EPAPHELO PAULO AALEPENLE AWE AFILIPI

1 Miyo Paulo ni Timootheyo, arumeyi a Kristu Yesu, ninnaalepela ootheene ale oororomeleya* mwa Kristu Yesu, anikhala oFilipi,+ vamosa ni axitokweene anihoolela ni arumeyi ookhaliherya:+

2 Muluku Tiithi ihu ni Yesu Kristu Pwiya ahu, ewooniheryeni oreera murima wuulupale ni yoovaheeni murettele.

3 Kinnimuxukhuru Muluku aka, kiwuupuwelakani nyuwo, okathi wootheene 4 kinimuxonttela aka, mwaha wa nyuwo ootheene. Kinnimuxonttela ni otteeliwa murima,+ 5 mwaha wa okhaliherya wanyu* ihapari sooreera, okhuma nihiku noopacerya mpakha olelo-va. 6 Kinnikupali tthiri wiira Muluku, yoowo opacenrye mwa nyuwo muteko ola wooreera, onoomaleliha+ mpakha nihiku na Kristu Yesu.+ 7 Vannireerela miyo wuupuwela siisa voohimya sa nyuwo, okhala wiira nyuwo muri vamurimani vaka. Tthiri nyuwo ootheene mooreereliwa murima vaalupale ni Muluku, okathi kaatthukweliwe aka+ ni okathi kaarumeela aka nlamulo wiira kiweryeke olaleya ihapari sooreera.+

8 Muluku onnisuwela wiira nyuwo ootheene anyu mookinkhela. Miyo kinnoophentani vanceene, ntoko oniira awe Kristu Yesu. 9 Nto, kinninvekela Muluku wiira ophenta wanyu otepeke wunnuwa+ ni osuwela weekeekhai+ ni ankhili oomalela;+ 10 wiira musuweleke othanla itthu sootepa okhalana efaita,*+ wiira muhikhalane mulattu ni muhaatthekiheke atthu akina+ mpakha nihiku na Kristu. 11 Mukhaliheriwaka ni Yesu Kristu,+ munoosareya mihokorokho sa xariya, wiira Muluku ovuwihiwe ni ottottopeliwe.

12 Axinnaka, kiniphavela wiira musuwele wiira mukhalelo aka, wookhaliherya tthiri olaleiwa ihapari sooreera; 13 tivonto, otthukweliwa waka+ mwaha wa Kristu, woosuweliwa+ ni makwarta ootheene a Mwene, vamosa ni atthu ootheene. 14 Vano, anna anceene mwa Apwiya, aalipihiwa murima mwaha wa otthukweliwa waka ni annitepa wooniherya olipa murima alaleyaka masu a Muluku, ahoovaka etthu.

15 Ekeekhai wiira atthu akina annimulaleya Kristu mwaha wa nrima ni ophavela ovirikanya. Masi akina annimulaleya ni mathowa ooloka. 16 Ale animulaleya Kristu ni mathowa ooloka, anniira eyo mwaha wa omphenta, maana aasuwela wiira kithanleliwe waakiherya ihapari sooreera.+ 17 Masi ale animulaleya mwaha wa nrima ni ophavela ovirikanya, anniira eyo aphavelaka oxinttana, ohiya ni mathowa ooreera, maana aniphavela okikumiherya maxakha vano kitthukweliwe aka. 18 Nto etthu ekhumelenle ti yoowi atthu anniiwa ihapari sinimuhimya Kristu, hata akina alaleyaka ni mathowa ooloka wala nnaari. Miyo kinnitteeliwa murima ni kinrowa otepaka otteeliwa murima, 19 maana koosuwela wiira kinrowa woopoliwa mwaha wa oxonttela wanyu+ ni kikhaliheriwaka ni ikuru soowaarya ninvahiwa ahu ni Yesu Kristu.+ 20 Kinniroromela ni kinnilipelela wiira khiivo enrowa okuulihiha muru. Nto okhala wiira nkinoovelela olavula, kinninvuwiha Kristu vano, ntoko kiniira aka okhuma khalai. Miyo* kinonvuwiha hata kiri ene mukumi aahiiso kikhwaaka.+

