YOWELI
1 Moolumo Yehova aamuleelale awe Yoweli,* mwaana a Petuweli taala:
2 “Nwiriyane ela, nyuwo axitokweene,
Nave nvahe ephoole, nyuwo ootheene munikhala elapo ela.
Niireke yootoko wiiraneya etthu siisa mahiku anyu ala,
Wala mahiku a amuhavinre anyu?+
3 Mwaaleele aniinyu etthu ela,
Vano aniinyu yaaleele anaaya,
Nave anaaya yaaleele osuulu onirwa.
4 Etthu esoope ehiyale aya, nasope ohoolya.+
Etthu nasope ohiyale awe, esoope ehirina mapupha ehoolya.
Nave etthu esoope ehirina mapupha ehiyale aya, esoope yoowali ehoolya.+
5 Nvenye, nyuwo anamuhapaliwa,+ munleke!
Mwiikhupanyeryeke, nyuwo ootheene muniwurya eviinyu,
Okhala wiira khenrowa okhala eviinyu ya niinaano para nyuwo.+
6 Tthiri mulaponi mwahu nnimoorwa nloko, noowerya ni nihinkontareya.+
Maino aya anlikana ni maino a kharamu,+ nave eyano aya enlikana ni eyano ya kharamu.
7 Nloko nlo noohonona ematta aka ya ewuuva ni nihiikittha mwiri aka wa efiiku nikhaliha exa.
Nlo nookumiha makula a miri saka, nirihela ottaiwene,
Nihiya iritta saya siri ene sootteela.
8 Mwiikhupanyeryeke, ntoko oniira awe muthiyana ohitonko orupa ni mulopwana,
Yoowo oniwara isaakho mwaha wookhweliwa noivu awe.*
9 Mpaani mwa Yehova soomala yoovaha ya ipyo+ ni yoovaha eniwuriwa.+
Anamukuttho, arumeyi a Yehova, animunla.
10 Ematta yoohononiwa, etthaya enninla,+
Okhala wiira ipyo soohononiwa, eviinyu ya niinaano ehuuma, nave makhura aamala.+
11 Alimi annuuliwa muru, nave alipa anipaka eviinyu anniikhupanyerya,
Mwaha wa etiriku ni esevaata.
Tthiri mireerelo sa mmatta soomala-mala.
12 Mwiri wa ewuuva ohuuma,
Nave mwiri wa efiiku woonyaala.
Mwiri wa muhokorokho oniihaniwa roma, korooro ni mwiri wa masa,
Niire so, miri sootheene sa mmatta sihuuma.+
Otteeliwa murima wa atthu wookhalihiwa wuuliwa muru.
13 Nyuwo anamukuttho, nware isaakho ni munleke.
Mwiikhupanyeryeke, nyuwo arumeyi a valtaari.+
Mukele mutemplo ni nvirihe ohiyu memmo nwanre ene isaakho, nyuwo arumeyi a Muluku aka,
Okhala wiira khuuvo oniruuha yoovaha ya ipyo+ ni yoovaha eniwuriwa+ mpaani mwa Muluku anyu.
14 Mulaleye wiira atthu atthukwe. Mulaleye muthukumano muulupale.+
Mwaathukumanye axitokweene, ni atthu ootheene a elapo ela,
Mpaani mwa Yehova Muluku anyu.+ Nave mmukhuwelele Yehova wiira ookhaliheryeni.
15 Mootakhaliwa mwaha wa nihiku nlo!
Tthiri nihiku na Yehova nri vakhiviru.+
Nihiku nlo ninrwa ntoko nihiku na opwetexa wa Muluku ooweryexa!
16 Mpaani mwa Muluku ahu khokhanle otteeliwa murima nnakhala ohakalala.
Yoolya yoomala.
17 Mmiso* ohuuma vapoxoloni vaya.
Arumasiya aahononiwa.
Mapuro ansukiwa soolya aapwexiwa, okhala wiira ipyo sihuuma.
18 Hata mihuwo saya sinnuupulela!
Ipooyi saya sinneetta voohitthokiheya, okhala wiira khasirina opuro woolya!
Nave makoto aya a ipwittipwitthi sinnihukhummwa.
19 Khoo Yehova, miyo kinoowiihanani,+
Okhala wiira mooro woopaha mapuro ootheene anilyihiwa inama moothakoni.
Nave mooro woopaha miri sootheene sa mmatta.
20 Hata inama sa mutakhwani sinnoolipelelani,
Okhala wiira miro sihuuma,
Nave mooro woopaha mapuro anilya inama moothakoni”.
2 “Murumihe nlope oSiyoni!+
Mukhuwelele ekhotto vamwaako vaka woowaarya.
