EPAPHELO PAULO AALEPENLE AWE AROMA

1 Epaphelo ela ti ya Paulo, murumeyi a Kristu Yesu. Miyo kihiihaniwa wiira kikhale murummwa ni koothanliwa wiira kilaleye ihapari sooreera sa Muluku.+ 2 Muluku aahileiherya khalai ene ihapari iyo sooreera mwa Soolempwa soowaarya, aarumeelaka maprofeta awe. 3 Ihapari iyo, sinimuhimya Mwanawe, yoowo aari osuulu wa Davidi.+ 4 Ninnisuwela wiira owo Mwaana a Muluku,+ okhala wiira Muluku aahirumeela owerya wa ikuru sawe soowaarya, wiira omuhihimuxe mookhwaani:+ Mwaana owo, ti Yesu Kristu, Pwiya ahu. 5 Omurumeelaka yoowo, Muluku oonooniherya oreera wawe murima wuulupale. Yesu ookithanla wiira kikhale murummwa,+ wiira kaakhaliherye atthu a maloko+ ootheene waamini, wiiwelela ni ottittimiha nsina nawe. 6 Nyuwo-tho, muhiihaniwa eriyari ya atthu, yaawo yiihaneliwe omutthara Yesu Kristu. 7 Epaphelo ela, aniroiheliwa ootheene ale anikhala oRoma, yaawo Muluku onaaphenta awe ni owiihanne awe wiira akhale oowaarya:

Oreera murima wuulupale ni murettele wa Muluku Tiithi ihu, ni wa Yesu Kristu Pwiya ahu, okhale ni nyuwo.

8 Opacerya wene, kinnimuxukhuru Muluku aka mwa Yesu Kristu, mwaha wa nyuwo, okhala wiira waamini wanyu, onnilavuliwa olumwenku wootheene. 9 Kinnimurumeela Muluku ni murima aka wootheene, kilaleyaka ihapari sooreera sinimuhimya Mwanawe. Nave, Muluku onnisuwela wiira nkinikhala-khala kihiyaka wooromolani okathi kinivekela aka.+ 10 Kinnivekela wiira, vaweryaneya vale, aahiiso Muluku aphavela, kiwerye orwa iwo ori anyu. 11 Tthiri, kinniphavela vanceene woowehani, wiira kookaweleni mareeliho anikhuma wa Muluku, wiira waamini wanyu olipe, 12 aahiiso, kiire so, wiira ootheene ahu nlipihane+ ni waamini khula mmosa a hiyo orina awe.

13 Anna, kiniphavela wiira musuweleke wiira, ikwaha sinceene kaaniphavela orwa ori anyu, wiira kiwiixuttihe atthu a weiwo okhala awiixutti, ntoko kiirale aka ilapo sikina. Masi khula okathi, yookhala etthu enikikhoottiherya orwa iwo. 14 Miyo kookhalana muritti* woowaalaleerya atthu ootheene: Akereku ni ale ahikhanle akereku, ale arina miruku ni ale ahirina miruku. 15 Nave, kinniphavela vanceene woolaleeryani ihapari sooreera, nyuwo munikhala oRoma.+ 16 Miyo nkinuuleliwa muru ihapari sooreera.+ Tthiri, ihapari sooreera ti owerya Muluku onirumeela awe wiira omoopole khula mutthu onaamini,+ ompacerya muyuda,+ nave-tho mukereku.+ 17 Exariya ya Muluku, annooniheriwa ale anooniherya waamini, ni ennilipiha waamini waya,+ ntoko Soolempwa sinihimya aya wiira: “Masi naxariya onookhala mukumi mwaha wa waamini wawe”.+

18 Muluku a wiirimu onninanariwa vanceene+ ni atthu ahinimwiiwelela, ni ahineettela exariya. Awo annipaka itthu sootakhala wiira yaakhoottiherye atthu akina osuwela ekeekhai.+ 19 Awo ahaana omusuwela Muluku, okhala wiira Muluku owo, oowooniherya itthu sinceene.+ 20 Tthiri, mikhalelo sa Muluku nihinwerya ahu woona, ninnisuwela naasomaka moota olumwenku opattuxiwe aya. Hiyo nnoowerya wiixutta moota Muluku ori awe, nitokosaka itthu opanke awe.+ Itthu iyo sinnooniherya owerya wawe ohinimala,+ ni wiira owo ti Muluku.+ Tivonto, ale ahinicalela itthu iyo, kharina mathowa a ohimukupali Muluku. 21 Nnaamwi yaamusuwela Muluku, awo khiyanvuwinhe, nnakhala khiyaamuxukhurenle. Masi khiyuupuwela etthu, nnakhala khiyaiwexexa etthu.+ 22 Hata yaahimya wiira aakhalana ankhili, yaahooniherya ohikhalana ankhili. 23 Ohiya omuttittimiha Muluku, yoowo ohinikhwa, awo anittittimiha ilatarato sinilikana ni pinaatamu, yoowo onikhwa, vamosa ni ilatarato sa axipalame,* sa inama sa metto mixexe, ni iye siniipurula.+

24 Tivo, Muluku aahaahiya apakaka itthu soohiloka, ntoko waaphavela aya murima aya. Itthu iyo saaninanariha irutthu saya. 25 Awo aaturuka ekeekhai ya Muluku ni wootha. Nave, annikokhorela ni orumeela itthu sipattuxiwe, omuhiya Mpattuxa, yoowo oniphwanela ovuwihiwa mahiku ootheene. Amen. 26 Tivo, Muluku ohaahiya epakaka itthu soowuuliha muru. Athiyana khaniphavela orupihiwa*+ ni alopwana, masi aniphavela orupihana athiyana-ru paahi. Eyo ennivirikanya makhalelo a ephattu.+ 27 Siiso-tho, alopwana aahiya waarupiha athiyana, ntoko makhalelo a ephattu alimaleliwe, masi aniphavela paahi orupihana alopwana-ru,+ apakaka itthu soowuuliha muru. Nto awo animwaakhela* voomalela ehukhumu aniphwanela aya, mwaha wa miteko saya soonanara.+

28 Nto okhala wiira awo khiyoona oreerela omusuwela saana Muluku, owo ohaahiya athipelelaka wuupuwela itthu soohiloka, ni opaka itthu yahaakhanle aya oopaka.+ 29 Atthu awo, yaahitepa ohikhalana exariya,+ otakhala, ohiphiyeriwa+ wiira itthu soonanara. Nave yaari ananrima,+ anawiive,+ oowana, oowootha,+ oolavilavi,+ oohankawaani, 30 oowaapa,+ oomunyokha Muluku, ooveeha, oowiixinnuwiha, oowiittottopa, yaapaka apalano ootakhala, oohiwiiwelela axipapaya ni aximamaya.+ 31 Awo khiyaarina miruku,+ yaari oohiroromeleya ni itthu yaaleiherya aya, khiyaaphenta akhwaaya ni khiyaamoriwa ikharari. 32 Awo annisuwela oratteene ele Muluku onihimya awe, wiira atthu anipaka itthu iyo, aniphwanela okhwa.+ Hata vari siiso, awo annithipelela opaka itthu iyo ni anniweemererya ale anipaka itthu iyo.

2 Tivonto, khuuvo a nyuwo, oniwerya wiixaakiha+ aaphukelaka atthu akina, variki owo opakaka itthu simosa-ru. Okathi munaaphukela anyu atthu awo, muniilamula mmansinyu.+ 2 Hiyo noosuwela wiira Muluku, tonaaphukela mwa xariya ale anipaka itthu iyo, ottharihelaka ekeekhai.

3 Nyuwo munaaphukela ale anipaka itthu simosa-ru munipaka anyu, munuupuwela wiira munimoopowa ophukela wa Muluku? 4 Nyuwo khamunisuwela wiira Muluku onniwooniheryani oreera wawe murima wuulupale,+ onnoovilelani+ ni woopixeryani murima?+ Nyuwo khamunoona wiira Muluku onnooreerelani murima, ookhaliheryakani wiira muttharuwe?+ 5 Masi mwaha wa wuumiha wanyu murima ni ohiphavela wanyu ottharuwa, munimwiiruuhela onanariwa wa Muluku. Onanariwa iwo, onrowa wooniheriwa nihiku Muluku onrowa awe waaphukela atthu mwa xariya.+ 6 Nave Muluku onrowa omuliva khula mutthu, ottharihelaka miteko sa mutthu owo:+ 7 Ale anivilela apakaka itthu sooloka, onimwaavaha okumi woohimala, okhala wiira awo annaavya ovuwa,+ nttittimiho ni okumi ohinimala. 8 Masi, ale ahiniiwelela ekeekhai ni anipaka itthu sootakhala, oviruwa ni onanariwa wa Muluku onimwaaphwanya.+ 9 Ole onipaka itthu sootakhala, onoophwanya maxakha ni ohaawa, ompacerya muyuda, nave-tho mukereku. 10 Masi ole onipaka itthu sooloka, onoophwanya ovuwa, nttittimiho ni murettele, ompacerya muyuda,+ nave-tho mukereku.+ 11 Tthiri, Muluku khonaathanya atthu.+

12 Mweekeekhai, ootheene ale anipaka etampi ahisuwelaka malamulo,+ animookhwa ahisuwelaka malamulo. Masi, ootheene ale anipaka etampi asuwelaka malamulo, anoophukeliwa atthariheliwaka malamulo awo.+ 13 Ale aniiwa malamulo, khanooniwa okhala anaxariya ohoolo wa Muluku, masi ale aneettela malamulo, tanooniwa okhala anaxariya ohoolo wa Muluku.+ 14 Ale ahikhanle ayuda, kharina nlamulo.+ Okathi anipaka aya itthu mweephattu, nto enavara itthu sinihimmwa ni nlamulo, awo annooniherya wiira aakhalana malamulo vamurimani vaya. 15 Miteko saya sinnooniherya wiira nlamulo noolempwa vamurimani vaya. Nave-tho, murima aya onniwooniherya akhala wiira miteko saya ti sooreera aahiiso sootakhala. Siiso, muupuwelo aya onnaakhaliherya woona akhala wiira aakhalana mulattu wala kharina. 16 Eyo enimwiiraneya nihiku Muluku onrowa awe omuruma Kristu Yesu, wiira ophukele miteko apinaatamu anivara aya wiiphiini.+ Eyo enrowa wiiraneya sitthariheliwaka ihapari sooreera kinilaleya aka.

