Itthu Sinikhaliherya

NIIREKE NYUWO MWA MUTTHU OOHAKALALA? Akhala wira ti siiso, exeeni eniwiirihani ohakalala? Niireke emusi anyu? Muteko? Aahiiso, etiini anyu? Waaniheryasa, nyuwo muniphavela etthu enrowa woophwanyihani ohakalala, ntoko: omaliha osoma, ophwanya muteko, wala othuma ekaaro.

Atthu anceene, annihakalala nuumala ophwanya etthu yaaphavela aya. Masi niireke ohakalala iwo onnipisa? Nnaari, maana onikhala okathi vakhaani paahi.

Khuuvo mutthu ohimphavela ohakalala. Nnaamwi ohipisaka, ohakalala onnimwiiriha mutthu otteeliwa murima ni itthu sirina awe ni ophavela okhala mukumi.

Eyo khentaphulela wira nihaana okhalana itthu sotheene, masi ontaphulela ohakalala ni itthu sirina ahu. Nto vaavo ninhimya ahu so: “Miyo kinrowa ohakalala paahi akhala wira kinoothuma . . . ”, wala “kapaka . . . ”, eyo enooniherya wira khanrina ohakalala.

Hiyo pooti olikanyiha ohakalala ni ekumi yooloka. Mutthu oniwerya sai okhalana ekumi yooloka? Owo ohaana olya saana, wiina nikuruta, ni okhalana mweettelo wooloka. Vamosaru, wira nihakalale nihaana okhalana mikhalelo sooloka sinrowa okhaliherya okumi ahu.

Mikhalelo xeeni sinikhaliherya wira mutthu ohakalale? Sihaavo mikhalelo sinceene, masi iya sinittharelana ti sootepa otthuneya:

• OHAKALALA NI ITTHU SIRINA AHU NI OVAHA

• EKUMI YOOLOKA NI OVILELA

• OPHENTA

• OLEVELELA

• OSUWELA YOOLAKELA YA OKUMI

• NLIPELELO

Eliivuru emosa yoottittimihiwa eni: “Òreriwa t’ale antthara makhalelo òrera”. (Esalimo 119:1) Niwehe moota makhalelo awo aniphwanyiha aya ohakalala.