Waataana ni Itiini Sikina
Niireke atthu ootheene arina itiini saya animukokhorela Muluku tthiri?
Niireke Biibiliya oniixuttiha wiira Yehova onneemererya itiini sootheene hata siixuttihaka itthu soohiloka?
Mat 7:13, 14; Yoh 17:3; aEef 4:4-6
Soowiiraneya sa mbiibiliyani sa efaita yinceene:
Yoox 24:15 — Yooxuwa aahimmye wiira nihaana othanla omukokhorela Yehova aahiiso waakokhorela amuluku akina.
1 Ma 18:19-40 — Yehova aahimuruma profeta Eliya wooniherya wiira ale animukokhorela Muluku eekeekhai ahiireleke mpantta waakokhorela amuluku eethiru, ntoko omukokhorela Bayali.
Yehova oniwoonela sai amuluku eethiru ni okokhoreliwa waya?
Yehova oniwoonela sai atthu ale anihimya wiira animukokhorela yena, masi anipaka itthu soohiloka?
Yes 1:13-15; 1 aKo 10:20-22; 2 aKo 6:14, 15, 17
Soowiiraneya sa mbiibiliyani sa efaita yinceene:
Okh 32:1-10 — Mwaha wa okhanyereriwa ni aisarayeli akina, Aroni aahipaka elatarato ya mwaanyompe ni aahimurumeela wiira opake “nira nowatthapela Apwiya” aahiiso efesta ya Yehova, nto Yehova aahinanariwa vanceene.
1 Ma 12:26-30 — Mwene Yerobowamu khaaphavela wiira atthu amukokhoreleke Yehova otemplo oYerusalemu, nto aahipaka elatarato yaathoonyerya Yehova, nto eyo yaahiwiiriha atthu ale ottheka.
Yehova aalenle exeeni aisarayeli voohimya sa otakaahana ni atthu yaakokhorela amuluku akina?
Yehova aapanke exeeni okathi atthu awe yaatakiha aya soolema sa itiini sikina?
Mak 10:6, 7; Esa 106:35-40; Yer 44:2, 3
Soowiiraneya sa mbiibiliyani sa efaita yinceene:
1 Ma 11:1-9 — Mwaha wa waathela athiyana a ilapo sikina, mwene Salomoni aahinveeha Yehova, aahaakokhorela amuluku eethiru ni aahiwiiriha atthu akina opaka etthu emosaru.
Esa 78:40, 41, 55-62 — Asafi aahooniherya moota waakokhorela amuluku ethiru ni ohiiwelela wa aisarayeli waamuriipiha aya murima Yehova, nto eyo yaahimwiiriha Yehova onyanyala nloko nle.
Niireke Yesu aanikhaliherya soowiixuttiha sa itiini sahaavarihana ni Nuulumo na Muluku?
Soowiiraneya sa mbiibiliyani sa efaita yinceene:
Mat 16:6, 12 — Yesu aahilikanyiha soowiixuttiha sa afarisi ni asaduki ni eferemento, ntoko siisaale eferemento enipuhuwiha aya otthu wooweetheiwa, soowiixuttiha sowoothiwa sinnaakuva omwaramwareya, mpakha ohonona soowiixuttiha sooloka sa Nuulumo na Muluku.
Mat 23:5-7, 23-33 — Yesu aahaapwapwela vanceene alipa-oolepa ni afarisi mwaha wa wootha ni soowiixuttiha saya soohiloka.
Mar 7:5-9 — Yesu aahaapwapwela alipa-oolepa ni afarisi mwaha wootepexa ovaha efaita miyuupuwelo sa apinaatamu ohiya Nuulumo na Muluku.
Niireke Yesu aaphavela wiira atthareli awe akawanyeye ni yeetteleke itiini soovirikana?
Soowiiraneya sa mbiibiliyani sa efaita yinceene:
Yoh 15:4, 5 — Yesu aahirumeela mwiri wa evidera ophavelaka wooniherya wiira atthareli awe yaahaana wiiraana ni yena ni makristau makina.
Yoh 17:1, 6, 11, 20-23 — Ohiyu wookiserya aari awe ni arummwa awe ohinatthi wiiviwa, Yesu aahivekela wiira atthareli awe ekeekhai akhaleke oowiiraana.
Niireke makristau a okathi wa arummwa yaakupali itthu simosaru ni yaamukokhorela Yehova mwa enamuna emosaru?
Soowiiraneya sa mbiibiliyani sa efaita yinceene:
Mit 11:20-23, 25, 26 — Miloko sa wAntiyokiya ni oYerusalemu saari sowiiraana ni saavara hoothe.
aRo 15:25, 26; 2 aKo 8:1-7 — Miloko sinceene sa okathi wa arummwa saanooniherya ophentana sikhaliheryanaka okathi wa mixankiho, nto eyo yooniherya wiira saahiiraana vanceene.
Niireke Muluku onneemererya itiini sootheene siniihimya wiira sinnimwaami Kristu?
Akhala wiira etiini eyo khenitthara soowiixuttiha sa Yesu ni sa arummwa, niireke Muluku onneemererya etiini eyo?
Soowiiraneya sa mbiibiliyani sa efaita yinceene:
Mat 13:24-30, 36-43 — Orumeelaka nlikanyiho nla, Yesu aahiixuttiha wiira ntoko siisaale nthakathaka nannuwale aya ni omwaareela ematta yootheene, makristau manceene owootha yaamukela mmulokoni.
1 Yoh 2:18, 19 — Murummwa Yohani aahimmye wiira yaahikhumelela awanani anceene a Kristu wanikisa wa eseekulu yoopacerya.