Ekasamento
Ti pani okumihenrye ekasamento?
Ti pani mukristau okhanle awe oomuthanla wiira othelane?
Xeeni mukristau eekeekhai ahaarowa awe weemererya mwanawe omuthela aahiiso otheliwa ni mutthu ohiivaherenrye wa Yehova ni opatisiwa?
Soowiiraneya sa mbiibiliyani sa efaita yinceene:
Map 24:1-4, 7 — Abrahamu khaamweemerenrye mwanawe aihaniwa Isakhi omuthela muthiyana a oKanani, maana atthu a elapo ele yanaakokhorela amuluku eethiru. Nto hata uuluvanle, Abrahamu aahilakela omwaavyerya muthiyana aamukokhorela Yehova.
Map 28:1-4 — Isakhi aahimuleela mwanawe aihaniwa Yakobe omuthela muthiyana aamukokhorela Yehova ohiya omuthela muthiyana a oKanani.
Yehova onoonela sai okathi onimoona awe murumeyi awe omuthelaka aahiiso otheliwa ni mutthu ohinaamini?
Soowiiraneya sa mbiibiliyani sa efaita yinceene:
1 Ma 11:1-6, 9-11 — Yehova aahinanariwa vanceene mwaha woowi mwene Salomoni khaiwelenle Nlamulo, maana aahaathela athiyana a ilapo sikina, yaawo yaahapunxe murima awe wiira ohimukokhoreleke Yehova.
Ne 13:23-27 — Ntoko Yehova aananariwe awe, kuvernatoro Nehemiya aahinanariwa vanceene mwaha woowi aisarayeli akina yaahaathela athiyana a ilapo sikina yaawo yahaamukokhorela Yehova. Nto Nehemiya aahaapwapwela ni waattaruxa.
Xeeni vari aya vamiruku omuthela aahiiso otheliwa ni mutthu onimurumeela moororomeleya Yehova ni orina mweettelo wooloka?
Nave-tho munwehe aEef 5:28-31, 33.
Soowiiraneya sa mbiibiliyani sa efaita yinceene:
1 Sa 25:2, 3, 14-17 — Nnaamwi aari thaaciri, Nabali aari mutthu ootakhala murima, nto aahikhala mulopwana oothela oohiloka para Abigayili.
Mir 21:9 — Ohimuthanla saana mutthu ninrowa ahu othelana pooti ohonona murettele ahu ni ohakalala wahu.
aRo 7:2 — Murummwa Paulo ohimmye wiira okathi muthiyana onitheliwa awe, owo onihooleliwa ni iyawe, yoowo oyariwe orina ene etampi. Nto muthiyana a ankhili onnuupuwela oratteene ohinatthi omuthanla mutthu onrowa awe othelana.
Wiilokiherya ehinatthi ekasamento
Xeeni mulopwana onireerela awe oweha akhala wiira onoowerya ovahaka yoolya etthoko awe ohinatthi wuupuwela othela?
Yoowiiraneya ya mbiibiliyani ya efaita yinceene:
Mir 24:27 — Ohinatthi othela ni waayara anamwane, owo ohaana okhala mutthu onikhalela nthiti ovara muteko wiira ovaheke yoolya etthoko awe.
Xeeni makristau annamorari anireerela aya ophavelasa miruku sooloka ni osuwelana oratteene ohiya owehexexa makhalelo a owiitho a mutthu owo?
Soowiiraneya sa mbiibiliyani sa efaita yinceene:
Rut 2:4-7, 10-12 — Bowazi aahimusuwela oratteene Ruti onwehaka okathi aavara awe muteko, iiwaka itthu atthu oororomeleya yaahimya aya sa Ruti, oweha moota aathokorerya awe amusi awe ni aahoona wiira aanimphenta vanceene Yehova.
Rut 2:8, 9, 20 — Ruti aahimusuwela Bowazi owehaka oreera wawe murima, ovaha wawe ni omphenta wawe Yehova.
Xeeni Yehova oniphavela awe wiira ale annamorari akhalaneke mweettelo wooloka okathi annamorari aya ni onoivari?
Soowiiraneya sa mbiibiliyani sa efaita yinceene:
Mir 5:18, 19 — Inamuna sikina sa wooniheryana ophentana ti sa anamathelana paahi.
