EPAPHELO YA NENLI PAULO AALEPENLE AWE AKORINTO

1 Miyo Paulo, murummwa a Kristu Yesu, ntoko Muluku oniphavela awe, vamosa ni munnihu Timootheyo,+ kinnilepela epaphelo ela muloko wa Muluku, yoowo ori oKorinto. Nave-tho, kinnaaroihela epaphelo ela ootheene ale oororomeleya,* anikhala elapo yootheene ya wAkhaya.+

2 Muluku Tiithi ihu ni Yesu Kristu Pwiya ahu, ewooniheryeni oreera murima wuulupale ni yoovaheeni murettele.

3 Ottottopeliwe Muluku, Tiithi a Pwiya ahu Yesu Kristu,+ yoowo ori Tiithi oomoriwa ikharari vanceene+ ni Muluku onnimaaliha mwa mikhalelo sootheene.+ 4 Ti yoowo onnimaaliha* wa khula muxankiho onniphwanya,*+ wiira mwaha wa nimaaliho onnivaha awe,+ hiyo-tho, niweryeke waamaaliha ale+ sinaaphwanya mixankiho soovirikana.* 5 Hiyo ninnihaawa ni itthu sinceene mwaha wa omutthara Kristu.+ Nave-tho, mwaha wa Kristu, hiyo ninnimaalihiwa vanceene. 6 Vano, saaniphwanyaka mixankiho,* sinniphwanya wiira nyuwo mmaalihiwe ni moopoliwe. Nave naamaalihiwaka, nniirela-tho wiira nyuwo mmaalihiwe. Nimaaliho nlo, nnimookhaliheryani ovilela mixankiho, seiyo-tho ninkhalana ahu. 7 Ninnoororomelani vanceene, wiira siisaale munihaawa anyu ntoko hiyo, nave-tho munrowa omaalihiwa ntoko hiyo.+

8 Axinnaka, nimphavela wiira musuwele maxakha yaaniphwannye eprovinsia ya wAsia.+ Maxakha awo yaahitepa onixankiha, nihinawerya ovilela ni ikuru sahu. Nave khinaasuwela akhala wiira naamukhala akumi wala nnaari.+ 9 Mweekeekhai, nuupuwela wiira naamookhwa. Etthu ela yooniixuttiha ohiiroromela mmansihu, masi omuroromela Muluku,+ yoowo onaahihimuxa alipa-ookhwa. 10 Owo aahinoopola okathi naahala ahu okhwa, nave onrowa onoopola. Ninnilipelela-tho wiira khonrowa ohiya onoopola.+ 11 Nyuwo-tho munoowerya onikhaliherya, munivekelelaka wa Muluku,+ okhala wiira atthu anceene yaanivekelelaka, Muluku onoowiriyana ni onoonikhaliherya. Siiso, atthu anceene anoomuxukhurela Muluku.+

12 Hiyo ninniittottopa mwaha wa etthu ela: Murima ahu onninikhalela onamoona wiira nookhalana murima wooloka ni nookhalana ekeekhai enikhuma wa Muluku. Eyo ennooneya okathi ninkhala ahu ni atthu a moolumwenkuni, vanceenexa okathi ninkhala ahu ni nyuwo. Hiyo khaninlipa ni osuwela wa olumwenku,+ masi ninlipa ni oreera murima wuulupale wa Muluku. 13 Ninnoolepelani itthu sookhweya osoma* ni wiiwexexa. Nave kinnilipelela wiira munrowa wiiwexexaka oratteene* itthu iya, 14 siisaale akina a nyuwo aniiwexexa aya. Tthiri, akina a nyuwo anniiwexexa wiira munniittottopa mwaha wa hiyo. Siiso-tho, hiyo ninrowa wiittottopa mwaha wa nyuwo, nihiku na Pwiya ahu Yesu.

15 Kiroromelaka siiso, kaaniphavela orwa wa nyuwo ekwaha ya nenli, wiira mutteeliwe-tho murima.* 16 Tthiri kaaniphavela wooxukuryani kirowaka ni kihokolowaka oMasedonia. Nuumala-vo, mukihoole mwakihiye mphironi, kaarowaka oYudeya.+ 17 Masi kiireke okathi kaaphavela aka opaka eyo, kaathokorenrye mwaha owo ntoko etthu yaamukhaani? Kiireke kinnimpaka palano ntoko pinaatamu, kihimyaka wiira “aayo, aayo”, nuumala-vo, kinahimya wiira “nnaari, nnaari”? 18 Etthu enihimya ahu ekeekhai. Nyuwo pooti omuroromela Muluku. Hiyo khannihimya wiira “aayo”, nuumala-vo, nnahimya wiira “nnaari”. 19 Nave-tho, Yesu Kristu, Mwaana a Muluku, yoowo miyo ni Silvano* ni Timootheyo+ noolalenryaahuni, khonihimya wiira “aayo”, nuumala-vo, onahimya wiira “nnaari”. Masi, ahimya wiira “aayo”, okathi wootheene onikhala “aayo” yoowo. 20 Itthu sootheene Muluku oleihenrye awe, sinnikhala “aayo” mwaha wa Yesu.+ Tivo nniira ahu “Amen” wa Muluku,+ mwa nsina na Yesu, wiira Muluku ovuwihiwe. 21 Masi, Muluku tonilipiherya wiira nyuwo ni hiyo na atthu a Kristu ni ti yoowo onithanlale.+ 22 Nave-tho, owo oonivaha ikuru soowaarya+ vamurimani vahu.+ Siiso, onnilipiherya wiira onoonivaha itthu sinrwa ohoolo.*

23 Vano, kinnilaphela okumi aka ohoolo wa Muluku, wiira nlelo nkinatthi ophiya oKorinto iwo, okhala wiira nkaaphavela otepa wooriipihani murima. 24 Hiyo khanihiyo axineene waamini wanyu,+ masi ninvara muteko vamosa ni nyuwo, niirelaka otteeliwa wanyu murima. Tthiri, nyuwo munnilipa mwaha wa waamini wanyu.

2 Miyo koolakela ohooriipihani-tho murima ekwaha ekina kinirwa aka wooxukuryani. 2 Akhala wiira kinimooriipihani murima, ti pani onrowa okitteeliha murima, ohikhanle ole kimuriipihale aka murima? 3 Tivo koolepenlyaakani siiso, wiira miyo kaphiya ori anyu, kihiriipiwe murima mwaha wa ale yaakhanle ookitteeliha murima. Tthiri mwaha wa nyuwo ootheene, kinnikupali wiira etthu enikitteeliha murima, nave ennootteelihani murima ootheene anyu. 4 Miyo kihoolepelani epaphelo ni oxanka ni oriipiwa murima ni maithori manceene, kihiphavelaka wooriipihani murima,+ masi kiphavelaka woosuwelihani wiira kinnoophentani vanceene.

