EPAPHELO PAULO AALEPENLE AWE AKOLOSI

1 Miyo Paulo, kithanliwe ni Muluku okhala murummwa a Kristu Yesu, ni Timootheyo+ munnihu, 2 kinnaalepela ale oororomeleya* ni axinna oororomeleya mwa Kristu, anikhala oKolosi:

Oreera murima wuulupale wa Muluku Tiithi ihu ni murettele okhale ni nyuwo.

3 Okathi wootheene ninnimuxukhuru Muluku, Tiithi awe Pwiya ahu Yesu Kristu, noovekelelakani. 4 Hiyo nihiiwa ohimmwaka omwaamini wanyu Kristu Yesu ni waaphenta wanyu ootheene ale oororomeleya,* 5 mwaha wa itthu sooreera sinlipelela anyu, musukeriwe anyu wiirimu.+ Moosuwelihiwa khalai ene nlipelelo nla ni moolumo eekeekhai a ihapari sooreera 6 mulaleeriwe anyu. Ntoko ihapari sooreera sinikumiherya aya mihokorokho ni wuncerereya olumwenku wootheene,+ siiso-tho, vanniireya eriyari anyu, okhuma nihiku mpacenrye anyu wiiwa ni osuwela saana oreera murima wuulupale weekeekhai wa Muluku. 7 Itthu iya mwiixuttihiwe ni Epaafara,+ namuteko mukhwiihu oophentiwa, yoowo ori murumeyi oororomeleya a Kristu nipuro nahu. 8 Yoowo-tho tonisuwelihale ophenta wanyu, onikumiheriwa ni ikuru sa Muluku.

9 Tivonto, okhuma nihiku niiwale ahu ophenta wanyu iwo, khanihiyale woovekelelani.+ Nave ninninvekela Muluku wiira oovaheeni voomalela osuwela oratteene ele oniphavela awe,+ ni wiira oovaheeni miruku ni wiiwexexa itthu, mukhaliheriwaka ni ikuru sa Muluku,+ 10 wiira nweryeke weetta ntoko simphwanela aya atthu a Yehova, mmusivelihaka mwa itthu sootheene ni nweryeke okumiherya mihokorokho, nvaraka miteko sooreera sa khula enamuna ni wuncererya omusuwela wanyu saana Muluku.+ 11 Mulipihiweke voomalela ni owerya wawe woovuwa,+ wiira nweryeke ovilela, mpixaka murima ni otteeliwa murima, 12 mmuxukhurelaka Tiithi. Owo owiirihani ophwanelela okaweliwa itthu sooreera sivahiwe aya ale oororomeleya,*+ ari ntoko muthuko.

13 Owo oonaakiherya owerya wa epiphi,+ khunithaamiherya moomweneni mwa Mwanawe onimphentexa awe. 14 Mwaha wa onoopola,* nooleveleliwa itampi sahu.+ 15 Mwaana owo, ti eruku ya Muluku ohinooneya,+ nave topacenrye opattuxiwa mwa itthu sootheene.+ 16 Mwaha wa yoowo, soopattuxiwa itthu sootheene wiirimu ni vathi: Itthu sinooneya ni iye sihinooneya,+ omwene ni owerya ni olamulelo ni okhulupale. Itthu sootheene sikina soopattuxiwa mwa yoowo+ ni sipattuxeriwe yoowo. 17 Owo ookhala itthu sootheene sikina sihinatthi opattuxiwa+ ni sootheene sikina sipattuxiwe mwa yoowo, 18 nave owo ti muru wa erutthu, ori muloko.+ Yoowo ti ephattuwelo ya okumi ni mwaana oopacerya. Topacenrye ohihimuwa mwa alipa-ookhwa,+ tivo vakhanle awe oopacerya mwa itthu sootheene. 19 okhala wiira Muluku vaahimusivela wiira itthu sootheene sikhale mwa Yesu,+ 20 siiso-tho, mwa yoowo, Muluku aahisiveliwa waataana-tho ni itthu sootheene sikina sa vathi ni sa wiirimu,+ okhalihaka murettele ni ephome+ ya Yesu, emwarexiwe vamwirini wa nihaaxeryo.*