Nsi 1:2; 2:6 — Okathi makampusi ni mwali a oXulami yaanamorari aya, awo yaanirumeela inamuna sa wooniheryana ophentana saari sooloka, ohiya moolumo aahiiso inamuna sinooniherya orupihana woohiloka.
Nsi 4:12; 8:8-10 — Mwali a oXulami khaarupanne mutthu mukina ni aaniihiiha, nto owo aari ntoko exardim yootekeleliwa.
Xeeni anamathelana anireerela aya olepiha ekasamento aya moovarihana ni nlamulo?
Muritti wa mulopwana oothela
Muritti xeeni muulupale Yehova onvanhe awe mulopwana oothela?
Ntakiheryo xeeni mulopwana oothela onireerela awe otthara?
Xeeni mulopwana oothela onireerela awe wooniherya wiira onnimphenta mwaarawe ni onnisuwela itthu sinimuthowa ni moonelo awe?
Soowiiraneya sa mbiibiliyani sa efaita yinceene:
Map 21:8-12 — Nnaamwi Abrahamu aahaasiveliwe moonelo wa Sara, Yehova aahimuleela Abrahamu opaka ele Sara aahimmye awe.
Mir 31:10, 11, 16, 28 — Mulopwana a ankhili omuthenle muthiyana ookhomaala khonimakela owehaweha etthu mwaarawe onipaka awe nnakhala waavya soovonya sa mwaarawe, ohiya-vo, owo onnimuroromela ni onnimuttottopela.
aEef 5:33 — Moolumo ala a murummwa Paulo annooniherya wiira okhala wene muthiyana ootheliwa onniphavela osuwela akhala wiira onniphentiwa ni iyawe.
Muritti wa muthiyana ootheliwa
Muritti xeeni wa efaita yinceene Yehova onvanhe awe muthiyana ootheliwa?
Niireke muritti athiyana avahiwe aya ni Muluku onniwiiriha ohikhalana efaita?
Soowiiraneya sa mbiibiliyani sa efaita yinceene:
Mir 1:8; 1 aKo 7:4 — Yehova ohaavaha okhulupale vatthokoni athiyana ootheliwa ni aximaama.
1 aKo 11:3 — Murummwa Paulo ohimmye wiira ootheene ahu nihaana wiiwelela okhulupale, Muluku ahu oowerya sootheene paahi tohirina mukhulupale awe.
aHe 13:7, 17 — Mmulokoni, athiyana ni alopwana ahaana owiiwelela ale anihoolela.
Murokora otheliwe ni mulopwana ohinaamini onrowa omuhakalaliha sai Yehova?
Xeeni muthiyana ootheliwa onireerela awe omuttittimiha vanceene iyawe?
Yoowiiraneya ya mbiibiliyani ya efaita yinceene:
Map 18:12; 1 Pe 3:5, 6 — Sara aanimuttittimiha vanceene iyawe, owo ‘animwiirela pwiyaka’ hata mmuupuweloni.
Enamuna xeeni ya muthiyana ootheliwa Biibiliya onimuhimya awe wiira onnivaha ntakiheryo nooloka?
Soowiiraneya sa mbiibiliyani sa efaita yinceene:
Map 24:62-67 — Rebeka aanimukhaliherya iyawe aihaniwa Isakhi ophwanya nimaaliho nuumala okhweliwa maama awe.
1 Sa 25:14-24, 32-38 — Abigayili aahiwerya omukhapelela iyawe ootakhala murima ni atthu ootheene a etthoko awe, mwaha woowi moowiiyeviha aahirowa onvekela Davidi wiira ommorele ikharari.
Est 4:6-17; 5:1-8; 7:1-6; 8:3-6 — Pwiyamwene Esteeri aahileva okumi awe ikwaha piili wiira olavule ni iyawe, yoowo aari mwene. Owo aahipaka eyo mwaha woowi aaphavela waakhapelela atthu a Muluku.
Ophuka mixankiho
Malakiheryo xeeni anrowa waakhaliherya anamathelana ophuka mixankiho mukasamentoni mwaya?
Malakiheryo xeeni anrowa waakhaliherya anamathelana okhalana moonelo wooloka voohimya sa musurukhu?
Luk 12:15; aFi 4:5; 1 Ti 6:9, 10; aHe 13:5
Nave-tho nwehe mpantta oni: “Musurukhu”.