5 Akhala mutthu owiirinhe akina oriipiwa murima,+ khokiriipinhe murima miyo, masi ohooriipihani murima ootheene anyu. Nto nkiniphavela olavulasa vanceene mwaha ola. 6 Vaaphiyerya opwapweliwa wawe mulopwana owo ni atthu anceene. 7 Vano, muhaana omulevelela mulopwana owo ni murima wootheene ni ommaaliha,+ wiira ohitepe oriipiwa murima mpakha okhulumuwa.+ 8 Tivo, kinootumereryani wiira mmooniherye wiira munnimphenta.+ 9 Etthu ekina ekiirinhe woolepelani epaphelo ela, tiila: Kiniphavela osuwela oratteene, vakhala wiira nyuwo munniiwelela mwa itthu sootheene. 10 Akhala wiira moomulevelela mutthu mwaha wa etthu emosa, nave miyo koomulevelela. Tthiri, khula etthu kilevelenle aka (akhala wiira koolevelela etthu), kihiira siiso wiira mphwanye mureerelo vamaithoni va Kristu. 11 Siiso, khaninrowa oweriwa* ni Satana,+ maana khanintikhina itthu siniphavela awe.*+

12 Nuumala ophiya oTrowade+ wiira kalaleye ihapari sooreera sa Kristu ni ovahiwa eparakha yuulupale* wiira kivare muteko wa Apwiya, 13 kaahixanka vanceene, okhala wiira nkamphwannye munnaka Tito.+ Tivo, kaahaalaxerya awiixutti a weiwo, kinarowa oMasedonia.+

14 Oxukhureliwe Muluku, yoowo onnihoolela ntoko anakhotto anitthika okhottoni axinttale ene ni Kristu. Osuwela wa Muluku onninkhela saana, nave owo onnirumeela muteko ninvara ahu wiira owiirihe atthu a mapuro ootheene woona wunkhela iwo! 15 Hiyo nimmulaleya Kristu, ninlikana ni etthu yoowunkhela ohoolo wa Muluku. Wunkhela iwo, onnaaphwanya ale anrowa woopowa ni ale anrowa opwetexiwa. 16 Para ale anrowa opwetexiwa, onnaaphwanya wunkhela wa okhwa,+ oniroiha wookhwaani. Nave para ale anrowa woopowa, onnaaphwanya wunkhela wa okumi, oniroiha wookumini. Vano, ti pani oniphwanelela tthiri ovara muteko ntoko ola? 17 Hiyo ninniphwanelela, maana khaninlikana ni atthu anceene, yaawo animpakela nakoso* nuulumo na Muluku.+ Masi ntoko awiixutti a Kristu, hiyo ninnilavula ekeekhai vamaithoni va Muluku, nirummwale ene ni Muluku yoowo.

3 Niireke nihaana wiisuweliha-tho wa nyuwo? Niireke nihaana woovahani ipaphelo sinnittottopela, ntoko atthu akina aniira aya? Aahiiso, niireke ti nyuwo mukhanle oonivaha ipaphelo iyo? 2 Epaphelo ahu ti nyuwo, yeeyo elempwale+ vamurimani vahu, enisuweliwa ni enisommwa ni apinaatamu ootheene. 3 Nyuwo munnooniheriwa okhala epaphelo ya Kristu, yeeyo elempwale ni hiyo, arumeyi a Muluku.+ Eyo khelempwale ni etinta, masi elempwale ni ikuru soowaarya sa Muluku mukumi. Nave khelempwale vamalukuni,+ masi elempwale vamurimani.+

4 Tivo, hiyo ninnimuroromela siiso Muluku, mwaha wa Kristu. 5 Hiyo khannihimya wiira ninniphwanelela ovara muteko ola mwaha wa ikuru sahu. Masi, Muluku tonniiriha ophwanelela ovara muteko ola.+ 6 Nave, mwaha wa yoowo, hiyo ninniphwanelela okhala arumeyi a Muluku a nivarihano na niinaano,+ niheettihiwaka ni Nlamulo,+ masi neettihiwaka ni ikuru soowaarya sa Muluku, okhala wiira Nlamulo ninnikumiherya okhwa,+ masi ikuru soowaarya sa Muluku sinnivaha okumi.+

7 Nto, Nlamulo ninkumiherya okhwa, nenlo naalempwe vamalukuni,+ naahikumiheriwa ni ovuwa wuulupale, mpakha aisarayeli ohiwerya oweha owiitho wa Moise, mwaha wa waarya owiitho wawe.+ Masi ovuwa iwo waahimala. 8 Vakhala wiira Nlamulo naahikumiheriwa ni ovuwa, niireke ikuru soowaarya sa Muluku+ khasinrowa okumiheriwa ni ovuwa wuulupalexa?+ 9 Vakhala wiira Nlamulo, nenlo nnaalamula apinaatamu+ ti noovuwa,+ nto muteko onaakhaliherya atthu okhala anaxariya onrowa otepa ovuwa!+ 10 Ovuwa wa Nlamulo khahiyo etthu, naalikanyiha ni ovuwa wa nivarihano na niinaano.+ 11 Tthiri, vakhala wiira ele emalihiwe yaahikumiheriwa ni ovuwa,+ nto ele nlelo enikhala, ennitepa ovuwihiwa!+

12 Okhala wiira ninniroromela siisa,+ ninnilavula nihoovaka etthu. 13 Nave, khanniira ntoko Moise, yoowo aakhuneela owiitho wawe ni eveewu,+ wiira aisarayeli ahiweryeke oweha emalelo ya Nlamulo naarowa omalihiwa. 14 Masi, muupuwelo aya woottiyeliwa.+ Mpakha-va, muupuwelo aya onikhala ntoko okhuneeliwe ni eveewu, nave khanwerya wiiwexexa nivarihano na khalai.+ Kristu paahi,+ tonikhaliherya okumiha eveewu eyo. 15 Nave-tho, mirima saya+ sookhuneeliwa mpakha olelo-va. Siiso, awo khaniwerya wiiwexexa soolempwa sa Moise.+ 16 Masi, okathi mutthu onirukunuxa awe mweettelo awe, onamukokhorela Yehova, eveewu eyo ennikumihiwa.+ 17 Yehova khonooneya ni onikhala wiirimu.* Nto vaavo vari ikuru sa Yehova,+ vaavo-tho wookhala otaphuwa.+ 18 Ootheene ahu nikuminhe eveewu owiitho wahu, ninlikana ni ixipelyu* sinooniherya ovuwa wa Yehova. Hiyo ninnitatuxiwa wiira nikhaleke ntoko Muluku, nave nitepeke wooniherya ovuwa wa Muluku, ntoko oniphavela awe Yehova, yoowo ohinooneya ni onikhala wiirimu.*+

4 Nto, okhala wiira nookhalana muteko ola mwaha wa omoreliwa ikharari ni Muluku, hiyo khannihiya ovara muteko ola. 2 Masi, nookhootta itthu soowuuliha muru, seiyo sinivariwa wiiphiini. Nave khanneetta niphavelaka waawoka atthu, ohiya-vo nniixuttiha paahi ele nuulumo na Muluku nnihimya aya.+ Ohoolo wa Muluku, hiyo ninniwooniherya apinaatamu ootheene wiira ninnipaka etthu yooreera, mwa enamuna enivara mirima saya.+ 3 Tthiri, akhala wiira ihapari sooreera ninlaleya ahu sihiipithihiwa, siipithihiwe wa ale anrowa opwetexiwa, 4 eyo piiyo, ale ahinaamini,+ yaawo miyuupuwelo saya sittiyeliwe ni muluku a olumwenku ola,*+ wiira ahimwaleeliwe ni waarya*+ wa ihapari sooreera soovuwa sa Kristu, yoowo ori eruku ya Muluku.+ 5 Okathi nnaalaleerya ahu atthu, hiyo khaninlavula myaha sahu, masi ninlavula myaha sa Yesu Kristu, ntoko Pwiya. Nave ninnihimya wiira na ipottha sanyu, mwaha wa Yesu. 6 Muluku tohimmye wiira: “Muthuko waarye mweepiphini”.+ Nto Muluku onnimwaleela mirima sahu+ ni osuwela wawe woovuwa, orumeelaka owiitho wa Kristu.