21 Khalai, nyuwo-tho mwaahirakamelana ni Muluku ni mwaari awanani awe, mwaha woowi muupuwela itthu sootakhala. 22 Nto vano, owo ohaataana-tho ni nyuwo mwaha wa okhwa wa mwanawe, wiira mukhale oowaarya, oohittheka ni muhikhalane mulattu vamaithoni vawe.+ 23 Masi, muhaana olipiherya waamini,+ mweemenle ene voolipa,+ muhaanyiheryaka etthu,+ muhaakhiwaka nlipelelo nvahiwe anyu okathi mwaiwale anyu ihapari sooreera, seiyo yaalaleeriwe aya atthu ootheene vathi-va.+ Nto, miyo Paulo, kookhala namalaleya a ihapari iyo sooreera.+

24 Vano kinnitteeliwa murima hata kihaawaka mwaha wa nyuwo.+ Kinoona wiira nlelo kihaana ohaawa ntoko mpantta wa erutthu ya Kristu.+ Ohaawa iwo, onookhaliherya erutthu ya Kristu, eyo piiyo, muloko.+ 25 Miyo kookhala murumeyi a muloko ola, moovarihana ni muteko ovahiwe aka+ ni Muluku, wa waalaleerya atthu voomalela masu a Muluku, wiira mphwanye mureerelo. 26 Eyo, esiiri ya Muluku,+ yeeyo yahaasuweliwe khalai,*+ hata ni atthu yaakhala okathi ole. Masi vano, esiiri eyo aasuwelihiwa ale oororomeleya.*+ 27 Nto, Muluku oosiveliwa waasuweliha ale oororomeleya* eriyari ya maloko, mihakhu suulupale sa esiiri awe.+ Esiiri eyo tiila: Waataana wanyu ni Kristu, ni nlipelelo na wiirela mpantta ovuwa wawe.+ 28 Owo tuule nimmulaleya ahu, nimulakiheryaka khula mutthu, nimwiixuttihaka khula mutthu ni miruku sootheene, wiira khula mutthu nimukhalihe oomalela moowiiraana ni Kristu.+ 29 Tivonto kinivaraka muteko mwa nthiti, kiilipihaka ni owerya onikivaha awe, weiwo onikeettiha.+

2 Kimphavela wiira musuwele ekhotto yuulupale kiniwana aka, koowanelakani nyuwo ni atthu a oLawodiseya,+ vamosa ni ootheene ale ahitonko okiweha.* 2 Kinniwana wiira mirima sa atthu ootheene silipihiwe+ ni wiira awo yaataanihiweke moophentani.+ Nto eyo ewiirihe ophwanya mihakhu sootheene mwaha wa wiiwexexa saana itthu. Siiso anoowerya osuwela oratteene esiiri ya Muluku, eyo piiyo, Kristu.+ 3 Mwa yoowo, sihiipithihiwa oratteene mihakhu sootheene sa miruku ni osuwela.+ 4 Kinoohimeeryani itthu iya wiira muhimuhiye mutthu awootothakani ni moolumo ooweepesa. 5 Nnaamwi kiri ene ottaiwene, murima aka ori ni nyuwo ni kinnitteeliwa murima+ osuwela wiira munnimwaamini Kristu ni murima anyu wootheene.+

6 Tivonto, okhala wiira moomweemererya Pwiya, Kristu Yesu, mweetteke mwiiraanale ene nuuwo. 7 Mwiixeriheke mitathaari sanyu, mulipihiwaka mwa yoowo,+ mulipihiwaka moowaaminini,+ ntoko mwiixuttihiwe anyu. Nave, okathi munimuxukhuru anyu Muluku, waamini wanyu otepeke wuncerereya.+