17 Akina a nyuwo anniihimya okhala ayuda,+ nave anniroromela nlamulo ni anniittottopa mwaha wa waataana waya ni Muluku. 18 Nyuwo munnisuwela ele Muluku oniphavela awe ni munneemererya itthu sooloka, okhala wiira muhiixuttihiwa Nlamulo.+ 19 Nave munnikupali wiira munniwerya oweettiha alipa-oohoona ni waamwaleela ale aari mweepiphini. 20 Nyuwo munuupuwela wiira munoowerya omuttaruxa mutthu ohirina ankhili ni owiixuttiha anamwane, mwaha woowi munniiwexexa itthu saamukhaani ni munnisuwela ekeekhai eri Munlamuloni. 21 Nyuwo muniwiixuttiha atthu akina, xeeni muhiniisiixuttiha anyu mmansinyu?+ Nyuwo munaalaleerya akina wiira: “Muhiiyeke”,+ xeeni muniiya anyu? 22 Nyuwo munihimya wiira: “Muhiraruweke”,+ xeeni muniraruwa anyu? Nyuwo munaathanya amuluku eethiru, xeeni muniiya anyu itthu sa mutemplo? 23 Nyuwo muniittottopa mwaha wa osuwela nlamulo na Muluku, xeeni muninveeha anyu Muluku, muhiiwelelaka Nlamulo nlo? 24 Vaalempwa wiira: “Mwaha wa nyuwo, nsina na Muluku ninniveehiwa eriyari ya ale ahikhanle ayuda”.+

25 Tthiri, winnuwihiwa+ onnikhalana efaita akhala wiira munneettela nlamulo.+ Masi, akhala wiira khamuneettela nlamulo, winnuwihiwa wanyu khorina efaita. 26 Akhala wiira mutthu oohinnuwihiwa+ onneettela sooruma sa xariya sa Nlamulo, hata ohinnuwihiwe, owo onimooniwaka ntoko mutthu oowinnuwihiwa.+ 27 Nyuwo muhiixuttihiwa winnuwihiwa ni muhiixuttihiwa Nlamulo noolempwa, masi khamuneettela. Siiso, akhala wiira mutthu ohinnuwihiwe onneettela Nlamulo, nto owo onnoophukelani. 28 Tthiri, mutthu khonikhala muyuda mwaha wa wooneya ota-ru paahi,+ nave winnuwihiwa weekeekhai khahiyo wa weerutthuni paahi.+ 29 Masi muyuda eekeekhai, onooneya ni murima.+ Owo ohinnuwihiwa vamurimani ni ikuru sa Muluku,+ ohiya ni Nlamulo.+ Mutthu siiso, onnittottopeliwa ni Muluku, ohiya ni atthu.+

3 Mureerelo xeeni mutthu onikhalana awe mwaha wookhala muyuda? Wala, winnuwihiwa onikumiherya mureerelo xeeni? 2 Sookhala mireerelo sinceene. Woopacerya, Muluku aahaavahererya ayuda moolumo awe oowaarya.+ 3 Vano, ankhi akina a yaawo yaahiyale waamini? Niireke ohaamini waya onitaphulela wiira Muluku khoniroromeleya? 4 Nnaari! Hata atthu ootheene akhalaka anawoothe,+ Muluku onrowa okhalaka eekeekhai,+ siisaale silempwale aya wiira: “Nyuwo munookhalana erasau mwaha wa moolumo anyu, nave okathi munrowa anyu ohimyaniwa etthu, nyuwo munimooniherya wiira atthu awo animootha”.+ 5 Okathi nimpaka ahu itthu sootakhala, eyo ennitepa wooniherya wiira Muluku naxariya. Nto niireke Muluku onnittheka, aananariwaka ni hiyo? (Eyo ti etthu anuupuwela aya atthu akina.) 6 Nnaari, khahiyo siiso! Vakhala wiira ti siiso, Muluku onrowa ophukela sai olumwenku?+

7 Vano, akhala wiira miyo kinnootha, nto wootha waka iwo onawooniherya atthu wiira ele Muluku onihimya awe ekeekhai ni onawiiriha omuttottopela yoowo, nto xeeni Muluku onikihimya awe okhala natampi? 8 Niireke hiyo pooti ohimya wiira: “Nipake itthu soohiloka, okhala wiira itthu sooloka sinnoorwa”? Atthu akina anninootherya okhalaka ntoko hiyo ninlavula siiso. Tthiri, atthu awo ahaana ophukeliwa.+

9 Nto niireke hiyo ti nitempe okhala atthu, waavikana akina? Nnaari! Ntoko kihimmye aka, ayuda ni akereku, ootheene aya anniweriwa ni etampi.+ 10 Soolempwa sinihimya wiira: “Khuuvo naxariya, nnakhala mmosa.+ 11 Khuuvo mutthu orina ankhili, khuuvo onimwaavya Muluku. 12 Atthu ootheene aahapuwa, nto ootheene aya kharina efaita. Khuuvo onipaka itthu sooreera, nnakhala mmosa”.+ 13 “Mmilo aya, onlikana ni mahiye oohittiyeliwa. Nlumi naya noosareya wootha”.+ “Mwaano mwaya, aakhalana eveneno ya inowa”.+ 14 “Mwaano mwaya, moosareya moolumo ootakhaliha ni oowali”.+ 15 “Inawu saya sinnaakuvela wiiva”.*+ 16 “Awo annikumiheryana maxakha ni annaakhana itthu. 17 Nave khanisuwela okhala ni murettele ni atthu akina”.+ 18 “Awo khanimoova Muluku”.+

19 Vano hiyo noosuwela wiira itthu sootheene Nlamulo ninhimya aya, sinaahimeerya ale aneettela Nlamulo, wiira atthu ootheene ahoothereryeke etthu, nave asuweleke wiira aakhalana mulattu vamaithoni va Muluku. Tivo, anniphwanela waakhela ehukhumu.+ 20 Siiso, khuuvo mutthu onrowa othokoreriwa okhala naxariya vamaithoni va Muluku mwaha wa weettela Nlamulo,+ maana Nlamulo ninninikhaliherya osuwela saana etampi.+

21 Vano, noosuwelihiwa wiira vanniweryaneya okhala naxariya ohoolo wa Muluku,+ hata niheettelaka Nlamulo. Eyo yoohimmwa-tho ni Nlamulo ni soolempwa sa Maprofeta.+ 22 Exariya ya Muluku ennooniheriwa mwaha wa omwaamini Yesu Kristu, yooniheriwaka ootheene yaale arina waamini iwo. Tthiri Muluku khonaathanya atthu.+ 23 Atthu ootheene aattheka ni khaniwerya ophwanya ovuwa wa Muluku.+ 24 Kristu Yesu oowoopola*+ oliveryaka itampi saya, tivo, awo aakhalihiwa anaxariya ohoolo wa Muluku.+ Nave Muluku ohaavaha mahala ene, mwaha wa oreera wawe murima wuulupale.+ 25 Muluku onvaha Yesu ntoko mukuttho wiira nitthikele waataana ni Muluku,+ mwaha wa waamini ephome ya Yesu.+ Muluku oopaka eyo wiira ooniherye exariya awe. Nave khoonihenrye paahi opixa wawe murima,* olevelelaka itampi saapakiwe khalai, 26 masi-tho onninooniherya exariya awe+ hiyo ninkhala okathi ola, omuhimyaka okhala naxariya mutthu yoole onimwaamini Yesu.+

27 Tivonto, niireke wiira nookhalana mathowa anniiriha wiittottopa? Nnaari. Niireke nihaana wiittottopa mwaha wa wiiwelela Nlamulo?+ Nnaari, niittottopeke paahi mwaha wa weettela nlamulo na waamini. 28 Ninnisuwela wiira mutthu onnihimmwa okhala naxariya mwaha wa waamini, ohiya mwaha wa weettela ele Nlamulo nnihimya aya.+ 29 Aahiiso niireke owo Muluku a ayuda paahi?+ Kiira-tho Muluku a atthu ahikhanle ayuda?+ Aayo, nave-tho owo Muluku a atthu ahikhanle ayuda.+ 30 Okhala wiira Muluku ori mmosa,+ owo onimwaahimya okhala anaxariya+ ale oowinnuwihiwa mwaha wa waamini. Nave-tho, onimwaahimya okhala anaxariya+ ale oohinnuwihiwa mwaha wa waamini waya. 31 Niireke hiyo ninnimaliha Nlamulo mwaha wa waamini wahu? Nnaari! Masi, hiyo ninnilipiha Nlamulo.+

4 Nihimye exeeni sa muhavinre ahu Abrahamu? 2 Vaakhanle wiira Abrahamu aahithokoreriwa okhala naxariya mwaha wa etthu aapanke awe, owo aamukhalana mathowa oowiittottopa, masi ohiya ohoolo wa Muluku. 3 Yoolepa enihimya exeeni? Enihimya wiira: “Abrahamu aahimwaamini Yehova, nto owo aahithokoreriwa okhala naxariya”.+ 4 Akhala wiira mutthu onivara muteko onniliviwa, khoniliviwa mwaha wa oreera murima wuulupale wa patarau awe, owo oniliviwa mwaha woowi onniphwanelela. 5 Masi okathi mutthu onimwaamini awe Muluku, ohilipanaka miteko paahi, Muluku onnimuthokorerya mutthu owo okhala naxariya mwaha wa waamini wawe. Muluku tonaathokorerya anatampi okhala anaxariya.+ 6 Davidi aahimmye wiira mutthu onnithokoreriwa okhala naxariya ni Muluku, ohikhanle mwaha wa miteko sawe, mutthu owo onnihakalala. Owo aahimmye wiira: 7 “Oohakalala taale aleveleliwe miteko saya sootakhala ni siliyaliwe* soottheka saya. 8 Oohakalala tuule Yehova ohinikontari awe etampi awe”.+

9 Niireke anihakalala paahi taale oowinnuwihiwa? Wala, ale oohinnuwihiwa nave annihakalala?+ Hiyo noohimya wiira: “Waamini wa Abrahamu, waahithokoreriwa okhala exariya”.+ 10 Nto, okathi xeeni waamini wawe waathokoreriwe aya okhala exariya? Niireke iira innuwihiwe ene, aahiiso ohinatthi winnuwihiwa? Owo iira ohinatthi winnuwihiwa. 11 Nave, owo aahaakhela esinaale,+ eyo piiyo, winnuwihiwa. Vano winnuwihiwa iwo waari ntoko ekanyeryo ya* exariya, mwaha wa waamini aarina awe ohinatthi winnuwihiwa. Eyo ehiiraneya, wiira Abrahamu okhale tiithi a atthu ootheene oowaamini,+ yaawo nlelo ahinnuwihiwe. Siiso, awo anoothokoreriwa okhala anaxariya. 12 Tivo, Abrahamu tori tiithi a atthu ootheene oowinnuwihiwa. Masi khahiyo tiithi a atthu oowinnuwihiwa paahi, nave-tho owo tiithi a atthu anitthara ephiro ya waamini,+ yeeyo aatthanre awe ohinatthi winnuwihiwa.

13 Veekeekhai, Abrahamu aahiiso osuulu awe khiyaaleiheriwe waakhela olumwenku+ mwaha wa weettela nlamulo, masi yaaleiheriwe mwaha wa okhalana exariya enrwa mwaha wa waamini.+ 14 Vaakhanle wiira atthu yaarowa waakhela itthu saaleiheriwe mwaha wa weettela Nlamulo, weeso waamini khiwaarowa okhalana efaita. Nave ele yaaleiheriwe awe Abrahamu, yaarowa okhala ethiru. 15 Mweekeekhai, Nlamulo ninnikumiherya onanariwa vanceene+ wa Muluku. Masi naahikhale nlamulo, khivaniweryaneya otthekela nlamulo nlo.+

16 Abrahamu aahaakhela ele yaaleiheriwe awe mwaha wa waamini wawe. Eyo ehiiraneya mwaha wa oreera murima wuulupale wa Muluku.+ Siiso, osuulu awe wootheene onoophwanya tthiri ele yaaleiheriwe,+ ohiya paahi ale aneettela Nlamulo, masi-tho ale anitthara waamini wa Abrahamu, yoowo ori tiithi a atthu ootheene.+ 17 (Soolempwa sinihimya wiira: “Miyo kihoothanlani wiira mukhale tiithi a maloko manceene”.)+ Abrahamu aahooniherya waamini iwo ohoolo wa Muluku, yoowo onaahihimuxa alipa-ookhwa ni onilavula itthu nlelo sihiiraneyale, sinakhala ntoko sihiiraneya.* 18 Abrahamu khaalipelela waayara anamwane. Masi mwaha wa nlipelelo aarina awe, owo aanaamini wiira aamukhala tiithi a maloko manceene, ntoko Muluku aahimmye awe oriki: “Osuulu anyu onrowa waatta siisa”.+ 19 Nnaamwi waamini wawe wahaavukunwe, Abrahamu aanisuwela wiira khaawerya waayara anamwane (okhala wiira aarina iyaakha soowiiraka 100).+ Nave-tho, aanisuwela wiira Sara khaawerya oyara, mwaha woowi aahitepa wuuluvala.+ 20 Masi mwaha wa ele Muluku aamuleihenrye awe, owo khaahoverya aahiiso khaahiyale waamini. Ohiya-vo, waamini wawe waahimulipiha ni aahinvuwiha Muluku. 21 Nave, owo aanikupali tthiri wiira Muluku ampaka ele aaleihenrye awe.+ 22 Tivonto, mwaha wa waamini wawe “owo aahithokoreriwa okhala naxariya”.+