7 Masi, nookhalana muhakhu ola+ ori mmwaapuni wa oloko,+ wiira owerya onivikana wa mutthu, okhale wa Muluku, ohiya wawihu.+ 8 Khula mpantta sinniniphwanya mixankiho, masi khanimphunyiwa vahinwerya ahu weeteteya. Ninkhala ntoko nrootthukweliwa, masi ninnisuwela etthu yoowiira.*+ 9 Ninnilupatthiwa, masi khanninyanyaliwa.+ Ninniriheliwa vathi, masi khanimpwetexiwa.+ 10 Okathi wootheene ninnivilela ohaaxiwa ntoko Yesu aahaaxiwe awe,+ wiira-tho okumi wa Yesu wooniheriwe mookumini mwahu. 11 Hiyo ninnikhala akumi, masi okathi wootheene ninnihala okhwa+ mwaha wa Yesu, wiira okumi wa Yesu wooniheriwe mweerutthuni mwahu. 12 Nnaamwi nihalaka okhwa, eyo ennoophwanyihani okumi.

13 Vaalempwa wiira: “Miyo kihooniherya waamini, tivo kilavunle aka”.+ Nave, hiyo ninnooniherya wiira nookhalana waamini omosa-ru, tivo ninlavula ahu. 14 Ole omuhihimunxe Yesu, nave onrowa onihihimuxa wiira nakhaleke vamosa ni Yesu ni onooniroiha ohoolo wa Yesu.+ 15 Itthu iya sootheene muniireliwa nyuwo, wiira oreera murima wuulupale wa Muluku otepeke wuncerereya. Onnitepa wuncerereya okathi atthu anceene aninvuwiha aya Muluku,+ amuxukhurelaka.

16 Tivonto, hiyo khannitthikela ottuli. Hata irutthu sahu sihononeyaka, masi mirima sahu ni miyuupuwelo sahu, sinnikhalihiwa isya khula nihiku. 17 Tthiri, hata maxakha anniphwanya ari ene a* okathi vakhaani ni ahikhanle etthu, maxakha awo anniniiriha waakhela ovuwa, weiwo onitepa wunnuwa* ni ohinimala.+ 18 Hiyo khanimmakela wuupuwela itthu ninwerya ahu woona. Masi nnuupuwela itthu nihinwerya ahu woona,+ okhala wiira itthu sinooneya ti sa okathi vakhaani, masi itthu sihinooneya ti sa okathi ohinimala.

5 Hiyo noosuwela wiira empa ela ya vathi-va, eyo piiyo, etenta* ela, ehaana onyaanyiwa.+ Nto ninrowa ovahiwa ni Muluku empa enikhala okathi wootheene wiirimu, yeeyo ehitekiwe ni matata.+ 2 Okathi onikhala ahu empa ela ya vathi, ninniipulela, nave ninniphavela vanceene waakhela empa ahu ya wiirimu.+ Empa eyo, enrowa onikhuneela siisaale ikuwo, 3 wiira waphiya okathi onrowa ahu owara, nihiphwanyiwe nihiwanre etthu. 4 Tthiri, hiyo ninkhala etenta ela, ninniipulela ni ninnixanka, nihiphavelaka ohiya empa ela, siisaale mutthu onirula awe ikuwo. Masi nimphavela waakhela empa ya wiirimu,+ wiira okumi woohimala oranttele irutthu sahu sinikhwa.+ 5 Muluku, yoowo onivanhe ikuru sawe soowaarya ntoko etthu ennilipiherya+ wiira onoonivaha itthu sinirwa muhoolo,*+ oonilokiherya okumi ola.

6 Okathi wootheene ninniroromela vanceene nisuwelaka wiira okathi onikhala ahu ni erutthu ela,* ninnimurakamela Pwiya.+ 7 Hiyo nneettihiwa ni waamini, ohiya ni itthu sinoona ahu. 8 Masi hiyo ninniroromela vanceene, nave ninniphavela okhala ni Apwiya,+ ohiya okhala ni erutthu ela. 9 Tivonto, hata nikhalaka nuuwo aahiiso nihikhalaka nuuwo, noolakela ophavela omusiveliha okathi wootheene. 10 Tthiri, ootheene ahu ninrowa weemela* ohoolo wa nipuro Kristu oniphuka awe milattu, wiira khula mutthu oliviwe, sitthariwaka itthu opanke awe ori ene ni erutthu ntoko ya pinaatamu, sikhale itthu sooreera, aahiiso sootakhala.*+

11 Okhala wiira noosuwela ele enitaphulela aya owoova Apwiya, ninniwiiriha atthu onikupali, masi hiyo ninnisuweliwa oratteene ni* Muluku. Nto, kinnilipelela wiira mirima sanyu sihookhaliheryani onisuwela saana. 12 Hiyo khanimphavela otthikela wiittottopa, masi nimphavela wootumereryani wiira mwiittottopeke mwaha wa hiyo. Siiso, munoowerya owaakhula ale aniittottopa mwaha wa makhalelo aya anooneya,+ ohiya mwaha wa ele eri vamurimani. 13 Akhala wiira naahivahuwa,*+ naavahunwe mwaha wa Muluku. Akhala wiira muupuwelo ahu ti wooloka, owo ti wooloka mwaha wa nyuwo. 14 Ophenta wa Kristu tonnitumererya, okhala wiira etthu esuwenle ahu tiila: Mulopwana mmosa ohookhwa mwaha wa atthu ootheene,+ okhala wiira ootheene yaahikhwa. 15 Nave, owo ohookhwa mwaha wa atthu ootheene, wiira ale ari akumi, ahiisiveliheke mmansaya,+ masi amusiveliheke Kristu, yoowo okhwiiye mwaha wa atthu awo, ni ohihimuxiwe.

16 Okhuma niinaano-va orowa ohoolo, khaninwoona atthu nittharaka makhalelo anooneya.+ Hata akina a hiyo naamusuwenle Kristu nittharaka makhalelo anooneya, vano khaninwerya-tho opaka eyo.+ 17 Tivonto, akhala wiira mutthu ohiiraana ni Kristu, mutthu owo oopattuxiwa vasya ni Muluku.+ Itthu sa khalai soovira, masi sookhumelela itthu sa niinaano. 18 Masi itthu sootheene sinikhuma wa Muluku, yoowo oniirinhe otthikela waataana nuuwo omurumeelaka Kristu.+ Nave oonivaha muteko wa waakhaliherya akina otthikela waataana ni Muluku.+ 19 Eyo enitaphulela wiira owo onimurumeela Kristu wiira owiirihe atthu otthikela waataana ni Muluku,+ nave khonaaphukela mwaha wa itampi saya.+ Muluku owo oonivaha muteko wa waahimeerya atthu wiira anoowerya otthikela waataana nuuwo.+

20 Hiyo na anamitthaka+ nipuro na Kristu,+ okhalaka ntoko wiira Muluku onnirumeela hiyo wiira naalattule atthu. Ntoko atthu ari nipuro na Kristu, ninnaaxonttela atthu, niiraka: “Mutthikele waataana ni Muluku”. 21 Kristu khotonko ottheka,+ nave Muluku onvaha ntoko mukuttho mwaha wa itampi sahu. Siiso, mwaha wa yoowo nnoowerya okhala anaxariya vamaithoni va Muluku.+

6 Hiyo ninvara muteko vamosa ni Muluku.+ Nave ninnooxonttelani wiira muhaakhele oreera murima wuulupale wa Muluku, muhiirelaka ovarela etthu.+ 2 Muluku onihimya wiira: “Okathi wooreerela, miyo koowiiwani, nave nihiku na woopoliwa, miyo kaahookhaliheryani”.+ Mwiiwe! Vano ola tori okathi wootepexa oreerela. Mwiiwe! Vano nla ti nihiku na woopoliwa.