8 Mwiipasoopeke wiira muhimuhiye mutthu oovarakani+ ntoko mwaamunama ni moolumo oowoototha ni miyuupuwelo seethiru, muttharaka itthu atthu alimalenle aya ni muttharaka miruku sa olumwenku, ohiya miruku sa Kristu. 9 Tthiri, Kristu owo oosareya mikhalelo sootheene sa Muluku.+ 10 Nto, nyuwo moomalela mwa yoowo,* ori muru wa olamulelo wootheene ni okhulupale.+ 11 Okhala wiira muhaataana nuuwo, muhinnuwihiwa, ohiya ni matata, masi mwaha wa orula erutthu yoottheka,+ maana arumeyi a Kristu aninnuwihiwa siiso.+ 12 Okathi mwaapatisiwe anyu,+ mwaahivithiwa vamosa ni Kristu. Nave okhala wiira mwaahaataana nuuwo ni mwaahaamini itthu Muluku opanke awe ni owerya wawe, moohihimuxiwa+ vamosa nuuwo. Tthiri Muluku onvenxa mwa alipa-ookhwa.+

13 Khalai, nyuwo mwaahikhwa mwaha wa itampi sanyu ni mwaha wa ohinnuwihiwa mweerutthuni mwanyu. Nto vano, Muluku ohookhalihani akumi vamosa ni Kristu.+ Vooreera murima, Muluku oonilevelela itampi sahu.+ 14 Nave oottipiha* etukumento+ yaarina malakiheryo yaalempwale ni matata,+ yeeyo yaanivirikanya.+ Muluku oottipiha etukumento eyo okhomelaka vamwirini wa nihaaxeryo.*+ 15 Orumeelaka mwiri wa nihaaxeryo, ohaarula ikuwo makhulupale ni anamalamulela, aakuxaka ntoko ipottha ni oowooniherya atthu ootheene wiira ohaaxintta.+

16 Siiso, ahikhale onoophukelani mwaha wa soolya ni soowurya,+ aahiiso mwaha wa otthapela niira, mweeri musya,+ nnakhala esaabadu.+ 17 Iyo saari ntoko eruku ya itthu saakela orwa.+ Masi ekeekhai ene ti Kristu.+ 18 Mwiipasoopeke ni atthu yaale aniiyeviha aphavelaka owehiwa paahi. Nave mwiipasoopeke ni ale anikokhorela malaikha,* okhala wiira awo pooti wookhoottiheryani waakhela etthuvo anyu.+ Atthu awo anivarexexa itthu siniweha aya paahi, nave anniittottopa mwaha wa miyuupuwelo saya seethiru. 19 Atthu siisa, khaninvarexexa ole ori muru ahu,+ yoowo onilyiha erutthu ela, onakhaliha emosa-ru munikhomanyiwa makhuva ni mitika.* Nto erutthu eyo enninnuwa ntoko Muluku oniphavela awe.+

20 Akhala wiira muhookhwa vamosa ni Kristu, mwaakiheriwaka miruku sa olumwenku,+ xeeni muneetta anyu ntoko atthu a vathi-va? Xeeni ottharaka sooruma sa olumwenku ola, seiyo sini:+ 21 “Muhivare, muhilye, nnakhala okwata”? 22 Sooruma iyo sinihimya itthu sinipweteya niinaano-ru, moovarihana ni ikano ni itthu atthu aniixuttiha aya.+ 23 Iyo sinikhala ntoko sooloka, masi khasinaakhaliherya atthu okhootta itthu siniphavela erutthu aya.+ Eyo enniiraneya okhala wiira animukokhorela Muluku ntoko aniphavela aya, nave annoothererya wiiyeviha ni annihaaxa erutthu aya.

