YOOXUUWA

1 Nuumala okhwa Moise murumeyi a Yehova, Yehova aahimuhimeerya Yooxuuwa*+ mwaana a Nuuni, namakhaliherya+ a Moise wiira: 2 “Murumeyi aka Moise, ohookhwa.+ Vano nvenye ni atthu ootheene, mulapuwe muro Yordani, murowe elapo kinrowa aka waavaha atthu a Isarayeli.+ 3 Kinimoovahani khula opuro onrowa anyu ovira, ntoko kaamuleihenrye aka Moise.+ 4 Muttetthe anyu onrowa okhuma woothakoni wa oLiibano ni muro muulupale, muro Eufrate, eyo piiyo, elapo yootheene ya atthu a oHeti,+ mpakha mpantta onikela nsuwa wa Ephareya Yuulupale.*+ 5 Mahiku ootheene munrowa anyu okhala mukumi, khuuvo onrowa wooweryani.+ Kinookhala ni nyuwo,+ ntoko kaari aka ni Moise. Nkinrowa woohiyani nnakhala woonyanyalani.+ 6 Mulipe murima ni mwiilipihe,+ okhala wiira ti nyuwo munrowa owiiriha atthu ala waakhela elapo kaaleihenrye aka waavaha amuhavinre aya.+

7 “Mulipe murima paahi ni mwiilipihe vanceene, ni mweetteleke oratteene malamulo ootheene Moise murumeyi aka oorummyaaweni. Muhihapuwele nnakhala moono woolopwana wala moono woothiyana.+ Mwiira siiso, munookhalanaka ankhili khula opuro onrowa anyu.+ 8 Muhihiye olavula moolumo a nlamulo nla,+ ni musomeke vathi-vathi* othana ni ohiyu, wiira mweetteleke oratteene itthu sootheene silempwale memmo.+ Mwiira siiso, munimweetta saana ni munookhalana ankhili.+ 9 Kiira ti miyo koorummeni wiira mulipe murima ni mwiilipihe? Muhoove, okhala wiira Yehova Muluku anyu onookhala ni nyuwo khula opuro onrowa anyu”.+

10 Nto Yooxuuwa aahaaruma makhulupale a atthu wiira: 11 “Nvira-vire mmuttettheni ni mwaarume atthu wiira: ‘Mulokiherye yoolya, okhala wiira muhina mwa mahiku mararu munrowa olapuwa muro Yordani murowaka elapo Yehova Muluku anyu onrowa awe woovahani, wiira ekhale yawinyu’”.+

12 Nave Yooxuuwa aahaahimeerya atthu a nihimo na Rubeni, na Gadi ni nimeya na nihimo na Manase wiira: 13 “Muhiliyale wiira Moise murumeyi a Yehova aahoorumani wiira:+ ‘Yehova Muluku anyu onnoovahani opuro woomumula. Owo ohoovahani elapo ela. 14 Axaarinyu, aniinyu, ni inama sanyu anrowa okhalaka elapo Moise oovanhaaweni mpantta* ola wa muro Yordani.+ Masi nyuwo anakhotto ootheene ootupa,+ munrowa olapuwa wiira mwawane ekhotto nwaakihaka axinninyu.+ Muhaana waakhaliherya 15 mpakha Yehova waavaha axinninyu opuro woomumula, ntoko oovanhaaweni, wiira awo-tho yaakhele elapo Yehova Muluku anyu onaavaha awe. Nuumala-vo, mutthikeleke elapo nvahiwe anyu wiira ekhale yawinyu, yeeyo Moise murumeyi a Yehova oovanhaaweni, mpantta onikhuma nsuwa wa muro Yordani’”.+

16 Awo yaahimwaakhula Yooxuuwa wiira: “Nnoovara itthu sootheene munirumme anyu, nave nnoorowa khula opuro onrowa anyu oniruma.+ 17 Ntoko siisaale naiwelenle ahu itthu sootheene Moise aahimya awe, siiso-tho nnoowiiwelelani. Masi Yehova Muluku anyu okhale ni nyuwo ntoko ari awe ni Moise.+ 18 Mutthu yoole onrowa woovirikanyani, ni ohiiwelela ele muniruma anyu, ohaana wiiviwa.+ Mulipe murima paahi ni mwiilipihe”.+

2 Ari ene oXitimi, Yooxuuwa mwaana a Nuuni aahaaruma ni mwiitiho alopwana anli+ wiira yawehawehe elapo. Owo aahaaleela wiira: “Murowe mwawehawehe elapo otepexa wene muttetthe wa oYeriko”. Awo yaahirowa elapo eyo, khuphiya owannyawe muthiyana mmosa namararuwa, aihaniwa Rahabi.+ Alukama weiwo. 2 Mwene a oYeriko aahileeliwa wiira: “Alopwana aisarayeli ahoorwa ohiyu wiira ahottele elapo ela”. 3 Tivo mwene a oYeriko aahiruma oleeliwa Rahabi wiira: “Mwaakumiherye ota alopwana ari mpaani mwanyu, okhala wiira aarwenle ohottela elapo ela yootheene”.

4 Masi muthiyana owo aahaakuxa alopwana ale anli owiipithiha. Nuumala-vo, aahihimya wiira: “Ekeekhai wiira alopwana awo yaahirwa owannyaka, masi nkaasuwela opuro yaakhuma aya. 5 Vahalaka wiila, okathi mukhora wa epooma waahala aya vakhaani owaliwa, alopwana awo yaahirowa. Nkisuwenle opuro oronwe aya, masi akhala wiira munimwaatthimakela, munimwaaphwanya”. 6 (Masi, owo aahaakuxa alopwana awo owiipithiha vasulu va empa awe* aakhuneela ni malaxi). 7 Siiso, alopwana ale a mwene yaahaatthimakela alopwana ale anli attharaka ephiro yaarowa oYordani mpakha nipuro noolapuwa.+ Alopwana awo a mwene, akhumaka-ru, mukhora wa epooma waahiwaliwa.

8 Ahinatthi orupa alopwana ale, muthiyana owo aahirowa opuro waari aya. 9 Muthiyana owo aahaahimeerya alopwana ale wiira: “Koosuwela wiira Yehova onimoovahani elapo ela+ ni ootheene ahu ninniwoovani.+ Atthu ootheene a elapo ela annithukumela mwaha wa nyuwo.+ 10 Tthiri, nihiiwa moota Yehova uuminhe awe maasi a ephareya Yooxeerya ohoolo wanyu, okathi mwaakhumme anyu wExiitu.+ Nave nihiiwa etthu mwaawiirinhe anyu mamwene manli a wAmori, Sihoni+ ni Oogi,+ yaawo mwaapwetenxe anyu mpantta mukina* wa muro Yordani. 11 Nuumala wiiwa eyo, naahoova vanceene nave khuuvo aawenrye olipa murima mwaha wa nyuwo, okhala wiira Yehova Muluku anyu tokhanle Muluku wiirimu ni elapo ya vathi.+ 12 Xontte, vano, mukilaphele ni nsina na Yehova, wiira mwaha wa wooreerelani murima, ni nyuwo munimwaareerela murima atthu a etthoko ya tiithi aka. Nave mukivahe esinaale enooniherya wiira munimwiira ele enihimya anyu. 13 Muhiwiive apaapa ni amaama, ni axinnaka ni axirokoraka, ni atthu aya ootheene. Nave munoopole wiira nihikhwe”.+

14 Nto alopwana ale yaahimuhimeerya Rahabi wiira: “Nnoovaha okumi ahu mwaha wa nyuwo! Mwaahaaleele atthu akina ele yaarwenle ahu, nnimooreerelani murima ni nnimwiira ele ehimmye ahu, okathi Yehova onrowa awe onivaha elapo ela”. 15 Nto muthiyana ole, aahaakuruxa ni mukhoyi alopwana ale aavirihaka vaxanelani, okhala wiira empa awe yaakhala mpantta mmosa wa exiri ya epooma. Tthiri, empa awe yaakhala vasulu va ixiri sa epooma.+ 16 Nto muthiyana owo aahaahimeerya alopwana ale wiira: “Mutthyawele muttetthe wa omiyaakoni ni mwaipithe weiwo mahiku mararu, wiira ale anoolupatthani ahoophwanyeni. Nuumala-vo, alopwana awo anoolupatthani yatthika, muroweke owannyu”.

17 Alopwana ale yaahimuleela wiira: “Hiyo khaninrowa okhalana nthowa etthu ela muniirinhe anyu olapha,+ 18 vakhala wiira, okathi ninrwa ahu elapo ela, nyuwo khamunrowa otthukwelela mukhoyi ola wooxeerya vaxanelani-va munikurunxe anyu. Muhaana waathukumanya mpaani-mu apapinyu, amaminyu, ni axinninyu, ni atthu ootheene a etthoko ya apapinyu.+ 19 Vano akhala mutthu onrowa okhumela ota, akhwa vale owo torina mulattu,* hiyo khanrina mulattu. Masi akhala wiira ehasara eyo enoomukhumelela mutthu ori ene mpaani-mu akhwa vale hiyo nirina mulattu. 20 Masi mwamuleela mutthu ele yaarwenle ahu,+ hiyo khanrina mulattu mwaha wa ele eniirinhe anyu olapha”. 21 Owo aahaakhula wiira: “Yiiraneye ntoko mulavunle anyu”.

Siiso aahaahiya arowaka, nto awo yaahirowa. Nuumala-vo, owo aahitthukwelela mukhoyi owo wooxeerya vaxanelani. 22 Vano alopwana ale yaahirowa muttetthe wa omiyaakoni, khukhala weiwo mahiku mararu, mpakha alopwana ale yaalupattha otthika. Alopwana ale a mwene yaahiwaavya iphiro sootheene masi khiyaaphwannye. 23 Alopwana ale anli yaahikhuruwa muttetthe wa omiyaakoni, khulapuwa muro, atthikela wa Yooxuuwa, mwaana a Nuuni. Awo yaahimuleela itthu sootheene saawiiranenle. 24 Vano alopwana ale yaahimuhimeerya Yooxuuwa wiira: “Yehova oonivaha elapo ele yootheene.+ Tthiri atthu ootheene a elapo ele annithukumela mwaha wa hiyo”.+

3 Vano Yooxuuwa ni aisarayeli ootheene yaahivenya voosiisu ene, akhumaka oXitimi,+ aphiya omuro Yordani. Awo yaahiviriha ohiyu weiwo ahinatthi olapuwa muro owo.

2 Nuuvira mahiku mararu, makhulupale+ yaahivira-vira mmuttettheni mootheene, 3 ni yaahaaruma atthu wiira: “Moonaka-ru Nivuku na Nivarihano na Yehova Muluku anyu, nikuxiwaka ni anamukuttho alevi,+ nyuwo nave nvenyeke, mutthareke nivuku nlo. 4 Masi, murakamele nivuku nlo etthu yoowiiraka imeeturu 890.* Muhaattamele nnakhala vakhaani. Siiso, munoosuwela ephiro yootthara, okhala wiira khamutonko otthara ephiro ela”.

5 Vano Yooxuuwa aahaaleela atthu wiira: “Mwiireerihe,+ okhala wiira meelo Yehova onoopaka itthu sootikiniha eriyari anyu”.+

6 Vano Yooxuuwa aahaaleela anamukuttho wiira: “Mukuxe Nivuku+ na Nivarihano ni murowe ohoolo wa atthu”. Siiso yaahikuxa Nivuku na Nivarihano khurowa ohoolo wa atthu.

7 Nto Yehova aahimuhimeerya Yooxuuwa wiira: “Okhuma olelo vaava orowa ohoolo, aisarayeli anoopacerya woottittimihani,+ mwaha woowi kinrowa wooniherya wiira kiri ni nyuwo+ ntoko kaari aka ni Moise.+ 8 Mwaarume anamukuttho anikuxa Nivuku na Nivarihano wiira: ‘Mwaphiya mukerekhere mwa muro Yordani, muhaana weemela mmaasini mwa muro Yordani’”.+

9 Yooxuuwa aahaaleela aisarayeli wiira: “Murwaase-va, nwiriyane moolumo a Yehova Muluku anyu”. 10 Yooxuuwa aahihimya-tho wiira: “Mwaha wa etthu ela, munoosuwela wiira Muluku mukumi ori ni nyuwo.+ Nave moohaanyiherya owo onoowoomola ohoolo wanyu akanaani, aheti, ahivi, aperizi, axirigaxi, amori, ni ayebusi.+ 11 Moone! Nivuku na Nivarihano na Pwiya a elapo yootheene, nnoovira ohoolo wanyu, nrowaka omuro Yordani. 12 Vano, mwaathanle alopwana 12 a mahimo a aisarayeli, khula nihimo mulopwana mmosa.+ 13 Okathi anamukuttho anikuxa Nivuku na Yehova, Pwiya a elapo yootheene, anrowa aya onyakela maasi a muro Yordani, maasi a mpantta onikhuma maasi wa muro Yordani animweemela, ekhaleke ntoko exiri”.+

14 Okathi atthu yaakhumme aya opuro waari aya, ahalaka vakhaani olapuwa muro Yordani, anamukuttho yaakuxa Nivuku+ na Nivarihano, yaahirowa ohoolo wa atthu. 15 Okathi anamukuttho yaakuxa Nivuku, yaaphiyale aya omuro Yordani, ni anyakela maasi a muro owo (okhala wiira muro Yordani waanikhalana maasi manceene, ikhopela sootheene sa muro owo+ okathi wa ohepha), 16 maasi yaakhuma mpantta oniphattuwa awe muro, yaaheemela. Maasi awo, yaaheemela ottaiwene ntoko exiri, epooma ya Adamu, waattamela oSartani. Nave, maasi yaakhuruwa erowaka ephareya ya Araba, eyo piiyo, ephareya ya Maakha,* yaahiwelela. Vano maasi awo yaahikawanyeya, nave atthu yaahilapuwa waattamela oYeriko. 17 Okathi anamukuttho yaakuxa Nivuku na Nivarihano na Yehova yeemenle aya vatthayani voowuuma,+ eriyari ya muro Yordani, aisarayeli ootheene yaahilapuwa eviraka etthaya yowuuma,+ mpakha nloko nootheene olapuwa muro Yordani.

4 Nuumala nloko nootheene na aisarayeli olapuwa muro Yordani, Yehova aahimuhimeerya Yooxuuwa wiira: 2 “Mwaathanle alopwana 12 eriyari ya atthu, khula nihimo mulopwana mmosa,+ 3 ni mwaarume wiira: ‘Mukuxe maluku 12 eriyari ya muro Yordani, opuro yoowo yeemenle aya anamukuttho.+ Mukuxe maluku awo, mwaapwehe opuro onrowa anyu omaka ohiyu’”.+

4 Siiso, Yooxuuwa aahiwiihana alopwana 12 aisarayeli, yaawo aathanlale awe, khula nihimo mulopwana mmosa. 5 Nto Yooxuuwa aahaahimeerya wiira: “Nvire ohoolo wa Nivuku na Yehova Muluku anyu, mpakha eriyari ya muro Yordani. Nave khula mmosa a nyuwo, oteexe mmakhatani nluku nawe, moovarihana ni nummeru na mahimo a aisarayeli, 6 wiira ekhale ntoko esinaale eriyari anyu. Akhala wiira muhoolo aniinyu animookohani wiira: ‘Maluku ala anithoonyerya-ni?’+ 7 Muhaana owaakhula so: ‘Mwaha woowi maasi a muro Yordani yaahikawanyeya ohoolo wa Nivuku+ na Nivarihano na Yehova. Okathi nivuku nlo naalapuxiwe aya omuro Yordani, maasi a muro Yordani yaahikawanyeya. Maluku ala anrowa okhala ethoonyeryo ya mahiku ootheene eniwuupuxerya atthu a Isarayeli’”.+

8 Siiso, alopwana ale aisarayeli, yaahiira ntoko Yooxuuwa aarumme awe. Awo yaahikuxa maluku 12 eriyari ya muro Yordani, ntoko Yehova aamurumme awe Yooxuuwa, moovarihana ni nummeru na mahimo a aisarayeli. Awo yaahikuxa maluku awo, aroiha opuro yoole yaarowa aya omaka ohiyu, apweha weiwo.

9 Nave-tho, Yooxuuwa aahipweha maluku 12 eriyari ya muro Yordani, opuro yoole yeemenle aya anamukuttho yaakunxe Nivuku na Nivarihano.+ Nave maluku awo ari opuro yoowo mpakha olelo-va.

10 Anamukuttho yaakunxe Nivuku, yaaheemela eriyari ya muro Yordani, mpakha opakiwa itthu sootheene Yehova aamurumme awe Yooxuuwa waaleela atthu, moovarihana ni itthu sootheene Moise aamurumme awe Yooxuuwa. Okathi yiiraneya aya eyo, atthu yaanilapuwa moowaakuveya. 11 Atthu ootheene amalaka-ru olapuwa, Nivuku na Yehova ni anamukuttho yaahilapuwa awehiwaka ni atthu.+ 12 Nto nihimo na Rubeni, ni na Gadi, ni nimeya na nihimo na Manase, yaahilapuwa muro yiilokihenrye ene owana ekhotto,+ arowaka ohoolo wa aisarayeli akina, ntoko Moise aalenle awe.+ 13 Anakhotto oowiiraka 40.000, akunxe ene ikaruma saya sa ekhotto, yaahilapuwa ohoolo wa Yehova, arowaka moothakoni mwa oYeriko.

14 Nihiku nle, Yehova aahimukhaliha Yooxuuwa muhooleli muulupale vamaithoni va aisarayeli ootheene,+ nave aisarayeli awo yaahimuttittimiha vanceene mahiku ootheene aari awe mukumi, ntoko siisaale yaamuttittiminhe aya vanceene Moise.+

15 Nuumala-vo, Yehova aahimuhimeerya Yooxuuwa wiira: 16 “Mwaarume anamukuttho, akunxe nivuku+ na Onamoona wiira akhume mmuro Yordani”. 17 Nto Yooxuuwa aahaaruma anamukuttho wiira: “Mukhume mmaasini mwa muro Yordani”. 18 Okathi anamukuttho yaakunxe Nivuku+ na Nivarihano na Yehova, yaakhumme aya eriyari ya muro Yordani, inawu saya sinyakela etthaya yoowuuma, maasi a muro Yordani yaahitthikela ovira, ni yaahimwareela mukerekhere+ ntoko yaari aya khalai.

19 Atthu yaahikhuma omuro Yordani mahiku yeettaka 10, mweeri woopacerya, ni yaahimaka oXiligali+ mmukanoni mpantta onikhuma nsuwa wa oYeriko.

20 Nto maluku 12 yaakuminhe aya mmuro Yordani, Yooxuuwa aahipweha oXiligali.+ 21 Yooxuuwa aahaahimeerya aisarayeli wiira: “Muhoolo anamwane yaakoha axipapaya wiira: ‘Maluku ala anthoonyerya-ni?’,+ 22 ahaana owaakhula so: ‘Aisarayeli yaahilapuwa muro Yordani aviraka etthaya yoowuuma.+ 23 Okathi owo, Yehova Muluku anyu, aahuumiha maasi a muro Yordani ohoolo waya mpakha awo olapuwa, ntoko Yehova Muluku anyu iirale awe okathi uuminhe awe ephareya yooxeerya ohoolo wahu, mpakha hiyo olapuwa.+ 24 Owo aahipaka eyo, wiira atthu ootheene a mulaponi asuwele wiira ntata na Yehova ti noowerya,+ ni wiira nyuwo mmukokhoreleke* Yehova Muluku anyu mahiku ootheene’”.