3 Hiyo khanniira etthu eniwiiriha akina ohiya waamini, wiira ohikhale mutthu onrowa oveeha muteko oninvarela ahu Muluku.+ 4 Mwa inamuna sootheene, hiyo ninniixooniherya okhala arumeyi a Muluku,+ mwaha woowi noovilela weehereriwa wa khula enamuna, maxakha, okathi woovela-veliha ni mixankiho.+ 5 Naahimaniwa, naahitthukweliwa,+ naahikumana ni mittitthi sootakhala, naahivara muteko woolipa, naahiviriha mahiku makina nihirumpe ohiyu ni naahivoliwa etala.+ 6 Nookhalana okumi wooloka, okumi ahu onivarihana ni osuwela, ninnipixa murima,+ hiyo na atthu ooreera murima,+ okumi ahu oneettihiwa ni ikuru soowaarya, ophenta wahu khahiyo woowoothererya.+ 7 Hiyo ninnilavula ekeekhai, ninlipa ni ikuru sa Muluku,+ nookuxa ikapwitthi sa exariya+ moono ahu woolopwana* ni woothiyana.* 8 Hiyo ninnivuwihiwa ni khaninttittimihiwa, ninniveehiwa ni ninnittottopeliwa. Ninnihimmwa okhala atthu anaawoka akina, masi hiyo ninlavula ekeekhai. 9 Ninnooniwa okhala atthu oohisuweliwa, masi Muluku onninsuwela. Ninkhala ntoko atthu ahanle vakhaani okhwa,* masi naakumi.+ Ninnooniwa ntoko atthu anivahiwa ehukhumu,* masi khaniiviwe.+ 10 Atthu anuupuwela wiira hiyo na atthu ooriipiwa murima, masi okathi wootheene ninnitteeliwa murima. Nnooniwa ntoko alipa-oohaawa, masi ninnaavaha atthu anceene itthu sinceene sooloka. Nnooniwa ntoko atthu ahirina etthu, masi nookhalana itthu sootheene.+

11 Axinnaka a oKorinto, ninlavula ni nyuwo nihivithaka etthu. Hiyo ninnoophentani ni murima wootheene tthiri.* 12 Hiyo khinoowalenleni mirima sahu,+ masi ti nyuwo muniwalenle mirima sanyu. 13 Kinilavula ni nyuwo ntoko anaaka, nto munithokoreryeke ntoko hiyo nnoothokoreryaahuni. Ni nyuwo-tho mutthukuleke vanceene mirima sanyu.+

14 Muhitakaahaneke ni ale ahinaamini.*+ Exariya enivarihana sai ni otakhala?+ Aahiiso, waarya onivarihana sai ni epiphi?+ 15 Ohiya-vo, niireke Kristu ni Satana*+ anniiwanana? Aahiiso, mutthu oowaamini* onivarihana sai ni mutthu ohinaamini?+ 16 Nave, etemplo ya Muluku enivarihana sai ni amuluku eethiru?+ Hiyo na etemplo ya Muluku mmosa mukumi,+ ntoko Muluku ohimmye awe wiira: “Miyo kinrowa okhala eriyari aya,+ kinrowa weettaka eriyari aya, kinrowa okhala Muluku aya, nave awo anrowa okhala atthu aka”.+ 17 “Yehova onihimya wiira: ‘Tivonto, mukhume eriyari aya, nvalaane naawo, ni muhiye ovara itthu soonanara’”;+ “‘miyo kinrowa owaakhelani’”.+ 18 “Yehova, Muluku Oowerya Sootheene, onihimya wiira: ‘Miyo kinrowa okhala tiithi inyu,+ nave nyuwo munrowa okhala anaaka axilopwana ni anaaka axithiyana’”.+

7 Tivonto, axinnaka oophentiwa, okhala wiira Muluku oonileiherya+ itthu iya, niirapihe, nikumihaka itthu sootheene sinnanariha erutthu ahu ni murima ahu.+ Nitepeke waarya nimoovaka Muluku.

2 Munitthukulele murima anyu.+ Khuuvo nimutthekenle ahu, khuuvo nimukumihenrye ahu muxankiho, nave khuuvo ninwonke ahu wiira niphwanye mureerelo.+ 3 Nkinihimya itthu iya wiira koolamuleni. Tthiri, kihoohimeeryani khalai ene wiira nyuwo muri vamurimani vahu, wiira nikhwe hoothe ni nikhale akumi hoothe. 4 Miyo kinnilavula ni nyuwo kihivithaka etthu. Kinniittottopa vanceene mwaha wa nyuwo. Koolipihiwa vanceene. Kinnitepa otteeliwa murima moohaawani mwahu mootheene.+

5 Mweekeekhai, okathi naaphiyale ahu oMasedonia,+ khinaamumunle, masi nlelo naanixanka mwa inamuna sootheene. Atthu yaaninivaanyiha, nave naanixanka mwaha wa miloko. 6 Masi Muluku, yoowo onaahakalaliha ale ariipiwe murima,+ aahinihakalaliha ni orwa wa Tito. 7 Ohiya paahi mwaha wa orwa wawe, masi mwaha woowi ootthika olipihiwe ene mwaha wa nyuwo. Owo oonileela wiira munniphavelasa okiweha ni wiira mooriipiwa murima ni munnixanka* mwaha wa miyo. Nto eyo ennincererya otteeliwa waka murima.

8 Hata muriipiwe ene murima mwaha wa epaphelo aka,+ miyo nkinthanana. Woopaceryani, kaahiriipiwa murima mwaha wa wooriipihani murima. Masi koosuwela wiira oriipiwa wanyu murima waari wa okathi vakhaani. 9 Vano kootteeliwa murima, ohiya mwaha woowi mwaahiriipiwa murima, masi mwaha woowi eyo yoowiirihani orukunuxa murima. Oriipiwa wanyu murima onnivarihana ni ele Muluku oniphavela awe. Nto eyo ehookhaliheryani. Tivonto, itthu noohimenryaahuni, khisookumihenryeni muxankiho. 10 Oriipiwa murima onimusivela Muluku, onnikumiherya orukunuxa murima, weiwo onimwiiriha mutthu woopowa, ohithananaka.+ Masi, oriipiwa murima wa olumwenku ola, onnikumiherya okhwa. 11 Vannooneya wiira mwaahiriipiwa murima ntoko Muluku oniphavela awe, nave mwaha wa yeeyo, nyuwo muhiimananiha opaka etthu yooloka. Mooreeriha masina anyu, mwaahinyoonyiwa mwaha wa etthu yoohiloka yaapakiwe, moomoova Muluku, moophavela orukunuxa murima, moomurumeela Muluku ni murima wootheene, moolokiherya etthu yoohiloka yaapakiwe.+ Moopaka oratteene itthu sootheene wiira mphuke mwaha ola. 12 Vano, koolepelakani epaphelo, nkilempe mwaha wa ole opanke etampi,+ nnakhala mwaha wa ole otthekeliwe. Masi, kilempe wiira kiwehe akhala wiira munimooniherya ohoolo wa Muluku, wiira munniphavela oniwiriyana. 13 Tivonto nlipihiwe ahu.

Hiyo nootepa otteeliwa murima mwaha wa otteeliwa murima wa Tito, okhala wiira ootheene anyu moomulipiha. 14 Miyo kihiittottopa ohoolo wa Tito mwaha wa nyuwo, nto nkiittottompe mahala ene. Wiittottopa wahu ohoolo wa Tito ti weekeekhai, siisaale itthu sootheene noohimenryaahuni siri aya seekeekhai. 15 Nave-tho, owo onnitepa woophentani, okathi onuupuwela awe moota ootheene anyu muniiwelela anyu,+ ni moota mmwaakhenle anyu ni nttittimiho nuulupale. 16 Kinnitteeliwa murima okhala wiira pooti woororomelani* mwa inamuna sootheene.

