawo ni anakhotto awe ootheene, ni ikaaro sawe sa ekhotto, ni anakhavalo awe.+ 18 Tthiri atthu a wExiitu anoosuwela wiira miyo ka Yehova, okathi kinrowa aka owiiriha atthu woona wiira ti miyo kirina owerya wuulupalexa onvikana Farawo, ni ikaaro sawe sa ekhotto, ni anakhavalo awe”.+

19 Vano nlaikha na Muluku eekeekhai,+ nenlo naari ohoolo wa atthu a Isarayeli, naahitthikela ottuli, nave neeku naari ohoolo naahitthikela ottuli,+ neemela. 20 Tivo, neeku nne naahikhala eriyari ya atthu a wExiitu ni atthu a Isarayeli.+ Nto neeku nle naanaakumiherya epiphi atthu a wExiitu, masi naanikumiherya okokola ohiyu mpantta yaari aya aisarayeli.+ Siiso, atthu a wExiitu khiyaawerya owaattamela aisarayeli, ohiyu wootheene.

21 Moise aahookolela ntata nawe vasulu va ephareya.+ Ohiyu wootheene, Yehova aahiiriha woopa epheyo yuulupale, yaakhuma mpantta onikhuma nsuwa. Nto ephareya yaahuuma,+ ni maasi yaahikawanyeya.+ 22 Aisarayeli yaahivira eriyari ya ephareya yoowuuma,+ maasi yeemenle ene ntoko exiri, moono woolopwana ni moono woothiyana.+ 23 Atthu a wExiitu yaahaatthimakela aisarayeli. Ikhavalo sootheene sa Farawo, ni ikaaro sawe sa ekhotto, ni anakhavalo awe, yaahipacerya waatthimakela akelaka eriyari ya ephareya.+ 24 Vahalaka oxa,* Yehova aahaaweha atthu a wExiitu ori ene muneekuni na mooro.+ Nto aahiwaakanyerya ni owiiriha woova. 25 Muluku aahiiriha ikaaro saya okhuma maroota, ahinawerya weettiha saana ikaaro iyo. Vano atthu a wExiitu yaanihimya so: “Nrowe naatthyawe aisarayeli, okhala wiira Yehova toniwana ni hiyo”.+

26 Vano Yehova aahimuleela Moise iiraka: “Mookololele ntata nanyu vasulu va ephareya, wiira maasi yaakhuneele atthu a wExiitu, ni ikaaro saya sa ekhotto, ni anakhavalo aya”. 27 Vahalaka oxa, Moise moowaakuveya aahookolela ntata nawe vasulu va ephareya, nto ephareya yaahitthikela ntoko yaari aya. Okathi atthu a wExiitu yeerenrye aya otthyawa, Yehova aahaarihela atthu awo eriyari ya ephareya.+ 28 Maasi yaahitthikelana, akhuneela ikaaro sa ekhotto, ni anakhavalo, ni anakhotto ootheene a Farawo, yaawo yaakenle mphareya-mme.+ Khuuvo ooponwe, nnakhala mmosa.+

29 Masi aisarayeli yaahivira eriyari ya ephareya yoowuuma.+ Nave maasi yaahipakeya exiri, moono woolopwana ni moono woothiyana.+ 30 Tivo, Yehova aahiwoopola aisarayeli nihiku nenne mmatatani mwa atthu a wExiitu.+ Nave aisarayeli yaahiwoona atthu a wExiitu akhwiiye ene mukerekhere mwa ephareya. 31 Nave-tho, aisarayeli yaahiweha wiira Yehova aahaapwetexa atthu a wExiitu ni owerya wawe wuulupale.* Nto atthu yaahipacerya omoova Yehova ni omwaamini Yehova ni murumeyi awe Moise.+

15 Okathi ole, Moise ni aisarayeli,* yaahimwiipela Yehova nsipo nla:+

“Kinoomwiipela Yehova, okhala wiira owo oovuwihiwa vanceene.+

Oorihela mphareya+ ekhavalo ni nakhavalo aya.

 2 Yah* tori ikuru saka ni owerya waka, okhala wiira tonikoopola.+

Ola Muluku aka, nto miyo kinoomuttottopela;+ ola Muluku aamuhavinre aka,+ miyo kinonvuwiha.+

 3 Yehova nakhotto oowerya.+ Yehova ti nsina nawe.+

 5 Maasi ootupa ahaakhuneela; awo aamireya mpakha vathi ntoko nluku.+

Maasi ootupa, yaaheemela eriyari ya ephareya.

 9 Awanani inyu yaahimya wiira: ‘Miyo kinimwaatthimakela!

Miyo kinimwaaphwanya! Kinookawanya mireerelo saya mpakha okiphiyerya!

Kinookumiha espaata* aka! Ntata naka nnimwaaxintta!’+

11 Khoo Yehova,+ niireke aakhala amuluku anlikana ni nyuwo?

Ti pani onlikana ni nyuwo, yoowo onooniherya waarya wuulupalexa?+

Nyuwo ti yoole onireerela wooviwa ni ottottopeliwa ni isipo, yoole onipaka itthu sootikiniha.+

12 Nyuwo muhookola ntata nanyu noolopwana, nto elapo ehaamirya.+

Atthu ootheene anikhala oKanaani, anooriipiwa murima vanceene.+

16 Awo animoova vanceene ni ottettemela.+

18 Yehova onrowa olamulelaka ntoko mwene mahiku ootheene.+

20 Vano profeta Miriyamu, yoowo aari murokorawe Aroni, aahikuxa nlapa naamukhaani onoopa.* Nave athiyana ootheene yaanimutthara yoopaka malapa* aya macikhaani ni yiinaka. 21 Miriyamu aaniipa owaakhulelaka axilopwana, oriki:

“Mmwiipele Yehova, okhala wiira oovuwihiwa vanceene.+

Oorihela mphareya+ ekhavalo ni nakhavalo aya”.

22 Muhoolo mwaya, Moise aahaakumiha aisarayeli ephareya Yooxeerya, anarowasa woothakoni wa oXuri. Yaaheetta mahiku mararu moothakoni, masi khiyaaphwannye maasi. 23 Awo yaahiphiya oMara,*+ masi khiyaawenrye owurya maasi a oMara mwaha woowi yaari oowaawa. Tivonto aavanhe awe nsina noowi Mara. 24 Nto atthu yaahipacerya omukhupanya Moise+ yiiraka: “Ninrowa owurya exeeni?” 25 Vano Moise aahinvekela Yehova+ wiira omukhaliherye. Nto Yehova aahimooniherya mwiri. Okathi aarihenle awe mwiri ole mmaasini, maasi yaahithatuwa, anasiva.

Opuro ole Muluku aahaavaha nlamulo atthu ni mathowa yaarowa owiiriha ophukeliwa. Nave-tho, aahiweehererya+ opuro ole. 26 Muluku aahimmye wiira: “Mwaiwelela oratteene moolumo aka, miyo Yehova Muluku anyu, ni mwapaka itthu sooloka vamaithoni vaka, ni wiiwelela saana sooruma saka ni weettela malamulo aka,+ nkinrowa wookumiheryani iretta ntoko kaakumihenrye aka atthu a wExiitu.+ Miyo Yehova, kinimoovahakani ekumi yooreera”.+

27 Nuumala-vo, yaahiphiya wElimi, weiwo saari ihime 12 sa maasi ni mikole 70. Nto yaahimaka weiwo, waattamela maasi.

16 Nuumala okhuma wElimi, muloko wootheene wa Isarayeli waahiphiya moothakoni wa oSini,+ eriyari ya wElimi ni oSinayi. Naari nihiku 15 na mweeri wa nenli, nuumala aisarayeli okhuma elapo ya wExiitu.

2 Vano, muloko wootheene wa Isarayeli, waahipacerya omukhupanya Moise ni Aroni, woothakoni.+ 3 Aisarayeli yaanaaleela wiira: “Xeeni muniruuhaka moothakoni-mu, wiira atthu ootheene akhwe etala? Fataari Yehova aaniivale elapo ya wExiitu, weiwo miyaapu sahu saasareya aya enama,+ ni naakhuura ahu iphaawu mpakha ovona”.+

4 Nto Yehova aahimuleela Moise wiira: “Kinimooruuhelani ephaawu enikhuma wiirimu,+ yeeyo enrowa omoraka ntoko epula. Khula mutthu ohaana ottotta eniphiyerya khula nihiku.+ Siiso, miyo kinooweehererya, kiwoone akhala wiira animwiiwelela nlamulo naka aahiiso khanrowa wiiwelela.+ 5 Masi nihiku na neethanu namosa,+ okathi aniilokiherya aya wiira yattotte, awo ahaana ottotta ikwaha piili mwaattelo yaattotta aya nihiku nimosa”.+

6 Tivo, Moise ni Aroni, yaahaaleela aisarayeli wiira: “Makaaripi munoosuwela wiira Yehova tookuminheni elapo ya wExiitu.+ 7 Meelo voosiisu munooweha ovuwa wa Yehova, okhala wiira Yehova ohiiwa omukhupanya wanyu. Hiyo naani, wiira munikhupanyeke?” 8 Moise aahihimya-tho wiira: “Okathi Yehova onrowa awe woovahakani enama makaaripi, ni ephaawu voosiisu, wiira mukhuureke mpakha ovona, munimoona wiira Yehova ohiiwa omukhupanya wanyu. Hiyo naani? Nyuwo khamunnikhupanya hiyo, masi munimukhupanya Yehova”.+

9 Moise aahimuleela Aroni wiira: “Mwaaleele atthu ootheene a muloko wa Isarayeli wiira: ‘Murwe mmwaattamele Yehova, okhala wiira owo ohiiwa omukhupanya wanyu’”.+ 10 Aroni omalaka-ru olavula ni muloko wootheene wa Isarayeli, awo yaahirukunuwa anaweha woothakoni. Nto ovuwa wa Yehova waahikhumelela muneekuni.+

11 Yehova aahimuleela-tho Moise, oriki: 12 “Koowiiwa aisarayeli+ akikhupanyaka. Mwaaleele wiira: ‘Makaaripi* munrowa okhuuraka enama, voosiisu munrowa okhuuraka ephaawu+ mpakha ovona. Tthiri munoosuwela wiira miyo ka Yehova, Muluku anyu’”.+

13 Siiso, nihiku nenne makaaripi, yaahikhumelela anapiri,* asareya opuro ole+ yaamanke aya. Nave voosiisu waahikhumelela okame ipantta sootheene sa opuro ole. 14 Okathi okame waamwareya aya, saahooneya vatthayani+ itthu saamukhaani ni sooreera, saakhala ntoko eneevi yaamonre. 15 Okathi aisarayeli yoonale aya, yaahipacerya okohana yiiraka: “Exeeni ela?”, okhala wiira khiyaasuwela etthu ele. Moise aahaaleela wiira: “Ela ephaawu Yehova oovanhaaweni wiira ekhale eyoolya anyu.+ 16 Yehova ohimmye wiira: ‘Khula mutthu ottotteke onrowa awe owerya olya. Muhaana ottotta ekoomeri*+ emosa para khula mutthu ori mutentani* mwanyu’”. 17 Aisarayeli yaahipacerya ottottela. Akina yaattottela vanceene, akina yaattottela vakhaani. 18 Okathi yaaphimme aya ni ekoomeri, yaahoona wiira ole aattotta vanceene khiyaahala, ni ole aattotta vakhaani, yaaniphiyerya.+ Khula mutthu aanittotta eyoolya yaaphiyerya.

19 Vano Moise aahaaleela wiira: “Ohikhale mutthu onrowa osuka mpakha meelo voosiisu”.+ 20 Masi awo khiyaamwiiwelenle Moise. Okathi atthu akina yaasunke aya ephaawu ele mpakha mmeeloni mwaya voosiisu, yaahisareya miyunku ni yaaninkha. Vano Moise aaninanariwa naawo. 21 Mahiku ootheene voosiisu, khula mutthu aanittotta vaawerya awe olya. Okathi nsuwa naaviha aya, ele yaahanle vatthayani yaanitothowa.

22 Nihiku na neethanu namosa, awo yaahittotta iphaawu ikwaha piili,+ ikoomeri piili para khula mutthu. Tivo, makhulupale ootheene a muloko, yaahirowa omuleela Moise. 23 Owo aahiwaakhula wiira: “Yehova ohimmye siiso. Meelo ninrowa okhala nihiku noophumurya, eyo piiyo, esaabadu ya Yehova.+ Mooxeke nfornuni ele muniphavela anyu ni mwaapeyeke ele muniphavela anyu.+ Vano musukeke ele enihala mpakha mmeeloni mwaya voosiisu”. 24 Awo yaanisuka mpakha mmeeloni mwaya voosiisu, ntoko Moise aarumme awe. Nto khiyankha, nnakhala khiyaasareya miyunku. 25 Moise aahaaleela wiira: “Mulyeeke olelo, okhala wiira olelo esaabadu ya Yehova. Olelo khamunrowa ophwanya vatthayani. 26 Muttotteke emana mpakha mahiku 6. Masi nihiku na neethanu nenli, eyo piiyo, esaabadu,+ khenrowa okhalaka”. 27 Masi nihiku na neethanu nenli, atthu akina yaahirowa ottotta, khuhiphwanya etthu.

28 Vano Yehova aahimuleela Moise wiira: “Munrowa okhootta mpakha silini, wiiwelela sooruma saka ni malamulo aka?+ 29 Moone wiira Yehova ohoovahani esaabadu.+ Tivonto, nihiku na neethanu namosa, owo onnoovahani eyoolya ya mahiku manli. Khula mutthu okhaleke vate vawe. Nihiku na neethanu nenli, ohikhale mutthu onikhuma nipuro onikhala awe”. 30 Nto atthu yaaniphumurya nihiku na neethanu nenli,+ eyo piiyo, esaabadu.

31 Nto aisarayeli yaahivaha ephaawu eyo nsina noowi “emana”.* Eyo yaakhala ntoko enuku yaamukhaani,* yootteela, ni yaasiva ntoko ipulaxa sooheliwa oravo.+ 32 Moise aahihimya wiira: “Yehova orumme wiira: ‘Musarye ekoomeri emosa ya emana, wiira esukeriwe osuulu anyu.+ Siiso, awo anooweha eyoolya koovanhaakani woothakoni, okathi kookumihaakani wExiitu’”. 33 Moise aahimuleela Aroni wiira: “Mukuxe murinki muhele-mo ekoomeri emosa ya emana, ni mpwehe ohoolo wa Yehova. Eyo ehaana osukiwaka para ale anrowa oyariwa wiira aweheke”.+ 34 Nto Aroni aahipweha murinki owo ohoolo wa nivuku na Onamoona,*+ wiira osukiwe, sisaale ntoko Yehova aamurumme awe Moise. 35 Aisarayeli yaahilya emana iyaakha 40,+ mpakha ophiya elapo yaakhaliwa.+ Awo yaahilya emana mpakha ophiya mmukanoni mwa elapo ya oKanaani.+ 36 Mwaattelo wa ikoomeri 10, waalikana ni eefa* emosa.

17 Muloko wootheene wa aisarayeli waahikhuma woothakoni wa oSini.+ Awo yaaneemela mapuro Yehova aaleela awe,+ mpakha ophiya oRefidimi,+ amaka weiwo. Masi opuro ole khiyaaphwannye maasi wiira atthu awuryeke.

2 Nto atthu yaahipacerya onyakulihana ni Moise,+ yiiraka: “Munivahe maasi wiira niwurye”. Masi Moise aahiwaakhula wiira: “Xeeni muninyakulihana anyu ni miyo? Xeeni munimweehererya anyu Yehova?”+ 3 Masi atthu khiyaareere ovoliwa ntthona. Tivo awo yaanimukhupanya Moise,+ yiiraka: “Xeeni muhalaka onikumiha wExiitu wiira muniive hiyo, nwiive aniihu, ni mihuwo sahu mwaha wa ntthona?” 4 Vano Moise aahinvekela Yehova iiraka: “Kiwiirihe exeeni atthu ala? Ahanle vakhaani okivonyakasa maluku!”

5 Yehova aahimuleela Moise wiira: “Mwaahiye atthu, nto mwaakuxe axitokweene akina a Isarayeli, ni mmukuxe ttootto anyu mwammanenle anyu muro Niilo.+ Mmukuxe ttootto owo mmatatani mwanyu, muroweke. 6 Mukiiwe! Miyo kinrowa okumana ni nyuwo vamwala vale, muttetthe wa oHorebi. Muhaana omana mwala ole, nto maasi anookhuma wiira atthu awurye”.+ Moise aahipaka eyo ooniwaka ni axitokweene a Isarayeli. 7 Tivo, Moise aahivaha opuro ole nsina noowi Masa*+ ni Meriba,*+ okhala wiira aahinyakulihana ni aisarayeli, ni okhala wiira awo yaahimweehererya+ Yehova, yiiraka: “Niireke Yehova ori ni hiyo?”

8 Nuumala-vo, Amaleki+ yaahirwa wiira awane ni aisarayeli, oRefidimi.+ 9 Nto Moise aahimuleela Yooxuuwa+ wiira: “Mwaathanle alopwana wiira yawane ni Amaleki. Meelo miyo kinrowa weemela vamwaako, kinvarenle ene ttootto a Muluku eekeekhai”. 10 Nto Yooxuuwa aahipaka ele Moise aamulenle awe.+ Owo aahiwana ni Amaleki. Nave Moise ni Aroni, ni Huri+ yaahirowa vasulu va mwaako.

11 Okathi Moise eemexa awe matata awe, aisarayeli yaanixintta. Masi okathi aakuruxa awe matata awe, Amaleki yaanixintta. 12 Okathi Moise yaamulemela aya matata awe, Aroni ni Huri yaahikuxa nluku apweha vathi, Moise okilaathela. Vano Aroni aahikhala mpantta mmosa, ni Huri aahikhala mpantta mukina, wiira amukhaliherye matata awe. Tivo matata a Moise yaaheemela mpakha nsuwa okela. 13 Tivonto, Yooxuuwa aahaaxintta Amaleki ni espaata.*+

14 Yehova aahimuleela Moise wiira: “Mulepe etthu ela muliivuruni wiira yuupuweliweke, ni mmuleele-tho Yooxuuwa wiira: ‘Kinimwaamala-maliha Amaleki mulaponi,*+ nto awo khanrowa-tho wuupuweliwa’”. 15 Vano Moise aahimuteka altaari, onvaha nsina noowi Yehova-Nisi,* 16 iiraka: “Okhala wiira ntata na Amaleki ninwana ni ehice ya Yah,*+ nto Yehova owo onrowa owana naawo ni osuulu aya wootheene onrowa okhumelela muhoolo”.+

18 Yeethoro, taata awe+ Moise, yoowo aari namukuttho a oMidiyani, aahiiwa itthu sootheene Muluku aamwiirenle awe Moise, ni aawiirenle awe aisarayeli, ni moota Yehova aakuminhe awe aisarayeli wExiitu.+ 2 Yeethoro, taata awe Moise, aahimwaakhela Siipora, mwaarawe Moise, okathi Moise aamurumme awe Siipora owo orowa wa apapawe, 3 vamosa ni anaawe anli.+ Mwaana mmosa aihaniwa Gerisomi,*+ maana Moise aahimya wiira: “Okhala wiira kanamurwa elapo ela”. 4 Nave, mwaana mukina aihaniwa Eliyeezeri,* maana Moise aahimya so: “Muluku a paapa aka tonikikhaliherya, owo ookoopola wiira kihiiviwe ni Farawo”.+

5 Vano Yeethoro, taata awe Moise, vamosa ni anaawe Moise ni mwaarawe Moise, yaahirowa okumana ni Moise woothakoni, weiwo aamanke awe, omwaako wa Muluku eekeekhai.+ 6 Yeethoro aahiruma oleeliwa Moise wiira: “Miyo Yeethoro,+ taata anyu, kinnoorwa okumana ni nyuwo. Kiri ni mwaarinyu, ni aniinyu anli”. 7 Niinaano-ru, Moise aahirowa okumana ni taata awe. Nuumala omphwanya, aahuurama, ompexari. Awo yaahikohana ihaali, nuumala-vo, Moise aahimuroiha mutentani* mwawe.

8 Moise aahimuleela taata awe itthu sootheene Yehova aamwiirinhe awe Farawo ni atthu a wExiitu, wiira aakhaliherye aisarayeli.+ Nave aahimuleela mixankiho sootheene aakumanne awe mphironi,+ ni moota oopoliwe awe ni Yehova. 9 Yeethoro aahihakalala vanceene osuwela itthu sootheene sooreera Yehova aawiirenle awe aisarayeli, owoopolaka wExiitu.* 10 Vano, Yeethoro aahihimya wiira: “Ottottopeliwe Yehova, yoowo owooponleni wExiitu ni mmatatani mwa Farawo, ni owooponle atthu awe yaahaaxiwa wExiitu. 11 Vano koosuwela wiira Yehova ti muulupalexa, waavikana amuluku ootheene,+ mwaha wa etthu aawiirinhe awe atthu yaawiirenle etthu yootakhala atthu awe”. 12 Yeethoro, taata awe Moise, aahiruuha etthu wiira onvahe Muluku yoovaha para opahiwa. Nto Aroni ni axitokweene ootheene a Isarayeli, yaahirowa olya vamosa ni taata awe Moise, ohoolo wa Muluku eekeekhai.