23 Masi, moolumo oowi “aahithokoreriwa okhala”, khiyaalepeliwe Abrahamu paahi.+ 24 Moolumo awo, noolepeliwa-tho hiyo, okhala wiira nnoothokoreriwa okhala anaxariya mwaha wa omwaamini wahu Muluku, yoowo omuhihimunxe mookhwaani Pwiya ahu Yesu.+ 25 Owo oovahereriwa wiira okhwe mwaha wa itampi sahu,+ nave oohihimuxiwa wiira onihimye okhala anaxariya.+

5 Vano nihimmwale ahu okhala anaxariya mwaha wa waamini wahu,+ nnoowerya okhalana murettele ni Muluku, mwaha wa Pwiya Yesu Kristu.+ 2 Omwaamini wahu Yesu, onnineemererya omwaattamela Muluku ni ottottela mureerelo oreera murima wuulupale wa Muluku.+ Hiyo pooti otteeliwa murima, okhala wiira ninnilipelela waakhela ovuwa onikhuma wa Muluku. 3 Ohiya-vo, nitteeliweke murima okathi nnihaawa ahu,+ maana noosuwela wiira ohaawa onnikumiherya ovilela.+ 4 Nave ovilela, onniniiriha weemereriwa ni Muluku.+ Weemereriwa ni Muluku, onninivaha nlipelelo.+ 5 Vano hiyo pooti ororomela tthiri nlipelelo nlo,+ okhala wiira Muluku onnirumeela ikuru sawe soowaarya, seiyo onnivaha awe, ooniheryaka wiira onniniphenta.+

6 Kristu ohaakhwela anatampi, okathi Muluku aathanlale awe. Owo aakhwiiye nlelo nri ene ootteettheya.+ 7 Ti voovila mutthu omukhwela naxariya. Masi woonasa wene, pooti omukhwela mutthu ooreera murima. 8 Muluku onninooniherya ophenta wawe mwa enamuna ela: Kristu oonikhwela nlelo nri ene anatampi.+ 9 Tivonto, okhala wiira ephome ya Kristu ennimwiiriha Muluku onithokorerya okhala anaxariya,+ nikupaliki wiira eyo enoonoopola oviruwa wa Muluku.+ 10 Nnaamwi naari awanani a Muluku, hiyo nookhala apatthani awe* mwaha wa okhwa wa Mwanawe.+ Eyo ennitepa onikupaliha wiira ninrowa woopoliwa mwaha wa okumi wa Yesu, vano nri ahu apatthani a* Muluku. 11 Ele Muluku opanke awe omurumeelaka Pwiya ahu Yesu Kristu, enninitteeliha murima, okhala wiira mwaha wa yoowo, hiyo nookhala apatthani a* Muluku.+

12 Etampi yookela moolumwenkuni mwaha wa mulopwana mmosa. Nto etampi eyo yooruuha okhwa.+ Siiso, okhwa ohaaphwanya atthu ootheene, okhala wiira atthu ootheene aattheka . . .+ 13 Etampi yaahikhala mulaponi nihinatthi okhumelela Nlamulo. Masi naahikhale nlamulo, khuuvo onivahiwa mulattu wa etampi.+ 14 Okhwa waahilamulela okhuma Adamu mpakha Moise. Nave ohaalamulela ale ahitthenke ntoko yaatthenke aya Adamu. Nto Adamu aamuthoonyerya* ole aarowa okhumelela ohoolo.+

15 Masi yoovaha ya Muluku khenlikana ni etampi ya Adamu. Atthu anceene ahookhwa mwaha wa etampi ya mulopwana owo mmosa. Masi oreera murima wuulupale wa Muluku ni yoovaha awe mwaha wa oreera murima wuulupale wa mulopwana mmosa,+ eyo piiyo, Yesu Kristu, ti wootepa wunnuwa. Orumeelaka yoovaha eyo, Muluku onnaavaha mareeliho oowaatta atthu anceene!+ 16 Nave-tho, etthu enikumiherya aya yoovaha ya Muluku, khenlikana ni ele enikumiherya aya etampi ya mulopwana mmosa.+ Tthiri etampi ya mulopwana mmosa yookumiherya mulattu.*+ Masi nuumala atthu anceene opaka itampi sinceene, Muluku ohaavaha etthu ewiirinhe ohimmwa okhala anaxariya.+ 17 Vakhala wiira mwaha wa etampi ya mulopwana mmosa,+ okhwa waahilamulela, nto ale yaakhenle voowaatta oreera murima wuulupale wa Muluku ni yoovaha ya xariya,+ anrowa otepaka olamulela+ ari ene akumi, mwaha wa mutthu mmosa, Yesu Kristu!+

18 Siisaale etampi ya mulopwana mmosa yaakumihenrye aya mulattu* atthu ootheene,+ siiso-tho, muteko mmosa wa xariya, woowiiriha atthu ootheene+ ohimmwa okhala anaxariya, wiira akhale akumi.+ 19 Tthiri, mwaha wa ohiiwelela wa mulopwana mmosa, atthu anceene yaahikhalihiwa anatampi.+ Siiso-tho, mwaha wa wiiwelela wa mulopwana mmosa, atthu anceene anookhalihiwa anaxariya.+ 20 Vano, Nlamulo naahikumiheriwa wiira yooniheriwe atthu wiira aatepa ottheka.+ Masi okathi vaatepa aya wooneya wiira itampi khasireere, nave oreera murima wuulupale wa Muluku, waamutepa wuncerereya. 21 Mwaha wa xeeni? Mwaha woowi, siisaale etampi elamulenle aya, enakumiherya okhwa,+ siiso-tho, oreera murima wuulupale wa Muluku olamulele mwaha wa exariya eniphwanyiha okumi woohimala, mwa Yesu Kristu, Pwiya ahu.+

6 Vano, nihimye exeeni? Niireke nihaana othipelela opaka etampi wiira oreera murima wuulupale wa Muluku otepeke wuncerereya? 2 Nnaari! Hiyo khanneettihiwa-tho ni etampi.*+ Nto ninwerya sai othipelela okhala mutampini?+ 3 Aahiiso, khamunsuwela wiira ootheene ahu nipatisiwe mwa Kristu Yesu,+ noopatisiwa mookhwaani mwawe?+ 4 Siiso, noovithiwa vamosa nuuwo, okhala wiira naapatisiwe wiira nikhale nuuwo mookhwaani mwawe.+ Eyo ehiiraneya wiira hiyo-tho nikhalane okumi musya, siisaale Kristu orina awe okumi musya, yoowo Tiithi omuhihimunxe awe, orumeelaka owerya wawe.+ 5 Okhala wiira nihiiraana nuuwo, maana nihookhwa ntoko owo,+ siiso, nihiiraana nuuwo, okhala wiira noohihimuxiwa ntoko owo.+ 6 Noosuwela wiira omutthu ahu wa khalai, wookhomeliwa vamwirini vamosa nuuwo,+ wiira okumihiwe owerya wa etampi mweerutthuni mwahu,+ wiira nihikhale-tho ipottha sa etampi.+ 7 Tthiri, ole okhwiiye ooleveleliwa* itampi sawe.

8 Nave-tho, vakhala wiira nihookhwa ni Kristu, ninnikupali wiira nnookhala-tho akumi nuuwo. 9 Noosuwela wiira vano Kristu ohihimuxiwe awe mookhwaani,+ khonikhala-khala okhwaaka.+ Okhwa khoninwerya-tho.* 10 Owo ohookhwa ekwaha emosa paahi wiira omalihe etampi, nave khonitthikela-tho okhwa.+ Masi okumi orina awe vano, onipaka ele Muluku oniphavela awe. 11 Vamosa-ru, mwiixooneke okhala atthu ookhwa ahinivara etampi. Nave-tho mwiixooneke okhala atthu akumi wiira mpakeke ele Muluku oniphavela awe, ntoko atthu animutthara Kristu Yesu.+

12 Tivo, muhihiye etampi yeettihaka okumi anyu. Muhiiweleleke itthu siniphavela irutthu sanyu,+ seiyo sinrowa okhwa. 13 Muhivahereryeke erutthu anyu etampi, wiira epakeke itthu soohiloka. Ohiya-vo, muhele okumi anyu mmatatani mwa Muluku, ntoko atthu ahihimuxiwe mookhwaani. Muhele erutthu anyu mmatatani mwa Muluku, wiira mpakeke itthu sooreera.+ 14 Nyuwo khamuneettihiwa-tho ni malamulo,+ masi muhaakhela oreera murima wuulupale wa Muluku.+ Siiso, etampi khenoolamulelani-tho ntoko pwiya anyu.

15 Nto nihimye exeeni? Niireke nnoopaka etampi, nihimyaka wiira khanneettihiwa-tho ni malamulo, nave nihimyaka wiira nihaakhela oreera murima wuulupale wa Muluku?+ Nnaari, vahikhale siiso! 16 Niireke khamunisuwela? Vakhala wiira munniivahererya ntoko ipottha wiira mmwiiweleleke mutthu, nyuwo munnikhala ipottha sa mutthu owo, okhala wiira munnimwiiwelela.+ Niire so, nyuwo mwa ipottha sa etampi+ eniphwanyiha okhwa,+ aahiiso mwa ipottha sa wiiwelela oniphwanyiha exariya. 17 Nto nimuxukhureleke Muluku, okhala wiira nnaamwi khalai mwaari ipottha sa etampi, vano munniiwelela ni murima wootheene mwiixuttiho Muluku oovanhaaweni. 18 Tthiri, okhala wiira mootaphuliwa okhala ipottha sa etampi,+ mukhalihiwa ipottha sa Muluku, weeso mpakeke itthu sooloka.+ 19 Masi mwaha wa otteettheya wa erutthu anyu, kinnilavula ni nyuwo kirumeelaka moolumo anisuweliwa ni apinaatamu. Ntoko epottha, nyuwo moovahererya irutthu sanyu miteko soonanara ni miteko sootakhala wiira nvareke itthu sootakhala. Masi vano, nvahererye irutthu sanyu itthu sa xariya, wiira nvareke itthu soowaarya.+ 20 Okathi mwaari anyu ipottha sa etampi, nyuwo khimwaakhanyereriwa opaka itthu sooloka.