8 Axinnaka, vano nimphavela woosuwelihani etthu miloko sa oMasedonia+ sinipaka aya mwaha woowaakhela oreera murima wuulupale wa Muluku. 2 Okathi yeehereriwa aya vanceene ni mixankiho suulupale, awo yaahooniherya otteeliwa murima ni yaahooniherya okhala atthu oovaha, nnaamwi yaari ootepa ohaawa. 3 Miyo kinnaakhalela onamoona wiira yaahivaha ntoko yaawerya aya,+ hata ovikana yaawerya aya.+ 4 Ikwaha sinceene, awo yaaninixonttela wiira naavahe eparakha ya ovaha etthu ni murima wootheene, ni waakhaliherya ale oororomeleya.*+ 5 Nave yaahipaka ovikana ele naalipelela ahu, epaceryaka waarumeela ni murima wootheene Apwiya hoothe ni hiyo, ettharaka ele Muluku oniphavela awe. 6 Eyo yaahiniiriha omutumererya Tito+ wiira omalihe muteko aapacenrye awe eriyari anyu, eyo piiyo, okuxa soovaha munivaha anyu muhakalanle ene. 7 Nyuwo munniira saana itthu sootheene. Waamini wanyu ti woolipa. Munniwerya olavula. Osuwela wanyu ti woowaatta. Munniimananiha opaka itthu sootheene. Munnaaphenta tthiri atthu akina, ntoko hiyo nnoophentaahuni. Siiso, muthipeleleke ophavela ovaha mwa enamuna eyo.+

8 Miyo nkinilavula eyo ntoko yooruma, masi kimphavela wiira musuwele wiimananiha ni ophavela orina aya atthu akina. Nave kiniphavela woona vakhala wiira ophenta wanyu ti weekeekhai. 9 Tthiri, nyuwo munnisuwela oreera murima wuulupale wa Pwiya ahu Yesu Kristu, yoowo nnaamwi aari oothaaciri, aahiikhaliha masikhini mwaha wa nyuwo,+ wiira nyuwo muthaaciri mwaha wa ohaawa wawe.

10 Nave, moonelo aka tuula:+ Ovara muteko ola, onnoophwanyihani mureerelo, okhala wiira mmwaisana, mwaahipacerya muteko ola, ohiya-vo, mwaahooniherya ophavela wanyu opaka eyo. 11 Vano, mmalelihe muteko mpacenrye anyu ovara. Siiso, munoomaleliha muteko owo, muttharihaka ele erina anyu, ntoko mwaalakenle anyu khalai ene. 12 Tthiri, Muluku vannimusivela vanceene naavahaka ni murima wootheene, maana onilipelela wiira mutthu ovaheke ele eniwerya awe,+ ohiya ele ehiniwerya awe. 13 Miyo nkiniphavela okhweiherya okumi wa atthu akina, nto khiyaxankiha okumi anyu. 14 Okathi ola, okhalana wanyu itthu sinceene onookhaliherya othoiwa waya. Mwiiraka siiso, okhalana waya itthu sinceene onookhaliherya othoiwa wanyu. Siiso, ootheene anyu munrowa olikanaka. 15 Ti siiso valempwale aya wiira: “Mutthu orina itthu sinceene, khotempe okhalana itthu sinceene, nave mutthu orina itthu vakhaani, khotempe okhalana itthu vakhaani”.+

16 Ninnimuxukhuru Muluku, okhala wiira Tito onnoothokoreryani ntoko hiyo nniira ahu.+ 17 Owo oheemererya ele naamulenle ahu, masi-tho, aaniphavela tthiri opaka ele nanvekenle ahu, tivo oolakela orwa wa nyuwo. 18 Vamosa ni Tito, ninnimuruma munna yoowo onittottopeliwa ni miloko sootheene, mwaha wa olaleya ihapari sooreera. 19 Ohiya-vo, owo oothanliwa ni miloko wiira neetteke mikwaha hoothe, niroihaka soovaha iya, seiyo ninrowa ahu okawa wiira Apwiya avuwihiwe ni nooniherye wiira ninniphavela waakhaliherya akina. 20 Siiso, ninnisyaka olavuliwa voohiloka, mwaha wa moota ninkhapelela ahu itthu iya sinivahiwa ni murima wootheene.+ 21 Tthiri, hiyo ‘ninnikhapelela itthu sootheene moororomeleya, ohiya paahi vamaithoni va Yehova, masi-tho vamaithoni va atthu’.+

22 Nave, ninnimuruma munnihu hoothe naawo, yoowo ikwaha sinceene nimweerenrye ahu, niweha wiira onnikhalela nthiti myaha sinceene. Vano onnitepa okhalela nthiti, okhala wiira onnoororomelani vanceene. 23 Yakhala atthu anikoha wiira Tito ti pani, mwaaleele wiira owo onivara muteko vamosa ni miyo wiira nookhaliheryeni. Nave-tho, yakhala atthu anikoha wiira axinna ala tani, mwaleele wiira awo arummwa a miloko, nave anninvuwiha Kristu. 24 Nto, nwooniherye axinna awo wiira munnaaphenta ni murima wootheene.+ Nave, nwooniherye atthu a mmulokoni, ele eniirinhe wiittottopa mwaha wa nyuwo.

9 Nilavulaka sa muteko woowaakhaliherya ale oororomeleya,*+ tthiri khivaniprisari woolepelani, 2 okhala wiira koosuwela wiira munniphavela okhaliherya. Miyo kinniittottopa ohoolo wa amasedonia mwaha wa nyuwo. Kihaahimeerya wiira, mwa eyaakha ntero, nyuwo a wAkhaya, moolikana wiira mukhaliherye. Mwaha wa ophavela wanyu vanceene okhaliherya, woowiiriha amasedonia anceene ophavela-tho okhaliherya. 3 Vano kinnaaruma axinna orwa iwo, wiira nihiittottope mahala ene, mwaha wa ophavela wanyu okhaliherya ni wiira mphaveleke okhaliherya, ntoko kaahimenrye aka wiira mwaarowa okhaliherya. 4 Vaahikhale siiso, woonasa wene amasedonia animoorwa ni miyo, yoophwanyeeni muhilikanne. Nto, hiyo nnimuuliwa muru mwaha woowoororomelani. Nave-tho, nyuwo munimuuliwa muru. 5 Tivo, kihoona oreerela waatumererya axinna, ni kihaahooliha wiira arwe wa nyuwo. Siiso, okathi ninrowa ahu ophiya iwo, nnoophwanya soovaha iyo silikanne ene. Nto eyo enimooniherya wiira munivaha ni murima wootheene, ohiya mwaha wookhanyereriwa.

