EPAPHELO PAULO AALEPENLE AWE AKALAASIA

1 Miyo murummwa Paulo, kinnoolepelani nyuwo. Khuuvo pinaatamu okithanlale wiira kikhale murummwa, masi kithanliwe ni Yesu Kristu+ vamosa ni Muluku, Tiithi ihu,+ yoowo omuhihimunxe Yesu owo mookhwaani. 2 Tthiri, miyo Paulo vamosa ni axinna akina oowaamini ari vamosa ni miyo, ninnoolepelani nyuwo, a miloko sa oKalaasia:

3 Oreera murima wuulupale ni murettele wa Muluku Tiithi ihu ni wa Pwiya ahu Yesu Kristu, okhale ni nyuwo. 4 Kristu ohiivahererya mwaha wa itampi sahu,+ wiira onaakiherye olumwenku ola* wootakhala,+ ntoko oniphavela awe Muluku, Tiithi ihu.+ 5 Muluku owo ovuwihiwe mahiku ootheene. Amen.

6 Kinnitikinihiwa okhala wiira niinaano-ru moomuhiya Muluku, wiira mweemererye enamuna ekina ya ihapari sooreera.+ Nto Muluku owo taawiihanneni orumeelaka oreera murima wuulupale wa Kristu. 7 Khahiyo wiira sirookhala ihapari sikina sooreera. Masi aakhala atthu akina aniphavela woohapuxani+ ehononaka ihapari sooreera sinimuhimya Kristu. 8 Nto, hata hiyo aahiiso nlaikha na wiirimu, noolaleeryakani ihapari sooreera sinivirikana ni ihapari sooreera noolalenryaahuni, mutthu owo otakhaliwe. 9 Ntoko naahimmye ahu khalai, kinnihimya-tho wiira: Ole onoolaleeryani ihapari sooreera sinivirikana ni iye mwaakhenle anyu, mutthu owo otakhaliwe.

10 Miyo nkiniphavela weemereriwa ni atthu, masi kiniphavela weemereriwa ni Muluku. Tivo, nkineererya waasiveliha atthu. Vaakhanle wiira nlelo kinaasiveliha atthu, nkaarowa okhala murumeyi a Kristu. 11 Axinnaka, kiniphavela woosuwelihani wiira ihapari sooreera koolalenryaakani khasinikhuma wa apinaatamu,+ 12 okhala wiira khahiyo apinaatamu akivanhe ihapari iyo. Nave nkiixuttihiwe ni apinaatamu, masi Yesu Kristu, tokisuwelinhe.

13 Ntoko munisuwela anyu, okathi keettela aka etiini ya ayuda,+ miyo kaanilupattha vanceene* muloko wa Muluku, nave kaanipaka itthu sinceene sootakhala wiira kimala-malihe muloko owo.+ 14 Miyo kaanitepa orowa ohoolo etiini ya ayuda, waavikana atthu akina a elapo aka naalikana ahu iyaakha. Nave kaanitepa okhalela nthiti otthara soolema sa amuhavinre aka.+ 15 Vano, Muluku, yoowo okithanlale kihinatthi oyariwa ni okiihanne orumeelaka oreera wawe murima wuulupale,+ aahoona oreerela 16 okisuweliha Mwanawe, wiira kaalaleerye ale ahikhanle ayuda ihapari sooreera sinimuhimya mwaana owo.+ Miyo nkaaronwe onvekela miruku mutthu* mukina, 17 nnakhala nkaaronwe oYerusalemu waakoha ale yaapacenrye okhala arummwa kihinatthi miyo. Masi kaahirowa wArabia, nuumala-vo, kaahitthikela oDamaasiko.+

18 Nuuvira iyaakha tthaaru, kaahirowa oYerusalemu+ omuxukurya Keefa,*+ ni kaahikhala nuuwo mahiku 15. 19 Murummwa mukina kanwenhe aka aari Yakobo paahi,+ munnaya Apwiya. 20 Kinnihimya ohoolo wa Muluku, wiira itthu iya kinoolepelaakani, ti seekeekhai.