21 Soowiira sanyu sa okathi ole, saakumihenrye exeeni? Saakumihenrye itthu siniwuulihani muru vano. Tthiri, itthu iyo sinniroiha wookhwaani.+ 22 Vano mutaphuliwe anyu etampi, mpakeke itthu soowaarya ntoko ipottha sa Muluku.+ Eyo enimoophwanyihani okumi woohimala.+ 23 Tthiri, etampi eniliviwa ni okhwa.+ Masi etthu Muluku onivaha awe, ti okumi woohimala+ mwa Kristu Yesu, Pwiya ahu.+

7 Axinnaka, kinlavula ni nyuwo munisuwela Nlamulo. Kiireke khamunsuwela wiira Nlamulo nookhalana owerya wa omuruma mutthu, okathi wootheene onikhala awe mukumi? 2 Mwa ntakiheryo, Nlamulo nnihimya wiira muthiyana ootheliwa onnikhala vamosa ni iyawe, nlelo iyawe ori ene mukumi.+ Masi iyawe akhwa vale, nlamulo ninnimutaphula. 3 Tivo, iyawe akhala mukumi, nto muthiyana owo onatheliwa ni mulopwana mukina,+ muthiyana owo onooraruwa. Masi, akhala wiira iyawe ohookhwa, muthiyana owo ootaphuwa. Siiso, atheliwa ni mulopwana mukina, owo khoniraruwa.+

4 Axinnaka, nave-tho erutthu ya Kristu yoowoopolani wiira muheetteleke Nlamulo na Moise. Eyo ehiiraneya wiira mukhale a mutthu mukina,+ yoowo ohihimuxiwe mookhwaani.+ Vano ninniwerya omurumeela Muluku.+ 5 Okathi naakhala ahu nittharaka itthu erutthu ahu yaaphavela aya, Nlamulo naahooniherya oratteene wiira itthu iyo sootakhala, saaniiriha erutthu ahu opaka etampi. Nto etampi eyo, yaaniniroiha wookhwaani.+ 6 Masi vano nootaphuliwa otthara Nlamulo,+ okhala wiira nlo khanniwerya-tho onikhoottiherya etthu. Siiso, hiyo nnoowerya okhala ipottha sa Muluku mwa enamuna esya, neettihiwaka ni ikuru soowaarya,+ ohiya ni nlamulo, ntoko khalai.+

7 Nto nihimye exeeni? Niireke wiira Nlamulo etampi? Nnaari! Mweekeekhai, nahaakhanle Nlamulo,+ miyo nkaarowa osuwela etampi. Mwa ntakiheryo, miyo nkaarowa osuwela nrima, Nlamulo nahaahimmye wiira: “Muhikhaleleke nrima itthu sa aneene”.+ 8 Vano etampi, yoottottela mureerelo yooruma eyo wiira ekiirihe okhalela nrima itthu sootheene soohiloka. Nahaakhanle nlamulo, etampi khiyaarowa okhalana owerya.*+ 9 Tthiri, miyo kaakhala nihinatthi okhumelela nlamulo. Masi nuumala okhumelela yooruma, etampi yaahitthikela okhala ekumi, nto miyo kaahikhwa.+ 10 Yooruma kuupuwela aka wiira yaarowa okiphwanyiha okumi,+ yaahikiroiha wookhwaani. 11 Vano etampi yaahirumeela yooruma eyo, wiira ekiwoke ni ekiive. 12 Hata vari siiso, Nlamulo ti noowaarya, nave yooruma ti yoowaarya, ti ya xariya ni yooreera.+

13 Niireke eyo enitaphulela wiira etthu yooloka tekiivale? Nnaari! Etampi tekiivale. Nlamulo ti nooreera,+ masi nihooniherya saana wiira etampi ti yaakiiva. Tivonto, yooruma ennooniherya oratteene wiira etampi ti yootakhala tthiri.+ 14 Hiyo noosuwela wiira Nlamulo ti na Muluku. Miyo ka mutthu paahi, otumiheriwe etampi.+ 15 Miyo nkinsuwela etthu kinipaka aka. Nkinivara ele eniphavela aka, masi kinivara ele eninyokha aka. 16 Nto kaapakaka ele kihiniphavela aka, kinnikupali wiira Nlamulo ti nooreera. 17 Vano, nkihiyo-tho miyo kinipaka etthu eyo, masi etampi tenipaka, yeeyo enikhala mwa miyo.+ 18 Koosuwela wiira mwa miyo, eyo piiyo, mweerutthuni mwaka, khenikhala etthu yooreera, maana miyo kinniphavela opaka etthu yooreera, masi nkiniwerya.+ 19 Miyo nkiniwerya opaka itthu sooreera kiniphavela aka, masi kinimakela opaka itthu soonanara kihiniphavela aka. 20 Tivo, akhala wiira kinnipaka etthu ehiniphavela aka, weeso khahiyo-tho miyo kinipaka etthu eyo. Masi etampi tenipaka, yeeyo enikhala mwa miyo.

21 Siiso, nookhala nlamulo nla nnikeettiha: Kaaphavelaka opaka etthu yooloka, kinnoona wiira kiniphavela opaka etthu yootakhala eri mwa miyo.+ 22 Vamurimani vaka, ninnikisivela nlamulo na Muluku.+ 23 Masi kinnoona nlamulo nikina mweerutthuni mwaka, nenlo ninvirikanya nlamulo na muupuwelo aka.+ Nlamulo nlo ti etampi+ eri mweerutthuni mwaka, nave tenikeettiha. 24 Miyo nkireere otakhaliwa! Ti pani onrowa okoopola erutthu ela enikiroiha mookhwaani? 25 Kinnimuxukhuru Muluku, okhala wiira owo onookoopola omurumeelaka Yesu Kristu, Pwiya ahu! Tivo, itthu kinuupuwela aka, sineettihiwa ni Nlamulo na Muluku, masi erutthu aka eneettihiwa ni nlamulo na etampi.+

8 Vano, ale yiiranne ni Kristu Yesu, khanivahiwa mulattu. 2 Nto, nlamulo na ikuru sa Muluku sinivaha okumi, nihootaphulani+ munlamuloni na etampi ni okhwa, nyuwo munimutthara Kristu Yesu. 3 Nlamulo na Moise khinaawerya wootaphulani,+ okhala wiira apinaatamu tootteettheya+ ni toottheka. Muluku anwerya owoopolani omurumaka Mwanawe,+ aalikana ni pinaatamu oottheka, wiira omalihe etampi. Siiso, Muluku oolamula etampi mweerutthuni,+ 4 wiira nimaliherye etthu ya xariya Nlamulo ninvekela aya,+ niheettihiwaka ni erutthu, masi neettihiwaka ni ikuru sa Muluku.+ 5 Ale aniiwelela erutthu, anuupuwela itthu sa weerutthuni,+ masi ale aniiwelela ikuru sa Muluku, anuupuwelela itthu ikuru iyo sinaalakiherya aya opaka.+ 6 Wuupuwelela itthu sa weerutthuni, onniroiha wookhwaani.+ Masi wuupuwelela itthu sinipakiwa ni ikuru sa Muluku, onniphwanyiha okumi ni murettele.+ 7 Nahiya erutthu ahu yoottheka yeettihaka muupuwelo ahu, enoonikhaliha awanani a Muluku.+ Tthiri, erutthu ahu yoottheka kheniiwelela nlamulo na Muluku, hata kheniwerya wiiwelela. 8 Siiso, ale anitthara itthu erutthu aya siniphavela aya, khaniwerya omusiveliha Muluku.

9 Masi, nyuwo axinnaka, khamunitthara erutthu yoottheka. Akhala wiira ikuru+ sa Muluku sinnikhala mwa nyuwo tthiri, weeso munikhala moovarihana ni ikuru iyo. Mutthu yoole ohirina muupuwelo wa Kristu, mutthu owo khahiyo ta Kristu. 10 Masi, vakhala wiira muhiiraana ni Kristu,+ ikuru sa Muluku sinnookhalihani akumi mwaha wa exariya, hata erutthu ekhwiiye ene mwaha wa etampi. 11 Ikuru sa Muluku soomuhihimuxa Yesu mookhwaani. Akhala wiira ikuru iyo siri mwa nyuwo, nto Ole omuhihimunxe Kristu Yesu mookhwaani,+ nave-tho onrowa okhaliha sikumi irutthu sanyu sinikhwa,+ orumeelaka ikuru sawe, seiyo siri mwa nyuwo.

12 Tivo, axinnaka, hiyo khaninkhanyereriwa wiiwelela erutthu yoottheka.+ 13 Mwaiwelela erutthu, tthiri munimookhwa. Masi mweemererya okhaliheriwa ni owerya wa ikuru sa Muluku, wiira mwiive miteko sa erutthu,+ nyuwo munookhala akumi.+ 14 Mweekeekhai, ootheene ale aneettihiwa ni ikuru sa Muluku, awo tthiri anamwane a Muluku.+ 15 Nyuwo khimwaakhenle ikuru sinookhalihani ipottha ni siniwiirihani-tho woova. Ohiya-vo, muhaakhela ikuru sa Muluku sinniiriha okuxiwa wiira nikhale anamwane* a Muluku. Ikuru iyo, sinniniiriha okhuwela, niiraka: “Abba,* Tiithi!”+ 16 Ikuru sa Muluku sinninikupaliha+ wiira na anamwane a Muluku tthiri.+ 17 Akhala wiira na anamwane a Muluku, nnimwaakhela etthu Muluku onivaha awe. Nave-tho, onoonivaha etthu+ envahale awe Kristu. Masi nihaana toko ohaawa hoothe,+ wiira nivuwihiwe hoothe.+

18 Tivo, ohaawa onniphwanya niinaano khahiyo etthu, nalikanyiha ni etthuvo yuulupale Muluku onrowa awe onivaha muhoolo.+ 19 Soopattuxiwa sootheene sinnimulipelela vanceene Muluku, wiira aasuwelihe anaawe.+ 20 Soopattuxiwa khisaaphavela olamuliwa+ wiira sikhaleke sihilipelelaka etthu muhoolo, masi Muluku aaheemererya eyo. Tivo, okathi Muluku aalamunle awe, owo aahinivaha nlipelelo. 21 Vano, soopattuxiwa khasinrowa-tho okhala ipottha sa etampi ni okhwa.+ Nto, sinrowa ophwanya otaphuwa woovuwa wa anamwane a Muluku. 22 Noosuwela wiira mpakha-va, soopattuxiwa sootheene sinniipulela hoothe ni sinnihaawa hoothe. 23 Ohiya eyo paahi, hiyo naakhenle epantta yoopacerya ya etthuvo, eyo piiyo, ikuru soowaarya, ninniipulela vamurimani vahu,+ nimulipelelaka Muluku onikuxa wiira nikhale anaawe.*+ Owo onniwerya opaka eyo, okhala wiira Kristu ooliva,* wiira noopoliwe mweerutthuni mwahu. 24 Okathi noopoliwe ahu, hiyo noophwanya nlipelelo nna. Nlipelelo nnooneya, khahiyo nlipelelo neekeekhai. Niireke mutthu onnilipelela etthu onoona awe? 25 Masi naalipelelaka+ etthu nihinoona ahu,+ hiyo ninnitepa olipelela etthu eyo nivilelaka.+

26 Nave ikuru soowaarya sinoonikhaliherya okathi nintteettheya ahu.+ Okathi owo, hiyo pooti osuwela wiira nihaana ovekela, masi nihinasuwela etthu ene yoovekela. Vano ikuru soowaarya, pooti onivekelela okathi nniipulela ahu, nihiweryaka ohimya moolumo ookhalela. 27 Muluku onnitokosa mirima sahu,+ ni onnisuwela etthu ikuru sawe sinihimya aya, okhala wiira ikuru iyo sinnivekela sittharihaka ele Muluku onaaphavelela awe ale oororomeleya.*

28 Hiyo noosuwela wiira Muluku, onniiriha miteko sawe sootheene ovara vamosa, wiira saakumiherye mureerelo ale animphenta, yaawo Muluku owiihanne awe moovarihana ni yoolakela awe.+ 29 Owo aapacenrye waathokorerya yaawo. Nto vahinatthi ophiya okathi, aahilakela wiira awo yaarowa okhala ntoko Mwanawe.+ Siiso, Mwanawe taarowa okhala oopacerya+ eriyari ya axinna anceene.+ 30 Nto, Muluku aahiwiihana ale aathanlale awe.+ Nave owo aahaahimya okhala anaxariya,+ ale aawiihanne awe.+ Nuumala-vo, aahaavuwiha ale aahimmye awe okhala anaxariya.+