5 Mamwene ootheene a wAmori,+ yaawo yaakhala mpantta onikela nsuwa wa muro Yordani, ni mamwene ootheene a oKanaani+ yaawo yaattamenle ephareya, yaahiiwa wiira Yehova aahuumiha maasi a muro Yordani ohoolo wa aisarayeli, mpakha hiyo olapuwa. Nuumala wiiwa eyo, mamwene ale yaahithukumela vanceene,+ ni khuuvo aawenrye olipa murima mwaha wa aisarayeli.+

2 Okathi ole Yehova aahimuhimeerya Yooxuuwa wiira: “Mpake miyaalo sa maluku, nwinnuwihe+ ekwaha ya nenli alopwana aisarayeli”. 3 Siiso Yooxuuwa aahipaka miyaalo sa maluku, owinnuwiha alopwana aisarayeli oXibeyati-Haraloti.*+ 4 Etthu yaamwiirinhe Yooxuuwa owinnuwiha alopwana aisarayeli tiila: Alopwana ootheene yaakhumme wExiitu, yaale yaarina iyaakha soorowa okhottoni, yaahikhwa moothakoni okathi yeetta aya mukwaha akhumaka wExiitu.+ 5 Alopwana ootheene yaakhumme wExiitu yaahinnuwihiwa, masi ootheene yaale yaayariwe moothakoni okathi yeetta aya mukwaha akhumaka wExiitu, khiyannuwihiwe. 6 Aisarayeli yaaheetta moothakoni iyaakha 40,+ mpakha nloko nootheene okhwa, eyo piiyo, alopwana yaarina iyaakha soorowa okhottoni yaakhumme wExiitu, yahaamwiiwelenle Yehova.+ Alopwana awo, Yehova aahaalaphela wiira khiyaarowa okela elapo+ yeeyo Yehova aaleihenrye awe amuhavinre aya, wiira aamunivaha,+ elapo yoowaatta eleeti ni oravo.+ 7 Nto owo aahaarantteliha awo ni anaaya.+ Ti yaawo Yooxuuwa aawinnuwinhe awe. Awo yaari oohinnuwihiwa okhala wiira okathi yeetta aya mukwaha, khiyannuwihiwe.

8 Nuumala alopwana ootheene a nloko nne winnuwihiwa, awo khiyaakhumme opuro waari aya mmuttettheni, mpakha openuwa.

9 Vano Yehova aahimuleela Yooxuuwa wiira: “Olelo kihookumihani etthu yoowuuliha muru, yaawiirihani oveehiwa ni atthu a wExiitu”. Siiso, opuro owo onniihaniwa Xiligali*+ mpakha olelo-va.

10 Aisarayeli khiyaakhumme mmuttettheni mwa oXiligali. Nihiku 14 na mweeri yoowo,+ vahalaka wiila, yaahimwiira paasikha moothakoni mwa oYeriko. 11 Mmeeloni mwaya nuumala paasikha, nihiku nenle yaahipacerya olya itthu sa elapo ele, eyo piiyo, iphaawu soohiheliwa eferemento+ ni ipyo soowaarikiwa. 12 Okhuma nihiku naapacenrye aya olya itthu sa elapo ele, emana khiyaamonre-tho. Aisarayeli khiyaalyiiye-tho emana.+ Eyaakha eyo yaahipacerya olya itthu sa elapo ya oKanaani.+

13 Okathi Yooxuuwa aattamenle awe oYeriko, aahimoona mulopwana+ eemenle ene ohoolo wawe, okunxe ene espaata* mmatatani mwawe.+ Yooxuuwa aahimwaattamela khumukoha wiira: “Nyuwo muri mpantta ahu aahiiso muri mpantta wa awanani ahu?” 14 Owo aahimwaakhula wiira: “Nnaari, kiruuye ntoko mukhulupale a anakhotto a Yehova”.+ Siiso, Yooxuuwa aahikokhora, uurama mpakha vathi, onamukoha oriki: “Exeeni pwiya aka oniphavela awe omuhimeerya murumeyi awe?” 15 Mukhulupale a anakhotto a Yehova aahimwaakhula Yooxuuwa wiira: “Murule isantaalya sanyu, okhala wiira opuro ori anyu ti woowaarya”. Niinaano-ru, Yooxuuwa aahiira siiso.+

6 Vano, epooma ya oYeriko yaahiwaliwa oratteene mwaha wa aisarayeli. Khuuvo mutthu aakhuma, nave khuuvo mutthu aakela.+

2 Yehova aahimuhimeerya Yooxuuwa wiira: “Miyo kihoovahereryani epooma ya oYeriko, ni mwene aya, ni anakhotto aya oowerya mmatatani mwanyu.+ 3 Nyuwo anakhotto ootheene, muhaana orukurerya epooma eyo, khula nihiku ekwaha emosa. Muhaana opaka eyo mahiku 6. 4 Mwaathanle anamukuttho 7, yaawo anrowa okuxa malope a manyaka 7 a epwittipwitthi, anrowa okhala ohoolo wa Nivuku na Nivarihano. Masi, nihiku na neethanu nenli, murukureryase epooma eyo ikwaha 7, nave anamukuttho ahaana woopa malope.+ 5 Okathi onrowa aya woopiwa malope awo, atthu yiiwaka-ru, ahaana okhuwela vanceene ntoko anakhotto. Siiso, ixiri sa epooma sinrowa omora,+ nave atthu ahaana otthimakela epooma eyo”.

6 Nto Yooxuuwa mwaana a Nuuni, aahiwiihana anamukuttho aaleela wiira: “Mukuxe Nivuku na Nivarihano, nave anamukuttho 7, ahaana okuxa malope a manyaka a ipwittipwitthi, ni orowa ohoolo wa Nivuku na Yehova”.+ 7 Vano Yooxuuwa aahaaleela atthu wiira: “Murowe, mwarukurerye epooma, nave atoropa akunxe ikaruma sa ekhotto,+ arowe ohoolo wa nivuku na Yehova”. 8 Atthu yaahiira ntoko saarummwale aya ni Yooxuuwa. Anamukuttho 7, yaawo yaari ohoolo wa Yehova, ekunxe ene malope a manyaka a epwittipwitthi, yaaneetta yoopaka malope awo. Nave, Nivuku na Nivarihano na Yehova naanaatthara. 9 Atoropa yaakunxe ikaruma sa ekhotto, yaaneetta ohoolo wa anamukuttho yoopa malope, nave atoropa yaari ottuli, yaanitthara Nivuku na Nivarihano, okathi voopiwa aya malope voohihiyererya.

10 Yooxuuwa aahaaruma atthu wiira: “Muhikhuwele. Mmaale paahi. Muhilavule etthu mpakha nihiku ninrowa aka woohimeeryani wiira: ‘Mukhuwele!’ Nto nihiku nenlo mukhuweleke”. 11 Owo aahiruma orukurerihiwa nivuku na Yehova epooma yootheene, ekwaha emosa. Nuumala-vo, atthu awo yaahitthikela omuttettheni, aviriha ohiyu weiwo.

12 Mmeeloni mwaya voosiisu, Yooxuuwa ni anamukuttho, yaahikuxa Nivuku+ na Nivarihano na Yehova. 13 Nto anamukuttho 7 yaakunxe malope 7 a manyaka a epwittipwitthi, yaaneetta ohoolo wa nivuku na Yehova, erumihaka malope aya voohihiyererya. Atoropa yaakunxe ikaruma sa ekhotto, yaanirowa ohoolo wa anamukuttho, nave atoropa akina yaari ottuli yaanitthara nivuku na Yehova, okathi voopiwa aya malope awo voohihiyererya. 14 Awo yaahirukurerya epooma eyo ekwaha emosa, nihiku na nenli, nuumala-vo yaahitthikela mmuttettheni. Yaahiira siiso mahiku 6.+

15 Nihiku na neethanu nenli, yaahivenya oxaka, voosiisu ene yaahirukurerya epooma yootheene ikwaha 7. Nihiku nenno paahi, ti yaarukurenrye aya epooma eyo, ikwaha 7.+ 16 Vano nuumala orukurerya ekwaha ya neethanu nenli, anamukuttho yaahoopa malope, nto Yooxuuwa aahaaleela atthu wiira: “Mukhuwele,+ okhala wiira Yehova ohoovahani epooma ela! 17 Epooma eyo ni itthu sootheene siri mpooma-mmo, sihaana opwetexiwa voomalela,+ itthu iyo sootheene ti sa Yehova. Rahabi+ namararuwa ni atthu ootheene ari mpaani mwawe paahi muhiwiive, okhala wiira aahiwiipithiha alopwana ale naarumme ahu.+ 18 Masi, muhivare itthu iyo sinrowa opwetexiwa,+ okhala wiira opaka eyo pooti owiirihani ophavela ni okuxa itthu iyo.+ Opaka eyo wanwiiriha aisarayeli ootheene opwetexiwa ni waakumiherya ehasara.*+ 19 Masi eparatha yootheene, ni eweero, ni itthu sootheene sa ekoopiri, ni sa iyuuma, ti soowaarya ni ti saawawe Yehova.+ Itthu iyo sihaana oroihiwa empa enisukiwa muhakhu wa Yehova”.+

20 Okathi yoopiwe aya malope, atthu yaahikhuwela.+ Nuumala atthu wiiwa oruma wa malope ni okhuwela ntoko anakhotto, ixiri sa epooma saahimora.+ Vano atthu ootheene yaahitthimakela mpooma, akuxa epooma eyo. 21 Awo yaahiwiivakasa ni espaata* atthu ootheene a epooma ele: alopwana ni athiyana, amiravo ni atthu oowuuluvala, ipooyi, ipwittipwitthi, ni apuuru.+

22 Yooxuuwa aahaahimeerya alopwana ale anli yaahottenle elapo ele oriki: “Murowe owannyawe muthiyana ole namararuwa, mwamukumiherye ota ni amusi awe ootheene, ntoko mwaamuleihenrye anyu”.+ 23 Siiso, alopwana ale yaahirowa owannyawe Rahabi, amukumiherya ota vamosa ni paapa awe, maama awe, axinnawe, ni atthu ootheene aarina awe. Alopwana awo, yaahaakumiherya ota amusi ootheene a muthiyana ole,+ yaapweha opuro woovareleleya, ota wa muttetthe wa aisarayeli.

24 Moottharelana, yaahipaha epooma ni itthu sootheene saari mpooma-mmo. Masi eparatha, eweero, ni itthu sa ekoopiri ni sa eyuuma, yaahiroiha empa enisukiwa muhakhu wa Yehova.+ 25 Rahabi namararuwa, ni atthu a etthoko ya paapa awe, ni atthu ootheene aarina awe, khiyaiviwe ni Yooxuuwa.+ Muthiyana owo onnikhala ni aisarayeli mpakha olelo-va,+ mwaha woowi aahiwiipithiha anamahottela yaarummwale ni Yooxuuwa ohottela oYeriko.+

26 Okathi owo, Yooxuuwa aahilapha* oriki: “Otakhaliwe ohoolo wa Yehova, mutthu yoole onrowa otthikela oteka epooma ya oYeriko. Okathi onrowa awe waapaceriha alisenso, onookhweliwa mwanawe oopacerya oyariwa, nave okathi onrowa awe ohela mikhora, onookhweliwa mwanawe ookiserya oyariwa”.+

27 Siiso, Yehova aari ni Yooxuuwa, nto ovuwa wa Yooxuuwa*+ waahisuweliwa elapo yootheene.+

7 Masi, aisarayeli khiyaapanke ntoko Muluku saarumme awe, mwaha wa itthu saahimmwale wiira saahaana opwetexiwa, okhala wiira Akaani,+ mwaana a Karmi, mwaana a Zabidi, mwaana a Zerahi, a nihimo na Yuda, aahikuxa itthu saahimmwale wiira saahaana opwetexiwa.+ Nto Yehova aahaaviruwela aisarayeli.+

2 Ari ene oYeriko, Yooxuuwa aahaaruma alopwana akina wiira yahottele muttetthe wa Ayi.+ Muttetthe owo waattamenle oBethi-Aveni ni mpantta onikhuma nsuwa wa oBeteli.+ Yooxuuwa aahaaleela alopwana awo wiira: “Murowe, mwahottele muttetthe owo”. Siiso, alopwana awo yaahirowa, ahottela muttetthe wa Ayi. 3 Nuumala ohokolowela wa Yooxuuwa, alopwana ale yaahimuleela wiira: “Khivanreerela orowa atthu ootheene. Alopwana oowiiraka 2.000 wala 3.000, anoophiyerya wiira yaxintte muttetthe wa Ayi. Muhaakhulumule atthu ootheene mwaarumaka orowa, okhala wiira atthu a muttetthe ole ari vakhaani”.

4 Nto alopwana oowiiraka 3.000, yaahirowa muttetthe ole, masi awo yaahaatthyawa alopwana a muttetthe wa Ayi.+ 5 Alopwana a muttetthe wa Ayi, yaahiwiiva alopwana 36 aisarayeli, nave yaahiwoomola aisarayeli okhuma ota wa epooma mpakha oXebarimi, awiivaka mpakha oneri. Nto aisarayeli ale, khiyaawenrye olipa murima.*

6 Siiso, Yooxuuwa ni makhulupale makina aisarayeli, yaahikhera malaya aya, akokhora, yuurama mpakha vathi ohoolo wa nivuku na nivarihano na Yehova mpakha makaaripi. Nave awo yaanihela ntthupi mmuru. 7 Yooxuuwa aahihimya wiira: “Nyuwo Pwiya Muulupalexa Yehova, xeeni muhalaka waalapuxa atthu ala muro Yordani? Niireke mwaaphavela waavahererya wiira apwetexiwe ni atthu a wAmori? Naamuxukhurela naahanle mpantta mukina* wa muro Yordani! 8 Khoo Yehova, mukilevelele, kinrowa ohimya exeeni vano aisarayeli yaatthyanwe aya awanani aya? 9 Okathi atthu a oKanaani ni atthu ootheene anikhala elapo ela anrowa aya wiiwa eyo, awo anoonirukurerya ni anoomala-maliha nsina nahu mulaponi. Nto exeeni munrowa anyu opaka mwaha wa nsina nanyu nuulupalexa?”+

10 Yehova aahimwaakhula Yooxuuwa wiira: “Mweemele! Xeeni muuramenle anyu vathi? 11 Aisarayeli aattheka. Awo aahonona nivarihano naka+ kaarumme aka weettela. Aakuxa itthu sikina saahimmwale wiira saahaana opwetexiwa.+ Ahiiya,+ atakaaherya voohisuweliwa ni mireerelo saya.+ 12 Tivo, aisarayeli khanrowa waawerya awanani aya. Awo anoorukunuwa ni animwaatthyawa awanani aya mwaha woowi ahiilamula opwetexiwa. Nkinrowa okhala ni nyuwo vahikhanle wiira siroohononiwa eriyari anyu, itthu saahimmwale wiira saahaana opwetexiwa.+ 13 Nvenye, mwaareerihe atthu!+ Mwaaleele wiira: ‘Mwiireerihe para meelo, okhala wiira Yehova Muluku a Isarayeli onihimya so: “Nyuwo aisarayeli, etthu ehimmwale wiira ehaana opwetexiwa eri eriyari anyu. Nyuwo khamunrowa waawerya awanani anyu, vahikhanle wiira murookumiha eriyari anyu, etthu ehimmwale wiira ehaana opwetexiwa. 14 Meelo voosiisu, muhaana othukumana opuro omosa mahimo ootheene: nihimo ti nihimo, nihimo nenle Yehova onrowa awe othanla,+ nihaana orowa ohoolo emusi ti emusi; emusi yeele Yehova onrowa awe othanla ehaana orowa ohoolo etthoko ti etthoko; etthoko yeele Yehova onrowa othanla ehaana orowa ohoolo mulopwana ti mulopwana. 15 Mulopwana yoole onrowa ophwanyaniwa etthu ehimmwale wiira ehaana opwetexiwa, onoopahiwa ni mooro,+ ni itthu sawe sootheene, mwaha woowi oohonona nivarihano+ na Yehova, ni oopaka etthu yoowuuliha muru wIsarayeli”’”.

16 Mmeeloni mwaya, Yooxuuwa aahivenya voosiisu ene, ni aahiwiiriha aisarayeli orowa ohoolo, nihimo ti nihimo, nto Muluku aahithanla nihimo na Yuda. 17 Yooxuuwa aahiiriha imusi sa Yuda orowa ohoolo, nto Muluku aahithanla emusi ya Zerahi.+ Nuumala-vo, aahiiriha emusi ya Zerahi orowa ohoolo, mulopwana ti mulopwana, nto Muluku aahithanla etthoko ya Zabidi. 18 Moottharelana, Yooxuuwa aahiiriha etthoko ya Zabidi orowa ohoolo, mulopwana ti mulopwana, nto Muluku aahimuthanla Akaani mwaana a Karmi, mwaana a Zabidi, mwaana a Zerahi, a nihimo na Yuda.+ 19 Vano Yooxuuwa aahimuleela Akaani wiira: “Xontte, mwanaka, mmuttittimihe Yehova Muluku a Isarayeli ni mmuleele etthu epanke anyu. Xontte, mukileele ele epanke anyu. Muhikikhuwe etthu”.

20 Akaani aahimwaakhula Yooxuuwa wiira: “Veekeekhai, ti miyo kimutthekenle Yehova Muluku a Isarayeli, etthu kiirale aka tiila: 21 Okathi kaawenhe aka itthu iye, kaahoona nlaya nooreerexa na mukhulupale a oXineyari+ ni ixeekele* 200 sa eparatha ni eweero yaalemela ixeekele 50, itthu iyo saahikisivela, kikuxa. Itthu iyo kivinthe mutentani* mwaka, musurukhu kiroothipela”.

22 Niinaano-ru, Yooxuuwa aahaaruma atthu orowela itthu iyo, nto awo yaahirowa otentani, atthimakaka. Mutentani mwawe Akaani taavinthe awe nlaya, nave musurukhu aapwenhe vathi va nlaya nlo. 23 Nto awo yaahikumiha itthu iyo mutentani, ni yaahiroiha wa Yooxuuwa ni wa aisarayeli ootheene. Nave yaahipweha ohoolo wa Yehova. 24 Yooxuuwa ni aisarayeli ootheene aarina awe, yaahimukuxa Akaani+ mwaana a Zerahi, vamosa ni eparatha, ni nlaya nooreerexa, ni epaara ya eweero,+ hoothe ni anaawe axilopwana, anaawe axithiyana, ipooyi sawe, apuuru awe, ipwittipwitthi sawe, ipuri sawe, etenta awe, ni itthu sootheene aarina awe. Nuumala-vo, yaahimuroiha oxepani wa wAkori.+ 25 Yooxuuwa aahimuhimeerya wiira: “Xeeni munikumihenrye anyu ehasara?*+ Yehova onimookumiheryani ehasara olelo”. Nto aisarayeli ootheene yaahinvonyakasa maluku Akaani+ ni emusi awe, nuumala-vo yaahaapaha ni mooro.+ Ti siiso yaiviwe aya ni maluku. 26 Vamirutthuni vaya, yaahuukela maluku manceene yaawo anikhala mpakha olelo-va. Siiso, onanariwa wa Yehova waahivukuwa.+ Ti maana aya opuro ole oniihaniwa aya nxepa na wAkori* mpakha olelo-va.