21 Nuumala-vo, miyo kaahirowa muttetthe wa oSiiria ni oSilisia.+ 22 Masi awiixutti a Kristu a miloko sa oYudeya, khiyaakisuwela. 23 Awo yaamakela wiiwa vahimmwaka wiira: “Mulopwana yoole aaphavela omaliha etiini ahu+ ni aanilupattha, vano onilaleya ihapari sooreera”.+ 24 Siiso, awo yaahipacerya onvuwiha Muluku mwaha wa miyo.

2 Nuuvira iyaakha 14, kaahitthikela-tho oYerusalemu ni Baarnaba,+ nave-tho kaahimukuxa Tito.+ 2 Kaahirowa oYerusalemu iwo, okhala wiira Apwiya yaahikisuweliha wiira kaahaana wiira siiso. Weiwo, kaahithukumana paahi ni ale yaahoolela mmulokoni, kaahimeeryaka ihapari sooreera kaalalenrye aka ale ahikhanle ayuda. Kaahiira siiso, wiira kisuwele akhala wiira etthu kampakenle aka Muluku yaari yooreera aahiiso khiyaarenre. Vakhala wiira khiyaarenre, weeso kaavanre muteko mahala. 3 Hata vari siiso, Tito,+ yoowo aari ni miyo, khaakhanyereriwe winnuwihiwa,+ nnaamwi aari mukereku. 4 Mwaha owo waahikhumelela mwaha wa axinna oowootha,+ yaawo yaakenle mmulokoni wiira anihotteleke. Awo yaaphavela ohonona otaphuwa+ nrina ahu mwaha wa okhala awiixutti a Kristu Yesu. Yaaphavela wiira nitthikele okhala ipottha sa Nlamulo.+ 5 Hiyo khinaawiiwelenle nnakhala vakhaani,*+ wiira ekeekhai ya ihapari sooreera ekhaleke ni nyuwo.

6 Vano, axinna yooniwa okhala etthu,+ eyo piiyo, ale yaahoolela mmulokoni, khakiixuttinhe etthu esya. Tthiri, miyo nkincala makhalelo yaarina aya khalai, okhala wiira Muluku khoniweha makhalelo anooneya a mutthu. 7 Masi, awo yaahoona wiira kaahaakhela muteko wa waalaleerya ihapari sooreera atthu oohinnuwihiwa,+ siisaale Pedru aakhenle awe muteko wa waalaleerya ihapari sooreera atthu oowinnuwihiwa. 8 Tthiri, Muluku, yoowo onvanhe Pedru owerya wiira okhale murummwa a atthu oowinnuwihiwa, ti yoowo-tho okivanhe owerya wiira kikhale murummwa a atthu ahikhanle ayuda.+ 9 Awo yaahiweha wiira Muluku aahikooniherya oreera wawe murima wuulupale.+ Tivonto, Yakobo,+ Keefa* ni Yohani, yaawo yaari ntoko ahooleli,* yaahikivaha ntata miyo ni Baarnaba,+ ntoko ethoonyeryo yoowi naavara muteko vamosa, anahimya wiira: “Nyuwo pooti waalaleerya ale ahikhanle ayuda, masi hiyo ninrowa waalaleeryaka ale oowinnuwihiwa”. 10 Awo yaanivekenle paahi wiira niwuupuweleke axinna oohaawa. Nto eyo ti etthu kiniimananiha aka vanceene opaka.+

11 Okathi Keefa*+ aaphiyale awe wAntiyokiya,+ miyo kaahinvaha miruku,* okhala wiira etthu aapaka awe khiyaalonke. 12 Ahinatthi ophiya alopwana akina yaarummwale ni Yakobo,+ Keefa* owo aanilya ni atthu yahaakhanle ayuda.+ Masi nuumala alopwana ale ophiya, aahihiya opaka eyo ni aahivalaana ni atthu awo, owoovaka ale oowinnuwihiwa.+ 13 Nave-tho ayuda akina yaanootha, enapaka etthu emosa-ru ntoko Keefa.* Hata Baarnaba aahikuxiwa ni wootha waya. 14 Masi okathi koonale aka wiira atthu ale khiyeettela ekeekhai ya ihapari sooreera,+ kaahimuhimeerya Keefa* ohoolo wa atthu ootheene wiira: “Akhala wiira nyuwo muri muyuda, munnikhala ntoko atthu ahikhanle ayuda, ohiya ntoko ayuda, muniwerya sai waakhanyereryaka ale ahikhanle ayuda weettela soolema sa ayuda?”+