31 Nto, nihimye exeeni mwaha wa itthu iya? Akhala wiira Muluku ori ni hiyo, ti pani onrowa onivirikanya?+ 32 Owo khoovelenle onvaha Mwanawe wiira onikhwele ootheene ahu.+ Ohiya paahi onivaha Mwanawe, niireke nave khonrowa onivaha itthu sikina ni murima awe wootheene? 33 Ti pani oniwerya waahimyana itthu ale Muluku aathanlale awe?+ Muluku tonaahimya atthu awo okhala anaxariya.+ 34 Ti pani oniwerya waalamula atthu awo? Khuuvo, okhala wiira Kristu Yesu, ohookhwa ni oohihimuxiwa mookhwaani. Vano, owo ori moono woolopwana wa Muluku,+ nave onninivekelela.+

35 Niireke yookhala etthu enrowa onivalaanya ni ophenta wa Kristu?+ Niireke mixankiho,* ohaawa, olupatthiwa, etala, ohikhalana etthu yoowara,* woopopihiwa, aahiiso otupheliwa,* onoowerya onivalaanya ni ophenta wa Kristu?+ 36 Soolempwa sinihimya wiira: “Mwaha wa nyuwo, okathi wootheene ninnivahereriwa wiira niiviwe. Ninnooniwa okhala ntoko ipwittipwitthi sinrowa wiiviwa”.+ 37 Masi mwa itthu iya sootheene, hiyo ninnixintta moomalela+ mwaha wa* ole oniphentale. 38 Tthiri, kinnikupali wiira nnakhala okhwa, aahiiso okumi, wala malaikha, nnakhala ikuvernu, aahiiso itthu sikhanle vano wala itthu sinrowa okhumelela muhoolo, nnakhala owerya,+ 39 hata itthu sa musulu, nnakhala itthu sa vathi, aahiiso itthu sikina sipattuxiwe, khasiniwerya onivalaanya ni ophenta wa Muluku, weiwo onooniheriwa mwa Kristu Yesu, Pwiya ahu.

9 Ntoko mutthu onimutthara Kristu, miyo kinilavula ekeekhai, nkinootha. Murima aka, yoowo oneettihiwa ni ikuru soowaarya, onnooniherya wiira eyo ekeekhai: 2 Murima aka wookiriipa vanceene ni onnitepa okiwereya. 3 Kinneemererya ovahiwa ehukhumu yaarowa ovahiwa axinnaka ayuda, yaawo ahinimutthara Kristu, akhala wiira eyo yaamwaakhaliherya. 4 Awo ti aisarayeli, nave aathanliwa wiira ekhale anamwane a Muluku.+ Owo oowooniherya ovuwa wawe ni ohaavaha mavarihano+ a Nlamulo,+ ohaaleiherya itthu+ ni ohaavaha eparakha wiira amurumeeleke.+ 5 Awo akhumme nloko na amuhavinre ahu.+ Nave-tho Kristu okhumme nloko nenlo.+ Ottottopeliwe Muluku, yoowo onaalamulela atthu ootheene ni onilamulela itthu sootheene. Amen.

6 Vano, khahiyo wiira itthu Muluku aaleihenrye awe siroohiiraneya. Mweekeekhai, khahiyo wiira ale ankhuma nloko na Isarayeli, ootheene aya ta nloko na “Isarayeli” tthiri.+ 7 Khahiyo wiira ootheene aya anamwane eekeekhai a Abrahamu mwaha wookhala osuulu awe.+ Muluku aahimuhimeerya Abrahamu wiira: “Ole onrowa ohimmwa okhala osuulu anyu, onrowa okhuma nloko na Isaakhi”.+ 8 Eyo khenitaphulela wiira anamwane ootheene a Abrahamu tari anamwane eekeekhai a Muluku.+ Masi ale ayariwe mwaha wa natiri,+ tari anamwane eekeekhai a Abrahamu. 9 Muluku aaleihenrye wiira: “Mwaahiyu, okathi ene yoola, kinimoorwa. Nto Sara onrowa wiiraka omuyanre ene mwaana mwaamulopwana”.+ 10 Yaahiiraneya etthu emosa-ru, okathi Rebeka aamuyarenle awe maphapo muhavinre ahu Isaakhi.+ 11 Ahinatthi oyariwa anamwane awo, nnakhala awo ahinre etthu yooreera aahiiso yootakhala, Muluku aahimuhimya khalai ene, ole aarowa awe omuthanla. Muluku onimuthanla ole onimphavela awe, ohiya mwaha wa miteko sa mutthu. 12 Muluku aahimuleela Rebeka wiira: “Ole muulupale, onrowa omurumeelaka ole mukhaani”.+ 13 Ntoko valempwale aya wiira: “Komphenta Yakobe, masi koomunyokha Esawu”.+

14 Nto ninrowa ohimya exeeni? Niireke Muluku khorina exariya? Nnaari, khahiyo siiso!+ 15 Muluku aahimuleela Moise wiira: “Kinrowa ommorela ikharari ole kiniphavela aka ommorela ikharari, nave kinrowa omoonela othunku ole kiniphavela aka omoonela othunku”.+ 16 Tivo, eyo khenlipa ni ophavela aahiiso wiimananiha wa mutthu, masi enlipa ni omoriwa ikharari wa Muluku.+ 17 Yoolepa ennimuhimya Farawo wiira: “Kihoohiyani muri ene mukumi mwaha wa etthu ela: Wiira kooniherye owerya waka mwaha wa nyuwo, ni wiira nsina naka nilaleiwe elapo yootheene ya vathi”.+ 18 Siiso, Muluku onnimmorela ikharari khula mutthu onimphavela awe, masi onnimuhiya ole oniphavela wiixinnuwiha, wiira iixinnuwiheke.+

19 Tivo, nyuwo munookikoha wiira: “Khuuvo oniwerya ovirikanya ele Muluku olakenle awe, nto xeeni nlelo onaavaha awe nthowa apinaatamu?” 20 Nyuwo mwa pani wiira mwaakhulaneke ni Muluku?+ Niireke etthu yoowuupiwa enoowerya omuhimeerya mulipa-oowuupa wiira: “Xeeni muhalaka okuupa siisa?”+ 21 Khamunsuwela wiira mulipa-oowuupa, ookhalana owerya woorumeela oloko+ mmosa-ru wiira opake mwaapu onirumeeliwa nihiku nuulupale, ni opake mwaapu onirumeeliwa khula nihiku? 22 Etthu emosa-ru, enniiraneya ni Muluku. Owo onniphavela waaviruwela atthu ootakhala murima ni osuweliha owerya wawe. Masi onnaapixerya murima ale amwiirinhe onanariwa,* yaawo aniphwanela opwetexiwa. 23 Muluku oopaka eyo wiira owooniherye ovuwa wawe wuulupale ale aarowa awe waamorela ikharari.+ Nave ohaalokiherya wiira avuwihiwe. 24 Ti yoohi Muluku oniihanne awe, ohiya paahi eriyari ya ayuda, masi-tho eriyari ya ale ahikhanle ayuda.+ 25 Eyo enniiraneya ntoko Muluku aahimmye awe khalai muliivuruni mwa Hoseya, oriki: “Miyo kinoowiirela ale ahikhanle atthu aka,+ okhala ‘atthu aka’. Nave ale kahaaphenta aka, kinrowa owiihanaka ‘oophentiwa’.+ 26 Nto ohiya wiireliwaka: ‘Nyuwo khamuhiyo atthu aka’, anrowa wiireliwaka: ‘Anamwane a Muluku mukumi’”.+

27 Eyo ti etthu Yesaya onikhuwela awe aahimyaka aisarayeli wiira: “Nnaamwi aisarayeli ari ene anceene ntoko mihaava sa ophareya, atthu vakhaani paahi tanrowa woopowa.+ 28 Tthiri Yehova onrowa ophukela elapo, nave owo onimwaakuviha olamuliwa waya”.+ 29 Nave-tho, Yesaya aahihimya vahinatthi wiiraneya, oriki: “Vaakhanle wiira Yehova a anakhotto khonihiyenrye osuulu, naarowa okhalaka ntoko epooma ya oSodoma, ni naarowa olikanaka ni epooma ya oGomora”.+

30 Nto ninrowa ohimya exeeni? Atthu awo a maloko makina yaahooniherya waamini+ ni yaahithokoreriwa okhala anaxariya,+ hata yaheettela exariya. 31 Nave, nnaamwi aisarayeli yeettela nlamulo na xariya, awo khiyaavarexenxe nlamulo nlo. 32 Mwaha wa xeeni? Mwaha woowi awo yaaneererya opaka eyo ni miteko, ohiya ni waamini. Awo yaahikwattula* “nluku ninkwattuliha”.+ 33 Ti siiso sinihimya aya soolempwa wiira: “Nkawehani! Koopweha oSiyoni nluku+ nnaakwattuliha atthu ni mwala onaatthekiha atthu. Masi ole onaamini nluku nenno, khonrowa othanana”.+

10 Axinnaka, etthu murima aka oniphavela aya, nave kininvekela aka Muluku ni murima aka wootheene, ti yoowi atthu a nloko naka yoopowe.+ 2 Kinnaakhalela onamoona wiira awo anniimananiha vanceene omurumeela Muluku,+ masi anipaka eyo ahimusuwelaka saana Muluku. 3 Awo khanisuwela ele Muluku onihimya awe wiira tenimukhaliha mutthu naxariya.+ Masi, aniphavela opaka itthu wiira yiikhalihe anaxariya,+ ahipakaka ele Muluku onihimya awe wiira tenimukhaliha mutthu naxariya.+ 4 Tthiri, Kristu oomaliha Nlamulo.+ Nto ootheene ale animwaamini, anookhalihiwa anaxariya.+

5 Moise oolepa oromolaka exariya eniphwanyiwa mwaha wa weettela Nlamulo, oriki: “Mutthu yoole oniiwelela itthu iya, onookhala mukumi mwaha wa seiyo”.+ 6 Masi Soolempwa sinnooniherya wiira mutthu onnithokoreriwa okhala naxariya mwaha wa waamini. Soolempwa iyo sinihimya wiira: “Muhuupuweleke wiira:+ ‘Ti pani onrowa owela wiirimu’,+ eyo piiyo, wiira omukuruxe Kristu? 7 Aahiiso: ‘Ti pani onrowa okhuruwela munlittini noowiixa’,+ eyo piiyo, wiira omukumihe Kristu mookhwaani?” 8 Masi yoolepa enihimya exeeni? Enihimya wiira: “Moolumo ala ari vakhiviru vanyu, ari mwaano mwanyu ni vamurimani vanyu”,+ eyo piiyo, “moolumo” a waamini, yaawo ninlaleya ahu. 9 Vakhala wiira munnilaleya ni eyano anyu wiira Yesu ti Pwiya,+ ni munnaamini vamurimani vanyu wiira Muluku oomuhihimuxa mookhwaani, munimoopowa. 10 Tthiri wiira mutthu okhale naxariya, ohaana waamini vamurimani vawe, nave wiira oopowe, ohaana olaleya ihapari iyo ni eyano awe.+