13 Mmeeloni mwaya, Moise aahikilaathi ntoko aalimalenle awe, wiira ophukeke myaha sa atthu. Nto atthu yaanirwa aneemela ohoolo wawe, okhuma voosiisu mpakha makaaripi. 14 Okathi taata awe Moise oonale awe itthu sootheene Moise aawiirela awe atthu, aahimukoha wiira: “Xeeni muniwiiriha anyu siisa atthu ala? Xeeni munaaphukela anyu mekhinyu atthu ala ootheene aneemela ohoolo wanyu, okhuma voosiisu mpakha makaaripi?” 15 Moise aahimwaakhula taata awe, iiraka: “Okhala wiira atthu ala anikirweela miyo wiira asuwele ele Muluku eniphavela awe. 16 Okathi muxankiho onikhumelela aya wa atthu anli, awo annoorwa okileela. Nto miyo kihaana ophuka mwaha owo, ni waasuweliha ele Muluku eekeekhai eniphavela awe, ni waasuweliha malamulo awe”.+

17 Taata awe Moise aahimuleela wiira: “Etthu munipaka anyu khelonke. 18 Tthiri nyuwo ni atthu ari ni nyuwo munootemwa,* okhala wiira muteko ola onlikana ni muritti muulupale muhikhanle anyu ookuxa mekhinyu. 19 Vano mukiwiriyane: Miyo kinimoovahani miruku, nto Muluku onimooreelihani.+ Nyuwo munrowa olavulaka ni Muluku eekeekhai,+ mmuleelaka myaha sa atthu.+ 20 Muhaana owiixuttiha atthu malakiheryo ni malamulo,+ ni waasuweliha moota wooweettela ni muteko akhanle aya oovara. 21 Masi muhaana waathanla alopwana+ animoova Muluku ni anisuwela ophuka myaha, ni oororomeleya ni ahiniphuka myaha aphavelaka mureerelo aya.+ Alopwana awo mwaakhalihe makhulupale a atthu 1.000, makhulupale a atthu 100, makhulupale a atthu 50, ni makhulupale a atthu 10.+ 22 Awo ahaana ophuka myaha sinikhumelela. Myaha sooxankiha ahaana wooruuhelani,+ masi myaha saamukhaani aphukeke mmansaya. Nvukule muteko anyu, mwaahiyaka atthu akina wiira yookhaliheryeni.+ 23 Mwapaka eyo, ni Muluku aphavela vale, munoowerya ovara muteko anyu, nave atthu ootheene anootthikelaka owaani ahakalanle ene”.

24 Moohipisa, Moise aahiiwa miruku sa taata awe, nto aahiira sootheene aaleeliwe awe. 25 Moise aahaathanla alopwana yaawerya ophuka myaha, eriyari ya aisarayeli ootheene, wiira yaahooleleke atthu. Owo aahaakhaliha makhulupale a atthu 1.000, makhulupale a atthu 100, makhulupale a atthu 50, ni makhulupale a atthu 10. 26 Awo yaaniphuka myaha sa atthu okathi saakhumelela aya. Myaha sooxankiha yaanimuroihela Moise,+ masi myaha saamukhaani, yaaniphuka mmansaya. 27 Nuumala-vo, Moise aahaalaxerya atatawe,+ nto Yeethoro aahirowa owannyawe.

19 Mweeri wa neeraru, nuumala aisarayeli okhuma elapo ya wExiitu, awo yaahiphiya woothakoni wa oSinayi, nihiku nene nenlo.* 2 Awo yaahikhuma oRefidimi,+ aphiya woothakoni wa oSinayi, amaka woothakoni weiwo. Aisarayeli yaamanke ohoolo wa mwaako Sinayi.+

3 Vano Moise aahirowa okumana ni Muluku eekeekhai. Ori ene vamwaako,+ Yehova aahilavula ni Moise, iiraka: “Muhimeerye osuulu wa Yakobe, ni mwaaleele aisarayeli wiira: 4 ‘Nyuwo muhoona mmansinyu etthu ewiirinhe aka atthu a wExiitu,+ wiira kookuxeeni ntoko murumaasi* onaakuxa awe axaana awe mmapuphani mwawe, wiira kooruuheni wa miyo.+ 5 Vano mwaiwelela oratteene moolumo aka, ni mwatthara nivarihano naka, mweekeekhai munookhala atthu kaathanlale aka eriyari ya atthu ootheene,+ okhala wiira elapo yootheene ti yawaka.+ 6 Munookikhalela omwene wa anamukuttho ni nloko na atthu oowaarya’.+ Ala moolumo munrowa anyu waaleela aisarayeli”.

7 Siiso, Moise aahikhuruwa, aathukumanya axitokweene yaahoolela atthu, aaleela itthu sootheene Yehova aamurumme awe.+ 8 Nuumala-vo, atthu ootheene yaahaakhula moowiiraana yiiraka: “Nnoovara+ itthu sootheene Yehova olavunle awe”. Niinaano-ru, Moise aahirowa omuleela Yehova ele atthu yaakhunle aya. 9 Yehova aahilavula ni Moise oriki: “Mukiiwe! Kinimoorwa wa nyuwo muneekuni nooriipa, wiira atthu akiiwe kilavulaka ni nyuwo. Siiso, awo-tho animoororomelakani okathi wootheene”. Nto Moise aahimuleela Yehova moolumo a atthu ale.

10 Yehova aahimuleela Moise wiira: “Murowe ori atthu, mwaaleele wiira yiireerihe olelo ni meelo. Nave awo ahaana okattha ikuwo saya. 11 Nihiku na neeraru yiireke yiilokihenrye ene, okhala wiira nihiku nenno na neeraru, Yehova onookhuruwela vamwaako Sinayi, ooniwaka ni atthu ootheene. 12 Muhele mukano mukerekhere mwa mwaako ni mwaaleele atthu wiira: ‘Mwiikasoope wiira muhiwele vamwaako, nnakhala okwata mukerekhere. Mutthu yoole onrowa okwata mwaako ohaana wiiviwa. 13 Mutthu owo otthenke ohikwatiwe, masi ohaana ovonyiwa maluku aahiiso ohommwa.* Hata okhalaka mwaamunama aahiiso mutthu, ohaana wiiviwa’.+ Masi narumihiwa nlope na nnyaka na epwittipwitthi,+ atthu ahaana waattamela mwaako owo”.

14 Vano Moise aahikhuruwa wa mwaako, onarowa waari atthu. Owo aahipacerya waareeriha atthu, nave awo yaahikattha ikuwo saya.+ 15 Moise aahaaleela atthu wiira: “Mwiilokiherye para murotto. Muhimurupihe mwaarinyu”.*

16 Mmurottoni mwaya voosiisu, waahikhumelela okukutteya ni etari, nave naahikhala neeku nooriipa+ naakhunenle mwaako, ni waahiiwanyeya oruma wuulupale wa nlope. Vano atthu ale ootheene yaathukumanne, yaahipacerya ottettemela.+ 17 Nto Moise aahaakuxa atthu opuro waamanke aya, wiira yakumane ni Muluku eekeekhai. Awo yaaheemela mukerekhere mwa mwaako. 18 Mwaako wootheene wa oSinayi waatthuwa mwiixi, okhala wiira Yehova aahirwa orukureriwe ene ni mooro.+ Mwiixi owo waaniwela ntoko mwiixi onikhuma nfornuni, nave mwaako wootheene waanittettemela vanceene.+ 19 Okathi oruma wa nlope waatepa aya, Moise aanilavula, nave Muluku eekeekhai animwaakhula.

20 Yehova aahikhuruwela vamwaako Sinayi, okhala vasulu vaya. Nuumala-vo, Yehova aahimwiihana Moise vasulu vamwaako. Nto Moise aahiwela.+ 21 Vano Yehova aahimuleela Moise wiira: “Mukhuruwele vathi, mwaaleele atthu wiira aheererye otupha mukano, aphavelaka onweha Yehova, yiira siiso, atthu anceene animookhwa. 22 Nave mwaaleele anamukuttho, yaawo ikwaha sinceene animwaattamela Yehova wiira yiireerihe, wiira Yehova ohiwiive”.+ 23 Moise aahimuleela Yehova wiira: “Atthu khanwerya owela vamwaako Sinayi, okhala wiira nyuwo moonilopola mwiiraka: ‘Muhele mukano mukerekhere mwa mwaako, nave mukhalihe moowaarya”.+ 24 Masi Yehova aahimuleela Moise wiira: “Mukhuruwele vathi, ni mwatthike nyuwo ni Aroni. Masi anamukuttho ni atthu akina, ahituphe mukano aphavelaka okumana ni Yehova, wiira owo ohiwiive”.+ 25 Tivo, Moise aahikhuruwa, orowa vaari atthu, aaleela ele Muluku aahimmye awe.

20 Vano Muluku aahilavula moolumo ala ootheene, iiraka:+

2 “Miyo ka Yehova, Muluku anyu. Ti yoomi kookuminheni elapo ya wExiitu, weiwo mwaari anyu ipottha.+ 3 Muhaana okikokhorela miyo paahi. Muhaakokhoreleke amuluku akina.+

4 “Muhipake elatarato, aahiiso etthu ekina enlikana ni etthu eri wiirimu, wala eri mulaponi, aahiiso eri mmaasini.+ 5 Muhikokhoreleke ilatarato iyo, nnakhala muhiwokiwe wiira mukokhoreleke,*+ okhala wiira miyo Yehova Muluku anyu, ka Muluku oniphavela wiira kikokhoreliweke mekhaka paahi.+ Kinnaahukhumu anamwane mwaha wa soottheka sa axipapaya, mpakha osuulu aya wa neeraru aahiiso wa neexexe. 6 Masi kinnooniherya ophenta woororomeleya maloko anyu ikonto sene anrowa okhumelela ohoolo, yaawo anikiphenta ni aniiwelela sooruma saka.+

7 “Muhirumeele nsina na Yehova Muluku anyu veethiru,+ okhala wiira Yehova onoomuhukhumu mutthu yoole onirumeela nsina nawe veethiru.+

8 “Muttittimiheke nihiku na saabadu, okhala wiira ti noowaarya.+ 9 Nvareke miteko sanyu sootheene mpakha mahiku mathanu namosa,+ 10 masi nihiku na neethanu nenli, esaabadu para Yehova Muluku anyu. Nyuwo muhivare muteko, nnakhala mwaninyu mwaamulopwana, nnakhala mwaninyu mwaamuthiyana, nnakhala epottha anyu yoolopwana, nnakhala epottha anyu yoothiyana, nnakhala enama anyu, nnakhala anamurwa anikhala ipooma sanyu.*+ 11 Mahiku mathanu namosa, Yehova oopaka erimu, elapo ya vathi, ephareya ni itthu sootheene siri memmo. Nto nihiku na neethanu nenli,+ aahiphumurya. Tivo, Yehova aahireeliha nihiku na saabadu, okhaliha noowaarya.

12 “Mwaattittimiheke apapinyu ni amaminyu,+ wiira mwakhaleke mahiku manceene elapo Yehova Muluku anyu onrowa awe woovahani.+

13 “Muhimwiive mutthu.+

14 “Muhiraruwe.+

15 “Muhiiye.+

16 “Muhimootherye mutthu mukina.+

17 “Muhikhalele nrima etthoko ya mutthu mukina. Muhimutthune muthiyana+ a mulopwana mukina,+ nnakhala epottha awe yoolopwana, nnakhala epottha awe yoothiyana, nnakhala epooyi awe, nnakhala puuru awe, hata etthu ekina”.

18 Atthu ootheene yaahiiwa okukutteya, ni itari, ni oruma wa nlope, ni yaahiweha mwaako waatthuwa mwiixi. Okathi atthu yiiwale aya ni woona itthu iye, awo yaahittettemela ni khiyaattamenle-tho+ mwaako ole. 19 Siiso, awo yaahimuleela Moise wiira: “Hiyo ninnoova wiira Muluku alavula ni hiyo nnimookhwa.+ Tivo, mukhaleke nyuwo munilavula nuuwo. Vano hiyo nnimoowiriyanakani”. 20 Moise aahaaleela atthu ale wiira: “Muhoove, okhala wiira Muluku eekeekhai oniphavela oweehereryani,+ wiira mmooveke, ni muhittheke”.+ 21 Atthu ale yaahanle vaavale, masi Moise aahaattamela neeku nooriipa, vaavo vaari awe Muluku eekeekhai.+

22 Nto Yehova aahimuleela Moise iiraka: “Mwaaleele aisarayeli wiira: ‘Nyuwo mmansinyu mooweha wiira koolavula ni nyuwo kiri ene wiirimu.+ 23 Muhaapake+ amuluku a eparatha ni a eweero wiira mwaakokhorele vamosa ni miyo. 24 Mumpake altaari a etthaya, wiira nvaheke soovaha para opahiwa, mikuttho sa opatthani,* sa ipwittipwitthi, ni sa ipooyi. Khula opuro kiniphavela aka wiira nsina naka nuupuweleliweke,*+ kinimoorwa wiira kooreeliheni. 25 Akhala wiira munikipakela altaari a maluku, murumeele maluku oohipwexiwa.+ Mwarumeela eyuuma wiira mpwexe maluku awo, munoomunanariha altaari owo. 26 Muhipake exikatta wiira nweleke valtaari. Siiso, okathi munwela anyu, khasinrowa wooniwaka ipantte sa erutthu sihinreerela wooniwa’.

21 “Malamulo munrowa anyu waaleela atthu taala:+

2 “Mwathuma epottha+ ya nloko na aheeperi, eyo ehaana woovarelani muteko mpakha iyaakha 6. Masi eyaakha ya neethanu nenli, ehaana otaphuliwa ehilinve etthu.+ 3 Akhala wiira erwiiye mekhaya, enoorowa mekhaya. Masi akhala wiira yaahithela, weeso ehaana orowa ni mwaaraya. 4 Akhala wiira pwiya aya yonvaha muthiyana epottha aya, wiira emuthele, nto muthiyana owo aayara anamwane axilopwana aahiiso axithiyana, muthiyana owo ni anaawe ahaana ohala ni pwiya aya. Vano, epottha eyo eroweke mekhaya.+ 5 Masi epottha eyo yathipelela, enahimya wiira: ‘Miyo kinnimphenta pwiya aka, ni mwaaraka, ni kinnaaphenta anaaka. Nkiniphavela otaphuliwa’,+ 6 nto pwiya awe ohaana oroiha ohoolo wa Muluku eekeekhai. Nuumala-vo, oroihe epottha eyo vamukhora aahiiso aaro a mukhora. Vano, pwiya awe ohaana othorola niyaru na epottha eyo ni nttemulo.* Nto epottha eyo enrowa okhala yawawe mahiku ootheene.

7 “Akhala wiira mulopwana onimutumiha mwanawe mwaamuthiyana wiira okhale epottha, nto eyo khenrowa otaphuliwa ntoko enitaphuliwa aya epottha yoolopwana. 8 Akhala wiira pwiya awe khosiveliwe ni epottha eyo, ni khothanlale wiira ekhale mwaarawe mukina,* ohaana ohiya wiira ethummwe* ni mutthu mukina. Masi khonrowa okhalana etireitu ya omutumiherya mutthu a elapo ekina, maana pwiya awe khororomeleiye wa epottha eyo. 9 Akhala wiira oninvaha mwanawe mwaamulopwana wiira othele, owo ohaana ovaha epottha eyo itireitu sinivahiwa anamwane axithiyana. 10 Vano amuthela muthiyana mukina, ohivukule itthu oninvaha awe+ muthiyana oopacerya, itthu ntoko yoolya, soowara, ni orupana.* 11 Akhala wiira khoninvaha itthu iya tthaaru, nto owo ohaana okhuma ohilinve etthu.

12 “Ole onrowa onvulaliha mutthu, vano mutthu owo khukhwa, owo ohaana wiiviwa.+ 13 Masi mutthu owo apaka eyo voohilakela, nto Muluku eekeekhai ohipaka etthu, kinimoothanlelani opuro okhanle awe ootthyawela.+ 14 Akhala wiira mutthu oonanariwa vanceene ni mukhwaawe, nto omwiiva voolakelela,+ mutthu owo ohaana wiiviwa, hata otthyawelaka valtaari.+ 15 Mutthu yoole onrowa waamana apapawe aahiiso amamawe, ohaana wiiviwa.+

16 “Ole oninvara mutthu+ ophavelaka omutumiha, aahiiso aphwanyaniwa onvanre ene,+ ohaana wiiviwa.+

17 “Ole onaalapha* apapawe aahiiso amamawe, ohaana wiiviwa.+

18 “Akhala mutthu oninyakulihana ni mukhwaawe, nto mmosa onvulaliha mukhwaawe ni nluku aahiiso ni esooku,* mutthu owo ohikhwa, masi oona owereya mpakha wummaathi, ela ti etthu ekhanle oowiiraneya: 19 Ole ovulalihiwe avenya onawerya weetta ni ttootto, ole onvulalinhe khorina mulattu. Masi ohaana omuliva okathi wootheene ovinre ohivaraka muteko, mpakha owo okhala saana.

20 “Akhala mutthu onivulaliha epottha awe yoolopwana aahiiso yoothiyana orumeelaka ekopo, nto epottha eyo ekhwa okathi enimaniwa aya,* mwaneene epottha eyo ohaana ohukhummwa.+ 21 Masi akhala wiira ninnivira nihiku nimosa aahiiso mahiku manli ehikhwiiye, nuumala-vo enakhwa, mwaneene epottha khonrowa ovahiwa ehukhumu, okhala wiira epottha eyo othumme ni musurukhu awe.

22 “Yakhala alopwana aniwana, ammana muthiyana orupanle, vano muthiyana owo oyara ahiphiiye mahiku,*+ masi muthiyana owo ni mwanawe ahikhwa,* ole ommanne ohaana oliva musurukhu onrowa awe ovekeliwa ni iyawe muthiyana owo. Ohaana oliva ohoolo wa alipa-oophuka milattu.+ 23 Masi akhwa mutthu, weeso ole otthenke ohaana wiiviwa nave. Okumi oliviwe ni okumi,+ 24 niitho nliviwe ni niitho, niino nliviwe ni niino, ntata nliviwe ni ntata, nnawu nliviwe ni nnawu,+ 25 opaha oliviwe ni opahiwa, ovulaliha oliviwe ni ovulalihiwa, omana oliviwe ni omaniwa.

26 “Akhala mutthu onimana niitho na epottha awe yoolopwana aahiiso yoothiyana, nto opwexa niitho nno, ohaana otaphula epottha eyo wiira oliverye niitho naya.+ 27 Akhala wiira onipwexa niino na epottha awe yoolopwana aahiiso yoothiyana, ohaana otaphula epottha eyo wiira oliverye niino naya.

28 “Akhala wiira epooyi yoomukhumula mulopwana aahiiso muthiyana ni manyaka aya, nto owo okhwa, epooyi eyo ehaana ovonyiwa maluku mpakha okhwa.+ Vano enama aya ehikhuuriwe. Masi mwaneene epooyi eyo, khonrowa ohukhummwa. 29 Masi akhala wiira epooyi eyo yaamakela waakhumula atthu ni manyaka aya, nave mwaneene epooyi eyo oleeliwa, masi owo ohitthukwelela epooyi eyo, vano eyo khumwiiva mulopwana aahiiso muthiyana, ehaana ovonyiwa maluku. Nave-tho, mwaneene epooyi eyo, ohaana wiiviwa. 30 Akhala wiira mwaneene epooyi eyo onivekeliwa oliva* wiira ohiiviwe, owo ohaana oliva musurukhu onivekeliwa awe. 31 Hata epooyi eyo emukhumunle ene mmiravo aahiiso mwaaruusi ni manyaka aya, ahaana otthariwa malamulo mamosa-ru. 32 Akhala wiira epooyi eyo yookhumula ni manyaka aya epottha yoolopwana aahiiso yoothiyana, mwaneene epottha eyo ohaana oliviwa ixeekele* 30. Nave epooyi eyo ehaana ovonyiwa maluku mpakha okhwa.

33 “Akhala wiira mutthu khonikhuneela ehime awe aahiiso oothipa ehime awe ohikhuneela, vano epooyi aahiiso puuru omorela mweehimeni-mmo, 34 mwaneene ehime eyo ohaana oliva.+ Owo ohaana omuliva mwaneene enama eyo. Nave enama eyo yookhwa enrowa okhala yawawe. 35 Akhala wiira epooyi ya mutthu mmosa ennivulaliha epooyi ya mutthu mukina, nto epooyi eyo evulalihiwe ekhwa, axineene ipooyi iyo ahaana otumiha epooyi ele ekumi ni okawana musurukhu ene. Nave-tho, ahaana okawana enama eyo yookhwa. 36 Aahiiso, akhala wiira epooyi eyo yaamakela waakhumula atthu ni manyaka aya, nto mwaneene epooyi eyo ohitthukwa, owo ohaana oliva ni epooyi ekina. Nave, epooyi yookhwa enrowa okhala yawawe.

22 “Akhala mutthu oniiya epooyi emosa, aahiiso epwittipwitthi, khwiiva aahiiso khutumiha, ohaana okumiha ipooyi ithanu, wiira oliverye epooyi emosa, ni ohaana okumiha ipwittipwitthi ixexe, wiira oliverye epwittipwitthi emosa.+

2 (“Latarau+ aphwanyiwa opwexaka mukhora wa aneene, ovulalihiwa ni iiviwa, ole omwiivale khorina mulattu. 3 Masi eyo yiiraneya nuumala nsuwa okhuma, ole omwiivale onookhalana mulattu.)

“Latarau owo ohaana oliverya etthu iiyale awe. Aahikhalane etthu, ohaana otumihiwa wiira oliverye itthu iiyale awe. 4 Akhala wiira ele iiyale awe nlelo ekumi, ni eri ni yoowo, ekhale epooyi, aahiiso puuru, wala epwittipwitthi, ohaana oliverya ikwaha piili.

5 “Akhala mutthu onilyiha inama sawe mmatta mwawe, aahiiso mmatta mwawe mwa ewuuva, onahiya inama sawe sirowaka olya ematta ya mutthu mukina, owo ohaana oliverya ni mihokorokho sawe sootepa oreera sa mmatta mwawe, aahiiso sa mmatta mwawe mwa ewuuva.

6 “Akhala mutthu onipattiha mooro, vano mooro owo khupaha miri sa miiwa, vamosa ni mavisi a ipyo sa aneene ni mihokorokho sihihemphwale, aahiiso khupaha ematta yootheene, nto ole opanhe ohaana oliverya ele eviiye.