15 Hiyo na ayuda, nave khaninlikana ni ale ahikhanle ayuda, yaawo ari anatampi. 16 Noosuwela wiira mutthu onnithokoreriwa okhala naxariya mwaha wa omwaamini+ Yesu Kristu,+ ohiya mwaha wa weettela Nlamulo. Siiso, hiyo noomwaamini Kristu Yesu, wiira nithokoreriwe okhala anaxariya mwaha wa omwaamini Kristu, ohiya mwaha wa weettela Nlamulo, maana khuuvo mutthu onrowa othokoreriwa okhala naxariya mwaha wa weettela Nlamulo.+ 17 Vano, vakhala wiira hiyo-tho ninnithokoreriwa okhala anatampi, okathi omosa-ru nimphavela ahu othokoreriwa okhala anaxariya mwaha wa Kristu, niireke Kristu onnitumererya opaka etampi? Nnaari, khahiyo siiso! 18 Katthikela oteka etthu yeele kaapwenxe aka, kinnooniherya wiira kinnitthekela Nlamulo. 19 Okhala wiira kaaneettela Nlamulo,+ miyo kookhwela Nlamulo, wiira kimukhalele mukumi Muluku. 20 Kookhomeliwa vamwirini vamosa ni Kristu.+ Miyo nkiniikhalela mmansaka,+ masi Kristu tonikhala mwa miyo. Mweekeekhai, vano kinnikhala ntoko pinaatamu, mwaha wa omwaamini Mwaana a Muluku,+ yoowo okiphentale ni ovaherenrye okumi awe mwaha wa miyo.+ 21 Nkinikhootta* oreera murima wuulupale wa Muluku,+ maana vakhala wiira exariya eniphwanyiwa mwaha wa weettela Nlamulo, weeso Kristu okhwiiye mahala ene.+

3 Nyuwo akalaasia khamurina ankhili! Ti pani oowonkeni,+ nnaamwi mutthokiheriwe ene oratteene wiira Yesu Kristu aahikhomeliwa vamwirini?+ 2 Kiniphavela wookohani* etthu emosa: Kiireke mwaakhenle ikuru soowaarya mwaha wa weettela Nlamulo aahiiso mwaha wa waamini ele mwiiwale anyu?+ 3 Niireke murootepa ohikhalana ankhili? Khalai, mwaaniroromela ikuru soowaarya. Nto vano kiireke munitthara muupuwelo wa apinaatamu?+ 4 Niireke muhaawale mahala ene itthu sinceene soophwannyeni? Kinnikupali tthiri wiira khimuhaawale mahala! 5 Tivo, kiireke ole onoovahani ikuru soowaarya ni onipaka miteko sootikiniha+ eriyari anyu, onipaka eyo mwaha wa weettela wanyu Nlamulo? Aahiiso onipaka eyo mwaha wa waamini wanyu itthu mwiiwale anyu? 6 Eyo ti etthu yaamwiiranenle Abrahamu: Owo “aahimwaamini Yehova, nto aahithokoreriwa okhala naxariya”.+

7 Mweekeekhai, nyuwo moosuwela wiira ale arina waamini, tari anamwane a Abrahamu.+ 8 Soolempwa saahihimya khalai ene wiira Muluku aamwaahimya ale ahikhanle ayuda okhala anaxariya mwaha wa waamini. Siiso, aahimuleela Abrahamu khalai ene ihapari sooreera, oriki: “Maloko ootheene anooreelihiwa mwaha wa nyuwo”.+ 9 Nto, ale arina waamini annireelihiwa vamosa ni Abrahamu, yoowo aarina waamini.+