3 Okhala wiira moohihimuxiwa mookhwaani vamosa ni Kristu,+ weeso muthipeleleke ophavela itthu sa wiirimu, weiwo Kristu okilanthi awe moono woolopwana wa Muluku.+ 2 Muupuweleke itthu sa wiirimu,+ ohiya itthu sa vathi-va.+ 3 Nyuwo muhookhwa, nave okumi anyu woovithiwa vamosa ni Kristu, okhala wiira eyo ennivarihana ni ele Muluku oniphavela awe. 4 Okathi Kristu, yoowo ori okumi ahu,+ onrowa awe wiixooniherya, nyuwo-tho munimooniheriwa vamosa nuuwo ni ovuwa.+

5 Vano, mwiive itthu iya soohiloka erutthu anyu eniphavela aya:+ Orupihana woohiloka,* itthu soonanara, osiveliwa orupihana woohiloka,+ soophavela soohiloka ni ohiphiyeriwa, eyo piiyo, waakokhorela amuluku eethiru. 6 Onanariwa wa Muluku onimwaaphwanya ale aniira itthu iyo. 7 Ola ti waari mweettelo anyu khalai, okathi mwaavara anyu itthu iyo soonanara.+ 8 Masi vano mukhootteke itthu iya sootheene: Oviruwa, onanariwa, otakhala murima,+ oveeha+ ni oruwana,+ nnakhala sihikhume mwaano mwanyu. 9 Muhootheryaneke.+ Murule omutthu wa khalai+ ni miteko saya. 10 Vano nware omutthu wa niinaano,+ yoowo onikhalihiwa musya ni osuwela weekeekhai, onalikana ni omutthu yoowo opattuxiwe ni Muluku.+ 11 Omutthu owo wa niinaano khuuvo mukereku aahiiso muyuda, mutthu oowinnuwihiwa nnakhala oohinnuwihiwa, epottha wala mutthu ootaphuwa, mmalapo, hata xiitha,* maana ootheene anoolikana. Masi Kristu tori itthu sootheene para itthu sootheene.+

12 Okhala wiira moothanliwa ni Muluku+ ni mwa atthu oowaarya ni oophentiwa, mooniheryeke* othunku,+ oreera murima, wiiyeviha,*+ omaala+ ni opixa murima.+ 13 Nvilelaneke, mulevelelaneke ni murima wootheene ikwaha sootheene,+ hata musuwelaka wiira mootthekeliwa.+ Ntoko Yehova oolevelenlyaaweni, nyuwo-tho mwiireke siiso.+ 14 Ovikana itthu sootheene iya, mooniheryeke* ophenta,+ okhala wiira ophenta iwo onniwiiraaniha atthu ootheene voomalela.+

15 Nave-tho, murettele wa Kristu weettiheke mirima sanyu,+ okhala wiira muhiitthaneliwa murettele owo, wiira mukhale erutthu emosa-ru. Mukhaleke atthu ooxukhuru. 16 Nuulumo na Kristu nikhale ni nyuwo ni noovaheeni miruku sootheene. Muhihiyererye wiixuttihana ni olipihana* ni masaalimu,+ munvuwihaka Muluku ni isipo soomutthapela ni omuxukhuru. Mmwiipeleke Yehova ni murima anyu wootheene.+ 17 Khula etthu enihimya anyu aahiiso eniira anyu, mwiireke mwa nsina na Pwiya Yesu, nave mmuxukhuruku Muluku Tiithi, mwa Yesu.+

18 Nyuwo athiyana, nwiiweleleke aiyanyu voohinlaseya,+ ntoko simphavela aya Apwiya. 19 Nyuwo alopwana, muhihiye waaphenta amwaarinyu+ ni muhaaviruweleke.*+ 20 Nyuwo anamwane, nwiiweleleke apapinyu ni amaminyu mwa itthu sootheene,+ okhala wiira eyo ennaasivela Apwiya. 21 Nyuwo axipaapa, muhaanyonyiheke* aniinyu,+ wiira ahiriipiweke murima. 22 Nyuwo ipottha, nwiiweleleke ale munaavarela anyu muteko+ vathi-va mwa itthu sootheene. Khahiyo paahi owiiwelela okathi anoowehaayani, wiira mwaasivelihe atthu.* Masi mwaarumeeleke ni murima wooreera, mwaha wa omoova Yehova. 23 Khula etthu munipaka anyu, mpakeke ni okumi anyu wootheene, ntoko munimurumeela Yehova,+ ohiya atthu. 24 Moosuwela wiira Yehova tonrowa wootthuvelani, oovahakani sooreera aasukenrye awe atthu awe.+ Munvareleke muteko Pwiya, Kristu. 25 Tthiri ole oniira sootakhala onooliviwa ni sootakhala siniira awe,+ maana Muluku khonimuthanla mutthu.+