7 “Akhala mutthu oninvahererya mukhwaawe musurukhu aahiiso itthu sikina wiira osuke owannyawe, vano itthu iyo siiyiwa, latarau ene aphwanyiwa, ohaana oliverya itthu iyo, ikwaha piili.+ 8 Masi latarau ene aahiphwanyiwe, nto mwaneene etthoko ohaana oroihiwa ohoolo wa Muluku eekeekhai,+ wiira awehiwe akhala wiira khokunxe itthu sa mukhwaawe. 9 Akhala mutthu onootheriwa okuxa etthu ehikhanle yawawe, ntoko epooyi, puuru, epwittipwitthi, nlaya, aahiiso khula etthu erimenle, atthu awo ahaana orowa ohoolo wa Muluku eekeekhai,+ wiira osuweliwe mwaneene. Ole Muluku onrowa awe omuhimya wiira ookhalana mulattu, ohaana omuliva mukhwaawe ikwaha piili.+

10 “Akhala mutthu oninvahererya mutthu mukina puuru, epooyi, epwittipwitthi, aahiiso muhuwo mukina wiira okhapeleleke, nto enama eyo ekhwa, aahiiso erakala, wala evariwa masi ohikhala mutthu owehale, 11 oowanli aya ahaana orowa wa alipa-oophuka milattu. Vano, ole aavahereriwe okhapelela inama iyo, ohaana olapha ohoolo wa Yehova, ohimyaka wiira khokunxe. Mwaneene inama iyo ohaana okupali. Nto, ole aavahereriwe okhapelela khonrowa oliva etthu.+ 12 Masi akhala wiira enama eyo yiiyiwe mmatatani mwawe, ohaana omuliva mwaneene. 13 Akhala wiira enama eyo ekhuuriwe ni enama ya mutakhwani, owo ohaana oruuha mpantta ohanle wiira ooniherye. Vano, owo khonrowa oliverya okhala wiira ekhuuriwe ni enama ya mutakhwani.

14 “Akhala mutthu onimoolela mukhwaawe enama, nto enama eyo erakala aahiiso ekhwa, mwaneene ohikhanle, ole oolale ohaana oliva. 15 Akhala wiira mwaneene aari vaavo, owo khonrowa oliva etthu. Masi, akhala wiira yaarimwaalukariwa, nto yooliviwa ni musurukhu owo yaalukaraniwe aya.

16 “Akhala mulopwana onimoototha mwali* ohinoivariwe, nave khumurupiha, ohaana oliva eperesu ya noiva, wiira omuthele.+ 17 Akhala wiira paapa awe muthiyana ole onookhootta onvahererya mwanawe, nto mulopwana owo ohaana oliva eperesu ya noiva.

18 “Muthiyana nookhwiri, ohaana wiiviwa.+

19 “Mutthu yoole ommurupiha mwaamunama wala onirupihiwa ni mwaamunama, ohaana wiiviwa.+

20 “Ole oninvaha mukuttho muluku mukina, ohikhanle Yehova paahi, ohaana wiiviwa.+

21 “Muhimuhaaxe nnakhala ompuherya namurwa,+ okhala wiira nyuwo mwaari anamurwa elapo ya wExiitu.+

22 “Muhimuhaaxe muthiyana naamukhweli, aahiiso mwaana ohirina apapawe.*+ 23 Mwamuhaaxa, nto owo okikhuwelela, miyo kinimwiiwa okhuwela wawe.+ 24 Nto kinoonanariwa vanceene, ni kinoowiivani ni espaata.* Axaarinyu anrowa okhala anaamukhweli, nave aniinyu anrowa okhala ikwaasuni.

25 “Mwamukophiha musurukhu mutthu oohaawa a nloko naka, muhikhaleke ntoko ale anikophiha musurukhu* aphavelaka ophwanya etthu. Muhimulokiheke musurukhu, ovikana ole mmukophinhe anyu.+

26 “Mukhwiinyu aweemexeryani mukhumi awe,+ muhaana omuttikiherya vahinatthi wiila, 27 okhala wiira orina mukhumi mmosa, yoowo oniikhuneela awe. Onrowa wiikhuneela exeeni aarupaka?+ Akikhuwelela, miyo kinonwiriyana, okhala wiira kinnoona othunku.*+

28 “Muhinveehe Muluku,+ nnakhala mukhulupale ori eriyari ya nloko nanyu.+

29 “Muhoovelele ovaha mihokorokho soowaatta muruwenrye anyu, nnakhala eviinyu aahiiso makhura aniyiiheya opuro aninyakattiwa aya.+ Muhaana okivaha+ aniinyu oopacerya oyariwa. 30 Etthu mukhanle anyu oopaka ni epooyi anyu, ni epwittipwitthi anyu,+ tiila: Mwaaxaana aya okhaleke ni maama aya mahiku 7, vano nihiku na 8, muhaana okivaha.+

31 “Mweettelo anyu okhaleke woowaarya ohoolo waka.+ Nave, muhikhuure enama yiiviwe ni enama ya mutakhwani.+ Muhaana waavaha alapwa.

23 “Muhimwarya-mwaryeke ihapari sihikhanle seekeekhai.+ Muhimukhaliheryeke mutthu ootakhala, mmukhalelaka onamoona,+ wiira mmukumiherye etthu yootakhala mutthu mukina. 2 Muhipakeke itthu sootakhala mwaha woowi anamunceene aniira siiso. Okathi munimukhalela anyu onamoona mutthu, muhilavuleke itthu sihikhanle seekeekhai wiira mwaakhaliherye anamunceene, maana mwiira siiso, munoohonona exariya. 3 Okathi oniphukiwa aya mwaha wa mulipa-oohaawa, muhimukhaliherye mwaha wookhala mulipa-oohaawa paahi.+

4 “Mwaphwanya epooyi aahiiso mwamphwanya puuru a nwanani anyu orimenle ene, mmuttikiherye mwaneene.+ 5 Mwamphwanya puuru a mutthu onoonyokhani omonre ene ni muritti awe, muhivire muhimukhalihenrye. Muhaana omukhaliherya mutthu owo, mukuruxaka miritti vasulu va mwaamunama owo.+

6 “Muhihononeke exariya, okathi oniphukiwa aya mulattu+ wa mutthu oohaawa.

7 “Muhiireleke mpantta okathi onootheriwa awe mutthu. Nave-tho, muhimwiive naxariya ohitthenke etthu, okhala wiira miyo nkinrowa omuhimya mutakhali okhala naxariya.*+

8 “Muheemereryeke okunyariwa. Okhala wiira okunyariwa onniwiiriha alipa-oophuka milattu ohitthara exariya. Nave-tho, pooti omwiiriha naxariya+ orukunuxa muupuwelo awe.

9 “Muhaahaaxeke anamurwa anikhala mmuttettheni mwanyu. Nyuwo moosuwela makhalelo a anamurwa, maana mwaari anamurwa wExiitu.+

10 “Mwaaleke ipyo sanyu mmatta mpakha iyaakha 6.+ Nave muhepheke mihokorokho saya. 11 Masi eyaakha ya neethanu nenli muhilime, wiira etthaya emumule. Siiso, alipa-oohaawa a nloko nanyu anrowa olyaaka mihokorokho sinrowa omela. Iye sinrowa ohala, sinrowa olyiwaka ni inama sa mutakhwani. Mwiiriheke siiso ematta anyu ya ewuuva ni ya olivera.

12 “Nvareke muteko anyu mpakha mahiku 6. Masi nihiku na neethanu nenli, muhivareke muteko, wiira epooyi anyu ni puuru anyu simumule, nave mwaana mwaamulopwana a epottha anyu yoothiyana, ni namurwa onikhala mmuttettheni mwanyu, amumule.+

13 “Mukhalane ephoole wiira mpake itthu sootheene koohimenryaakani.+ Muhiromoleke masina a amuluku akina. Nave, ohikhale oniwiiwani mwaaromolaka ni eyano anyu.+

14 “Khula mwaakha mpakeke ifesta tthaaru, mukitthapelaka miyo.+ 15 Mpakeke Efesta ya Iphaawu Soohiheliwa Eferemento.+ Mahiku 7 munrowa okhuuraka iphaawu soohiheliwa eferemento ntoko koorumalyaakani, okathi othanleliwe, mweeri wa abibi,*+ okhala wiira nyuwo mwaakhumme wExiitu okathi yoowo. Ohikhale onirwa okumana ni miyo matata-ru.+ 16 Nave muhaana opaka Efesta ya Ohepha* mihokorokho soopacerya sa miteko sanyu, seiyo mwanle anyu mmatta mwanyu.+ Nave-tho, wuumalani wa mwaakha muhaana opaka Efesta ya Othukumanya,* okathi munrowa anyu othukumanyaka itthu muhemphe anyu mmatta mwanyu.+ 17 Khula mwaakha, alopwana ootheene a nloko nanyu, ahaana orowa okumana ni Pwiya eekeekhai, Yehova,+ ikwaha tthaaru.

18 “Okathi munikivaha anyu mukuttho, muhikivaheke ephome vamosa ni ephaawu yooheliwa eferemento. Nave, makhura a mikuttho sinivahiwa okathi munipaka anyu ifesta sookitthapela, ehisukiwe ohiyu wootheene mpakha voosiisu.

19 “Muhaana oroiha mpaani mwa Yehova, Muluku anyu,+ mihokorokho sanyu soopacerya ottokottha, sootepexa oloka.

“Muhimwaapeye mwaaxaana a epuri muleetini mwa nipele na amamawe.+

20 “Kinooruma nlaikha orowa ohoolo wanyu+ wiira nookhapelelekeni mphironi, ni nooroiheni opuro kilokihenrye aka.+ 21 Nvaheke ephoole etthu ninhimya aya ni mwiiweleleke nenlo. Muhivirikanye etthu ninhimya aya, okhala wiira khaninrowa woolevelelani itampi sanyu,+ maana nlo nookhalana nsina naka. 22 Masi mwaiwelela oratteene moolumo aya, ni mwapaka itthu sootheene kinihimya aka, miyo kinookhalaka nwanani aawanani anyu, ni kinimwaavirikanya ale anoovirikanyani. 23 Nlaikha naka nnoorowa ohoolo wanyu, ni nnimooroihani elapo ya amori, ahiti, aperizi, akanaani, ahivi ni ayebusi. Nave miyo kinimwaapwetexa atthu a ilapo iyo.+ 24 Muhaakokhoreleke amuluku aya, aahiiso muhiwokiwe wiira mwaakokoreleke, nnakhala muhitakiheke itthu anipaka aya.+ Masi muhaana waapwexakasa amuluku aya, ni opwexakasa ipilaari anaakokhorela aya amuluku aya.+ 25 Muhaana okirumeela miyo, Yehova Muluku anyu,+ nto miyo kinooreeliha eyoolya anyu ni maasi anyu.+ Kinookumiha iretta eriyari anyu.+ 26 Khuuvo muthiyana a mulaponi mwanyu onrowa oyiiheyaka erukulu awe, aahiiso ohiyaraka.+ Kinimwaattiha mahiku a okumi anyu.

27 “Kinoowiiriha atthu woova, nlelo muhinatthi ophiya ilapo saya,+ nave miyo kinoowaakanyerya atthu a maloko ootheene anrowa owanaka ni nyuwo. Kinoowiiriha awanani inyu wootthyawani, axinttiwe ene.+ 28 Kinoowiiriha awanani anyu okhulumuwa, nlelo muhinatthi ophiya ilapo saya.+ Nave-tho, kinoowoomola+ ahivi, akanaani ni ahiti. 29 Nkinrowa owoomola ootheene aya eyaakha emosa, wiira elapo ehihale ehikhaliwaka, ni wiira inama sa mutakhwani sihitotholane,+ siwiiriheni etthu yootakhala. 30 Kinrowa owoomolaka vakhaani-vakhaani, mpakha nyuwo waatta mulaponi, ni okuxa elapo eyo.+

31 “Mikano sa elapo anyu sinrowa okhuma ephareya Yooxeerya mpakha ephareya ya afilisti, ni okhuma woothakoni mpakha omuro Eufrate.*+ Kinimoovahani mmatatani mwanyu atthu a elapo eyo, nto nyuwo munoowoomola.+ 32 Muhipake nivarihano ni atthu awo, nnakhala ni amuluku aya.+ 33 Atthu awo ahikhaleke mulaponi mwanyu, wiira ahiwiiriheni okitthekela. Vakhala wiira munimwaakokhorela* amuluku aya, eyo enimookumiheryani maxakha”.+

24 Yehova aahimuleela Moise wiira: “Nwele vamwaako nyuwo ni Aroni, ni Nadabi ni Abihu,+ ni axitokweene 70 a Isarayeli. Muhaana wuurama murakamenle ene. 2 Okathi Moise onrowa awe omwaattamela Yehova, ohaana okhala mekhawe. Masi alopwana akina ahaattamele, nave atthu ahiwele vamwaako nuuwo”.+

3 Moise aahirowa waaleela atthu moolumo ni malamulo ootheene Yehova aamurumme awe.+ Nto atthu ootheene yaahaakhula hoothe yiiraka: “Hiyo nnoovara+ itthu sootheene Yehova ohimmye awe”. 4 Siiso, Moise aahilepa moolumo ootheene a Yehova.+ Aahivenya voosiisu, omuteka altaari mukerekhere mwa mwaako, ni aaheemexa maluku 12, yaawo yaathonyerya mahimo 12 a Isarayeli. 5 Nuumala-vo, Moise aahaaruma amiravo a Isarayeli onvaha Yehova soovaha para opahiwa ni mikuttho sa opatthani+ sa ipooyi. 6 Moise aahihavula ephome eriyari ohela mutixelani, nto mpantta mukina wa ephome eyo aahitathela vasulu va altaari. 7 Nuumala-vo, aahikuxa eliivuru ya nivarihano, aasomela atthu voowiiwanyeya.+ Nto atthu awo yaahaakhula wiira: “Nnoovara itthu sootheene Yehova olavunle awe, ni nnimwiiwelela”.+ 8 Vano Moise aahikuxa ephome, aatathela atthu+ iiraka: “Ela ti ephome ya nivarihano, nenno Yehova opanke awe ni nyuwo. Nivarihano nno, nyuwo muheemererya wiiwelela moolumo ootheene+ mwiiwale anyu”.

9 Moise ni Aroni, ni Nadabi ni Abihu, ni axitokweene 70 a Isarayeli, yaahiwela vamwaako, 10 anweha Muluku a Isarayeli.+ Vathi va inawu sawe, aahinyakela etthu yaalikana ni nluku noowaarya nniihaniwa safira. Nluku nlo, naari noowaarya ntoko wiirimu ohikhanle meeku.+ 11 Owo khaawiirinhe etthu yootakhala alopwana ale a Isarayeli yaathanliwe.+ Awo yaahoonihiwa Muluku eekeekhai, yaahilya ni yaahiwurya.

12 Vano, Yehova aahimuleela Moise wiira: “Nwele vamwaako vari aka, mukhale vaavo. Kinimoovahani mapawe a maluku kinrowa aka olepa malamulo ni sooruma, wiira mwawiixuttiheke atthu”.+ 13 Nto Moise ni namakhaliherya awe Yooxuuwa,+ yaahiwela vamwaako. Vano Moise aahirowa vamwaako ari Muluku eekeekhai.+ 14 Masi Moise aahaaleela axitokweene akina oriki: “Munilipeleleke vaava mpakha hiyo otthika.+ Aroni ni Huri+ ari ni nyuwo. Akhala mutthu orina mwaha onireerela ophukiwa, aaroiheleke yaawo”.+ 15 Moise aahiwela vamwaako, okathi yoowo waakhuneeliwa aya+ ni meeku vasulu vaya.

16 Ovuwa wa Yehova+ waahikhala vamwaako Sinayi,+ nave meeku yaahikhuneela mwaako owo mpakha mahiku 6. Nihiku na neethanu nenli, Muluku aahimwiihana Moise. Muluku owo aari mmeekuni. 17 Aisarayeli yaaniweha ovuwa wa Yehova. Ovuwa iwo waakhala ntoko mooro waapatta vasulu vamwaako. 18 Moise aahirowa mmeekuni vasulu vamwaako.+ Vano Moise aahikhala vamwaako mahiku 40, othana ni ohiyu.+

25 Vano Yehova aahimuleela Moise wiira: 2 “Mwaaleele atthu a wIsarayeli wiira akithukumanyerye soovaha. Khula mutthu oniphavela ovaha ni murima awe wootheene, mwaakhele etthu eyo oniphavela awe okivaha.+ 3 Soovaha munrowa anyu waakhela tiiya: eweero,+ eparatha,+ ekoopiri,+ 4 nliinya nooripelela, ekuwo ekoore violeeta,* ekuwo yooxeerya, eliinyu yooreerexa, manri a epuri, 5 isapala sa ipwittipwitthi soolopwana sipintariwe ekoore yooxeerya ni isapala sa inama eniihaniwa fooka,* ni matera a akaasiya,+ 6 makhura para ixamaniiya,+ baalsamu para opaka makhura+ aniittheliwa atthu oothanliwa, nsenso noowunkhela,*+ 7 maluku oowaarya aniihaniwa oonikisi ni maluku makina, wiira aheliwe va eefodini+ ni vamurupani wa vapeeto.*+ 8 Awo ahaana opaka nipuro anrowa aya okikokhorelaka. Nto miyo kinookhalaka eriyari aya.+ 9 Nyuwo muhaana opaka etapernaakulu ni itthu sootheene sinrowa okhalaka memmo, muttharaka oratteene, siisaale ntoko kinrowa aka owooniheryani.+

10 “Awo ahaana opaka nivuku* arumeelaka matera a akaasiya. Orakama waya okhale wa emeeturu emosa ni isentiimeturu 10,* okhuveya waya okhale wa isentiimeturu 70,* nave orakamela waya osulu okhale wa isentiimeturu 70.+ 11 Nuumala-vo, musirikele ni eweero yooreerexa.+ Musirikele muhina ni ota. Nave mumpake aaro a eweero vasulu vaya, orukureryaka nivuku nno nootheene.+ 12 Mpake ipulseera ixexe sa eweero, muhele vasulu va metto soomixexe sa nivuku nno. Muhele ipulseera piili ikantu piili, nto ipulseera sikina piili, muhele ikantu sikina piili. 13 Mpake ikopo sa matera a akaasiya, ni musirikele ni eweero.+ 14 Muhele ikopo iyo vanivukuni, nvirihaka mpulseerani siri mpararini mwa Nivuku, wiira siteexaniweke Nivuku nlo. 15 Ikopo iyo sihaana okhalaka mpulseerani sa Nivuku. Sihikumihiweke.+ 16 Muhele muhina mwa Nivuku, mapawe a maluku a Onamoona, yaawo kinrowa aka woovahani.+

17 “Mpake etampa ya eweero yooreerexa. Orakama waya okhale wa emeeturu emosa ni isentiimeturu 10,* nave okhuveya waya okhale wa isentiimeturu 70.*+ 18 Mwaapake makerubi manli a eweero. Muhaana orumeela eweero yoohaniwa ni maritelo. Khula kerubi mmuhele eponta emosa ya etampa.+ 19 Mwaapwehe makerubi awo iponta soopiili. Khula kerubi eponta emosa ya etampa. 20 Mapupha+ a makerubi awo, ahaana otaphuwa ewehaka musulu, akhuneelaka etampa. Makerubi awo awehaneke. Masi owiitho waya wuuramele vathi, awehaka etampa. 21 Mpwehe etampa+ eyo vasulu va Nivuku. Vano muhina mwa Nivuku, mpwehe mapawe a maluku a Onamoona, yaawo kinrowa aka woovahani. 22 Kinrowa wiixooniheryaka wa nyuwo ni kinoolavulaka ni nyuwo, vasulu va etampa.+ Kinimooleelakani itthu sootheene kinrowa aka woorumakani waaleela aisarayeli, kiri ene eriyari ya makerubi manli, ari vasulu va Nivuku na Onamoona.

23 “Nave-tho, mpake meesa+ murumeelaka matera a akaasiya. Orakama waya okhale waattamela emeeturu emosa,* okhuveya waya okhale waattamela nimeya na emeeturu,* ni orakamela waya osulu okhale wa isentiimeturu 70.*+ 24 Meesa awo musirikele ni eweero yooreerexa, nave mumpake aaro a eweero onirukurerya meesa awo ootheene. 25 Mumpake aaro onrowa orukurerya meesa ootheene. Wunnuwa wawe okhale mphimo wa ntata nimosa.* Nave-tho, vasulu vawe mumpake aaro mukina a eweero. 26 Meesa awo mpakele ipulseera ixexe sa eweero, muhele ikantu sooxeexe, seiyo siheliwe aya metto sa meesa. 27 Ipulseera iyo sihaana oheliwa vathi omwaattamela aaro, wiira sivirihiweke ikopo sinrowa oteexaniwaka meesa awo. 28 Mpake ikopo sa matera a akaasiya ni musirikele ni eweero, wiira siteexaniweke meesa.