10 Ootheene ale aniroromela weettela Nlamulo aatakhaliwa, maana vaalempwa wiira: “Ootakhaliwa ole ohineettela itthu sootheene silempwale murooluni mwa Nlamulo”.+ 11 Ohiya-vo, vannooneya wiira khuuvo onihimmwa okhala naxariya ni Muluku+ mwaha wa wiiwelela nlamulo, okhala wiira “naxariya onookhala mukumi mwaha wa waamini wawe”.+ 12 Nlamulo khaninlipa ni waamini. Masi, “mutthu yoole oniiwelela itthu iya, onookhala mukumi mwaha wa seiyo”.+ 13 Kristu oonithuma,+ khinoopola+ naatakhalihiwe ahu ni Nlamulo. Owo aaheemererya otakhaliwa nipuro nahu, maana vaalempwa wiira: “Ootakhaliwa tuule othomeiwale vamwirini”.+ 14 Eyo yaahiiraneya siiso, wiira ale ahikhanle ayuda yaakhele mareeliho aaleiheriwe awe Abrahamu mwaha wa Kristu Yesu.+ Nave-tho yaahiiraneya wiira naakhele ikuru soowaarya Muluku onileihenrye awe onivaha,+ mwaha wa waamini wahu.

15 Axinnaka, miyo kinilavula kirumeelaka nlikanyiho na itthu siniwiiraneela apinaatamu: Nivarihano nalipihiwa, hata vakhalaka ni mutthu mmosa paahi, khuuvo onittipiha aahiiso wuncererya nivarihano nlo. 16 Vano, Abrahamu ni osuulu awe ti yaaleiheriwe itthu iyo.+ Yoolepa khenihimya wiira “ni osuulu anyu wootheene”, okhalaka ntoko yaari anceene. Ohiya-vo, enihimya wiira “osuulu anyu”, emuhimyaka mmosa, eyo piiyo, Kristu.+ 17 Nave-tho, miyo kinihimya wiira: Muluku aapacenrye opaka nivarihano. Nuuvira iyaakha 430,+ aahivaha Nlamulo. Masi nlo khinaattipinhe nivarihano, nnakhala khinaamalinhe etthu aaleihenrye awe. 18 Vakhala wiira ninrowa waakhela etthuvo mwaha wa weettela Nlamulo, weeso khaninrowa waakhela mwaha wa oleiheriwa. Masi Muluku oomureerela murima Abrahamu, onvahaka etthuvo eyo, mwaha woowi aahimuleiherya.+

19 Xeeni Nlamulo naakumiheriwe aya? Nlamulo naakumiheriwe wiira sooniheriwe itthu soohiloka atthu yaapaka aya,+ mpakha orwa osuulu,+ yoowo waamaneliwe natiri. Nlamulo nlo naahisuwelihiwa ni malaikha,+ orumeeliwaka mulipa-oowaataaniha.+ 20 Nivarihano napakiwa ni mutthu mmosa, khivampirisari okhala mulipa-oowaataaniha. Masi Muluku ori mekhawe. 21 Nto, niireke Nlamulo ninninvirikanya natiri a Muluku? Nnaari, khahiyo siiso! Vaakhanle wiira nlamulo nookumiheriwa wiira nivaheke okumi, weeso exariya yaarowa okumiheriwa mwaha wa nlamulo. 22 Masi Nuulumo na Muluku noovahererya itthu sootheene wiira seettihiweke ni etampi. Siiso, ale anaamini, anoophwanya itthu sooreera sileiheriwe aya ale animwaamini Yesu Kristu.