6 Kilavulaka sa mwaha ola, ole onaala ipyo vakhaani, onihepha vakhaani, masi ole onaala ipyo sinceene, onihepha vanceene.+ 7 Khula mutthu iireke ntoko olakenle awe vamurimani vawe, ohiya opaka eyo ohiphavelaka aahiiso okhanyereriwaka,+ okhala wiira Muluku onnimphenta ole onivaha murima omuttenle ene.+

8 Ohiya-vo, Muluku ookhalana owerya wa owooniheryani oreera wawe murima wuulupale, wiira ehikhale etthu enoothowani, masi mukhalane voowaatta itthu sootheene muniphavela anyu, wiira nvare miteko sootheene sooreera.+ 9 (Vaalempwa wiira: “Owo onnikawa voowaatta itthu orina awe; onnaavaha alipa-oohaawa. Exariya awe ennikhala mahiku ootheene”.+ 10 Vano Muluku, yoowo oninvaha ipyo soowaatta mulipa-oowaala ni onaavaha ephaawu atthu wiira ekhuureke, onrowa woovahani ipyo wiira mwaale ni onrowa wuncererya. Nave onimuncererya itthu munrowa anyu ohepha, mwaha wa miteko sanyu sa xariya.) 11 Muluku ohooreelihani vanceene, wiira nyuwo nweryeke ovaha vanceene. Atthu anrowa omuxukhuruku Muluku mwaha wa yoovaha anyu, yeeyo enrowa ahu waavahaka atthu akina. 12 Tthiri, muteko ola wa waakhaliherya atthu, khonaaphwanyiha mureerelo ale oororomeleya*+ paahi, masi-tho onniwiiriha atthu anceene omuxukhurela Muluku. 13 Mwaha wa etthu ela nvahale anyu, munimooniherya omutthu anyu. Nave awo anonvuwihaka Muluku okhala wiira munneettela ihapari sooreera sa Kristu munilaleya anyu, nave mwaha woowi munnaakhaliherya arumeyi oororomeleya* ni atthu ootheene.+ 14 Nave-tho, awo animoophentani ni wooxonttelelani wa Muluku, mwaha woowi oreera murima wuulupale wa Muluku, ori ni nyuwo.

15 Nimuxukhureleke Muluku, mwaha wa etthu yootepa oreera ovahale awe, yeeyo ehiniwerya ahu otthokiherya.

10 Vano, miyo Paulo, kinniphavela tthiri wiira mutthareke itthu koohimenryaakani. Kinilavula ni nyuwo kimutakihaka Kristu,+ yoowo ori oowiiyeviha ni ooreera murima. Masi akina a nyuwo anihimya wiira kakhala eriyari anyu,+ kinikhala mutthu oowiiyeviha, masi ipaphelo kinoolepelaakani, kinilavula vooluluwanya.+ 2 Kinlipelela wiira okathi kinrowa aka ophiya iwo, ale anuupuwela wiira nintthara makhalelo a erutthu, anrowa wiiraka aturunke ene muupuwelo aya, wiira kihaapwapwele vanceene. 3 Nnaamwi nikhalaka olumwenku ola, hiyo khaninwana ekhotto ntoko aniira aya atthu a olumwenku ola. 4 Ikapwitthi sa ekhotto ahu, khahiyo seiye sinirumeeliwa ni atthu a olumwenku ola.+ Masi Muluku tonivanhe,+ wiira nipwexeke itthu soolipexa, seiyo sinlikana ni ipa soolipa. 5 Hiyo ninnipwexakasa miyuupuwelo sootheene ni itthu sootheene sinaakhoottiherya atthu omusuwela Muluku.+ Siisaale ntoko mutthu otthukweliwe, hiyo ninnitthukwela miyuupuwelo sootheene, wiira simwiiweleleke Kristu. 6 Nave noolikana wiira nimuhukhumu khula mutthu ohiniiwelela,+ nuumala nyuwo wooniherya wiira munniiwelela mwa itthu sootheene.

7 Nyuwo muniweha itthu ntoko sinooneya aya. Akhala mutthu onilavula ohihoveryaka wiira owo murumeyi a Kristu, ohaana wuupuwela etthu ela: Siisaale owo ori awe murumeyi a Kristu, hiyo-tho na arumeyi a Kristu. 8 Apwiya aanivaha owerya wiira nlipihe waamini wanyu, ohiya opwetexa.+ Hata kiittottopaka vanceene mwaha wa owerya iwo nivahiwe ahu, miyo nkinrowa wuuliwa muru. 9 Nkiniphavela owiirihani woonaka wiira kiniphavela owoopopihani ni ipaphelo kinoolepelaakani. 10 Atthu akina anihimya wiira: “Ipaphelo sawe ti soolipa ni sookhalana owerya, masi owo akhala ni hiyo khonoopiha, nave moolumo awe kharina efaita”. 11 Masi, ale anihimya siiso ahaana osuwela wiira, itthu nnihimya ahu* mpapheloni mwahu nihikhanle weiwo, ti seiyo ninrowa ahu opaka* nakhala weiwo.+ 12 Hiyo khanimphavela wiihela ekurupu emosa-ru ya atthu oowiittottopa, nnakhala olikana naawo. Atthu awo anniiphukela attharihelaka ele aneene anihimya aya okhala yooreera.+ Nto, annooniherya wiira kharina ankhili.+

13 Vano, hiyo nnimwiittottopa, masi nihivikanaka mukano. Ninrowa wiittottopa paahi mwaha wa ele eniwerya ahu opaka, mmutekoni nithanleliwe ahu ni Muluku. Nave nyuwo muniirela mpantta muteko owo nithanleliwe ahu.+ 14 Mweekeekhai, okathi naari ahu ni nyuwo, khinaapanke etthu Muluku ahaanirumme awe. Masi ti hiyo naapacenrye woolaleeryani ihapari sooreera sa Kristu.+ 15 Hiyo khanniittottopa ovikana mikano nithanleliwe ahu, eyo piiyo, khanniittottopa mwaha wa miteko sa atthu akina. Ninlipelela wiira okathi waamini wanyu onrowa aya wunnuwaka, muteko ahu onrowa wunnuwaka mmuttettheni mwahu. Siiso, muttetthe ninrowa ahu ovaraka muteko, onootepaka wunnuwa. 16 Vano, hiyo nnoowerya olaleya ihapari sooreera mittetthe sirakamenle muttetthe anyu, wiira nihiittottope mwaha wa muteko ovariwe ni atthu akina mmuttettheni athanleliwe aya. 17 “Masi ole oniittottopa, iittottopeke mwaha wa Yehova”.*+ 18 Muluku khonimweemererya ole oniittottopa mmansawe,+ masi Yehova tonimuthanla mutthu onimweemererya awe.+

11 Hata miyo kikhalaka ntoko mulolo, kaaniphavela wiira mukivilele. Mweekeekhai, nyuwo munnikivilela! 2 Miyo kinniwunlelani ehace,* ntoko Muluku oniwunlelaaweni ehace, okhala wiira kihooleiheryani woothelihani mulopwana mmosa, Kristu. Vano, kimphavela woovahereryani yoowo, ntoko mwali.*+ 3 Kinnoova wiira siisaale enowa yanwonke aya Eva ephavelaka omuhapuxa,+ mutthu mukina pooti ohonona muupuwelo anyu, owiirihakani ohiroromeleya ni okhala oohiloka. Masi, ole onimutthara Kristu ohaana okhala oororomeleya ni ooloka.+ 4 Mweekeekhai, arwa mutthu onoolaleeryani Yesu mukina, ohikhanle ole noolalenryaahuni, aahiiso akhala wiira muupuwelo anyu onimweettihiwa ni ikuru sikina, sinivirikana ni ikuru seiye seettiha muupuwelo anyu, wala arwa mutthu onoolaleeryani ihapari sooreera, sihikhanle iye mwaakhenle anyu,+ nyuwo munneemererya itthu iyo. 5 Miyo kinoona wiira khiivo etthu enooniherya wiira ka mwaamukhaani ohoolo wa arummwa anyu, yaawo aniixoona okhala ootepa oloka.+ 6 Masi, hata kihirattelaka olavula,+ miyo kinnimusuwela Muluku. Tthiri, hiyo noowooniheryani eyo mwa itthu sootheene.