8 Vano Yehova aahimuleela Yooxuuwa wiira: “Muhoove, nnakhala muhithukumele.+ Mwaakuxe anakhotto ootheene murowe mwatuphele muttetthe wa Ayi. Miyo kihoovahereryani mwene a Ayi, atthu awe, epooma awe, ni muttetthe awe.+ 2 Ntoko mwiirinhe anyu epooma ya oYeriko ni mwene aya,+ siiso-tho muhaana wiiriha epooma ya Ayi ni mwene aya. Masi nyuwo pooti okuxa itthu munrowa anyu ophwanya mpooma-mmo, vamosa ni inama. Mwaathanle anakhotto akina wiira yiipithe ottuli wa epooma”.

3 Siiso, Yooxuuwa ni anakhotto ootheene yaahirowa otuphela epooma ya Ayi. Yooxuuwa aahaathanla anakhotto ootupa 30.000, nto khwaaruma orowa ohiyu. 4 Yooxuuwa aahaaruma oriki: “Murowe mwiipithe ottuli wa epooma. Muhirakamele vanceene epooma eyo, ni mukhale oolikana ene. 5 Miyo ni atthu ootheene kirina aka, ninrowa waattamela epooma. Okathi atthu a mpooma-mmo, anrowa aya ophavela owana ni hiyo,+ ntoko woopaceryani, ninrowa waatthyawa. 6 Okathi anrowa aya onoomola, nnimwaarakamihela epooma, maana anrowa ohimyaka so: ‘Awo anoonitthyawa ntoko woopaceryani’.+ Siiso ninrowa waatthyawa. 7 Nto nyuwosa, muhaana ovenya opuro mwaipinthe anyu, mutuphele epooma. Yehova Muluku anyu onrowa woovahereryani epooma eyo. 8 Mukuxaka-ru epooma eyo, muhaana opaha.+ Muhaana opaka eyo muttharaka nuulumo na Yehova. Ela ti yooruma kinoovahaakani”.

9 Yooxuuwa aahaaruma anakhotto awe orowa wiipitha mpantta mukina wa epooma. Awo yaahiipitha eriyari ya oBeteli ni Ayi mpantta onikela nsuwa wa Ayi. Masi Yooxuuwa aahiviriha ohiyu ole ni anakhotto akina.

10 Nuumala Yooxuuwa ovenya voosiisu ene, aahaathukumanya atoropa. Moottharelana, owo ni makhulupale a aisarayeli, yaahirowa muttetthe wa Ayi. 11 Anakhotto ootheene+ aarina awe, yaaheetta khurowa ohoolo wa epooma eyo. Awo yaahimaka onorti wa Ayi. Nto eriyari ya anakhotto awo ni epooma ya Ayi, yaahikhala nxepa. 12 Yooxuuwa, aahaathanla alopwana oowiiraka 5.000, ni aahaaruma wiipitha+ eriyari ya oBeteli+ ni Ayi, mpantta onikela nsuwa wa epooma. 13 Siiso, anakhotto ale yaahimaka onorti wa epooma,+ nave ale yaahanle ottuli yaahimaka mpantta onikela nsuwa wa epooma.+ Ohiyu yoole, Yooxuuwa aahirowa mpakha oxepani.

14 Nuumala mwene a epooma ya Ayi waaweha anakhotto a Yooxuuwa, aahivenya niinaano-ru ni anakhotto a epooma ele voosiisu ene, wiira awane ni aisarayeli opuro waawehana ni oxepani. Masi mwene ole, khaasuwela wiira anakhotto akina yaaroomwiipithela ottuli wa epooma. 15 Okathi alopwana a epooma ya Ayi yaatuphenle aya aisarayeli, Yooxuuwa ni aisarayeli ootheene yaahitthyawa attharaka estaraata yaarowa woothakoni.+ 16 Vano alopwana akina yaahanle mpooma, yaahiireliwa wiira ewoomole aisarayeli. Okathi yaamoomola aya Yooxuuwa, awo yaanitepa orakamela epooma. 17 Khuuvo mulopwana a epooma ya Ayi ni oBeteli, ahaaronwe owoomola aisarayeli. Awo yaahihiya epooma yoohuleya ene, anawoomola aisarayeli.

18 Yehova aahimuleela Yooxuuwa wiira: “Muthoonye epooma ya Ayi ni nivaka mukunxe anyu mmatatani mwanyu,+ okhala wiira kinrowa woovahereryani epooma eyo”.+ Nto Yooxuuwa aahithoonya epooma ya Ayi ni nivaka aakunxe awe mmatatani mwawe. 19 Okathi Yooxuuwa aathoonyale awe epooma eyo, anakhotto awe yaahivenya moowaakuveya opuro waipinthe aya, nto yaahitthimakela epooma eyo, atuphela. Vano niinaano-ru, yaahipaha epooma eyo ni mooro.+

20 Okathi atthu a epooma ya Ayi yaarukununwe aya, yaahiweha mwiixi waatthuwa opooma iwe, nto khiyaawerya-tho otthyawela opuro mukina. Vano anakhotto aisarayeli yaatthyawela moothakoni, yaahaarukunuwela ale yaawoomola. 21 Okathi Yooxuuwa ni aisarayeli ootheene yaawenhe aya wiira anakhotto yaipinthe yaahikuxa epooma, ni yaawenhe aya mwiixi waatthuwa opooma iwe, yaahirukunuwa, yaatuphela anakhotto a epooma ya Ayi. 22 Anakhotto aisarayeli yaakunxe epooma, yaahikhuma, arowa waatuphela awanani aya. Siiso, anakhotto a epooma ya Ayi yaari eriyari: aisarayeli akina mpantta ola nno, akina mpantta ole iwe. Nto aisarayeli yaahiwiivakasa anakhotto ootheene, khuuvo ooponwe nnakhala otthyawa.+ 23 Masi, yaahinvara mwene a epooma ya Ayi+ ori ene mukumi, amuroiha wa Yooxuuwa.

24 Aisarayeli yaahiwiivakasa anakhotto a epooma ya Ayi woothakoni weiwo yaatthimakela aya. Aisarayeli yaahiwiivakasa ni espaata* anakhotto a epooma ya Ayi woothakoni, mpakha waamaliha ootheene aya. Nuumala-vo awo yaahitthikela epooma ya Ayi, awiivakasa ni espaata* ale yaahanle. 25 Atthu ootheene yaakhwiiye nihiku nne, alopwana ni athiyana, yaari 12.000, eyo piiyo, atthu ootheene a epooma ya Ayi. 26 Yooxuuwa khaahiyale othoonya epooma ele ni nivaka aakunxe awe mmatatani,+ mpakha atthu ootheene a epooma ya Ayi opwetexiwa.+ 27 Vano, aisarayeli yaahikuxa inama ni itthu sa epooma ele, ntoko Yehova aamurumme awe Yooxuuwa.+

28 Nto Yooxuuwa aahipaha epooma ya Ayi, khukhaliha milepe* mahiku ootheene,+ ntoko siri aya mpakha olelo-va. 29 Yooxuuwa aahimwiiva ni aahimuthomeya vamwirini mwene a epooma ya Ayi mpakha makaaripi. Nto nsuwa nihalaka osama, Yooxuuwa aahiruma okuruxiwa murutthu wa mwene owo vamwirini.+ Nuumala-vo, murutthu owo waahiriheliwa vamukhora wa epooma, ni yaahuukeliwa maluku manceene vasulu vaya. Maluku awo annikhala opuro yoowo, mpakha olelo-va.

30 Okathi owo, Yooxuuwa aahimutekela altaari Yehova Muluku a Isarayeli omwaako Ebali.+ 31 Owo aahipaka eyo, ntoko Moise, murumeyi a Yehova, aarumme awe aisarayeli, ntoko siisaale silempwale aya muliivuruni ya Nlamulo+ na Moise, wiira: “Altaari etekiwe ni maluku maalupale, ehirumeeliwe nnakhala ekaruma emosa ya eyuuma”.+ Valtaari owo, aahivahiwa Yehova soovaha para opahiwa ni mikuttho sa opatthani.+

32 Yooxuuwa aahilepa vasulu va maluku awo ekoopiya ya Nlamulo,+ nenno Moise aalempe awe ohoolo wa aisarayeli.+ 33 Aisarayeli ootheene, ni axitokweene, ni makhulupale, ni alipa oophuka yaaheemela ipantta soopiili sa Nivuku na Nivarihano, ohoolo wa anamukuttho alevi, yaawo yaakunxe Nivuku na Nivarihano na Yehova. Opuro owo, yaahikhala anamurwa ni aisarayeli axineene.+ Nimeya na atthu awo, yeemenle ohoolo wa mwaako Xerizimi, nimeya nikina yeemenle ohoolo wa mwaako Ebali+ (ntoko Moise murumeyi a Yehova aarumme awe),+ wiira areelihiwe atthu a Isarayeli. 34 Moottharelana, Yooxuuwa aahisoma voowiiwanyeya moolumo ootheene a Nlamulo+ na Moise, eyo piiyo, moolumo ooreeliha+ ni ootakhaliha,+ moovarihana ni itthu sootheene saalempwale muliivuruni ya Nlamulo. 35 Yooxuuwa aahaasomela voowiiwanyeya aisarayeli ootheene moolumo ootheene aarummwale awe ni Moise.+ Opuro owo, yaahikhala athiyana, anamwane, ni anamurwa+ yaakhala* eriyari ya aisarayeli.+

9 Mamwene ootheene yaakhala mpantta onikela nsuwa wa muro Yordani,+ yaahiiwa ele yiiraneyale. Nto ale yaakhala muttetthe wa omiyaakoni, oXefela, ni ootheene ale yaattamenle Ephareya Yuulupale,*+ ni ale yaakhala ohoolo wa oLiibano, eyo piiyo, aheti, amori, akanaani, aperizi, ahivi, ni ayebusi,+ 2 yaahiiraana wiira awane ekhotto ni Yooxuuwa ni aisarayeli.+

3 Nave-tho, atthu yaakhala oXibeyoni,+ yaahiiwa ele Yooxuuwa iirinhe awe epooma ya oYeriko+ ni epooma ya Ayi.+ 4 Nto awo, yaahipaka itthu mwa miruku, yaahihela yoolya isaakho sa khalai ni yaahaareya apuuru aya. Yaahikuxa-tho mirupa sa eviinyu soothaala ni soottotthiwa. 5 Nave, yaahiwara isantaalya soolala ni soottotthiwa, ni yaahiwara malaya oowuuluvala. Yaahikuxa-tho iphaawu soowuuma ni soonyakatteya. 6 Siiso, maxibeyoni yaahirowa wa Yooxuuwa ni alopwana aisarayeli omuttettheni wa oXiligali,+ amuleela wiira: “Hiyo ninkhuma elapo ya ottaiwene. Vano mpake ompatthani ni hiyo”. 7 Masi, alopwana aisarayeli yaahaahimeerya ahivi+ awo wiira: “Pooti wiira munikhala vakhiviru ni hiyo. Nto ninrowa owerya sai opaka ompatthani ni nyuwo?”+ 8 Awo yaahimwaakhula Yooxuuwa wiira: “Hiyo na arumeyi anyu”.*

Vano, Yooxuuwa aahaakoha wiira: “Nyuwo mwa pani? Munkhuma vai?” 9 Awo yaahimwaakhula Yooxuuwa ariki: “Arumeyi anyu anikhuma elapo ya ottaiwene,+ mwaha wa nsina na Yehova Muluku anyu. Tthiri nihiiwa ovuwa ni itthu sootheene opanke awe elapo ya wExiitu.+ 10 Nihiiwa-tho itthu sootheene owiirinhe awe mamwene manli a wAmori yaari mpantta mukina* wa muro Yordani, eyo piiyo, mwene Sihoni+ a oHexeboni, ni mwene Oogi+ a oBaxani, yoowo aakhala wAxitarothi. 11 Nto, makhulupale ahu ni atthu ootheene anikhala elapo ahu, aanihimeerya wiira: ‘Mukuxe yoolya ni mweette mukwaha, murowe mwakumane ni atthu awo. Mwaahimeerye wiira: “Hiyo nnookhala arumeyi anyu;+ nto mpake ompatthani ni hiyo”’.+ 12 Iphaawu sahu iya, siira sooxiwe ene niinaano nihiku naavennye ahu owannyihu nirwaaka-va. Masi vano mooneke, sihuuma ni soonyakatteya.+ 13 Mirupa sahu iya sa eviinyu, saari isya okathi naahenle ahu eviinyu, masi vano, soophuleya.+ Nave, malaya ahu ni isantaalya sahu, soothaala, mwaha wa mukwaha woorakama neettale ahu”.

14 Siiso, alopwana aisarayeli yaahikuxa* soolya sikina sa atthu a oXibeyoni, masi, khiyaamukonhe Yehova.+ 15 Siiso, Yooxuuwa aahiiwanana murettele naawo+ ni aahipaka ompatthani wiira khaarowa owiiva. Nave, makhulupale a muloko, yaahaaleiherya etthu emosa-ru.+

16 Yaavirale aya mahiku mararu, nuumala opaka ompatthani ni atthu ale, aisarayeli yaahiiwa wiira atthu ale yaakhala vakhiviru, yaarimwaattamana. 17 Vano, aisarayeli yaaheetta mukwaha wa mahiku mararu wiira aphiye ipooma iyo. Ipooma iyo, saihaniwa Xibeyoni,+ Kefira, Beerothi, ni Kiriyathi-Yarimi.+ 18 Masi, aisarayeli khiyaawiivakanse atthu awo, mwaha woowi makhulupale a muloko, yaahileiherya ohoolo wa Yehova+ Muluku a Isarayeli, wiira khiyaarowa owiiva. Siiso, muloko wootheene waahipacerya waalavula moohiloka makhulupale awo. 19 Vano, makhulupale ootheene yaahihimeerya muloko wootheene wiira: “Okhala wiira naahileiherya ohoolo wa Yehova Muluku a Isarayeli, khanneemiheriwa owiiva. 20 Etthu ninrowa ahu opaka tiila: khaninrowa owiiva, wiira Muluku ohinanariwe ni hiyo, mwaha wa etthu naaleihenrye ahu”.+ 21 Siisaale makhulupale yaaleihenrye aya maxibeyoni, yaahihimya-tho wiira: “Nihiwiive, masi anrowa othayaka ikhuni, ni waarikela maasi aisarayeli ootheene”.

22 Yooxuuwa aahiwiihana, aakoha wiira: “Xeeni muniwonke anyu muhimyaka wiira mwaakhuma elapo yoottaiwene, mukhalaka vakhiviru vahu?+ 23 Okhuma olelo vaava orowa ohoolo, nyuwo mootakhaliwa.+ Mahiku ootheene munrowa okhalaka ipottha, muthayaka ikhuni, ni murikelelaka maasi empa ya Muluku aka”. 24 Atthu awo yaahimwaakhula Yooxuuwa wiira: “Arumeyi anyu ahiira eyo, okhala wiira ahiiwa oratteene ohimmwaka wiira Yehova Muluku anyu, aahimuruma murumeyi awe Moise, wiira oovaheeni elapo ela, ni aamala-malihe ohoolo wanyu, atthu ootheene a elapo ela.+ Nto, naahoova wiivakasiwa mwaha wa nyuwo,+ tivonto nipanke ahu etthu ela.+ 25 Vano, hiyo nri mmatatani mwanyu. Muniiriheke ele enoona anyu okhala yooloka ni ya xariya”. 26 Ela ti etthu Yooxuuwa aapanke awe: aahiwoopola mmatatani mwa aisarayeli, nto aisarayeli awo khiyaawiivale axibeyoni. 27 Masi, okhuma nihiku nenle, Yooxuuwa aahaakhaliha alipa-oothaya ikhuni ni alipa-oorikelela maasi,+ yaaroihelaka aisarayeli ootheene, ni altaari a Yehova, opuro yoowo Muluku aarowa awe othanla.+ Awo, anniira siiso mpakha olelo-va.+

10 Mwene Adonizedeki a oYerusalemu, aahiiwa wiira Yooxuuwa aahikuxa epooma ya wAyi, ni aahipwetexa, iirihaka epooma ya wAyi ni mwene aya+ etthu emosa-ru iirinhe awe epooma ya oYeriko ni mwene aya.+ Owo aahiiwa-tho wiira axibeyoni yaahipaka ompatthani ni aisarayeli,+ anakhala eriyari aya. 2 Nuumala wiiwa eyo, mwene Adonizedeki aahoova vanceene,+ mwaha woowi epooma ya oXibeyoni yaari epooma yuulupale yaalikana ni ipooma sinilamuleliwa ni mwene. Epooma eyo, yaari yuulupale ovikana epooma ya wAyi,+ nave alopwana ootheene a epooma eyo yaari anakhotto. 3 Nto, Adonizedeki mwene a oYerusalemu, aahiruma oleeliwa Hohami, mwene a oHebroni,+ Pireyami mwene a oYarimuthi, Yafiya mwene a oLakixi, ni Debiri mwene a wEgloni,+ wiira: 4 “Murwe mukikhaliherye waatuphela axibeyoni, okhala wiira aapaka ompatthani ni Yooxuuwa vamosa ni aisarayeli”.+ 5 Siiso, mamwene mathanu a wAmori,+ eyo piiyo, mwene a oYerusalemu, mwene a oHebroni, mwene a oYarimuthi, mwene a oLakixi, ni mwene a wEgloni, yaahithukumana vamosa ni anakhotto aya, arowa omuttettheni wiira yawane ni axibeyoni.

6 Vano, atthu a oXibeyoni yaahiruma oleeliwa Yooxuuwa mmuttettheni mwa oXiligali,+ wiira: “Muhaanyanyale arumeyi anyu.+ Murwe, mwaakuveke! Munoopole ni munikhaliherye! Mamwene ootheene a wAmori a muttetthe wa omiyaakoni, aathukumana wiira anituphele”. 7 Nto, Yooxuuwa aahikhuma oXiligali, ni atoropa ootheene hoothe ni anakhotto oowerya.+

8 Vano, Yehova aahimuleela Yooxuuwa wiira: “Muhiwoove,+ okhala wiira kihoovahereryani mmatatani mwanyu,+ awanani anyu awo. Nto khuuvo onrowa wooweryani”.+ 9 Yooxuuwa aahaatuphela awanani awe mootutuxerya, nuumala weetta ohiyu wootheene okhumaka oXiligali. 10 Yehova aahaavela-veliha atthu a wAmori ohoolo wa aisarayeli,+ nto aisarayeli yaahiwiivakasa oXibeyoni, yaatthimakelaka mpakha etturuuru ya oBethi-Horoni, awiivaka mpakha ephiro ya wAzeka ni ya oMakeda. 11 Okathi awanani awo yaatthyawa aya aisarayeli, akhuruwaka esupita ya oBethi-Horoni, Yehova aahaamoroxela maluku maalupale a maralala mpakha wAzeka. Nto awo yaahikhwaasa. Tthiri, ale yaakhwiiye mwaha wa maluku a maralala, yaahaatta waavikana ale yiiviwe ni espaata* ni aisarayeli.

12 Nihiku Yehova aaxinttale awe atthu a wAmori vamaithoni va aisarayeli, Yooxuuwa aahinvekela Yehova ohoolo wa aisarayeli, oriki:

13 Siiso nsuwa naaheemela ni mweeri khuheetta-tho, mpakha nloko na aisarayeli owunlela ikuhu awanani aya. Kiira eyo yoolempwa muliivuruni mwa Yaxari?+ Nto nsuwa naaheemela eriyari ya erimu, ni khinaakunve okela etthu yoowiiraka nihiku ntero. 14 Khinnakhale nihiku nikina ntoko nle, nnakhala nihinatthi nihiku nle aahiiso nuumala nihiku nle, okathi Yehova aawiriyanne awe ovekela wa mutthu mwa enamuna eyo.+ Tthiri Yehova aaniwana owaakihaka aisarayeli.+

15 Nuumala-vo, Yooxuuwa ni aisarayeli ootheene yaahitthikela muttetthe wa oXiligali.+

16 Nto, mamwene ale mathanu yaahitthyawa, ni yaahiipitha munikhukuni mwa oMakeda.+ 17 Nuumala-vo, Yooxuuwa aahileeliwa wiira: “Mamwene ale mathanu aaphwanyiwa, yiipinthe munikhukuni mwa oMakeda”.+ 18 Nto Yooxuuwa aahihimya wiira: “Mpirikixele maluku maalupale mukhora wa nikhuku nlo, ni mwaathanle alopwana wiira alipeleleke. 19 Masi nyuwo akina, muheemele. Mwaatthimakele awanani anyu, ni nwiivakase nwoomolaka.+ Muhaahiye etthyawelaka ipooma saya, okhala wiira Yehova Muluku anyu ohoovahereryani awo mmatatani mwanyu”.