23 Masi, nihinatthi omwaamini Kristu, hiyo naakhapeleliwa ni nlamulo. Nave neettihiwa ni nlamulo nenno, niwehereryaka ele Muluku aarowa awe osuweliha.+ 24 Nlamulo naahikhala mulipa-onihoola* nniroihaka wa Kristu,+ wiira nithokoreriwe okhala anaxariya mwaha wa waamini.+ 25 Masi, vano nimmwaamini ahu Kristu,+ khannimpirisari-tho mulipa-onihoola.*+

26 Tthiri, ootheene anyu mwa anamwane a Muluku,+ mwaha wa omwaamini wanyu Kristu Yesu.+ 27 Ootheene anyu mpatisiwe mwa Kristu, monwara Kristu.+ 28 Khuuvo muyuda nnakhala mukereku,+ khiivo epottha nnakhala mutthu ootaphuwa,+ khuuvo mulopwana nnakhala muthiyana.+ Ootheene anyu muri mutthu mmosa, mwiiranne ene ni Kristu Yesu.+ 29 Masi, vakhala wiira mwa atthu a Kristu, ootheene anyu mwa osuulu weekeekhai wa Abrahamu.+ Nave munrowa waakhela+ etthu emosa-ru aaleiheriwe awe Abrahamu.+

4 Kiniphavela ohimya wiira, akhala wiira ole onrowa ohiyeriwa muhakhu nlelo mwaana, hata itthu sootheene siri ene sawawe, owo khonivirikana ni epottha ya vatthokoni, 2 maana aakhala atthu animukhapelela ni anikhapelela empa awe, mpakha nihiku paapa awe othanlale awe khalai ene. 3 Siiso, okathi naari ahu anamwane, nave-tho hiyo naari ipottha sa miyuupuwelo ni mweettelo wa olumwenku ola.+ 4 Masi waamalenle aya okathi waathanleliwe, Muluku aahimuruma Mwanawe, yoowo aayariwe ni muthiyana+ ni eettela nlamulo,+ 5 wiira olive esisapo yaarowa owoopola ale yeettela nlamulo.+ Siiso, Muluku anwerya onikhaliha anaawe.+

6 Vano, okhala wiira mwa anamwane, Muluku ooruma ikuru soowaarya onvanhe awe+ Mwanawe, wiira okhale vamurimani vahu.+ Nto ikuru iyo soowaarya sinnikhuwela siiraka: “Abba,* Tiithi!”+ 7 Tivo, nyuwo khamuhiyo-tho epottha, masi mwa mwaana a Muluku. Akhala wiira mwa mwaana a Muluku, nave munimwaakhela etthu Muluku onrowa awe woohiyeryani.+

8 Masi, okathi mwahaamusuwela anyu Muluku, nyuwo mwaari ipottha sa amuluku eethiru. 9 Vano mmusuwenle anyu Muluku, niire so, munisuweliwa anyu ni Muluku, vanikhala sai otthikelaka-tho miruku seethiru+ ni sihinivareleya muteko ni ophavelaka okhala ipottha sa itthu iyo?+ 10 Nyuwo munuupuwela wiira aakhala mahiku, miyeeri,+ okathi ni iyaakha sirina efaita yuulupale ni munnitthapela seiyo. 11 Kinnoova wiira kiimananinhe mahala ene wookhaliheryani.

12 Axinnaka, kinnooxonttelani wiira mukhale ntoko miyo, okhala wiira miyo kaari ntoko nyuwo.+ Khiivo etthu yootakhala mukiirenle anyu. 13 Musuweleke wiira ekwaha yoopacerya koolalenryaakani ihapari sooreera, waari mwaha woowi kanwereiwa. 14 Nnaamwi eretta aka yooxankihaleni, nyuwo khimwaakithannye nnakhala khimwaakikhoottale,* masi mwaahikaakhela ntoko nlaikha na Muluku, aahiiso ntoko Kristu Yesu. 15 Vano, otteeliwa murima waarina anyu ori vai? Miyo kinnikhalela onamoona wiira khalai, mwanwerya osyoola maitho anyu wiira mukivahe, vakhala wiira eyo yaamukikhaliherya.+ 16 Kiireke vano ka nwanani inyu, mwaha woowi kinooleelani ekeekhai? 17 Atthu awo anniimananiha vanceene wiira akuxe mirima sanyu, masi khaniphavela mureerelo anyu. Awo aniphavela woovalaanyani ni miyo, wiira mwaatthareke yaawo. 18 Masi, okathi wootheene, ti vooloka atthu ophavela okuxa murima anyu, aphavelaka mureerelo anyu, ohiya paahi kiri ene ni nyuwo. 19 Anaaka oophentiwa,+ kootthikela-tho woona owereya mwaha wa nyuwo. Owereya iwo, onlikana ni owereya onimphwanya muthiyana ohanle oyara. Nlelo kinimoonaka owereya mpakha nyuwo wooniherya omutthu wa Kristu. 20 Kaaniphavela kiri ene ni nyuwo niinaano-va, wiira kilavule ni nyuwo moota mukina, okhala wiira kooxanka mwaha wa nyuwo.