7 Miyo koohakalala woolaleeryani ihapari sooreera sa Muluku, kihoovekelakani etthu. Vano, kiireke koottheka mwaha wa wiikhaliha mukhaani wiira nyuwo nvuwihiwe?+ 8 Kiheemererya okhaliheriwa ni miloko sikina, nto eyo enlikana ni owiiyerya wiira koorumeeleni nyuwo.+ 9 Tthiri, okathi kaari aka ni nyuwo ni kahaarina aka etthu, khuuvo mutthu kanvekenle aka etthu, okhala wiira axinna yaakhuma oMasedonia, yaahikikhaliherya ni itthu sootheene saakithowa.+ Mweekeekhai, kaahiimananiha ohoovekelani etthu. Nto eyo ti etthu kiniimananiha aka opaka.+ 10 Siisaale kinimutthara aka Kristu, khiivo etthu enrowa okikhoottiherya wiittottopa mwaha wa etthu ela,+ mittetthe sootheene sa wAkhaya. 11 Xeeni kiheemerenrye aka ovahiwa etthu ni nyuwo? Kiireke nkinoophentani? Muluku onnisuwela wiira kinnoophentani.

12 Ahaavo atthu aniittottopa ni anihimya wiira awo arummwa ntoko hiyo. Nto, nkinihiya opaka ele enimakela aka opaka,+ wiira atthu awo ehikhalane etthu enrowa owiiriha wiittottopa. 13 Tthiri, atthu awo ti arummwa oowootha, anamuteko oowoka, yaawo anoothererya okhala arummwa a Kristu.+ 14 Eyo khahiyo etthu enkitikiniha, okhala wiira hata Satana, onnoothererya okhala nlaikha noowaarya.+ 15 Tivonto, khivannitikiniha oweha wiira arumeyi awe annoothererya okhala anaxariya. Masi emalelo aya, enrowa ovarihanaka ni miteko saya.+

16 Kinnihimya-tho wiira: Ohikhale mutthu onuupuwela wiira ka mulolo. Masi vakhala wiira munnuupuwela siiso, mukeemererye ntoko mulolo, wiira miyo-tho kiittottopeke vakhaani. 17 Ele enilavula aka ntoko mutthu oowiittottopa ni oowiiroromela, nkinilavula kittharaka ntakiheryo na Apwiya, masi kinilavula ntoko mulolo. 18 Okhala wiira atthu anceene anniittottopa mwaha wa itthu sa olumwenku ola,* ni miyo-tho kinrowa wiittottopa. 19 Okhala wiira nyuwo munihimya wiira, “hiyo khanihiyo alolo”, xeeni munisiveliwa anyu waavilela alolo? 20 Tthiri, nyuwo munninvilela ole onookhalihani epottha, onikuxa mireerelo sanyu ni itthu murina anyu, ole oniittottopa ohoolo wanyu ni ole onoomanani owiitho.

21 Vanninuuliha muru ohimya siiso, okhala wiira akina a nyuwo pooti onoonaka okhala atthu oolosowa, vahinwerya ahu orumeela saana okhulupale ahu.

Masi akhala wiira atthu akina khanoovelela wiittottopa ni miyo-tho nkinoovelela wiittottopa, hata kooniwaka okhala mulolo. 22 Niireke atthu awo aheeperi? Ni miyo-tho ka muheeperi.+ Niireke atthu awo aisarayeli? Ni miyo-tho ka mwisarayeli. Niireke atthu awo osuulu wa Abrahamu? Ni miyo-tho ka osuulu wa Abrahamu.+ 23 Niireke awo arumeyi a Kristu? Kinaakhula ntoko namukhwa-anepa,* wiira miyo kootepexa okhala murumeyi a Kristu waavikana awo, okhala wiira koovara muteko munceene waavikana awo,+ kootthukweliwa ikwaha sinceene waavikana awo,+ koomaniwa ikwaha soohikontareya ni ikwaha sinceene kaahala vakhaani okhwa.+ 24 Ayuda aakimana ikwaha thanu. Khula ekwaha yaakimana aya, awo yaanikiwaxula imaara 39.*+ 25 Koomaniwa ni ikopo ikwaha tthaaru,+ koovonyakasiwa maluku ekwaha emosa,+ yookikhumelela ehasara ni pakiti mphareya ikwaha tthaaru,+ kooviriha ohiyu omosa ni othana omosa mphareya. 26 Kiheetta mikwaha sinceene, kookumana itthu soowoopiha mmuro, eriyari ya alatarau, eriyari ya atthu+ a nloko naka ni atthu a maloko makina,+ mpooma,+ moothakoni, mphareya, eriyari ya axinna oowootha. 27 Koovara muteko woolipa ni wookhulumula, kooviriha mahiku manceene kihirupaka ohiyu,+ kaahivoliwa etala ni ntthona,+ ikwaha sinceene nkaarina etthu yoolya,+ kaaniriiriwa ni nkaarina etthu yoowara.*

28 Ohiya paahi itthu iya, khula nihiku kaanixanka mwaha wa miloko.+ 29 Mutthu mukina atteettheya, miyo kinnixanka. Mutthu mukina akwattulihiwa,* khuhiya waamini, miyo kinninanariwa vanceene.

30 Vakhala wiira kihaana wiittottopa, kinrowa wiittottopa mwaha wa itthu sinooniherya wiira ka mutthu ootteettheya. 31 Muluku, Tiithi awe Pwiya ahu Yesu, yoowo onireerela ottottopeliwa mahiku ootheene, onnisuwela wiira nkinootha. 32 Vano, oDamaasiko, kuvernatoro aalamulela okathi Areta aari awe mwene, aahaapweha makwarta vamukhora wa epooma, wiira ekivare. 33 Masi axinna yaahikihela muttankani,* akiviriha vaxanelani ya exiri ya epooma,+ akikuruxela vathi. Nto kaahoopowa.

12 Miyo kihaana wiittottopa. Tivo, kinrowa olavula itthu kooniheriwe aka+ ni Apwiya+ ni moolumo akivanhe aya, nnaamwi eyo ehirowaka okikumiherya mureerelo. 2 Kinnimusuwela mulopwana mmosa, yoowo aari murumeyi a Kristu. Iyaakha 14 sivinre, aahikuxiwa niinaano-ru oroihiwaka erimu ya neeraru. Miyo nkinsuwela vakhala wiira aakuxiwe ni erutthu awe aahiiso ohirina erutthu awe, masi Muluku tonisuwela. 3 Aayo, miyo kinnimusuwela mulopwana owo. Owo aahikuxiwa niinaano-ru oroihiwaka oparayiisu. Nkinisuwela akhala wiira aakuxiwe ni erutthu awe aahiiso ohirina erutthu awe, masi Muluku tonisuwela. 4 Ori ene oparayiisu, mulopwana ole aahiiwa moolumo ahinlavuliwa ni ahinireerela mutthu olavula. 5 Miyo kinimwiittottopa mwaha wa mulopwana owo, masi nkinrowa wiittottopa mmansaka, vahikhanle paahi mwaha wa ohilipa waka. 6 Tthiri, hata kaaphavela wiittottopa, nkaarowa okhala mulolo, maana kaarowa olavula ekeekhai. Masi nkinipaka eyo wiira ohikhale mutthu onrowa otepa okittottopela, ovikana ele onikiwehana awe aahiiso onikiiwa awe, 7 mwaha wa itthu sootikiniha suulupale kooniheriwe aka.