29 “Mpake-tho iparatho ni ikoopho sinrowa orumeeliwaka vameesa, ni mirinki ni itixela, seiyo sinrowa orumeeliwaka para soovaha siniwuriwa. Muhaana opaka itthu iyo ni eweero yooreerexa.+ 30 Nave, mahiku ootheene muhaana opwehaka vameesa ephaawu kinivahiwa aka miyo.*+

31 Mpake muthuko*+ wa eweero yooreerexa. Muhaana orumeela eweero yoohaniwa ni maritelo. Metto saya, ekopo aya, iritta saya, ikoopho saya, iputawu saya ni ifilori saya, sootheene sihaana okhala muthuko mmosa-ru.+ 32 Muthuko owo onookhalana iritta 6 sinrowa okhumaka mpararini mwaya. Iritta tthaaru moono mmosa ni iritta tthaaru moono mukina. 33 Khula eritta eri moono mmosa, ekhalane ikoopho tthaaru sinlikana ni ifilori sa amentowa. Nave sikhalane iputawu ni ifilori sinivirikanyihiwa ekina ni ekhwaaya. Nave-tho, iritta sa moono mukina sikhale siiso. Iritta sootheene 6 sa muthuko owo sihaana olikanaka. 34 Ekopo ya muthuko owo, ekhalane ikoopho ixexe sinlikana ni ifilori sa amentowa, nave ekhalane iputawu ni ifilori sinivirikanyihiwa ekina ni ekhwaaya. 35 Eputawu yoopacerya, enrowa olupanyaka iritta piili soopacerya sinikhuma vakoponi, nave eputawu ya nenli, enrowa olupanyaka iritta piili sinittharelana. Nto eputawu ya neeraru, enrowa olupanyaka iritta piili sookiserya. Iritta sootheene 6 sikhumeke ekopo emosa-ru. 36 Iputawu, iritta ni muthuko wootheene, sihaana okhala emosa-ru. Sihaana opakiwa ni eweero yooreerexa ehaniwe ni maritelo.+ 37 Muthuko owo mpakele ixamaniiya 7. Okathi sinrowa aya opattihiwaka, sinrowa omwaleelaka ohoolo waya.+ 38 Itisora sinithikilaniwa ntthampo noovya ni iparatho siniheliwa ntthampo noovya, sihaana opakiwa ni eweero yooreerexa.+ 39 Muthuko owo, vamosa ni itthu sootheene sinirumeeliwa para muthuko owo, sihaana opakiwa ni etalento* emosa ya eweero yooreerexa. 40 Mpake itthu iyo muttharaka oratteene itthu kiwoonihenryaakani vamwaako-va.+

26 “Mpake etapernaakulu+ ni ikuwo 10 sa eliinyu yooreerexa yoorithiwa, nliinya nooripelela, ekuwo ekoore violeeta* ni ekuwo yooxeerya. Nave muxore malaikha+ vakuwoni-vo.+ 2 Khula ekuwo, erakamelo aya ekhale etthu yoowiiraka imeeturu 12 nnimeya* ni okhuveya waya okhale etthu yoowiiraka imeeturu piili.* Ikuwo sootheene sikhalane munnuwelo mmosa-ru.+ 3 Mulupanye ikuwo ithanu wiira ekhale ekuwo emosa yuulupale. Nave mulupanye ikuwo sikina ithanu wiira ekhale ekuwo emosa yuulupale. Nto sinookhala ikuwo piili suulupale. 4 Oponta wa khula ekuwo yuulupale, muttotthele ithulula* ni nliinya nooripelela, wiira ikuwo iyo soopiili silupanyiweke. 5 Ekuwo emosa, mpake ithulula 50. Nave oponta wa ekuwo ekina mpake ithulula 50, wiira ithulula iyo sinrowa okumanyihiwa, siwehaneke. 6 Mpake ikweeceryo 50 sa eweero ni mulupanye ikuwo iyo ni ikweeceryo. Siiso, etapernaakulu ekhale emosa-ru.+

7 “Mpake ikuwo ni manri a epuri+ wiira ekhuneeleke vasulu va etapernaakulu. Ikuwo+ iyo sikhale 11. 8 Khula ekuwo, erakamelo aya enrowa okhala etthu yoowiiraka imeeturu 13,* nave ekhuveelo aya enrowa okhala waattamela imeeturu piili.* Ikuwo iyo 11 sikhalane munnuwelo mmosa-ru. 9 Mulupanye ikuwo ithanu, nave-tho mulupanye ikuwo sikina ithanu namosa. Nto mukhune ekuwo ya neethanu namosa ohoolo wa etenta.* 10 Mpake ithulula 50 oponta wa ekuwo yookiserya wa iye soopacerya olupanyiwa. Nave oponta wa ekuwo yoopacerya wa iye sikina, muhele ithulula 50 opuro sinrowa aya olupanyiwa. 11 Mpake ikweeceryo 50 sa ekoopiri, muhele muthululani wiira mulupanye ikuwo sootheene, wiira sikhale ekuwo emosa. Siiso, etenta* yootheene enookhala emosa. 12 Ikuwo iyo enoohala emosa. Vano ekuwo eyo muthomeye. Nimeya na ekuwo eyo ehanle, mukhune ni muthomeye vasulu va etapernaakulu. 13 Ekuwo ehanle ehaana orowa vathi, etthu yoowiiraka nimeya na emeeturu,* ovikana ekuwo ya eliinyu. Eyo ehaana okhuneela ipantta soopiili sa etapernaakulu.

14 “Nave-tho, mpake ekuwo ya isapala sa ipwittipwitthi soolopwana, mpintari ni ekoore yooxeerya. Vasulu vaya, mukhuneele ni ekuwo ya isapala sa inama siniihaniwa fooka.*+

15 “Mpake etapernaakulu ni ithaapwa+ sa akaasiya soolupanyiwa piili-piili.+ 16 Orakama wa ithaapwa iyo soolupanyiwa, okhale wa imeeturu ixexe nnimeya.* Ithaapwa iyo sihaana ovalaana isentiimeturu 67.* 17 Khula ithaapwa piili soolupanyiwa, sihaana okhalana ikweeceryo piili soolupana. Ithaapwa sootheene soolupanyiwa sa etapernaakulu sihaana okhala siiso. 18 Moono woothiyana* wa etapernaakulu mpakele ipaare 20 sa ithaapwa soolupanyiwa.

19 “Mpake iyeemexeryo+ 40 sa eparatha, muhele vathi va ipaare 20 sa ithaapwa soolupanyiwa. Iyeemexeryo piili sikhale vathi va ithaapwa piili soolupanyiwa, sirina ikweeceryo piili.+ 20 Mpantta mukina wa etapernaakulu, eyo piiyo, moono woolopwana,* mpakele ipaare 20 sa ithaapwa soolupanyiwa, 21 vamosa ni iyeemexeryo saya 40 sa eparatha. Iyeemexeryo piili sikhale vathi va khula ithaapwa piili soolupanyiwa. 22 Ottuli* wa etapernaakulu, mpake ipaare 6 sa ithaapwa soolupanyiwa.+ 23 Ikantu piili sa ottuli wa etapernaakulu, mpake ni ipaare piili sa ithaapwa soolupanyiwa. 24 Ikantu iyo sipakiwe ni ithaapwa piili soovalaanyiwa vathi, masi sinikumana osulu, opuro ori epulseera yoopacerya. Ikantu soopiili sipakiwe siiso. 25 Mpantta owo, sinrowa okhala ipaare 8 sa ithaapwa soolupanyiwa ni iyeemexeryo saya 16 sa eparatha. Iyeemexeryo piili sikhaleke vathi va ithaapwa piili soolupanyiwa.

26 “Mpake ikopo sa matera a akaasiya. Ikopo ithanu sinrowa olupanyaka mpantta mmosa wa etapernaakulu.+ 27 Nave ikopo ithanu, sinrowa olupanyaka mpantta mukina wa etapernaakulu. Vano ikopo ithanu sikina, sinrowa olupanyaka ottuli* wa etapernaakulu. 28 Ekopo enivira eriyari ya ithaapwa soolupanyiwa, ehaana okhuma oponta mpakha oponta.

29 “Musirikele ni eweero ithaapwa iyo soolupanyiwa. Mpake ipulseera sa eweero+ muhele muthaapwani-mmo, wiira ikopo iyo sivireke mpulseerani memmo. Vano, musirikele ikopo iyo ni eweero. 30 Mpake etapernaakulu muttharaka itthu sootheene kiwoonihenryaakani vamwaako-va.+

31 Mpake ekortiina+ ya nliinya nooripelela, ekuwo ekoore violeeta, ekuwo yooxeerya ni eliinyu yooreerexa yoorithiwa. Muxore malaikha vakortiinani-vo. 32 Muthomeye ekortiina eyo vamaripuni maxexe a mwiri wa akaasiya, yaawo asirikeliwe ni eweero. Ikweeceryo saya sikhale sa eweero. Maripu awo yeemexiwe vasulu va iyeemexeryo ixexe sa eparatha. 33 Muthomeye ekortiina eyo vathi va ikweeceryo, ni mpwehe Nivuku na Onamoona+ ottuli wa ekortiina. Ekortiina eyo tenrowa ovalaanya Nipuro Noowaarya+ ni Nipuro Noowaaryexa.+ 34 Mpwehe etampa vasulu va Nivuku na Onamoona. Nuumala-vo, mpwehe nivuku nlo Nipuro Noowaaryexa.

35 Mpwehe meesa ohoolo wa ekortiina. Nave mpwehe muthuko*+ ohoolo wa meesa, moono woothiyana wa etapernaakulu. Nto meesa awo ekhale moono woolopwana wa etapernaakulu. 36 Mpake ekortiina wiira yakhuneeleke vamukhora. Ekortiina eyo ekhale ya nliinya nooripelela, ekuwo ekoore violeeta, ekuwo yooxeerya ni eliinyu yooreerexa yoorithiwa.+ 37 Mpakele ekortiina eyo maripu mathanu a mwiri wa akaasiya ni musirikele ni eweero. Ikweeceryo saya sikhale sa eweero. Nave maripu awo, mpakele iyeemexeryo ithanu sa ekoopiri.

27 Mumpake altaari a matera a akaasiya.+ Wunnuwa wawe okhale etthu yoowiiraka imeeturu piili.* Ipantte sooxeexe sa altaari owo sihaana olikanaka. Orakamela wawe osulu okhale etthu yoowiiraka emeeturu emosa.*+ 2 Khula ekantu ya altaari mpake nnyaka+ nimosa. Manyaka awo ahaana opatthiwa vaavo. Nave-tho mmusirikele altaari owo ni ekoopiri.+ 3 Mpake-tho ipalti sinikhupaniwa ettuurwa,* ipoxolo, itixela, ikarfu, ni iparatho siniheliwa makhala a mooro. Itthu iyo sootheene mpake ni ekoopiri.+ 4 Mpake ekerelya para altaari owo, eyo piiyo, ekaraati ya ekoopiri. Opuro eri ekerelya, mpake ipulseera ixexe sa ekoopiri, nto muhele khula epulseera ekantu emosa ya altaari owo. 5 Ekerelya eyo muhele eriyari ya altaari, mwaatalele nvirihaka muhina mwa altaari. 6 Mpake ikopo sa matera a akaasiya para altaari owo, ni musirikele ni ekoopiri. 7 Ikopo iyo sivirihiwe mpulseerani wiira sakhaleke ninno-ninno, okathi sinrowa aya oteexaniwaka+ altaari owo. 8 Altaari owo mumpake ntoko ekaaxa ya matera. Muhaana ompaka ntoko siisaale kiwoonihenryaakani vamwaako-va.+

9 “Mpake nivate+ na etapernaakulu eyo. Moono woothiyana* wa nivate nlo, onrowa okutteleliwa ni ikortiina sa eliinyu yooreerexa yoorithiwa. Orakama waya mpantta owo,+ onrowa okhala etthu yoowiiraka imeeturu 45.* 10 Mpantta owo ohaana okhalana maripu 20 ni iyeemexeryo 20 sa ekoopiri. Ikweeceryo sa maripu awo ni ilupanyeryo* saya, sikhale sa eparatha. 11 Ikortiina sinrowa okuttelela moono woolopwana, erakamelo aya ekhale-tho etthu yoowiiraka imeeturu 45.* Nave-tho, enookhalana maripu 20 ni iyeemexeryo saya 20 sa ekoopiri, vamosa ni ikweeceryo saya ni ilupanyeryo* sa eparatha. 12 Ottuli* wa nivate muhele ikortiina, erakamelo aya ekhale etthu yoowiiraka imeeturu 22.* Mpantta owo okhalane maripu 10 ni iyeemexeryo 10. 13 Ohoolo wa nivate nlo, weiwo oniwehana ni mpantta onikhuma nsuwa, erakamelo aya okhale etthu yoowiiraka imeeturu 22.* 14 Moono woolopwana wa ekortiina ya mukhora, sikhale ikortiina erakamelo aya etthu yoowiiraka imeeturu 7,* vamosa ni maripu mararu ni iyeemexeryo+ tthaaru. 15 Moono woothiyana wa ekortiina ya mukhora, sikhale ikortiina erakamelo aya etthu yoowiiraka imeeturu 7,* vamosa ni maripu mararu ni iyeemexeryo tthaaru.

16 “Vamukhora wa nivate, muhele ekortiina erakamelo aya etthu yoowiiraka imeeturu 9.* Ekortiina eyo ekhale ya nliinya nooripelela, ekuwo ya ekoore violeeta,* ekuwo yooxeerya ni eliinyu yooreerexa yoorithiwa.+ Mpake-tho maripu maxexe ni iyeemexeryo+ ixexe. 17 Maripu ootheene anirukurerya nivate, akhalane ilupanyeryo sa eparatha ni ikweeceryo sa eparatha. Masi iyeemexeryo saya sikhale sa ekoopiri.+ 18 Ekintaali enirukurerya nivate nlo, orakama waya okhale etthu yoowiiraka imeeturu 45,*+ okhuveya waya etthu yoowiiraka imeeturu 22,* nave orakamela waya osulu etthu yoowiiraka imeeturu piili.* Ehaana opakiwa ni ikuwo sa eliinyu yooreerexa yoorithiwa. Nave, iyeemexeryo saya sikhale sa ekoopiri. 19 Itthu sootheene sinirumeeliwa mutapernaakulu, vamosa ni iyeemexeryo sa etenta* ni iyeemexeryo sootheene sa ekintaali ya nivate, sihaana okhala sa ekoopiri.+

20 “Mwaarume aIsarayeli wiira yooruuheleni makhura ooreerexa para ixamaniiya, wiira sipatteke okathi wootheene.+ 21 Mutentani* mwa muthukumano, ota wa Nipuro Noowaaryexa,* waattamela Nivuku na Onamoona,+ Aroni ni anaawe tarina muritti wa oweha wiira ixamaniiya soopattihiwa ohoolo wa Yehova,+ okhuma ohiyu mpakha voosiisu. Yooruma ela ti ya mahiku ootheene, para maloko ootheene a Isarayeli.+

28 “Mwa atthu a nloko na Isarayeli, mmwiitthane muulupale anyu+ Aroni,+ vamosa ni anaawe Nadabi ni Abihu,+ ni Eleyazari ni Itamari,+ wiira akhale anamukuttho aka.+ 2 Mumpakele muulupale anyu Aroni malaya oowaarya ni ooreera wiira ottittimiheyeke.+ 3 Mulavule ni alipa-oottottha ooratta, yaawo kaavanhe aka ankhili,+ wiira emuttotthele malaya Aroni. Malaya awo, animooniherya wiira owo ooreerihiwa, wiira okhale namukuttho aka.

4 “Soowara anrowa aya opaka tiiya: murupa wa vapeeto,*+ eefodi,+ nlaya nihirina miyoono,+ nlaya nootteela na xadrexi, nleeso+ ni musako.+ Ampakele soowara iya soowaarya Aroni ni anaawe, wiira Aroni owo okhale namukuttho aka. 5 Alipa-oottottha awo ooratta, ahaana orumeela eweero, nliinya nooripelela, ekuwo ya ekoore violeeta,* ekuwo yooxeerya ni eliinyu yooreerexa.

6 “Epake eefodi ya eweero, nliinya nooripelela, ekuwo ya ekoore violeeta,* ekuwo yooxeerya ni eliinyu yooreerexa yoorithiwa. Eefodi eyo ehaana okhala yooxoriwa.+ 7 Eyo ehaana okhalana ipantte piili mmakhatani, wiira silupanyeke epantta ya ohoolo ni ya ottuli. 8 Musako+ wooxoriwa, yoowo ottottheleliwe va eefodini-vo wiira olipiheke, ohaana opakiwa sirumeeliwaka itthu simosa-ru: eweero, nliinya nooripelela, ekuwo ya ekoore violeeta, ekuwo yooxeerya ni eliinyu yooreerexa yoorithiwa.

9 “Mukuxe maluku+ manli a oonikisi, mulepe-vo masina a anamwane a Isarayeli.+ 10 Nluku nimosa mulepe-vo masina 6, nluku nikina mulepe masina makina 6, mumpaceryaka ole oopacerya oyariwa mpakha ole ookiserya oyariwa. 11 Mulipa onihottha maluku, ohaana olepa masina awo a anamwane a Isarayeli vamalukuni-vo manli, ntoko siisaale enilempwa aya eseelu.+ Nuumala-vo, murume wiira maluku awo eheliwe mwiivareleloni sa eweero. 12 Maluku awo manli ahaana oheliwa mmakhatani, opuro onilupanyiwa aya epantta ya ohoolo ni ya ottuli ya eefodi, wiira anamwane a Isarayeli+ yuupuweliweke. Aroni onrowa oteexaka masina awo mmakhatani mwawe, ohoolo wa Yehova, wiira aIsarayeli yuupuweliweke. 13 Mpake ivarelelo sa eweero, 14 ni mpake ikwirinti piili sa eweero yooreerexa, soorithiwa ntoko mukhoyi.+ Ikwirinti iyo soorithiwa mulupanye ni ivarelelo.+

15 “Mmurume mulipa-ooxora wiira opake murupa wa vapeeto warumeeliwa wiira esuweliwe etthu Muluku aaphavela awe.+ Murupa owo, opakiwe siisaale ntoko eefodi, erumeeliwaka eweero, nliinya nooripelela, ekuwo ya ekoore violeeta, ekuwo yooxeerya ni eliinyu yooreerexa yoorithiwa.+ 16 Murupa owo wakhuniwa vale, ipantta saya sootheene silikaneke. Wunnuwa waya ohaana okhala wa mphimo wa ntata nimosa.* 17 Vamurupani-vo muhele iliinya ixexe sa maluku. Eliinya yoopacerya, muhele nluku rupi, topaasio ni esmeralda. 18 Eliinya ya nenli, muhele nluku turkesa, safira ni xaspe. 19 Eliinya ya neeraru, muhele nluku nniihaniwa leexemi,* aakata ni ametista. 20 Eliinya ya neexexe, muhele nluku nniihaniwa krisoolito, oonikisi ni xade. Maluku awo ahaana oheliwa mwiivareleloni sa eweero. 21 Maluku awo anrowa othoonyeryaka masina a anamwane 12 a Isarayeli. Khula nluku nihaana ohotthiwa ntoko enihotthiwa aya eseelu. Khula nsina ninrowa othoonyeryaka nihimo nimosa na mahimo 12 a Isarayeli.

22 “Mpake ikwirinti soorithiwa saalikana ni ikwirinti sa eweero yooreerexa,+ muhele vamurupani wa vapeeto. 23 Mwaapake anela anli a eweero para murupa wa vapeeto, mwaahele anela awo anli ikantu piili sa osulu sa murupa owo. 24 Muhele ikwirinti piili sa eweero yoorithiwa mwaanelani ari ikantu piili sa osulu sa murupa owo. 25 Iponta piili sa ikwirinti iyo mukweceerye mwiivareleloni piili, seiyo siri mmakhatani mwa eefodi, mpantta wa ohoolo. 26 Mwaapake anela anli a eweero, mwaahele ikantu piili siri mpantta wa muhina wa murupa wa vapeeto, oniwehana ni eefodi.+ 27 Mwaapake-tho anela anli a eweero, mwaahele ohoolo wa eefodi, vathi va makhata a eefodi eyo, waattamela opuro enilupanyiwa aya, vasulu va musako wa eefodi.+ 28 Murupa wa vapeeto olipihiwe ni mukhoyi wooripelela. Mukhoyi owo otthukweleliwe anela a murupa wa vapeeto ni anela a eefodi. Siiso, murupa owo onoolipa va eefodini, vasulu va musako wooxoriwa.

29 “Okathi Aroni onrowa awe okelaka Nipuro Noowaarya, owo onookuxaka vapeeto vawe masina a anamwane a Isarayeli, vamurupani wa vapeeto waarumeeliwa wiira esuweliwe etthu Muluku aaphavela awe. Siiso, aIsarayeli anrowa wuupuweliwaka mahiku ootheene ohoolo wa Yehova. 30 Murupa wa vapeeto para ophukela, mmuhele Urimi ni Tumimi.*+ Urimi ni Tumimi owo, ohaana okhalaka vapeeto va Aroni, okathi onrowa awe okumanaka ni Yehova. Okathi wootheene Aroni onrowa awe okumanaka ni Yehova, owo ohaana okuxa vapeeto vawe, itthu iyo sinrowa orumeeliwaka wiira siphukiweke milattu sa aisarayeli.

31 “Mpake nlaya nihirina miyoono, ninrowa owariwaka muhina mwa eefodi. Nlaya nlo nootheene nihaana opakiwa ni nliinya nooripelela.+ 32 Osulu wa nlaya nlo, ohaana othaliwa wiira ekhale exiko. Vano, mulipa-oottottha ohaana ottotthela mukerekhere mwa exiko eyo, elikaneke ni exiko ya ekuleti ya eyuuma,* wiira ehikhereye. 33 Vathi va nlaya nlo, mpake itthu sinlikana ni mihokorokho,* murumeelaka nliinya nooripelela, ekuwo ya ekoore violeeta ni ekuwo yooxeerya. Murukurerihe mihokorokho iyo nlaya nootheene. Mpake-tho isiinu sa eweero. Iyo sivirikanyihiweke ni mihokorokho iye. 34 Muhaana ovirikanyihaka esiinu emosa ya eweero ni muhokorokho mmosa, esiinu emosa ya eweero ni muhokorokho mmosa, murukurerihaka vathi va nlaya nootheene nihirina miyoono. 35 Aroni ohaana owara nlaya nlo, wiira okirumeeleke. Vano oruma wa isiinu iyo, onrowa wiiwanyeyaka okathi Aroni onrowa awe okelaka Nipuro Noowaarya wiira akumane ni Yehova ni okhumaka nipuro nlo. Siiso, owo khonrowa okhwa.+

36 “Muhaana opaka elaamina yoowaarya ya eweero yooreerexa. Nto valaaminani-vo, mulepe ntoko enilempwa aya eseelu, ni moolumo ani: ‘Yehova+ toowaarya’. 37 Mutthukwelele elaamina eyo vanleesoni ni nliinya nooripelela. Ekhaleke epantta ya ohoolo ya nleeso nlo.+ 38 Elaamina eyo enrowa okhalaka vayuuci va Aroni. Nave, Aroni onimwaakhulaka vakhala wiira ohaavo mutthu ohirumenle saana itthu soowaarya,+ seiyo aisarayeli anireeriha aya wiira anvahe Muluku. Elaamina eyo ehaana okhalaka vayuuci va Aroni okathi wootheene, wiira Yehova oweemererye atthu awo.

39 “Mpake nlaya nootteela na xadrexi na eliinyu yooreerexa, mpake nleeso na eliinyu yooreerexa, ni mpake musako wooxoriwa.+

40 “Nave-tho mwaapakele anaawe Aroni+ malaya, misako, ni maleeso. Sootheene iyo sihaana okhala soowaarya ni sooreera, wiira attittimiheyeke.+ 41 Muhaana onwariha itthu iyo munninyu Aroni, vamosa ni anaawe. Nave nwiitthele makhura,+ mwaathanle,*+ ni mwaareerihe, wiira akhale anamukuttho aka. 42 Nave-tho, mwaapakele akaputtula* wiira yaawareke muhina.+ Akaputtula awo akhumeke muyuununi mpakha mutarani. 43 Aroni ni anaaya ahaana waawara akaputtula awo okathi anikela aya mutentani mwa muthukumano, aahiiso okathi anaattamela aya valtaari wiira evareke muteko Nipuro Noowaarya. Siiso, khanrowa okhalana mulattu ni khanrowa okhwa. Nlamulo nla ti na mahiku ootheene para Aroni ni osuulu aya.

