Yoosoma 15

Apatthani A Muluku Ampaka Eri Yooloka

Vaavo nyuwo munikhalan’anyu mpatthani onisiveliw’anyu, nyuwo muniphavela wira mulikaneke n’uwo. “Muluku t’òrera murima ni t’a exariya”, onihimya Biibiliya. (Esalimo 25:8) Wira nikhale apatthani a Muluku, nihaana okhala ooreera murima ni a xariya. Biibiliya onihimya wira: “Mutthareke mwettelo wa Muluku, okhala wira mwà an’awe òphentiwa. Mwetteleke mophentani.” (aÉfeso 5:1, 2) Inamuna ikina sa wi niire eyo tiiya:

Mukhale oowaakhaliherya akina. “Niwireleke sorera atthu othene.”—aGalasia 6:10.

Nivareke muteko mooluttuweliwa. ‘Nawĩye attharuwe wĩya: ohiya vo, ahaweleke ovara muteko ni matat’awe ntoko vamphwanelelaya.’—aÉfeso 4:28.

Mukhale ooloka mwerutthuni ni mmakhalelo anyu. “Niitteelihe mwa soonanara sotheene s’erutthu ni sa munepa, niphavelaka omaleliha otteela wahu nimoovaka Muluku.”—2 aKorinto 7:1, NM.

Mwaathokoreryeke a emusi anyu ni niphento ni nttittimiho. “Masi mwirirya ene yola onohimyani-tho nyuwo . . . amphenteke mwar’awe ntoko sinìphentawe, ni wira muthiyana amuttittimiheke iy’awe. Nyuwo anamwane! Nwiweleleke atith’inyu.”—aÉfeso 5:33–6:1.

Nwooniherye akina wira munnaaphenta. “Niphentaneke othene, okhala wira ophentana onikhuma wa Muluku.”—1 Yohani 4:7.

Mwiweleleke malamulo eelapo. “Khula mutthu ohana owìwelela [anilamulela] . . . Vano mmulive khula mutthu etthu enimphwanela: mwalive mpósito axinene.”—aRoma 13:1, 7.