EPAPHELO YA NENLI PAULO AALEPENLE AWE ATESALOONIKA

1 Miyo Paulo ni Silvano* ni Timootheyo,+ ninnoolepelani nyuwo a muloko wa oTesaloonika, mwiiranne ni Muluku Tiithi, vamosa ni Pwiya Yesu Kristu:

2 Oreera murima wuulupale ni murettele wa Muluku Tiithi, vamosa ni wa Pwiya Yesu Kristu, okhale ni nyuwo.

3 Axinnaka, okathi wootheene nihaana omuxukhuru Muluku mwaha wa nyuwo. Vanniphwanela wiira siiso, okhala wiira waamini wanyu onootepa wunnuwa, nave ootheene anyu ophentana wanyu, onnitepa wuncerereya.+ 4 Tivo, ninniittottopa vanceene mwaha wa nyuwo+ eriyari ya miloko sa Muluku. Hiyo ninnihimya wiira hata mulupatthiwaka ni ohaaxiwa,+ nyuwo munnivilela mmuroromelaka Muluku. 5 Eyo ethoonyeryo enooniherya wiira Muluku onniphuka mwa xariya, nave mwaha wa yeeyo, munnooniwa ophwanelela waakhela Omwene wa Muluku, yoowo munihaawela anyu.+

6 Tthiri, okhala wiira Muluku naxariya, owo onrowa waahukhumu ale anoohaaxani.+ 7 Okathi Pwiya Yesu+ onrowa awe wooniheriwa okhumaka wiirimu ni malaikha awe oowerya ni malumi a mooro, nyuwo munihaaxiwa vano, munrowa woopowa vamosa ni hiyo.+ 8 Okathi owo, onoowunlela ikuhu ale ahinimusuwela Muluku ni ale ahiniiwelela ihapari sooreera sinimuhimya Pwiya Yesu.+ 9 Pwiya ahu onrowa waaphukela atthu awo. Ehukhumu aya enrowa okhala opwetexiwa ohinimala,+ siiso, owo khonrowa-tho waathokorerya nnakhala waakhaliherya ni owerya wawe wuulupale. 10 Okathi Pwiya onirwa awe wiira ovuwihiwe vamosa ni arumeyi awe oororomeleya,* ootheene ale animwaamini anrowa otikinihiwa mwaha wa yoowo. Nave okhala wiira nyuwo mookupali itthu sootheene noohimenryaahuni, munrowa okhala vamosa ni atthu awo.

11 Tivo, okathi wootheene ninnoovekelelani wa Muluku, wiira owooneeni ophwanelela wiihaniwa nuuwo,+ nave wiira ni owerya wawe, opake itthu sootheene sooloka oniphavela awe owiirelani ni wiira miteko sanyu, seiyo sinooniherya waamini, seetteke saana. 12 Siiso, nsina na Pwiya ahu Yesu, nnoovuwihiwa mwaha wa nyuwo. Nave nyuwo-tho munoovuwihiwa mwaha wa waataana wanyu wuulupale nuuwo. Nto eyo enimooniherya oreera murima wuulupale wa Muluku ahu ni wa Pwiya Yesu Kristu.

2 Axinnaka, nilavulaka sa okathi Pwiya ahu Yesu Kristu onitthika* awe,+ ni okathi ninrowa ahu othukumanyiwa vamosa nuuwo,+ ninnoovekelani wiira 2 muhaakuveke okuxeya murima aahiiso oxanka, akhala wiira vannihimmwa wiira nihiku na Yehova noophiya.+ Muhixankeke, hata atthu awo ahimyaka wiira ihapari iyo sinikhuma wa Muluku,+ aahiiso mmwiiwale ene mutthu mukina, wala musomme ene mpapheloni atthu akina anihimya aya wiira ti hiyo nilempe.

3 Ohikhale mutthu onoowokani,+ okhala wiira nihinatthi ophiya nihiku nlo, onoopacerya toko ovirikanyiwa Muluku*+ ni onimooniheriwa mutakhali. Ti yoowo onrowa opwetexiwa.+ 4 Owo ti namavirikanya ni onniihela vasulu va khula etthu enihimmwa okhala “muluku”, aahiiso enikokhoreliwa. Siiso, onnikilaathi mutemplo mwa Muluku, iixooniheryaka ohoolo wa atthu ootheene wiira owo muluku. 5 Niireke khamunuupuwela wiira okathi kaari aka ni nyuwo, kaamakela wooleelani itthu iya?