29 “Etthu mukhanle anyu oopaka wiira mmureerihe Aroni ni anaawe wiira akhale anamukuttho aka, tiila: Mukuxe epooyi emosa, ni ipwittipwitthi piili+ soohirakala. 2 Mukuxe-tho iphaawu soohiheliwa eferemento, ni iphaawu soohiheliwa eferemento siheliwe makhura, seiyo sipakiwe ntoko anela, ni iphaawu soohiheliwa eferemento soophapateya ni soottihiwe makhura.+ Mpake iphaawu iyo murumeelaka otthu* wa etiriku wooreerexa. 3 Muhele musestoni, mukiruuhele muhenle ene musestoni-mmo.+ Mukiruuhele-tho epooyi ele emosa ni ipwittipwitthi iye piili.

4 “Mmuroihe Aroni ni anaawe waattamela mukhora wa etenta* ya muthukumano,+ ni mwaarapihe.*+ 5 Nuumala-vo, munwarihe Aroni nlaya+ noorakama, nlaya na eefodi noohikhalana miyoono, eefodi, ni murupa wa vapeeto. Nave mmutthukwelele muyuununi+ mwawe musako wa eefodi. 6 Munwarihe nleeso vamuru ni muhele vanleesoni-vo+ elaamina yoowaarya ya eweero.* 7 Nave mukuxe makhura+ oowaarya mmuyiiherye+ vamuru vawe wiira mmukhalihe namukuttho.

8 “Vano nwiihane anaawe Aroni, mwaawarihe malaya+ oorakama. 9 Munwarihe musako Aroni ni anaawe, ni mwaawarihe maleeso aya. Alopwana ala ni osuulu aya anrowa okhalaka anamukuttho. Nla nlamulo na mahiku ootheene.+ Ela ti enamuna munrowa anyu omuthanla Aroni ni anaawe wiira akhale anamukuttho.*+

10 “Vano, muruuhe epooyi ele ohoolo wa etenta* ya muthukumano, nto Aroni ni anaawe yiixaatherye matata aya vamuru+ va epooyi eyo. 11 Muhite epooyi eyo ohoolo wa Yehova, vamukhora va etenta* ya muthukumano.+ 12 Munaanihe ekatha anyu mphomeni mwa epooyi eyo, ni muhele ephome eyo vamanyakani a altaari.+ Nave ephome yootheene ehanle muyiiherye mukerekhere mwa altaari.+ 13 Mukuxe ekortuura+ yootheene enrukurerya marupo, ni ekortuura enimurukurerya hapa, ni isyo soopiili ni ekortuura eri vamosa ni isyo iyo, mpahe wiira okhumeke mwiixi valtaari.+ 14 Masi ethayi ya epooyi eyo, vamosa ni esapala aya ni mavi aya, mwapahe ota wa muttetthe. Eyo yoovaha para oleveleliwa etampi.

15 “Mukuxe epwittipwitthi emosa, nto Aroni ni anaawe yiixaatherye matata aya vamuru va epwittipwitthi eyo.+ 16 Muhite epwittipwitthi eyo, nto ephome aya mutathele ipantte sootheene sa altaari.+ 17 Muthikilele epwittipwitthi eyo, murapihe marupo aya+ ni metto saya, ni mwaatalele valtaari enama eyo ethikileliwe. Nto, epetaaso emosa ewehaneke ni epetaaso ekina, okhuma waametto mpakha waamuru. 18 Mpahe epwittipwitthi yootheene, wiira okhumeke mwiixi valtaari. Eyo yoovaha para opahiwa enivahiwa Yehova, yoowunkhela saana.*+ Eyo yoovaha yoopahiwa enivahiwa Yehova.

19 “Nuumala-vo, mukuxe epwittipwitthi ekina, nto Aroni ni anaawe yiixaatherye matata aya vamuru va epwittipwitthi eyo.+ 20 Muhite epwittipwitthi eyo, mukuxe ephome aya vakhaani, muttikitthele vathi va niyaru noolopwana na Aroni ni vathi va maaru oolopwana a anaawe. Nave-tho, muttikitthele ephome ekatha aya yuulupale ya ntata noolopwana, ni elipwi aya yuulupale ya nnawu naya noolopwana. Mutathele ephome ipantta sootheene sa altaari. 21 Mukuxe ephome vakhaani eri valtaari, ni makhura oowaarya,+ mmutathele Aroni ni malaya awe, ni mwaatathele anaawe Aroni ni malaya aya. Siiso, malaya awe Aroni ni malaya aya anaawe, anookhalihiwa oowaarya.+

22 “Mukumihe ekortuura ya epwittipwitthi eyo, eyo piiyo, mwiila wooneneva, ekortuura yootheene enrukurerya marupo, ni ekortuura enimurukurerya hapa ni isyo soopiili, ni ekortuura eri vamosa ni isyo iyo,+ ni mwetto woolopwana, okhala wiira eyo epwittipwitthi enivahiwa okathi anithanliwa aya+ anamukuttho. 23 Nave-tho, mukuxe ephaawu emosa yoovilikeya, ni ephaawu eri ntoko anela yoowoottihiwa makhura, ni ephaawu emosa yoophapateya, seiyo siri musestoni mwa iphaawu soohiheliwa eferemento. Esestu eyo eri ohoolo wa Yehova. 24 Muhele itthu iyo sootheene mmatatani mwa Aroni ni mmatatani mwa anaawe. Awo ahaana weettiha itthu iyo aroihaka ohoolo ni ottuli, ntoko yoovaha eneettihiwa ohoolo wa Yehova. 25 Nuumala-vo, mukuxe itthu iyo mmatatani mwaya ni mwapahe valtaari, vasulu va yoovaha para opahiwa, wiira sinkheleke saana* ohoolo wa Yehova. Eyo yoovaha yoopahiwa enivahiwa Yehova.

26 “Vano, mukuxe epeeto ya epwittipwitthi enivahiwa okathi anithanliwa aya+ anamukuttho, yeeyo enivahiwa mwaha wa Aroni, mweettiheke muroihaka ohoolo ni ottuli, ntoko yoovaha eneettihiwa ohoolo wa Yehova. Eyo ti epantta ya enama munrowa anyu ovahiwa. 27 Mureerihe epeeto ya yoovaha yeettihiwa, ni mwetto wa epantta ereeriheliwe Muluku, yeeyo yeettihiwa, ni yaahavuliwe wa mwaapwittipwitthi aavahiwa okathi Aroni ni anaawe yaakhalihiwa aya+ anamukuttho. 28 Ela epantta ereeriheliwe Muluku, enrowa ovahiwaka Aroni ni anaawe. Nna nlamulo na mahiku ootheene aisarayeli anrowa aya weettelaka. Nave enrowa okhala epantta ereeriheliwe Muluku aisarayeli+ anrowa aya onvahaka Yehova, okathi anrowa aya ovahaka mikuttho saya sa opatthani.+

29 “Malaya oowaarya+ a Aroni anrowa owariwaka ni anaawe,+ yaawo anrowa omuranttela, okathi anrowa aya oyiiheriwa makhura ni okhalihiwa anamukuttho. 30 Mwaana mmosa-mmosa a Aroni onrowa omuranttelaka ntoko namukuttho, ohaana owaraka malaya awe mahiku 7,+ okathi onrowa awe mutentani* mwa muthukumano wiira avareke muteko nipuro noowaarya.

31 “Mukuxe enama ya mwaapwittipwitthi aavahiwa okathi Aroni ni anaawe yaakhalihiwe aya anamukuttho, mmwaapeye nipuro noowaarya.+ 32 Aroni ni anaawe anrowa okhuuraka+ enama ya mwaapwittipwitthi owo, vamosa ni ephaawu eri musestoni, ari ene vamukhora va etenta* ya muthukumano. 33 Awo ahaana okhuura itthu iyo saavahiwe wiira aleveleliwe itampi saya, okathi yaathanliwe aya okhala anamukuttho* ni yaareerihiwe aya. Masi mutthu ohikhanle namukuttho* ohikhuure itthu iyo, okhala wiira ti sooreerihiwa.+ 34 Akhala wiira enoohala mpakha mmeeloni mwaya ephaawu ni enama sinivahiwa okathi Aroni ni anaawe anikhalihiwa aya anamukuttho, muhaana opaha ni mooro.+ Itthu iyo sihikhuuriwe, okhala wiira ti sooreerihiwa.

35 “Mmwiirihe siiso Aroni ni anaawe, muttharaka itthu sootheene koorumalyaakani. Anoovira mahiku 7 mwaakhalihaka anamukuttho.*+ 36 Khula nihiku, muhaana ovekela oleveleliwa itampi nvahaka epooyi ya yoovaha para oleveleliwa etampi. Siiso, nyuwo munoomureeriha altaari owo. Nave-tho, muhaana oyiiherya makhura valtaari wiira mmureerihe.+ 37 Anoovira mahiku 7 wiira mmurerihe altaari. Nave muhaana omureeriha wiira okhale altaari oowaaryexa.+ Khula mutthu oninvara altaari owo, ohaana okhala ooreerihiwa.

38 “Etthu mukhanle anyu oovahaka valtaari, tiila: khula nihiku nvaheke ipwittipwitthi piili saamukhaani sa eyaakha emosa, voohihiyererya.+ 39 Epwittipwitthi emosa yaamukhaani nvaheke voosiisu, epwittipwitthi ekina nvaheke nuumala nsuwa okela.*+ 40 Okathi munivaha anyu epwittipwitthi yoopacerya, nvaheke ni mpantta wa namuloko wa eefa* emosa ya otthu wooreerexa, wootakaahiwa ni mpantta wa neexexe wa ehiini* emosa ya makhura ooreerexa a olivera, ni mpantta wa neexexe wa ehiini emosa ya eviinyu. Nto eviinyu eyo enrowa okhala ntoko yoovaha eniwuriwa. 41 Nvaheke epwittipwitthi ya nenli nuumala nsuwa okela,* vamosa ni otthu wa ipyo simosa-ru ni soovaha siniwuriwa, ntoko siniira anyu voosiisu. Ela yoovaha yoopahiwa enivahiwa Yehova. Nto wunkhela* waya onrowa omusivelaka. 42 Yoovaha ela para opahiwa, ekhaleke para mahiku ootheene. Ehaana ovahiwaka ni maloko anyu ootheene, vamukhora va etenta* ya muthukumano, ohoolo wa Yehova, vaavo kinrowa aka okumanaka ni nyuwo, wiira kilavuleke ni nyuwo.+

43 “Miyo kinimwaakhumelela aisarayeli vaavale. Nto, opuro ole onooreerihiwa ni ovuwa waka.+ 44 Kinooreeriha etenta* ya muthukumano ni kinoomureeriha altaari. Nave kinoomureeriha Aroni ni anaawe+ wiira akhale anamukuttho aka. 45 Kinookhalaka ni aisarayeli, nave kinrowa okhala Muluku aya.+ 46 Awo anoosuwela tthiri wiira miyo ka Yehova Muluku aya, yoomi kaakuminhe elapo ya wExiitu wiira kikhaleke naawo.+ Miyo ka Yehova, Muluku aya.

30 “Mumpake altaari wiira nipahiweke-vo nsenso.*+ Altaari owo okhale a matera a akaasiya.+ 2 Ipantte sooxeexe sa altaari owo sihaana olikanaka. Orakama waya waari etthu yoowiiraka nimeya na emeeturu.* Wunnuwa waya waari etthu yoowiiraka nimeya na emeeturu. Orakamela waya musulu okhaleke etthu yoowiiraka emeeturu emosa.* Manyaka a altaari awo ahaana opatthiwa vaavo.+ 3 Mmusirikele altaari owo ni eweero yooreerexa vasulu vawe, ipantte sootheene sooxeexe ni manyaka awe. Nave-tho, mumpake aaro a eweero onimurukurerya altaari owo ootheene. 4 Nave-tho, mumpakele altaari owo ipulseera piili sa eweero, vathi va aaro. Ipulseera iyo sikhale ipantte piili, khula epantte ipulseera piili. Ipulseera iyo sinrowa ovarelelaka ikopo sinrowa oteexaniwaka altaari owo. 5 Ikopo iyo mpake sa matera a akaasiya ni musirikele ni eweero. 6 Mumpwehe altaari owo ohoolo wa ekortiina ya Nipuro Noowaaryexa, wiira aattamane ni Nivuku na Onamoona.+ Miyo kinrowa wookhumelelakani+ vasulu va etampa ya Nivuku na Onamoona.

7 “Khula voosiisu, okathi Aroni+ onrowa awe okhapelelaka ixamaniiya,+ owo onrowa opahaka nsenso noowunkhela*+ vasulu va altaari.+ 8 Nave-tho, nuumala nsuwa okela,* okathi Aroni onrowa awe opattihaka ixamaniiya, owo onoopahaka nsenso. Nsenso nlo nihaana opaheriwaka Yehova okathi wootheene, okhuma niinaano-va mpakha ohoolo. 9 Valtaari-vo, muhipahe nsenso noohireerela,+ nnakhala muhivahe yoovaha para opahiwa, aahiiso yoovaha ya ipyo. Nave-tho, muhiyiiherye-vo yoovaha eniwuriwa. 10 Aroni ohaana ottikitthela manyaka a altaari ni ephome vakhaani ya mwaamunama aavahiwa wiira atthu aleveleliwe etampi,+ wiira omureerihe altaari owo. Ohaana opaka eyo ekwaha emosa vamwaakhani,+ okhuma niinaano-va orowa ohoolo, wiira omureerihe altaari. Altaari owo toowaaryexa para Yehova”.

11 Vano, Yehova aahimuleela Moise wiira: 12 “Khula okathi munaalepa anyu ni waakontari aisarayeli+ axilopwana, khula mmosa ohaana onvaha Yehova yoowoopola, iirelaka oliverya okumi awe okathi yoowo onirepeliwa awe. Yiira siiso, khenrowa waakhumelela ehukhumu okathi anrowa aya olempwaka. 13 Ootheene ale alempwale ahaana ovaha nimeya na exeekele,* attharaka exeekele* ya nipuro noowaarya.+ Ikheera* 20 saalikana ni exeekele emosa. Yehova+ aahaana ovahiwa nimeya na exeekele. 14 Ootheene yaale arepeliwe, okhuma iyaakha 20 orowa ohoolo, ahaana onvaha Yehova etthu anivekeliwa aya.+ 15 Khula mmosa ohaana onvaha Yehova nimeya na exeekele* wiira oliverye okumi awe. Thaaciri ohivahe vanceene, nnakhala masikhini ohivahe vakhaani. 16 Mwaakhele musurukhu owo wa eparatha aisarayeli anivaha aya wiira aliverye ikumi saya, nvahererye wiira orumeeliweke muteko onivariwa mutentani* mwa muthukumano. Musurukhu owo onoowiirihaka aisarayeli wuupuweliwaka ni Yehova, wiira aliverye ikumi saya”.

17 Yehova aahimuleela-tho Moise wiira: 18 “Mpake epasiya ya ekoopiri ni metto saya sa ekoopiri wiira anamukuttho yiirapiheke.+ Mpwehe eriyari ya etenta* ya muthukumano ni altaari. Nuumala-vo, muhele-mo+ maasi. 19 Aroni ni anaawe anrowa onyawaka ni orapiha inawu saya vaavo.+ 20 Okathi awo anrowa aya okelaka mutentani* mwa muthukumano, aahiiso omwaattamela altaari wiira avareke muteko ni ampaheryeke mikuttho Yehova, awo ahaana onyawa ni orapiha inawu saya wiira ehikhwe. 21 Awo ahaana onyawa ni orapiha inawu saya wiira ehikhwe. Nla nlamulo na mahiku ootheene para awosa, eyo piiyo, Aroni ni osuulu awe, ni maloko aya anrowa okhumelela ohoolo”.+

22 Yehova aahilavula-tho ni Moise iiraka: 23 “Vano mukuxe itthu iya soowunkhela vanceene: Ixeekele 500 sa miira oowuuma, ni ixeekele 250 sa ekanela yoowunkhela, ni ixeekele 250 sa malaxi oowunkhela aniihaniwa kaalamu, 24 ni ixeekele 500 sa muthinto mukina wa ekanela.* Itthu iyo sihaana ophimmwa ni exeekele enirumeeliwa nipuro noowaarya.+ Nave-tho mukuxe ehiini* emosa ya makhura a olivera. 25 Itthu iyo sootheene mpakele makhura oowaarya para wiittheliwaka atthu oothanliwa. Makhura awo ahaana opakiwa saana.+ Awo ahaana okhala makhura oowaarya anrowa wiittheliwaka atthu oothanliwa.

26 “Murumeele makhura awo oowaarya wiira muyiiherye etenta* ya muthukumano+ ni Nivuku na Onamoona, 27 ni meesa vamosa ni itthu sootheene sinirumeeliwa vameesa-vo, ni muthuko, ni itthu sootheene sinirumeeliwa ni muthuko owo, ni altaari a nsenso, 28 ni altaari a soovaha para opahiwa ni itthu sootheene sinirumeeliwa valtaari-vo, ni epasiya ni metto saya. 29 Muhaana oreeriha itthu iyo wiira sikhale soowaaryexa.+ Khula mutthu onivara itthu iyo ohaana okhala ooreerihiwa.+ 30 Nave-tho mmwiitthele makhura Aroni+ ni anaawe,+ ni mwaareerihe wiira ekhale anamukuttho aka.+

31 “Mwaaleele aisarayeli wiira: ‘Makhura awo oowaarya aniyiiheriwa atthu oothanliwa, anrowa okhalaka oowaarya para miyo okathi wootheene, okhuma niinaano-va orowa ohoolo.+ 32 Ohikhale mutthu onrowa wootta makhura awo. Nnakhala muhipake makhura ntoko awo. Awo makhura oowaarya. Muhaana othokoreryaka okhala etthu yoowaarya. 33 Mutthu yoole onrowa opaka makhura ntoko awo, ni onrowa omoottiha mutthu ohikhanle namukuttho,* ohaana wiiviwa’”.+

34 Yehova aahitthikela-tho omuleela Moise iiraka: “Mukuxe itthu iya soowunkhela:+ esenya yoowunkhela, onixa,* kalbanu* oowunkhela, ni nsenso nootteela nooreerexa. Sootheene iya sihaana okhala mwaattelo mmosa-ru. 35 Mutakaahe itthu iyo wiira mpake nsenso.+ Nsenso nlo noowunkhela nihaana opakiwa saana. Nihaana oheliwa maakha,+ nikhale nooreerexa ni noowaarya. 36 Muhavule vakhaani, muxile wiira okhale otthu wooxileya saana. Nuumala-vo, muhavule vakhaani mpwehe ohoolo wa Nivuku na Onamoona, nenno niri mutentani mwa muthukumano, memmo kinrowa aka wookhumelelani. Muhaana othokorerya nsenso nla okhala etthu yoowaaryexa para nyuwo. 37 Muhipake nsenso ntoko nla+ wiira murumeeleke, okhala wiira etthu yoowaarya para Yehova. 38 Mutthu yoole onrowa opaka nsenso ntoko nla, wiira ooneke wunkhela, ohaana wiiviwa”.

31 Yehova aahitthikela-tho olavula ni Moise iiraka: 2 “Mwiiwe: koomuthanla Besaleli+ mwaana a Uri, musulwaawe Huri, a nihimo na Yuda.+ 3 Kinonvaha ikuru saka, wiira okhalaneke miruku, ankhili ni osuweleke ovara miteko sootheene, 4 ni oweryeke otesenyari saana itthu onrowa awe opakaka, osuweleke ovarela muteko eweero, eparatha, ekoopiri, 5 oweryeke othikila ni ohottha maluku+ ni opaka khula etthu enipakiwa ni matera.+ 6 Nave-tho, koomuthanla Oholiyabi,+ mwaana a Ahisamaki, a nihimo na Dani, wiira omukhaliheryeke. Ootheene ale anisuwela ovara saana miteko saya, kinimwaavaha ankhili vamurimani vaya, wiira aweryeke ovara miteko iya sootheene koorumalyaakani:+ 7 Etenta* ya muthukumano,+ Nivuku na Onamoona+ ni etampa aya,+ ni itthu sootheene sinirumeeliwa mutentani, 8 ni meesa,+ ni itthu sootheene sinirumeeliwa vameesa-vo,+ ni muthuko wa eweero yooreerexa, ni itthu sootheene siri vamuthukoni-vo, ni altaari a nsenso,*+ 9 ni altaari a yoovaha para opahiwa,+ ni itthu sootheene sinirumeeliwa valtaarini-vo, ni epasiya ni metto saya,+ 10 ni malaya ooxoriwa saana para namukuttho Aroni, ni malaya para anaawe wiira awareke yaavaraka muteko wa onamukuttho,+ 11 ni makhura oowaarya aniittheliwa atthu oothanliwa, ni nsenso noowunkhela para nipuro noowaarya+ na etemplo. Awo ahaana opaka itthu sootheene koorumalyaakani”.

12 Yehova aahimuleela-tho Moise wiira: 13 “Mwaaleele aisarayeli wiira: ‘Muhihiye otthara nlamulo naka na esaabadu,+ okhala wiira eyo ethoonyeryo ya mahiku ootheene, para miyo ni nyuwo, wiira musuwele wiira miyo Yehova, kihoothanlani wiira mukirumeeleke. 14 Muhihiye weettela nlamulo naka na esaabadu, okhala wiira nlo nihiku noowaarya para nyuwo.+ Mutthu yoole ohinrowa wiiwelela nlamulo naka na esaabadu ohaana wiiviwa. Akhala mutthu onrowa ovara muteko nihiku nno, mutthu owo ohaana wiiviwa munlokoni mwanyu.+ 15 Nvareke muteko mpakha mahiku 6, masi nihiku na neethanu nenli, mphumuryeke+ okhala wiira esaabadu. Nno nihiku noowaarya para Yehova. Mutthu yoole onrowa ovara muteko nihiku na saabadu, ohaana wiiviwa. 16 Aisarayeli ahaana wiiwelela nlamulo naka na esaabadu. Awo ahaana wuupuwelaka nihiku na saabadu, okhuma niinaano-va orowa ohoolo. Nla nivarihano na mahiku ootheene. 17 Esaabadu esinaale ya mahiku ootheene para miyo ni aisarayeli,+ okhala wiira Yehova oopaka erimu ni elapo ya vathi mahiku 6. Nto nihiku na neethanu nenli owo aahiphumurya ohakalanle ene+ ni muteko awe’”.