Atthu ootheene anikhala elapo ela athukumeleke,
Okhala wiira nihiku na Yehova ninnoorwa!+ Nri vakhiviru.
2 Nlo ninrowa okhala nihiku nooriipela ni na epiphi,+
Ninrowa okhala nihiku na meeku ni na ewiriphi.+
Nihiku nlo ninrowa olikanaka ni waarya wa nsuwa na voosiisu nimmwareela vamwaako.
Anookhala atthu anceene ni oowerya.+
Khatonko okhala atthu siisa ntoko nihiku nlo,
Nave khanrowa otthikela okhala atthu siisa,
Iyaakha sa atthu ootheene.
3 Ohoolo waya wookhala mooro onipaha,
Nave ottuli waya wookhala mooro onipwetexa.+
Elapo eri ohoolo waya enlikana ni exarti ya wEedeni,+
Masi elapo eri ottuli waya enlikana ni voothakoni ohinkhaliwa.
Nto khiivo etthu eniwerya woopowa.
4 Mukhalelo aya onlikana ni mukhalelo wa ekhavalo,
Nave awo annitthimaka ntoko ikhavalo sinirumeeliwa okhottoni.+
5 Onyakula waya onlikana ni ikaaro sa ekhotto sinwela vasulu va mwaako,+
Nave onlikana ni opuphuruwa wa mooro onipaha malaxi.
Onyakula waya onlikana ni atthu oowerya yiilokihenrye owana ekhotto.+
6 Atthu anoothukumela ohoolo waya.
Owiitho wa atthu ootheene onimooneya wiira aaxanka.
7 Awo annitthimakela okhottoni ntoko anakhotto ootupa,
Anniwela ixiri ntoko anakhotto.
Khula mmosa onnitthara ephiro awe,
Nave khuuvo onihapuwa ephiro awe.
8 Awo khanaakakha akhwaaya,
Khula mmosa onnitthara ephiro awe.
Vakhala wiira ikaruma sa ekhotto sinnaamoroxa akina,
Atthu akina khanikhuma opuro aya yiilokihenrye aya owana ekhotto.
9 Awo annituphela epooma, annitthimaka vasulu va ixiri.
Anniwela ipa, aviraka vaxanelani ntoko alatarau.
10 Elapo ni erimu ennithukumela ohoolo waya.
Nsuwa ni mweeri sooriipela,+
Nave itheneeri soohiya waarya.
11 Yehova onookhuwela ohoolo wa anakhotto awe,+ okhala wiira omuttettheni wawe khareere atthu.+
Tthiri ole oneettela nuulumo na Muluku toowerya,
Okhala wiira nihiku na Yehova ti nuulupale ni ti nootepa woopiha.+
Ti pani oniwerya ovilela nihiku nlo?”+
12 Etthu onihimya awe Yehova tiila: “Nto, hata vano, mutthikele wa miyo ni murima anyu wootheene,+
Mutthukwaka,+ munlaka ni mwiikhupanyeryaka.
13 Mukhere murima anyu,+ ohiya ikuwo sanyu.+
Nave mutthikele wa Yehova Muluku anyu,
Okhala wiira owo onnoona othunku, toomoriwa ikharari, toopisa onanariwa+ ni onnooniherya vanceene ophenta woororomeleya.+
Nave, owo onooturuka muupuwelo awe mwaha wa ehasara enrowa okhumelela.
14 Woonasa wene, owo onootthikela ottuli ni onimuupuwelela mwaha owo,+
Nave onoonivaha mareeliho manceene.
Niireke owo khonrowa onivaha mareeliho mwaha wa yoovaha ya ipyo ni yoovaha eniwuriwa, sinivahiwa Yehova Muluku anyu?
15 Murumihe nlope oSiyoni!
Mulaleye wiira atthu etthukwe, nwiihanele muthukumano muulupale.+
16 Mwaathukumanye atthu, mureerihe muloko.+
Mwaathanle alopwana oowuuluvala, mwaathukumanye anamwane oowunnuwa ni acikhaani.+
Noivu okhume okwartu wawe, nave noiva okhume okwartu wawe.
17 Eriyari ya mukhora ni altaari,+
Anamukuttho yinleke, arumeyi a Yehova ahimyeke wiira:
‘Khoo Yehova, nwoonele othunku atthu anyu.
Muhiwiirihe atthu anyu otheiwa,
Alamuleliwaka ni maloko makina.
Niireke vaamuloka atthu okohaka wiira: “Ori vai Muluku aya?”’+
18 Yehova onookhalela nthiti okhapelela elapo awe,
Nave onoowoonela othunku atthu awe.+
19 Yehova onoowaakhula atthu awe wiira:
‘Kinimooruuhelani ipyo, eviinyu ya niinaano ni makhura.