21 Nto miyo kinoona so: Kaakhalaka mukumi, kinimukhalela Kristu.+ Nave kakhwa, kinoophwanya mureerelo.+ 22 Vano, kaakhalaka nlelo mukumi, kinoowerya ovara vanceene muteko wa Kristu. Masi nkinrowa ohimya etthu enrowa aka othanla. 23 Mwa itthu iya piili, nkinsuwela enrowa aka othanla, maana kinniphavela okhwa wiira kakhaleke ni Kristu.+ Tthiri eyo etthu yooreerexa.+ 24 Masi, kihaana okhala mukumi mwaha wa nyuwo. 25 Tivonto, kinnisuwela wiira kinookhala mukumi, okhala wiira nkinrowa okhwa niinaano. Tthiri, kinookhalaka ni nyuwo wiira muncereryeke muteko oninvarela anyu Muluku ni wiira mutteeliweke murima mwaha wa waamini wanyu. 26 Siiso, okathi kintthikela aka iwo, otteeliwa wanyu murima wuncerereye mwaha wa omutthara Kristu Yesu.

27 Mweetteke saana paahi, ntoko simphwanela aya ihapari sooreera sa Kristu.+ Nto mwiira siiso, hata kooxukuryakani aahiiso nnaari, nyuwo munoolipa, munookhalana muupuwelo mmosa-ru, munimwiiraana, ni munookhalana murima mmosa-ru+ wiira muhihiyererye waamini wanyu ihapari sooreera, 28 ni khamuniwoovaka hata vakhaani ale anoolupatthani. Itthu iya sootheene ethoonyeryo yoowi atthu awo anoopwetexiwa,+ masi nyuwo munimoopoliwa.+ Ethoonyeryo eyo enikhuma wa Muluku. 29 Tthiri nyuwo muhaakhela eparakha, ohiya paahi ya omwaamini Kristu, masi-tho ya ohaawa mwaha wa yoowo.+ 30 Nyuwo mookhalana mixankiho simosa-ru kaarina aka,+ nave-tho seiyo nlelo kirina aka.

2 Axinnaka, okhala wiira muhiiraana ni Kristu, okhala wiira munnaalipiha ni waamaaliha akina mwaha wa waaphenta, okhala wiira munnaathokorerya akina, mwaaphentaka ni mwaamorelaka ikharari, 2 nto mukitteeliheke murima mooniheryaka wiira murina muupuwelo mmosa-ru, niphento nimosa-ru, muhiiraana voomalela ni munoolikana muupuwelo.+ 3 Muhiireke itthu mphavelaka oxinttana+ wala wiittottopa.+ Masi mwiiyeviheke, khula mutthu awooneleke vatthu akhwaawe wiivikana mmensawe.+ 4 Muhiphaveleke mureerelo anyu paahi,+ masi-tho mphaveleke mureerelo wa atthu akina.+

5 Muhihiye okhalana muupuwelo ni moonelo ola, yoowo aarina awe Kristu Yesu.+ 6 Nnaamwi owo aari ntoko Muluku,+ nnakhala khaatonko weererya wuupuwela wiira olikaneke ni Muluku.+ 7 Nnaari, masi owo aahileva itthu sootheene aarina awe, aaheemererya okhala epottha+ ni aahiikhaliha pinaatamu.+ 8 Nave-tho, nuumala okhala pinaatamu, aahiiyeviha ni aahiiwelela mpakha okhwa,+ eyo piiyo, mpakha okhwa vamwirini wa nihaaxeryo.*+ 9 Tivonto, Muluku onvuwiha vanceene,+ oomureerela murima, khunvaha nsina ninvikana masina makina ootheene,+ 10 wiira ootheene amukhoromele* Yesu, akhale ale ari wiirimu, ale ari elapo ya vathi ni ale ari vathi va elapo.*+ 11 Nave, atthu ootheene ahaana weemererya wiira Yesu Kristu tori Pwiya,+ wiira avuwihiwe Muluku Tiithi.