11 Yoolepa emosa ennimuhimya Kristu, eriki: “Ole onimwaamini yoowo, khonrowa othanana”.+ 12 Khokhanle ovirikana eriyari ya muyuda ni mukereku.+ Ootheene aya arina Pwiya mmosa-ru, yoowo onaareerela murima ootheene ale aninvekela waakhaliherya. 13 Tthiri, “ootheene ale anivekela aromolaka nsina na Yehova,* animoopoliwa”.+ 14 Masi, anrowa onvekela sai ole ahinimwaamini aya? Anrowa omwaamini sai, ahimusuwelaka? Nave, anrowa omusuwela sai, ohikhanle mutthu onrowa waalaleerya? 15 Nto, anrowa olaleya sai, ahirummwale?+ Ti siiso silempwale aya wiira: “Ti vooreera onweha mutthu olaleyaka ihapari sooreera sa itthu sooreera!”+

16 Hata vari siiso, khahiyo wiira atthu ootheene yaahiiwelela ihapari sooreera. Yesaya onihimya wiira: “Yehova,* ti pani okupanli itthu aniiwale aya nilavulaka?”+ 17 Mutthu onaamini paahi nuumala wiiwa nuulumo.+ Nto, vanniweryaneya wiiwa nuulumo okathi onilaleiwa awe Kristu. 18 Kinikoha so: Kiireke aisarayeli khaiwale ihapari iyo? Ahiiwa, maana “nsu naya noomwareela elapo yootheene. Nave moolumo aya aaphiya mpakha omalenle elapo”.+ 19 Kinnikoha-tho wiira: Kiireke aisarayeli khaiwale oratteene?+ Ahiiwa tthiri, maana opacerya wene Moise oohimya wiira: “Kinimwaarumeela atthu a nloko nihirina efaita wiira kiwiiriheni okhalana nrima. Kinoowiirihani onanariwa, kaarumeelaka atthu a nloko na alolo”.+ 20 Yesaya onnilipiherya-tho ohimyaka wiira: “Ale yahaakaavya, aakiphwanya.+ Ale yahaakikoha, aakisuwela”.+ 21 Vano, onnaahimya atthu a Isarayeli, oriki: “Nihiku nootheene, kinniwookolela matata aka atthu oohiiwelela ni oowiisoona”.+

11 Nto kinnikoha-tho wiira: Niireke Muluku ohaakhootta atthu awe?+ Nnaari, khaakhoottale, okhala wiira miyo-tho ka mwisarayeli, osuulu wa Abrahamu, a nihimo na Beniyamini. 2 Muluku khaakhontte atthu awe, yaawo aapacenrye awe waathanla.+ Niireke khamunisuwela ele yoolepa enihimya aya emuhimyaka Eliya, yoowo anlaseya ohoolo wa Muluku, mwaha wa aisarayeli? 3 Eliya aahihimya wiira: “Yehova, awo aawiiva maprofeta anyu, ahaapwexakasa altaari anyu, nave kihanle mekhaka. Vano, awo aniphavela okiiva”.+ 4 Nto Muluku aamwaakhunle sai? Aamwaakhunle so: “Nlelo kookhalana alopwana 7.000, yaawo ahuuramme wiira amukokhorele Bayaali”.+ 5 Eyo enniiraneya-tho okathi ola. Yookhala ekurupu yaamukhaani ya atthu athanliwe*+ mwaha wa oreera murima wuulupale wa Muluku. 6 Eyo enitaphulela wiira owo ohaathanla mwaha wa oreera wawe murima wuulupale,+ ohiya mwaha wa miteko saya.+ Vaakhanle wiira aapaka etthu wiira athanliwe, weeso khiwaarowa okhala mwaha wa oreera murima wuulupale wa Muluku.

7 Nto nihimye exeeni? Atthu a Isarayeli khiyaaphwannye etthu yaaphavela aya. Atthu vakhaani yaathanliwe ti yaaphwannye etthu eyo.+ Masi akina yaahikhootta.*+ 8 Ti siiso Soolempwa sinihimya aya wiira: “Muluku ohaaruuhela ikhove sinceene,+ wiira ahooneke ni ahiiweke, mpakha olelo-va”.+ 9 Nave Davidi oohimya wiira: “Ifesta saya* sikhale muraakho ni ntapha wiira saamoroxe ni ahukhummwe. 10 Owiitho waya waariipe, wiira ahiweryeke woona, nave muthana aya okhurupuwe mahiku ootheene”.+

11 Vano, kinikoha wiira: Niireke okathi ayuda yaakwattuliwe aya, yaahimora ahivenya-tho? Nnaari! Masi, mwaha wa omora waya, ale ahikhanle ayuda taphwannye aya woopowa, wiira ayuda yaakhalele nrima.+ 12 Vano, vakhala wiira ohiiwelela waya nlamulo onnikumiherya mureerelo moolumwenkuni, nave ovukuwa mwaattelo aya onnaakumiherya mureerelo ale ahikhanle ayuda,+ nto vanootepa okumiherya mireerelo vakhala wiira anoomalela!

13 Kinilavula ni nyuwo atthu ahikhanle ayuda. Okhala wiira ka murummwa a atthu ahikhanle ayuda,+ kinnivaha efaita yuulupale* muteko kininvarela aka Muluku.+ 14 Nave, kinnilipelela wiira vaweryaneya, kinoowiiriha atthu a nloko naka okhalela nrima ele mwaakhenle anyu, ni kinnilipelela owoopola akina a yaawo. 15 Okhoottiwa waya+ ohaakhaliherya atthu akina a moolumwenkuni okhalana waataana ni Muluku. Akhala wiira Muluku onniwaakhela-tho awo,* onrowa okhalaka ntoko onaattikiherya okumi, aakumihaka mookhwaani. 16 Akhala wiira epantte yoopacerya ya ephaawu enivahiwa ntoko milipu ti yoowaarya, weeso ephaawu yootheene ti yoowaarya. Nave-tho, akhala wiira mutathaari wa mwiri ti woowaarya, weeso iritta saya ti soowaarya.

17 Vano, iritta sikina saahiikitthiwa vamwirini. Nuumala-vo, mwaahilupanyiwa ni iritta sikina sa mwiri wa olivera wa vate, nnaamwi nyuwo mwaari eritta ya mwiri wa olivera wa mutakhwani. Siiso, nyuwo munnittottela mureerelo mitathaari saya. 18 Tivo, muhithanyeke iritta iye Muluku iikintthe awe, okhala wiira nyuwo khamunlipiha mitathaari sa mwiri,+ masi mitathaari ti sinoolipihani. 19 Akina a nyuwo anrowa ohimyaka wiira: “Iritta sikina sihiikitthiwa wiira miyo kilupanyiwe nipuro naya”.+ 20 Eyo ekeekhai! Awo ahiikitthiwa mwaha woowi khiyaarina waamini.+ Masi nyuwo mookhalihiwa nipuro naya, mwaha wa waamini wanyu.+ Tivo, muhiittottopeke, masi mooveke. 21 Vakhala wiira Muluku ohiikittha iritta sa mwiri wa olivera wa vate, nave-tho nyuwo munimwiikitthiwa. 22 Munnoona wiira Muluku tooreera murima+ ni onninanariwa. Owo onninanariwa naale amonre mwaha wa ohaamini.+ Masi mwaapakaka itthu siniphwanela oreereliwa murima ni Muluku, owo onimooreerelani murima. Mwaahiire siiso, nyuwo-tho munimwiikitthiwa. 23 Nto ayuda yapacerya waamini, anoolupanyeriwa-tho vamwirini,+ okhala wiira Muluku onniwerya otthikela waalupanyerya. 24 Nyuwo muhiikitthiwa vamwirini wa olivera wa mutakhwani, mulupanyeriwa mwiri wa vate. Eyo khahiyo etthu ya ephattu. Nto vanrowa otepa okhweya olupanyerya iritta sa mwiri wa olivera wa vate, nipuro saikitthiwe aya!

25 Axinnaka, kiniphavela wiira musuwele esiiri Muluku ovinthe awe,+ wiira muhiixooneke okhala atthu ootepa osuwela. Esiiri ene Muluku ovinthe awe tiila: Atthu akina a Isarayeli ahuumiha mirima saya. Eyo enimwiiraneya mpakha orwa ootheene ale athanliwe, yaawo ahikhanle ayuda. 26 Nto, ti siiso aisarayeli ootheene+ anrowa aya woopowa. Soolempwa sinihimya wiira: “Moopoli onrowa okhuma oSiyoni,+ wiira omalihe otakhala wootheene wa osuulu wa Yakobe.* 27 Nla ti nivarihano kinrowa aka opaka naawo,+ okathi kinrowa aka okumiha itampi saya”.+ 28 Ekeekhai wiira ayuda akina, anniwanana ihapari sooreera, nto eyo ennoophwanyihani mureerelo. Masi awo athanliwe ni Muluku, nave owo onnaaphenta mwaha wa amuhavinre aya.+ 29 Muluku khonrowa othanana mwaha wa itthu ovanhe awe, nave khonrowa othanana mwaha wa ale owiihanne awe. 30 Khalai, nyuwo khimwaamwiiwelela Muluku,+ masi vano owo onnoomorelani ikharari+ mwaha wa ohiiwelela wa ayuda.+ 31 Vano, ayuda awo khaniiwelela, nto Muluku onnoomorelani ikharari. Nave ayuda anoomoreliwa ikharari, ntoko nyuwo mmoreliwe anyu ikharari. 32 Tthiri, Muluku onniwoona ntoko maperesu mwaha wa ohiiwelela waya.+ Siiso, owo onimwaamorela ikharari ootheene aya.+

33 Tthiri, mareeliho, ni ankhili, ni osuwela wa Muluku, ti sootepa waatta. Khuuvo oniwerya osuwelexa ophukela wawe, nave khuuvo oniwerya osuwela iphiro sawe! 34 “Ti pani osuwenle muupuwelo wa Yehova, aahiiso ti pani oninvaha miruku?”+ 35 Aahiiso, “niireke ookhala mutthu opacenrye onvaha etthu Muluku, wiira Muluku owo omuttikiherye?”+ 36 Nnaari, okhala wiira owo oopaka itthu sootheene, ni onnikhaliha itthu sootheene, ni itthu sootheene sinimukhalela yoowo. Owo onnireerela ovuwihiwa mahiku ootheene. Amen.

12 Axinnaka, okhala wiira Muluku oowoonelani othunku, kinooxonttelani wiira nvahererye irutthu sanyu+ ntoko mukuttho mukumi, woowaarya+ ni onimusivela Muluku. Murumeeleke muupuwelo anyu okathi muninvarela anyu muteko.+ 2 Nave muhitakiheke mweettelo wa olumwenku ola.* Masi, mmweemereryeke Muluku oturuka moota munuupuwela anyu,+ wiira musuweleke oratteene etthu Muluku oniphavela awe,+ yeeyo eri yooreera, yookhalela ni yoomalela.