20 Yooxuuwa ni aisarayeli yaahiwiivakasa awanani aya, anahala vakhaani waamala-maliha, masi akina yaahoopowa atthyawela ipooma soolipihiwa. 21 Nto, atthu ootheene yaahitthikela wa Yooxuuwa ari ene akumi, omuttettheni wa oMakeda. Nave, khuuvo mutthu aalavunle aavirikanyaka aisarayeli. 22 Nto Yooxuuwa aahihimya wiira: “Mukumihe maluku attiyelinwe nikhuku nlo, mwaakumihe munikhukuni-mmo mamwene ale mathanu, mukiruuhele-va”. 23 Siiso, awo yaahimuruuhela Yooxuuwa mamwene mathanu yaari munikhukuni: mwene a oYerusalemu, mwene a oHebroni, mwene a oYarimuthi, mwene a oLakixi, ni mwene a wEgloni.+ 24 Okathi aaruuheliwe awe mamwene awo, Yooxuuwa aahiwiihana alopwana ootheene aisarayeli, ni aahaaleela makumantanti a anakhotto, yaawo yaaronwe okhottoni nuuwo, oriki: “Mwaattamele-va. Mpweherye inawu sanyu muxikoni mwaya mamwene ala”. Siiso, makumantanti awo, yaahipweherya inawu saya muxikoni mwaya mamwene awo.+ 25 Vano Yooxuuwa aahaaleela wiira: “Muhoove, nnakhala muhithukumele.+ Mulipe murima ni mwiilipihe. Okhala wiira, ela ti etthu Yehova onrowa awe owiiriha awanani anyu ootheene, yaawo aniwanana anyu”.+

26 Moottharelana, Yooxuuwa aahiwiiva mamwene awo ni aahaathomeya miri mithanu. Mamwene awo yaahikhala mpakha makaaripi, athomeiwale ene vamwirini. 27 Nuumala nsuwa okela, Yooxuuwa aahiruma okuruxiwa vamwirini mirutthu sa mamwene awo,+ ni aahiruma oriheliwa munikhukuni yaipinthe aya. Vano yaahipirikixeliwa maluku maalupale vamukhora va nikhuku nlo, yaawo anikhala mpakha olelo-va.

28 Nihiku nle, Yooxuuwa aahikuxa epooma ya oMakeda+ ni aahiwiiva ni espaata* atthu ootheene yaari mpooma-mmo. Owo aahimwiiva mwene aya ni atthu ootheene a epooma ele.+ Yooxuuwa aahimwiiriha mwene a oMakeda+ etthu emosa-ru aamwiirinhe awe mwene a oYeriko.

29 Vano Yooxuuwa vamosa ni anakhotto ootheene aisarayeli, yaahikhuma oMakeda anarowa oLibina. Nto yaahiwana ni atthu a oLibina.+ 30 Nave-tho, Yehova aahaavahererya aisarayeli epooma eyo ni mwene aya.+ Nto aisarayeli yaahipwetexa epooma eyo ni yaahiwiiva atthu ootheene ni espaata, ahimuhiyaka nnakhala mutthu mmosa mukumi. Siiso, awo yaahimwiiriha mwene a epooma ele etthu emosa-ru yaamwiirinhe aya mwene a oYeriko.+

31 Moottharelana, Yooxuuwa vamosa ni anakhotto ootheene a aisarayeli yaahikhuma oLibina anarowa oLakixi.+ Nto yaahimaka weiwo ni yaahiwana ni atthu a epooma eyo. 32 Yehova aahaavahererya aisarayeli epooma ya oLakixi. Nto awo yaahikuxa epooma eyo nihiku na nenli. Nave, awo yaahipwetexa epooma eyo ni yaahiwiiva ni espaata atthu ootheene,+ ntoko yairinhe aya epooma ya oLibina.

33 Vano, Horami, mwene a oXezeri,+ aahirowa waakhaliherya atthu a oLakixi. Masi, Yooxuuwa aahimwiiva vamosa ni atthu awe, ohimuhiyaka nnakhala mutthu mmosa mukumi.

34 Vano Yooxuuwa vamosa ni anakhotto ootheene a aisarayeli, yaahikhuma oLakixi anarowa wEgloni.+ Nto yaahimaka weiwo ni yaahiwana ni atthu a epooma eyo. 35 Awo yaahikuxa epooma eyo nihiku nenno, ni yaahiwiiva ni espaata atthu a epooma eyo. Aisarayeli awo yaahaapwetexa atthu ootheene yaari mpooma-mmo nihiku nenlo, ntoko yiirinhe aya oLakixi.+

36 Vano Yooxuuwa vamosa ni anakhotto ootheene a aisarayeli, yaahikhuma wEgloni anarowa oHebroni.+ Nto yaahiwana ni atthu a epooma eyo. 37 Aisarayeli awo yaahikuxa epooma eyo ni yaahipwetexa. Yaahimwiiva mwene aya, yaahipwetexa mittetthe saya, ni yaahiwiiva ni espaata* atthu ootheene a epooma eyo, ahimuhiyaka nnakhala mutthu mmosa mukumi. Siisaale Yooxuuwa airinhe awe wEgloni, owo aahipwetexa epooma eyo ni aahiwiiva atthu ootheene a epooma eyo.

38 Wookiseryani, Yooxuuwa ni anakhotto ootheene a aisarayeli yaahirukunuwa anarowa oDebiri.+ Nto yaahiwana ni atthu a epooma eyo. 39 Yooxuuwa aahikuxa epooma eyo, mwene aya, ni atthu aya ootheene, ni aahiwiiva ni espaata. Owo aahiwiiva atthu ootheene a epooma eyo+ ohimuhiyaka nnakhala mutthu mmosa mukumi.+ Yooxuuwa aahiiriha oDebiri ni mwene aya etthu emosa-ru airinhe awe oHebroni, ni oLibina, ni mamwene aya.

40 Yooxuuwa aahixintta elapo yootheene ya muttetthe wa omiyaakoni, eyo piiyo, oNegebi, oXefela,+ ni mittetthe soowaattamela, vamosa ni mamwene aya, ohimuhiyaka nnakhala mutthu mmosa mukumi. Owo aahiwiiva atthu ootheene,+ siisaale Yehova, Muluku a Isarayeli, aamurumme awe.+ 41 Yooxuuwa aahixintta okhuma oKadexi-Barneya+ mpakha oGaza,+ ni elapo yootheene ya oGooxeni+ mpakha oXibeyoni.+ 42 Yooxuuwa aahaaxintta mamwene ootheene ni aahikuxa mittetthe saya okathi omosa-ru, okhala wiira Yehova, Muluku a Isarayeli, taawana owaakihaka aisarayeli.+ 43 Nuumala-vo, Yooxuuwa ni anakhotto ootheene aisarayeli yaahitthikela muttetthe wa oXiligali.+

11 Nuumala Yabini, mwene a oHasori, wiiwa ele yaakhumelenle, aahiruma oleeliwa mwene Yobabi a oMadoni,+ mwene a oXimironi, ni mwene a wAkaxafi.+ 2 Nave-tho aahiruma oleeliwa mamwene yaakhala onorti wa muttetthe wa omiyaakoni, ni ale yaakhala woothakoni osuuli wa oKinerethi, ni ale yaakhala oXefela, ni ale yaakhala mukerekhere wa oDori,+ mpantta onikela nsuwa. 3 Aahiruma-tho oleeliwa atthu ootheene a oKanaani+ yaakhala mpantta onikhuma nsuwa ni onikela nsuwa, atthu ootheene a wAmori,+ aheti, aperizi, ayebusi, yaawo yaakhala muttetthe wa omiyaakoni, ahivi,+ yaakhala mukerekhere mwa mwaako Hermoni,+ muttetthe wa oMisipa. 4 Siiso, mamwene ootheene yaahirwa vamosa ni anakhotto aya, waatta waya waalikana ni mihaava sa ophareya. Nave-tho, yaahirwa ni ikhavalo saya sinceene ni ikaaro saya sa ekhotto. 5 Mamwene awo ootheene yaahiiwanana othukumana opuro omosa. Nto, yaahivenya, arowa omaka waattamela opuro waaphattuwa maasi a oMeromi, wiira yawane ni aisarayeli.

6 Siiso, Yehova aahimuhimeerya Yooxuuwa wiira: “Muhiwoove atthu awo.+ Tthiri, meelo ewoora ene yeela, kinimwaavahererya atthu awo mmatatani mwanyu. Nto nyuwo munoowiiva ootheene awo. Murakalihe ikhavalo saya,+ vano ikaaro saya mpahe ni mooro”. 7 Yooxuuwa ni anakhotto ootheene, yaahaatuphela mootutuxerya atthu awo, waattamela opuro waaphattuwa maasi a oMeromi. 8 Yehova aahaavahererya atthu awo mmatatani mwa aisarayeli.+ Nto, aisarayeli awo, yaahaawerya ni yaahiwoomola mpakha oSiidoni muttetthe wa atthu anceene,+ ni oMisirefothi-Mayimi,+ mpakha mpantta onikhuma nsuwa wa oxepani wa oMisipa. Aisarayeli awo, yaahiwiiva ootheene aya ahimuhiyaka nnakhala mutthu mmosa mukumi.+ 9 Yooxuuwa aahiira ntoko aahimeeriwa awe ni Yehova. Yooxuuwa aahirakaliha ikhavalo saya, nave ikaaro saya aahipaha ni mooro.+

10 Vano, Yooxuuwa aahitthika, okuxa epooma ya oHasori, omwiiva ni espaata* mwene a epooma eyo.+ Khalai, oHasori ti yaari epooma yuulupale ya ipooma iyo sootheene saarina mamwene. 11 Aisarayeli yaahiwiiva ni espaata atthu ootheene a epooma eyo,+ ahimuhiyaka nnakhala mutthu mmosa mukumi.+ Nuumala-vo, yaahipaha epooma ya oHasori. 12 Yooxuuwa, aahikuxa ipooma sootheene sa mamwene awo, ni aahiwiiva ni espaata mamwene awo ootheene.+ Owo aahaapwetexa,+ siisaale Moise murumeyi a Yehova, aarumme awe. 13 Isarayeli khaapanhe ipooma saakhala mapuro oottukhuwa. Masi, epooma ya oHasori paahi, ti yaapahiwe ni Yooxuuwa. 14 Aisarayeli yaahikuxa itthu sootheene ni inama sa ipooma iyo.+ Masi, yaahiwiiva ni espaata atthu ootheene, mpakha waamala-maliha.+ Awo khiyaamuhiyale nnakhala mutthu mmosa mukumi.+ 15 Siisaale Yehova aamurumme awe murumeyi awe, Moise, siiso-tho, Moise aahimuruma Yooxuuwa.+ Vano Yooxuuwa, aahiira siiso. Owo aahiira sootheene, Yehova aamurumme awe Moise.+

16 Yooxuuwa aahikuxa elapo eyo yootheene: muttetthe wa omiyaakoni, oNegebi wootheene+ ni muttetthe wa oGooxeni,* oXefela,+ wAraba,+ ni muttetthe wa omiyaakoni wa Isarayeli ni oXefela waya. 17 Elapo eyo yaakhuma omwaako Halaki, yoowo onirowa mpakha oSeyiri, mpakha ophiya oBayali-Gadi,+ oxepani wa oLiibano, mukerekhere wa mwaako Hermoni.+ Yooxuuwa aahaavara mamwene aya ootheene ni aahiwiivakasa. 18 Yooxuuwa aahiwana ekhotto ni mamwene ala ootheene, okathi munceene. 19 Khaavo atthu yaapanke ompatthani ni aisarayeli, ahikhanle paahi ahivi yaakhala oXibeyoni.+ Aisarayeli yaahaawerya atthu ootheene awanaka ekhotto.+ 20 Yehova taawiirinhe atthu awo wuumiha mirima saya,+ wiira ewane ekhotto ni aisarayeli, ophavelaka waapwetexa, ohiwoonelaka othunku nnakhala vakhaani.+ Atthu awo yaahaana opwetexiwa, ntoko Yehova aamurumme awe Moise.+

21 Okathi ene yoowo, Yooxuuwa aahaamala-maliha atthu a wAnakimi+ yaakhala muttetthe wa omiyaakoni, okhuma oHebroni, oDebiri, wAnabi, ni muttetthe wootheene wa omiyaakoni wa oYuda, ni muttetthe wootheene wa omiyakoni wa Isarayeli. Yooxuuwa aahaapwetexa vamosa ni ipooma saya.+ 22 Khuuvo mutthu a wAnakimi aahanle elapo ya aisarayeli. Awo yaahanle+ paahi oGaza,+ oGathi+ ni wAxidodi.+ 23 Siiso Yooxuuwa aahikuxa elapo yootheene, ntoko Yehova aamuleihenrye awe Moise.+ Moottharelana, Yooxuuwa aahaavaha aisarayeli elapo eyo ntoko etthu yoohiyeriwa, aakawelaka moovarihana ni mahimo aya.+ Nto elapo yaahimumula, ehinawaniwa-tho ekhotto.+

12 Mamwene a ilapo seiyo aisarayeli yaaxinttale aya, ni yaakunxe aya mpantta onikhuma nsuwa wa muro Yordani, okhuma nxepa na Arinoni+ mpakha omwaako Hermoni,+ ni mpantta wootheene onikhuma nsuwa wa Araba,+ taala: 2 Mwene Sihoni+ a wAmori, yoowo aakhala oHexeboni. Omwene awe waanikhuma epooma ya wAroweri,+ yeeyo yaakhala oxepani na wArinoni,+ mpakha oxepani wa Yaboki. Owo aanilamulela-tho nimeya na epooma ya oXileyaadi. Nave, oxepani wa Yaboki, waari mukano wa atthu a wAmoni. 3 Mwene owo, aanilamulela-tho wAraba, mpakha mpantta onikhuma nsuwa wa ephareya Kinerethi,*+ ni ephareya yaari wAraba, eyo piiyo, ephareya ya Maakha.* Omwene awe waaniphiya mpantta onikhuma nsuwa wa oBethi-Yeximothi, mpakha mukerekhere wa omwaako Pisiga,+ mpantta wa osuuli.

4 Aisarayeli yaahikuxa-tho muttetthe wa mwene Oogi+ a oBaxani, yoowo aari ookiserya aatthu a oRefayimi.+ Mwene owo aakhala wAxitarothi ni wEdreyi. 5 Omwene awe waaniphiya omwaako Hermoni, oSalika, ni oBaxani wootheene,+ mpakha omukanoni wa muttetthe wa atthu a oXesuri ni a oMaakati.+ Owo aanilamulela-tho nimeya na epooma ya oXileyaadi, mpakha muttetthe wa mwene Sihoni a oHexeboni.+

6 Moise murumeyi a Yehova ni aisarayeli, yaahaawerya mamwene awo.+ Nuumala-vo, Moise murumeyi a Yehova, aahivaha ilapo sa mamwene awo, nihimo na Rubeni, nihimo na Gadi ni nimeya na nihimo na Manase.+

7 Yooxuuwa vamosa ni aisarayeli, yaahaawerya mamwene a ilapo saakhala mpantta onikela nsuwa wa muro Yordani, okhuma oBayali-Gadi+ nxepa na oLiibano,+ mpakha omwaako Halaki,+ yoowo waarowa mpakha oSeyiri.+ Nuumala-vo, Yooxuuwa aahivaha ilapo sa mamwene awo, mahimo a aisarayeli, wiira sikhale sawaya.+ 8 Ilapo iyo saaniphiya muttetthe wa omiyaakoni, oXefela, wAraba, mukerekhere mwaya, woothakoni ni oNegebi.+ Iya saari mittetthe sa aheti, amori,+ akanaani, aperizi, ahivi ni ayebusi.+ Mamwene awo taala:

13 Vano, Yooxuuwa aahuuluvala.+ Nto Yehova aahimuhimeerya wiira: “Nyuwo muhuuluvala. Masi nlelo yoohala epantte yuulupale ya elapo muhikunxe anyu. 2 Elapo ene enihala tiila:+ Mittetthe sootheene sa afilisti, ni mittetthe sootheene sa axesuri.+ 3 (Muttetthe owo waapacerya muro mwaamukhaani onikhuma muro Niilo,* yoowo onikhala mpantta onikhuma nsuwa a* wExiitu, mpakha mmukanoni a wEkironi, onorti, yoowo wooniwa okhala muttetthe wa akanaani).+ Waanihala-tho muttetthe wa anamalamulela athanu afilisti,+ eyo piiyo, muttetthe wa oGaza, wAxidodi,+ wAxikeloni,+ oGathi,+ ni wEkironi.+ Waanihala-tho muttetthe a wAwimi,+ 4 osuuli, elapo yootheene ya akanaani, muttetthe wa oMeyara yoowo ori wa atthu a oSiidoni,+ mpakha wAfeki, mmukanoni wa atthu a wAmori. 5 Nave-tho, elapo ya oXebali+ ni mpantta wootheene onikhuma nsuwa wa oLiibano, okhuma oBayali-Gadi, mukerekhere wa mwaako Hermoni, mpakha oLebo-Hamati.+ 6 Woohala-tho muttetthe wootheene wa omiyaakoni, okhuma oLiibano+ mpakha oMisirefothi-Mayimi+ ni muttetthe wootheene wa oSiidoni.+ Miyo kinoowoomola atthu awo ohoolo wa aisarayeli.+ Nyuwo muhaana waavaha elapo eyo aisarayeli, ntoko etthu yoohiyeriwa, ntoko koorumalyaakani.+ 7 Vano mukawanye elapo eyo ntoko etthu yoohiyeriwa, ni mwaavahe mahimo 9 a aisarayeli ni nimeya na nihimo na Manase”.+

8 Vano nimeya nikina na nihimo na Manase, ni nihimo na Rubeni, ni nihimo na Gadi, yaahikuxa ntoko etthu yoohiyeriwa muttetthe Moise aavanhe awe, mpantta onikhuma nsuwa wa muro Yordani, siisaale Moise, murumeyi a Yehova aavanhe awe:+ 9 Muttetthe owo waakhuma wAroweri,+ yoowo ori mukerekhere mwa nxepa na Arinoni,+ ni epooma yaari eriyari ya onxepani weiwo ni muttetthe wootheene woottukhuwa wa oMedaba mpakha oDiboni. 10 Nave-tho, ipooma sootheene sa Mwene Sihoni a wAmori, yoowo aalamulela oHexeboni, mpakha mmukanoni wa atthu a wAmoni,+ 11 ni oXileyaadi, ni muttetthe wootheene wa oXesuri, ni oMaakati,+ ni muttetthe wootheene wa omwaako Hermoni, ni muttetthe wootheene wa oBaxani,+ mpakha oSalika.+ 12 Elapo yootheene ya mwene Oogi a oBaxani, yoowo aalamulela wAxitarothi ni wEdreyi. (Mwene owo aari ookiserya a atthu a oRefayimi.)+ Moise aahaawerya mamwene awo ni aahiwoomola.+ 13 Masi aisarayeli khiyaawoomonle+ axesuri ni amaakati, okhala wiira axesuri ni amaakati annikhala eriyari ya aisarayeli mpakha olelo-va.

