EPAPHELO YA NEERARU YA YOHANI

1 Kinilepa ti miyo, mutokweene anyu,* koolepelakani nyuwo Gaio. Kinnoophentani ni murima aka wootheene.

2 Munnaka oophentiwa, kinnivekela wiira itthu siweettelekeni saana ni mukhalaneke okumi wooloka, ntoko siri anyu vano. 3 Kootteeliwa murima vanceene okathi anna yaarwiiye aya, khuhimya* wiira nlelo munneettela ekeekhai moororomeleya.+ 4 Kaiwaka wiira anaaka anneettela ekeekhai,+ kinnitteeliwa murima vanceene. Khiivo etthu ekina enikitteeliha murima* siiso.

5 Munnaka oophentiwa, munnooniherya ororomeleya wanyu wa Muluku, okathi muniwiirela anyu sooreera anna, hata muhaasuwelaka.+ 6 Awo aahimya wiira munnaaphenta anna a mmulokoni. Koovara metto, mwaakhaliherye vaniwerya anyu, okathi onikhuma aya ni mukhalelo onimusivela Muluku.*+ 7 Tthiri, mwaha wa nsina na Muluku, awo yaahirowa olaleerya, ahilipelelaka ovahiwa etthu+ ni ale yahaakhanle ayuda. 8 Tivo, nihaana owaakhela saana atthu siisa,+ wiira neetteleke ekeekhai vamosa ni yaawo.+

9 Kihaalepela epaphelo anna ootheene a mmulokoni, masi Diotrefe, yoowo oniphavela okhala opuro woopacerya eriyari ya anna,+ khonivaha efaita ele enihimya ahu.+ 10 Tivo, karwa vale weiwo, kinoohimya sootakhala sootheene oniira awe ni itthu sinnootherya awe ni moolumo ootakhala.*+ Khahiyo yeeyo paahi, owo khoniphavela owaakhela anna+ ni nttittimiho. Nave onneererya waakhoottiherya ale aniphavela owaakhela anna awo ni onneererya owoomola mmulokoni.

11 Munnaka oophentiwa, muhitakiheke itthu sootakhala, masi mutakiheke itthu sooloka.+ Ole onipaka itthu sooloka, onikhuma wa Muluku.+ Ole onipaka itthu sootakhala, khomusuwenle Muluku.+ 12 Vano, atthu ootheene annimuttottopela Demeetrio. Nave-tho ekeekhai ennimukhalela onamoona. Hiyo-tho ninnimukhalela onamoona, nto nyuwo moosuwela wiira itthu sinihimya ahu ti seekeekhai.

13 Kaahikhalana itthu sinceene soowoolepelani, masi nkiniphavela woolepelani mpapheloni-mu ni etinta. 14 Miyo kinnilipelela orwa weiwo moohipisa, wiira kilavule ni nyuwo niitho-nniitho.

Murettele okhale ni nyuwo.

Apatthani ahu annookhomasani. Mwaakhomase apatthani aka, mmosa-mmosa.