MPANTTA 1
Niireke Wira Muluku Onninthokorerya?
OLELO-VA, olumwenku woosareya mixankiho. Ikhotto, ihasara sa ephattu, iretta, osikhini, otakhala, ni itthu sikina soohiloka sinnaahaaxa atthu ikonto sene. Pooti wira nyuwo mookhalana mixankiho sanyu. Tani oniwerya onikhaliherya? Niireke ookhala onnithokorerya?
Ophenta wa Muluku ti wuulupalexa ovikana ophenta weiwo maama orina awe ni mwanawe
Nnoowerya okupali wira Muluku onninthokorerya tthiri. Nuulumo nawe ninhimya so: “Vano Apwiya àwakhula wira: Muthiyana ommwamwiha mwan’awe onowerya omuliyala? Walá onowerya oliyala ommorela ikharari yowo, ori ephome awe? Vano, onamwi uwo amuliyalaka mwan’awe, miyo nkinoliyalani, nnákhala vakhani”.a
Eyo khahiyo etthu yoohakalaliha? Ophenta wa Muluku ti wuulupalexa ovikana ophenta weiwo maama orina awe ni mwanawe. Muluku khonikhala-khala onihiyaka! Tthiri, owo oonikhaliherya mwa enamuna yoohakalaliha. Moota xeeni? Owo oonooniherya esiiri eniphwanyiha ekumi yoohakalala, ori waamini wekeekhai.
Waamini wekeekhai onimoophwanyihani ohakalala. Waamini iwo onimookhaliheryani osyaka mixankiho sinceene, ni ohixanka sakhumelela mixankiho iyo. Nave-tho, onoowiirihani omwaattamela Muluku, ni woophwanyihani murettele mmupuweloni ni vamurimani. Tthiri, waamini wekeekhai onimoophwanyihani mareeliho a muhoolo, eyo piiyo, ekumi ehinimala mParayiisu!
Masi exeeni ori waamini wekeekhai? Nto munrowa ophwanya sai?
a Nwehe yoolepa ya Yesaya 49:15, Nuulumo na Muluku.