14 Moise khaavanhe elapo nihimo na Levi ntoko etthu yoohiyeriwa.+ Soovaha sinipahiwa ni mooro siroiheliwaka Yehova Muluku a Isarayeli teri yoohiyeriwa aya,+ ntoko Moise aaleihenrye awe.+

15 Vano Moise aahaavaha elapo ntoko etthu yoohiyeriwa atthu a nihimo na Rubeni, moovarihana ni imusi saya. 16 Nto muttetthe aya waakhuma wAroweri, yoowo ori mukerekhere mwa nxepa na Arinoni, ni muttetthe wootheene woottukhuwa waattamenle oMedaba. 17 Nave-tho epooma ya oHexeboni ni mittetthe sootheene sa epooma eyo+ saari mapuro oottukhuwa, oDiboni, oBamothi-Bayali, oBethi-Bayaali-Mewoni,+ 18 oYahasa,+ oKedemothi,+ oMefaathi,+ 19 oKiriyatayimi, oSiibima,+ ni oSerethi-Xahari, waari omwaako wa oxepani weiwo, 20 oBethi-Peyori, mukerekhere mwa oPisiga,+ oBethi-Yeximothi,+ 21 ipooma sootheene sa mapuro oottukhuwa, ni elapo yootheene ya mwene Sihoni a wAmori, yoowo aalamulela oHexeboni.+ Moise aahimwiiva mwene Sihoni,+ ni mamwene yaamwiiwelela Sihoni, yaawo yaari makhulupale a oMidiyani. Masina aya taala: Evi, Rekemi, Suri, Huri, ni Reba,+ yaawo yaakhala elapo ele. 22 Mmosa a atthu ale aiviwe ni espaata* ni aisarayeli, aari Balaamu,+ mwaana a Beyori, yoowo aari nahako.+ 23 Mukano wa elapo ya nihimo na Rubeni waari muro Yordani. Elapo eyo vamosa ni ipooma saya, ni mittetthe saya, yaari etthu yoohiyeriwa ya nihimo na Rubeni, moovarihana ni imusi saya.

24 Moottharelana, Moise aahivaha elapo ntoko etthu yoohiyeriwa nihimo na Gadi moovarihana ni imusi saya. 25 Nto, muttetthe aya waari epooma ya oYazeri,+ ni ipooma sootheene sa oXileyaadi ni nimeya ya elapo ya wAmoni,+ mpakha wAroweri, weiwo waawehana ni oRaba.+ 26 Nave-tho, muttetthe aya waaniphiya oHexeboni,+ mpakha oRamathi-Misipe, ni oBetonimi. Waaniphiya-tho oMahanayimi,+ mpakha omukanoni wa oDebiri. 27 Elapo eyo, yaaniphiya mpakha oxepani wa oBethi-Harani, oBethi-Nimira,+ oSukothi,+ ni oSafoni, ni mpantta waahala wa elapo ya mwene Sihoni a oHexeboni.+ Muro Yordani ti waari mukano aya mpakha ephareya ya oKinerethi,+ mpantta onikhuma nsuwa wa muro Yordani. 28 Elapo eyo vamosa ni ipooma saya, ni mittetthe saya, yaari etthu yoohiyeriwa ya nihimo na Gadi, moovarihana ni imusi saya.

29 Moottharelana, Moise aahivaha ntoko etthu yoohiyeriwa nimeya na nihimo na Manase, moovarihana ni imusi saya.+ 30 Elapo aya yaaniphiya oMahanayimi,+ oBaxani wootheene, elapo yootheene ya mwene Oogi a oBaxani, ni mittetthe sootheene sa Yayiri+ saakhala oBaxani. Elapo eyo yaarina ipooma 60. 31 Anamwane a Makiri,+ mwaana a Manase, eyo piiyo, nimeya na anamwane a Makiri, moovarihana ni imusi saya, yaahivahiwa nimeya na oXileyaadi, wAxitarothi, ni wEdreyi,+ seiyo saari ipooma sa mwene Oogi a oBaxani.

32 Iya saari ilapo Moise aavanhe awe ntoko etthu yoohiyeriwa, woothakoni wa oMowabi, mpantta mukina wa muro Yordani, mpantta onikhuma nsuwa wa oYeriko.+

33 Masi, nihimo na Levi khinaavahiwe etthu ni Moise ntoko etthu yoohiyeriwa.+ Tthiri Yehova, Muluku a Isarayeli, tori yoohiyeriwa aya, ntoko aaleihenrye awe.+

14 Ela ti etthu aisarayeli yaavahiwe aya, ntoko etthu yoohiyeriwa elapo ya oKanaani. Namukuttho Eleyazari, vamosa ni Yooxuuwa mwaana a Nuuni, ni ahooleli a imusi a mahimo a Isarayeli, yaahaavaha elapo atthu awo, ntoko etthu yoohiyeriwa.+ 2 Mahimo 9 nnimeya+ yaahikaweliwa elapo eyo ntoko etthu yoohiyeriwa evonyiwaka esoorti,*+ ntoko Yehova aamurumme awe Moise. 3 Moise aahaavaha elapo ntoko etthu yoohiyeriwa mahimo manli nnimeya, mpantta mukina* wa muro Yordani.+ Masi alevi khiyaavahiwe elapo ntoko etthu yoohiyeriwa.+ 4 Osuulu wa Yosefe waari mahimo manli:+ Nihimo na Manase ni nihimo na Efrayimi.+ Vano alevi khiyaakaweliwe elapo vamosa ni mahimo makina. Awo yaavahiwe paahi ipooma sikina wiira akhaleke,+ ni imatta saarukurenrye mittetthe iyo wiira elyiheke inama saya ni apweheke mireerelo saya.+ 5 Siiso, aisarayeli yaahikawelana elapo, ntoko Yehova aamurumme awe Moise.

6 Alopwana akina a nihimo na Yuda yaahimwaattamela Yooxuuwa oXiligali.+ Vano Kalebi,+ mwaana a Yefune, mukenisi, aahimuhimeerya Yooxuuwa wiira: “Nyuwo moosuwela oratteene ele Yehova aamuhimenrye awe+ Moise, mulopwana a Muluku eekeekhai,+ oohimyakani nyuwo ni miyo okathi naari ahu oKadexi-Barneya.+ 7 Kiri ene oKadexi-Barneya, ni kirina ene iyaakha 40, Moise, murumeyi a Yehova, aahikiruma orowa ohottela elapo.+ Okathi kaatthinke aka, kaahihimya itthu sootheene koonale aka.+ 8 Nnaamwi axinnaka yaaronwe ni miyo yaakhulumunle atthu, miyo kaahimutthara Yehova, Muluku aka, ni murima wootheene.*+ 9 Nihiku nle, Moise aahileiherya oriki: ‘Elapo munyakenle anyu enrowa okhala yawinyu ni ya aniinyu, mahiku ootheene okhala wiira moomutthara Yehova, Muluku aka ni murima wootheene’.+ 10 Ntoko Moise aaleihenrye awe,+ Yehova ookihiya kikhalaka mukumi+ iyaakha iya 45, okhuma okathi yoole Yehova aamuleihenrye awe Moise, aisarayeli yeettaka moothakoni.+ Olelo, miyo kirina iyaakha 85. 11 Mpakha olelo-va, ikuru saka khasivukunwe, sinlikana ni iye saarina aka okathi Moise aakirumme awe. Nlelo kookhalana ikuru soowana ekhotto wala soovara miteko sikina ntoko kaarina aka khalai. 12 Nto, mukivahe muttetthe ola wa omiyaakoni, yoowo Yehova aakileihenrye awe nihiku nle. Tthiri nihiku nle, nyuwo mwaahiiwa wiira elapo ela, yaahikhala atthu a wAnakimi+ ni ipooma saya suulupale ni soolipihiwa.+ Mweekeekhai, Yehova onookhala ni miyo,+ ni kinoowoomola atthu awo ntoko Yehova oleihenrye awe”.+

13 Siiso, Yooxuuwa aahimureeliha Kalebi, mwaana a Yefune, nto aahinvaha muttetthe wa oHebroni ntoko etthu yoohiyeriwa.+ 14 Tivonto, muttetthe wa oHebroni ori awe wa Kalebi mwaana a Yefune, mukenisi, ntoko etthu yoohiyeriwa mpakha olelo-va. Owo aahivahiwa muttetthe owo mwaha woowi aahimutthara Yehova, Muluku a Isarayeli, ni murima wootheene.+ 15 Khalai muttetthe wa oHebroni waihaniwa Kiriyathi-Araba+ (Araba aari mulopwana oovuwa eriyari ya atthu a wAnakimi). Nto elapo yaahimumula, ehinawaniwa-tho ekhotto.+

15 Epantta ya elapo yaakaweliwe+ nihimo na Yuda ni imusi saya, yaakhuma omukanoni wa wEdomi,+ woothakoni wa oSini, mpakha osuuli wa oNegebi. 2 Mukano aya wa osuuli, waapacerya waattamela ephareya ya Maakha,*+ eyo piiyo, obaiya* waawehana ni mpantta wa osuuli. 3 Mukano aya waaniphiya-tho osuuli, etturuuru ya wAkarabimi,+ onavira oSini, nuumala-vo onawela orowaka osuuli wa oKadexi-Barneya.+ Moottharelana waanivira oHesironi, onawela orowaka wAdari, ni onarukunuwela oKarika. 4 Nave-tho mukano aya waanivira wAsimoni,+ ni waaniphiya mpakha muro mwaamukhaani wa wExiitu.+ Mukano owo waamalela Ephareya Yuulupale.* Ola waari mukano aya mpantta wa osuuli.

5 Mukano wa mpantta onikhuma nsuwa, waari ephareya ya Maakha,* mpakha ommalela awe muro Yordani. Mukano wa onorti waari obaiya,* ommalela awe muro Yordani.+ 6 Mukano owo waaniwela mpakha oBethi-Hogla,+ onavira onorti wa oBethi-Araba.+ Nave, mukano owo waaniwela mpakha opuro waari nluku na Bohani,+ mwaana a Rubeni. 7 Moottharelana, mukano owo waaniwela mpakha oDebiri, oxepani wa Akori,+ onarukunuwela onorti owehaka oXiligali,+ yoowo aari ohoolo wa etturuuru ya wAdumimi, eyo piiyo, osuuli wa oxepani. Nave mukano owo, waanivira opuro waaphattuwa maasi a wEni-Xemexi,+ onamalela wEni-Rogeli.+ 8 Mukano owo, waaniwela mpakha oxepani wa mwaana a Hinomi,+ mukerekhere wa ayebusi,+ osuuli, eyo piiyo, oYerusalemu.+ Nave-tho mukano owo waaniwela mpakha osulu wa mwaako, waari ohoolo wa oxepani wa Hinomi, mpantta onikela nsuwa. Nxepa nno naari* mukerekhere mwa nxepa na arefayimi, onorti. 9 Mukano owo waanirukunuwa vasulu va mwaako, orowaka opuro waaphattuwa maasi a oNefetowa,+ ni waaniphiya ipooma sa mwaako Efuroni. Mukano owo waaniphiya mpakha oBayala, eyo piiyo, oKiriyathi-Yarimi.+ 10 Okhumaka oBayala, mukano owo waanirukunuwela mpantta onikela nsuwa orowaka omwaako Seyiri, ni waanivira mukerekhere wa mwaako Yarimi, onorti, eyo piiyo, oKesaloni. Nto mukano owo waanikhuruwa orowaka oBethi-Xemexi,+ onaphiya oTiimina.+ 11 Mukano owo waaniphiya mpakha mukerekhere wa wEkironi,+ onorti. Nave mukano owo waanirowa oXikaroni, oviraka omwaako Bayala mpakha oYabineyeli, onamalela ophareya.

12 Mpantta onikela nsuwa wa mukano owo, waari Ephareya Yuulupale,*+ ni okerekhere waya. Iya saari mikano sa osuulu wa Yuda, vamosa ni imusi saya, ipantta sootheene.

13 Yooxuuwa aahinvaha Kalebi+ mwaana a Yefune, elapo eriyari ya osuulu wa Yuda, moovarihana ni ele Yehova aamurumme awe Yooxuuwa, eyo piiyo: Muttetthe wa oKiriyathi-Araba, niire so, oHebroni.+ (Araba aari paapa awe Anaki.) 14 Siiso Kalebi aahiwoomola elapo eyo anamwane araru a Anaki:+ Xexayi, Ahimani, ni Talimayi,+ yaawo yaari osuulu wa Anaki. 15 Moottharelana Kalebi aahirowa owana ni atthu yaakhala oDebiri.+ (Khalai oDebiri waihaniwa oKiriyathi-Seferi.) 16 Vano Kalebi aahihimya wiira: “Mulopwana onrowa otuphela muttetthe wa oKiriyathi-Seferi ni okuxa muttetthe owo, kinoomutheliha mwanaka mwaamuthiyana, Akisa”. 17 Nto Otiniyeli,+ mwaana a munnawe Kalebi, aihaniwa Kenazi,+ aahikuxa muttetthe owo. Siiso, Kalebi aahimutheliha mwanawe mwaamuthiyana, Akisa.+ 18 Okathi Akisa aarowa awe owaani, aahithipelela omuleela iyawe, Otiniyeli, wiira onvekele ematta paapa awe, Kalebi. Akisa owo aahikhuruwa vapuuruni anwenle awe. Nto Kalebi aahimukoha wiira: “Muniphavela-ni?”+ 19 Akisa owo aahimwaakhula wiira: “Kihoovarani metto, mukireelihe. Okhala wiira mookivaha mpantta mmosa wa elapo ya osuuli,* mukivahe-tho muttetthe wa oGulothi-Mayimi”.* Siiso, Kalebi aahinvaha Akisa owo, muttetthe wa oGulothi wa Ota ni muttetthe wa oGulothi wa Ohitto.

20 Ela ti elapo nihimo na Yuda ni imusi saya, yaavahiwe aya ntoko etthu yoohiyeriwa.

21 Ipooma sa nihimo na Yuda saaphwanyaneya mpantta wa osuuli orowa mpakha omukanoni wa Edomi+ tiiya: oKabaseyeli, wEderi, oYaguri, 22 oKina, oDimona, wAdada, 23 oKedexi, oHasori, oYitanani, 24 oZifi, oTelemi, oBeyalothi, 25 oHasori-Hadata, ni oKeriyothi-Esironi, eyo piiyo, oHasori. 26 Nave-tho, wAmami, oXema, oMolada,+ 27 oHasari-Gada, oHeximoni, oBethi-Pelethi,+ 28 oHasari-Xuwali, oBeri-Xeba,+ oBiziyoteya, 29 oBayala, wlyimi, wEsemi, 30 wElitoladi, oKesili, oHorma,+ 31 oSikilaki,+ oMadimana, oSansana, 32 oLebawothi, oXelehimi, wAyini, ni oRimoni.+ Otakaaha ipooma sootheene saari 29 ni mittetthe saya.

33 Ipooma sa oXefela,+ tiiya: wExitawoli, oSoreya,+ wAxina, 34 oZanowa, wEni-Ganimi, oTapuwa, wEnami, 35 oYarimuthi, wAdulami,+ oSoko, wAzeka,+ 36 oXaarayimi,+ wAditayimi, oXedera, ni oXederotayimi.* Otakaaha ipooma sootheene saari 14 ni mittetthe saya.

37 Nave, epooma ya oSenani, oHadaxa, oMigdali-Gadi, 38 oDileyani, oMisipa, oYokiteyeli, 39 oLakixi,+ oBosekathi, wEgloni, 40 oKaboni, oLahamami, oKitilixi, 41 oXederothi, oBethi-Dagoni, oNaama, ni oMakeda.+ Otakaaha ipooma sootheene saari 16 ni mittetthe saya.

42 Epooma ya oLibina,+ wEteri, wAxani,+ 43 oYifata, wAxina, oNesibi, 44 oKeila, wAkazibi, ni oMarexa. Otakaaha ipooma sootheene saari 9 ni mittetthe saya.

45 Epooma ya wEkironi ni mittetthe saya suulupale ni saamukhaani. 46 Okhuma wEkironi owehaka mpantta onikela nsuwa, ni mapuro ootheene yaattamenle wAxidodi ni mittetthe saya.

47 Epooma ya wAxidodi,+ ni mittetthe saya suulupale ni saamukhaani. Epooma ya oGaza,+ ni mittetthe saya suulupale ni saamukhaani, orowa mpakha muro mwaamukhaani a wExiitu, eyo piiyo, Ephareya Yuulupale,* ni muttetthe woowaattamela.+

48 Nave-tho muttetthe wa omiyaakoni, saahikhala ipooma sa oXamiri, oYatiri,+ oSoko, 49 oDana, oKiriyathi-Sana, eyo piiyo, oDebiri, 50 wAnabi, wExitemo,+ wAnimi, 51 oGooxeni,+ oHoloni, ni oXilo.+ Otakaaha ipooma sootheene saari 11 ni mittetthe saya.

52 Epooma ya wArabia, oDuma, wExani, 53 oYanimi, oBethi-Tapuwa, wAfeka, 54 oHumeta, oKiriyathi-Araba, eyo piiyo, oHebroni,+ ni oSiyori. Otakaaha ipooma sootheene saari 9 ni mittetthe saya.

55 Epooma ya oMawoni,+ oKarmelo, oZifi,+ oYuta, 56 oYezireyeli, oYokedeyami, oZanowa, 57 oKayini, oXibeya, ni oTiimina.+ Otakaaha ipooma sootheene saari 10 ni mittetthe saya.

58 Epooma ya oHalihuli, oBethi-Suri, oGedori, 59 oMaarathi, oBethi-Anothi, ni wElitekoni. Otakaaha ipooma sootheene saari 6 ni mittetthe saya.

60 Epooma ya oKiriyathi-Bayaali, eyo piiyo, oKiriyathi-Yarimi,+ ni oRaba. Otakaaha ipooma sootheene saari piili ni mittetthe saya.

61 Woothakoni saahikhala ipooma sa oBethi-Araba,+ oMidini, oSekaka, 62 oNibexani, eyo piiyo, epooma ya Maakha, ni wEni-Gedi.+ Otakaaha ipooma sootheene saari 6 ni mittetthe saya.

63 Vano, alopwana a oYuda khiyaawenrye owoomola+ ayebusi,+ yaakhala oYerusalemu.+ Nto ayebusi annikhala oYerusalemu ni atthu a oYuda, mpakha olelo-va.

16 Elapo yaavahiwe aya+ osuulu wa Yosefe,+ yaapacerya muro Yordani waattamela oYeriko, mpakha opuro waaphattuwa maasi, mpantta onikhuma nsuwa wa oYeriko. Nave, yaaniphiya woothakoni wa oYeriko, mpakha muttetthe wa omiyaakoni wa oBeteli.+ 2 Elapo eyo yaanikhuma oBeteli, muttetthe wa oLuzi, enarowa mmukanoni wa atthu a wAriki, wAtarothi. 3 Moottharelana, mukano owo waanikhuruwa mpantta onikhuma nsuwa, owehana ni mmukanoni wa atthu a oYafeleti, mpakha mmukanoni wa oBethi-Horoni wa Ohitto+ ni oXezeri,+ onamalela ophareya.