12 Siiso, axinnaka oophentiwa, nyuwo muhiiwelela okathi wootheene, ohiya paahi okathi kaari aka ni nyuwo, masi vootepa vano kiri aka ottaiwene. Mwiimananiheke vanceene wiira moopoliwe ni Muluku, mmuttittimihaka yoowo ni mmoovaka. 13 Tthiri, mwaha wa onireerela wawe murima, Muluku onnikumiherya mwa nyuwo ophavela ni owerya ovara muteko. 14 Mwiireke sootheene muhinlaseyaka+ nnakhala onyakulihana,+ 15 wiira mukhale ooreera murima ni oohittheka, mukhale anamwane ooloka a Muluku,+ eriyari ya nloko nla nootakhala ni noohiloka.+ Nto nyuwo munnaarya eriyari aya ntoko mithuko sa mulaponi,+ 16 nvarexexaka oratteene nuulumo na okumi.+ Siiso, miyo kinookhalana mathowa ootteeliwa murima nihiku na Kristu, kisuwelaka wiira nkitthimanke mahala ene, nnakhala nkivanre muteko mahala. 17 Masi, nnaamwi kimwarexiwaka ntoko mukuttho+ wa yoovaha+ eniwuriwa wiira kikhaliherye muteko wa Muluku, kinnihakalala vanceene vamosa ni nyuwo, okhala wiira waamini wanyu, woowiirihani nave opaka etthu emosa-ru. 18 Nyuwo-tho, mutteeliweke murima, mutthapeke vamosa ni miyo.

19 Kinniroromela mwa Apwiya Yesu, wooruuhelani Timootheyo+ voohipisa, wiira miyo kilipihiwe ni ihaali sanyu. 20 Nkirina-tho mutthu mukina oowiivahererya siisa, onrowa woothokoreryani vanceene, 21 okhala wiira atthu akina aniphavela mureerelo aya paahi, khaniphavela itthu Yesu Kristu oniphavela awe. 22 Masi nyuwo moosuwela oratteene wiira owo ohiivahererya ovara muteko ni miyo, olaleyaka ihapari sooreera, ntoko mwaana+ onivara muteko vamosa ni paapa awe. 23 Tivonto, ti yoowo onimuroromela aka wooruuhelani voohipisa, kasuwela vanrowa aya omalela mulattu aka. 24 Tthiri, kinnikupali mwa Apwiya wiira nave miyo kinimoorwa voohipisa.+

25 Okathi ola kinnoona oreerela wooruuhelani Epafrodito, munnaka onvarana aka muteko, yoowo-tho ori nakhotto a Kristu. Ti yoowo mwaakiruuhenle anyu wiira okikhaliheryeke ni itthu saakithowa.+ 26 Vano onniphavela vanceene woowehani ootheene anyu. Owo ooriipiwa murima vanceene maana oosuwela wiira nyuwo mwaahiiwa wiira anwereiwa. 27 Mweekeekhai, owo aahiwereiwa onahala vakhaani okhwa. Masi, Muluku ommorela ikharari, ohiya owo paahi, masi-tho ookimorela ikharari miyo, wiira kihitepe oriipiwa murima. 28 Tivonto, kinnimuruma orwa voohipisa wiira mutteeliwe-tho murima mwanweha, nave oxanka waka ovukuwe. 29 Mmwaakhele ntoko muniwaakhela anyu awiixutti a Apwiya. Atthu siisa, mwaattittimiheke.+ 30 Owo aahanle vakhaani okhwa mwaha wa muteko wa Kristu.* Aahileva okumi awe wiira okikhaliheryeke, okhala wiira nyuwo muri ottaiwene.+

3 Tivonto, annaka, mutteeliweke murima mwa Apwiya.+ Miyo nkinoona onyoonya woolepelani itthu simosa-ru, kiirelaka mureerelo anyu.

2 Mwiipasoopeke ni ale anlikana ni alapwa. Mwiipasoopeke ni ale aniira sootakhala. Mwiipasoopeke ni ale aniphavela wiira munnuwihiwe.*+ 3 Tthiri alipa-oowinnuwihiwa mweekeekhai ti hiyo,+ maana ninnimukokhorela Muluku neettihiwaka ni ikuru sawe. Hiyo ninniittottopa mwaha wa ele Kristu Yesu+ opanke awe ni khaninroromela itthu sa apinaatamu, 4 nnaamwi miyo kirina ene mathowa oororomela itthu iyo.