4 Nyuwo munivareliwa muteko, muthokoreryeke ipottha sanyu saana ni mwa xariya, musuwelaka wiira nyuwo-tho mookhalana Pwiya wiirimu.+

2 Mukhaleleke nthiti ovekela.+ Nto okathi munipaka anyu eyo, mukhaleke oowehaweha ni ooxukhurela.+ 3 Munivekeleleke+ wiira Muluku onivahe eparakha yoolaleya masu ni olavula esiiri ya Muluku enimuhimya Kristu, yeeyo ekiirihale otthukweliwa mukhatteya-mu.+ 4 Nave mukivekeleleke wiira kiwerye olaleya oratteene ntoko vanreerela aya.

5 Mweetteke ni ankhili ohoolo wa ale ahinaamini ni murumeeleke saana okathi anyu.*+ 6 Okathi wootheene, moolumo anyu ekhaleke ooreera, ooweeleeliwa* ni maakha,+ wiira musuweleke moota woomwaakhula khula mutthu.+

7 Tiikhiko,+ munnaka oophentiwa, murumeyi oororomeleya ni namuteko mukhwiihu mwa Apwiya, onimooleelani ihaali saka sootheene. 8 Miyo koomuruma orwa iwo wiira ooleeleni ihaali sahu ni wiira olipihe mirima sanyu. 9 Owo onirwa ni Oneesimo,+ munnaka oophentiwa ni oororomeleya, yoowo aakhala ni nyuwo. Awo animooleelani itthu sootheene siniiraneya nno.

10 Aristarko,+ yoowo otthukwelaniwe aka, onnookhomasani, vamosa ni Marko,+ mmusi awe Baarnaba (Marko owo, ti yoole muleeliwe anyu wiira arwa wooxukuryani, mmwaakhele saana).+ 11 Nave, Yesu yoowo oniihaniwa Naxariya, onnookhomasani. Axinna ala araru anivarana aka muteko wa Omwene wa Muluku, toowinnuwihiwa. Awo annikilipiha vanceene. 12 Epaafara,+ murumeyi a Kristu Yesu, yoowo aakhala ni nyuwo, onnookhomasani. Okathi wootheene, onnoovekelelani ni nthiti, wiira wookiseryani waya, mulipe saana ni mukhale oolikana ene wiira mweetteleke itthu sootheene Muluku oniphavela awe. 13 Kinnimukhalela onamoona Epaafara owo, wiira onnoovarelani muteko ni nthiti. Nave-tho onnaavarela muteko ni ntithi, ale ari oLawodiseya ni oHiyeraapoli.

14 Luka,+ munnihu oophentiwa, yoowo ori meetiku, onnookhomasani. Nave-tho, Dema+ onnookhomasani. 15 Mwaakhomase axinna a oLawodiseya ni mmukhomase Ninfa vamosa ni muloko ori vate vawe.+ 16 Mwamaliha osoma epaphelo ela, muroihe muloko wa oLawodiseya wiira yasommwe-tho.+ Nave nyuwo musome epaphelo enikhuma oLawodiseya. 17 Mmuleele Arikipo+ wiira: “Muthokoreryeke muteko ovahiwa anyu ni Apwiya, wiira nvareke oratteene”.

18 Ti miyo Paulo kinookhomasani. Kinlepa ni ntata naka.+ Muupuweleke wiira kirootthukiwa.+ Oreera murima wuulupale wa Muluku okhaleke ni nyuwo.