21 Mukileele! Niireke nyuwo muniphavela weettela Nlamulo, khamuniwiriyana etthu Nlamulo nnihimya aya? 22 Mwa ntakiheryo, vaalempwa wiira Abrahamu aahikhalana anamwane anli axilopwana. Mmosa aayareliwe ni muthiyana aari epottha,+ nave mukina aayareliwe ni muthiyana ootaphuwa.+ 23 Mwaana aayariwe ni muthiyana epottha, aayariwe ntoko aniyariwa aya anamwane akina,+ masi mwaana a muthiyana ootaphuwa, aayariwe mwaha wa natiri.+ 24 Itthu iya sinnitaphulela etthu ekina: Athiyana ala, anitaphulela mavarihano manli, nimosa naapakiwe omwaako Sinayi,+ nenno nnaakumiherya anamwane wiira akhale ipottha. Nivarihano nlo ninlikana ni Agari. 25 Vano, Agari onithoonyerya mwaako Sinayi,+ yoowo ori wArabia, nave olelo-va, onimuthoonyerya Yerusalemu, maana owo nlelo epottha, vamosa ni anaawe. 26 Masi, Yerusalemu a wiirimu tootaphuwa, nave maama ahu ti yoowo.

27 Vaalempwa wiira: “Nyuwo muthiyana ohiniyara ni ohitonko oyara, mutteeliweke murima! Nyuwo muthiyana ohinoone owereya onimphwanya muthiyana oniyara, mukhuweleke mutthapaka, okhala wiira anamwane a muthiyana ohiniyara khareere waatta, waavikana anamwane a muthiyana orina iyawe”.+ 28 Vano axinnaka, nyuwo mwa anamwane a natiri, ntoko aari awe Isaakhi.+ 29 Okathi ole, mwaana aayariwe ntoko aniyariwa aya anamwane akina, aanimulupattha ole aayariwe ni owerya wa ikuru soowaarya.+ Siiso-tho, onniiraneya olelo-va.+ 30 Masi, soolempwa sinihimya exeeni? Sinihimya wiira: “Mmoomole murumeyi ola ni mwanawe, okhala wiira mwaana a murumeyi, khonikhala-khala okawanaka etthu ohiyeriwe awe mwaana a muthiyana ootaphuwa”.+ 31 Tivonto, axinnaka, hiyo khanihiyo anamwane a murumeyi, masi na anamwane a muthiyana ootaphuwa.

5 Kristu oonoopola wiira nikhale ootaphuwa. Tivo, mwiilipihe,+ nave muhitthikele okhala epottha.+

2 Mukiwiriyane! Miyo, Paulo, kinooleelani wiira mwannuwihiwa, Kristu khonrowa woophwanyihani mureerelo.+ 3 Kinnitthikela-tho wooleelani wiira, khula mulopwana oninnuwihiwa, ohaana weettela Nlamulo nootheene.+ 4 Nyuwo muneererya ohimmwa okhala naxariya mwaha wa weettela Nlamulo,+ moovalaana ni Kristu. Nyuwo mookhootta oreera murima wuulupale wa Kristu. 5 Hiyo, neettihiwaka ni ikuru soowaarya sa Muluku, ninnilipelela vanceene exariya enikhumelela mwaha wa waamini. 6 Ale yiiranne ni Kristu Yesu, winnuwihiwa aahiiso ohinnuwihiwa khahiyo etthu.+ Masi etthu yuulupale, okhalana waamini onooniheriwa ni ophenta.