18 Nuumala olavula ni Moise vamwaako Sinayi, Muluku aahinvaha Moise mapawe manli a Onamoona+ yaalempwale moolumo awe. Yaari mapawe a maluku, yaawo Muluku aalempe awe ni ekatha awe.+

32 Atthu yaanoona wiira Moise aanipisa okhuruwa vamwaako.+ Tivo yaahithukumana vaari awe Aroni, anamuleela wiira: “Nrowe, mwanipakele muluku wiira onihooleleke,+ okhala wiira khaninsuwela etthu emwiiranenle Moise ole, yoowo onikuminhe elapo ya wExiitu”. 2 Nto Aroni aahaaleela wiira: “Mukuxe ipirinku sa eweero+ awanre aya axaarinyu, aniinyu axilopwana, ni aniinyu axithiyana, mukiruuhele”. 3 Vano, atthu ootheene yaahirula ipirinku sa eweero yaawanre aya, anamuroihela Aroni. 4 Nuumala-vo, Aroni aahikuxa eweero yaaruuhale aya, opaka elatarato* ya epooyi,+ orumeelaka ekaruma emosa. Nto atthu yaahipacerya ohimya wiira: “Nyuwo Isarayeli, ola Muluku anyu, yoowo ookuminheni elapo ya wExiitu”.+

5 Okathi Aroni aawenhe awe etthu ele, owo aahimuteka altaari ohoolo wa elatarato eyo. Nuumala-vo, Aroni aahilaleya iiraka: “Meelo enookhala efesta para Yehova”. 6 Mmeeloni mwaya, atthu yaahivenya voosiisu, anavaha soovaha para opahiwa ni mikuttho sa opatthani. Nuumala-vo, atthu yaahikilaathi analya ni anawurya. Vano atthu awo yaahivenya anatthapa.+

7 Nto Yehova aahimuleela Moise wiira: “Mukhuruwele vathi vale, okhala wiira atthu anyu, mwaakuminhe anyu wExiitu, aapaka etthu yootakhala.+ 8 Awo aahapuwa voohipisa ephiro kaarumme aka otthara.+ Aapaka elatarato* ya epooyi, anakokhorela ni anavaha mukuttho, yiiraka: ‘Nyuwo Isarayeli, ola Muluku anyu, yoowo ookuminheni elapo ya wExiitu’”. 9 Yehova aahimuleela wiira: “Kihoona wiira atthu ala khaniphavela wiiwa.+ 10 Koonanariwa vanceene! Mukihiye kaamalamalihe atthu ala. Nuumala-vo, kinimookhalihani nyuwo nloko noowaatta”.+

11 Vano Moise, aahimuxonttela Yehova Muluku awe,+ iiraka: “Khoo Yehova, muhinanariwe ni atthu anyu, yaawo mwaakuminhe anyu elapo ya wExiitu ni owerya wanyu wuulupale.+ 12 Mwiira siiso, atthu a wExiitu anrowa ohimyaka wiira: ‘Muluku aya ohaakumiha elapo ela, ophavelaka owiiriha etthu yootakhala. Owo aaphavela owiiva omwaako, ni waamalamaliha mulaponi mootheene’.+ Muhiye waaviruwela atthu anyu, nave muturuke muupuwelo anyu wiira muhaakumiherye etthu yootakhala atthu anyu. 13 Nwuupuweleke arumeyi anyu Abrahamu, Isaakhi, ni Isarayeli, yaawo mulamphe anyu murumolaka nsina nanyu, mwiiraka: ‘Miyo kinimuncererya osuulu anyu, olikaneke ni itheneeri siri wiirimu.+ Nave kinoovaha osuulu anyu elapo ela yootheene kiwoonihenryaakani, wiira ekhale yawaya mahiku ootheene’”.+

14 Siiso, Yehova aahituruka muupuwelo awe woowi aarowa waakumiherya maxakha atthu awe.+

15 Moise aahikhuruwa vamwaako, okunxe ene mmatatani mwawe+ mapawe manli a Onamoona.+ Mapawe awo yaalempwale ninno-ninno, eyo piiyo, yaalempwale ohoolo ni ottuli. 16 Muluku mwaneene taapanke mapawe awo,+ ni taalempe moolumo awo. 17 Okathi Yooxuuwa aawiiwale awe atthu anyakulaka omaxaxani, aahimuleela Moise wiira: “Kinniiwa onyakula ntoko wa atthu aniwana ekhotto”. 18 Masi Moise aahimuleela wiira:

19 Okathi Moise aattamenle awe omaxaxani, aahoona epooyi+ ni aahaaweha atthu yiinaka. Vano, owo aahinanariwa vanceene, ni aahirihela vathi mapawe yaari mmatatani mwawe, awo apwexakaseya khumorela mukerekhere mwa mwaako.+ 20 Moise aahikuxa epooyi ele yaapanke aya, aahipaha vaikho, khunyakatta mpakha opakeya ntthupi.+ Nuumala-vo, aahiitthela mmaasini, ni aahiwiiriha aisarayeli owurya maasi awo.+ 21 Vano Moise aahimukoha Aroni wiira: “Xeeni muhalaka owiiriha atthu ala opaka etampi ela yuulupale?” 22 Aroni aahimwaakhula oriki: “Pwiyaka, muhinanariwe. Nyuwo moosuwela oratteene wiira atthu ala waasivela opaka itthu sootakhala.+ 23 Awo yaakivekenle wiira: ‘Munipakele muluku wiira onihooleleke, okhala wiira khaninsuwela etthu emwiiranenle Moise ole, yoowo onikuminhe elapo ya wExiitu’.+ 24 Tivo, miyo kaahaaleela wiira: ‘Khula mutthu orina itthu sa eweero, orule ni okivahererye’. Nuumala-vo, kaahirihela itthu iyo vaikho, khupakeya epooyi”.

25 Moise aahoona wiira atthu ale khiyaakhoottiheya, okhala wiira Aroni khaakhootihenrye. Tivonto, awo yaahuuliwa muru ohoolo wa awanani aya. 26 Nto Moise aahirowa omaxaxani, eemela vamukhora, onalavula oriki: “Tani animukhaliherya Yehova? Arwe vari aka!”+ Siiso, atthu ootheene a nihimo na Levi yaahithukumana vaari Moise. 27 Vano Moise aahaaleela wiira: “Yehova, Muluku a Isarayeli, ohimmye wiira: ‘Khula mutthu okuxe espaata* awe, ovira-vire omaxaxani wootheene, omwiive munnawe, namwaattamanani awe, ni mpatthani awe’”.+ 28 Alevi yaahipaka ele Moise aarumme awe. Nihiku nle, yaahiiviwa alopwana oowiiraka 3.000. 29 Vano Moise aahihimya wiira: “Mukhale oolikana ene* wiira nvare muteko wa Yehova, okhala wiira khula mmosa a nyuwo oomwiiva mwanawe mwaamulopwana ni munnawe.+ Mwaha wa yeeyo, Muluku onimooreelihani olelo”.+

30 Mmeeloni mwaya, Moise aahaaleela atthu ale wiira: “Nyuwosa moopaka etampi yuulupalexa. Vano kinoowela vamwaako kalavule ni Yehova, wiira kiwehe vakhala wiira kinoowerya onvekela wiira muleveleliwe etampi anyu”.+ 31 Tivonto, Moise aahitthikela wa Yehova, onahimya wiira: “Atthu ale aapaka etampi yuulupale tthiri! Awo ahiipakela muluku a eweero!+ 32 Nto, mwaphavela vale, mwaalevelele etampi aya.+ Masi mwaahipavele, xontte muttipihe nsina naka muliivuruni mwanyu”.+ 33 Masi Yehova aahimuleela Moise oriki: “Miyo kinrowa ottipiha muliivuruni mwaka nsina na mutthu yoole okitthekenle. 34 Vano, murowe mwaakuxe atthu ale, mwaaroihe opuro koohimenryaakani. Nlaikha naka nnimoohoolani.+ Nihiku kinrowa aka waakoha, kinimwaahukhumu mwaha wa etampi aya”. 35 Nto Yehova aahipacerya waahukhumu atthu ale, mwaha wa epooyi yaapanke aya, eyo piiyo, epooyi Aroni aapanke awe.

33 Yehova aahimuleela-tho Moise wiira: “Mwaakuxe atthu mwaakuminhe anyu elapo ya wExiitu, mwaaroihe elapo kimmanenle aka natiri Abrahamu, Isaakhi, ni Yakobe, kiiraka: ‘Kinoovaha elapo ela+ osuulu anyu’. 2 Kinooruma nlaikha naka orowa ohoolo wanyu+ wiira kiwoomole akanaani, amori, ahiti, aperizi, ahivi, ni ayebusi.+ 3 Murowe elapo yoowaatta eleeti ni oravo.+ Masi miyo nkinrowa ni nyuwo, okhala wiira khamumphavela wiiwa.+ Karowa ni nyuwo, kinimoopwetexani mphironi”.+

4 Atthu yaahiriipiwa murima vanceene, okhala wiira yaahiiwa ehapari ele yootakhala. Awo yaahipacerya wunla, ni khuuvo mutthu aawanre itthu samphwaneliha. 5 Yehova aahimuleela Moise iiraka: “Mwaaleele aisarayeli wiira: ‘Nyuwosa khamuniphavela wiiwa.+ Kaakhanle variyari vanyu okathi vakhaani paahi, kaamoopwetexani.+ Vano, muhiware itthu sinoophwanelihani, kinrowa wiiraka kuupuwelaka etthu kinrowa aka owiirihani’”. 6 Okhuma mwaako Horebi orowa ohoolo, aisarayeli khiyaawanre-tho* itthu saaphwaneliha.

7 Vano Moise aahikuxa etenta* awe eemexa ota wa maxaxa, opuro woorakamela vakhaani ni maxaxa. Owo aahiitthana etenta eyo, okhala etenta ya muthukumano. Khula mutthu aaphavela malakiheryo a Yehova,+ aahaana orowa etenta ele ya muthukumano, yeeyo yaari ota wa maxaxa. 8 Okathi Moise aarowa awe vatentani vale, atthu ootheene yaanivenya ni aneemela vamukhora va etenta aya. Awo yaaninwehexexa Moise mpakha okela mutentani mwawe. 9 Moise okelaka-ru mutentani, neeku+ naanikhuruwa nneemela vamukhora va etenta, okathi Muluku aalavula awe ni Moise.+ 10 Okathi atthu ootheene yaaweha aya neeku neemenle ene vamukhora va etenta ele, khula mutthu aanuurama vatentani vawe mpakha vathi. 11 Yehova aanilavula ni Moise, ntoko siisaale mutthu onilavula awe ni mutthu mukhwaawe owehanaka owiitho.+ Okathi Moise aatthikela awe omaxaxani, Yooxuuwa+ mwaana a Nuuni, murumeyi ni namakhaliherya awe,+ khaakhuma mutentani.

12 Vano Moise aahimwiirela Yehova wiira: “Nyuwo mukilenle wiira: ‘Mwaahoole atthu ala’, masi khamukilenle mutthu onrowa okihoola. Nave-tho, nyuwo moohimya wiira: ‘Kinnoosuwelani oratteene,* ni moohimya-tho wiira mookireerela murima vanceene’. 13 Xontte, akhala wiira mookireerela murima, mukisuwelihe iphiro sanyu,+ wiira koosuweleni ni muhihiye okireerela murima. Nave-tho, muupuweleke wiira nna, nloko nanyu”.+ 14 Muluku* aahihimya wiira: “Miyo mmansaka kinoorowa ni nyuwo+ ni kinimoovahani murettele”.+ 15 Moise aahimuleela wiira: “Akhala wiira nyuwo mmansinyu khamunrowa ni hiyo, weeso muhinikumihe opuro ola”. 16 Mwaahirowe ni hiyo,+ atthu anrowa osuwela sai wiira mookireerela murima, ni muhaareerela murima atthu anyu? Kiira miyo ni atthu anyu noovirikana ni atthu a mulaponi,+ mwaha woowi nyuwo muneetta ni hiyo?”

17 Yehova aahimuleela-tho Moise wiira: “Kinoowiirelani-tho etthu ela munikivekela anyu, okhala wiira kihooreerelani murima vanceene, ni kinnoosuwelani oratteene”.* 18 Moise aahihimya wiira: “Xontte, mukooniherye ovuwa wanyu”. 19 Muluku aahimwaakhula oriki: “Miyo kinoovira ohoolo wanyu, nto nyuwo munimoona oreera waka murima, nave kinimoosuwelihani nsina naka, Yehova.+ Miyo kinrowa omureerela murima ole kiniphavela aka omureerela murima, nave-tho kinrowa ommorela ikharari ole kiniphavela aka ommorela ikharari”.+ 20 Nave aahihimya-tho wiira: “Khamukhanle ooweha owiitho waka, okhala wiira khuuvo mutthu okhanle ooweha owiitho waka, nlelo onakhala mukumi”.

21 Yehova aahihimya-tho wiira: “Wookhala opuro waattamela va kiri aka. Mweemele vasulu va mwala ole”. 22 Okathi ovuwa waka onrowa aya oviraka, kinimoopwehani munikhukhuni mwa mwala ola, ni kinimookhuneelani ni ntata naka, mpakha miyo ovira. 23 Nuumala-vo, kinookumiha ntata naka, ni munooweha ottuli waka. Masi owiitho waka khoniwehiwa”.+

34 Yehova aahimuleela Moise wiira: “Mpake mapawe manli a maluku, anlikana ni ale oopacerya.+ Miyo kinoolepa vamapaweni-vo moolumo kaalempe aka mapawe ale oopacerya,+ yaawo mwaapwenxe anyu.+ 2 Mwiilokiherye wiira meelo voosiisu mwawele vamwaako Sinayi, wiira mwakumane ni miyo vasulu va mwaako.+ 3 Ohikhale mutthu onrowa woottharani, nave ohikhale mutthu mukina onrowa wooniwa vamwaako-vo. Nnakhala ipwittipwitthi aahiiso ipooyi sihilye mukerekhere mwa mwaako owo”.+

4 Vano, Moise aahipaka mapawe manli a maluku yaalikana ni ale oopacerya. Aahivenya voosiisu, owela mwaako Sinayi, ntoko Yehova aamurumalyaawe. Nave aahikuxa mapawe manli a maluku mmatatani mwawe. 5 Nto Yehova aahikhuruwa+ muneekuni, omwaattamela Moise, vano Yehova+ onalavula nsina nawe. 6 Yehova aahivira ohoolo wa Moise, olavulaka so: “Yehova, Yehova! Muluku oomoriwa ikharari+ ni oothunku,+ oopisa onanariwa+ ni onooniherya vanceene ophenta woororomeleya,+ nave itthu sootheene onihimya awe ti seekeekhai.*+ 7 Owo onniwooniherya ophenta woororomeleya atthu a maloko ikonto sene,+ onnaalevelela ale aniira itthu sootakhala, ooveeha ni anatampi.+ Masi, onimwaahukhumu+ atthu ootakhala murima. Nave-tho, onimwaahukhumu axipaapa aya, anaaya, osuulu aya, mpakha osuulu aya wa neeraru ni osuulu aya wa neexexe”.+

8 Moise aahikokhora voowaakuveya, uurama mpakha vathi. 9 Vano aahihimya so: “Khoo Yehova, vakhala wiira mookireerela murima, xontte Yehova murowe ni hiyo,+ nnaamwi niri ene atthu oohiiwelela.+ Nave munilevelele mwaha wa ohiiwelela wahu ni itampi sahu,+ ni munaakhele ntoko atthu anyu”. 10 Yehova aahimwaakhula wiira: “Nla nivarihano kimpaka aka ni nyuwo: Kinoopaka itthu sootikiniha ohoolo wa atthu anyu ootheene, seiyo kihitonko aka opaka* elapo yootheene aahiiso ohoolo wa maloko ootheene.+ Atthu ootheene a maloko makina munrowa anyu okhalaka eriyari aya, animoona miteko saka sootikiniha, okhala wiira kinnipaka miteko sootikiniha para mureerelo anyu”.+

11 “Mukiwiriyane saana etthu kinoorumaakani olelo.+ Kinoowoomola ohoolo wanyu amori, akanaani, ahiti, aperizi, ahivi ni ayebusi.+ 12 Phoole! Muhipake nivarihano ni atthu a elapo munrowa anyu,+ okhala wiira opaka eyo pooti wookumiheryani maxakha.+ 13 Masi mwaapwexakase altaari aya, mpwexakase ipilaari anaakokhorela aya amuluku aya, ni mwiikitthe+ miri soowuuma anikokhorela aya.* 14 Muhimukokhoreleke muluku mukina,+ okhala wiira Yehova oniphavela wiira okokhoreliweke yoowo paahi.* Owo Muluku oniphavela wiira okokhoreliweke yoowo paahi.+ 15 Muhipake nivarihano ni atthu a elapo eyo, okhala wiira okathi anrowa aya waakokhorelaka* amuluku aya+ ni waavahaka mikuttho awo, nyuwo munoolattuliwa, nto munimoolya eyoolya anrowa aya ovahaka mukuttho.+ 16 Nuumala-vo, munimwaakuxa anaaya axithiyana, mwaathelihe aniinyu axilopwana.+ Vano, okathi axithiyana awo anrowa aya waakokhorelaka* amuluku aya, anoowiirihaka aniinyu waakokhorela amuluku awo.+

17 “Muhaapake amuluku a eyuuma+ yoototoxiwa.

18 “Mpakeke Efesta ya Iphaawu Soohiheliwa Eferemento.+ Munrowa okhuuraka iphaawu soohiheliwa eferemento, ntoko koorumalyaakani. Mpakeke efesta eyo mahiku 7, okathi othanleliwe, mweeri wa abibi,*+ okhala wiira nyuwo mwaakhumme wExiitu mweeri yoowo wa abibi.

19 “Anamwane ootheene axilopwana oopacerya oyariwa tawaka.+ Inama sootheene soolopwana soopacerya ototholiwa ti sawaka, ekhale epooyi aahiiso epwittipwitthi.+ 20 Mwakhalana puuru oolopwana oopacerya ototholiwa, muhaana omoopola, nvahaka mukuttho wa epwittipwitthi, nipuro na puuru owo. Mwaahivahe mukuttho wa epwittipwitthi, weeso muhaana omunta exiko puuru owo. Anamwane ootheene axilopwana oopacerya oyariwa+ a nloko nanyu, ahaana woopoliwa. Ohikhale onirwa okumana ni miyo matata-ru.

21 “Nvareke muteko anyu mpakha mahiku 6. Masi nihiku na neethanu nenli, muhaana ophumurya.+ Hata okathi woolima ni okathi woohepha, muhaana ophumurya.

22 “Nave, muhaana opaka Efesta ya Ohepha,* yeeyo munrowa anyu ovahaka etiriku yoopacerya ohemphwa. Nave-tho, wuumalani wa mwaakha+ muhaana opaka Efesta ya Othukumanya.*

23 “Khula mwaakha, alopwana ootheene a nloko nanyu, ahaana orowa okumana ni Pwiya eekeekhai, Yehova, Muluku a Isarayeli,+ ikwaha tthaaru. 24 Kinoowoomola ohoolo wanyu+ atthu a maloko makina, ni kinimuncererya muttetthe anyu. Nave-tho, khuuvo onrowa ophavelaka okuxa elapo anyu, okathi munrowa anyu okumanaka ni Yehova Muluku anyu, ikwaha tthaaru, khula mwaakha.

25 “Okathi munikivaha anyu mukuttho, muhikivaheke ephome vamosa ni ephaawu yooheliwa eferemento.+ Mukuttho onivahiva okathi wa efesta ya Paasikha, ohisukiweke ohiyu wootheene mpakha voosiisu.+

26 “Muhaana oroiha mpaani mwa Yehova, Muluku anyu,+ mihokorokho sanyu soopacerya ottokottha, sootepexa oloka.

“Muhimwaapeye mwaaxaana a epuri muleetini mwa nipele na amamawe”.+

27 Yehova aahimuleela-tho Moise wiira: “Mulepe moolumo ala,+ okhala wiira kinnipaka nivarihano ni nyuwo ni aisarayeli,+ kittharaka moolumo ala”. 28 Moise aahikhala vamwaako ni Yehova mahiku 40, othana ni ohiyu. Khaalyiiye etthu nnakhala khaawunrye maasi.+ Nave, owo* aahilepa vamapaweni a maluku, moolumo a nivarihano nlo, eyo piiyo, Sooruma Muloko.*+

29 Moise aahikhuruwa vamwaako Sinayi, okunxe ene mmatatani mwawe+ mapawe manli a maluku. Okathi aakhurunwe awe vamwaako, Moise khaasuwenle wiira owiitho wawe waanaarya, mwaha woolavula ni Muluku. 30 Okathi Aroni ni aisarayeli ootheene yanwenhe aya Moise, yaahoona wiira owiitho wawe waanaarya, nto yaanoova omwaattamela.+

31 Masi, Moise aahiwiihana. Siiso, Aroni ni makhulupale ootheene a nloko, yaahimwaattamela. Nto Moise aahilavula naawo. 32 Nuumala-vo, aisarayeli ootheene yaahimwaattamela. Vano Moise aahaaleela sooruma sootheene Yehova anvanhe awe vamwaako Sinayi.+ 33 Khula okathi Moise aamala awe olavula naawo, aanikhuneela owiitho wawe+ ni eveewu. 34 Masi okathi Moise aarowa awe okumana ni Yehova wiira olavulane, aanikumiha eveewu, mpakha okathi aakhuma awe.+ Nuumala-vo, owo aanirowa waaleela aisarayeli sooruma aakhenle awe.+ 35 Nto aisarayeli yaanoona wiira owiitho wa Moise waanaarya. Vano Moise aanikhuneela owiitho wawe ni eveewu, mpakha ophiya okathi aarowa awe olavula ni Muluku.+

35 Nuumala-vo, Moise aahithukumanya nloko nootheene na aisarayeli, onaaleela wiira: “Itthu Yehova orumme awe wiira sivariweke,+ tiiya: 2 Nvareke miteko sanyu mahiku 6. Masi nihiku na neethanu nenli, nihaana okhala noowaarya para nyuwo. Ninrowa okhala nihiku na saabadu, nenlo munrowa anyu ophumuryaka mwaha wa Yehova.+ Mutthu yoole onrowa ovara muteko nihiku nno, onimwiiviwa.+ 3 Muhiiseele mooro vatthokoni vanyu, nihiku na saabadu”.

