Yoosoma 12

Ottittimiha Okumi ni Ephome

Nooneleke sai okumi? (1) oyiiha erukulu? (1)

MaKristau anooniherya sai ophavela waya okhala saana wa khuta mutthu? (2)

Niireke wira ti vootthekeya wiiva inama? (3)

Sowiira xeeni sihinooniherya ottittimiha okumi? (4)

Nlamulo xeeni na Muluku nikhanle voohimya sa ephome? (5)

Niireke wira eyo enihela muhina oheleliwa ephome? (6)

1. Yehova tokhanle Maphattuwelo a okumi. Okumi wa itthu sotheene sikhanle, onikhuma wa Muluku. (Esalimo 36:10) Muluku onnithokorerya okumi ntoko etthu ya vameekh’aya. Hata okumi wa mwaana orupaliwe t’otthuneya wa Yehova. Olakela omwiiva mwaana owo orupaliwe eri etampi wa Muluku.​—Okhuma 21:22, 23; Esalimo 127:3.

2. Makristau eekeekhai aniimananiha ohipaka etthu enikumiherya ehasara. Anniimananiha wira ekaaro aya vamosa ni empa aya ehikumiherye yootakhala. (Otumererya 22:8) Arumeyi a Muluku khanileva okumi aya mwaha woophavela othweela aahiiso wiihakalaliha paahi. Tivonto awo khaniwiira axooku oowoopiha yaawo moolakela anaaphwanyiha owereya atthu akina. Awo annisyaka otthekula onitumererya owali.​—Esalimo 11:5; Yohani 13:35.

3. Okumi wa inama ti wootthun eya-tho wa Mpattuxa. MuKristau pooti wiiva inama wira ophwanye yoolya, yoowara, aahiiso wira isaakihe iretta ni sowoopiha sikina. (Maphattuwelo 3:21; 9:3; Okhuma 21:28) Masi ohaaxa inama wala wiiva mwaha wa otthekula aahiiso wiihakalaliha paahi, etthu yootakhala.​—Miruku 12:10.

4. Omulya soona, okhuura noz-de-bétele (murette onimwiiriha mutthu ohuupuwela saana) ni olya mirette soohapaliha mwaha wa ophavela wiihakalaliha paahi khahiyo etthu yooloka wa maKristau. Sowiira iyo ti soohiloka mwaha woowi (1) sinninipaka okhala epottha, (2) sinnihonona erutthu ahu, ni (3) itthu soohiloka. (aRoma 6:19; 12:1; 2 aKorinto 7:1) Pooti okhala vooxankiha ohiya soolema iya. Masi wira nimusivelihe Yehova nohaana ohiya opaka itthu iyo.

5. Ephome etthu yootepexa ottittimiheya wa Muluku. Muluku onihimya wira ekumi eri mphomeni. Tivonto varya aya wootthekeya olya ephome. Ti vootthekeya-tho okhuura enama yeeyo ephome aya ehikumihiwe saana. Akhala wira enama eyo eroonyopottholiwa wala erimwiikhwela vantaphani, khenireerela okhuuriwa. Akhala wira yiiviwe nnivaka wala ni kapwitthi, mowaakuva yohaana oyiihiwa ephome aya akhala wira enrowa okhuuriwa.​—Maphattuwelo 9:3, 4; Onamukuttho 17:13, 14; Miteko 15:28, 29.

6. Niireke wira ti vootthekeya waakhulela oheleliwa ephome? Muhaana wuupuwela wira Yehova oniruma wira nihaana osyaka olya ephome. Ela entaphulela wira mmukhalelo ori wotheene nihiheleke mwerutthuni mwahu ephome ya atthu akina aahiiso ephome ahu yeeyo esukiwe. (Miteko 21:25) Tivonto maKristau eekeekhai vahinaakhulela aya oheleliwa ephome. Awo anaakhulela muthinto mukina wa olooliwa oxiripitaali ntoko ole wa oheleliwa mirette sikina sihirina ephome. Awo anniphavela okhala akumi, masi khaneererya otthekela malamulo a Muluku mwaha woophavela osuka okumi aya.​—Matheyo 16:25.

[Efootu ya epaaxina 25]

Wira nimusivelihe Muluku, nohaana osyaka oheleliwa ephome, soolema sootthekeya ni oleva okumi mmukhalelo woohiloka