7 Nyuwo mwaaneetta saana mweekeekhaini.*+ Ti pani ookhoottihenryeni wiiwelelaka ekeekhai? 8 Itthu aniixuttiha aya ale yookhoottihenryeni, khasinikhuma wa Muluku, yoowo owihanneni. 9 Eferemento vakhaani, enniiriha otthu wootheene wooweetheiwa* opuhuwa.+ 10 Miyo kinnikupali wiira nyuwo muri awiixutti a Pwiya,+ munookupali ele enihimya aka. Masi, ole onooxankihani, onimwaakhela ehukhumu+ oniphwanela awe. 11 Axinnaka, vakhala wiira miyo nlelo kinilaleya winnuwihiwa, xeeni nlelo kinilupatthiwa aka? Vakhala wiira nlelo kinilaleya winnuwihiwa, weeso mwiri wa nihaaxeryo* wa Yesu,+ khahiyo-tho etthu eniwiiriha atthu akina ohiya waamini. 12 Miyo kaaniphavela wiira alopwana yaale aneererya wooxankihani, yiihule* mmansaya.

13 Axinnaka, nyuwo muhiihaneliwa otaphuwa. Nto, muhirumeeleke otaphuwa nno wiira mpakeke itthu siniphavela aya erutthu anyu yoottheka.+ Masi, ophenta owiirihekeni waavarela muteko akhwiinyu.+ 14 Nlamulo nootheene ninnimaliheriwa* ni yooruma emosa, yeeyo eni: “Mumphenteke mukhwiinyu ntoko muniiphenta anyu”.+ 15 Mwaathipelelaka olumana ni okhuurana,+ mwiipasoope wiira muhipwetexane.+

16 Masi kinihimya wiira: Muhihiye weettihiwa ni ikuru sa Muluku,+ nto khamunrowa opakaka nnakhala vakhaani itthu siniphavela aya erutthu yoottheka.+ 17 Tthiri, erutthu ennivirikanya ikuru soowaarya sa Muluku ni itthu ikuru iyo siniphavela aya. Nave ikuru soowaarya sa Muluku sinnivirikanya erutthu. Siiso, iyo khasinivarihana. Tivo, khamunipaka itthu seiye muniphavela anyu opaka.+ 18 Ohiya-vo, vakhala wiira muneettihiwa ni ikuru sa Muluku, nyuwo khamunikhanyereriwa weettela Nlamulo.

19 Itthu siniphavela aya erutthu yoottheka sinnooneya oratteene. Itthu sene tiiya: Orupihana woohiloka,*+ itthu soonanara, mweettelo woohiloka onooniherya ohuuliwa muru,*+ 20 waakokhorela amuluku eethiru, okhwiri,*+ onyokhana, owana, okhalelana ehace, waakuva onanariwa, ohiiwanana, okumiherya okawanyeya, otthara soowiixuttiha sa atthu, 21 nrima, ohapaliwa,+ ifesta sootakhala* ni itthu sikina sinlikana ni iya.+ Miyo kinnoolopolani mwaha wa itthu iya, ntoko kooloponlyaakani wiira, ale animakela opaka itthu iya, khanrowa waakhela Omwene wa Muluku.+

22 Ohiya-vo, mikhalelo* sinikumiheriwa ni ikuru soowaarya, tiiya: Ophenta, otteeliwa murima, murettele, opixa murima, oreera murima, oloka,+ waamini, 23 omaala, wiihiiha.+ Khanikhanle Nlamulo ninvirikanya mikhalelo iya. 24 Nave-tho, awiixutti a Kristu Yesu, aakhomela vamwirini erutthu aya yoottheka, vamosa ni itthu saasivela ni yaaphavela aya.+

25 Akhala wiira ninneettihiwa ni ikuru soowaarya sa Muluku, nihaana othipelelaka weettihiwa ni ikuru iyo sa Muluku.+ 26 Nihiittottopeke,+ nnakhala nihiphaveleke owiiriha akina oxinttana,+ hata nihikhalelaneke nrima.

