Tiivi Eri Yootthuna ya Muluku?

Muluku oniphavela wira nikhalane murettele ni ohakalala woohimala mparayiisu valaponi!

Woonasa wene nyuwo pooti okoha so: ‘Eyo enrowa wiireya sai?’ Biibiliya onihimya wira Omwene wa Muluku tonrowa oruuha mareeliho ala. Ohiya-vo, Muluku oniphavela wira nisuwele Omwene awe ni yoolakela awe.​—Esalimo 37:11, 29; Yesaya 9:6.

Muluku oniphavela wira nikhaleke saana.

Ntoko siisaale tiithi oophenta oniphavela awe wira anaawe akhaleke saana, Tiithi ahu a wiirimu oniphavela wira niphwanye ohakalala ohinimala. (Yesaya 48:17, 18) Owo ooleiherya wira “ole onettela otthuna wa Muluku onokhala mahiku othene”.​—1 Yohani 2:17.

Muluku oniphavela wira neetteleke iphiro sawe.

Biibiliya onihimya wira Mpattuxa ahu oniphavela ‘onixuttiha iphiro sawe’ wira neetteke memmo. (Yesaya 2:2, 3) Owo oothanla ‘nloko nnihaneliwa nsina nawe’ wira nilaleyeke otthuna wawe ilapo sotheene.​—Miteko 15:14.

Muluku oniphavela wira nimukokhoreleke mowiiraana.

Ohiya waavalaanya atthu, omukokhorela Yehova mwa ekeekhai onniwiiriha atthu awo okhala oowiiraana mwa niphento na ekeekhai. (Yohani 13:35) Tani olelo-va aniwiixuttiha atthu mapuro otheene wira amurumeeleke Muluku mowiiraana? Ninnoovekelani wira, musome ebroxura ela wira musuwele waakhuliwa wa nikoho nno.