Akhala mutthu onuupuwela wiira ookhalana mathowa oororomela itthu sa apinaatamu, miyo kootepa okhalana oowaatta: 5 Miyo kinnuwihiwe nihiku na neethanu neeraru,+ ka nloko na Isarayeli, nihimo na Beniyamini, ka muheeperi ni anamuyari aka yaari aheeperi;+ ka nfarisi, moovarihana ni nlamulo;+ 6 kaanikhalela nthiti olupattha muloko,+ kaanittharihela oratteene ele nlamulo naahimya aya okhala exariya. 7 Masi itthu sootheene kaavaha aka efaita, vano nkinoona okhala etthu,* mwaha wa Kristu.+ 8 Ohiya-vo, kinnithokorerya itthu sootheene okhala ethiru, mwaha wa efaita erina aya omusuwela Kristu Yesu, Pwiya aka. Mwaha wa yoowo, kooleva itthu sootheene ni kinnithokorerya itthu sootheene okhala ikokhola, wiira kimphwanye Kristu, 9 ni kooniwe okhala mutthu onimutthara. Masi nkinihimmwa okhala naxariya mwaha wootthara Nlamulo, ohiya-vo, kinihimmwa okhala naxariya mwaha woomwaamini+ Kristu.+ Tthiri Muluku onniwoona ale animwaamini Kristu okhala anaxariya.+ 10 Kinniphavela omusuwela yena ni osuwela ikuru sa ohihimuwa wawe.+ Kinniphavela-tho ohaawa+ vamosa nuuwo, kiivahereryaka wiira kikhwe ntoko owo,+ 11 wiira vaweryaneya, kiwerye ophwanya ohihimuwa woopacerya.+

12 Khahiyo wiira kirimwaakhela etthuvo ene, nave khahiyo wiira koophwanya omalela, masi kinniimananiha+ wiira kiphwanye etthuvo eyo, maana koosuwela wiira ti etthu Kristu Yesu okithanlenle awe.+ 13 Annaka, miyo nkinoona wiira koophwanya itthu iyo, masi etthu enisuwela aka tiila: Kinniliyala itthu sihanle ottuli+ ni kinniimananiha wiira kiphwanye itthu siri ohoolo.+ 14 Nave kinniimananiha wiira kiphwanye etthuvo+ ya wiirimu, Muluku onikiihanela awe+ mwa Kristu Yesu. 15 Tivonto, hiyo nrina waamini woolipa,+ nikhalaneke muupuwelo ni moonelo owo. Vakhala wiira nyuwo murina muupuwelo mukina, Muluku onoowooniheryani moonelo wooloka. 16 Masi, hata nironwe ene vahoolo, nitepeke weetta ephiro emosa-ru.

17 Annaka, moowiiraana mukitakiheke miyo,+ nave mwaatakiheke atthu yaale aneetta moovarihana ni ntakiheryo nivahale ahu. 18 Aakhala atthu anceene anthanya okhwa wa Kristu vamwirini wa nihaaxeryo.* Kaanaaromola atthu awo ikwaha sinceene, kiira? Vano kinnaaromola atthu awo kinlaka. 19 Emalelo aya anrowa opwetexiwa, muluku aya ti erukulu aya, anniivuwiha ni itthu saya soowuuliha muru, nave anuupuwelela itthu sa vathi-va.+ 20 Masi elapo ahu+ eri wiirimu,+ nto ninnimulipelela ni murima wootheene moopoli onikhuma wuuwu, Pwiya Yesu Kristu.+ 21 Owo onrowa orumeela owerya wuulupale aakhenle awe wiira eettiheke itthu sootheene+ ni onrowa otatuxa erutthu ahu yootteettheya wiira elikaneke* ni erutthu awe yoovuwa.+

4 Tivonto, axinnaka, miyo kinnoophentani ni mookinkhela. Otteeliwa waka murima ni etthuvo* aka,+ ti nyuwo. Mwiilipiherye+ weetta siisa mwa Apwiya.