6 Vano nyuwo munnimusuwela ole onimukhoottiherya mutakhali owo, wiira ohooniheriwe ohinatthi ophiya okathi aya. 7 Mweekeekhai, otakhala wa mutthu owo, weiwo ohinooneya, oniira ovaraka muteko aya.+ Masi otakhala iwo khonrowa osuweliwa, mpakha okathi ohinrowa awe okhala-tho ole onimukhoottiherya. 8 Nuumala-vo, mutakhali owo onimooniheriwa. Vano, Pwiya Yesu onompwetexa orumeelaka moolumo oowerya anikhuma mwaano mwawe+ ni onommala-maliha okathi onrowa aya wooneya+ otthika* wawe. 9 Okathi mutakhali owo onrowa awe okhumelela, onoorumeela owerya wa Satana,+ nave onoopaka miiriirya sinceene, ithoonyeryo soowootha ni itthu sootikiniha.+ 10 Nave-tho, onookumiherya itthu sootheene sootakhala,+ wiira owootothe ale anrowa opwetexiwa. Nto awo anoopwetexiwa, mwaha wa okhootta waakhela ekeekhai ni ohaasivela ekeekhai eyo, yeeyo yaarowa owoopola. 11 Tivo Muluku onaahiya awe awokiwaka ni itthu soowoothiwa siniixuttihiwa, wiira akupaliki moolumo oowoothiwa.+ 12 Siiso, ootheene aya anoophukeliwa, okhala wiira khiyaakupanli ekeekhai, masi yaanisiveliwa ni itthu sihikhanle sa xariya.

13 Vano, okathi wootheene nihaana omuxukhuru Muluku mwaha wa nyuwo, axinna muniphentiwa ni Yehova, maana okhuma khalai Muluku ohoothanlani+ wiira moopowe, ooreerihakani+ ni ikuru sawe soowaarya ni mwaha wa waamini wanyu ekeekhai. 14 Muluku oowiihanani wiira moopowe mwaha wa ihapari sooreera ninlaleya ahu, wiira nvuwihiwe ntoko Pwiya ahu, Yesu Kristu.+ 15 Tivo, axinnaka, mwiilipihe+ ni nvarexexe itthu* mwiixuttihiwe anyu,+ okhale ni moolumo ahu aahiiso ni ipaphelo sahu. 16 Muluku Tiithi ihu, onniniphenta,+ nave mwaha wa oreera wawe murima wuulupale, owo onninlipiha mahiku ootheene ni onninivaha nlipelelo nihimmala.+ Nto, ninvekela wiira owo ni Pwiya ahu Yesu Kristu, 17 amaalihe mirima sanyu ni yoolipiheni wiira okathi wootheene mpakeke ni mulavuleke itthu sooreera.

3 Tivonto, axinnaka, muhihiye onivekelela,+ wiira nuulumo na Yehova nitepeke omwara-mwareya voowaakuveya+ ni nivuwihiweke, ntoko vaniiraneya aya ni nyuwo. 2 Nave munivekeleleke wiira Muluku onaakiherye atthu ootepa otakhala,+ maana khahiyo wiira atthu ootheene aakhalana waamini.+ 3 Masi Apwiya toororomeleya, nave awo animoolipihani ni anoowaakiheryani Mutakhali. 4 Ntoko atthu anaatthara Apwiya, hiyo ninnoororomelani wiira munnipaka ni munrowa opakaka itthu noorumalyaahuni. 5 Apwiya yookhaliheryekeni omphenta Muluku+ ni ovilela+ wiira mmutthareke Kristu.

6 Axinnaka, vano ninnoovahani malakiheryo mwa nsina na Pwiya ahu Yesu Kristu, wiira nvalaane ni khula munna ohiniiwelela+ ni ohintthara itthu* niwiixuttihalyaahuni.*+ 7 Nyuwo aneene munnisuwela moota mukhanle anyu oonitakiha,+ maana khinentte voohikhalela eriyari anyu. 8 Nnakhala khanilyiiye yoolya ya mutthu mahala ene.*+ Ohiya-vo, naaniimananiha nivaraka muteko woolipa ohiyu ni othana wiira niikhapelele. Khinaaphavela omureya muritti khula mmosa a nyuwo.+ 9 Hiyo nookhalana etireitu ya woovekelani itthu,+ masi khannipaka eyo, maana nimphavela wiira mutthareke ntakiheryo nahu.+ 10 Tthiri, okathi naari ahu ni nyuwo, naamakela woorumani wiira: “Akhala mutthu ohiniphavela ovara muteko, weeso ohilyeeke”.+ 11 Nihiiwa wiira eriyari anyu, aakhala atthu akina ahiniiwelela,+ nnakhala ahinivara-tho muteko, masi aniikeliha myaha sihikhanle sawaya.+ 12 Atthu awo, ninnaaruma ni ninnaatumererya mwa nsina na Pwiya Yesu Kristu, wiira ahaana okhala ni murettele* ni alyeeke itthu aniphwanya aya mwaha wa muteko aya.+

13 Nto nyuwo, axinnaka, muhikhulumuwe opaka itthu sooreera. 14 Akhala mutthu ohiniiwelela itthu nilempe ahu mpapheloni-mu, mukhalane ephoole ni* mutthu owo ni muhiye waataana nuuwo,+ wiira uuliwe muru. 15 Masi muhimuthokoreryeke ntoko nwanani, ohiya-vo, muthipeleleke omulopola+ ntoko munninyu.

16 Apwiya a murettele, yoovahekeni murettele okathi wootheene ni mwa inamuna sootheene.+ Apwiya akhale ni nyuwo ootheene.

17 Miyo Paulo, kinlepa makhomaso ala ni ntata naka.+ Miyo kinlepa siisa ipaphelo saka sootheene, wiira musuweleke wiira ti miyo kilempe.

18 Oreera murima wuulupale wa Pwiya ahu Yesu Kristu, okhale ni nyuwo ootheene.