4 Vano Moise aahaaleela atthu ootheene a nloko na Isarayeli wiira: “Etthu Yehova orumme awe tiila: 5 ‘Mwaakhelele itthu sootheene atthu a nloko nanyu+ aninvaha aya Yehova. Khula mutthu oniphavela ni murima awe+ wootheene onvaha etthu Yehova, oruuhe itthu iya: eweero, eparatha, ekoopiri, 6 nliinya nooripelela, ekuwo ekoore violeeta,* ekuwo yooxeerya, eliinyu yooreerexa, manri a epuri,+ 7 isapala sa ipwittipwitthi soolopwana sipintariwe ekoore yooxeerya, isapala sa inama siniihaniwa fooka,* matera a akaasiya, 8 makhura para ixamaniiya, baalsamu para opaka makhura aniittheliwa atthu oothanliwa, nsenso noowunkhela,*+ 9 maluku aniihaniwa oonikisi ni maluku makina, wiira aheliwe va eefodini+ ni vamurupani wa vapeeto.+

10 “‘Khula mutthu onisuwela ovara muteko saana,+ orwe wiira ovareke itthu sootheene Yehova orumme awe opakiwa, 11 eyo piiyo, etapernaakulu ni ipantta saya sootheene ni itthu saya sinikhuneelaniwa aya, ni ikweeceryo ni ithaapwa saya piili soolupanyiwa, ni ikopo saya, ni maripu aya, ni iyeemexeryo saya. 12 Mpake Nivuku+ ni ikopo saya,+ ni etampa,+ ni ekortiina+ para ovalaanya, 13 ni meesa+ ni ikopo saya, ni itthu sootheene sinirumeeliwa vameesa-vo, ni ephaawu kinivahiwa aka.*+ 14 Nave mpake muthuko+ para omwaleela ni itthu sootheene sinikhala vamuthukoni-vo, ni ixamaniiya+ ni makhura aya. 15 Mumpake altaari a nsenso+ ni ikopo sawe, ni makhura aniittheliwa atthu oothanliwa, ni nsenso noowunkhela,+ ni ekortiina para mukhora wa etapernaakulu. 16 Nave-tho, mumpake altaari a soovaha para opahiwa+ ni ekerelya awe ya ekoopiri, ni ikopo sawe, ni itthu sootheene sinirumeeliwa valtaari-vo, ni epasiya ni metto saya.+ 17 Mpake ikortiina sinikuttelela nivate,+ ni maripu aya ni iyeemexeryo saya, ni ekortiina ya mukhora wa nivate. 18 Mpake-tho iyeemexeryo sa etenta* ya etapernaakulu, iyeemexeryo sa etenta ya nivate ni mikhoyi saya.+ 19 Mpake malaya ooxoriwa saana+ wiira awariweke ni anamukuttho, okathi anrowa aya ovaraka muteko nipuro noowaarya, eyo piiyo, malaya oowaarya para namukuttho Aroni+ ni malaya para anaawe wiira awareke yaavaraka muteko wa onamukuttho’”.

20 Siiso, nloko nootheene na aisarayeli nahikhuma ohoolo wa Moise nnarowa. 21 Vano, khula mutthu aaphavela ni murima awe wootheene,+ ni khula mutthu aaphavela okhaliherya aahimuroihela Yehova itthu anvaha awe. Itthu saavaha aya saanipakeliwa etenta ya muthukhumano, saanipakiwa itthu sootheene saarumeliwa mutentani-mmo, ni saanipakeliwa malaya oowaarya. 22 Awo yaanirwa, alopwana ni athiyana, khula mmosa onavaha ni murima awe wootheene itthu iya: iporoxe, ipirinku, anela, ni itthu sikina. Nave yaanivaha itthu sootheene saapakiwa ni eweero. Ootheene aya yaaninvaha Yehova+ itthu sa eweero. 23 Nto ootheene ale yaarina nliinya nooripelela, ekuwo ekoore violeeta, ekuwo yooxeerya, eliinyu yooreerexa, manri a epuri, isapala sa ipwittipwitti soolopwana sipintariwe ekoore yooxeerya, isapala sa fooka, yaahiruuha. 24 Ootheene ale yaaphavela ovaha eparatha ni ekoopiri yaaninvaha Yehova. Nave ootheene ale yaarina matera a akaasiya, yaahiruuha wiira avareliweke muteko.

25 Athiyana ootheene yaasuwela otthava saana+ ni matata aya, yaahiruuha itthu yaapanke aya, eyo piiyo, nliinya nooripelela, ekuwo ekoore violeeta, ekuwo yooxeerya ni eliinyu yooreerexa. 26 Athiyana ootheene yaasuwela ovara saana muteko, yaawo yaaphavela ni murima aya wootheene, yaahitthava itthu ni manri epuri.

27 Nave makhulupale atthu, yaahiruuha maluku aniihaniwa oonikisi ni maluku makina, wiira aheeliwe va eefodini ni vamurupani wa vapeeto.+ 28 Yaahimuruuha-tho baalsamu, makhura para ixamaniiya, makhura aniittheliwa atthu oothanliwa+ ni nsenso noowunkhela.+ 29 Alopwana ootheene ni athiyana ootheene aisarayeli, yaahiruuha itthu yanvanhe aya Yehova, ntoko murima aya waaphavela aya. Awo yaahikuxa itthu iya yaavanhe aya wiira akhaliherye muteko wa Yehova,+ anvahererya Moise, yoowo aarumme opaka eyo.

30 Moise aahaaleela aisarayeli wiira: “Moone, Yehova oomuthanla Besaleli, mwaana a Uri, musulwaawe Huri, a nihimo na Yuda.+ 31 Muluku onvaha ikuru sawe Besaleli, wiira okhalaneke ankhili ni miruku ni osuweleke ovara miteko sootheene, 32 oweryeke otesenyari saana itthu onrowa awe opakaka, osuweleke ovarela muteko eweero, eparatha, ekoopiri, 33 oweryeke othikila ni ohottha maluku ni opaka khula etthu enipakiwa ni matera. 34 Nave Muluku onvaha owo ni Oholiyabi,+ mwaana a Ahisamaki, a nihimo na Dani, owerya wa owiixuttiha akina. 35 Ohaavaha osuwela+ wiira aweryeke ovara miteko sootheene, otesenyari, oxora aarumeelaka nliinya nooripelela, ekuwo ekoore violeeta, ekuwo yooxeerya ni eliinyu yooreerexa. Nave ohaava osuwela wiira avareke muteko woottottha. Alopwana ala anoovaraka khula muteko ni anootesenyariki ipalanta sootheene.

36 “Besaleli, Oholiyabi, ni atthu ootheene oosuwela ovara miteko saana, anrowa opaka itthu sootheene sa mutentani* munrowa okokhoreliwaka Muluku, ntoko siisaale Yehova orumme awe.+ Yehova ohaavaha atthu awo miruku, wiira apakeke oratteene itthu sootheene”.

2 Moise aahimwiihana Besaleli, ni Oholiyabi, ni atthu ootheene yaasuwela ovara miteko saana, yaawo Yehova aavanhe awe miruku,+ ni khula mutthu aaphavela wiivahererya ni murima awe wootheene wiira ovareke muteko.+ 3 Awo yaahivahereriwa ni Moise itthu sootheene+ aisarayeli yaaruuhale aya para ovareliwa muteko wa etenta aarowa awe okokhoreliwaka Muluku. Masi khula voosiisu, aisarayeli yaamutepa oruuha soovaha saya.

4 Vano, nuumala opacerya muteko ole woowaarya, atthu ootheene yaasuwela ovara muteko yaanirwa, mmosa-mmosa. 5 Nto awo yaanimuleela Moise wiira: “Atthu anootepa oruuha itthu sinceene, ovikana itthu sinipirisari para ovariwa muteko Yehova orumme awe”. 6 Siiso, Moise aahiruma olaleiwa omaxaxani wootheene wiira: “Ohikhale mutthu oniruuha itthu onivaha awe para etenta yoowaarya”. Tivonto, atthu ale yaahihiya oruuha soovaha saya. 7 Itthu saavahiwe wiira sivareliweke muteko khisaarere waatta, saahivikana iye saapirisariwa.

8 Atthu ootheene yaasuwela ovara muteko saana,+ yaahipaka etapernaakulu+ ni ikuwo 10 sa eliinyu yooreerexa yoorithiwa, nliinya nooripelela, ekuwo ekoore violeeta* ni ekuwo yooxeerya. Besaleli* aahixorela malaikha vakuwoni-vo.+ 9 Khula ekuwo, erakamelo aya yaari imeeturu 12 nnimeya,* ni okhuveya waya waari waattamela imeeturu piili.* Ikuwo sootheene saari munnuwelo mmosa-ru. 10 Nuumala-vo aahilupanya ikuwo ithanu, nave aahilupanya-tho ikuwo sikina ithanu. 11 Nto, aahipaka ithulula* ni nliinya nooripelela oponta wa ikuwo ithanu soolupanyiwa, opuro waarowa aya olupanyiwa. Nave aahipaka ithulula okerekhere wa ikuwo iye sikina ithanu soolupanyiwa, opuro waarowa aya olupanyiwa ni ikuwo iye ithanu soopacerya. 12 Ekuwo emosa, aapanke ithulula 50. Nave oponta wa ekuwo ekina aapanke ithulula 50, wiira ithulula iyo siwehaneke opuro sinrowa aya olupanyiwa. 13 Wookiseryani waya, owo aahipaka ikweeceryo 50 sa eweero ni aahilupanya ikuwo iyo ni ikweeceryo. Siiso, etapernaakulu yaahikhala emosa-ru.

14 Nuumala-vo, aahipaka ikuwo ni manri a epuri wiira ekhuneeleke vasulu va etapernaakulu. Owo aapanke ikuwo+ 11. 15 Khula ekuwo, erakamelo aya yaari etthu yoowiiraka imeeturu 13,* nave ekhuveelo aya yaari waattamela imeeturu piili.* Ikuwo iyo 11 saari munnuwelo mmosa-ru. 16 Nto aahilupanya ikuwo ithanu, nave-tho aahilupanya ikuwo sikina ithanu namosa. 17 Nuumala-vo, aahipaka ithulula 50 oponta wa ekuwo yookiserya wa iye soopacerya olupanyiwa. Nave oponta wa ekuwo yoopacerya ya iye sikina, aahipaka ithulula 50 opuro saarowa aya olupanyiwa. 18 Nave aahipaka ikweeceryo 50 sa ekoopiri, para olupanya ikuwo iye sa etenta,* wiira ekhale emosa-ru.

19 Owo aahipaka ekuwo ya isapala sa ipwittipwitthi soolopwana, opintari ni ekoore yooxeerya. Vasulu vaya, aahikhuneela ni ekuwo ya isapala+ sa inama siniihaniwa fooka.*

20 Aahipaka etapernaakulu ni ithaapwa sa akaasiya+ soolupanyiwa piili-piili, sooweemexiwa.+ 21 Orakama wa ithaapwa iyo soolupanyiwa, waari wa imeeturu ixexe nnimeya.* Ovalaana waya waari wa isentiimeturu 67.* 22 Khula ithaapwa piili soolupanyiwa, saahikhalana ikweeceryo piili saari soolupana. Owo aahipaka siiso ithaapwa sootheene soolupanyiwa sa etapernaakulu. 23 Mpantta mukina wa etapernaakulu, eyo piiyo, moono woothiyana,* aahipaka ipaare 20 sa ithaapwa soolupanyiwa. 24 Nuumala-vo, aahipaka iyeemexeryo 40 sa eparatha, ohela vathi va ipaare 20 sa ithaapwa soolupanyiwa. Iyeemexeryo piili saari vathi va ithaapwa piili soolupanyiwa, sirina ikweeceryo piili.+ 25 Mpantta mukina wa etapernaakulu, eyo piiyo, moono woolopwana,* aahipaka ipaare 20 sa ithaapwa soolupanyiwa, 26 vamosa ni iyeemexeryo saya 40 sa eparatha. Iyeemexeryo piili saari vathi va khula ithaapwa piili soolupanyiwa. Nto ithaapwa sootheene soolupanyiwa saakhalana iyeemexeryo piili vathi vaya.

27 Ottuli* wa etapernaakulu, aahipaka ipaare 6 sa ithaapwa soolupanyiwa.+ 28 Owo aahipaka ipaare piili sa ithaapwa soolupanyiwa para ikantu piili sa ottuli wa etapernaakulu. 29 Ithaapwa iyo saari piili soovalaanyiwa vathi, masi saakumana osulu, opuro yaari epulseera yoopacerya. Owo aahipaka siiso ikantu soopiili. 30 Awo yaahipaka ipaare 8 sa ithaapwa soolupanyiwa ni iyeemexeryo saya 16 sa eparatha. Iyeemexeryo piili saakhala vathi va ithaapwa piili soolupanyiwa.

31 Nuumala-vo, aahipaka ikopo sa matera a akaasiya. Ikopo ithanu saalupanya mpantta mmosa wa etapernaakulu.+ 32 Nave ikopo ithanu saalupanya mpantta mukina wa etapernaakulu. Vano ikopo ithanu sikina, saalupanya ottuli* wa etapernaakulu. 33 Owo aahipaka ekopo yaavira eriyari ya ithaapwa soolupanyiwa, okhuma oponta mpakha oponta. 34 Aahisirikela ni eweero ithaapwa soolupanyiwa. Nave aahipaka ipulseera sa eweero, ohela muthaapwani. Nto ikopo saavira mpulseerani-mmo. Nuumala-vo, aahisirikela ikopo iyo ni eweero.+

35 Nave-tho aahipaka ekortiina+ ya nliinya nooripelela, ekuwo ya ekoore violeeta, ekuwo yooxeerya ni eliinyu yooreerexa yoorithiwa. Owo aahixora malaikha+ vakortinani-vo.+ 36 Owo aahipakela ekortiina eyo maripu maxexe a akaasiya, oosirikeliwa ni eweero. Aahipaka ikweeceryo sa eweero ni iyeemexeryo ixexe sa eparatha, para maripu awo. 37 Nave-tho aahipaka ekortiina yaakhuneela vamukhora. Ekortiina eyo yaapakiwe ni nliinya nooripelela, ekuwo ya ekoore violeeta, ekuwo yooxeerya ni eliinyu yooreerexa yoorithiwa.+ 38 Aahipakela ekortiina eyo maripu mathanu ni ikweeceryo saya. Owo aahisirikela eweero vasulu va maripu ni ilupanyeryo saya. Masi iyeemexeryo saya ithanu, saari sa ekoopiri.

37 Vano, Besaleli+ aahipaka Nivuku+ orumeelaka matera a akaasiya. Orakama waya waari wa emeeturu emosa ni isentiimeturu 10,* okhuveya waya waari wa isentiimeturu 70,* nave orakamela waya osulu waari wa isentiimeturu 70.+ 2 Nuumala-vo, aahiisirikela nivuku nlo ni eweero yooreerexa, muhina ni ota. Nave aahimpaka aaro a eweero vasulu vaya,+ orukureryaka nivuku nno nootheene. 3 Aahipaka ipulseera ixexe sa eweero, khuhela vasulu va metto soomixexe sa nivuku nno. Aahihela ipulseera piili ikantu piili, nto ipulseera sikina piili, aahenle ikantu sikina piili. 4 Nuumala-vo, aahiipaka ikopo sa matera a akaasiya, osirikela ni eweero.+ 5 Aahihela ikopo iyo vanivukuni, ovirihaka mpulseerani siri mpararini mwa Nivuku, wiira siteexaniweke Nivuku+ nno.

6 Aahipaka etampa ya eweero yooreerexa.+ Orakama waya waari wa emeeturu emosa ni isentiimeturu 10,* nave okhuveya waya waari wa isentiimeturu 70.*+ 7 Nuumala-vo, aahaapaka makerubi manli+ a eweero yoohaniwa ni maritelo. Khula kerubi aamuhenle eponta emosa ya etampa.+ 8 Owo aapanke makerubi iponta soopiili sa etampa. Kerubi mmosa ari eponta emosa, nave kerubi mukina ari eponta ekina. 9 Mapupha+ a makerubi awo yaari ootaphuwa, ewehaka musulu, akhuneelaka etampa. Makerubi awo yanwehana, masi owiitho waya wuuramenle vathi, awehaka etampa.+

10 Aahipaka meesa orumeelaka matera a akaasiya.+ Orakama waya waari waattamela emeeturu emosa,* okhuveya waya waari waattamela nimeya na emeeturu,* ni orakamela waya osulu waari wa isentiimeturu 70.*+ 11 Vano, aahisirikela meesa awo ni eweero yooreerexa, nave aahimpaka aaro a eweero vasulu vaya, aarukurerya meesa awo ootheene. 12 Nuumala-vo, aahimpaka aaro aarowa orukurerya meesa ootheene. Wunnuwa wawe waari wa mphimo wa ntata nimosa.* Nave-tho, vasulu vawe aahimpaka aaro mukina a eweero. 13 Nave-tho, aahipaka ipulseera ixexe sa eweero para meesa awo, khuhela ikantu sooxeexe, seiyo saaheliwe aya metto sa meesa. 14 Ipulseera iyo saaheliwe vathi omwaattamela aaro, wiira sivirihiweke ikopo sarowa oteexaniwaka meesa awo. 15 Nuumala-vo, aahipaka ikopo sa matera a akaasiya, osirikela ni eweero, wiira siteexaniweke meesa. 16 Vano, aahipaka itthu saarowa orumeeliwaka vameesa, eyo piiyo, iparatho, ikoopho, itixela ni mirinki saya, seiyo saarowa orumeeliwaka wiira sivahiweke soovaha siniwuriwa.+ Itthu iyo saapakiwe ni eweero yooreerexa.

17 Nuumala-vo, aahipaka muthuko*+ wa eweero yooreerexa. Muthuko owo waapakiwe ni eweero yoohaniwa ni maritelo. Metto saya, ekopo aya, ikoopho saya, iputawu saya ni ifilori saya, sootheene saari muthuko mmosa-ru.+ 18 Muthuko owo waahikhalana iritta 6 saakhuma mpararini mwaya. Iritta tthaaru moono mmosa, iritta tthaaru moono mukina. 19 Khula eritta yaari moono mmosa, yaahikhalana ikoopho tthaaru saalikana ni ifilori sa amentowa. Nave yaahikhalana iputawu ni ifilori saavirikanyihiwa ekina ni ekhwaaya. Nave-tho, iritta sa moono mukina saari siiso. Iritta sootheene 6 sa muthuko owo saamulikana. 20 Ekopo ya muthuko owo, yaahikhalana ikoopho ixexe saalikana ni ifilori sa amentowa, nave yaahikhalana iputawu ni ifilori saavirikanyihiwa ekina ni ekhwaaya. 21 Eputawu yoopacerya, yaanilupanya iritta piili soopacerya saakhuma vakoponi, nave eputawu ya nenli, yaanilupanya iritta piili saattharelana. Nto eputawu ya neeraru, yaanilupanya iritta piili sookiserya. Iritta sootheene 6 saakhuma ekopo emosa-ru. 22 Iputawu, iritta ni muthuko wootheene, yaari etthu emosa-ru. Saapakiwe ni eweero yooreerexa yaahaniwe ni maritelo. 23 Nuumala-vo, aahipaka ixamaniiya 7+ para muthuko owo, itisora saathikilaniwa ntthampo noovya ni iparatho saaheeliwa ntthampo noovya. Itthu iyo sootheene saapakiwe ni eweero yooreerexa. 24 Muthuko owo, vamosa ni itthu sootheene saarumeeliwa para muthuko owo, saapakiwe erumeliwaka etalento* emosa ya eweero yooreerexa.

25 Vano, aahimpaka altaari aapahiwa-vo nsenso.*+ Altaari owo ari a matera a akaasiya. Ipantte sooxeexe sa altaari owo saamulikana. Khula mpantta waari etthu yoowiiraka nimeya na emeeturu.* Orakamela waya osulu waari etthu yoowiiraka emeeturu emosa.* Manyaka a altaari owo yaapattheliwe vaavo.+ 26 Aahimusirikela altaari owo ni eweero yooreerexa vasulu vawe, ipantte sootheene sooxeexe ni manyaka awe. Nave-tho, aahimpaka aaro a eweero vasulu vaya, aamurukurerya altaari owo ootheene. 27 Aahimpakela altaari owo ipulseera piili sa eweero, vathi va aaro. Ipulseera iyo saari ipantte piili, khula epantte ipulseera piili. Nto ipulseera iyo saarowa ovarelelaka ikopo saarowa oteexaniwaka altaari owo. 28 Nuumala-vo, aahipaka ikopo sa matera a akaasiya, osirikela ni eweero. 29 Nave-tho, aahipaka makhura+ oowaarya para wiittheliwa atthu oothanliwa ni nsenso nooreerexa ni noowunkhela.+ Itthu iyo saahipakiwa saana.

38 Besaleli aahimpaka altaari a matera a akaasiya, a soovaha para opahiwa. Wunnuwa wawe waari etthu yoowiiraka imeeturu piili.* Ipantte sooxeexe sa altaari owo saamulikana. Orakamela wawe osulu waari etthu yoowiiraka emeeturu emosa.*+ 2 Khula ekantu ya altaari owo aahipaka nnyaka nimosa. Manyaka awo aapantthe vaavo. Nave-tho, aahimusirikela altaari owo ni ekoopiri.+ 3 Aahipaka-tho itthu sootheene sinirumeeliwa valtaari, eyo piiyo, ipalti sinikhupaniwa ettuurwa,* ipoxolo, itixela, ikarfu ni iparatho siniheliwa makhala a mooro. Itthu iyo sootheene aapanke ni ekoopiri. 4 Aahipaka-tho ekerelya para altaari, eyo piiyo, ekarati ya ekoopiri. Ekerelya eyo aahihela eriyari ya altaari, aatalela ovirihaka muhina mwa altaari owo. 5 Opuro ori ekerelya ya ekoopiri, aahipaka ipulseera ixexe sa ekoopiri, ohela khula epulseera ekantu emosa ya altaari owo, wiira sivireke ikopo saarowa oteexaniwaka altaari. 6 Aahipaka ikopo sa matera a akaasiya, ni aahisirikela ni ekoopiri. 7 Ikopo iyo aahiviriha mpulseerani wiira sikhaleke ninno-ninno, para oteexaniwaka altaari. Aahimpaka altaari owo ntoko ekaaxa ya matera.

