EPAPHELO YA NENLI YA PEDRU

1 Miyo Simoni Pedru, ka murumeyi ni murummwa a Yesu Kristu. Kinoolepelani nyuwo mwaakhenle waamini wooreerexa ntoko nrina ahu, nivahiwe ahu mwaha wa exariya ya Muluku ahu ni ya Moopoli ahu Yesu Kristu, kiiraka:

2 Muncereriwe oreera murima wuulupale wa Muluku ni murettele, mwaha wa omusuwela saana+ Muluku ni Yesu, Pwiya ahu. 3 Owerya wa Muluku, woonivaha* itthu sootheene nimphavela ahu wiira nikhale akumi ni wiira niivahererye wa Muluku, mwaha wa omusuwela saana Muluku, yoowo oniihanne+ mwaha wa okhala Muluku muulupale ni ooreera murima. 4 Mwaha wa itthu iya, Muluku ooniroromeliha* moolumo awe eekeekhai ni ooreerexa.+ Siiso, mwaha wa moolumo awe, nyuwo munookhalana mikhalelo sirina awe,+ nuumala otthyawa itthu soonanara sa moolumwenkuni, seiyo sinikhumelela mwaha wa soophavela soohiloka.

5 Tivo, mwaha wa yeeyo, mpakeke sootheene muniwerya anyu+ wiira oreera wanyu murima wuncererye waamini wanyu.+ Osuwela wanyu wuncererye oreera wanyu murima.+ 6 Wiihiiha wanyu wuncererye osuwela wanyu.+ Ovilela wanyu wuncererye wiihiiha wanyu. Omurumeela wanyu Muluku ni nthiti wuncererye ovilela wanyu.+ 7 Ophentana wanyu ntoko axinna wuncererye omurumeela wanyu Muluku ni nthiti. Nave ophenta wanyu wuncererye ophentana wanyu ntoko axinna.+ 8 Mwakhalana mikhalelo iya, sinatepa wuncerereya, munoorumeela omusuwela wanyu saana Pwiya ahu Yesu Kristu, wiira mutepeke wiima mihokorokho ni muhivolole.+

9 Akhala mutthu ohirina mikhalelo iya, owo khonoona, oottiyela maitho awe wiira ohooneke okokola,*+ nave onniliyala wiira ooleveleliwa itampi sawe+ sa khalai. 10 Tivonto, axinnaka, mutepeke olipiherya wiihaniwa wanyu+ ni othanliwa wanyu. Mwiira siiso, khamunikhala-khala muhiyaka waamini.+ 11 Siiso, munimweemereriwa okela ni ovuwa Moomweneni ohinimala+ wa Pwiya ahu ni Moopoli ahu Yesu Kristu.+

12 Tivo vaniphavela aka owuupuxeryani itthu iya okathi wootheene, nnaamwi musuwenle ene ni mulimpe ene mweekeekhaini, yeeyo mwiixuntte anyu. 13 Masi kinoona wiira ti vookhalela otthikela-tho owuupuxeryani itthu iya,+ nlelo kirina ene erutthu* ela.+ 14 Miyo koosuwela wiira erutthu* ela khenrowa okhala okathi munceene, ntoko Pwiya ahu Yesu Kristu okisuwelinhe awe oratteene.+ 15 Kinimwiimananiha vanceene wiira karowa vale, nyuwo nwerye wuupuwela* itthu iya sootheene.

16 Hiyo nihoosuwelihani owerya ni otthika* wa Pwiya ahu Yesu Kristu, nihittharaka myaha soowoothiwa, seiyo sinipakeleliwa ni atthu. Masi, nihoosuwelihani okhala wiira nooweha ovuwa wawe ni maitho ahu.+ 17 Owo aahaakhela nttittimiho ni ovuwa onikhuma wa Muluku, Tiithi. Eyo yaahiiraneya okathi Muluku aamuhimenrye awe moolumo ala, ani: “Ola Mwanaka, kinimphentexa aka, yoowo onikihakalaliha vanceene”.+ 18 Mweekeekhai, naahiiwa moolumo ala ekhumaka wiirimu, okathi naari ahu ni Yesu, omwaako waathanliwe ni Muluku.