4 Nto osuulu wa Yosefe,+ eyo piiyo, Manase ni Efrayimi, yaahikuxa elapo yaavahiwe aya.+ 5 Ola ti waari mukano wa osuulu wa Efrayimi vamosa ni imusi saya: Mukano wa mpantta onikhuma nsuwa yaavahiwe aya, waapacerya wAtarothi-Adari,+ mpakha oBethi-Horoni wa Ota,+ 6 onaphiya mpakha ophareya. Muttetthe wa oMikimetathi+ waari mpantta wa onorti. Mukano owo waanirukunuwela mpantta onikhuma nsuwa mpakha oTanathi-Silo, oviraka mpantta onikhuma nsuwa mpakha oYanoha. 7 Nuumala-vo, mukano owo waanikhuruwa okhumaka oYanoha mpakha wAtarothi ni oNaara, onavira oYeriko+ mpakha muro Yordani. 8 Okhuma oTapuwa,+ mukano owo waanivira mpantta onikela nsuwa owehanaka ni muro mwaamukhaani wa oKana, onamalela ophareya.+ Ela yaari elapo yaavahiwe aya ntoko etthu yoohiyeriwa, atthu a nihimo na Efrayimi, moovarihana ni imusi saya. 9 Vano, nihimo na Efrayimi yaahikhalana-tho ipooma vamosa ni mittetthe saya eriyari ya nihimo na Manase.+

10 Masi atthu a nihimo na Efrayimi khiyaawoomonle akanaani yaakhala oXezeri.+ Siiso, akanaani annikhala eriyari ya nihimo na Efrayimi mpakha olelo-va,+ ni annikhanyereriwa ovara muteko ntoko ipottha.+

17 Vano nihimo na Manase naahivahiwa elapo,+ okhala wiira Manase+ aari mwaana oopacerya a Yosefe.+ Makiri,+ mwaana oopacerya a Manase ni tiithi awe Xileyaadi, aari mulopwana aawana ekhotto, tivo owo aahivahiwa muttetthe wa oXileyaadi ni wa oBaxani.+ 2 Nto, osuulu mukina wa Manase, waahivahiwa elapo, moovarihana ni imusi saya, eyo piiyo: Anamwane a Abiyezeri,+ anamwane a Heleki, anamwane a Asiriyeli, anamwane a Sikhemi, anamwane a Heferi, ni anamwane a Xemida. Ala yaari alopwana a osuulu wa Manase, mwaana a Yosefe, moovarihana ni imusi saya.+ 3 Masi Selofehadi+ mwaana a Heferi, mwaana a Xileyaadi, mwaana a Makiri, mwaana a Manase, khaarina anamwane axilopwana, masi aarina anamwane axithiyana paahi. Nto masina a anamwane awo axithiyana, taala: Mahala, Nowa, Hogla, Milika, ni Tirsa. 4 Siiso, anamwane awo yaahirowa wa namukuttho Eleyazari,+ ni wa Yooxuuwa mwaana a Nuuni, ni wa ahooleli a imusi a mahimo a Isarayeli, anahimya wiira: “Yehova tomurumme Moise wiira onivahe elapo ntoko etthu yoohiyeriwa eriyari ya axirokorihu”.+ Nto ottharaka yooruma ya Yehova, owo aahaavaha elapo ntoko etthu yoohiyeriwa eriyari ya axirokoraya, eyo piiyo, anamwane a paapa aya.+

5 Anamwane a Manase, yaahaakhela ipantte 10 sa elapo, ohiya paahi ilapo sa oXileyaadi ni oBaxani, seiyo saakhala mpantta mukina* wa muro Yordani.+ 6 Tthiri, anamwane axithiyana a Manase yaahaakhela elapo ntoko etthu yoohiyeriwa vamosa ni anamwane axilopwana a Manase. Vano, elapo ya oXileyaadi yaahikhala ya osuulu mukina wa Manase.

7 Mukano wa Manase, waakhuma wAxeri mpakha oMikimetathi,+ muttetthe yoowo waakhala ohoolo wa oSikhemi.+ Nave mukano owo waanivira osuuli* mpakha elapo ya atthu a wEni-Tapuwa. 8 Elapo ya oTapuwa,+ yaari ya nihimo na Manase, masi epooma ya oTapuwa, yeeyo yaari omukanoni wa nihimo na Manase, yaari ya nihimo na Efrayimi. 9 Mukano owo, waanikhuruwa orowaka muro mwaamukhaani wa oKana, mpantta wa osuuli waawehana ni muro owo mwaamukhaani. Saahikhala ipooma sa Efrayimi eriyari ya ipooma sa Manase.+ Nave mukano wa Manase waavira onorti wa muro owo mwaamukhaani, onamalela ophareya.+ 10 Muttetthe wa osuuli wari wa Efrayimi, nave muttetthe wa onorti waari wa Manase. Nto mukano wa Manase waamalela ophareya.+ Nave-tho, muttetthe wa Manase waaniphiya onorti wa Axeri, mpakha mpantta onikhuma nsuwa wa Isakari.

11 Manase aahivahiwa ipooma iya sinittharelana, vamosa ni atthu aya, ni mittetthe saya saamukhaani seiyo saari ipooma sa Isakari ni Axeri. Ipooma sene tiiya: OBethi-Xeyani, wIbileyami,+ oDori,+ wEni-Dori,+ oTaanaki,+ ni oMegido. Mittetthe miraru saari mapuro oottukhuwa.

12 Masi, osuulu wa Manase khiwaawenrye okuxa ipooma iye. Siiso akanaani yaahithipelela okhala mulaponi-mme.+ 13 Vano, okathi aisarayeli yaarina aya owerya, yaahaakhanyereriha akanaani ovara muteko ntoko ipottha.+ Hata vari siiso, aisarayeli khiyaawoomonle moomalela.+

14 Osuulu wa Yosefe waahimukoha Yooxuuwa wiira: “Xeeni muhalaka onivaha muttetthe mmosa paahi+ ntoko etthu yoohiyeriwa? Hiyo khanireere waatta, maana Yehova oonireeliha mpakha olelo-va”.+ 15 Yooxuuwa aahiwaakhula wiira: “Vakhala wiira khamureere waatta, ni elapo ya Efrayimi+ ya omiyaakoni khenoophiyeryani, weeso murowe elapo ya aperizi+ ni ya arefayimi,+ muuhe etakhwa wiira mukhaleke weiwo”. 16 Vano, osuulu wa Yosefe waahimwaakhula Yooxuuwa wiira: “Muttetthe wa omiyaakoni khonniphiyerya. Nave akanaani anikhala woothakoni, eyo piiyo, ale ankhala oBethi-Xeyani+ ni mittetthe saya saamukhaani, ni ale ankhala muxepani mwa oYezireyeli,+ aakhalana ikaaro sa ekhotto+ sirina ifoise* sa eyuuma”. 17 Siiso, Yooxuuwa aahiwaakhula atthu a etthoko ya Yosefe, eyo piiyo, Efrayimi ni Manase wiira: “Tthiri, nyuwo khamureere waatta ni mookhalana owerya wuulupale. Khamunrowa ovahiwa muttetthe mmosa paahi,+ 18 masi-tho muttetthe wa omiyaakoni onrowa okhala wawinyu.+ Nnaamwi muttetthe owo ori ene etakhwa, nyuwo munimuuha ni tonrowa aya omalela muttetthe anyu. Tthiri nyuwo munoowoomola akanaani, hata ari ene owerya ni arina ene ikaaro sa ekhotto sirina ifoise sa eyuuma”.+

18 Nto muloko wootheene wa aisarayeli waahithukumana oSilo,+ ni aisarayeli awo yaaheemexa opuro owo etenta* ya muthukumano,+ okhala wiira yaahiwerya elapo eyo.+ 2 Masi nlelo yaahihala mahimo 7 a aisarayeli, yahaavahiwe elapo ntoko etthu yoohiyeriwa. 3 Vano Yooxuuwa aahaakoha aisarayeli wiira: “Munrowa olipelela mpakha liini, wiira mwakuxe elapo Yehova Muluku a amuhavinre anyu, oovanhaaweni?+ 4 Mukiruuhele alopwana araru a khula nihimo wiira kaarume. Alopwana awo ahaana orowa ni weettelela elapo eyo wiira yalepe moota elapo eyo siri aya moovarihana ni soohiyeriwa sa khula nihimo. Nuumala-vo awo ahaana otthikela wa miyo. 5 Awo ahaana orowa okawanya elapo eyo ipantta 7.+ Nihimo na Yuda nlelo ninrowa okhalaka muttetthe aya wa osuuli,+ nave etthoko ya Yosefe nlelo enrowa okhalaka muttetthe aya wa onorti.+ 6 Vano nyuwo murowe mwalepe moota elapo eyo siri aya, mukawanyaka elapo eyo ipantta 7, nuumala-vo mukiruuhele. Nto miyo kivonyaka esoorti,*+ kinimookawelani elapo eyo ohoolo wa Yehova Muluku ahu. 7 Masi alevi khanrowa ovahiwa etthu eriyari anyu,+ okhala wiira ovara muteko ntoko namukuttho a Yehova teri yoohiyeriwa aya.+ Nave nihimo na Gadi, ni na Rubeni, ni nimeya na nihimo na Manase,+ ahaakhela yoohiyeriwa aya mpantta onikhuma nsuwa wa muro Yordani, weiwo Moise, murumeyi a Yehova, aavanhe awe”.

8 Alopwana awo yaahiilokiherya wiira arowe, nto Yooxuuwa aahaaruma ale yaarowa olepa moota elapo eyo siri aya, oriki: “Murowe mweettelele elapo eyo ni mwalepe moota siri aya, nuumala-vo mutthikele wa miyo. Nto miyo kinoovonya esoorti* wiira kookaweleni elapo eyo oSilo wenno, ohoolo wa Yehova”.+ 9 Nto alopwana awo yaahirowa ni yaaheettelela elapo yootheene ni yaahilepa moota siri aya. Awo yaahikawanya elapo eyo ipantta 7 moovarihana ni ipooma saya, alepaka muliivuruni itthu sootheene yoonale aya. Nuumala-vo, yaahitthikela wa Yooxuuwa, oSilo. 10 Nuumala-vo, Yooxuuwa aahivonya esoorti oSilo ohoolo wa Yehova,+ wiira aakawele aisarayeli elapo eyo. Siiso Yooxuuwa aahaakawela elapo eyo atthu a Isarayeli aavahaka khula nihimo elapo aya.+

11 Vano, esoorti yaahimorela nihimo na Beniyamini moovarihana ni imusi saya. Nto muttetthe waavahiwe aya waari eriyari ya atthu a Yuda+ ni atthu a Yosefe.+ 12 Mpantta wa onorti, mukano aya waapacerya muro Yordani. Mukano owo waanirowa mukerekhere wa oYeriko,+ onorti, onawela mwaako waawehana ni mpantta onikhuma nsuwa. Nave mukano owo waaniphiya woothakoni wa oBethi-Aveni.+ 13 Mukano owo waanirowa-tho oLuzi, mukerekhere wa oLuzi, eyo piiyo, oBeteli,+ osuuli. Nave mukano owo waanikhuruwa wAtarothi-Adari,+ mwaako waari osuuli wa oBethi-Horoni wa Ohitto.+ 14 Mukano owo waaniphiya mpantta onikela nsuwa, onarukunuwela osuuli, okhumaka mwaako waawehana oBethi-Horoni orowaka osuuli. Mukano owo waamalela oKiriyathi-Bayaali, eyo piiyo, oKiriyathi-Yarimi,+ epooma ya Yuda. Ola waari mukano wa mpantta onikela nsuwa.

15 Mukano wa mpantta wa osuuli, waapacerya mukerekhere wa oKiriyathi-Yarimi. Mukano owo waaniphiya mpantta onikela nsuwa. Nave waanirowa opuro oniphattuwa maasi a oNefetowa.+ 16 Mukano owo waanikhuruwela mukerekhere wa mwaako waawehana ni oxepani wa mwaana a Hinomi,+ waari oxepani wa arefayimi,+ onorti. Owo waanikhuruwela oxepani wa Hinomi, mukerekhere wa ayebusi,+ osuuli, okhuruwelaka wEni-Rogeli.+ 17 Mukano owo waanivira onorti, ni waaniphiya wEni-Xemexi, nuumala-vo waanirowa oXelilothi, ohoolo wa etturuuru ya wAdumimi.+ Moottharelana, waanirowa opuro waari nluku+ na Bohani,+ mwaana a Rubeni. 18 Nave mukano owo waaniphiya-tho mapuro oottukhuwa, ohoolo wa wAraba, onorti, onakhuruwela wAraba weiwo. 19 Mukano owo waaniphiya mapuro oottukhuwa a oBethi-Hogla,+ onorti. Nto waamalela obaiya* ya ephareya ya Maakha* onorti,+ waamalela awe muro Yordani, osuuli. Ola waari mukano wa mpantta wa osuuli. 20 Mukano wa mpantta onikhuma nsuwa waari muro Yordani. Ola waari mukano wa elapo yaavahiwe aya nihimo na Beniyamini ntoko etthu yoohiyeriwa moovarihana ni imusi saya.

21 Ipooma sa nihimo na Beniyamini moovarihana ni imusi saya, saari iya: oYeriko, oBethi-Hogla, wEmeki-Kesisi, 22 oBethi-Araba,+ oSemarayimi, oBeteli,+ 23 wAwimi, oPara, wOfra, 24 oKefari-Amona, wOfini, ni oXeeba.+ Otakaaha ipooma sootheene saari 12 ni mittetthe saya.

25 Epooma ya oXibeyoni,+ oRama, oBeerothi, 26 oMisipa, oKefira, oMosa, 27 oRekemi, oYiripeyeli, oTarala, 28 oSela,+ oHa-Elefi, oYebusi, eyo piiyo, oYerusalemu,+ oXibeya,+ ni oKiriyathi. Otakaaha ipooma sootheene saari 14 ni mittetthe saya.

Ela yaari elapo yaavahiwe aya nihimo na Beniyamini, moovarihana ni imusi saya, ntoko etthu yoohiyeriwa.

19 Vano, esoorti ya nenli,+ yaahimorela nihimo na Simeyoni+ moovarihana ni imusi saya. Elapo yaavahiwe aya ntoko etthu yoohiyeriwa, yaakhala eriyari ya nihimo na Yuda.+ 2 Ilapo saavahiwe aya ntoko etthu yoohiyeriwa, saari iya: oBeri-Xeba,+ oXeeba, oMolada,+ 3 oHasari-Xuwali,+ oBala, wEsemi,+ 4 wElitoladi,+ oBetuli, oHorma, 5 oSikilaki,+ oBethi-Markabothi, oHasari-Susa, 6 oBethi-Lebawothi,+ ni oXaruheni. Otakaaha ipooma sootheene saari 13 ni mittetthe saya. 7 Epooma ya wAyini, oRimoni, wEteri, ni wAxani.+ Otakaaha ipooma sootheene saari ixexe ni mittetthe saya. 8 Nave-tho nihimo na Simeyoni naahivahiwa-tho mittetthe sootheene saarukurenrye ipooma iya, mpakha oBaalathi-Beri, eyo piiyo, oRama wa osuuli. Ela yaari elapo yaavahiwe aya nihimo na Simeyoni, ntoko etthu yoohiyeriwa, moovarihana ni imusi saya. 9 Elapo yaavahiwe aya osuulu wa Simeyoni, yaahavuliwe elapo ya Yuda, mwaha woowi elapo ya Yuda khiyaareere owunnuwela. Siiso osuulu wa Simeyoni, waahivahiwa elapo ntoko etthu yoohiyeriwa eriyari ya nihimo na Yuda.+

10 Moottharelana, esoorti ya neeraru,+ yaahimorela osuulu wa Zabuloni+ moovarihana ni imusi saya. Mukano wa elapo aya, waaniphiya mpakha oSaridi. 11 Nave mukano aya waanirowa mpakha oMareyali, owehanaka ni mpantta onikela nsuwa. Nave mukano owo waanivira oDabexethi, onaphiya oxepani, ohoolo wa oYokineyami. 12 Okhumaka oSaridi mpantta onikhuma nsuwa, mukano owo waanivira okerekhere wa oKisilothi-Tabori, onarowa oDaberathi,+ onawela oYafiya. 13 Okhumaka oYafiya, mukano owo waanirukunuwela mpantta onikhuma nsuwa mpakha oGathi-Heferi+ ni wEta-Kasini. Mukano owo waanirowa mpakha oRimoni, onaphiya oNeya. 14 Nave, okhumaka onorti, mukano owo waanirukunuwela oHanatoni, onamalela oxepani wa oYifita-Heli. 15 Nave-tho osuulu wa Zabuloni moovarihana ni imusi saya, waahivahiwa-tho epooma ya oKatathi, oNahalali, oXimironi,+ wIdala, ni oBetelehemu.+ Otakaaha ipooma sootheene saari 12 ni mittetthe saya. 16 Ela ti yaari elapo yaavahiwe aya osuulu wa Zabuloni ntoko etthu yoohiyeriwa, moovarihana ni imusi saya.+ Iya saari ipooma ni mittetthe saya.

17 Vano, esoorti ya neexexe+ yaahimorela osuulu wa Isakari+ moovarihana ni imusi saya. 18 Nto, mukano aya waanirowa mpakha epooma ya oYezireyeli,+ oKesulothi, oXunemi,+ 19 oHafarayimi, oXiyoni, wAnaharathi, 20 oRabithi, oKixiyoni, wEbesi, 21 oRemethi, wEni-Ganimi,+ wEni-Hada, ni oBethi-Pasesi. 22 Nave-tho, mukano owo waanirowa mpakha epooma ya oTabori,+ oXahasima, ni oBethi-Xemexi, onamalela muro Yordani. Otakaaha ipooma sootheene saari 16 ni mittetthe saya. 23 Ela ti yaari elapo yaavahiwe aya nihimo na Isakari ntoko etthu yoohiyeriwa,+ moovarihana ni imusi saya. Iya saari ipooma ni mittetthe saya.

24 Vano, esoorti ya neethanu,+ yaahimorela nihimo na Axeri+ moovarihana ni imusi saya. 25 Nto mukano aya, waari epooma ya oHelikathi,+ oHali, oBeteni, wAkaxafi, 26 wAlameleki, wAmadi ni oMixali. Mukano owo waaniphiya mpantta onikela nsuwa wa oKarmelo+ ni oXihori-Libinathi. 27 Nave-tho, mukano owo waanirukunuwela oBethi-Dagoni, mpantta onikhuma nsuwa, onavira oZabuloni, ni oxepani wa oYifita-Heli, onorti. Nto mukano owo waaniphiya oBethi-Emeki ni oNeyeli, onarowa mpakha moono woothiyana wa oKabuli. 28 Mukano owo waanirowa-tho epooma ya wEbironi, oRehobi, oHamoni, ni oKana, onarowa mpakha oSiidoni muttetthe wa atthu anceene.+ 29 Moottharelana, mukano owo waanirukunuwela oRama, onarowa mpakha epooma yoolipihiwa ya oTiiro.+ Nave-tho, waanirukunuwela oHosa, onamalela ophareya, muttetthe wa Akazibi, 30 wUma, wAfeki,+ ni oRehobi.+ Otakaaha ipooma sootheene saari 22 ni mittetthe saya. 31 Ela ti yaari elapo yaavahiwe aya nihimo na Axeri ntoko etthu yoohiyeriwa, moovarihana ni imusi saya.+ Iya saari ipooma ni mittetthe saya.