Nto nyuwo munimoolya mpakha ovona.+
Nave maloko makina khanrowa otthikela wooveehani.+
20 Kinoomoomolela ottaiwene wa nyuwo ole onikhuma onorti,
Kinoomuroiha woothakoni woowuuma ohinikhaliwa,
Ohoolo wawe* onrowa owehaka mpantta onikhuma nsuwa wa ephareya,*
Nave ottuli wawe onrowa owehaka mpantta onikela nsuwa wa ephareya.*
Makhuva awe anrowa wunkhaka,
Murutthu awe onrowa wunkhaka mulaponi mootheene,+
Okhala wiira Muluku onoopaka itthu suulupale’.
21 Nyuwo elapo, muhoove.
Mutthapeke ni mutteeliweke murima, okhala wiira Yehova onoopaka itthu suulupale.
22 Nyuwo inama sa mutakhwani, muhoove etthu,
Maana malaxi a woothakoni anooripelela.+
Miri sinimwiima mihokorokho.+
Mwiri wa efiiku ni wa ewuuva, sinimwiima mihokorokho sinceene.+
23 Nyuwo anamwane a oSiyoni, mutthapeke ni mutteeliweke murima ni Yehova Muluku anyu,+
Maana onimoovahani epula yoopacerya* okathi wooreerela.
24 Opuro oneepetthiwa etiriku onoosareya ipyo sooreera,
Nave mapuro aninyakattiwa ewuuva enoosareya eviinyu ya niinaano ni makhura.+
25 Tthiri, iyaakha sivinre miyo kaahooruuhelani anakhotto anceene a anasope,
Isoope sihirina mapupha, isoope soowali ni isoope sinikhuura itthu, seiyo saakhuurale ipyo sanyu.
Miyo kinimoolivani mwaha wa itthu anakhotto awo yaahononne aya.+
26 Tthiri, nyuwo munimoolya mpakha ovona,+
Nave munoottottopela nsina na Yehova Muluku anyu,+
Yoowo opanke itthu sootikiniha eriyari anyu.
Atthu aka khanrowa otthikela wuulihihiwa muru.+
27 Nyuwo munoosuwela wiira miyo kiri eriyari ya atthu a Isarayeli,+
Ni wiira miyo ka Yehova Muluku anyu,+ khuuvo-tho mukina!
Atthu aka khanrowa otthikela wuulihihiwa muru.
28 Nuumala-vo, kinimwaavaha ikuru saka+ atthu a makhalelo ootheene,
Nave aniinyu axilopwana ni aniinyu axithiyana anrowa okhala maprofeta,
Atthu anyu oowuuluvala anrowa olohaka itthu,
Nave amiravo anyu anrowa wooniheriwaka itthu ni Muluku.+
29 Hata ipottha saka soolopwana ni soothiyana,
Mahiku awo kinoovaha ikuru saka.
30 Kinrowa wooniherya itthu sootikiniha wiirimu ni valaponi,
Ntoko: ephome, mooro ni mwiixi munceene oniwela osulu.+
31 Nsuwa ninrowa okhalihiwa epiphi, nave mweeri onrowa okhalihiwa ephome,+
Nihinatthi ophiya nihiku nuulupale ni nootepa woopiha na Yehova.+
32 Ootheene ale anivekela aromolaka nsina na Yehova, animoopoliwa.+
Tthiri, omwaako Siyoni ni oYerusalemu tanrowa aya okhala atthu anrowa woopowa,+ ntoko Yehova aahimmye awe.
Nave awo anrowa okhala eriyari ya atthu yooponwe, yaawo Yehova oniwiihana awe”.
3 “Mwiiwe! Mahiku awo ni okathi owo,
Okathi kinrowa aka waattikiherya oYuda ni oYerusalemu atthu yaaroihiwe weepotthani,+
2 Nave-tho kinimwaathukumanya atthu a maloko ootheene,
Ni kinimwaaroiha oxepani wa Yosafati.
Weiwo, miyo kinimwaaphukela,+
Kiwaakiheryaka atthu aka ni aIsarayeli yaawo ari awaka.
Tthiri awo yaahaamwarya-mwara atthu aka eriyari ya maloko,
Nave yaahikawana elapo aka yaaworu.+
3 Awo ahaavonyerya esoorti atthu aka.+
Aamutumiha mmiravo yiirelaka omuliva muthiyana namararuwa,
Nave aamutumiha mwaana mwaamuthiyana ni eviinyu, wiira awurye.
4 Nave-tho, exeeni erina anyu ni miyo,
Nyuwo atthu a oTiiro ni oSiidoni vamosa ni atthu ootheene a mittetthe sa afilisti?