19 Tivo nintepa ahu okupali wiira moolumo a maprofeta animwiiraneya tthiri. Nyuwo munniira saana nwiriyanaka oratteene moolumo awo,+ yaawo anlikana ni muthuko onimwaleela weepiphini, eyo piiyo, vamurimani vanyu, mpakha oxa ni mpakha okhumelela nivoroxa.*+ 20 Nyuwo musuweleke saana wiira, khiivo eprofesia ya Soolempwa enikumiheriwa ni muupuwelo wa apinaatamu. 21 Tthiri, eprofesia khetonko okumiheriwa ni apinaatamu,+ masi apinaatamu yaahilavula moolumo a Muluku, yeettihiwaka ni ikuru soowaarya.+

2 Masi, eriyari ya atthu awo yaahikhala-tho maprofeta oowootha. Nave-tho eriyari anyu, anookhala alipa-oowiixuttiha oowootha.+ Moolavilavi, awo anookumiherya itiini sinrowa ohonona waamini wanyu. Nave anoomukhootta ole* owooponle.+ Mwaha wa opaka eyo, awo anoopwetexiwa moowaakuveya. 2 Nave-tho, atthu anceene anrowa ottharaka mweettelo aya woohiloka onooniherya ohuuliwa muru.*+ Nto, mwaha wa atthu awo, ephiro ya Muluku* enrowa oveehiwaka.+ 3 Mwaha wa ohiphiyeriwa waya, awo animweererya owiiyeryani ni moolumo oowoka. Masi ohukhummwa waya, weiwo alakeliwe aya okhuma khalai,+ khonrowa opisa. Awo anoopwetexiwa tthiri.+

4 Mweekeekhai, Muluku khaalevelenle malaikha yaatthenke,+ masi aahirihela malaikha awo oTaartaru,*+ otthukwelaka mweepiphini* yuulupale, wiira yaphukeliwe.+ 5 Muluku khaalevelenle atthu a khalai, masi aahirupihela epula yuulupale olumwenku ole+ waasanrye atthu ootakhala,+ khumoopola Nowe, yoowo aalaleya exariya,+ vamosa ni atthu akina 7.+ 6 Nave aahipwetexa epooma ya oSodoma ni ya oGomora, khuhala ettuurwa paahi.+ Siiso, aahiwooniherya atthu ootakhala murima, etthu yaarowa okhumelela ohoolo.+ 7 Masi aahimoopola Lothi, yoowo aari naxariya+ ni aaxanka vanceene mwaha wa mweettelo woohiloka onooniherya ohuuliwa muru* wa atthu ale ootakhala. 8 Mweekeekhai, okathi naxariya owo aakhala awe eriyari ya atthu ale ootakhala, aaniweha moota yaakhala aya ni aaniiwa itthu yaahimya aya. Siiso, khula nihiku, itthu iyo saanimuriipiha murima. 9 Tivonto, Yehova* onnisuwela owoopola mmaxakhani atthu ooreera murima.+ Masi onnaasuka ale ootakhala murima, wiira yapwetexiwe* nihiku noophukela,+ 10 vanceenexa ale aniphavelasa waarupiha akina wiira enanarihe irutthu sa atthu awo+ ni ale anaathanya makhulupale.*+

Awo toowiikuxererya ni oowiisoona, nave khanoova waaveeha ale anittittimihiwa ni Muluku. 11 Masi malaikha, nnaamwi eri ene ooweryexa waavikana awo, khaniwootherya ni khanaaveeha atthu awo aniixuttiha itthu soowoothiwa, mwaha woowi malaikha awo annimuttittimiha Yehova.*+ 12 Atthu awo anniveeha itthu ahinisuwela aya. Anoopwetexiwa mwaha wa mweettelo aya wootakhala,+ siisaale inama sinitotholiwa aya wiira sivariweke ni siiviweke. 13 Nave awo anrowa ohukhummwa mwaha wa miteko saya sootakhala.