3 Mwaha wa Muluku okireerela murima vaalupale, kinnootumereryani ootheene anyu, wiira muhitepeke wiisuupuwela ovikana vanireerela aya.+ Masi muupuweleke oratteene ni mwiiphukeleke moovarihana ni mwaattelo wa waamini Muluku oovanhaaweni.*+ 4 Erutthu yookhalana ipantta sinceene,+ masi ipantta iyo sootheene khasinivara etthu emosa-ru. 5 Siiso, nnaamwi nri ene anceene, na erutthu emosa paahi, yeeyo yiiranne ni Kristu. Nave-tho, na ipantte sinikhaliheryana.+ 6 Hiyo nihaakhela owerya wa ovara miteko soovirikana mwaha wa oreera murima wuulupale wa Muluku.+ Akhala wiira nihaakhela owerya woolaleya ihapari sa Muluku, nipakeke eyo moovarihana ni waamini nrina ahu. 7 Aahiiso, akhala wiira nihaakhela owerya wa waakhaliherya akina, naakhaliheryeke voohihiyererya. Akhala wiira nihaakhela owerya wa owiixuttiha atthu akina, niixuttiheke voohihiyererya.+ 8 Akhala wiira noovahiwa owerya wa waalipiha*+ atthu akina, naalipiheke.* Akhala wiira noovahiwa owerya wa waakawela*+ etthu atthu akina, naakaweleke ni murima wootheene. Ole onihoolela mmulokoni, opakeke eyo ni nthiti.+ Nto ole onimoriwa ikharari, opakeke eyo otteeliwe ene murima.+

9 Ophenta wanyu okhaleke woohoothererya.+ Muthanyeke itthu sootakhala,+ nvarexexeke itthu sooloka. 10 Mphentaneke vanceene ntoko axinna. Mpaceryeke nyuwo waattittimiha akina ni murima anyu wootheene.+ 11 Nvareke muteko voowiilipiha,* muhilosoweke.*+ Ikuru soowaarya+ siwiiriheni okhalana ikuru. Munvareleke muteko Yehova ni murima anyu wootheene.+ 12 Mutteeliweke murima mwaha wa nlipelelo nanyu. Nvileleke mwaahaawaka.+ Muhihiyereryeke ovekela.+ 13 Mukawaneke ni awiixutti* itthu sinaathowa.+ Mukhalaneke yoolema ya owaakhela aletto.+ 14 Munvekeleke Muluku wiira aareeliheke ale anoolupatthani.+ Nave, munvekeleke Muluku wiira aareeliheke atthu, ni muhaalavuleleke itthu sootakhala.+ 15 Mutteeliweke murima ni ale anitteeliwa murima. Munleke ni ale aninla. 16 Mwaathokoreryeke akina ntoko muniithokorerya anyu. Muhiixinnuwiheke, masi mwiiyeviheke.+ Muhuupuweleke wiira nyuwo munnisuwelexa itthu waavikana akina.+

17 Mutthu awiirelani etthu yootakhala, muhimuttikiheryeke ni etthu yootakhala.+ Mphaveleke opaka itthu sooreera ohoolo* wa atthu ootheene. 18 Mpakeke sootheene muniwerya anyu, wiira mukhaleke ni murettele ni atthu ootheene.+ 19 Axinnaka, muhinleke ikuhu. Masi mmuhiyeke Muluku ooniheryeke onanariwa wawe wuulupale mwaha wa itthu sootakhala sinipakiwa.+ Tthiri, vaalempwa wiira: “Yehova onihimya wiira: ‘Ti miyo kininla ikuhu; miyo kinimwaattikiherya’”.+ 20 “Nwanani anyu avoliwa etala, munvahe yoolya, avoliwa ntthona, munvahe etthu yoowurya. Mwiira siiso, munimuukela makhala a mooro vamuru vawe”.*+ 21 Muhihiye muxinttiwaka ni sootakhala, masi muxintteke sootakhala mwiiraka sooreera.+

13 Niwiiweleleke makhulupale a mulaponi,* yaawo annilamulela.+ Khuuvo orina okhulupale, oheemereriwe ni Muluku.+ Khula mmosa a yaawo, ookhalihiwa opuro awe ni Muluku.+ 2 Tivonto, ole onaavirikanya makhulupale, onnivirikanya mukhalelo okumiheriwe ni Muluku. Nto ale anivirikanya siiso, anoophukeliwa.* 3 Ale aniira itthu sooreera, khaniwoova makhulupale, masi ale aniira itthu sootakhala, taniwoova.+ Niireke munniphavela ohiwoova makhulupale? Weeso mwiireke itthu sooreera,+ nto awo animoottottopelani. 4 Makhulupale awo, arumeyi a Muluku, nave aakhalihiwa mapuro aya wiira yoophwanyihekeni mureerelo. Masi mwiira etthu yoohiloka, mooveke, okhala wiira awo aakhalana owerya* wa woohukhumuni, nto khanipaka eyo mahala ene. Awo arumeyi a Muluku, anaahukhumu ale anipaka itthu sootakhala.

5 Nto, nookhala nthowa nuulupale ninwiirihani owiiwelela makhulupale. Khahiyo mwaha wa woova onanariwa waya paahi, masi-tho mwaha wa murima anyu.+ 6 Tivo nyuwo muniliva anyu mpoosito, okhala wiira awo arumeyi a Muluku, anaavarela muteko atthu ootheene. Annivara muteko owo okathi wootheene. 7 Munvaheke khula mutthu etthu oniphwanela awe: Ole onivekela mpoosito, munvaheke mpoosito;+ ole onivekela musurukhu wa kuvernu, mmuliveke musurukhu wa kuvernu; ole onivekela wooviwa, mmooveke;+ ole onivekela ottittimihiwa, mmuttittimiheke.+

8 Muhikopheke etthu ehinwerya anyu oliva, masi muhaana ophentana mukina ni mukhwaawe,+ okhala wiira ole onimphenta mukhwaawe, onneettela nlamulo.+ 9 Nlamulo noowi: “Muhiraruwe,+ muhimwiive mutthu,+ muhiiye,+ muhikhaleleke nrima itthu sa aneene”,+ vamosa ni sooruma sootheene siniphwanyaneya Munlamuloni, siniirela mpantta nlamulo nimosa paahi, nenlo nnihimya wiira: “Mumphenteke mukhwiinyu ntoko muniiphenta anyu”.+ 10 Ole oniphenta, khoniwiirela sootakhala akhwaawe.+ Tivo, ole oniphenta, onneettela nlamulo.+

11 Mwiireke siiso, maana munnisuwela okathi ola ninkhala ahu. Ola okathi woovenya mwaarupa anyu,+ okhala wiira vano woopoliwa wahu onnitepa waattamela, ovikana okathi naapacenrye ahu waamini. 12 Ohiyu ohanle omala, nave vanihala vakhaani oxa. Vano nihiye ovara miteko sa epiphi,+ masi nikuxe ikapwitthi sa muthuko.+ 13 Nikhalaneke mukhalelo wooreera,*+ ntoko atthu anivara muteko nipuro nookokola. Nihipakeke ifesta sootakhala,* nnakhala ohapaliwa hata orupihana woohiloka. Nave nihikhalaneke mweettelo woohiloka onooniherya ohuuliwa muru,*+ nihiwaneke, aahiiso nihikhalaneke nrima.+ 14 Mmutakiheke Pwiya Yesu Kristu.+ Nave muhimpakeleke palano moota munrowa anyu opaka etampi.*+

14 Nwaakheleke ale ahilimpe waamini waya,+ masi muhaaphukeleke ale arina muupuwelo onivirikana ni wawinyu. 2 Mutthu orina waamini woolipa onnoolya itthu sootheene, masi ole orina waamini woohilipa, onilya makukhu paahi. 3 Ole onilya itthu sootheene, ohimuthanyeke ole ohinilya itthu sootheene. Nave ole ohinilya itthu sootheene ohimphukeleke ole onilya itthu sootheene,+ okhala wiira Muluku oomwaakhela mutthu owo. 4 Nyuwo mwa pani wiira mumphukeleke murumeyi a mutthu mukina?+ Pwiya awe tonithanla akhala wiira etthu enipaka awe murumeyi owo, ti yooreera aahiiso ti yootakhala.+ Okhaliheriwaka ni Yehova, owo onookhalana mukhalelo wooloka vamaithoni va Muluku.

5 Mutthu mmosa onnithokorerya nihiku nimosa okhala noottittimiheya ovikana mahiku makina,+ masi mutthu mukina onnithokorerya mahiku ootheene okhala oolikana.+ Khula mutthu aikupaliheke vanceene mmuupuweloni mwawe. 6 Ole onithokorerya nihiku nimosa okhala nootepa ottittimiheya, onipaka eyo wiira omuttittimihe Yehova.+ Ole onilya itthu sootheene, onipaka eyo wiira omuttittimihe Yehova. Nave, ole ohinilya itthu sootheene, onninvuwiha-tho Yehova, ni onnimuxukhuru Muluku.+ 7 Khuuvo mutthu onikhala, aikhalelaka mwaneene.+ Nave khuuvo mutthu onikhwa, aikhwelaka mwaneene. 8 Mweekeekhai, naakhalaka akumi, nimmukhalela Yehova.+ Nave, naakhwaaka, nimmukhwela Yehova. Tivo, hata nikhalaka akumi wala nikhwaaka, hiyo na atthu a Yehova.+ 9 Tthiri, ti nthowa naya Kristu aakhwiiye awe ni aahihimuxiwe awe, wiira okhale Pwiya a alipa-ookhwa ni Pwiya a atthu akumi.+

10 Masi xeeni munimphukela anyu munninyu?+ Aahiiso, xeeni-tho munimuthanya anyu munninyu? Ootheene ahu ninrowa ophukeliwa ni Muluku.+ 11 Soolempwa sinihimya so: “Yehova onihimya wiira: ‘Kinnilaphela okumi aka+ wiira, mweekeekhai atthu ootheene anookokhora ohoolo waka, nave apinaatamu ootheene anookittittimiha ahimyaka wiira miyo ka Muluku’”.+ 12 Tivo, khula mmosa a hiyo onrowa waakhula ohoolo wa Muluku.+

13 Siiso, muhiye ophukelana.+ Ohiya-vo, mulakele ohipaka etthu yaarowa ovukula waamini wa munna aahiiso ommoroxa.*+ 14 Ntoko mwiixutti a Pwiya Yesu, kinnisuwela wiira khiivo etthu mutthu onilya awe eri yoohiloka mekhaya-ru.+ Masi akhala wiira mutthu onnithokorerya yoolya eyo okhala yoohiloka, onnoona wiira khivanireerela olya. 15 Vakhala wiira munninyu onniriipiwa murima mwaha wa yoolya munilya anyu, nyuwo khamunooniherya-tho ophenta.+ Muhimpwetexe munninyu mwaha wa yoolya, yoowo Kristu omukhwenle awe.+ 16 Tivo, muhipakeke itthu munikupali anyu wiira ti sooloka, masi saarowa owiiriha atthu woolavulani voohiloka. 17 Omwene wa Muluku khontaphulela olya ni owurya,+ masi ontaphulela okhalana exariya, murettele ni otteeliwa murima, weiwo onikumiheriwa ni ikuru soowaarya. 18 Ole ori murumeyi a Kristu ni orina mikhalelo iya, onnimusiveliha Muluku ni onnittittimihiwa ni atthu.

19 Tivo, niphaveleke itthu sinikumiherya murettele+ ni itthu sinikhaliherya olipihana mukina ni mukhwaawe.+ 20 Muhiye ohonona muteko wa Muluku mwaha wa yoolya paahi.+ Mweekeekhai, soolya sootheene sinneemereriwa olya, masi khivanireerela olya etthu enrowa ovukula waamini wa mutthu mukina.+ 21 Fataari ohikhuura enama aahiiso ohiwurya eviinyu, nnakhala ohipaka etthu yaarowa ovukula waamini wa munninyu.+ 22 Etthu enikupali anyu mwaha wa itthu iya, ti yawinyu nyuwo mmansinyu ni Muluku. Nyuwo munoohakalala, mwaahiivaheke nthowa mwaha wa itthu munikupali anyu okhala sooreera. 23 Masi, akhala wiira mutthu onnihoverya, hata vari siiso onalya, owo oolamuliwa, maana khonilya aaminiki. Mweekeekhai, khula etthu nimpaka ahu nihaaminiki, etthu eyo etampi.

