Epaphelo ya Nikhuuru Noolamulela

Anna ni arokora oophentiwa:

Omphenta wahu Muluku ni waaphenta wahu atthu, onniniiriha ‘orowa owiixuttiha atthu a ilapo sotheene ni waapatisa’. (Math. 28:19, 20; Mar. 12:28-31) Ophenta weekeekhai wookhalana ikuru. Waaphenta wahu atthu, onoowiiriha ‘ale arina murima wooloka waakhela okumi woohimala’. — Mit. 13:48.

Khalai, hiyo naalaleerya nirumeelaka moolumo naahenle ahu mmuru, ni naanaahiyerya atthu iliivuru. Masi vano, nihaana olokiherya moota nnaalaleerya ahu atthu. Okhala wiira nimphavela wooniherya wiira ninnaaphenta atthu, nto nihaana olavulaka myaha sinaasivela atthu awo. Eyo enitaphulela wiira nihaana okhala oolikana ene wiira niturukeke etthu naalokihenrye ahu, wiira nilavuleke itthu sinimuxankiha ni sinimusivela mutthu owo ninlavulana ahu. Nto ebroxuura ela, enrowa onikhaliherya sai opaka eyo?

Ebroxuura ela yookhalana soosoma 12, seiyo sinooniherya mikhalelo ninreerela ahu okhalana, wiira naaphenteke atthu ni naapakeke awiixutti. Khula yoosoma, yookhalana yoolepa aahiiso soolepa sa mBiibiliyani, seiyo sinooniherya mukhalelo Yesu aahiiso makristau oopacerya yoonihenrye aya, okathi yaalaleerya aya. Etthu eniphavela ahu, khahiyo ohela mmuru itthu ninrowa ahu olavula. Masi nihaana woona moota nikhanle ahu oowooniherya wiira ninnaaphenta atthu. Mikhalelo iya 12, sinnivareleya muteko okathi nniirela ahu mpantta inamuna soovirikana sa muteko ahu woolaleerya. Masi, ninrowa oweha mikhalelo kamosa-kamosa siniphaveleya vanceene okathi nimpacerya ahu ovaanela ni atthu, onitthikela ahu waaxukurya aahiiso okathi nnaasomiha ahu Biibiliya.

Okathi munisoma anyu khula mwaha, muupuweleke saana moota munrowa anyu wooniherya mukhalelo onilavuliwa yoosoma eyo, okathi munaalaleerya anyu atthu a mmuttettheni mwanyu. Nave mphaveleke wuncererya omphenta wanyu Yehova ni waaphenta wanyu atthu. Ophenta iwo, onimookhaliheryani owerya waapaka awiixutti, ovikana khula enamuna ya olaleerya mwaarowa anyu orumeela.

Mweekeekhai, eparakha yuulupale para hiyo, ovara muteko vamosa ni nyuwo. (Sof. 3:9) Ninvekela wiira Yehova ooreelihekeni vanceene, okathi muniimananiha anyu waaphenta atthu ni waapaka awiixutti!