Mwaha 18
Yakobe Onirowa Oharani
NYUWO munnaasuwela alopwana ala Yakobe onilavulana awe? Nuumala weetta mahiku manceene, Yakobe aahikumana ni awosa veehimeni. Awo yaakhapelela ipwittipwitthi saya. Yakobe aahikoha wira: ‘Mwaa woowi?’
‘Oharani,’ awo yaahaakhulasa.
‘Nyuwo munnimusuwela Labano?’ Yakobe aahikoha.
‘Aayo,’ awo yaahaakhulasa. ‘Munweheke, owo onrwa vo ti Rakheli mwanawe ni nikoto nawe na ipwittipwitthi.’ Nyuwo munniwerya omoona Rakheli onrwa valee moohirakamela?
Vaavo Yakobe aamoonalya awe Rakheli ni ipwittipwitthi s’atata awe a Labano, aahirowa ni aahipirikixa nluku veehimeni wira ipwittipwitthi siweryeke owurya. Nuumala vo Yakobe aahimbejari Rakheli ni aahimuleela owo aari aani. Ola aahitteeliwa murima vanceene, nto aahirowa owaani waaleela atithi awe a Labano.
Labano aahihakalala vanceene wi Yakobe aarowa okhala n’uwo. Nto vaavo Yakobe aavenka awe wira omuthele Rakheli, Labano aahihakalala. Hataa vaari siiso, owo aahinvekela Yakobe wira ovare muteko omatta wawe iyaakha thanuu na piili mwaha wa Rakheli. Okhala wira owo aanimphenta vanceenexa Rakheli, Yakobe aahiira ela. Masi vaavo okathi waaphiiya aya wa othela, nyuwo munnisuwela yeeyo yiiranen’ye?
Labano aahimunnya Yakobe mwanawe muulupale mwaamuthiyana Liya mmapuro mwa Rakheli. Vaavo Yakobe vaakhulenlya awe onvarela muteko Labano iyaakha sikina thanuu na piili, Labano aahimunnya-tho Rakheli wira okhalee mwaarawe. Okathi ole Muluku aaneemererya alopwana okhalana athiyana oovikana mmosaa. Masi vano, ntoko Biibiliya sinooniherya awe, mulopwana oohaana okhalana muthiyana mmosaa paahi.