2 Kinnimutumererya Evodia ni Sintikhe okhalana muupuwelo mmosa-ru, onivarihana ni Apwiya.+ 3 Ni nyuwo-tho, mpatthani aka oororomeleya kinvarana aka muteko, kinnoovekelani wiira muhihiye waakhaliherya axithiyana awo. Tthiri awo, vamosa ni Klementi ni akina, anniimananiha* olaleya ihapari sooreera ni miyo. Masina a atthu awo ootheene, aalempwa muliivuruni mwa okumi.+

4 Okathi wootheene, mutteeliweke murima mwa Apwiya. Kinoohimya-tho wiira: Mutteeliweke murima!+ 5 Atthu ootheene aweheke wiira khamunithipelela moonelo anyu paahi.+ Apwiya ari vakhiviru. 6 Muhixankeke ni khula etthu,+ masi mwa itthu sootheene, munvekeleke ni mmuxontteleke Muluku. Nave-tho mmuxukhureleke, mmusuwelihaka itthu muninvekela anyu.+ 7 Siiso, murettele+ wa Muluku, yoowo onvikana osuwela wootheene wa apinaatamu,+ onoosuka mirima sanyu ni miyuupuwelo sanyu, mwa Kristu Yesu.

8 Nto, axinnaka, muhihiye othokorerya* itthu sootheene siri seekeekhai ni sirina efaita yuulupale; sootheene siri sa xariya ni sooloka; sootheene siri soophenteya ni soottittimiheya; sootheene siri sookhalela ni soottottopeleya.+ 9 Mpakeke itthu mwiixuttale anyu ni miyo ni mweemerenrye anyu, nave-tho iye mukiiwale anyu ni moonale anyu kivaraka.+ Nto Muluku a murettele, onookhala ni nyuwo.

10 Ntoko murumeyi a Pwiya, kootteeliwa murima vanceene okhala wiira mootthikela wooniherya wiira munnikuupuwela.+ Khahiyo wiira mwaarookiliyala, masi mwaha woowi khimwaarina eparakha ya okikhaliherya. 11 Khahiyo ovelavela onkiiriha olavula siiso, maana kihiixutta ohakalala ni makhalelo aka.+ 12 Miyo kinnisuwela okhalana itthu vakhaani+ ni itthu soowaatta. Okathi wootheene ni mwa itthu sootheene, kihiixutta esiiri ya okhalana yoolya ni ovoliwa etala, okhalana itthu sinceene ni othoiwa. 13 Tthiri, kinniwerya sootheene mwaha wa ole onikivaha ikuru.+

14 Masi, muhiira saana okikhaliherya moohaawani mwaka. 15 Mweekeekhai, nyuwo afilipi moosuwela wiira nuumala wiiwa ihapari sooreera ekwaha yoopacerya, okathi kaakhuma aka oMasedonia, khuuvo muloko mukina okikhalihenrye. Nyuwo paahi mphavenle okawana soovaha ni soowaakhela.+ 16 Okathi kaari aka oTesaloonika, mwaahikiruuhela itthu saakithowa, ohiya vamosa, masi vanli. 17 Khahiyo wiira kiniphavela otthuveliwa, masi kiniphavela mihokorokho sinincererya muhakhu* anyu. 18 Vano, kookhalana voowaatta itthu sootheene sinikithowa, maana Epafrodito+ ookiruuhela soovaha sanyu. Iyo siri ntoko yoovaha yoowunkhela+ ni mukuttho wooloka onimusivela Muluku. 19 Tivonto, Muluku aka, onimoovahani itthu sootheene sinoothowani,+ ottharihelaka mihakhu sawe soovuwa mwa Kristu Yesu. 20 Nto Muluku, Tiithi ihu, ovuwihiwe mahiku ootheene. Amen.

21 Mwa nsina na Kristu Yesu, mwaavahe makhomaso aka ootheene ale oororomeleya.* Axinna ari ni miyo, annookhomasani. 22 Ootheene ale oororomeleya,* vanceenexa ale a etthoko ya Seesari,+ annookhomasani.

23 Oreera murima wuulupale wa Pwiya Yesu Kristu, okhale ni nyuwo mwaha wa oreera wanyu murima.