Vano, wiira kihitepeke wiittottopa, yookhala etthu enimakela okixankiha, yeeyo enlikana ni mwiiwa oheliwe mweerutthuni mwaka.+ Eyo eri ntoko nlaikha na Satana, wiira nimakeleke okimana ni kihitepeke wiittottopa. 8 Kihaaxonttela Apwiya ikwaha tthaaru wiira etthu ela ekikhume. 9 Masi awo yaahikaakhula wiira: “Vanniphiyerya wooreerelani waka murima vaalupale, okhala wiira owerya waka onnitepa olipa, okathi muhinlipa anyu”.+ Nto, kinrowa wiittottopa voohakalala mwaha wa ohilipa waka, wiira owerya wa Kristu okhaleke vasulu vaka ntoko etenta.* 10 Siiso, vannikisivela ohilipa-lipa, oruwaniwa, othoiwa, olupatthiwa ni okhalana mixankiho, mwaha wa Kristu. Mweekeekhai, okathi kihinlipa aka, vaavo-nto kintepa aka olipa.+

11 Miyo kookhala ntoko mulolo mwaha wa nyuwo. Nyuwo mookikhanyererya okhala siiso, maana khamulavunle itthu sooloka kipanke aka. Miyo nkihiyo mwaamukhaanixa waavikana arummwa anyu, yaawo anikhala ntoko toolokexa, hata nyuwo muhikoonaka okhala etthu.+ 12 Tthiri, koowooniheryani ithoonyeryo sinooniherya wiira ka murummwa. Koopaka eyo ni ovilela wuulupale+ ni ithoonyeryo ni miiriirya ni miteko sootikiniha.+ 13 Etthu emosa paahi ewiirihaleni okhala ooyeva ovikana miloko sikina, tiila: Khiivo etthu koovekenlyaakani. Kiireke koottheka mwaha wa etthu eyo?+ Akhala wiira ti siiso, weeso mukilevelele.

14 Mwiiwe! Ela ekwaha ya neeraru kiilokihenrye aka wiira kirwe kooxukuryeni, nave nkiniphavela woovekelani etthu. Miyo nkiniphavela okhalana mireerelo sanyu,+ masi kiniphavela woowehani. Atthu khanlipelela wiira anamwane+ yaasukeryeke mihakhu axipapaya ni aximamaya, masi axipaapa ni aximaama, tanaasukerya mihakhu anaaya. 15 Miyo kinoohakalala omaliha itthu sootheene kirina aka mwaha wa nyuwo,+ hata okumi aka. Niireke nkiniphwanela ophentiwa vanceene ni nyuwo, siisaale kinoophentaakani? 16 Masi, nnaamwi kihoovekenleni etthu,+ nyuwo munihimya wiira “kihoowokani” ni kihoovarani “muntaphani”. 17 Kiireke koottottela mureerelo itthu sanyu, kaarumeelaka ale kaarumme aka orwa wa nyuwo? 18 Koomutumererya Tito orwa wa nyuwo, ori ene ni munna ole mukina. Niireke Tito oottottela mureerelo itthu sanyu?+ Nnaari! Hiyo nihooniherya okhala oowiiraana, kiira? Nave hiyo ninnipaka itthu simosa-ru, khahiyo siiso?

19 Woonasa wene, nyuwo munuupuwela wiira hiyo nnimwiixaakiha, masi khahiyo siiso. Ohiya-vo, ntoko atthu animutthara Kristu, hiyo ninnilavula ekeekhai vamaithoni va Muluku. Axinnaka oophentiwa, itthu sootheene nimpaka ahu, nniirela woolipihani. 20 Tthiri, kinnoova wiira karwa ori anyu, kinrowa woophwanyani ni mweettelo woovirikana ni ole kaaphavela aka. Nave moonelo aka onrowa okhala woovirikana ni ole mwaaphavela anyu. Masi, kinnoova ophwanya onyakulihana, nrima, oviruwa, okawanyeya, wootheryana, waapana, wiixinnuwiha ni ohiiwanana. 21 Woonasa wene, okathi kinitthikela aka iwo, Muluku aka onookiiriha wuuliwa muru eriyari anyu. Pooti wiira kinooriipiwa murima okhala wiira atthu anceene kharukununxe murima mwaha wa itampi apanke aya khalai. Awo khaturunke muupuwelo aya wa opaka itthu soohiloka, orupihana woohiloka* ni okhalana mweettelo woohiloka onooniherya ohuuliwa muru.*

13 Ela ekwaha ya neeraru kiniilokiherya aka wiira kirwe wooxukuryani. “Khula mwaha ohaana ophukiwa yakhumelela anamoona anli aahiiso araru ahimyaka etthu emosa-ru”.+ 2 Niinaano-va nkikhanle ni nyuwo, masi enihimya aka vano, mooneke ntoko kootthikela wooxukuryani ekwaha ya nenli. Nto, kinnaalopola ootheene ale yaatthenke khalai, vamosa ni atthu akina, wiira katthikela weiwo, kinimwaattaruxa atthu ootheene, 3 okhala wiira muniphavela ethoonyeryo yoowi Kristu onnilavula okirumeelaka miyo. Nave, Kristu owo khahiyo oohilipa eriyari anyu. Masi owo onnooniherya owerya wawe wuulupale. 4 Mweekeekhai, owo aahiiviwa vamwirini ntoko pinaatamu oohilipa, masi ookhalihiwa mukumi mwaha wa owerya wa Muluku.+ Tthiri, hiyo-tho vamosa nuuwo, khanilimpe. Masi, nnookhala akumi vamosa nuuwo,+ mwaha wa owerya wa Muluku, weiwo ori ni nyuwo.+

5 Okathi wootheene mwiiweheke akhala wiira nlelo munneettela waamini. Mwiivareryeke wiira musuwele omutthu anyu.+ Aahiiso, niireke khamunsuwela wiira Yesu Kristu ohiiraana ni nyuwo? Mwaahaana osuwela, vahikhanle wiira murookhoottiwa. 6 Tthiri, miyo kinlipelela wiira munoosuwela wiira khanikhoottiwe.

7 Vano, hiyo ninninvekela Muluku wiira muhipake etthu yootakhala. Khanimpaka eyo wiira nooniweke okhala ntoko atthu ooweemereriwa. Masi nimpaka eyo wiira nvareke itthu sooloka, hata hiyo nooniwaka okhala ntoko atthu akhoottiwe. 8 Hiyo khaninwerya opaka etthu enivirikanya ekeekhai, masi ninkhaliherya ekeekhai. 9 Mweekeekhai, hiyo ninnitteeliwa murima okathi wootheene ninkhala ahu oohilipa, masi nyuwo munakhala oolipa. Nto etthu enivekela ahu, tiila: Mpakeke marukunuxo anireerela. 10 Tivonto kinlepa aka itthu iya kihikhanle weiwo, wiira kakhala weiwo, kihitepane orumeela okhulupale Apwiya akivanhe aya.+ Awo aakivaha okhulupale owo wiira kaalipiheke atthu, ohiya waapwetexa.

11 Siiso, axinnaka, muhihiyeke otteeliwa murima, opaka marukunuxo anireerela, olipihiwa,+ okhalana muupuwelo mmosa-ru+ ni okhala ni murettele.+ Nto, Muluku oophenta ni a murettele,+ onrowa okhalaka ni nyuwo. 12 Mukohaneke ihaali, nvahanaka epeexo.* 13 Ootheene ale oororomeleya,* annookhomasani.

14 Ootheene anyu mwaakhele oreera murima wuulupale wa Pwiya Yesu Kristu. Nave mukhalane ophenta wa Muluku ni mukhalane ikuru soowaarya, seiyo ootheene anyu munittottela anyu mureerelo.