32 Vano, esoorti ya neethanu namosa,+ yaahimorela osuulu wa Nefetali moovarihana ni imusi saya. 33 Mukano wa elapo aya, waapacerya oHelefi, eyo piiyo, mwiri muulupale waari oSaananimi.+ Mukano owo waanivira wAdami-Nekebi, ni oYabineyeli, onarowa mpakha oLakumi, onamalela muro Yordani. 34 Moottharelana, mukano owo waanirukunuwela mpantta onikela nsuwa a wAzinothi-Tabori, onarowa oHukoki, onaphiya osuuli wa oZabuloni. Vano mukano aya waanivira wAxeri, mpantta onikela nsuwa, nave mpantta onikhuma nsuwa, waanivira elapo ya Yuda,* muro Yordani. 35 Vano ipooma soolipihiwa saari iya: oSidimi, oSeri, oHamati,+ oRakathi, oKinerethi, 36 wAdama, oRama, oHasori,+ 37 oKedexi,+ wEdreyi, wEni-Hasori, 38 oYironi, oMigdali-Eli, oHoremi, oBethi-Hanathi, ni oBethi-Xemexi.+ Otakaaha ipooma sootheene saari 19 ni mittetthe saya. 39 Ela ti yaari elapo yaavahiwe aya nihimo na Nefetali ntoko etthu yoohiyeriwa, moovarihana ni imusi saya.+ Iya saari ipooma ni mittetthe saya.

40 Vano, esoorti ya neethanu nenli,+ yaahimorela nihimo na Dani+ moovarihana ni imusi saya. 41 Nto mukano wa elapo aya, waari epooma ya oSoreya,+ wExitawoli, wIri-Xemexi, 42 oXaalabini,+ wAiyaloni,+ oYitala, 43 wEloni, oTiimina,+ wEkironi,+ 44 wEliteke, oXibetoni,+ oBaalathi, 45 oYehudi, oBene-Beraki, oGathi-Rimoni,+ 46 oMe-Yarikoni, oRakoni, vamosa ni mukano waattamenle oYope.+ 47 Masi muttetthe wa nihimo na Dani, khiwaarere waayevela.+ Siiso, yaahirowa otuphela muttetthe wa oLexemi,+ akuxa, ni awiiva atthu a muttetthe awo ni espaata.* Nuumala-vo, yaahikuxa muttetthe owo, okhala wawaya. Nto yaahituruka nsina na oLexemi, avaha nsina na Dani. Dani naari nsina na muhavinre aya.+ 48 Ela ti yaari elapo yaavahiwe aya nihimo na Dani ntoko etthu yoohiyeriwa, moovarihana ni imusi saya. Iya saari ipooma ni mittetthe saya.

49 Siiso, yaahikawanya elapo ntoko etthu yoohiyeriwa, moovarihana ni mittetthe saya. Nuumala-vo, aisarayeli yaahinvaha Yooxuuwa, mwaana a Nuuni, elapo ntoko etthu yoohiyeriwa, eriyari aya. 50 Attharaka yooruma ya Yehova, aisarayeli yaahinvaha Yooxuuwa epooma aavekenle awe, eyo piiyo, oTiminathi-Serahi,+ muttetthe wa omiyakoni wa wEfrayimi. Nto Yooxuuwa aahitthikela oteka epooma eyo, onakhala weiwo.

51 Iya, ilapo aisarayeli yaakaweliwe aya ntoko etthu yoohiyeriwa ni namukuttho Eleyazari, vamosa ni Yooxuuwa mwaana a Nuuni, ni ahooleli a imusi a mahimo a Isarayeli. Okaweliwa iwo wiiraneyale nuumala ovonyiwa esoorti*+ vamaithoni va Yehova, oSilo,+ vamukhora va etenta* ya muthukumano.+ Siiso, yaahimaliha okawanya ilapo.

20 Yehova aahimuhimeerya Yooxuuwa wiira: 2 “Mwaaleele aisarayeli wiira athanle ipooma sootthyawela,+ seiyo koolenlaakani, kimurumeelaka Moise. 3 Ipooma iyo, onrowa otthyawelaka khula mutthu onrowa omwiiva mukhwaawe ohilakenle.* Iyo sinrowa okhala ipooma sa ntthyawelo, wiira mulipa-oowunla ikuhu ohimwiive ole omwiivale mukhwaawe voohilakela.+ 4 Ole omwiivale mukhwaawe voohilakela, ohaana otthyawela epooma emosa ya ipooma iyo.+ Aphiya vale, ohaana weemela vamukhora wa epooma,+ ni waaleela mwaha awe axitokweene a epooma eyo. Nuumala-vo, axitokweene ahaana omwaakhela mpooma-mmo ni onvaha opuro wiira okhaleke memmo. 5 Vakhala wiira mulipa-oowunla ikuhu onoomutthimakela, axitokweene awo ahinvahererye mulipa oowiiva mmatatani mwa mulipa-oowunla ikuhu, okhala wiira omwiivale mukhwaawe owo voohilakela,* ni khaamunyokha.+ 6 Mulipa-oowiiva owo, ohaana okhala mpooma-mmo mpakha ophukiwa mulattu awe, ohoolo wa muloko,+ nave ohaana okhala mpooma-mmo mpakha okhwa namukuttho muulupale+ a mahiku awo. Nuumala okhwa namukuttho muulupale, mulipa-oowiiva owo, onoowerya otthikela epooma aatthyanwe awe, ni otthikela owannyawe”.+

7 Siiso, aisarayeli yaahivalaanya ipooma iya: Epooma ya oKedexi,+ yeeyo yaari oGalileya, muttetthe wa omiyaakoni wa Nefetali; epooma ya oSikhemi,+ muttetthe wa omiyaakoni wa Efrayimi; ni epooma ya oKiriyathi-Araba,+ eyo piiyo, oHebroni, muttetthe wa omiyaakoni wa Yuda. 8 Muttetthe waari mpantta onikhuma nsuwa wa muro Yordani, aisarayeli yaahithanla ipooma iya: Epooma ya oBeseri,+ yeeyo yaari woothakoni, muttetthe woottukhuwa wa nihimo na Rubeni; epooma ya oRamothi,+ yeeyo yaari oXileyaadi, ya nihimo na Gadi; ni epooma ya oGolani,+ yeeyo yaari oBaxani, ya nihimo na Manase.+

9 Iya, saari ipooma aisarayeli ootheene ni anamurwa yaakhala elapo aya, yaakhanle aya ootthyawela vakhala wiira yammwiiva mutthu ahilakenle.+ Mulipa-oowiiva owo, khaarowa wiiviwa ni mulipa-oowunla ikuhu ohinatthi ophukiwa mulattu awe, ohoolo wa muloko.+

21 Vano ahooleli a imusi sa alevi, yaahimwaattamela namukuttho Eleyazari,+ Yooxuuwa mwaana a Nuuni, ni ahooleli a imusi a mahimo a aisarayeli, 2 nto yaahaaleela oSilo,+ elapo ya oKanaani, wiira: “Yehova, omurumeelaka Moise, aahiruma wiira nivahiwe ipooma naarowa ahu okhalaka, ni imatta wiira nilyiheke inama sahu”.+ 3 Siiso, aisarayeli yaahihavula ipooma sikina ni imatta sikina mulaponi mwaya,+ yaavaha alevi awo,+ ntoko yaarummwale aya ni Yehova.

4 Vano, imusi sa akehathi+ ni alevi, yaawo yaari a osuulu wa namukuttho Aroni, yaahivahiwa ipooma 13 evonyiwaka esoorti,* mulaponi mwa nihimo na Yuda,+ na Simeyoni,+ ni na Beniyamini.+

5 Vano osuulu wa Kehathi waahanle, waahivahiwa* ipooma 10, mulaponi mwa nihimo na Efrayimi,+ na Dani, ni nimeya na nihimo na Manase.+

6 Vano osuulu wa Gerisoni,+ waahivahiwa ipooma 13, mulaponi wa nihimo na Isakari, na Axeri, na Nefetali ni nimeya na nihimo na Manase, oBaxani.+

7 Osuulu wa Merari,+ moovarihana ni imusi saya, waahivahiwa ipooma 12 sa nihimo na Rubeni, na Gadi ni na Zabuloni.+

8 Siiso, aisarayeli yaahaavaha alevi ipooma iyo ni imatta saya, evonyiwaka esoorti,* ntoko Yehova aamurumme awe Moise.+

9 Iya saari ipooma seiyo atthu a nihimo na Yuda ni nihimo na Simeyoni yaavanhe aya masina aya.+ 10 Ipooma iyo, yaahivahiwa osuulu wa Aroni yoowo waari wa emusi ya Kehathi, eyo piiyo, alevi, mwaha woowi ti yaapacenrye ovahiwa elapo, nuumala ovonyiwa esoorti.* 11 Siiso, awo yaahaavaha epooma ya oKiriyathi-Araba,+ eyo piiyo, oHebroni,+ muttetthe wa omiyaakoni wa oYuda, vamosa ni imatta saya. (Araba aari paapa awe Anaki.) 12 Masi ematta ya epooma eyo ni mittetthe saya, yaahinvaha Kalebi mwaana a Yefune, ntoko etthu yoohiyeriwa.+

13 Awo yaahivaha osuulu wa namukuttho Aroni, oHebroni+ ni imatta saya, ntoko epooma yootthyawela, yeeyo aarowa awe otthyawelaka mutthu aarowa ohimmwa wiira oomwiiva mukhwaawe.+ Ohiya-vo, yaahaavaha-tho ipooma iya sinittharelana: Epooma ya oLibina+ ni imatta saya, 14 oYatiri+ ni imatta saya, wExitemowa+ ni imatta saya, 15 oHoloni+ ni imatta saya, oDebiri+ ni imatta saya, 16 wAyini+ ni imatta saya, oYuta+ ni imatta saya, ni oBethi-Xemexi ni imatta saya. Otakaaha ipooma sootheene saari 9, sa mahimo awo manli.

17 Atthu a nihimo na Beniyamini, yaahivaha ipooma iya: Epooma ya oXibeyoni+ ni imatta saya, oXeeba ni imatta saya,+ 18 wAnatothi+ ni imatta saya, ni wAlimoni ni imatta saya. Otakaaha ipooma sootheene saari ixexe.

19 Ipooma sootheene saavahiwe anamukuttho, eyo piiyo, osuulu wa Aroni, saari 13 ni imatta saya.+

20 Vano imusi sa Kehathi saahanle, eriyari ya alevi, saahivahiwa ipooma sa nihimo na Efrayimi, evonyiwaka esoorti.* 21 Atthu a nihimo na Efrayimi, yaahivaha oSikhemi+ ni imatta saya, eyo piiyo, muttetthe wa omiyaakoni wa Efrayimi, ntoko epooma yootthyawela, yeeyo aarowa awe otthyawelaka mutthu aarowa ohimmwa wiira oomwiiva mukhwaawe.+ Ohiya-vo, yaahivaha-tho ipooma iya sinittharelana: Epooma ya oXezeri+ ni imatta saya, 22 oKibisayimi ni imatta saya, ni oBethi-Horoni+ ni imatta saya. Otakaaha ipooma sootheene saari ixexe.

23 Atthu a nihimo na Dani, yaahivaha ipooma iya: Epooma ya wEliteke ni imatta saya, oXibetoni ni imatta saya, 24 wAiyaloni+ ni imatta saya ni oGathi-Rimoni ni imatta saya. Otakaaha ipooma sootheene saari ixexe.

25 Nimeya na nihimo na Manase, yaahivaha ipooma iya: Epooma ya oTaanaki+ ni imatta saya, ni oGathi-Rimoni ni imatta saya. Otakaaha ipooma sootheene saari piili.

26 Ipooma sootheene ni imatta saya, seiyo imusi saahanle sa akehathi yaavahiwe aya, saari 10.

27 Nimeya na nihimo na Manase, yaahivaha osuulu wa Gerisoni,+ a imusi sa alevi, epooma yootthyawela, yeeyo aarowa awe otthyawelaka mutthu aarowa ohimmwa wiira oomwiiva mukhwaawe, eyo piiyo, epooma ya oGolani+ ni imatta saya, yeeyo yaari oBaxani. Ohiya-vo yaahivaha-tho epooma ya oBeexitera ni imatta saya. Otakaaha ipooma sootheene saari piili.

28 Atthu a nihimo na Isakari,+ yaahivaha ipooma iya: Epooma ya oKixiyoni ni imatta saya, oDaberathi+ ni imatta saya, 29 oYarimuthi ni imatta saya, ni wEni-Ganimi ni imatta saya. Otakaaha ipooma sootheene saari ixexe.

30 Atthu a nihimo na Axeri,+ yaahivaha ipooma iya: Epooma ya oMixali ni imatta saya, wAbidoni ni imatta saya, 31 oHelikathi+ ni imatta saya, ni oRehobi+ ni imatta saya. Otakaaha ipooma sootheene saari ixexe.

32 Atthu a nihimo na Nefetali, yaahivaha ipooma iya: Epooma ya ntthyawelo+ yeeyo aarowa awe otthyawelaka mutthu aarowa ohimmwa wiira oomwiiva mukhwaawe, eyo piiyo, epooma ya oKedexi+ ni imatta saya, yeeyo yaari oGalileya. Ohiya-vo, yaahivaha-tho epooma ya oHamothi-Dori ni imatta saya, ni oKaratani ni imatta saya. Otakaaha ipooma sootheene saari tthaaru.

33 Ipooma sootheene sa osuulu wa Gerisoni vamosa ni imusi saya, saari 13 ni imatta saya.

34 Atthu a nihimo na Zabuloni,+ yaahivaha imusi sa osuulu wa Merari,+ eyo piiyo, alevi yaahanle, ipooma iya sinittharelana: Epooma ya oYokineyami+ ni imatta saya, oKarta ni imatta saya, 35 oDimina ni imatta saya, ni oNahalali+ ni imatta saya. Otakaaha ipooma sootheene saari ixexe.

36 Atthu a nihimo na Rubeni, yaahivaha ipooma iya: Epooma ya oBeseri+ ni imatta saya, oYahasa ni imatta saya,+ 37 oKedemothi ni imatta saya, ni oMefaathi ni imatta saya. Otakaaha ipooma sootheene saari ixexe.

38 Atthu a nihimo na Gadi,+ yaahivaha ipooma iya: Epooma yootthyawela yeeyo aarowa awe otthyawelaka mutthu aarowa ohimmwa wiira oomwiiva mukhwaawe, eyo piiyo, epooma ya oRamothi ni imatta saya, yeeyo yaari oXileyaadi.+ Ohiya-vo yaahivaha-tho epooma ya oMahanayimi+ ni imatta saya, 39 oHexeboni+ ni imatta saya, ni oYazeri+ ni imatta saya. Otakaaha ipooma sootheene saari ixexe.

40 Ipooma sootheene saavahiwe aya osuulu wa Merari, vamosa ni imusi saya, eyo piiyo, imusi sa alevi saahanle, saari 12.

41 Ipooma sootheene sa alevi yaavahiwe aya ni aisarayeli, saari 48 ni imatta saya.+ 42 Khula epooma yaarukureriwa ni imatta saya. Ipooma iyo sootheene saari siiso.

43 Nto, Yehova aahaavaha aisarayeli ilapo sootheene aaleihenrye awe wiira aamwaavaha amuhavinre aya.+ Tivo, aisarayeli yaahikuxa ilapo iyo, anakhala memmo.+ 44 Nave-tho, Yehova aahaavaha opuro woomumula ipantta sootheene, ntoko aaleihenrye awe amuhavinre aya.+ Khuuvo nnakhala nwanani mmosa aawerya owana ni aisarayeli.+ Yehova aahaavahererya awanani aya ootheene mmatatani mwaya.+ 45 Itthu sootheene sooreera Yehova aaleihenrye awe aisarayeli, saahiiraneya, khiivo etthu nnakhala emosa yahiiraneyale. Tthiri itthu sootheene saahiiraneya.+

22 Vano Yooxuuwa aahiwiihana atthu a nihimo na Rubeni, na Gadi, ni nimeya na nihimo na Manase, 2 aahimeerya wiira: “Moovara itthu sootheene Moise, murumeyi a Yehova, oorummyaaweni,+ ni muhiiwelela nsu naka ni itthu sootheene koorummyaakani.+ 3 Nave khimwaanyanyanle axinninyu okathi ola wootheene, mpakha olelo-va.+ Nyuwo muheettela yooruma ya Yehova, Muluku anyu.+ 4 Vano, Yehova Muluku anyu, ohaaphwanyiha axinninyu omumula, ntoko aaleihenrye awe.+ Tivo, mutthikeleke mmawannyinyu,* elapo yeeyo Moise, murumeyi a Yehova, oovanhaaweni ntoko etthu yoohiyeriwa mpantta mukina* wa muro Yordani.+ 5 Masi mukhalane ephoole etthu emosa paahi: Mweetteleke nlamulo ni sooruma seiyo Moise, murumeyi a Yehova Muluku anyu, oovanhaaweni.+ Nto mumphenteke Yehova Muluku anyu,+ mweetteleke iphiro sawe sootheene,+ mwiiweleleke sooruma sawe,+ ni munvarexexe+ mmurumeelaka+ ni murima anyu wootheene ni okumi anyu wootheene”.+

6 Vano, Yooxuuwa aahaareeliha, ni aahaaleela wiira aroweke. Nuumala-vo, awo yaahirowa mmawannyeya. 7 Nimeya na nihimo na Manase, Moise aahivaha elapo ntoko etthu yoohiyeriwa, oBaxani.+ Nimeya nikina na nihimo na Manase, Yooxuuwa aahivaha elapo, mpantta onikela nsuwa wa muro Yordani,+ hoothe ni axinnaya. Okathi Yooxuuwa aaleela awe wiira arooke mmawannyeya, aahaareeliha, 8 aahimeeryaka wiira: “Mutthikeleke mmawannyinyu ni mihakhu sinceene, ni inama soowaatta, ni eparatha, ni eweero, ni ekoopiri, ni eyuuma, ni ikuwo sinceene.*+ Mukawaneke+ ni axinninyu itthu sa awanani anyu”.

9 Siiso, atthu a nihimo na Rubeni, na Gadi, ni nimeya na nihimo na Manase, yaahaahiya aisarayeli akina oSilo, elapo ya oKanaani. Nuumala-vo, yaahitthikela elapo ya oXileyaadi,+ elapo yeeyo yaavahiwe aya ntoko etthu yoohiyeriwa wiira akhaleke, sintoko Yehova aamurumme awe Moise.+ 10 Yaattamelaka oYordani, elapo ya oKanaani, atthu a nihimo na Rubeni, na Gadi, ni nimeya na nihimo na Manase, yaahaateka altaari aalupalexa oYordani weiwo. 11 Muhoolo mwaya, aisarayeli akina yaahiiwa+ vahimmwaka wiira: “Mooneke! Atthu a nihimo na Rubeni, na Gadi, ni nimeya na nihimo na Manase, ahaateka altaari ofronteera wa elapo ya oKanaani, waattamela oYordani mulaponi mwahu”. 12 Nuumala aisarayeli wiiwa eyo, muloko wootheene wa aisarayeli waahithukumana oSilo,+ wiira wawane ekhotto naawo.