8 Aahipaka epasiya ya ekoopiri+ ni metto saya sa ekoopiri. Aahipaka itthu iyo orumeelaka ixipelyu* sa athiyana yaavara vamukhora va etenta* ya muthukumano.

9 Nuumala-vo, aahipaka nivate+ na etapernaakulu. Moono woothiyana* wa nivate nlo, aahikuttelela ni ikortiina sa eliinyu yooreerexa yoorithiwa. Orakama waya mpantta owo, waari etthu yoowiiraka imeeturu 45.*+ 10 Mpantta owo waarina maripu 20 ni iyeemexeryo 20 sa ekoopiri. Ikweeceryo sa maripu awo ni ilupanyeryo* saya, saari sa eparatha. 11 Nave-tho, ikortiina saakuttelela moono woolopwana, erakamelo aya yaari etthu yoowiiraka imeeturu 45.* Maripu aya 20 ni iyeemexeryo saya 20, saari sa ekoopiri. Ikweeceryo sa maripu awo ni ilupanyeryo* saya, saari sa eparatha. 12 Ottuli* wa nivate, erakamelo ya ikortiina, yaari etthu yoowiiraka imeeturu 22.* Yaahikhala maripu 10 ni iyeemexeryo 10. Ikweeceryo sa maripu awo ni ilupanyeryo* saya, saari sa eparatha. 13 Ohoolo wa nivate nlo, weiwo waawehana ni mpantta onikhuma nsuwa, erakamelo aya yaari etthu yoowiiraka imeeturu 22.* 14 Moono woolopwana wa ekortiina ya mukhora, saahikhala ikortiina erakamelo aya etthu yoowiiraka imeeturu 7,* vamosa ni maripu mararu ni iyeemexeryo tthaaru. 15 Moono woothiyana wa ekortiina ya mukhora, saahikhala ikortiina erakamelo aya etthu yoowiiraka imeeturu 7,* vamosa ni maripu mararu ni iyeemexeryo tthaaru. 16 Ikortiina sootheene sa ekintaali yaarukurerya nivate, saapakiwe ni ikuwo sa eliinyu yooreerexa yoorithiwa. 17 Iyeemexeryo sa maripu awo, saari sa ekoopiri. Ikweeceryo ni ilupanyeryo sa maripu awo, saari sa eparatha. Vasulu va maripu awo, yaasirikeliwe ni eparatha. Maripu ootheene a nivate,+ yaahikhalana ilupanyeryo sa eparatha.

18 Ekortiina yaari vamukhora wa nivate, yaapakiwe ni nliinya nooripelela, ekuwo ya ekoore violeeta,* ekuwo yooxeerya ni eliinyu yooreerexa yoorithiwa. Wunnuwa waya, waari etthu yoowiiraka imeeturu 9,* nave orakamela waya waari etthu yoowiiraka imeeturu piili.* Yaamulikana ni ikortiina sa nivate.+ 19 Maripu aya maxexe ni iyeemexeryo saya ixexe, saari sa ekoopiri. Ikweeceryo ni ilupanyeryo saya, saari sa eparatha. Vasulu va maripu awo, saahisirikeliwa ni eparatha. 20 Iyeemexeryo sootheene sa etapernaakulu ni iyeemexeryo sa nivate, saari sa ekoopiri.+

21 Moise aahiruma opakiwa elista ya itthu saarumeeliwe para opakiwa etapernaakulu, eyo piiyo, etapernaakulu ya Onamoona.+ Alevi,+ yaawo yaahooleliwa ni Itamari,+ mwaana a namukuttho Aroni, ti yaavahiwe muteko owo. 22 Nto Besaleli+ mwaana a Uri, musulwaawe Huri, a nihimo na Yuda, aahipaka itthu sootheene Yehova aamurumme awe Moise. 23 Owo aari ni Oholiyabi,+ mwaana a Ahisamaki, a nihimo na Dani. Owo aari mulopwana aasuwela ovara saana miteko sawe, aaxora ni otthava orumeelaka nliinya nooripelela, ekuwo ya ekoore violeeta, ekuwo yooxeerya ni eliinyu yooreerexa.

24 Eweero yootheene yaarumeeliwe para muteko wootheene wa nipuro noowaarya, yaari eweero yeele yaavahiwe ntoko yoovaha yeettihiwa.+ Mwaattelo aya, waari wa italento* 29 ni ixeekele* 730, etthariwaka exeekele ya nipuro noowaarya. 25 Nave eparatha yaaruuhiwe ni atthu a munlokoni yaalempwale, yaari ya italento 100 ni ixeekele 1.775, etthariwaka exeekele ya nipuro noowaarya. 26 Nimeya na exeekele khula mutthu aaruuhale awe, naatthariwa nimeya na exeekele na nipuro noowaarya. Nummeru na alopwana ootheene yaalempwale, yaarina iyaakha 20 orowa ohoolo,+ naari 603.550.+

27 Nto wiira sipakiwe iyeemexeryo sa nipuro noowaarya, ni iyeemexeryo sa ekortiina, saarumeeliwe italento 100. Mweemexeryo mmosa,+ yaarumeeliwe etalento emosa, eyo piiyo, italento 100 para iyeemexeryo 100. 28 Aahirumeela ixeekele 1.775 wiira opake ikweeceryo para maripu. Nto aahisirikela eparatha vasulu va maripu awo, ni aahilupanya.

29 Vano ekoopiri yaavahiwe,* yaari italento 70, ni ixeekele 2.400. 30 Nto ikoopiri iyo aahipakela iyeemexeryo sa mukhora wa etenta ya muthukumano, altaari a ekoopiri, ni ekerelya aya, ni itthu sootheene saarumeeliwa valtaari-vo. 31 Aahipaka-tho iyeemexeryo sa nivate, iyeemexeryo sa mukhora wa nivate, ni ivarelelo sootheene sa etapernaakulu, ni ivarelelo+ sootheene sa nivate.

39 Yaahirumeela nliinya nooripelela, ekuwo ekoore violeeta* ni ekuwo yooxeerya,+ wiira epake malaya ooxoriwa saana, wiira awariweke ni anamukuttho okathi yaarowa aya ovaraka muteko nipuro noowaarya. Awo yaahipaka malaya oowaarya para Aroni,+ siisaale ntoko Yehova aamurumme awe Moise.

2 Aahipaka eefodi+ ya eweero ni nliinya nooripelela, ni nliinya ekoore violeeta, nooxeerya, ni eliinyu yooreerexa yoorithiwa. 3 Awo yaahimana eweero ni maritelo mpakha okhala ilaamina soopeepheya. Nuumala-vo, yaahithikila eweero eyo, khukhala ntoko mukhoyi mwaamukhaani, atakaaherya ni nliinya nooripelela, nliinya ekoore violeeta, nooxeerya, ni eliinyu yooreerexa, wiira exorele va eefodini-vo. 4 Awo yaahipaka ipantta piili mmakhatani, seiyo saalupanya epantte ya ohoolo ni ya ottuli ya eefodi. 5 Nave waahipakiwa musako wooxoriwa, yoowo waattottheleliwe va eefodini-vo wiira olipiheke,+ sirumeeliwaka itthu simosa-ru: eweero, nliinya nooripelela, ekuwo ya ekoore violeeta, ekuwo yooxeerya ni eliinyu yooreerexa yoorithiwa. Yaahipaka siisaale ntoko Yehova aamurumme awe Moise.

6 Nuumala-vo, yaahihela maluku a oonikisi mwiivareleloni sa eweero ni yaahilepa masina a anamwane a Isarayeli vamalukuni-vo, ntoko siisaale enilempwa aya eseelu.+ 7 Owo aahihela maluku awo ipantte piili sa mmakhatani sa eefodi, wiira aisarayeli+ yuupuweleliweke. Aahiira siisaale ntoko Yehova aamurumme awe Moise. 8 Nuumala-vo, aahipaka murupa wa vapeeto+ wooxoriwa, siisaale ntoko yaaxoriwa aya eefodi, orumeelaka eweero, nliinya nooripelela, ekuwo ekoore violeeta, ekuwo yooxeerya ni eliinyu yooreerexa yoorithiwa.+ 9 Murupa owo wakhuniwa vale, ipantta saya sootheene saamulikana. Wunnuwa waya waari wa mphimo wa ntata nimosa.* 10 Vamurupani-vo yaahihela iliinya ixexe sa maluku. Eliinya yoopacerya, yaahihela nluku rupi, topaasio ni esmeralda. 11 Eliinya ya nenli, yaahenle nluku turkesa, safira ni xaspe. 12 Eliinya ya neeraru, yaahihela nluku nniihaniwa leexemi,* aakata ni ametista. 13 Eliinya ya neexexe, yaahihela nluku nniihaniwa krisoolito, oonikisi ni xade. Maluku awo yaaheliwe mwiivareleloni sa eweero. 14 Maluku awo yaathoonyerya masina a anamwane 12 a Isarayeli. Khula nsina naalempwale ntoko enilempwa aya eseelu. Nave khula nsina naathoonyerya nihimo nimosa na mahimo 12 a Isarayeli.

15 Vano yaahipaka vamurupani wa vapeeto, ikwirinti soorithiwa saalikana ni ikwirinti sa eweero yooreerexa.+ 16 Yaahipaka ivarelelo piili sa eweero, ni anela anli a eweero. Nto yaahaahela anela awo anli ikantu piili sa osulu sa murupa wa vapeeto. 17 Nuumala-vo, yaahihela ikwirinti iye piili sa eweero yoorithiwa mwaanelani ari ikantu piili sa osulu sa murupa owo. 18 Yaahikweceerya iponta piili sa ekwirinti eyo mwiivareleloni piili, seiyo saari mmakhatani mwa eefodi, mpantta wa ohoolo. 19 Nave-tho, yaahaapaka anela anli a eweero, yaahela ikantu piili saari mpantta wa muhina wa murupa wa vapeeto, oniwehana ni eefodi.+ 20 Yaahaapaka-tho anela anli a eweero, yaahela ohoolo wa eefodi, vathi va makhata a eefodi eyo, waattamela opuro enilupanyiwa aya, vasulu wa musako wa eefodi. 21 Vano, yaahilipiha murupa wa vapeeto ni mukhoyi wooripelela. Mukhoyi owo waatthukweleliwe anela a murupa wa vapeeto ni anela a eefodi. Siiso, murupa owo waahilipa va eefodini, vasulu va musako wooxoriwa, siisaale ntoko Yehova aamurumme awe Moise.

22 Vano aahipaka nlaya nihirina miyoono, naarowa owariwaka muhina mwa eefodi. Nlaya nno nootheene naapakiwe ni nliinya nooripelela.+ 23 Osulu wa nlaya nlo, waahithaliwa wiira ekhale exiko. Mukerekhere mwa exiko eyo yaahittotthiwa enalikana ni exiko ya ekuleti ya eyuuma,* wiira ehikhereye. 24 Nuumala-vo, yaahipaka vathi va nlaya nlo itthu saalikana ni mihokorokho,* arumeelaka nliinya nooripelela, ekuwo ya ekoore violeeta ni ekuwo yooxeerya. Yaahirukureriha mihokorokho iyo nlaya nootheene. Maliinya awo ootheene yaaritheliwe vamosa. 25 Yaahipaka isiinu sa eweero yooreerexa, anavirikanyiha ni mihokorokho iye, arukurerihaka vathi va nlaya nle nootheene. 26 Awo yaanivirikanyiha esiinu emosa ni muhokorokho mmosa, esiinu emosa ni muhokorokho mmosa, arukurerihaka vathi va nlaya nootheene nahaarina miyoono, nenno naawariwa wiira ovariweke muteko wa onamukuttho. Awo yaahipaka siisaale ntoko Yehova aamurumme awe Moise.

27 Vano yaahipaka malaya a eliinyu yooreerexa, para Aroni ni anaawe.+ 28 Yaahipaka-tho nleeso+ na eliinyu yooreerexa ni maleeso+ a eliinyu yooreerexa para anaawe Aroni. Nave yaahaapaka akaputtula+ a eliinyu yooreerexa yoorithiwa, 29 yaahipaka musako arumeelaka eliinyu yooreerexa yoorithiwa, nliinya nooripelela, ekuwo ekoore violeeta ni ekuwo yooxeerya, saatthaviwe vamosa, siisaale ntoko Yehova aamurumme awe Moise.

30 Wookiseryani waya, yaahipaka elaamina yoowaarya ya eweero* yooreerexa. Nto valaaminani-vo, yaahilepa ntoko enilempwa aya eseelu, ni moolumo ani: “Yehova+ toowaarya”. 31 Yaahitthukwelela elaamina eyo vanleesoni ni nliinya nooripelela, siisaale ntoko Yehova aamurumme awe Moise.

32 Siiso, muteko wootheene wa etapernaakulu, eyo piiyo, etenta ya muthukumano, waahimalihiwa. Nto aisarayeli yaahipaka itthu sootheene Yehova aamurumme awe Moise.+ Awo yaahiira siisaale ntoko yaarummwale aya.

33 Nuumala-vo, Moise aahiruuheliwa etapernaakulu,+ eyo piiyo, etenta+ ni itthu sootheene saarowa orumeeliwaka para etenta eyo. Itthu sene tiiya: ikweeceryo,+ ithaapwa soolupanyiwa,+ ikopo,+ maripu, iyeemexeryo,+ 34 ekuwo ya isapala sa ipwittipwitthi soolopwana, soopintariwa ni ekoore yooxeerya,+ ekuwo ya isapala sa inama siniihaniwa fooka,* ni ekortiina para ovalaanya.+ 35 Nave aahiruuheliwa nivuku na Onamoona, ikopo saya,+ etampa aya,+ 36 meesa ni itthu sootheene+ saarowa orumeeliwaka vameesa-vo ni iphaawu saarowa ovahiwaka Muluku.* 37 Aahiruuheliwa muthuko wa eweero yooreerexa ni ixamaniiya+ saya saathataanyiwe ntoko epiixa, itthu sootheene+ sa muthuko owo saarowa orumeeliwaka, makhura para ixamaniiya,+ 38 altaari+ a eweero, makhura+ yaarowa wiittheliwaka atthu oothanliwa, nsenso* noowunkhela+ ni ekortiina+ para mukhora wa etenta. 39 Aahiruuheliwa-tho altaari a ekoopiri+ ni ekerelya awe ya ekoopiri, ikopo+ sa altaari ni itthu sootheene+ saarowa orumeeliwaka valtaari-vo. Aahiruuheliwa epasiya ni metto saya,+ 40 ikortiina sa ekintaali ya nivate, maripu a nivate ni iyeemexeryo saya,+ ekortiina+ para mukhora wa nivate, mikhoyi sa etenta ya nivate, ivarelelo saya+ ni itthu sootheene saarowa orumeeliwaka para muteko wa mutapernaakulu, eyo piiyo, etenta ya muthukumano. 41 Nave-tho aahiruuheliwa malaya ooxoriwa saana yaawo yaarowa owariwaka okathi waarowa aya ovariwaka muteko nipuro noowaarya, vamosa ni malaya oowaarya para namukuttho+ Aroni ni malaya para anaawe, wiira yawareke yaavaraka muteko wa onamukuttho.

42 Aisarayeli yaahivara muteko wootheene,+ attharaka itthu sootheene Yehova aamurumme awe Moise. 43 Okathi Moise aavarenrye awe miteko saya sootheene, aahoona wiira awo yaahivara siisaale ntoko Yehova aarumme awe. Vano Moise aahaareelihasa.

40 Yehova aahimuleela Moise wiira: 2 “Nihiku noopacerya, na mweeri woopacerya, muhaana weemexa etapernaakulu, eyo piiyo, etenta* ya muthukumano.+ 3 Mpwehe nivuku na Onamoona mutapernaakulu-mmo,+ ni muttiyelele* Nivuku nlo ni ekortiina.+ 4 Muruuhe meesa+ mutapernaakulu, ni mwaarumari itthu sinirumeeliwa vameesa-vo. Nave muruuhe muthuko+ ni mpattihe ixamaniiya saya.+ 5 Mumpwehe altaari a eweero onipahiwa-vo nsenso,*+ ohoolo wa nivuku na Onamoona. Nave muhele ekortiina vamukhora va etapernaakulu.+

6 “Mumpwehe altaari a yoovaha para opahiwa,+ ohoolo wa etapernaakulu, eyo piiyo, etenta ya muthukumano. 7 Nave-tho, mpwehe epasiya eriyari ya etenta ya muthukumano ni altaari. Nuumala-vo, muhele-mo+ maasi. 8 Vano, mpake nivate+ murukurerihaka etapernaakulu, ni muhele ekortiina+ vamukhora va nivate. 9 Mukuxe makhura aniittheliwa atthu oothanliwa,+ mwiitthele etapernaakulu ni itthu sootheene siri memmo.+ Nto, mwiirihe etapernaakulu ni itthu sootheene siri memmo okhala soowaarya. 10 Mwiitthele makhura valtaari a yoovaha para opahiwa, ni itthu sootheene sinirumeeliwa valtaari-vo. Mmwiirihe altaari+ owo okhala oowaaryexa. 11 Nave, mwiitthele makhura epasiya ni metto saya, ni mukhalihe yoowaarya.

12 “Mmuruuhe Aroni ni anaawe waattamela vamukhora wa etenta ya muthukumano, ni mwaarapihe* ni maasi.+ 13 Munwarihe Aroni malaya oowaarya,+ mmwiitthele makhura+ ni mmureerihe, wiira okhale namukuttho aka. 14 Nuumala-vo, mwaaruuhe anaawe, mwaawarihe malaya+ oorakama. 15 Muhaana owiitthela makhura ntoko nwiitthenle anyu apapaya,+ wiira akhalase anamukuttho aka. Wiittheliwa makhura iwo, onoowiiriha awo ni osuulu aya, okhala anamukuttho aka, okhuma niinaano-va orowa ohoolo”.+

16 Moise aahipaka itthu sootheene Yehova aamurumme awe.+ Owo aahiira siisaale ntoko aarummwale awe.

17 Nihiku noopacerya, na mweeri woopacerya, wa eyaakha ya nenli,* etapernaakulu yaaheemexiwa.+ 18 Okathi Moise eemexa awe etapernaakulu, aahihela vathi iyeemexeryo,+ aaheemexa ithaapwa soolupanyiwa,+ aahihela ikopo saya,+ ni aaheemexa maripu aya. 19 Aahaatala ikuwo+ vasulu va etapernaakulu, ikuwo saakhuneela+ etapernaakulu eyo, ntoko siisaale Yehova aamurumme awe.

20 Nuumala-vo, aahikuxa mapawe a Onamoona,+ ohela muhina mwa Nivuku.+ Nave aahihela ikopo+ mpulseerani mwa Nivuku. Nuumala-vo, aahihela etampa+ vasulu va Nivuku+ nno. 21 Moise aahiroiha Nivuku mutapernaakulu, aahihela ekortiina+ nipuro naya, wiira ekutteleleke nivuku na Onamoona,+ ntoko siisaale Yehova aamurumme awe.

22 Nuumala-vo, aahipweha meesa+ mutapernaakulu, moono woolopwana wa etapernaakulu eyo, ottuli wa ekortiina. 23 Nave, aahipweha iphaawu+ vameesa opuro saakhala aya, ohoolo wa Yehova, ntoko siisaale Yehova aamurumme awe.

24 Aahipweha muthuko+ mutapernaakulu, ohoolo wa meesa, moono woothiyana wa etapernaakulu. 25 Moise aahipattiha ixamaniiya+ ohoolo wa Yehova, siisaale ntoko Yehova aamurumme awe.

26 Vano, aahimpweha altaari+ a eweero mutapernaakulu, ohoolo wa ekortiina, 27 wiira nipahiweke-vo+ nsenso noowunkhela,+ siisaale ntoko Yehova aamurumme awe.

28 Aahihela ekortiina+ vamukhora va etapernaakulu.

29 Aahimpweha altaari a yoovaha para opahiwa,+ vamukhora va etapernaakulu, eyo piiyo, etenta ya muthukumano, wiira evahiweke-vo yoovaha para opahiwa+ ni yoovaha ya ipyo, siisaale ntoko Yehova aamurumme awe.

30 Vano, aahipweha epasiya eriyari ya etenta ya muthukumano ni altaari. Nuumala-vo, aahihela maasi mpasiyani-mmo, wiira anamukuttho yiirapiheke.+ 31 Nto Moise, Aroni ni anaawe Aroni, yaaninyawa ni yaanirapiha inawu saya opuro ole. 32 Khula okathi yaakela aya mutapernaakulu aahiiso yaamwaattamela aya altaari, awosa yaaniirapiha,+ siisaale ntoko Yehova aamurumme awe Moise.

33 Wookiseryani, Moise aahipaka nivate+ orukurerihaka etapernaakulu ni altaari. Nave aahihela ekortiina vamukhora va nivate.+

Siiso, Moise aahimaliha muteko ole. 34 Vano, neeku naahikhuneela etenta ya muthukumano. Ovuwa wa Yehova waahisareya mutapernaakulu.+ 35 Moise khaawerya ovolowa mutapernaakulu okhala wiira neeku nne nlelo naari vaavale, ni ovuwa wa Yehova waahisareya mutapernaakulu.+

36 Okathi wootheene aisarayeli yeetta aya+ moothakoni, awo yaanuukulula itenta saya opuro yaamaka aya, khula okathi neeku naakhuma aya vatapernaakulu. 37 Masi, vakhala wiira neeku khinaakhuma, awo nave khiyaakhuma opuro yaamanke aya, mpakha nihiku neeku naakhuma aya.+ 38 Khula opuro aisarayeli yaamaka aya,+ awo yaaniweha wiira othana neeku na Yehova naakhala vatapernaakulu, nave ohiyu mooro waanipatta vasulu va etapernaakulu.