Onnaasivela vanceene opuha yooniwaka. Ari ntoko malepa,+ yaawo annanariha muloko. Nave onnaasivela vanceene wiixuttiha itthu soowoothiwa, okathi anilya aya efesta ni nyuwo.+ 14 Awo anniphavela vanceene oraruwa*+ ni khaniwerya ohiya etampi. Nave annaawoka ale ahirina waamini woolipa.* Mirima saya soosareya nrima.* Awo tootakhaliwa. 15 Atthu awo aahiya ephiro yooreera, khurimeela. Aatthara ephiro ya Balaamu,+ mwaana a Beyori, yoowo aapaka itthu sootakhala ophavelaka oliviwa.+ 16 Masi aahittaruxiwa mwaha wa ohipaka etthu yooreera.+ Vano, puuru, yoowo ohinilavula, aahimulavuliha profeta owo, omukhoottiheryaka otthara ephiro awe yootakhala.+

17 Awo anlikana ni ihime* sihikhanle maasi ni meeku anikuxiwa ni epheyo yootupa. Nto atthu awo aasukeriwa epiphi yootepa oriipela.+ 18 Awo annilavula itthu sinikhala wiira ti sa faita, masi sihirina efaita. Annivara miteko sinooniherya mweettelo woohiloka onooniherya ohuuliwa muru* ni anniwiiriha atthu otthikela ophavela itthu soohiloka.+ Nave annaawoka wiira epakeke itthu sootakhala,+ seiyo ahiyale aya. 19 Atthu awo aniixuttiha itthu soowoothiwa, annaaroromeliha atthu otaphuwa, masi awo mmansaya ari ene ipottha sa itthu sootakhala.+ Mweekeekhai, vakhala wiira mutthu onniweriwa ni mutthu mukina, mutthu owo onnikhala epottha awe.*+ 20 Tthiri, vakhala wiira atthu awo ahoopowa itthu soonanara sa olumwenku ola,+ mwaha wa omusuwela saana Pwiya ni Moopoli, Yesu Kristu, nto khutthikela ovara itthu simosa-ru, yeettihiwaka ni itthu iyo, eyo etthu yootepa otakhala ovikana okathi yahaasuwela aya ekeekhai.+ 21 Fataari atthu awo yahaasuwenle ephiro ya xariya, ohiya osuwela ephiro eyo, nuumala-vo anahiya weettela sooruma sa nlamulo na Muluku, seiyo yaakhenle aya.+ 22 Ohiiraneya naawo muhapo weekeekhai onihimya wiira: “Mwalapwa ootthikela olya marapheyo awe, nave ekuluwe yeeyo emanle orapihiwa niinaano, yootthikela ophirikeya vamattopheni”.+

3 Axinnaka oophentiwa, ela epaphelo ya nenli kinoolepelaakani. Ntoko koolepenlyaakani epaphelo yoopacerya, vano kiniphavela wootumereryani, kiwuupuxeryakani wiira murumeele wuupuwela wanyu saana,+ 2 muupuwelaka moolumo yaahimmwale* khalai ene ni maprofeta oororomeleya ni itthu aixuttiha awe Pwiya ahu ni Moopoli ihu. Itthu iyo moowiiwa arummwa. 3 Musuwele etthu ela: Mahiku ookiserya, anookhumelela alipa-ooveeha itthu sooloka, nave anrowa opakaka itthu sootakhala, seiyo sinaasivela.+ 4 Awo anoohimyaka wiira: “Ole aaleihenrye wiira aamutthika,* ori vai?+ Okhuma okathi amuhavinre ahu akhwiiye aya, itthu sootheene nlelo siri ntoko saari aya, okhuma okathi sipattuxiwe aya itthu sootheene”.+