Niireke munikittikiherya etthu epanke aka?
Vakhala wiira munookittikiherya,
Ni miyo kinimoottikiheryani voowaakuveya ni moohipisa etthu epanke anyu.+
5 Nyuwo mookuxa eparatha aka ni eweero aka,+
Nave mooroiha mihakhu saka sooreerexa mpaani mwa Muluku anyu.
6 Muhaatumiherya akereku+ atthu a oYuda ni a oYerusalemu,
Wiira mwaaroihe ottaiwene wa muttetthe aya.
7 Miyo kinimwaakumiha opuro mwaatuminhe anyu,+
Nave kinimoottikiheryani etthu mpanke anyu.
8 Miyo kinimwaatumiherya atthu a oYuda+ aniinyu axilopwana ni aniinyu axithiyana,
Nto awo animwaatumiherya alopwana a oXeeba, nloko nenlo na ottaiwene.
Tthiri Yehova mwaneene tolavunle eyo.
9 Mulaleye etthu ela eriyari ya maloko+ wiira:
‘Mwiilokiherye owana ekhotto! Nwiihane alopwana anyu ootupa wiira avare muteko!
Anakhotto ootheene athukumane, erweeke!+
10 Ixaruwa* sanyu mpakihe espaata, nave ihipa sanyu mpakihe mavaka.
Mutthu ootteettheya ohimyeke wiira: “Miyo ka mutthu oowerya”.
11 Murwe, nikhaliheryane, nyuwo maloko a ipantta sootheene, nithukumane vamosa!’”+
Xontte Yehova, nwiirihe atthu oowerya orowa opuro owo.
12 “Maloko ootheene avenye ni arowe oxepani* wa Yosafati,
Okhala wiira kinrowa okilaathi weiwo wiira kiphukele maloko ootheene oowaattamela.+
13 Mukuxe efoisi,* okhala wiira okathi woohepha woophiya.
Murwe ni munyakele ewuuva, okhala wiira opuro oninyakattiwa ewuuva woosareya.+
Mapuro aninyakattiwa ewuuva aasareya, okhala wiira otakhala wa maloko awo ti wuulupale.
14 Oxepani aniphukeliwa atthu wookhala muttitthi muulupale wa atthu,
Okhala wiira nihiku na Yehova nri vakhiviru oxepani oniphukeliwa atthu.+
15 Nsuwa ni mweeri sinooriipela,
Nave itheneeri sinoohiya waarya.
16 Yehova onimoopa murukulu oSiyoni,
Nave oYerusalemu nnimwiiwanyeya nsu nawe.
Erimu ni elapo sinoothukumela.
Masi Yehova onrowa okhala ntthyawelo para atthu awe,+
Nave onrowa okhala opuro woolipihiwa para atthu a Isarayeli.
17 Nto nyuwo munoosuwela wiira miyo ka Yehova Muluku anyu, yoowo onikhala oSiyoni, mwaako aka woowaarya.+
18 Nihiku nlo miyaako sinookhoowa eviinyu ya niinaano,+
Mattumuxa anookhuma eleeti,
Nave miro sa oYuda sinoosareya maasi.
Empa ya Yehova anoophattuwa maasi,+
Nto maasi awo anrowa onaanihaka oxepani wa miri siniihaniwa Akaasiya.
19 Elapo ya wExiitu khenrowa okhaliwaka,+
Nave wEdomi onrowa okhala woothakoni ohinkhaliwa,+
Mwaha wa etthu yootakhala ewiirinhe aya atthu a oYuda,+
Elapo yeeyo awiivale aya atthu oohittheka.+
20 Masi oYuda onrowa okhaliwaka okathi wootheene,
Nave oYerusalemu onrowa okhaliwaka okathi wootheene.+
21 Nnaamwi awo atthenke ene, kinrowa owoonaka ntoko atthu oohittheka.+
Nto miyo, Yehova, kinrowa okhalaka oSiyoni”.+
Nsina nintaphulela, “Yehova ti Muluku”.
Aahiiso, “iyawe”.
Aahiiso, woonasa wene: “Ifiiku soowuuma”.
Eheeperi, “owiitho wawe”.
Eyo piiyo, ephareya Yookhwa.
Eyo piiyo, ephareya Mediteraanio.
Epula yoopacerya yaapacerya eriyari ya Outubro. Munwehe Apentise B15.
Epula yookiserya yaapacerya eriyari ya Abril. Munwehe Apentise B15.
Ekaruma yuulupale ya yuuma enirumeeliwa ni ipooyi aahiiso etaratoore wiira elimaniweke mmatta.
Aahiiso, “nipuro noowaataleya”.
Aahiiso, “ecampeya”.