6 Axinnaka, akhala wiira mutthu onnirowa ephiro yootakhala, hata ohisuwelaka, nyuwo muneettihiwa ni ikuru sa Muluku, mmuttikiherye ephiro yooreera.+ Masi muhaana opaka eyo mmureerelaka murima.+ Nave mwiipasoopeke wiira nyuwo-tho muhimorele vantaphani.+ 2 Mukhaliheryaneke ni miritti soolemela.+ Mwiira siiso, munimwiiwelela nlamulo na Kristu.+ 3 Akhala mutthu onoona wiira ookhalana efaita masi ohikhanle etthu,+ mutthu owo onimwiiwoka. 4 Khula mutthu ovareryeke miteko sawe.+ Siiso, onootteeliwa murima mwaha wa miteko sawe, ohiya mwaha wa wiilikanyiha ni atthu akina.+ 5 Mweekeekhai, khula mutthu onrowa oteexa muritti awe.+

6 Nave-tho, khula mutthu oniixuttihiwa nuulumo na Muluku, okawaneke mireerelo sawe sooreera ni ole onimwiixuttiha.+

7 Muhiiwoke: Muluku khonithweelihiwa. Veekeekhai, ele mutthu enaala awe, ti yeeyo onrowa awe ohepha.+ 8 Ole onaala uupuwelaka itthu siniphavela aya erutthu awe yoottheka, onrowa ohepha opwetexiwa, weiwo onikumiheriwa ni erutthu awe yoottheka. Masi ole onaala eettihiwaka ni ikuru sa Muluku, onrowa ohepha okumi woohimala, onikumiheriwa ni ikuru sa Muluku.+ 9 Tivo, nihikhulumuwe ovara miteko sooreera, okhala wiira naahikhulumuwe,+ ninrowa ohepha okathi othanliwe ni Muluku. 10 Siiso-tho, khula okathi ninwerya ahu okhaliheryana, naakhaliheryeke atthu ootheene, vanceenexa axinnihu ni axirokorihu, arina ahu waamini omosa-ru.

11 Moone moota sinnuwale aya ileetera sa epaphelo yoolepenlyaakani ni ntata naka.

12 Ale aniphavela waasiveliha atthu, ti yaawo anookhanyereryani winnuwihiwa. Awo anipaka eyo paahi wiira asyake olupatthiwa mwaha wa Kristu.* 13 Hata atthu yaale aninnuwihiwa, khaneettela Nlamulo,+ masi aniphavela wiira nyuwo munnuwihiwe wiira awo akhalane mathowa oowiittottopa, mwaha wa etthu yiirihiwe aya erutthu anyu. 14 Masi, miyo kihikhala-khale kiittottopaka, vahikhanle mwaha wa Pwiya ahu Yesu Kristu,+ yoowo okhwiiye vamwirini wa nihaaxeryo.* Mwaha wa okhwa wawe, miyo kinoona wiira olumwenku ohiiviwa,* nave olumwenku onoona wiira miyo kihiiviwa. 15 Winnuwihiwa aahiiso ohinnuwihiwa, khahiyo etthu.+ Etthu yuulupale, ti okhalihiwa mutthu musya ni Muluku.+ 16 Masi ootheene ale anrowa otthara malakiheryo a mweettelo ola, eyo piiyo, aisarayeli a Muluku,+ akhalane murettele ni amoreliwe ikharari.

17 Okhuma olelo-va orowa ohoolo, ohikhale onrowa okixankiha, maana kookhalana mweerutthuni mwaka mirala sinooniherya wiira ka epottha ya Yesu.+

18 Axinnaka, oreera murima wuulupale wa Pwiya ahu Yesu Kristu, okhale ni nyuwo, mwaha wa mukhalelo wooreera munooniherya anyu. Amen.