5 Awo khaniphavela wuupuwela ekeekhai ela: Okhuma khalai yaahikhala erimu ni wiira Muluku aahirumeela nuulumo nawe wiira ovalaanye elapo, maasi ni eriyari ya maasi.+ 6 Itthu iyo saahaapwetexa atthu a mahiku ale. Eyo yaahiiraneya okathi yoole maasi yaakhunenle aya elapo yootheene ya vathi.+ 7 Nave ni nuulumo nimosa-ru, erimu ya vano ni elapo ya vano soosukeriwa opahiwa ni mooro, nihiku anrowa aya ophukeliwa ni opwetexiwa atthu ootakhala.+

8 Tivo, axinnaka oophentiwa, muhiliyale etthu ela: Para Yehova,* nihiku nimosa ninlikana ni iyaakha 1.000. Nave iyaakha 1.000, sinlikana ni nihiku nimosa.+ 9 Yehova* khonipisa omaliherya etthu oleihenrye awe,+ ntoko atthu akina anuupuwela aya wiira onnipisa. Ohiya-vo, owo onnoopixeryani murima, maana khoniphavela wiira opwetexiwe nnakhala mutthu mmosa. Masi oniphavela wiira atthu ootheene arukunuxe murima.+ 10 Nihiku na Yehova,*+ nnimoorwa ntoko latarau.+ Nihiku nlo, erimu enoorimeela+ ni oruma wuulupale,* nave itthu sa wiirimu ni sa vathi sinooviha ni sinootothowa. Elapo ni itthu sootheene siri memmo sinrowa osuwelihiwa.*+

11 Okhala wiira itthu sootheene sinrowa ototoxiwa, muthokoreryeke mweettelo anyu ni etthu munireerela anyu opaka. Mukhaleke atthu anivara miteko sooloka ni mpakeke itthu sinooniherya wiira munniroromeleya wa Muluku. 12 Nave, nwehereryeke nihiku na Yehova,* muhiliyalaka.*+ Nihiku nlo, erimu enoopwetexiwa+ ni mooro, nave itthu sa wiirimu ni sa vathi, sinootothowa mwaha wa oviha vanceene! 13 Ninnilipelela erimu esya ni elapo esya, ntoko Muluku oleihenrye awe,+ memmo enrowa aya okhalaka exariya.+

14 Siiso, axinnaka oophentiwa, okhala wiira munnilipelela itthu iya, mwiimananiheke vanceene wiira wookiseryani waya, Muluku oophwanyeeni muhirina nlepa, nnakhala nthowa, masi murina ene murettele.+ 15 Muthokoreryeke opixa murima wa Pwiya ahu ntoko eparakha ya woopoliwa. Nave, ti siiso oolepenlyaaweni munnihu oophentiwa Paulo, ovahiwaka ankhili ni Muluku.+ 16 Mweekeekhai, ipaphelo sawe sootheene, oolepa itthu iya. Masi, itthu sikina olempe awe ti soovila wiiwexexa, nave ale ahinsuwela saana* ni ale ahilimpe muupuwelo aya, annihonona itthu iyo, ntoko anihonona aya Soolempwa sikina, yiirelaka opwetexiwa.

17 Tivonto, axinnaka oophentiwa, okhala wiira moosuwela itthu iya sihinatthi wiiraneya, mwiipasoopeke wiira muhihapuxiwe ni itthu soowoothiwa aniixuttiha aya atthu ootakhala murima, wiira waamini wanyu ohivukuwe.+ 18 Ohiya-vo, mwiimananiheke wiira mutepeke waakhela oreera murima wuulupale ni osuwela wa Pwiya ahu ni Moopoli ahu, Yesu Kristu. Owo ovuwihiweke vano ni mahiku ootheene. Amen.