13 Moottharelana, aisarayeli yaahimuruma Pineha,+ mwaana a namukuttho Eleyazari, orowa wa nihimo na Rubeni, na Gadi, ni nimeya na nihimo na Manase, elapo ya oXileyaadi. 14 Nave, ahooleli 10 yaahirowa vamosa ni Pineha. Mahimo ootheene a Isarayeli, aahikhuma muhooleli mmosa, yoowo aahoolela atthu anceene a Isarayeli.+ 15 Okathi Pineha ni ahooleli awo yaaphiyale aya opuro waari aya atthu a nihimo na Rubeni, na Gadi, ni nimeya na nihimo na Manase, elapo ya oXileyaadi, yaahaaleela wiira:

16 “Muloko wootheene wa Yehova onnookohani wiira: ‘Xeeni muhoonihenrye anyu ororomeleya+ ohoolo wa Muluku a Isarayeli? Olelo, nyuwo moohiya omutthara Yehova, mwiitekelaka altaari, ni mmurukunuwelaka Yehova.+ 17 Niireke yoottheka yaapanke ahu oPeyori khenniphiyerya? Mpakha olelo-va, hiyo khaniireerinhe mwaha wa yoottheka eyo, nnaamwi muloko wa Yehova waaphwanyiwe ehasara.+ 18 Vano nyuwo mumphavela omuhiya omutthara Yehova? Olelo, mwamurukunuwela Yehova, meelo onoonanariwa ni muloko wootheene wa Isarayeli.+ 19 Nto, vakhala wiira elapo nvahiwe anyu ti yoohiloka, mulapuwele elapo ya Yehova,+ weiwo enikhala aya etenta* ya muthukumano wa Yehova,+ mwakhaleke eriyari ahu. Masi, muhimurukunuwele Yehova, nnakhala muhiniirihe omurukunuwela, mwiitekelaka altaari, mphavelaka omutakaaha ni altaari a Yehova, Muluku ahu.+ 20 Okathi Akaani,+ mwaana a Zerahi oonihenrye awe ohiroromeleya ni itthu saahimmwale wiira saahaana opwetexiwa, niireke Muluku khaananariwe ni muloko wootheene wa Isarayeli?+ Akaani khaakhwiiye mekhawe mwaha wa yoottheka awe’”.+

21 Siiso, atthu a nihimo na Rubeni, na Gadi, ni nimeya na nihimo na Manase, yaahiwaakhula ahooleli a atthu anceene a Isarayeli,+ wiira: 22 “Muluku muulupalexa waavikana amuluku ootheene, Yehova,+ onnisuwela. Tthiri, Muluku muulupalexa waavikana amuluku ootheene, Yehova, onnisuwela. Nave, Isarayeli onoosuwela. Akhala wiira noomuteka altaari wiira nimurukunuwele ni ohimwiiwelela Yehova, weeso Muluku ohinoopole olelo-va. 23 Akhala wiira nihaateka altaari wiira nihiye omutthara Yehova, ni ovaha soovaha para opahiwa, soovaha sa ipyo ni mikuttho sa opatthani, Yehova onoonihukhumu.+ 24 Nnaari, hiyo nihaateka altaari, mwaha woowi nuupuwenle wiira muhoolo aniinyu yaamwaahimeerya aniihu ariki: ‘Exeeni erina anyu ni Yehova Muluku a Isarayeli? 25 Yehova oohela ntoko mukano muro Yordani eriyari ahu ni nyuwo, atthu a nihimo na Rubeni ni na Gadi. Nyuwo khamurina etthu ni Yehova’. Siiso, aniinyu animwaakhoottiherya aniihu omukokhorela* Yehova”.

26 “Tivonto, hiyo naahihimya wiira: ‘Nrowe naateke altaari, ohiya para ovahaka soovaha para opahiwa aahiiso mikuttho. 27 Masi altaari awo anrowa onikhalela onamoona hiyo ni nyuwo,+ osuulu ahu ni osuulu anyu, wiira nnonvarela muteko Yehova, nivahaka soovaha para opahiwa, mikuttho ni mikuttho sa opatthani.+ Nto, muhoolo aniinyu khanrowa waahimeerya aniihu wiira: “Nyuwo khamurina etthu ni Yehova”’. 28 Tivonto naahimmye ahu wiira: ‘Vakhala wiira muhoolo hiyo ni osuulu ahu ninrowa ohimeeriwa siiso, vano hiyo ninrowa waakhula wiira: “Nweheke ekoopiya ya altaari a Yehova yoowo amuhavinre ahu yaamutenke aya, ohiya wiira avaheke soovaha para opahiwa, aahiiso mikuttho. Masi wiira altaari owo onikhalele onamoona hiyo ni nyuwo”’. 29 Khaninkhala-khala nuupuwelelaka omurukunuwela Yehova, ni omuhiya omutthara Yehova+ naatekaka altaari wiira nivaheke soovaha para opahiwa, soovaha sa ipyo ni mikuttho. Hiyo, ninrowa ovahaka paahi mikuttho sa inama soopahiwa, soovaha sa ipyo, ni mikuttho sikina, waltaari a Yehova, yoowo ori ohoolo wa etapernaakulu awe”.+

30 Okathi mulipa a mukuttho Pineha, ni ahooleli a muloko wootheene, yaawo-tho yaahoolela a atthu anceene a Isarayeli, vaiwale aya moolumo a atthu a nihimo na Rubeni, na Gadi, ni na Manase, yaahihakalala.+ 31 Siiso, Pineha mwaana a namukuttho Eleyazari, aahaaleela atthu a nihimo na Rubeni, na Gadi, ni na Manase wiira: “Olelo noosuwela wiira Yehova ori eriyari ahu, okhala wiira khammurukunuwenle Yehova. Vano, nyuwo moowoopola aisarayeli mmatatani mwa Yehova”.

32 Nuumala Pineha mwaana a namukuttho Eleyazari, ni ahooleli a aisarayeli olavula ni atthu a nihimo na Rubeni, ni na Gadi elapo ya oXileyaadi, yaahitthikela elapo ya oKanaani, ni yaahaaleela aisarayeli akina itthu yaiwale aya. 33 Nto aisarayeli yaahaasivela etthu yaiwale aya. Vano awo yaahimuttottopela Muluku, ni khiyuupuwenle-tho owana ekhotto ni atthu a nihimo na Rubeni, ni na Gadi, wiira apwetexe elapo yaakhala aya.

34 Siiso, atthu a nihimo na Rubeni, ni na Gadi, yaahinvaha nsina altaari owo. Tthiri yaanihimya wiira: “Altaari ola onniirela onamoona, ootheene ahu, wiira Yehova, ti Muluku eekeekhai”.

23 Waahivira okathi munceene nuumala Yehova onvaha Isarayeli opuro woomumula,+ ni omoopola mmatatani mwa awanani awe ootheene yaamwaattamenle. Okathi owo, Yooxuuwa aahuuluvala vanceene.+ 2 Vano Yooxuuwa aahiwiihana aisarayeli ootheene,+ eyo piiyo, axitokweene, ahooleli a Isarayeli, alipa-oophuka milattu, ni makhulupale,+ aahimeerya wiira: “Miyo kihuuluvala vanceene. 3 Nyuwo muhoona mmansinyu itthu sootheene Yehova, Muluku anyu, iirenle awe nloko nla nootheene, ophavelaka mureerelo anyu, maana Yehova, Muluku anyu, taawanne owaakihakani.+ 4 Nkawehani, miyo kihookawelani elapo ya maloko a atthu ahanle, ntoko etthu yoohiyeriwa,+ kivonyaka esoorti.*+ Nave-tho, kihookawelani elapo ya maloko ootheene kipwetenxe aka,+ okhuma muro Yordani mpakha ephareya Yuulupale,* mpantta onikela nsuwa. 5 Nave Yehova, Muluku anyu, taawoomonle atthu awo ohoolo wanyu.+ Owo aahiwoomola atthu awo mwaha wa nyuwo, nto nyuwo mookuxa elapo aya, ntoko Yehova, Muluku anyu, ooleihenryaaweni.+

6 “Vano nyuwo mulipe murima, wiira mwiiweleleke ni mweetteleke itthu sootheene silempwale eliivuru ya nlamulo+ na Moise, muhihapuwelaka nnakhala moono woolopwana, aahiiso moono woothiyana.+ 7 Muhiiraaneke ni atthu a maloko awo+ ahanle eriyari anyu. Muhiromoleke masina a amuluku aya,+ nnakhala muhilapheke mwaaromolaka yaawo. Nave muhaarumeeleke amuluku awo, nnakhala owuuramela.+ 8 Masi, munvarexexeke Yehova, Muluku anyu,+ ntoko mwiirale anyu mpakha olelo-va. 9 Yehova onoowoomola atthu a maloko maalupale ni ootupa ohoolo wanyu.+ Owo onimwiira siiso ntoko iirale awe mpakha olelo-va, nto khuuvo mutthu onrowa owerya weemela ohoolo wanyu.+ 10 Mulopwana mmosa a nyuwo, onrowa owoomola awanani awe 1.000,+ okhala wiira Yehova, Muluku anyu, onrowa owana owaakihakani,+ ntoko ooleihenryaaweni.+ 11 Tivo, nwehaweheke okathi wootheene,+ mumphentaka Yehova, Muluku anyu.+

12 “Masi nyuwo mwatthikela ottuli, munaataana ni maloko ahanle eriyari anyu,+ munathelana+ naawo, munakhala naawo, nave awo anakhala ni nyuwo, 13 musuwelexe wiira Yehova, Muluku anyu, khonrowa woomola maloko awo mwaha wa nyuwo.+ Atthu a maloko awo anrowa okhala ntoko muraakho ni ntapha. Awo anrowa okhala ntoko murepettho onoowaxulani+ ni miiwa mmaithoni mwanyu, mpakha nyuwo omala-mala elapo ela yooreera Yehova, Muluku anyu, oovanhaaweni.

14 “Vano, miyo kihanle okhwa. Nto nyuwo moosuwela oratteene ni murima anyu wootheene ni okumi anyu wootheene, wiira itthu sootheene sooreera Yehova, Muluku anyu, ooleihenryaaweni, sihiiraneya. Tthiri itthu sootheene sihiiraneya. Khiivo nnakhala etthu emosa ehiiraneyale.+ 15 Masi, siisaale itthu sootheene sooreera, Yehova, Muluku anyu, ooleihenryaaweni, siiraneyale aya,+ siiso-tho Yehova onimookumiheryani ihasara sootheene* oleihenrye awe. Nave, onimoomala-malihani elapo yooreera Yehova, Muluku anyu, oovanhaaweni.+ 16 Akhala wiira munoohonona nivarihano na Yehova, Muluku anyu, oorummyaaweni weettela, ni mwarowa waarumeela amuluku akina, mwaakokhorelaka yaawo, nto Yehova, onoonanariwa vanceene ni nyuwo.+ Nave, nyuwo munoomala-mala voohipisa elapo yooreera oovanhaaweni”.+

24 Vano, Yooxuuwa aahithukumanya mahimo ootheene a Isarayeli oSikhemi, ni aahiwiihana axitokweene a Isarayeli, ahooleli aya, alipa-oophuka, ni makhulupale aya.+ Nto awo yaaheemela ohoolo wa Muluku eekeekhai. 2 Yooxuuwa aahaaleela atthu ootheene wiira: “Etthu onihimya awe Yehova, Muluku a Isarayeli, tiila: ‘Khalai,+ amuhavinre anyu+ yaakhala mpantta mukina wa muro Eufrate, weiwo aakhala awe Terahi, paapa awe Abrahamu ni Nahori. Awo yaanaarumeela amuluku akina.+

3 “‘Nuuvira okathi, kaahimukuxa muhavinre anyu, Abrahamu,+ mpantta mukina wa muro Eufrate, nto kaahimweettiha elapo yootheene ya oKanaani, ni kaahiiriha osuulu awe okhala munceene.+ Nuumala-vo kaahimureeliha Abrahamu nto owo aahimuyara Isaakhi.+ 4 Moottharelana Isaakhi aahimuyara Yakobe ni Esawu.+ Nuumala-vo, kaahinvaha Esawu mwaako Seyiri,+ wiira okhale awawe. Vano Yakobe ni anaawe yaahirowa wExiitu.+ 5 Muhoolo mwaya, kaahimuruma Moise ni Aroni+ wiira yookhaliheryeni, ni kaahikumiherya ihasara wExiitu+ ni itthu kaapanke aka eriyari aya. Nuumala-vo, kaahookumihani wExiitu iwo. 6 Okathi kaakumiha aka axipaapa anyu wExiitu,+ ni aphiya ophareya, atthu a wExiitu yaahiwoomola axipaapa anyu ni ikaaro sa ekhotto ni anakhavalo, mpakha ophiya ephareya Yooxeerya.+ 7 Awo yaahipacerya okikhuwelela miyo, Yehova.+ Siiso kaahikumiherya epiphi eriyari anyu ni atthu a wExiitu. Nave kaahaakeliha atthu a wExiitu mphareya, kaasamiha.+ Nto nyuwo mwaahiweha ni maitho anyu itthu kiirale aka elapo ya wExiitu.+ Nuumala-vo, mwaahikhala moothakoni iyaakha* sinceene.+

8 “‘Miyo kaahoopixani elapo ya atthu a wAmori, yaawo yaakhala mpantta mukina* wa muro Yordani, nto awo yaahiwana ni nyuwo.+ Masi, miyo kaahoovahereryani mmatatani mwanyu, wiira mukuxe elapo aya, ekhale yawinyu. Vano miyo kihaamala-maliha atthu awo ohoolo wanyu.+ 9 Nave, Balaki mwaana a Sipori, mwene a oMowabi, aahivenya ni aahiwana ni Isarayeli. Nto owo aahimwiihana Balaamu, mwaana a Beyori, wiira ootakhaliheni.+ 10 Masi miyo nkaaphavenle onwiriyana Balaamu.+ Siiso owo aahooreelihani ikwaha sinceene,+ nave miyo kaahiwoopolani mmatatani mwawe.+

11 “‘Moottharelana, nyuwo mwaahilapuwa muro Yordani,+ mphiya oYeriko.+ Nto ahooleli* a oYeriko, vamosa ni atthu a wAmori, ni aperizi, ni akanaani, ni aheti, ni axirigaxi, ni ahivi, ni ayebusi, yaahiwana ni nyuwo. Masi miyo kaahaavahererya mmatatani mwanyu.+ 12 Siiso miyo kaahaakhulumula, nto awo yaahitthyawa ohoolo wanyu,+ ntoko yaatthyanwe aya mamwene manli a wAmori. Khahiyo espaata* anyu wala mattheere anyu yaawoomonle.+ 13 Nto miyo kihoovahani elapo, muhivanre anyu muteko, ni ipooma muhitenke anyu,+ munakhala weiwo. Nyuwo munnoolya mihokorokho sa miri sa ewuuva, ni mihokorokho sa miri sa olivera, muhiphatteyale anyu’.+

14 “Tivonto, mmuttittimiheke vanceene* Yehova ni mmurumeeleke ni murima wooloka ni moororomeleya.*+ Nave mwaamala-malihe amuluku yaawo amuhavinre anyu yaarumeela aya mpantta mukina wa muro Eufrate ni wExiitu,+ ni mmurumeeleke Yehova. 15 Vano, mwaahooneke oreerela omurumeela Yehova, mmuthanle olelo vaava, Muluku onimphavela anyu omurumeela,+ akhala wiira munrowa waarumeelaka amuluku yaarumeeliwa ni amuhavinre anyu, yaawo yaakhala mpantta mukina wa muro Eufrate,+ aahiiso amuluku a wAmori a elapo yeeyo enikhala anyu.+ Masi miyo ni etthoko aka, nnoomurumeelaka Yehova”.

16 Nto atthu yaahaakhula ariki: “Khaninkhala-khala nimuhiyaka Yehova, wiira naarumeeleke amuluku akina. 17 Yehova Muluku ahu, tonikuminhe hiyo, ni axipaapa ahu elapo ya wExiitu,+ weiwo naari ahu ipottha.+ Nto ti yoowo opanke itthu iya sootheene sootikiniha ohoolo wahu,+ nave ti yoowo onikhapelenle iphiro sootheene neetta ahu ni onaakihenrye atthu ootheene naaphwanya ahu.+ 18 Yehova oowoomola atthu ootheene, vamosa ni atthu a wAmori, yaawo yaakhala elapo ela nihinatthi hiyo. Tivonto, ni hiyo ninrowa omurumeelaka Yehova, okhala wiira owo ti Muluku ahu”.

19 Vano, Yooxuuwa aahaahimeerya atthu wiira: “Nyuwo khamunwerya omurumeela Yehova, maana owo ti Muluku oowaarya.+ Owo oniphavela wiira atthu amukokhoreleke yoowo paahi.+ Nave khonrowa olevelela ohiiwelela wanyu ni soottheka sanyu.+ 20 Okathi wootheene Yehova aaniwiirelani itthu sooreera. Masi, mwamuhiya munaarumeela amuluku a amalapo, owo onimoorukunuwelani ni onimoomala-malihani”.+

21 Masi atthu yaahimwaakhula Yooxuuwa, ariki: “Nnaari, ninrowa omurumeelaka Yehova!”+ 22 Siiso, Yooxuuwa aahaahimeerya atthu ale, oriki: “Nyuwo mwa anamoona muniilamula mmansinyu wiira moolakela othanla omurumeela Yehova”.+ Nto atthu awo yaahaakhula ariki: “Aayo, hiyo na anamoona”.

23 “Tivonto, mwaamala-malihe amuluku a amalapo eriyari anyu, ni mmurumeeleke Yehova, Muluku a Isarayeli, ni murima anyu wootheene”. 24 Atthu awo yaahimwaakhula Yooxuuwa wiira: “Ninrowa omurumeelaka Yehova, Muluku ahu, nave ninrowa wiiwelelaka nsu nawe!”

25 Siiso, Yooxuuwa aahipaka nivarihano ni atthu awo nihiku nenle, ni aahaavaha nlamulo oSikhemi. 26 Moottharelana, Yooxuuwa aahilepa moolumo awo muliivuruni ya nlamulo na Muluku.+ Nto aahikuxa nluku nuulupale,+ eemexa vathi va mwiri muulupale yoowo aattamenle opuro woowaarya wa Yehova.

27 Vano, Yooxuuwa aahaaleela-tho atthu ootheene wiira: “Mwiiwe! Nluku nla ninrowa onikhalela onamoona,+ okhala wiira nluku nla, nihiiwa itthu sootheene Yehova onihimenryaawe. Nave nluku nla ninrowa wookhalelani onamoona, wiira muhimukhootte Muluku anyu”. 28 Siiso, Yooxuuwa aahaamwarya atthu, nto khula mutthu aahitthikela elapo aavahiwe awe ntoko etthu yoohiyeriwa.+

29 Nuumala itthu iya, Yooxuuwa mwaana a Nuuni, murumeyi a Yehova, aahikhwa orina ene iyaakha 110.+ 30 Nto owo, aahivithiwa muttetthe aavahiwe awe ntoko etthu yoohiyeriwa, oTiminathi-Serahi,+ yoowo waari muttetthe wa omiyaakoni wa Efrayimi, onorti wa mwaako Gaaxi. 31 Isarayeli khaahiyale omurumeela Yehova mahiku ootheene, Yooxuuwa aari awe mukumi, ni mahiku ootheene a axitokweene yaawo yaakhanle akumi nuumala Yooxuuwa okhwa, ni yaasuwela itthu sootheene Yehova aapanke awe wiira omphwanyihe mureerelo Isarayeli.+

32 Makhuva a Yosefe+ yaawo aisarayeli yaaruuhale aya wExiitu, yaahivithiwa oSikhemi, ematta Yakobe aathumme awe ni anamwane a Hemori,+ paapa awe Sikhemi, ni musurukhu 100 wa eparatha.+ Nto ematta eyo yaari ntoko etthu yoohiyeriwa ya anamwane a Yosefe.+

33 Nave-tho, Eleyazari mwaana a Aroni, aahikhwa.+ Nto aisarayeli yaahinvitha opuro woottukhuwa wa Pineha, mwanawe,+ opuro yoowo aavahiwe awe, muttetthe wa omiyaakoni wa Efrayimi.