15 Hiyo nirina waamini woolipa, naakhaliheryeke ale ahirina waamini woolipa,+ wiira avileleke mwaha wa otteettheya waya. Nave nihipakeke itthu sinnisivela paahi.+ 2 Khula mutthu ophaveleke omusiveliha mukhwaawe, onvarelaka itthu sooreera, wiira omulipihe.+ 3 Hata Kristu khaapanke itthu wiira iisivelihe mmansawe.+ Ti siiso Soolempwa sinihimya aya wiira: “Moolumo a atthu anooruwanani, annikimorela miyo”.+ 4 Itthu silempwale khalai, silepeliwe wiira siniixuttihe,+ nave hiyo nookhalana nlipelelo+ mwaha wa nuulumo na Muluku, nenlo ninnilipiha ni ninnikhaliherya ovilela.+ 5 Muluku, yoowo onnimaaliha ni onnikhaliherya ovilela, ookhaliheryeni ootheene anyu okhalana muupuwelo mmosa-ru, ntoko wa Kristu Yesu, 6 wiira moowiiwanana+ ni nsu* nimosa-ru, ninvuwihe Muluku, ni Tiithi awe Pwiya ahu, Yesu Kristu.

7 Tivo, mwaakhelaneke mukina ni mukhwaawe,+ siisaale Kristu nave owaakhenlyaaweni,+ wiira Muluku ovuwihiwe. 8 Kinooleelani wiira Kristu ookhala murumeyi a ayuda,*+ wiira owooniherye atthu awo wiira okathi wootheene Muluku onihimya ekeekhai. Nave aaphavela owooniherya wiira anatiri Muluku aamanenle awe amuhavinre aya, animwiiraneya.+ 9 Eyo ehiiraneya wiira maloko makina anvuwihe Muluku, mwaha wa omoriwa wawe ikharari.+ Ti siiso Soolempwa sinihimya aya wiira: “Ti maana aya kinrowa aka woottottopelani eriyari ya maloko, nave kinrowa aka ovuwiha nsina nanyu ni isipo”.+ 10 Nave Muluku onnihimya-tho wiira: “Maloko ootheene, vamosa ni atthu a Muluku,+ ahakalaleke”. 11 Nave onihimya-tho wiira: “Nyuwo atthu a maloko ootheene, mmuttottopeleke Yehova. Atthu a ilapo sootheene, anvuwiheke yoowo”.+ 12 Nave-tho Yesaya onihimya wiira: “Onookhumelela ole ori mutathaari wa Yese,+ wiira aalamuleleke atthu a maloko manceene.+ Maloko a atthu anrowa omuroromelaka yoowo”.+ 13 Kinivekela wiira Muluku, yoowo onivaha nlipelelo, otepeke wootteelihani murima ni oovaheeni murettele munceene, mwaha woowi munnimuroromela. Nto, mukhaliheriwaka ni ikuru soowaarya,+ nyuwo munoolipiha vanceene nlipelelo nanyu.

14 Nyuwo axinnaka, vano koosuwelexa wiira moosareya oreera murima, mookhalana osuwela woomalela, ni munniwerya ovahana miruku.* 15 Masi, kinnoolepelani ni moolumo oowiiwanyeya, kiwuupuxeryakani itthu kamosa-kamosa. Kinniwuupuxeryani itthu iyo, okhala wiira Muluku ookireerela murima vaalupale. 16 Owo ookithanla wiira kikhale murumeyi a Kristu Yesu, wiira kaalaleerye ihapari sooreera sa Muluku,+ ale ahikhanle ayuda.+ Miyo kinnivara muteko ola wiira Muluku oweemererye ale ahikhanle ayuda. Atthu awo ari ntoko mukuttho oreerihiwe ni ikuru soowaarya.

17 Vano, kinnitteeliwa murima okhala wiira ka mwiixutti a Kristu Yesu, ni kinnivara muteko wa Muluku. 18 Nkinrowa-tho olavula etthu enipaka aka. Masi kinrowa olavula paahi muteko Kristu onivara awe okirumeelaka miyo, wiira ale ahikhanle ayuda amwiiweleleke Kristu. Owo onnipaka eyo orumeelaka moolumo aka ni miteko saka. 19 Nave onnirumeela owerya wa miiriirya ni miteko sootikiniha,+ vamosa ni owerya wa ikuru soowaarya sa Muluku. Siiso, koolaleya ihapari sooreera sa Kristu mapuro ootheene, okhuma oYerusalemu mpakha wIliiriko.+ 20 Kaahilakela ohilaleya ihapari sooreera mapuro yaale Kristu aasuweliwe awe, wiira kihivareke-tho muteko mutthu mukina aapacenrye awe. 21 Ti siiso Soolempwa sinihimya aya wiira: “Ale ahitonko wiiwa olaleiwaka yoowo, anoomoona. Nave ale ahiiwale olaleiwaka yoowo, anoomusuwela”.+

22 Ti etthu yaakiirihale ohiwerya orwa weiwo ori anyu, nnaamwi ikwaha sinceene kaaphavenle opaka eyo. 23 Masi koolaleerya mapuro ootheene a mittetthe iya. Nave, soovira iyaakha sinceene kiphavelaka orwa wooxukuryani. 24 Siiso, kinnilipelela wiira okathi kinrowa aka wEspanya, kinimoowehani ni munookihoola vakhaani. 25 Masi, kinipacerya orowa oYerusalemu wiira kaakhaliherye ale oororomeleya* ari weiwo.+ 26 Axinna a oMasedonia ni a wAkhaya, aavaha mireerelo saya ni murima aya wootheene, wiira yaakhaliherye ale oororomeleya* oothoiwa anikhala epooma ya oYerusalemu.+ 27 Awo aavaha etteeliwe ene murima. Mweekeekhai, yaanoona wiira yaahaana opaka eyo. Ayuda ahaavaha ale ahikhanle ayuda, itthu sooreera sinikhuma wa Muluku. Nave ale ahikhanle ayuda yaahaana waakhaliherya ni itthu saathowa.+ 28 Vano, kiniroiha oYerusalemu itthu axinna avanhe aya wiira kaavahererye axinna a weiwo. Nuumala-vo, kinimooxukuryani kaarowaka wEspanya. 29 Koosuwela wiira karwa wooxukuryani, kinooruuha mareeliho oowaatta, anikhuma wa Kristu.

30 Axinnaka, okhala wiira ninnimwaamini Pwiya ahu Yesu Kristu, nave ikuru soowaarya sinniniiriha ophentana, mukivekeleleke wa Muluku ni nthiti, ntoko kiniira aka.+ 31 Nvekeleke wiira koopoliwe+ mmatatani mwa atthu a oYudeya, yaawo ahinimwaamini Yesu, ni wiira ale oororomeleya* ari oYerusalemu, yeemererye nikhaliheryo naka.+ 32 Muluku aphavela, kinimoorwa wooxukuryani, kitteeliwe ene murima, wiira nilipihane. 33 Nto, Muluku, yoowo onivaha murettele, okhale ni nyuwo ootheene.+ Amen.

16 Kinnootumereryani wiira mmwaakhele* murokorihu Febe, yoowo onirumeela muloko wa oKenkhere.+ 2 Xontte, mmwaakhele ntoko vanireerela aya waakheliwa atthu a Muluku.* Mmukhaliherye ni khula etthu enimuthowa,+ okhala wiira khoreere waakhaliherya atthu anceene, okihela muhina miyo.

3 Munvahe makhomaso aka Priska ni Aakila,+ yaawo kinivarana aka muteko wa Kristu Yesu. 4 Awo aaleva okumi aya* mwaha wa miyo.+ Miyo vamosa ni miloko sootheene sa ale ahikhanle ayuda, ninnaaxukhurela. 5 Mwaakhomase atthu a muloko onithukumana vate vaya.+ Munvahe makhomaso aka Epeneto, onimphenta aka, yoowo oniirela mpantta atthu oopacerya okhala awiixutti a Kristu, elapo ya wAsia. 6 Mmukhomase Maria, yoowo ohireere woovarelani muteko. 7 Mmukhomase Androniko ni Yuniya, yaawo ari amusi aka+ ni kaatthukweliwe aka vamosa mukhatteya. Awo annisuweliwa oratteene ni arummwa, nave apacenrye khalai omutthara Kristu okivikana miyo.

8 Munvahe makhomaso aka Ampliato, munnaka oophentiwa, yoowo-tho onaatthara Apwiya. 9 Mmukhomase Urbano, onivarana ahu muteko wa Kristu, vamosa ni mpatthani aka oophentiwa Sitakhi. 10 Mmukhomase Apele, yoowo ori murumeyi oororomeleya a Kristu. Mwaakhomase atthu a etthoko ya Aristoobulo. 11 Mmukhomase mmusi aka Erodioni. Mwaakhomase atthu a etthoko ya Narsiso, yaawo anaatthara Apwiya. 12 Mmukhomase Trifena ni Trifosa, athiyana yaawo aniilipiha ovara muteko wa Apwiya. Mmukhomase Perside, onimphenta ahu, maana owo onniilipiha ovara muteko wa Apwiya. 13 Mmukhomase Rufo, yoowo ori murumeyi oothanliwa a Apwiya. Nave-tho, mwaakhomase amamawe, yaawo ari ntoko amamaka. 14 Mmukhomase Asinkirito, Flegoni, Herme, Patroba, Herma ni axinna ari naawo. 15 Mmukhomase Filoologo ni Julia, Nereyo ni murokorawe, ni Olimpa, vamosa ni ale oororomeleya* ari naawo. 16 Mukohaneke ihaali, nvahanaka epeexo.* Miloko sootheene sa Kristu, sinnookhomasani.

17 Axinnaka, mwiikasoope ni ale anikumiherya ohiiwanana ni aniwiiriha akina ohiya waamini. Itthu iyo sinnivirikanya ele mwiixuntte anyu. Muhaataaneke ni atthu awo.+ 18 Awo khahiyo ipottha sa Pwiya ahu Kristu, masi ipottha sa itthu aniphavela aya. Awo annaawoka atthu ni moolumo oowoototha ni ooweepesa. 19 Masi atthu ootheene annisuwela wiira nyuwo munniiwelela, nave miyo kinnihakalala mwaha wa etthu eyo. Kimphavela wiira mukhalaneke miruku wiira mpakeke itthu sooreera, nave mukhaleke atthu oohittheka, musyakaka itthu sootakhala.+ 20 Voohipisa, Muluku a murettele, onimoovahani owerya wiira mmunyakatte Satana.+ Oreera murima wuulupale wa Pwiya ahu Yesu, okhale ni nyuwo.

21 Timootheyo, yoowo onivarana aka muteko, onnookhomasani. Nave-tho amusi aka,+ Lusio, Yasoni ni Sosipatro, annookhomasani.

22 Miyo Tersio, kilempe epaphelo ela, kinnookhomasani mwa nsina na Apwiya.

23 Gaio,+ kimanke aka vatthokoni vawe, vaavo-tho onithukumana awe muloko, onnookhomasani. Nave, Erasto, yoowo onisuka musurukhu wa epooma, vamosa ni munnawe oniihaniwa Kwarto, annookhomasani. 24* ——

25 Muluku onoowerya woolipihani. Eyo ennivarihana ni ihapari sooreera kinilaleya aka, ni olaleiwa wa Yesu Kristu. Ihapari iyo sooreera, sinnivarihana ni wuupululiwa wa esiiri ya Muluku,+ yeeyo yaavithiwe okathi munceene. 26 Vano, esiiri eyo ehuupululiwa.* Nto atthu a maloko ootheene aasuwela esiiri eyo ya Muluku, mwaha wa soolempwa sa maprofeta. Eyo ennivarihana ni yooruma ya Muluku, yoowo onikhala mahiku ootheene. Owo oniphavela wiira atthu a maloko ootheene amwaaminiki ni amwiiweleleke. 27 Muluku, yoowo paahi ori musuweli,+ onniphwanela ovuwihiwa mahiku ootheene, mwa Yesu Kristu. Amen.